پسپۆرەكێ ئابۆری دبێژیت: كێشەیێن د ناڤبەرا هەردو حوكمەتێن هەرێما كوردستانێ و ئیراقێ ب لادانا عەقلییەتا ناڤەندیبوونێ دێ هێنە چارەسەركرن.
د. ئەرشەد تاها، پسپۆری ئابۆری گۆت» هەكە ئەو سیاسەتا نوكە بەغدا بەرامبەر هەولێرێ ئەنجام ددەت، ب دووماهی نەهێت، ئەستەمە كێشەیێن هەلاویستی بهێنە چارەسەركرن».
د. ئەرشەد گۆت ژی» دادگەها بلند یا فیدرال ل ئیراقێ وەكو پارێزگەهەك مامەلێ ل گەل هەرێما كوردستانێ دكەت، هەكە وەزارەتا داراییا ئیراقێ ب شێوەیەكێ راستەوخوە مووچەیێن فەرمانبەرێن هەرێما كوردستانێ بەلاڤ بكەت، كو بەرۆڤاژی دستوورییە، هیچ رامانەك بۆ قەوارەیێ دستووریێ هەرێما كوردستانێ نامینیت».
ب دیتنا ئەوی بسپۆری ئابۆری» بەلاڤكرنا مووچەیێن فەرمانبەرێن هەرێما كوردستانێ ب شێوەیەكێ راستەوخوە ژ ئالیێ وەزارەتا داراییا ئیراقێ ڤە، بەرۆڤاژی هزر و فەلسەفەیا فیدرالیەتێیە».
گۆت ژی» د دەمێ بۆریدا هەرێما كوردستانێ نیشاندا هەكە دەلیڤە بۆ بهێتە دان، دشێت پێشڤەبرنا ئابۆری و ژیارا ئابۆری دروست بكەت».
خویاكر ژی» بەرپرسێن ئیراقێ دخوازن ب تمامی هەرێما كرودستانێ ئابلۆقە بدەن و هەموو دەستهەلاتێن دارایی و ئابۆری ژێ وەربگرن و د ئەنجامدا قەوارەیێ دستووریێ هەرێما كوردستانێ ب هەلوەشینن».

زنار تۆڤی:

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان دیار كر: بریارە ل چەند رۆژێن بهێت قانوونا پلەبەندی و خانەنشینییێ ل جڤاتا نوونەرێن ئیراقێ بۆ حەشدا شەعبی بهێتە دەركرن و د دووڤدا دێ چەكدارێن حەشدێ هێنە خانەنشینكرن و ئەڤی بابەتی گەلەك ئاریشە تێدا یێن هەین، حەشدا شەعبی وەكو شێوازێ لەشكرێ پاسدارێن ئیرانێیە، هەروەسا سیستەمێ وێ نیڤ سەربازییە.
د. سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی زێدەتر بۆ رۆژنامەیا (ئەڤرۆ) گۆت» ل سالا 2023 ێ هەژمارا چەكدارێن حەشدا شەعبی 95% ێ زێدە بوویە، ژ 122 هزار كەسان بووینە نێزیكی 240 هزار كەسان، چونكی دامەزراندن یا بەردەوامە و پلەبەندییا فەرمانبەریێ تێدا نینە و سازییەكا سەربخوەیە و مووچەیەكێ زەبەلاح بۆ هاتییە دیاركرن».
د. سەباح سوبحی دیاركر ژی» سالح فەیاز كونترۆلا دەستەیا حەشدا شەعبی دكەت و سەرۆكێ وێ دەستەیێ یە د هەمان دەمدا شیعەیان 183 پەرلەمانتار ل جڤاتا نوونەرێن ئیراقێیێن هەین و دشێن هەموو قانوونان دەرباز بكەن و د نوكە دا ئەوان هەموو سازییێن گرنگ یێن ئیراقێ كونترۆل كرینە».
