حوكمەتا ئیراقا فیدرال و حوكمەتا هەرێما كوردستانێ ل سەر دەستپێكرنا هنارتنا پەترۆلا هەرێما كوردستانێ ب رێیا توركیا رێككەفتن.
ئاژانسا رویتەرز ژ زاردەڤێ دو بەرپرسێن وەزارەتا پەترۆلا ئیراقێ بەلاڤكر» حوكمەتا ئیراقا فیدرال و حوكمەتا هەرێما كوردستانێ ل گەل كۆمپانیێن پەترۆلی گەهشتنە رێككەفتنێ بۆ دەستپێكرنا هنارتنا پەترۆلا خام ب رێكا بەندەرێ جەیهان یێ توركی».
ئەڤ چەندە رێ ددەتە هنارتنا نێزیكی 230 هزار بەرمیلێن پەترۆلێ د رۆژەكێدا.
ئاژانسا رویتەرز ژ زاردەڤێ بەرپرسەكێ وەزارەتا پەرتۆلا ئیراقێ ڤەگوهاست» ل رۆژا سێشەمبی مە دەست ب پێرابوونێن تەكنیكی كر بۆ بەرهەڤكرنا كارێن بۆرییا پەترۆلێ و پێشبینی دهێتە كرن د دەمێ 48 ساتاندا هنارتنا پەترۆلا هەرێما كوردستانێ بهێتە دەستپێكرن».
ب گۆڕەی بەرپرسێن ئیراقی كو ئاگەهداری رێككەفتنێ نە ل پلانا بەراهییێ داخواز ژ حوكمەتا هەرێما كوردستانێ هاتیە كرن پێگیر بیت ب گەهاندنا ب كێمی 230 هزار بەرمیلان د رۆژەكێدا ب كۆمپانییا (سۆمۆ) هەڤدەم 50 هزار بەرمیلێن دی ژی د رۆژەكێدا بۆ بكارئینانا ناڤخوەیێ دێ هێنە تەرخانكرن.
ل دووڤ رێككەفتنا سێقۆلی د ناڤبەرا حوكمەتا ئیراقا فیدرال و حوكمەتا هەرێما كوردستانێ و كۆمپانیێن پەترۆلی ل هەرێما كوردستانێ، بازرگان و كۆمپانی دشێن پەترۆلێ ب بهایێ كۆمپانییا (سۆمۆ) ل بەندەرێ جەیهان یێ توركی بكڕن.

سەرۆك مەسعود بارزانی، دوهی ل سەلاحەدین پێشوازی ل شاندەكێ‌ هەڤپەیمانیا «ئەساس» یا ئیراقی ب سەرۆكاتیا محسن مەندەلاوی كر.
د دیدارێ‌ دا بیروبۆچوون ل دۆر رەوشا سیاسی یا ئیراقێ‌ و هەلبژارتنێن داهاتی یێن جڤاتا نوونەرێن عیراقێ‌ لێك گوهاڕتن.
هەر د ڤێ‌ دیدارێ‌ دا، دوپاتی ل سەر هەماهەنگیا د ناڤبەرا هێز و لایەنێن سیاسی دا هاتە كرن.
هەر دوهی ب هەمان مەبەست محسن مەندەلاوی كو جگێرێ‌ سەرۆكێ‌ جڤاتا نوونەرێن ئیراقێ‌ یە ژی ل گەل نێچیرڤان بارزانی، سەرۆكێ‌ هەرێما كوردستانێ‌ كۆمبوو و رەوشا پەیوەندیێن هەرێما كوردستانێ‌ و ئیراقێ‌ دیسا هەلبژارتنێن جڤاتا نوونەران هێڤێنی دانوستاندنا وان بوو.
هەر د دیدارا ناڤبری دا ل گەل مەسرور بارزانی سەرۆكێ‌ حوكمەتا هەرێما كوردستانێ‌، دوهی ل هەولێرا پایتەخت، دوماهی گوهۆڕین و پێشهات و رەوشا گشتییا ئیراقێ و بەرهەڤیێن هەلبژارتنێن جڤاتا نوونەران هاتنە گەنگەشەكرن.
د وێ‌ كۆمبوونێ دا كو شاخەوان عەبدوللا، جێگرێ سەرۆكێ جڤاتا نوونەرێن ئیراقێ ژی بەرهەڤببوو،

دوهی دوشەمبی 22/9/2025، نێچیرڤان بارزانی، سەرۆكێ هەرێما كوردستانێ، پێشوازی ل موحسن مەندەلاوی، جێگرێ ئێكێ یێ سەرۆكێ جڤاتا نوونەرێن ئیراقێ و شاندەكێ د گەلدا كر كو ژ جێگرێ دویێ یێ سەرۆكێ جڤاتا نوونەرێن ئیراقێ و هەژمارەكا ئەندامێن جڤاتا ناڤبری پێكهاتبوون.
سەرۆكاتییا هەرێما كوردستانێ د بەیاننامەیەكێدا بەلاڤكر» د كۆمبوونەكێدا رەوشا گشتییا ئیراقێ، پرۆسەیا سیاسی و هەلبژارتنێن داهاتی یێن جڤاتا نوونەرێن ئیراقێ، كار و بەرنامەیێن جڤاتا نوونەران، هەڤبەندیێن هەولێر – بەغدا و رەوشا دەڤەرێ گەنگەشەكر» .
