بارەگەهێ بارزانی د بەیاننامەیەكێ دا ل دۆر كۆمبوونا سەرۆك مەسعود بارزانی ل گەل رەجب تەیب ئەردۆغان، سەرۆك كۆمارێ توركیا بەلاڤكر: ل هەولێرێ سەرۆك مەسعود بارزانی پێشوازی ل رەجەب تەیب ئەردۆغان، سەرۆك كۆمارێ توركیا كر و دگەلدا كۆمبوو.
هەروەسا بەلاڤكر» د كۆمبوونەكێدا سەرەدنا سەرۆك كۆمارێ توركیا و شاندێ دگەلدا بۆ بەغدا و تێكگەهشتن و رێككەفتنێن د ناڤبەرا ئیراقێ و توركیا دا ب گرنگ و دیرۆكی و فاكتەرێ گەشەپێدانێ و ئارامیێ هاتنە هەژمارتن».
دیاركر ژی» هەر د ئەوێ كۆمبوونێدا دوپاتی ل پێشڤەچوون و بەرفرەهبوونا پەیوەندیێن د ناڤبەرا ئیراقێ و هەرێما كوردستانێ و وەلاتێ توركیا هاتە كرن، ئەوژی ژ پێخەمەت ب هێزكرنا سەقامگیرییا هەرێمایەتی وهاریكاری و هەماهەنگییا هەڤپشك د بوارێن جۆراو جۆردا و ب هێزكرنا بنەمایێن هەڤسنۆریێ و پێشڤەبرنا پەیوەندیێن ئابۆری».

سەرۆكایەتییا هەرێما كوردستانێ راگەهاند: ئەردۆغانی بەردەوامییا پشتەڤانییا وەلاتێ خوە بۆ ئیراقێ و هەرێما كوردستانێ دوپاتكر و بەرهەڤییا وەلاتێ خوە بۆ هاریكارییا هەڤپشك و پێشڤەبرنا زێدەتر یا پەیوەندییان د هەموو بواراندا ل گەل ئیراقێ و هەرێما كوردستانێ نیشاندا .
هەروەسا دیاركر كو سەرۆك كۆمارێ توركیا داكۆكی ل پێدڤی و گرنگییا پاراستنا ئارامی و سەقامگیریێ ل دەڤەرێ و چارەسەركرنا كێشەیان و مسوگەركرنا مافێێن پێكهاتەیان كر.
سەرۆكایەتییا هەرێما كوردستانێ دیاركر ژی كو رێككەفتن و یاداشتێن تێكگەهشتنێ د ناڤبەرا ئیراقێ و توركیا دا و پاراستنا ئاسایشا سنۆری، بەرهنگاربوونا تیرۆرێ، دووماهی پێشهاتێن دەڤەرێ ب گشتی و چەند باس و بابەتێن جهێ گرنگییا هەردو ئالییان، تەوەرەكێ دی یێ كۆمبوونێ بوون.
دەقێ بەیاننامەیا سەرۆكایەتییا هەرێما كوردستانێ:
ل رۆژا دوشەمبی 22/4/2024 دچارچۆڤەیێ سەرەدانا خوە دا بۆ ئیراقێ، بەرێز رەجەب تەیب ئەردۆغان، سەرۆك كۆمارێ توركیا و شاندەكێ دگەلدا، گەهشتە هەرێما كوردستانێ و ل فرۆكخانەیا نێڤدەولەتییا هەولێرێ ژ ئالیێ بەرێزان نێچیرڤان بارزانی، سەرۆكێ هەرێما كوردستانێ، مەسرور بارزانی، سەرۆكێ حوكمەتا هەرێما كوردستانێ، قوباد تالەبانی، جێگرێ سەرۆكێ حوكمەتا هەرێمێ و هەژمارەكا وەزیران و بەرپرسێن بلند یێن هەرێما كوردستانێ پێشوازی لێ هاتە كرن.
پاشی د كۆمبوونەكێدا سەرەدانا سەرۆك ئەردۆغان بۆ بەغدا و دیدار و كۆمبوونێن وی ل گەل بەرپرسێن بلند یێن ئیراقا فیدرال، پەیوەندیێن توركیا ل گەل ئیراقێ و هەرێما كوردستانێ ب تایبەتی د بوارێ ئابۆری و بازرگانی و هاریكارییا ئەمنی، هاتنە گەنگەشەكرن.