ناڤهاتی گۆت ژی» ئەو پارەیێ بۆ حەشدا شەعبی هاتییە تەرخانكرن، 3.7 ترلیۆن دینارن كو 3.4 یێ وی پارەیی بۆ مووچەیێ ئەوانە و یێ دیتر ژی بۆ دابینكرنا پێدڤییێن ئەوانە و ئەو هێزە ژی سەر ب چارچۆڤەیێ هەماهەنگیێ یێ شیعی ڤەیە، هەروەسا دروستبوونا حەشدا شەعبی هەر ژ دەستپێكێ سەر ب سازییا لەشكری ل ئیراقێ نەبوویە، هەر چەندە شێوازەكێ نیڤ سەربازی وەرگرتییە، كو سەر ب وەزارەتا بەرگرییێ و فەرماندەییا گشتییا هێزێن چەكدارێن ئێراقێ ڤە نینە، بەلكو سەر ب سەرۆكێ دەستەیا حەشدا شەعبی ڤەیە، دیسا نوكە ئیراقێ 450 هزار سەرباز یێن هەین و چەكدارێن حەشدا شەعبی ژی هندی نیڤەكا لەشكرێ ئیراقێ نە».

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: دادگەها بلند یا فیدرال ل ئیراقێ دەست بۆ چەند بابەتێن ترسناك بریە، هەروەسا دبێژیت: ژ بلی پارتی دیموكراتی كوردستان هەڤدەم ئالی و كەسایەتیێن دی ژی ل ئیراقێ دبینن بڕیارێن دادگەها بلند یا فیدرال بڕیارێن سیاسی نە.
یادگار مەحموود، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەنداما لژنەیا قانوونی ل جڤاتا ناڤبری د داخۆیانییەكا رۆژنامەڤانیدا گۆت» ژبلی پارتی دیموكراتی كوردستان هەڤدەم ئالی و كەسایەتیێن دی ل ئیراقێ دبینن بڕیارێن دادگەها بلند یا فیدرال ل ئیراقێ د سیاسینە و بەرۆڤاژی دستووری نە».
یادگار مەحموود ئاماژە ب ئەوێ چەندێ ژی كر» دادكەها بلند یا فیدرال د بڕیارێن خوە دا دیموكراسی و ئازادی ل بەرچاڤ وەرنەگرتییە».
هەروەسا سەرنج بۆ ئەوێ چەندێ ژی راكێشا «ب لێنیرین بۆ دیباجەیا دستوورێ ئیراقێ، دێ رۆهن بیت كو دادگەها بلند یا فیدرال دەست بۆ چەند بابەتێن ترسناك بریە ژوان ژی پرسا مووچەیێن مووچەخۆرێن هەرێما كوردستانێ و هەلبژارتنێن پەرلەمانێ كوردستانێ».
گۆت ژی» دادگەها بلند یا فیدرال بزاڤێ دكەت دستوورێ ئیراقێ بهێتە راستڤەكرن، د دەمەكیدا دستووری ب خوە پێرابوونێن راستڤەكرنێ داناینە».

بسپۆرەکێ پەیوەندیێن نێڤدەولەتی سەبارەت ب هەلبژارتنێن باژێرڤانیان ل تورکیا دیار کر، نابیت ل باژێرێن مەزن یێن تورکیا جارەکا دی کورد پشتەڤانیێ ل بەربژارێن پارتا کۆماری بکەن، ئەو یەک د بەرژەوەندیا کوردان دا نینە و باشترە کورد خوە ژ پارتا کۆماری دوور بکەن.

د. عەبدوللا قران بسپۆرێ پەیوەندیێن نێڤدەولەتی راگەهاند، د هەلبژارتنێن بەری چارا سالان یێن باژێرڤانیان دا دەنگدەرێن هەدەپێ ل باژێرێن مەزن یێن تورکیا ب تایبەتی ژی ل ئەنقەرە و ئستەنبولێ پشتەڤانی ل بەربژارێن پارتا کۆماری کرن، لێ ئەو یەک د بەرژەوەندیا کوردان دا نەبوو و چو نەگەهشتیە کوردان، د هەلبژارتنێن هەری دووماهیێ دا ژی دیسان دەنگدەرێن هەدەپێ پشتەڤانی ل پارتا کۆماری کرن، گەلەک ژ دەنگدەرێن کورد ژ سیاسەتا هەدەپێ توورە بوون و دەنگێن خوە نەدانە وێ پارتیێ و گۆت: (ب کورتی کورد ئەڤرۆکە دخوازن ل تورکیا وان ژی سیاسەتا خوە یا جودا هەبیت، ئانکۆ پشتەڤانیکرن ژ بەربژارێن پارتا کۆماری د بەرژەوەندیا کوردان دا نینە، باشترە د ڤان هەلبژارتنان دا هەمان شاشیێن بەری نەهێنە دوبارە کرن، چونکی پارتا کۆماری ژی هەتا نها چو بۆ کوردان نەکریە و ژ بەر ڤێ یەکێ ژی رێژەیەکا هەری زێدە ژ کوردان ل تورکیا ژ پارتا کۆماری توورە نە).
