ئەڤرۆ نیوز:
سەرۆکێ ئەمریکا دۆنالد ترەمپی د کۆنگرەکێ رۆژنامەڤانی دا راگەهاند: دێ وەلاتیێن ئەمریکا ژ قەیرانا ئابووری پارێزین، چونکی کارێ مە یێ گرنگ پاراستنا وەلاتیێن ئەمریکایە، دێ ل حەفتیێن بهێن سەرکەفتنا تاقیکرنا چارەسەریا کۆرۆنا یێ راگەهینین.
دۆنالد ترەمپی گۆت ژی: پێنگاڤێن چارەسەریا ڤایرۆسێ کۆرۆنایێ بەرەڤ پێشڤەچووینە و دێ ل حەفتیێن بهێن دا سەرکەفتنا وێ چارەسەریێ وێ راگەهینین، چونکی کارێ هەرە گرنگێ یێ وان پاراستنا وەلاتیێن ئەمریکایە.
ئەڤرۆ نیوز:
ب راسپاردە و فەرمانا مەسرور بارزانی سەرۆکێ حوکمەتا هەرێما کوردستانێ، سوبەهی ئەیینێ 2020/3/20 شاندەکێ حکومەتا هەرێما کوردستانێ ب سەرۆکاتیا وەزیرێ نافخۆ رێبەر ئەحمەدی ژ بۆ جێبەجێکرنا رێنمایی و رێکارێن روو ب رووبوونا ڤایرۆرسێ کۆرۆنا یێ دێ سەرەدانا پارێزگەها دهۆکێ کەت.
هەروەسا ب بریارا سەرۆکێ حکومەتا هەرێمێ ، گۆژمێ دو ملیار دینار ژی وەکو هاریکاری بۆ زیانلێکەفتیێن لەهیان ل دهۆک و زاخۆ دێ هێنە مەزاختن.
ئەڤرۆ نیوز:
نێچیرڤان بارزانی، سەرۆکێ هەرێما کوردستانێ ب تەلەفۆنێ پەیوەندی ب فەرهاد ئەترووشی پارێزگارێ دهۆکێ کریە بۆ لێپرسینا رەوشا زیانلێکەفتیێن لەهیێن پارێزگەها دهۆکێ و ملیارەکا دیناران بۆ دهۆکێ تەرخان دکەت.
ئەڤرۆ پێنجشه‌مبی 19-3-2020 د په‌يوه‌نديه‌كا ته‌له‌فۆنی دا ل گه‌ل فه‌رهاد ئه‌ترووشى، پارێزگارێ دهۆكێ، نێچيرڤان بارزانى سه‌ره‌خۆشى و هەڤخەمێن خوە بۆ خێزان و كه‌سوكارێن وان دو قوربانيێن ژ ئه‌نجامێ لەهیان ل سنوورێ پارێزگا دهۆکێ ل سێمێلێ و زاخۆ گيانێ خوە ژ ده‌ست داین دەربریە.
لدووڤ راگەهاندنا سەرۆکاتیا هەرێما کوردستانێ، نێچیرڤان بارزانی پشتگيریا خوە بۆ كارێ سازیێن په‌يوه‌ندیدار بۆ ل تانا‌چوونا لێقه‌ومیان دووپاتكریه و بريار دایە وه‌كو هاوكاريه‌كا بلەز گۆژمێ (ئێک مليار دينار) ژ سه‌رۆكاتیا هه‌رێما كوردستانێ، پێشكێشی ئيدارا پارێزگەها دهۆكێ بکەت.
ئەڤرۆ نیوز:
وەزارەتا ساخلەمیا عیراق راگەهاند، د 24 دەمژمێرێن بوری دا ١١ حالەتێن نوو یێن توشبوون ب کۆرۆنا یێ ل پاریزگەهێن بەغدا و نەجەف و بەسرا و دیوانیە و موسەنا و واست و کەربەلا هاتینە تۆمار کرن.
وەزارەتا ساخلەمیا عیراقێ گۆتیە ژی، ئەڤرۆ پێنجشەمبی ١٩ ئادارا ٢٠٢٠ ، ئەنجامێن پشکنینان بۆ ١٢٣ کەسان هاتینە کرن و تێدا دەرکەفتیە کو پشکنینا ١١ کەسان پۆزەتیف بوویە.
دیار کریە ژى، سێ حالەت ژ وان ل رەسافە و حالەتەک ل باژارۆکێ نۆشداریێ بەغدا، دو حالەت ل کەربەلا، ل نەجەف و دیوانیە و بەسرا و موسەنا و واست حالەتەک لێ هاتیە تۆمار کرن.
ئەڤرۆ نیوز:
ئاسایشا هەولێرێ ئاشکرا دکەت، کو ئێک ژ پاسەوانێن وەزیرێ بەرێ یێ دارایی یێ هەرێمێ سیخوری کریە و پشتی دەستەسەرکرنا وی دانپێدان ب کارێ خوە کریە.