د كۆمبوونێدا نێچیرڤان بارزانی خواستا هەرێما كوردستانێ بۆ پێشڤەبرنا پەیوەندیێن خوە ل گەل كۆمارا توركیا د هەموو بواراندا دەربڕی و دوپاتكر كو هەرێما كوردستانێ وەكو هەردەم دێ فاكتەرێ ئارامیێ و سەقامگیریێ بیت ل دەڤەرێ، هەروەسا سوپاسییا هاریكاری و پشتەڤانییا توركیا بۆ هەرێما كوردستانێ ل دەمێن دژوار دا، كر.
هەر د كۆمبوونێدا بەرێز مەسرور بارزانی، سەرۆكێ حوكمەتا هەرێما كوردستانێ دوپاتی ل بەرهەڤییا حوكمەتا هەرێما كوردستانێ بۆ پێشڤەبرنا پەیوەندییان و هاریكارییا هەڤپشك یا ئابۆری و بازرگانی ل گەل توركیا كر، هەروەسا باس ل دەلیڤەیێن كاری و وەبەرئێنانێ بۆ كۆمپانیێن توركی د هەموو بواراندا كر و سوپاسییا وان كر كو ل رەوشا دژوار یا ئابۆری دا ژی، بەردەوامی ب كار و ئەنجامدانا پڕۆژەیان دایە.
ژ ئالیێ خوەڤە سەرۆك ئەردۆغانی بەردەوامییا پشتەڤانییا وەلاتێ خوە بۆ ئیراقێ و هەرێما كوردستانێ دوپاتكر و بەرهەڤییا وەلاتێ خوە بۆ هاریكارییا هەڤپشك و پێشڤەبرنا زێدەتر یا پەیوەندییان د هەموو بواراندا ل گەل ئیراقێ و هەرێما كوردستانێ نیشاندا، هەروەسا داكۆكی ل پێدڤی و گرنگییا پاراستنا ئارامیێ و سەقامگیریێ ل دەڤەرێ و چارەسەركرنا كێشەیان و مسۆگەركرنا مافێن پێكهاتەیان كر.
رێككەفتن و یاداشتێن تێكگەهشتنێ د ناڤبەرا توركیا و ئیراقێدا، پاراستنا ئاسایشا سنۆری، بەرهنگاربوونا تیرۆرێ، دووماهی پێشهاتێن دەڤەرێ ب گشتی و چەند باس و بابەتێن جهێ گرنگییا هەردو ئالییان، تەوەرەكێ دی یێ كۆمبوونێ بوون.

حوكمەتا هەرێما كوردستانێ راگەهاند، شاندێ هەرێما كوردستانێ و سەرۆك كۆمارێ توركیا د هەڤڕابوون ل سەر ئەوێ چەندێ كو دڤێت كێشەیێن د ناڤبەرا بەغدا و هەولێرێدا ل سەر بنەمایێ دستووری بهێنە چارەسەركرن.
حوكمەتا هەرێما كوردستانێ د بەیاننامەیا خوە دا دبێژیت» هەردو ئالی د هەڤڕا بوون ل سەر گرنگییا پاراستنا ئاسایش و سەقامگیرییا دەڤەرێ و چارەسەركرنا كێشەیێن د ناڤبەرا حوكمەتا فیدرال و هەرێما كوردستانێدا ل سەر بنەمایێ دستووری، هەروەسا پێشڤەبرنا هەماهەنگی و هاریكارییا هەڤپشك دبوارێ پێشڤەبرنا پەیوەندیێن بازرگانی و وەبەرهێنانێدا».
ژ ئالیێ خوەڤە، مەسرور بارزانی، سەرۆكێ حوكمەتا هەرێما كوردستانێ د تویتەكێدا ل دۆر كۆمبوونێ ل گەل سەرۆك كۆمارێ توركیا بەلاڤكر» خوەشحالبووم كو دانوستاندنەكا بەرهەمدار ل دۆر پێشڤەبرنا پەیوەندیێن دو ئالییانە و كۆمەكا بابەتێن دەڤەرێ هاتە ئەنجامدان»

هەولێر، قائید میرۆ

پەرلەمانتارەكا فڕاكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند، پارتی یا رژدە ل سەر هەلوەستێ خوە بۆ راستڤەكرنا پڕۆسەیا سیاسی ل ئیراقێ و دبێژیت، پارتی رازینابیت ئیدی كورد بهێنە پشتگوهاڤێتن و ب سیاسەتێن شاش ئیراق بهێتە بڕێڤەبرن و بەر ب پاشەڕۆژەكا نەدیار بچیت، چونكە كورد پشكدارەكێ كارایە دحوكمەتا ئیراقێدا نەكو تنێ بۆ دیكۆری پشكدارە.