ناڤهاتی ئەو یەک ژی دیار کر، نها پارتا دەم جهێ هەدەپێ گرتیە، هەکە پارتا دەم هەمان شاشیێن بەری نها یێن هەدەپێ دوبارە بکەت و ل باژێرێن مەزن یێن تورکیا ب تایبەتی ژی ل ئەنقەرە و ئستەنبولێ پشتەڤانیێ ل بەربژارێن پارتا کۆماری بکەت ئەو یەک دێ ئەنجامێن خوە یێن گەلەک خراب بۆ کوردان هەبن، دبیت ٥ سالان بابەتێ چارەسەرکرنا پرسا کوردی ل تورکیا گیرۆ بیت، ئەو یەک ژی دێ زیانەکا خوە یا گەلەک مەزن بۆ تورکیا و ب تایبەتی ژی بۆ کوردان هەبیت، ڤێجا باشترە پارتا دەم سەرەدەریەکا راست ل گەل هەلبژارتنێن نها ل تورکیا بکەت.
بسپۆرێ پەیوەندیێن نێڤدەولەتی ئەو یەک ژی دیار کر، هەکە ئاکپارتی وەکو هێزا ئێکێ و بهێز د ڤان هەلبژارتنان دا دەرکەڤیت دبیت دەست ب قۆناغەکا نوو یا چارەسەرکرنا پرسا کوردی بکەت، لێ هەکە پارتا دەم وەکو هەدەپێ شاشیێن چەند سالێن بۆری دوبارە بکەت ئەو یەک دێ کاریگەریەکا خوە یا خراب ل هەلوەست و سیاسەتا ئاکپارتیێ ژی کەت، ڤێجا باشترە بەرپرسێن پارتا دەم بەرهەڤیان بۆ هەر پێشهاتەکێ بکەن.
د. عەبدوللا قران د دووماهیا ئاخڤتنا خوە دا ئەو یەک ژی دیار، تورکیا د رەوشەکا تایبەت دایە و دبیت گەلەک گوهۆڕینێن نەچاڤەرێکری ژی ل تورکیا روو بدەن، ڤێجا باشترە هەم پارتا دەم و هەم ژی هێزێن دی یێن کوردی خوە بۆ هەر گوهۆڕینەکێ و هەر پێشهاتەکێ ل تورکیا بەرهەڤ بکەن.

رەمەزان زەكەریا

ئەڤ سالە كەرنەڤالا نەورۆزا ئاكرێ جۆدا بوو ژ سالێن بووری، مەسرور بارزانی سەرۆكێ حوكمەتا هەرێما كوردستانێ و كونسول و نوونەرێن 40 وەلاتان ل ئاكرێ پشكداری كەرنەڤالا نەورۆزێ بوون، ژبلی گەشتیارێن نافخۆیی و هەر چار پارچێن كوردستانێ.

ڤەهێل فەهمی، پەیڤدارێ گەشت و گوزارا ئاكرێ بۆ ئەڤرۆ گۆت: ئەڤ سالە ب بەرهەڤبوونا مەسرور بارزانی سەرۆكێ حوكمەتا هەرێما كوردستانێ و نوونەر و كونسولخانێن 40 وەلاتان گرنگیەكا مەزن دا بوو كەرنەڤالا نەورۆزا ئاكرێ ژبلی گەشتیارێ ناڤخۆیی.
ناڤبری گۆتژی: بۆ دیتنا خەتیرێن كەرنەڤالا نەورۆزا ئاكرێ پتری 75 هزار گەشتیارا سەرەدانا ئاكرێ كربوو، ژبلی گەشتیارێن هەر چوار پارچێن كوردستانێ و چەندین وەلاتێن جیهانێ پشكداری كەرنەڤالا نەرۆزا ئاكرێ بوون.