سەرۆكاتییا هەرێما كوردستانێ دیاركر ژی» هەردو ئالییان دوپاتی ل گرنگییا چارەسەركرنا كێشەیێن ئیراقێ، ب تایبەتی چارەسەركرنا كێشەیێن هەولێر – بەغدا ل سەر بنەمایێ دەستووری و رێككەفتنان كر كو د بەرژەوەندییا ئارامییا وەلاتی و پێشكەفتنا وی دایە».
سەبارەت ڤێ چەندێ سەرۆكێ هەرێما كوردستانێ سوپاسییا هەموو وان كەسایەتی و ئالییان كر كو كاری بۆ چارسەەركرنا كێشەیان دكەن، هەروەسا پشتەڤانییا خوە بۆ بزاڤان و تێكگەهشتنا حوكمەتا هەرێما كوردستانێ و حوكمەتا فیدرالی دەربارەی پرسا شایستەیێن دارایی و مووچەیێ فەرمانبەرێن هەرێما كوردستانێ، دوپاتكر.
هەردو ئالی هەڤڕابوون ل سەر گرنگییا ئەنجامدانا هەلبژارتنێن داهاتی یێن جڤاتا نوونەرێن ئیراقێ و باس ل بەرهەڤییان كر. ل دۆر ڤێ چەندێ هەردو ئالی پێشڤەبرن ب پرۆسەیا دیموكراسی ب پێدڤی و گرنگ بۆ پاراستنا ئارامییا وەلاتی هەژمارت.
گرنگییا كارێ هەڤپشك و هاریكارییا د ناڤبەرا پێكهاتە و ئالیێن سیاسی یێن وەلاتی و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو.

دوهی دوشەمبی 22/9/2025، مەسرور بارزانی، سەرۆكێ حوكمەتا هەرێما كوردستانێ، پێشوازێ ل شاندەكێ جڤاتا نوونەرێن ئیراقێ ب سەرۆكاتییا موحسن مەندەلاوی، جێگرێ ئێكێ یێ سەرۆكێ جڤاتا نوونەران كر.
د كۆمبوونەكێدا كو شاخەوان عەبدوللا، جێگرێ سەرۆكێ جڤاتا نوونەرێن ئیراقێ بەرهەڤبووی، دوماهی گوهۆڕین و پێشهات و رەوشا گشتییا ئیراقێ و بەرهەڤیێن هەلبژارتنێن جڤاتا نوونەران هاتنە گەنگەشەكرن.
هەردو ئالی هەڤڕابوون ل سەر پێدڤی و گرنگییا چارەسەركرنا كێشەیێن هەرێما كوردستانێ و حوكمەتا فیدرال ل سەر بنەمایێ رێزگرتنێ ل سیستەمێ فیدرالی و قەوارەیێ دەستووریێ هەرێما كوردستانێ و دابینكرنا مافێن دەستووری و شایستەیێن دارایی یێن هەرێما كوردستانێ.

دیدار/ دلۆڤان ئاكرەیی

بریاردەرێ فراكسیونا پارتی دیموكراتی كوردستانێ ل جڤاتا نوونەرێن ئیراقێ دیاركر: پارتی نابیت ب ساناهی بچیتە بن بارێ پێكئینانا كابینەیا نوو یا حوكمەتا ئیراقێ و پێدڤییە هەرێمێ مەرج هەبن چونكو نییەتا حوكمەتا ئیراقێ یا باش نەبوویە.
شوان كەلاری، بریاردەرێ فراكسیونا پارتی دیموكراتی كوردستان ل جڤاتا نوونەرێن ئیراقێ سەبارەت ب پشكدارییا پارتی د حوكمەتا نوو یا ئیراقێدا بۆ رۆژنامەیا (ئەڤرۆ) گوت» نابیت ل كابینەیا بهێت یا حوكمەتا ئیراقێ پارتی ب ساناهی بچیتە بن ربارێ پێكئینانا وێ و دەنگی ل سەر بدەت، بەلكو پێدڤییە ل گەل حزبێن دی یێن كوردستانی ب ئێك پاكێج بەری پێكئینانا حوكمەتێ كۆمەكا بابەت كێشەیان هەنە كۆ پێدڤییە بهێنە ئێكلاكرن، تاكو ئەو پرس ب ئێكجاری بهێنە چارەسەركرن، هەرچەندە ئیراق جهێ باوەریێ نینە، دەستووری بنپێ دكەت و رێككەفتنێن سیاسی بجهنائینیت، میناك پێدڤی بوو د كابینەیا محەمەد شیاع سوودانی دا رێككەفتن هاتبانە بجهئینان و د دەمێ شەش مەهاندا قانوونا پەترۆل و غازێ هاتبا دەركرن».