یادگار مەحموود، ئەنداما فڕاكسیۆنا پارتی دیموكراتی كوردستان ل جڤاتا نوونەرێن ئیراقێ بۆ رۆژنامەیا (ئەڤرۆ) گوت» هەموو حوكمەتێن پشتی پڕۆسەیا ئازادییا ئیراقێ هاتینە پێكئینان ل ئیراقێ كورد تێدا پشكداربووینە و ل سەر بنەمایێ رێكەفتنێن سیاسی حوكمەت ل ئیراقێ دهێنە پێكئینان، هەكە كوردان پشكداری د پێكئینانا حوكمەتێن ئیراقێدا نەكربا ئەڤە بێگومان هەڤكێشەیێن سیاسی دهاتنە گوهۆڕین وحوكمەت نەدهاتن پێكئینان، بەلێ مخابن ئەڤە شەش سالە دستوور دهێتە بنپێكرن، ب تایبەتی ئەو مادە و برگەیێن گرێدای هەرێما كوردستانێ، بڕینا پشكا بودجێ هەرێمێ و گیرۆكرنا دەركرنا قانوونا پەترۆل و غازێ ئێك ژوان ئاریشەیانە یێن كو ژئالیێ بەغدا ڤە هاتینە پەیداكرن بۆ هەرێما كوردستانێ، هەتا رێگری هاتییەكرن ل پێكئینا جڤاتا فیدڕالی، هەموو جاران ئالیێن سیاسی یێن ئیراقێ بۆ پێكئینانا حوكمەتێ و گەهشتن ب رێككەفتنێ سەرەدانا هەولێرێ دكر هەتا تنێ كورد رازیبین پشكداریێ دحوكمەتێن ئیراقێدا بكەن، كوردان ژی پشكدارییەكا كارا دخواست نەكو تنێ وەك دیكۆر بن د ناڤا حوكمەتا ئیراقێدا، مخابن نەكو ئیراق یا پێگیری رێككەفتنان نەبوویە بۆ دانا مافێن خەلكێ كوردستانێ، بەرۆڤاژی دژایەتییا هەرێما كوردستانێ ژی دهێتەكرن، ئەڤە ژی بۆ لاوازكرنا قەوارەیێ سیاسیێ هەرێما كوردستانێیە».
ئەڤێ پەرلەمانتارا پارتی زێدەتر گوت» ئاستەنگێن مەزن بۆ هەرێما كوردستانێ دهێنە دروستكرن، بەلێ هەلوەستێ ئەڤێجارێ یێ پارتی كارەكێ وەساكر ئیراق پێداچوونێ ب سیاسەتا خوەدا ل هەمبەری هەرێما كوردستانێ بكەت، چونكە پارتی دخوازیت پڕۆسەیا سیاسی ل ئیراقێ بهێتە راستڤەكرن و پارتی كار بۆ وێ چەندێ دكەت ئیراق ڤەگەڕیت بۆ رێكا راست كو ئەوژی ل ئیراقێ چەندین نەتەوە و پێكهاتە یێن تێدا هەین و دڤێت وەكهەڤی دسیاسەتا ئیراقێدا ل هەمبەری هەموو گەلێن ئیراقێدا هەبیت، نابیت جوداهی د ناڤبەرا چو پێكهاتەیاندا بهێتەكرن و نابیت خێرو بێرا ئیراقێ تنێ بۆ ئالییەكی یان پێكهاتەیەكی بتنێ بیت، كورد ژی وەكو هەڤپشكەكێ سەرەكی مفاداربیت ژ سامانێ ئیراقێ».