د. دلاوەر بۆزۆ هەركی، دەڤەردارێ ئاكرێ راگەهاند: ئاكرێ خەملا خۆیا نەورۆزێ كر و دیمەنێن جوان نیشا هەموو جیهانێ دان كو هەر سال ب رەنگێن خۆ یێن دلڤەكەر هەمبێزا جوانیا كەرنەڤالا نەورۆزێ دكەت. ئەڤ سالە ژی ب جۆداترین و ب خەملترین شێواز و ل ژێر چاڤدێریا مەسرور بارزانی سەرۆكێ حكومەتا هەرێما كوردستانێ بەرهەڤبوونا هژمارەكا زۆرا كونسول و هنارتیێن دیبلوماتی یێن وەلاتێن جیهانێ و هژمارەكا زۆرا گەشتیارێن بیانی و خەلكێ هەرێما كوردستانێ ل كەرنەڤالا نەورۆزێ پشكداربوون، ب فەرمی ژلایێ مەسرور بارزانی سەروكێ حكومەتا هەرێما كوردستانێ ئاكرێ وەكو پایتەختێ نەورۆزێ هاتە راگەهاندن.
گرۆپێن گەشتیارێن بیانی ل سەر ئاستێ 24 ولاتێن جیهانێ گەشتیار ئینابوون ئاكرێ بۆ دیتنا خەتیرێن كەرنەڤالا نەورۆزا ئاكرێ، ئەڤسالە ل كەرنەڤالا نەورۆزا ئاكرێ 2724 خەتیرێن ئاگرێ ژلایێ هەشت گروپێن خۆبەخش ڤە ل ئاكرێ هاتنە بلندكرن و نیشاندان ل سەر كەلا ئاكرێ و كەلە كەڤنا ئاكرێ.

هەرسێ هەڤپەیمانیێن سوننی (عەزم، حەسم و سیادە) بەیاننامەیەكا هەڤپشك سەبارەت بزاڤێن ئالیێن سیاسی بۆ پڕكرنا ڤالاهییا پۆستێ سەرۆكێ جڤاتا نوونەرێن ئیراقێ، بەلاڤكر و تێدا سوپاسییا سەرۆك مەسعود بارزانی دكەن ژ پێخەمەت خەمخۆرییا وی بۆ چارەسەركرنا ئەوێ كێشەیێ.
د بەیاننامەیا خوە دا ئەو هەرسێ هەڤپەیمانیێن سوننی دوپاتیێ ل ئەنجامدانا هەلبژارتنا سەرۆكێ جڤاتا نوونەران دناڤ جڤاتا نوونەران ب خوە دا و ئێكلاكرنا پرسا ئەوی پۆستی ژ ئالیێ پەرلەمانتارانڤە دكەن، ئەوژی ب گۆڕەی پێڕابوونێن قانوونی و بڕیارێن دادگەها بلند یا فیدرال.
ئەوان هەرسێ هەڤپەیمانیێن سوننی د بەیاننامەیا خوە دا ئاماژە كریە، پڕكرنا ڤالاهییا دستووری یا پۆستێ سەرۆكێ جڤاتا نوونەرێن ئیراقێ دێ پێنگاڤەك بیت ب ئاراستەیا چالاككرنا رۆلێ جڤاتا نوونەران د ئەركێن خوە یێن قانووندانانێ و چاڤدێریێ.
ل رۆژا 14/11/2023، دادگەها بلند یا فیدرال ل ئیراقێ بڕیارا ب دوماهیئینانا ئەندامەتییا هەر ئێك ژ محەمەد حەلبووسی و لەیس دلێمی ل جڤاتا نوونەرێن ئیراقێ ئینا، ب ئەڤێ بڕیارێ راستەوخوە حەلبووسی ژ پۆستێ سەرۆكێ جڤاتا نوونەرێن ئیراقێ هاتە دوورئێخستن ژ ئەگەرێ ئەوان كێشەیێن پێشتر ل گەل ئەوی پەرلەمانتاری رووداین.