كەلاری گۆت ژی» ل حوكمەتا مەحەمەد شیاع سوودانی دا بڕیار بوو رێككەفتنا شنگالێ و مادەیا 140 یا دەستووری و بابەتێ بودجەی بهێنە چارەسەركرن و ل جڤاتا نوونەران دەنگ ل سەر هاتبا دان و رێككەفتن هاتبا كرن، بەلێ ئێك ژ گرفتێن ئیراقێ ئەوە رێز و بها بۆ رێككەفتنان نەمایە و ئەو وەلاتێ باوەری پێ نەما و رێزێ ل رێككەفتنان نەگریت باوەری ب وی وەلاتی نامینیت، بهایێ چو تشتان نامینیت و ئێدی بەر ب هەلوەشاندنێ و كارەساتان دچیت، لەوما گرنگە د هەر كابینەیەكا ئیراقێدا كورد ب ئێك پاكێج پرسان ئێكلا بكەن، چونكو بابەتێ مووچەی ل گەل كوردستانێ رێككەفتن ل سەر هاتبوو كرن و چبوو د ناڤا قانوونا بوودجەی دا، بەلێ
مە دیت ل دەمێ سالەكێ دا سێ مووچە هاتن، ب شێوەیەكی ئەم یێن مژوولكرین كو بتنێ ئەم ب هانا مووچەی بكەڤین و كەنگی دێ مووچە ژ بەغدایێ هێتە هنارتن».

رێككەفتنا سێقۆلی بۆ هنارتنا پەترۆلا هەرێما كوردستانێ هاتە ئیمزاكرن و ل نێزیك دێ دەست ب هنارتنا پەترۆلا كوردستانێ هێتە كرن.
دوهی دوشەمبی 22/9/2025، وەزارەتا سامانێن سروشتی ل حوكمەتا هەرێما كوردستانێ و وەزارەتا پەترۆلا ئیراقا فیدرال و كۆمپانیێن بەرهەمهێنەرێن پەترۆلا كوردستانێ، رێككەفتنا هنارتنا پەترۆلا هەرێما كوردستانێ ل هەولێرێ ئیمزاكر.
ل دووڤ پێزانینان، چاڤەڕێ دهێتە كرن ل كۆمبوونا ئەڤرۆ سێشەمبی 23/9/2025 یا جڤاتا وەزیرێن ئیراقێ، ئەو رێككەفتنا سێقۆلی ژ ئالیێ محەمەد شیاع سوودانی، سەرۆك وەزیرێن ئیراقا فیدرال بهێتە راگەهاندن و پاشی بڕگەیێن رێككەفتنێ بهێنە بەلاڤكرن.
ئەڤە د دەمەكیدایە دوهی دوشەمبی 22/9/2025، شاندەكێ تەكنیكیێ كۆمپانییا (پەترۆلا باكوور) یا ئیراقی سەرەدانا باژێرێ هەولێرێ كری، ب ئارمانجا ب دوماهیئانێ ب پێرابوونێن دەستپێكرنا هنارتنا پەترۆلا هەرێما كوردستانێ. شاندێ ناڤبری ل گەل وەزارەتا سامانێن سروشتی ل حوكمەتا هەرێمێ بۆ دەمێ چار ساتان كۆمببوو.
ل دووڤ پێزانینان، بڕیارە ئەو پەترۆلا رادەستی كۆمپانییا (سۆمۆ) دهێتە كرن، ب رێكا كۆمپانییا (پەترۆلا باكوور) یا ب سەر وەزارەتا پەترۆلا ئیراقێڤە بۆ بەندەرێ جەیهان یێ توركی بهێتە هنارتن.
ئەڤ پێشهاتە د دەمەكیدایە كو ل رۆژا ئێكشەمبییا بۆری 21/9/2025، پێشەوا هەورامانی، پەیڤدارێ حوكمەتا هەرێما كوردستانێ راگەهاندبوو» چاڤەڕێ دهێتە كرن ل رۆژا دوشەمبی 21/9/2025 رێككەفتنا سێقۆلی د ناڤبەرا وەزارەتا پەترۆلا ئیراقێ، وەزارەتا سامانێن سروشتی ل حوكمەتا هەرێما كوردستانێ و كۆمپانیێن بەرهەمهێنەرێن پەترۆلا كوردستانێ بهێتە ئیمزاكرن، ب مەبەستا هنارتنا پەترۆلا هەرێما كوردستانێ بۆ بەندەرێ جەیهان یێ توركی».
گوتبوو ژی» ل دەمەكێ گەلەك نێزیك رێككەفتنا سێقۆلی دێ هێتە ئیمزاكرن، چونكە دڤێت بەری كۆمبوونا جڤاتا وەزیرێن ئیراقێ ئەو رێككەفتنە بهێتە ئیمزاكرن».
ب گۆڕەی رێككەفتنێ، هەرێما كوردستانێ رۆژانە 230 هزار بەرمیلێن پەترۆلێ دێ رادەستی كۆمپانییا (سۆمۆ) كەت و دێ 50 هزار بەرمیل بۆ پێدڤییە ناڤخوەیی بكارئینیت.
ژ ئالیێ خوەڤە باسم خزەیر، بریكارێ وەزارەتا پەترۆلا ئیراقێ ل حەفتییا بۆری د بەیاننامەیەكێدا راگەهاندبوو» ل چەند رۆژێن داهاتی ل گەل حوكمەتا هەرێما كوردستانێ و كۆمپانیێن پەترۆلی ل كوردستانێ ل دۆر دەستپێكرنا هنارتنا پەترۆلا هەرێما كوردستانێ، دێ رێككەڤن، پەیڤدارێ حوكمەتا هەرێما كوردستانێ ژی دبێژیت: ب ئیمزاكرنا رێككەفتنا سێقۆلی د ناڤبەرا حوكمەتا فیدرال و حوكمەتا هەرێما كوردستانێ و كۆمپانیێن بەرهەمئینانا پەترۆلی ل هەرێمێ هیچ ئاستەنگەك ل پێشبەری هنارتنا مووچەیێ فەرمانبەرێن هەرێما كوردستانێ نامینیت».