یادگار مەحموود ئاماژەكر» هەردەمێ پڕۆسەیا سیاسی ل ئیراقێ كەفتییە د مەترسیێدا تنێ ب پارتی هاتییە راستڤەكرن، پێنگاڤێن پارتی بۆ هەموو خەلكێ ئیراقێ و هەرێما كوردستانێ نە، ب تایبەتی سیاسەتا مەرجەعێ كوردستانێ سەرۆك بارزانی دێ ئیراقێ بەر ب ئاراستەكێ راست بەت، بلا هەموو خەلكێ هەرێما كوردستانێ و ئیراقێ بزانیت هەلوەست و سیاسەتا پارتی ئەوە ئیراقێ ژ قۆناغەكا تاری بەر ب قۆناغەكا رۆهن ببەت و پارتی چو جاران رێكێ نادەت كورد بهێنە پشتگوهاڤێتن ژئالیێ هندەك لایەنێن ئیراقی ڤەو مە هەلوەست و سیاسەتا پارتی دیت ل چەند سالێن بۆری كاریگەری ل سەر هەموو ئیراقێ هەبوویە، ب دیتنا پارتی یان دڤێت ئیراق یا هەموو مللەت و پێكهاتەیان بیت، یان ژی پارتی ئێدی دێ هەلوەست هەبن».

رەجەب تەیب ئەردۆغان، سەرۆككۆمارێ‌ توركیا پشتی دوهی ب سەرەدانەكا فەرمی گەهشتیە ئیراقێ‌ و ل گەل سەرۆككۆمار و سەرۆكوەزیرێن ئیراقێ‌ كۆمبووی، هەر دوهی سەرەدانا هەولێرێ‌ كر و ژ ئالیێ نێچیرڤان بارزانی، سەرۆكێ هەرێما كوردستانێ و مەسرور بارزانی سەرۆكێ‌ حكومەتا هەرێما كوردستانێ‌ ڤە ل فرۆكخانەیا هەولێرێ‌ پێشوازی لێ هاتەكرن و ل دووڤ دا ب بەرهەڤبوونا هەژمارەكا بەرپرسێن حكومی یێن هەرێما كوردستانێ‌ و توركیا كۆمبوونەكا بەرفرەه هاتە ئەنجامدان و چەندین پرسێن گرنگ گەنگەشە كرن.
هەر د سەرەدانا خۆ دا بۆ هەولێرێ‌، سەرۆككۆمارێ‌ توركیا ژ ئالیێ‌ سەرۆك مەسعود بارزانی ڤە پێشوازی لێ‌ هاتە كرن.
سەرۆك بارزانی ل دۆر سەرەدانا سەرۆككۆمارێ‌ توركیا راگەهاند، خۆشحال بووم ل كوردستانێ‌ من پێشوازی ل رەجەب تەیب ئەردۆغان، سەرۆككۆمارێ‌ توركیا كری و مە باسێ‌ رێكێن هەماهەنگیا بەردەوام ژ پێخەمەت بەرژەوەندیێن گەلێ‌ كوردستانێ‌ و توركیا كر.
هەروەسا سەرۆككۆمارێ‌ توركیا د سەرەدانا خۆ دا بۆ ئیراقێ‌ ل گەل بەرپرسێن ئیراقێ‌ 26 رێككەفتن و لێكتێگەهشتن ئیمزاكرن.

سەرۆك بارزانی ل سالڤەگەرا 126 یا دەرچوونا ئێكەم رۆژنامەیا كوردی كو یا هەڤدەم رۆژا رۆژنامەڤانییا كوردی و سالڤەگەڕا دامەزراندنا سەندیكا رۆژنامەڤانێن كوردستانێیە، د پەیامەكێدا پیرۆزباهی ل رۆژنامەڤان و میدیاكارێن كوردستانێ كر.
سەرۆك بارزانی د پەیاما خوە دا گۆت» ئەركەكێ پیرۆز و هەستیار یێ ل سەر ملێ رۆژنامەڤان و میدیاكاران كو پێكدهێت ژ پێدانا پێزانینان و هشیاری و ئاراستەكرن و پێشئێخستنا جڤاكییە. ب ئەڤێ هەلكەفتێ من داخوازییەك ژ رۆژنامەڤان و میدیاكارێن خوەشتڤی یێن كوردستانێ یا هەی، ئەركێ خوە ب شێوەیەكێ پیشییانە بۆ گەهاندنا راستییان و هەروەسا ژ پێخەمەت ب هێزكرنا فەرهەنگ و هشیارییا جڤاكی و وەلاتییان بجهبینن».