هەروەسا ب گۆڕەی ئەوێ رێككەفتنێ كو پڕۆسەیا سیاسی ل ئیراقێ پشتی سالا 2003 ل سەر هاتییە دامەزراندن، پۆستێ سەرۆكێ جڤاتا نوونەرێن ئیراقێ بەهرا سوننەیایە، بەلێ هەتا نوكە ئالیێن سوننی ل سەر بەربژارەكێ هەڤپشك رێكنەكەفتینە بۆ ئەوێ چەندێ ببیتە سەرۆكێ نوو یێ جڤاتا نوونەرێن ئیراقێ.

بڕیارە ئەڤرۆ شاندەكێ پرۆژەیێ (هەژمارا من) ل گەل شاندەكێ حوكمەتا ئیراقی و بانكا ناڤەندییا ئیراقی ل بەغدا كۆمبیت.
مەروان ئەحمەد، سەرپەرشتیارێ پرۆژەیێ (هەژمارا من) ل نڤیسینگەها سەرۆكێ حوكمەتا هەرێما كوردستانێ د داخۆیانییەكا رۆژنامەڤانیدا گوت» ئەڤرۆ دوشەمبی شاندەكێ پڕۆژەیێ (هەژمارا من) دێ ل گەل شاندەكێ حوكمەتا ئیراقێ و بەرپرسێن بانكا ناڤەندییا ئیراقێ كۆمبیت».
مەروان ئەحمەد گوت ژی» مەبەست ژ چوونا شاندی بۆ بەغدا بۆ بەرچاڤكرنا هووردەكاریێن پرۆژەیێ (هەژمارا من) یا حوكمەتا هەرێما كوردستانێ بۆ حوكمەت و بەرپرسێن بانكا ناڤەندییا ئیراقی».
هەتا نوكە زێدەتر ژ 240 هزار فەرمانبەرێن كەرتی گشتی ل هەرێما كوردستانێ مامەلا پرۆژەیێ (هەژمارا من) بۆ هاتییە دروستكرن و زێدەتر ژ 130 هزار فەرمانبەران ژی كارتێن بانكی وەرگرتینە و پرۆسە ژی بلەز بڕێڤە دچیت.
حوكمەتا هەرێما كوردستانێ یا بەردەوامە ل سەر بەرفرەهكرنا پڕۆژەیێ (هەژمارا من) و نوكە ل حەفت باژێرێن هەرێما كوردستانێ دەست ب تۆماركرنا مووچەخۆرێن هەرێما كوردستانێ د چارچۆڤەیێ پرۆژەیدا هاتییە كرن. رۆژانە ژی زێدەتر ژ چار هزار فەرمانبەر د پڕۆژەیێ (هەژمارا من) دا دهێنە تۆماركرن، پێنج بانكێن مەزن د پڕۆژەیدا د پشكدارن و بڕیارە چەندین بانكێن دی ژی پەیوەندیێ ب ئەوی پڕۆژەی بكەن.
ل رۆژا 23/3/2024، ئاوات شێخ جەناب، وەزیرێ دارایی و ئابۆری ل هەرێما كوردستانێ د داخۆیانییەكا رۆژنامەڤانیدا راگەهاندبوو» پڕۆژەیێ (هەژمارا من) بۆ تەوتینا موچەیە،جوداهییا سیستەمێ مە ل گەل یێ ئیراقێ ئەو كو یێ مە تەوتینە ل گەل 19 خزمەتگوزارییان، بەلێ یێ ئیراقێ ئەو 19 خزمەتگوزاری بۆ مووچەخۆران تێدا نینن».
وەزیرێ دارایی و ئابۆری ل هەرێما كوردستانێ ئاماژە ب ئەوێ چەندێ ژی كربوو كو پڕۆژەیێ (هەژمارا من) ب رازیبوونا محەمەد شیاع سودانی، سەرۆك وەزیرێن ئیراقێ و بانكا ناڤەندییا ئیراقێ هاتییە دروستكرن، هەروەسا چەندین بانكێن ئیراقی ژی د ئەڤی پڕۆژەیدا دێ پشكدار بن».
هەروەسا گوتبوو ژی» ب رێكا (هەژمارا من) مووچەخۆر دشێت مفادار بیت ژ خزمەتگوزاریێن بانكی و گەلەك ئاسانكاری دێ بۆ هێنە كرن ژ وان ژی مووچەخۆر دشێت ب رێكا (هەژمارا من) سولفەیێن خانوبەرا و هەڤژینیێ وەربگریت».