بریكارێ وەزارەتا پەترۆلا ئیراقێ ئاماژە ب وێ چەندێ كر كو وەزارەتا پەترۆلێ یا بەرهەڤە بۆ هنارتنا پەترۆلا هەرێما كوردستانێ.
ناڤبری گوت ژی» دۆسێیا گرێبەستێن پەترۆلی یێن هەرێما كوردستانێ ژ ئالیێ وەزارەتا سامانێن سروشتی ل هەرێما كوردستانێ دهێنە بڕێڤەبرن، چونكە ژ ئالیێ هەرێما كوردستانێ و كۆمپانیێن بەرهەمهێنەرێن پەترۆلێ هاتینە ئیمزاكرن».
بریكارێ وەزارەتا پەترۆلا ئیراقێ دیاركر ژی كو وان ئاسانكاری و پێرابوونێن پێدڤی وەرگرتینە بۆ وێ چەندێ د زووترین دەمدا هنارتنا پەترۆلا هەرێما كوردستانێ دەست پێ بكەت و گوت» ل ل نێزیك دێ ل گەل كۆمپانیێن پەترۆلی و هەرێما كوردستانێ گەهینە رێككەفتنێ».

سەرۆك بارزانی، ب هەلكەفتا سالڤەگەڕا 55 یا دامەزراندنا ئێكەتییا زانایێن ئایینێ ئیسلامێ ل كوردستانێ پەیاما پیرۆزباهیێ ئاراستەی سەرۆك و ئەندامێن مەكتەبا تەنفیزی وهەموو مامۆستایێن ئایینێ پیرۆزێ ئیسلامی ل كوردستانێ كر. و تێدا گوت» ب هەلكەفتا سالڤەگەڕا 55 یا دامەزراندنا ئێكەتییا زانایێن ئایینێ ئیسلامێ ل كوردستانێ پیرۆزباهییەكا گەرم ل سەرۆك و ئەندامێن مەكتەبا تەنفیزی و جڤاتا ناڤەندییا ئێكەتییا زانایان و هەموو مامۆستایێن ئایینێ پیرۆزێ ئیسلامێ ل كوردستانێ دكەم».
گوت ژی» دامەزراندنا ئێكەتییا زانایێن ئایینێ ئیسلامێ ل كوردستانێ ل سەر راسپاردەیا بارزانیێ نەمر، پێنگاڤەكا دیرۆكی بوو بۆ ب ئاراستەیا ب هێزكرنا رۆلێ مامۆستایێن ئایینی ل شۆرش و خەباتا گەلێ مە. ئەڤ بڕیارە دوپاتكرن بوو ل سەر پێگەهێ مامۆستایان و مەزنە زانایێن كورد یێن ئایینێ ئیسلامێ د بەلاڤكرنا تێگەهشتنا نەتەوەیی و نیشتمانپەروەری و پێكڤەژیانێ د ناڤ تەخ و چینێن جڤاكیدا و رۆلێ وان د پێشڤەبرنا دۆزا رەوایا گەلێ مە د هەموو قووناغاندا».
ل دووماهیێ گوت» ل سالڤەگەڕا دامەزراندنا ئێكەتییا زانایێن ئایینێ ئیسلامێ ل كوردستانێ هیڤییا سەركەفتنێ بۆ ئێكەتییا زانایێن ئایینێ ئیسلامێ ل كوردستانێ و هەموو مامۆستایێن ئایینی یێن بەرێز دخوازم و دەستخوەشیێ ل وەستیان و ئەركێ وان یێ پیرۆز دكەم».
نێچیرڤان بارزانی، سەرۆكێ هەرێما كوردستانێ ژی پەیامەكا پیرۆزباهیێ ئاراستەی ئێكەتییا زانایێن ئایینێ ئیسلامێ ل كوردستانێ كرو تێدا گوت»ئێكەتییا زانایان و مامۆستایێن ئایینی، وەك چاوان ل سەردەمێ شۆرشێ خەبات كریە و قوربانی داینە، ل سەردەمێ ئازادیێ ژی دا بەرهەڤی و رۆلێ بەرچاڤ هەیە د هێزكرنا كەلتوورێ پێكڤەژیانێ و هەڤدوقەبوولكرنێ و لێبۆرینێ، هەروەسا ل بەرهنگاربوون و نەهێلانا هزرا توندڕەوی و دەمارگێری و پێشڤەبرن ب گیانێ نیشتمانپەروەری و ئاشتییا جڤاكی».
پتر گوت»د ڤێ هەلكەفتێدا شەهیدێن ئێكەتییا زانایێن ئایینێ ئیسلامێ ل كوردستانێ ب رێزڤە دئینینە بیرا خوە و سلاڤان بۆ گیانێ وان یێ پاقژ دهنێرین، هەروەسا پشتەڤانییا خوە بۆ كار و خەباتا ئێكەتییا زانایان ژ پێخەمەت مسۆگەركرنا هەموو مافێن مامۆستایێن ئایینی دوپات دكەین».