سەرۆك بارزانی ب پێدڤی زانی» راگەهاندكار و رۆژنامەڤانێن كوردستانێ هەردەم ل بیر بیت كو میدیا و رۆژنامەڤانی ئامرازێن كاریگەرن بۆ دانەنیاسینا دۆزا رەوا یا گەلێ مە و بەرگریكرن ژ ناسنامە و مافێن گەلێ كوردستانێ و د هەمان جەمدا ئامرازن بۆ پاراستنا بهایان و ب هێزكرنا فەرهەنگا ئاشتیخوازیێ و پێكڤەژیانێ و مرۆڤدۆستیێ د ناڤ خەلكیدا».
ل دووماهییا پەیاما سەرۆك بارزانی دا هاتییە» سالڤەگەرا رۆژنامەڤانییا كوردی پیرۆز بیت و هیڤییا سەركەفتنێ بۆ هەموو رۆژنامەڤانێن كوردستانێ دخوازم».

سەرۆكێ هەرێما كوردستانێ پشتەڤانییا خوە یا تمام بۆ رۆژنامەڤانان و ئازادییا رۆژنامەڤانیێ و رادەربڕینێ دیاركر و داخواز ژ رۆناڤەنان كر پێگیری قانوونا كارێ رۆژنامەڤانیێ بن.
دوهی دوشەمبی 22/4/2024، نێچیرڤان بارزانی، سەرۆكێ هەرێما كوردستانێ د پەیامەكێدا ب هەلكەفتا سالڤەگەرا 126 یا رۆژا رۆژنامەڤانییا كوردی و دەرچوونا ئێكەم رۆژنامەیا (كوردستان) ژ ئالیێ (میر میقداد بەدرخان) و سالڤەگەرا 26 یا دامەزراندنا سەندیكا رۆژنامەڤانێن كوردستانێ ب گەرمی پیرۆزباهی ل هەموو رۆژنامەڤانێن كوردستانێ كر و هیڤییا سەركەفتنێ بۆ خواست.
نێچیرڤان بارزانی د پەیاما خوە دا گوت» ب ئەڤێ هەلكەفتێ، داكۆكیێ ل ژێنگەها هاندەر بۆ كارێ میدیایی، كارئاسانی بۆ دەستكەهشتنا رۆژنامەڤانن ب ژێدەرێن پێزانینان بێی جوداهی و دووركەفتن ژ سەپاندنا سانسۆرێ ل سەر ئەوان دكەم بۆ ئەوێ چەندێ رۆژنامەڤان بەرپرسیارانە رۆلێ پێشەییێ خوە د چاڤدێریكرنا دەزگەهان و بلندكرنا ئاستێ هشیارییا خەلكی و دروستكرنا رایا گشتیدا ببینن و ببنە فاكتەر و هەڤكارێن گرنگ د پڕۆسەیا ئاڤاكرن و گەشەپێدانا دیموكراسیێدا».
سەرۆكێ هەرێما كوردستانێ ئاماژە ب ئەوێ چەندێ ژی كر» د دەمەكیدا پشتەڤانییا خوە یا تمام بۆ رۆژنامەڤانان و باوەرییا من ئازادییا رۆژنامەڤانی و رادەربڕینێ وەكو بنەمایەكێ سەرەكیێ هەر جڤاكەكێ دیموكرات و ئازادیخواز دوپات دكەم، داخوازێ ژ رۆژنامەڤانان دكەم پێگیری قانوونا كارێ رۆژنامەڤانیێ و ئەتەكێتا رۆژنامەڤانی بن ژ راستگویی، هەڤسەنگی، بێلایەنی، دووركەفتن ژ دەنگوباسێ سەختە و زمانێ زڤر، هەروەسا هاندەرێن پاراستنا ئاشتییا جڤاكی و سەقامگیرییا سیاسی و پارێزەرێن بەرژەوەندییا بلند یا گەل و نیشتمانی بن».
سەرۆكێ هەرێما كوردستانێ رۆلێ رێكخراوێن ناڤخوەیی و نێڤدەولەتی یێ تایبەت ب چاڤدێریكرنا رەوشا ئازادییا رۆژنامەڤانی و رادەربڕینێ ل هەرێما كوردستانێ ب بلند هەلسەنگاند و دوپاتكر» دڤێت ئالیێن پەیوەندیدار ب گۆڕەی قانوونا رۆژنامەڤانی ل هەرێما كوردستانێ رەفتارێ ل گەل هەر كەیسەكا بوارێ رۆژنامەڤانیێدا بكەن».