جێگرێ سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: «هەژمارا من» ژ «تەوتین»ـا ئیراقی مفایێن گەلەك زێدەتر یێن هەین، هەروەسا چارەسەرییا كێشەیا مووچەیان ژی دكەت.
مەریوان قەرەنی، جێگرێ سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ د نڤیسینەكێدا ل پێگەهێ تایبەتێ خوە ل سەر تۆرا جڤاكییا فەیسبووكی، باسێ گرنگییا پڕۆژەیێ (هەژمارا من) دكەت.
مەریوان قەرەنی، د ئەوێ نڤیسینا خوە دا دبێژیت» (هەژمارا من) ئێك ژ پڕۆژەیێن هەرە گرنگ یێن كابینەیا نەهێ یا حوكمەتا هەرێما كوردستانێیە، ب رێكا ئەوی پڕۆژەی پلان هاتییە دانان كو هەتا دوماهییا ئەڤسالە، ملیۆنان مووچەخۆر ل هەرێما كوردستانێ ببن خودانێن هەژمارا بانكی. ئەڤ پڕۆژەیە هەر ڤەكرنا هەژمارەكا بانكی نینە بۆ ئەوێ چەندێ مووچەخۆر ب رێكا وی مووچەیێن خوە وەربگرن، بەلكو دروستكرنا ژێرخانەیەكا گرنگ یا داراییە ل هەرێما كوردستانێ، ب رێكا وی پڕۆژەی دێ پڕۆسەیا مامەلێن بازرگانی ب رێكا پارەیێ كاش بۆ ئالۆگۆرییا بانكی و ئەلكترۆنی هێتە گوهۆڕین و ب ڤی چەندێ ژی خەلك دشێن ژ گەلەك بواراندا مفادار بن».
جێگرێ سەرۆكێ فراكسیۆنا پارتی ل جڤاتا نوونەرێن ئیراقێ گۆت ژی: ب گۆڕەی پێداچوونا مە بۆ پڕۆژەیێ (هەژمارا من) بۆمە دیاربوو كو پڕۆژەی ئەڤ باشییە یێن تێدا هەین:
-تێچوویێ ڤەكرنا هەژمارێ تنێ دو هزار و 500 دینارن، د دەمەكیدا ڤەكرنا هەژماێ ل ( تەوتین)ـا ئیراقی 10 هزار دینارن.
-هەژمارەكا مەزن ژ بانكێن هەرێما كوردستانێ دێ پشتبەستنێ ل سەر كەن و بانك ژی ژ ئالیێ بانكا ناڤەندییا ئیراقی و گەنجینەیا ئەمریكا باوەری پێ هاتییە دان، د دەمەكیدا تەوتینا ئیراقی تنێ هەردو بانكێن رافیدەین و رەشید بخوەڤە دگریت (هەلبەت كونیەیا ئەڤان هەردو بانكان ژی گەلەك یا پاقژ نینە و پێشتر مە گوهلێبوویە كو د پڕۆژەیێ دزییا چەرخیدا دپشكدار بوون و گۆژمەیێ دو ملیار و 500 ملیۆن دۆلار ب رێكا ئەوان هەردو بانكان و چەند بانكێن دی بۆ دەرڤەی ئیراقێ هاتینە هنارتن !).
– دەهان جۆرێن خزمەتگوزاریێن بانكی ب رێكا (هەژمارا من) بۆ مووچەخۆران دێ هەبن، وەكو راكێشانا قەران و پارەدانا ئەلكترۆنی و خزمەتگوزاریێن دی، هەروەسا مووچەخۆر دێ بیتە خودان كریدت كارت و دشێت ل هەر جهەكی ل جیهانێ، كارتا خوە بكاربینیت و پارەیێ خوە رابكێشیت، بەلێ تەوتینا ئیراقێ تنێ بۆ وەرگرتنا مووچەی دهێتە بكارئینان و هیچ مفایەكێ دی نینە.
-بانكێن د ناڤ (هەژمارا من) دا پڕۆژەیێن وەسا یێن هەین كو دشێن قەرێ ب مووچەخۆران بدەن كو دگەهیتە زێدەتر ژ 150 ملیۆن دیناران، د دەمەكیدا هیچ ئەگەرەك نینە كو بانكێن ئیراقی ئەوی قەری ب مووچەخۆرێن هەرێما كوردستانێ بدەن.