خویاكر ژی»دوپات دكەین ژی كو هەرێما كوردستانێ بێی جوداهی بۆ هەردەم دێ ب نیشتمانێ پێكڤەژیانێ بۆ هەموو پێكهاتەیێن ئایینی و نەتەوەیی مینیت و ب هەموو شێوەیەكی دێ روو ب روویێ گوتارا كەربێ و هەر بزاڤەكێ بۆ تێكدانا كەلتوورێ پێكڤەژیانێ بین».
هەر ب هەمان هەلكەفت، مەسرور بارزانی، سەرۆكێ حوكمەتا هەرێما كوردستانێ، پەیامەكا پیرۆزباهیێ ئاراستەی سەرۆك و ئەندامێن ئێكەتییا ناڤبری كر و تێدا دبێژیت» گەرمترین پیرۆزباهییان ئاراستەی سەرۆك و ئەندامێن مەكتەبا تەنفیزی و هەموو ئەندامێن ئێكەتییا زانایان دكەم».
گوت ژی»ب رێزڤە ل رۆلێ گرنگ یێ ئێكەتییا زانایێن ئیسلامێ ل كوردستانێ و زانایێن ئایینی ب گشتی دنێرین د هێزكرنا بنەما و بهایێن بلند و مرۆڤی یێن ئایینێ ئیسلامێ و بەرهنگاربوونا هزرا توندڕەویێ و ب هێزتركرنا میانڕەویێ و كەلتوورێ پێكڤەژیانا ئاشتییانە د ناڤبەرا پێكهاتەیێن جودا یێن كوردستانێ دا».

دوهی ئێكشەمبی 21/9/2025، مەسرور بارزانی، سەرۆكێ حوكمەتا هەرێما كوردستانێ د بەردەوامییا سەرەدانا خوە بۆ پارێزگەها دهۆكێ و ئیدارەیا سەربخوە یا زاخۆ دا زەنگا دەستپێكرنا سالا نوو یا خواندنێ 2025- 2026 ل قوتابخانەیەكا زاخۆ لێدا هەروەسا چەندین پڕۆژەیێن خزمەتگوزاری یێن گرنگ ل ئیدارەیا سەربخوەیا زاخۆ ڤەكرن.
مامۆستایێن مە نموونەیا كەسانێن دلسۆز و نیشتمانپەروەرن
ل دەستپێكا سەرەدانا خوە بۆ زاخۆ، مەسرور بارزانی، سەرۆكێ حوكمەتا هەرێما كوردستانێ زەنگا سالا نوو یا خواندنێ ل قوتابخانەیا (دم دم) ل زاخۆ لێدا و د پەیڤەكێدا ئاماژە دیاركر: سوپاسییەكا مەزن یا مامۆستایێن قەدرگران دكەم كو سەرەرای هەموو ئاستەنگ و نەخوەشیان و بێ مووچەیی، بەردەوامی ب پرۆسەیا خواندنێ دا.
دەستپێكا سالا نوو یا خواندنێ 2025- 2026 ل هەوە و ل هەموو خەلكێ كوردستانێ پیرۆز بیت، هیڤیدارم سالەكا پڕ دەستكەفت و خوەشی بیت بۆ هەموو قوتابییان و بۆ مامۆستا و دایك و بابێن خوەشتڤی ژی. دەستخوەشییەكا مەزن ل دایكان و بابان دكەم بۆ پشتەڤانییا وان ل هنارتنا زارۆیێن خوە بۆ قوتابخانەیان، بۆ وێ چەندێ پاشەڕۆژا گەلێ مە گەش بیت و من باوەرییەكا ب هێز ب وێ چەندێ هەیە كو ئەو زارۆیانە دێ بنە سەركردە ودێ وەلاتێ مە بەر ب قووناغەكا باشتر بەن.