د دووماهییا پەیاما خوە دا، نێچیرڤان بارزانی گوت» سلاڤ ل رۆژنامەڤانێن شەهید و ئەو رۆژنامەڤانێن پێشەنگ ل سەردەمێ شۆڕەشێ و ئازادیێدا كو ژیانا خوە بۆ گەهاندنا راستیێ و پێشئێخستنا رۆژنامەڤانیێ كوردستانێ تەرخانكری» .

سەرۆكێ حوكمەتا هەرێما كوردستانێ بۆ رۆژنامەڤان و راگەهاندكارێن كوردستانێ دوپات دكەت و ب پێدڤی ژی دزانیت، میدیاكارێن كوردستانێ، هەردەم ل بەرەیێ نیشتمانیدا بن.
دوهی دوشەمبی 22/4/2024، مەسرور بارزانی، سەرۆكێ حوكمەتا هەرێما كوردستانێ د پەیامەكێدا ل سالڤەگەرا رۆژا رۆژنامەڤانییا كوردی و دەرچوونا ئێكەم هەژمارا رۆژنامەیا (كوردستان) ژ ئالیێ میر میقداد مەدحەت بەدرخان و سالڤەگەرا دامەزراندنا سەندیكا رۆژنامەڤانێن كوردستانێ، پیرۆزباهی ل هەموو رۆژنامەڤانێن كوردستانێ كر و هیڤییا سەركەفتنێ بۆ خواست.
د پەیاما سەرۆكێ حوكمەتا هەرێما كوردستانێ دا هاتییە» جهێ خوەشحالیێ و شانازیێیە كو راگەهاندكار ل هەرێما كوردستانێ و ل بن سیبەرا حوكمەتا هەرێما كوردستانێ، ب ئازادی و بێی هیچ سانسۆرەكی، كارێ خوە یێ پیشەیی دكەن و تمام د ئازادن د رەخنەگرتن و باسكرنا پێشێلكارییان و كێماسیێن حوكمەتێ. حوكمەت ژی وەكو هەردەم هاریكارا رۆژنامەڤان و راگەهاندكارێن كوردستانێ دڤێت بۆ ئەوێ چەندێ ب هاریكارییا هەموو ئالییەكی، بشێین كوردستانێ د هەموو بواراندا، بەر ب قۆناغەكا پێشكەفتیتر ببەین».
سەرۆكێ حوكمەتا هەرێما كوردستانێ ئاماژە ب ئەوێ چەندێ ژی كر» هیڤیدارم ئارمانجا سەرەكییا راگەهاندكارێن كوردستانێ گەهاندنا راستییان و پێشئێخستنا كوردستانێ و خزمەتكرنا خەلكی و داكۆكیكرن ژ مافێن گەلێ كوردستانێ و پاراستن و گەشەپێدانا قەوارەیێ دستووریێ هەرێما كوردستانێ بیت».
سەرۆكێ حوكمەتا هەرێمێ ب پێدڤی زانی» میدیاكارێن كوردستانێ، هەردەم ل بەرەیێ نیشتمانیدا بن و رێكێ نەدەن ب ناڤێ رۆژنامەڤانیێ، سڤكایەتی ل بهایێن نیشتمانی و بەرژەوەندیێن بلند یێن خەلكێ كوردستانێ بهێتە كرن و نابیت زمانێ زڤر و دیاردەیا نەشرین یا ناڤزراندنا خەلكی بهێتە بكارئینان».
ل دووماهییا پەیاما مەسرور بارزانی هاتییە» رۆژا رۆژنامەڤانییا كوردی پیرۆز بیت و ب ئەڤێ هەلكەفتێ، هەموو پشتەڤانییا خوە و حوكمەتا هەرێما كوردستانێ بۆ كارێ راستەقینەیێ رۆژنامەڤانیێ و ئازادییا رادەربرینێ ل هەرێما كوردستانێ دوپات دكەم».

سەرۆكێ هەرێما كوردستانێ راگەهاند: سەرەدانا سەرۆكێ توركیا بۆ ئیراقێ و هەرێما كوردستانێ ئاماژەیە بۆ پەیوەندیێن ب هێز د ناڤبەرا هەرێما كوردستانێ و ئیراقێ ل گەل توركیا.