-ل پڕۆژەیێ (هەژمارا من)، ب هزارەها ئامێرێن (ئەی تی ئیم) بۆ وەرگرتنا مووچەی و ب دەهان هزار ئامیرێن تایبەت ب خواندنا كریدەت كارت ب سەر ماركێت و سوپەر ماركێت و فرۆشگەه و دوكاناندا دێ هێنە بەلاڤكرن تاكو هەكە مووچەخۆری پارە ب كاش رانەكێشا، ب كارتا خوە بازارێن خوە بكەت ! بەلێ بانكێن ئیراقێ ل چەند جهێن دیاركری پارەیێ دناڤ تەوتینێ دا د مەزێخن و ب ئەڤێ چەندێ ژی دڤێت مووچەخۆر چەندین ساتان بۆ وەرگرتان مووچەیێ خوە د سرایێدا بیت.
-هەژمارا من پڕۆژەیەكێ گرنگ و ستراتیژیێ كوردستانێیە و ژ ئەگەرێ وی ئابۆرییا هەرێما كوردستانێ دێ پێشكەڤیت، د دەمەكیدا پڕۆژەیێ (تەوتین) پشكەكە ژ بزاڤێن زیانگەهاندنێ ب هەرێما كوردستانێ و ئابۆر و قەوارەیێ وی.
خویاكر ژی» ژ بەر هەموو ئەوان هۆكاران، دووپات دكەین دكەین كو پڕۆژەیێ (هەژماران من) زێدەتر بۆ مەچەخۆرێن هەرێما كوردستانێ یا ب مفایە و دێ كێشەیا مووچەی ژی چارەسەركەت. مخابن ئەوژی دژایەتییا وی پڕۆژەی دكەن، هەر ئەو حزبێن كو ل سالا 2014 پێشنیاز بۆ بەغدا كربوو مووچە و بودجەیا هەرێما كوردستانێ ببڕیت، چونكە ئەوان مانا خوە ل خرابییا رەوشا ژیارا خەلكێ كوردستانێ دبینن، هەر ئەون ژی كو نوكە هۆكارن ل پێشبەری چارەسەربوونا كێشەیا مووچەخۆرێن هەرێما كوردستانێ.».

عەزیز هەورامی:

لوقمان پێنجوێنی، ئەندامێ مەكتەبا سیاسی یا حزبا سۆسیال دیموكراتا كوردستانی بۆ رۆژنامەیا (ئەڤرۆ) راگەهاند: بڕیارێن دادگەها فیدرال ل ئیراقێ و حوكمەتا ئیراقی، د بەرژەوەندییا خەلكێ كوردستانێدا نینن، رەوشا سیاسی و ئابۆری یا نوكە یا گونجای نینە بۆ ئەنجامدان هەلبژارتنێن پەرلەمانێ كوردستانێ، هەرچەندە، ژڤانێ ئەنجامدانا هەلبژارتنێن پەرلەمانێ كوردستانێ گیروبوویە ژی بەلێ دادگەها فیدرال ل ئیراقێ دخوازیت كۆمەكا بڕیارێن دی یێن دژوار دەربكەت بۆ ژكارئێخستنا دەزگەهێن بڕێڤەبرنا هەرێما كوردستانێ.
لوقمان پێنجوێنی، ئەندامێ مەكتەبا سیاسی یا حزبا سۆسیال دیموكراتا كوردستانی گوتژ ی» حزبێن سیاسی یێن كوردستانی دناڤخوەدا د ناكۆكن و هەكە ب ئەڤێ رەوشێ و هەبوونا گرژی و ئالۆزییان بچنە د ناڤ پڕۆسەیا هەلبژارتناندا، دبیت كارێن نەخوازراو ژێ پەیدا ببن، دڤێت پڕۆسە ب هەردو روویان ببینین و دبیت كێشەیان بۆ هەرێما كوردستانێ دروست بكەت و هەكە د نوكەدا هەلبژارتن نەهێنە ئەنجامدان دبین باشتر بیت».