سوپاسییەكا مەزن یا مامۆستایێن قەدرگران دكەم كو سەرەرای هەموو ئاستەنگ و نەخوەشی و بێ مووچەییێ، بەردەوام بوون ل خواندنێ، ئەو مامۆستایێن كوردپەروەر و نیشتمانپەروەر و دلسۆز رێ چو جاران رێ نەدایە كو خواندن ب راوەستیت یان قوتابی بێ بەهر ببیت ژ خواندنێ. دەستخوەشییەكا مەزن ل وان مامۆستایان دكەم، ب راستی نموونەیا خەلكێ دلسۆز و نیشتمانپەروەر، ئەو مامۆستانە كو سەرەرای وان هەموو نەخوەشییان دیسان بەردەوام بووینە. هیڤییا من ئەوە كو ل دەمەكێ نێزیك، ئەڤ قەیرانە بەر ب دووماهیێ بچن و ئێدی ئەڤ كێشە نەمینن و هەموو كەس و فەرمانبەر ل كوردستانێ، ب تایبەتی مامۆستا، بەردەوام بن د وەرگرتنا هەموو مافێن خوەدا، وەك حوكمەتا هەرێما كوردستانێ ژی ئەم دێ پشتەڤان بیت كو هەر تشتەكێ د شیانێن مەدا بیت و ئینشائەللا دێ قەرەبوویا وێ زەحمەتێ بۆ كەین.ئەڤرۆ سالڤەگەڕا دامەزراندنا ئیدارەیا سەربخوەیا زاخۆیە ژی، پیرۆزباهیێ ل هەوە هەموویان و خەلكێ زاخۆ دكەم، هیڤیدارم زاخۆ بەردەوام د پێشكەفتنێدا بیت. ل چەند سالێن بۆری ب خەمخۆری و زەحمەت و وەستیانا خەلكێ زاخۆ و بەرپرسێن ئیداری یێن زاخۆ، ئەم دبینین پێشكەفتنەكا گەلەك باش تێدا هەبوویە. زاخۆ هەردەم پێشەنگ بوویە ل نیشتمانپەروەریێ و بەرگریێ و خۆڕاگریێ و قەهرەمانێن گەلەك مەزن ل زاخۆ دەركەفتینە و بەرگری ژ وەلاتێ مە كریە، ئەڤرۆ دەستێ ئاڤەدانیێ ل زاخۆ گەلەك یێ دیارە و ل هەموو كوردستانێ و ئیراقێ و دەڤەرێ وەك باژێرەكێ پێشكەفتی دنێرنە زاخۆ. مە ئەڤرۆ ژی چەندین پڕۆژە هەنە بۆ وێ چەندێ دیسان خزمەتەكا زێدەتر پێشكێشێ خەلكێ خوەشتڤیێ زاخۆ بكەین، نەخوەشخانەیا زارۆیان دێ ڤەكەین، پێشانگەهەكا نێڤدەولەتی ژی ل ڤێرێ هەیە دێ وێ ژی ڤەكەین، پاشی دێ پشكا دویێ یا كۆرنیشێ زاخۆ ڤەكەین كو بوویە ئێك ژ جوانترین جهێن هەرێما كوردستانێ.
خواندن ل وەلاتێ مە گەلەك یا پێدڤییە، ل گەل وێ چەندێ ژی دا پەروەردەكرنا قوتابییان هێشتا یا پێدڤیترە، ئەز دەستخوەشیێ ل وەزیری و ستافێ وەزارەتێ و مامۆستایێن بەرێز دكەم بۆ وێ چەندێ كو ل دەمێ بۆری گەلەك خوە وەستاندیە بۆ وێ ئێكێ ئاستێ خواندنێ ل وەلاتێ مە بەر ب پێش ببەن، ب راستی ژی گەلەك یا بەر ب پێشڤەچووی و گوهۆڕینێن مەزن هاتینە كرن.
ب راستی دەستكەفتەكێ دیرۆكییە كو گەلەك داتایێن خواندنێ ل سەر ئاستێ هەرێما كوردستانێ نوكە ب شێوەیەكێ ئەلكترۆنی بۆ مامۆستا و كاربدەستان بەردەستن و گەلەك ب ساناهی دشێن بڕیارێ ل سەر بنەمایەكێ زانستی بدەن بۆ هەر تشتەكێ پێدڤی بیت ژ روویێ خواندنێ بۆ قوتابخانەیێن خوە. هەروەسا بەرنامەیەكێ دی هەیە بۆ باشتركرنا تێكهەلبوونا قوتابییان ب رێیا ئەلكترۆنی ل گەل سیستەمێ خواندنێ، هیڤیدارم ئەوژی ل دەمەكێ نێزیك هەموو بەرنامە بكەڤنە كاری، ئەڤە ژی دێ كاریگەرییەكا گەلەك مەزن ل سەر ئاستێ خواندنێ و تێكگەهشتنا قوتابییان كەت و ئەڤە پێشكەفتنەكا گەلەك مەزنە كو ل سەر ئاستێ رۆژهەلاتا ناڤین ب راستی نموونەیە. جارەكادی دەستخوەشیێ ل هەوە دكەم بۆ وان دەستكەفتێن هەوە هەین.
ل سالێن بۆری بزاڤەكا مەزن هاتە كرن كو قوتابخانەیێن زێدەتر بهێنە دروستكرن، پتر ژ 200 قوتابخانەیان هاتنە دروستكرن و نێزیكی دو هزار قوتابخانە ژی ل سەر ئاستێ هەرێما كوردستانێ هاتینە نووژەنكرن، هێشتا ژی پێدڤییە زێدەتر بهێنە دابینكرن، بەلێ ژبەركو شیانێن ل بەردەست هند بوون، هەر ئەو هاتە كرن، بەلێ بزاڤێن مە دێ د بەردەوام بن بۆ دروستكرنا قوتابخانە و ناڤەندێن زانستی یێن زێدەتر و هاریكارییا زێدەتر ژی بۆ قوتابی و مامۆستایان دێ هێتە كرن.