نێچیرڤان بارزانی، سەرۆكێ هەرێما كوردستانێ د پۆستەكیدا ل تۆرا جڤاكییا ئێكس بەری سەرەدانا چاڤەرێكرییا سەرۆكێ توركیا بۆ هەرێما كوردستانێ بەلاڤكر» سەرەدانا دیرۆكی یا سەرۆك ئەردۆغانی بۆ بەغدا و هەولێرێ د دەمەكێ هەستیار ل دەڤەرێ دهێت».
نێچیرڤان بارزانی باس ل ئەوێ چەندێ كر» سەرەدان ئاماژەیە بۆ پەیوەندیێن ب هێز یێن سیاسی، ئابۆری و ئەمنی یێن ئیراقێ و هەرێما كوردستانێ ل گەل توركیا».
هەروەسا گوت» چاڤێ من ل ئەوێ چەندێیە ل هەولێرێ پێشوازیێ ل سەرۆك ئەردۆغانی بكەم بۆ گەنگەشەكرنا پرسێن گەرم ژ ئەوان ژی ئاشتی، سەقامگیری و گەشەیا ئابۆری».

مەسرور بارزانی، سەرۆكێ حوكمەتا هەرێما كوردستانێ راگەهاند: ل هەرێما كوردستانێ كارێ میدیایی ب تمامی یێ ئازادە و حوكمەتا هەرێما كوردستانێ یا پێگیرە ب پەیداكرنا ژینگەهەكا گونجای بۆ كارێ رۆژنامەڤانی و ئازادییا رادەربڕینێ د چارچۆڤەیێ قانوونێدا.
دوهی دوشەمبی 22/4/2024، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ دیدارا نێڤدەولەتییا هەولێرێ بۆ كارێ رۆژنامەڤانی بڕێڤەچوو كو ژ ئالیێ سەندیكا رۆژنامەڤانێن كوردستانێ و فیدراسیۆنا نێڤدەولەتییا رۆژنامەڤانان ڤە هاتبوو رێكخستن.
د دیدارێدا كو یا هەڤدەم بوو ل گەل سالڤەگەرا رۆژنامەڤانییا كوردی و سالڤەگەرا دەرچوونا رۆژنامەیا كوردستان و سالڤەگەرا دامەزراندنا سەندیكا رۆژنامەڤانێن كوردستانێ، سەرۆكێ حوكمەتا هەرێما كوردستانێ د پەیڤەكێدا د ئەوێ دیدارێدا ئاماژە ب ئەوێ چەندێ كر كو ل هەرێما كوردستانێ، كارێ میدیایی ب تمامی یێ ئازادە و حوكمەتا هەرێما كوردستانێ یا پێگیرە ب پەیداكرنا ژینگەهەكا گونجای بۆ كارێ رۆنامەڤانی و ئازادییا رادەربڕینێ د چارچۆڤەیێ قانوونێدا.

دەقێ پەیڤا سەرۆكێ حوكمەتا هەرێما كوردستانێ:
خوەشحالم د ئەڤێ دیدارا رۆژنامەڤانیدا ل گەل هەوەیێن بەرێز پشكداربم. ب تایبەتی ب خێر هاتنا هەموو ئەوان رۆژنامەڤان و راگەهاندكارێن بەرێز دكەم كو ژ وەلاتێن جیهانێ هاتین بۆ پشكداریكرنێ د ئەڤێ دیدارێدا. هیڤییا سەركەفتنێ بۆ دخوازم و ئومێدەوارم ئەنجام و راسپاردەیێن ئەڤێ دیدارێ، د خزمەتا پێشئێخستنا كارێ رۆژنامەڤانیدا بیت.
هەروەسا ب هەلكەفتا رۆژا رۆژنامەڤانییا كوردی و سالڤەگەرا دامەزراندنا سەندیكا رۆژنامەڤانێن كوردستانێ، گەرمترین پیرۆزباهییان ئاراستەی هەموو رۆژنامەڤانێن كوردستانێ دكەم و هیڤییا سەركەفتنێ و پێشكەفتنێ بۆ دخوازم.