دیاركر ژی» باشترە شەرعیەت بۆ پەرلەمانێ كوردستانێ بهێتە زڤراندن و ل پەرلەمانی بڕیارا دروست بهێتە دان و بەرسڤا هەموو بڕیارێن دادگەها فیدرال بهێتە دان كو هەموو ئەو بڕیارە دژی قەوارەیێ دستووریێ هەرێما كوردستانێ بوون».
پتر گوت» دادگەها فیدرال ل ئیراقێ خوە ئێخستییە شوینا جڤاتا قانووندانانێ، ئەو چەندە ژی جهێ دلتەنگیێیە، ئەم وەكو ئالیێن سیاسی ل هەرێما كوردستانێ ب دەستهەلات و ئۆپۆزسیۆن ڤە، هۆكارین ژ ئەوێ چەندا ل هەرێما كوردستانێ دهێتە كرن، پێدڤی بوو قەوارەیێ دستووریێ هەرێما كوردستانێ بپارێزین».
ل دوماهیێ گوت» پێدڤی بوو ل گەل دیاربوونا نیەتا دەركرنا بڕیارێن دادگەها فیدرال ل ئیراقێ، گۆپیتكا بلند یا حزبێن كوردستانێ هاتبا گرێدان و ژ پڕۆسەیا سیاسی ل ئیراقێ خوە ڤەكێشابا».

رێڤەبەرێ ناڤەندا فڕەنسی بۆ ڤەكۆلینان ل سەر ئیراقێ رادگەهینیت، حوكمڕانییا شیعی ل ئیراقێ پشتی سالا 2003 چو جاران یا سەركەفتی نەبوویە، هەروەسا دبێژیت: دادگەها فیدرال ل ئیراقێ ل بن كارتێكرنا ئیرانێ بڕیارێن خوە ددەت.
عادل باخەوان، رێڤەبەرێ ناڤەندا فڕەنسی بۆ ڤەكۆلینان ل سەر ئیراقێ گۆت: پشتی سالا 2003 د ئیراقێدا گرێبەستەكا سیاسی و جڤاكی نینە كو دەستەبەری سۆزا و پاراستنا مافان بكەت و باوەری ب ئیراقیبوونێ هەبیت، لەوما ئیراقێ ژ روویێ ستراكچەرێ سیاسی ڤە ئیفلاس بوویە و نوكە ئەو دەمەیە كو ئیفلاسبوونا خوە تێدا رادگەهینیت».
عادل باخەوانی سەرنج ئێخستە سەر ئەوێ چەندێ دادگەها فیدرال ل بن كارتێكرنا ئیرانێ بڕیارێن خوە ددەت ب تایبەتی بەرامبەر هەرێما كوردستانێ و سوننەیان.
ب دیتنا رێڤەبەرێ ناڤەندا فڕەنسی بۆ ڤەكۆلینان ل سەر ئیراقێ، هیچ هێزەك نەشێت بڕیارێن ئەوێ دادگەهێ رەت بكەت. هەروەسا پێشبینی ژی كر د پاشەڕۆژێدا بڕیارێن توندتر ژی بدەت كو ل دووڤ بۆچوونا وی هەتا نوكە تنێ 15% بڕیار دژی هەرێما كوردستانێ یێن دەركرین».
رۆهنكر ژی» ململانێیەكا توند د ناڤبەرا سەرۆكێ جڤاتا بلند یا دادوەریێ ل ئیراقێ و سەرۆكێ دادگەها بلند یا فیدرال ل ئیراقێ یا هەی، هەتاكو سەرۆكێ دادگەها بلند یا فیدرال ململانێ ل گەل محەمەد شیاع سودانی، سەرۆك وەزیرێن ئیراقێ ژی یا هەی و رێكێ ل پڕۆژەیێن سودانی دگریت».
هەروەسا دوپاتكر كو حوكمڕانییا شیعی ل ئیراقێ پشتی سالا 2003 چو جاران یا سەركەفتی نەبوو و د ئێك رستە دا خوە دبینیت كو ئەوی» پەشێمانبوون ژ هەموو ئەو سۆزێن ب ئیراقییان و هەتا شیعان ب خوە ژی داین». خویاكر ژی» ئیراق ل سەردەمێ حوكمڕانییا شیعی بوویە ئیراقا بێئومێدیێ و بێهیڤیێ».