جارەكادی هیڤیدارم سەركەفتی بن، ئینشائەللا كوردستانا مە هەر ئاڤەدان بیت، خواندنا مە بەر ب پێشڤە بچیت ژ روویێ پەروەردەیی ژی ڤە ئەز داخوازێ ژ مامۆستا و قوتابی و دایك و بابێن خوەشتڤی دكەم كو بابەتێ نیشتمانپەروەریێ و ژینگەهپارێزیێ ببیتە پشكەكا گەلەك گرنگ د سیستەمێ پەروەردەییێ هەر قوتابخانەیەكێ و د هەر مالەكێدا. وەلاتێ مە وەلاتێ شیرین و پیرۆزە، جهێ خەباتكەرێن مەیە، جهێ وان شەهیدایە كو خوونا خوە ژ پێخەمەت وی رشتی، هیڤیدارم ڤی وەلاتە ب پاقژی بپارێزن، پێدڤیە مامۆستا، قوتابییان تێبگەهینن كو بابەتێ ژینگەهپارێزیێ گەلەك گرنگە و ب هەمان شێوە بابەتێ نیشتمانپەروەریێ كو ئەم و ئەڤ ئاخە ژێك ناهێینە جوداكرن، مە خەونێن گەلەك مەزن و ئومێدێن گەلەك مەزن هەنە بۆ وێ چەندێ وەلاتێ مە بەر ب قووناغێن گەلەك پێشكەفتیتر بچیت.
ل دووماهیێ داخواز دكەم و هیڤییا من ئەوە كو هەڤبەندییەك ساخلەم و باش د ناڤبەرا قوتابییان و مامۆستایاندا هەبیت ل سەر بنەمایێ خوەشتڤیێ و رێزگرتنێ، نەك ترس و نەچاربوون، پێدڤییە هەموو قوتابی رێزێ ل مامۆستا و دایك و بابێن خوە بگرن، مامۆستا و دایك و باب ژی پشتەڤان بن بۆ وێ چەندێ هەموو قوتابیێن مە هەموو شیانێن خوە بكاربینن و بەر ب قووناغەكا گەشتر و كوردستانەكا ئاڤەدانتر پێنگاڤان ب هاڤێژن.
ڤەكرنا نەخوەشخانەیا زارۆیان ل زاخۆ ل دووڤ ستانداردێن نێڤدەولەتی
د بەردەوامییا سەرەدانا خوە دا بۆ پارێزگەها دهۆكێ و ئیدارەیا سەربخوە یا زاخۆ دا بۆ ڤەكرنا پڕۆژەیێن خزمەتگوزاری، دوهی ئێكشەمبی 21/9/2025، مەسرور بارزانی، سەرۆكێ حوكمەتا هەرێما كوردستانێ نەخوەشخانەیا زارۆیان ل زاخۆ ڤەكر و پەیڤەك پێشكێشكر و ئەڤە دەقێ وێ یە :
ئەڤرۆ ب خوەشحالیڤە هاتینە زاخۆ بۆ ڤەكرنا چەندین پڕۆژەیێن گرنگ. ئێك ژ وان ئەڤ نەخوەشخانەیا زارۆیانە، كو دێ ئەڤرۆ دەست بكاربیت و كەڤیتە د خزمەتا وەلاتییاندا، ب تایبەتی خەلكێ باژێرێ زاخۆ یا خوەشتڤی.
دەستخوەشیێ ل هەموو ئالییەكی دكەم بۆ ڤێ دەستكەفتێ. بێگۆمان، حوكمەت دێ بەردەوام بیت د پشتەڤانیكرنێدا بۆ وێ چەندێ زێدەتر خزمەتا خەلكێ خوە بكەین و ئەو خزمەتگوزاریێن بنەڕەتی كو د پێدڤینە، بۆ هەموو هەموو خەلكی بهێنە دابینكرن.
خوەشحالم كو ل سەر ئاستەكێ گەلەك باش، ئەڤ نەخوەشخانەیە هاتیە دروستكرن. هیڤیدارم هیچ كەسەك هیچ دەمەكی نەچار نەبیت بهێتە نەخوەشخانەیێ. بەلێ هەكە هاتن، هیڤییا من ئەوە ل ڤێرێ خزمەتەكا باش یا نەخوەشان بهێتە كرن، ب تایبەتی زارۆیێن مە یێن ئەزیز و هیچ دەمەكی پێدڤی ب وێ چەندێ نەبیت بەر ب جهەكێ دی بچن و هەر تشتەك پێدڤی بیت ل ڤێرێ بۆ بهێتە بجهئینان، ژ روویێ ساخلەمیێ و چارەسەریێڤە.
جارەكادی دەستخوەشیێ ل هەموو ئالییەكی دكەم. سوپاسییا هەموو نوشدار و كارمەندان ژی دكەم بۆ وێ زەحمەتا كێشای. هیڤیدارم هەردەم سەركەفتی بن و كوردستانا مە ئینشائەللا بەر ب رۆژێن خوەشتر و ئاڤەدانییەكا زێدەتر بچیت.
ڤەكرنا قووناغا دویێ یا كۆرنیشێ زاخۆ
هەر دوهی، سەرۆكێ حوكمەتا هەرێما كوردستانێ، قووناغا دویێ یا كۆرنیشێ زاخۆ ڤەكر. گوژمەیێ قووناغا دویێ یێ پڕۆژەیێ كۆرنیشێ زاخۆ زێدەتر ژ شەش ملیار دینارایە و درێژییا وی نێزیكی سێ كیلۆمەترایە.
قووناغا دویێ یا پڕۆژەی زێدەتر ژ 50% كەسكاتیێ بخوەڤە دگریت، پەیادەیا هاتنوچوونێ ب درێژییا هەشت مەتران بۆ هەر ئالییەكی هاتیە دروستكرن، هەروەسا خوارنگەه، كافیترییا و بەلەمێن گەشتیاری د پڕۆژەیدا هەنە.