حوكمەتا هەرێما كوردستانێ هەردەم ب رێز و پێزانینڤە دنێڕیتە رۆلێ گرنگێ رۆژنامەڤانان و پیشەییا رۆژنامەڤانیێ كو ب شێوەیەكێ پیشەییانە و بەرپرسیارانە ئەرك و پەیامێن راستەقینە یێن خوە د چارچۆڤەیێ قانوونێن بەركار و ئیتیكا رۆژنامەڤانی و پێڤەرێن نێڤدەولەتی بگەهینن، ب تایبەتی د بوارێ هشیاركرنا جڤاكی و گەهاندنا پێزانینێن راست و دروست و دەستنیشانكرنا كێماسییان و پێشێلكارییان و پشتەڤانیكرنا پڕۆسەیا چاكسازیێ, ب ئەڤی شێوەیی ژی راگەهاندكار وەكو دەستهەلاتا چاری، دێ هاریكارێن گرنگن بۆ دەزگەهێن دەزگەهێن حوكمەتێ و پێكڤە كاری بۆ پێشئێخستنا جڤاكی و بەر ب پێشڤەبرنا وەلاتی دكەن.
ل هەرێما كوردستانێ كارێ میدیایی ب تمامی یێ ئازادە و حوكمەتا هەرێما كوردستانێ یا پێگیرە ب پەیداكرنا دەلیڤە و ژینگەهەكا گونجای بۆ كارێ رۆژنامەڤانیێ و ئازادییا رادەربڕینێ د چارچۆڤەیێ قانوونێدا.
جهێ خوەشحالیێیە كو هەرێما كوردستانێ خودانا قانوونەكا پێشكەفتییا رۆژنامەڤانیێیە و ژئەگەرێ وێ، كارێ رۆژنامەڤانی و ئازادییا رادەربڕینێ ل هەرێما كوردستانێ، گەشەیەكا گەلەك باش كریە.
ئازادییا رۆژنامەڤانی ل هەرێما كوردستانێ، گەهشتییە ئاستەكی كو نەخەزێن هەرێما كوردستانێ بەردەوام د بزاڤێن خراب بكارئینانا ئەوێ ئازادیێ نە كو ل دەڤەرێ یا كێم وێنەیە، ئەڤە ژی بۆ لێدانا بنەمایێن دیموكراسی و قەوارەیێ هەرێما كوردستانێ كو ب ناڤێ رۆژنامەڤانیێ، خەلكەك دژایەتییا هەرێما كوردستانێ دكەن.
داخوازێ ژ رۆژنامەڤانێن بەرێز و سەندیكا و رێكخراوێن تایبەت ب رۆژنامەڤانان ڤە، كو رێكێ نەدەن ئەڤ پیشەیا گرنگ، ببیتە سەگۆیەك بۆ ب خراب بكارئینانائازادییا راگەهاندنێ و رادەربڕینێ.
دەستخوەشیێ ل لیژنەیا جێندەرییا فیدراسیۆنا نێڤدەولەتییا رۆژنامەڤانان دكەم بۆ هەلبژارتنا هەولێرێ بۆ ئەنجامدانا ئەڤێ دیدارێ. هیڤیدارم ئەڤ پێنگاڤە ببیتە دەلیڤەیەك بۆ ئەنجامدانا كار و پڕۆژەیێن هەڤپشك ل گەل سەندیكا رۆژنامەڤانێن كوردستانێ.
سەبارەت بابەتێ سەرەكیێ ئەڤێ دیدارێ ژی، كو تایبەتە ب پاراستنا ئافرەتێن رۆژنامەڤان ژ جوداكارییا رەگەزی و جێندەری، حوكمەتا هەرێما كوردستانێ یا بەرهەڤە بۆ هەماهەنگی و هاریكارییا پێدڤی ل گەل سەندیكا رۆژنامەڤانان و هەموو ئالیێن پەیوەندیدار بۆ نەهێلانا هەموو كێشە و ئاستەنگان ل پێشبەرییا ئافرەتێن رۆژنامەڤان و نەهێلانا هەموو جۆرە توندوتیژی و جوداكارییەكێ كو ل بەرامبەر ئەوان دهێتە كرن. سەبارەت ئەڤێ چەندێ هەر چ یا پێدڤی بیت ل سەر حوكمەتا هەرێمێ دێ ئەنجام دەت بۆ ب دووماهیئینان ب هەموو ئاستەنگێن ل پێشبەری ئافرەتێن رۆژنامەڤان بۆ ئەوێ چەندێ بشێن ئەركێن خوە ب شێوەیەكێ پیشەییانە ئەنجام بدەن.