ئاسایشا هەولێرێ بەلاڤ کریە: ر.ر.م کو پاسەوانێ وەزیرێ دارایی د کابینا هەشتێ یا حکومەتا هەرێما کوردستانێ دا بوویە، ل دەمێ ئەرکێ خوە یێ فەرمی دا ل ژێر سەرپەرشتی و رێنمایێن دەزگەهێ زانیاریان کارێ سیخوریێ ئەنجامدایە.
هەروەسا گۆتیە: سیخوری بۆ بەرژەوەندیا لایەنەکێ بیانی ل سەر حکومەتا هەرێما کوردستانێ، بەرژەوەندیێن گەلێ کوردستانێ، وەزارەتا دارایی و خودێ وەزیرێ دارایی ژی ئەنجامدایە، پشتی کو بەلگێن سەلماندی کەفتینه بەردەست ب فەرمانی دادوەری هتیە دەستگیر کرن و دانپێدان ب هەموو کارێن خوە یێن سیخوری کریە، هەموو هوورکاری ل بەر دەستێ دادوەرێ ڤەکولینێ دانە.
ئەڤرۆ نیوز:
حاکم ئازاد حەمە ئەمین نەقیبێ سەندیکا رۆژنامەڤانێن کوردستانێ راگەهاند کو نها بابەتێ کۆرۆنا بوویە ئاریشەکا مەزن ل هەموو جیهانێ، ژ بەر هندێ ژی پێدڤیە دەزگەهێن راگەهاندنێ ب بەرپرسیاری سەرەدەریێ ل گەل رەوشا نها بکەن.
نەقیبێ سەندیکا رۆژنامەڤانێن کوردستانێ ئەو یەک ژی دیار کر کو مخابن هندەک دەزگەهێن راگەهاندنێ بەرۆڤاژی هندێ کار دکەن و ب بەلاڤکرنا هندەک بابەتان ترس ل دەف وەلاتیان دروست کرینە، وەکو سەندیکا رۆژنامەڤانان دێ ل دۆر ڤی بابەتی داخۆیانیەکا فەرمی ژی بەلاڤ کەن.
ئه‌ڤرۆ نیۆز، عه‌زیز هه‌ورامی:
به‌ڕێوه‌به‌رایه‌تی گشتی ته‌ندروستی هه‌ڵه‌بجه، له‌گه‌ڵ كۆنسوڵییه‌تی كۆماری چین له هه‌رێمی كوردستان ڕێكه‌وتنێكی به‌به‌های، نزیكه‌ی 85 هه‌زار یۆرۆ ئیمزاكر، بۆ كردنه‌وه‌ی هۆڵێكی گه‌وره‌ی له دایكبوون به‌ته‌واوی ئامێره پزیشكییه سه‌رده‌مه‌كان بنیات ده‌نێ.
ئازاد مسته‌فا به‌ڕێوه‌به‌ری گشتی ته‌ندروستی پارێزگای هه‌ڵه‌بجه، به ئه‌ڤرۆ نیۆز ڕاگه‌یاند، ئه‌مڕۆ پێنچشه‌م به‌ڕێوه‌به‌رایه‌تی ته‌ندروستی هه‌ڵه‌بجه له دیوانی پارێزگای سلێمانی، ڕێكه‌وتنێكی ته‌ندروستیمان له‌گه‌ڵ كۆنسوڵییه‌تی وڵاتی چین ئیمزاكرد، نزیكه‌ی به‌به‌های 85 هه‌زار یۆرۆ، بۆ كردنه‌وه‌ی هۆڵێكی گه‌وره‌ی له دایكبوون له هه‌ڵه‌بجه به ته‌واوی ئه‌جیزه پزیشكییه‌كان.
هه‌روه‌ها وتی، ته‌واوی ئامێره پزیشكییه‌كان له لایه‌ن كۆمپانیاكانی كۆماری چیك دابین ده‌كرێن پاش ئه‌وه‌ی قبووڵ ده‌كرێن ده‌بێت، له ماوه‌ی 90 ڕۆژدا ته‌واوی ئامێره پزیشكییه‌كان بگاته هه‌ڵه‌بجه.
ئاواژه‌ی بۆ ئه‌وه‌شكرد، به ته‌واوبونی ئه‌و پڕۆژه‌یه هه‌ڵه‌بجه ده‌بێته خاوه‌نی هۆڵێكی له‌دایكبوونی مۆدێرن به ئه‌جیزه‌ی پێشكه‌وتوی ته‌ندروستیی.
حكوومه‌تی هه‌رێمی كوردستان له‌گه‌ڵ ده‌ست به‌كاربوونی كابینه‌ی 9 گرنگی تایبه‌تی به كه‌رتی ته‌ندروستی داوه، شاره‌زایانی پزیشكی ئاماژه به‌وه ده‌ده‌ن كوردستان له كه‌رتی ته‌ندروستی هه‌نگاوی گه‌وره‌ی به‌رو پێشه‌وه‌ناوه.
ئەڤرۆ نیوز:
تیمێن ساخلەمیێ بەردەوام دووڤچوونا گۆمانڵێکریێن ڤایروسێ COVID-19 دکەن و هەر گومانلێکریەک هەبیت دهێتە کەرەنتیکرن و پشکنین بو دهێنە کرن.
بو ڤێ چەندێ ژی نەخۆشەک ژیێ وی 50 سالە کو ژ وەلاتێ ئەلمانیا ڤەگەریایە، پشتی پشکنین بو هاتینە کرن ئەنجامێ وی پوزەتیڤ دەرچوویە و نوکە یێ دنەخۆشخانێ دا و رەوشا وی یا ساخلەمیێ یا باشە و وەلاتیێن پارێزگەهێ پشتراست دکەین دێ بەردەوام د کاری دابین بو پاراستنا ساخلەمیا وەلاتیان.
هیڤیدارین ژ وەلاتیان پێگیریێ ب رێنمایێن لیژنا بلند یا بەرهنگاریا کۆرۆنایێ بکەن.
رێڤەبەریا گشتی یا ساخلەمیا پارێزگەها دهۆکێ
ئەڤرۆ نیوز،عەلی حاجی :
د داخویانیەکێ دا ئەندامەکێ لژنا هەڤپشک ل زاخۆ بۆ ئەڤرۆ نیوز دیار کر ل سنورێ قەزا زاخۆ دو نانپێژ و خارنگەهەک و جهەکێ سەر ژێکرنا ئاژەلان کو ب نەیاسایی کار دکرن هاتنە سزادان و داخستن.
زێدەتر دکتور لاوین هابیل گۆت : ژبەر نەبوونا دەستویریا کاری ل دەف نانپێژەکی ل زاخۆ بۆ ماوەیێ هەشت رۆژان هاتە داخستن و ب کوژمەیەکێ پارەی ژی هاتە سزادان و هەر دیسان نانپێژەک ژی ل ناحیا دەرکارێ هاتە سزادان ب کوژمەیەکێ پارەی و داخستن ژبەر کو گەلەکا پیس بوو،زێدەباری وێ چەندێ ژی خارنگەهەک ل سەنتەرێ باژێرێ زاخۆ هاتە داخستن و سزادان ب کوژمەیەکی ژبەر کو هندەک تشتێن پیس دناڤ خارنەکا وان دا هات بوو دیتن و دیسان ژی ل لێنانگەهێ ژی هندەک زیندەوەر ژی هات بوونە دیتن ژبەر ڤێ چەندێ مە ئەو سزایە دانا بەر،هەر دیسان ل زاخۆ کەسەکێ ب نەیاسایی دناڤ جهەکێ خودان کرنا تەرش و تەوالی رادبوو ب سەرژێکرنا تەرش و کەوالی و هیچ مەرجەکێ تەندروستی تێدا نەبوو و هەر دیسان بێهنەکا گەلەک نەخوەش ژێ دهات .
و گۆت ژی : ئەو جهە بۆ ماوەیێ زێدەتری هەشت رۆژان هاتە داخستن و ب کوژمەیێ ٥٠٠ هزار دیناران ژی هاتە سزادا من و کەیسێ وی ژی بۆ جهێن ئەمنی هاتە رەوانە کرن ژبەر کو نابیت ب چو رەنگان ل وان جهان تەرش و تەوال بهێنە سەر ژێکرن.
ئەڤرۆ نیوز:
د راپۆرتەکا فەرمی یا حوکمەتا ئیتالیا دا هاتیە، ٩٩٪ یا وان کەسێن ژبەر کۆرۆنا یێ ژیانا خۆ ژ دەستداین نەخۆشیەکا دی ل گەل دا هەبوویە و ب تنێ ١٪ چ نەخۆشیێن دی نەبووینە یێن کو گیانێ خوە ژ دەستداین.
پەیمانگەها ساخلەمیا نیشتیمانی یا ئیتالیا ئەو راپۆرتە بەلاڤکریە و دیار کریە: پتر ژ دو هزار و ٥٠٠ حالەتێن ژیان ژ دەستدانێ هاتینە وەرگرتن و تێدا دەرکەفتیە ژ وێ هژمارێ ب تنێ ٠،٨٪ یا وان کەسێن د دەمێ توشبوونا وان ب ڤایرۆسی چ نەخۆشیەکا دی نەبوویە.
گۆتیە ژی، پتری ٧٥٪ یا ئەوێن ژبەر کۆرۆنایێ ل ئیتالیا ژیانا خۆ ژ دەستداین، ژبەر فشارا بلند یا خوینێ بوویە، ٣٥٪ ژ وان ژی نەخۆشیا شەکرێ هەبوویە، نێزیکی ئێک ل سەر سێ ژی ئاریشا دلی هەبووینە.
نيشاندان