كۆرنیشێ زاخۆ، ئێك ژ پڕۆژەیێن جوان و سەرنجڕاكێشێن كابینەیا نەهێ یا حوكمەتا هەرێما كوردستانێ و ئیدارەیا سەربخوەیا زاخۆیە، كو بەردەوام وەلاتیێن دەڤەرێن جودا یێن كوردستانێ و گەشتیار سەرەدانا وی دكەن.
ڤەكرنا ئێكەمین پێشانگەها نێڤدەولەتییا زاخۆ
مەسرور بارزانی، سەرۆكێ حوكمەتا هەرێما كوردستانێ، دوهی ئێكشەمبی 21/9/2025 ئێكەمین پێشانگەها نێڤدەولەتییا بازرگانی ل ئیدارەیا سەربخوەیا زاخۆ ڤەكر.
زێدەتر ژ 100 كۆمپانیێن ناڤخوەیی و بیانی كو وارێن جودا جودا دا كار دكەن، پشكداریێ د ئێكەمین پێشانگەها بازرگانییا نێڤدەولەتییا زاخۆ دا دكەن.
پێشانگەها نێڤدەولەتییا زاخۆ، ل سەر رووبەرێ هەشت هزار و 600 مەترێن دوجاركی هاتیە دروستكرن كو چار هزار مەترێن دوجاركی كەسكاتییە. د پێشانگەهێدا جهێن راوەستیانا ترۆمبێلان ب رووبەرێ 13 مەترێن دوجاركی هاتینە دروستكرن.
ستەیچ، جهێ روونشتنا مێهڤانان، خوارنگەه، چەند هۆلەكێن بچووك بۆ كۆنفرانسان، سیستەمێ دەنگێ، كامیرێن چاڤدێریێ، كارەبا بەردەوام، باشترین سیستەمێ ئاگرڤەمراندنێ بۆ پێشانگەهێ هاتینە دابینكرن.

سەرۆك بارزانی ل گەل شاندەكێ هەڤپەیمانییا (حەسم) و هەڤپەیمانییا (نەینەوا بۆ خەلكێ وێ) كۆمبوو.
بارەگەهێ بارزانی بەلاڤكر» ل سەلاحەدین سەرۆك مەسعود بارزانی ل گەل شاندەكێ هەڤپەیمانییا حەسم و هەڤپەیمانییا نەینەوا بۆ خەلكێ وێ ب سەرۆكاتییا سابت عەباسی، وەزیرێ بەرگرییا ئیراقێ كۆمبوو».
بارەگەهێ بارزانی ئاماژە ب وێ چەندێ كر» د دیدارەكێدا رەوشا سیاسییا ئیراقێ هاتە گەنگەشەكرن و بیر و بۆچوون ل دۆر هەلبژارتێن داهاتی یێن جڤاتا نوونەرێن ئیراقێ هاتنە لێكگۆهارتن و دوپاتی ل سەر هەماهەنگییا ئالییان بۆ دەربازكرنا كێشە و گرفتێن سیاسی هاتە كرن».

دوهی دوشەمبی 20/9/2025، مەسرور بارزانی، سەرۆكێ حوكمەتا هەرێما كوردستانێ، د رێوڕەسمێ ڤەكرنا عەمبار و سەنتەرێ پشكنینا پێشوەخت یا كۆمپانییا تۆیۆتا ل دهۆكێ، د وێ رێوڕەسمێدا سەرۆكێ حوكمەتا هەرێمێ پەیڤەك پێشكێشكر و ئەڤە دەقێ وێ یە:
ب خێرهاتنەكا تایبەت ل بالیۆزێ چاپۆنێ دكەم بۆ هەرێما كوردستانێ، هەروەسا سوپاسییا بەرهەڤبوونا قونسل و نوونەرێن كۆمپانییا تۆیۆتا ل ئیراقێ دكەم و دەستخوەشییەكا گەرم ل كاك سەرداری و سەردار گرۆپ دكەم بۆ ڤی كارێ پیرۆز یێ كری.
ب راستی جهێ دلخوەشیێیە كو دبینین وەلاتەكێ وەكو چاپۆنێ، باوەرییەكا وەسا ب هەرێما كوردستانێ هەیە، كو باژێرەكێ كوردستانێ دەستنیشان دكەت بۆ وێ چەندێ ل ڤێرێ هەموو ترۆمبێلێن چاپۆنی كو دهێنە د ئیراقێدا، ل ڤێرێ بۆ باژێرێن دی بهێنە هنارتن. حوكمەتا هەرێما كوردستانێ هەردەم پشتەڤان بوویە و دێ بەردەوام بین ژی د پشتەڤانیكرنا ڤان پڕۆژەیێن مەزندا، پڕۆژەیێن بازرگانی و وەبەرهێنانێ كو بێگومان، دێ هاریكار بن د پێشئێخستنا ئابوورێ هەرێما كوردستانێدا و هاریكارییا خەلكێ هەرێما كوردستانێ كو ئەوژی بشێن زێدەتر فێری كارێن ژ ڤی جۆری ببن.
دلخوەش بووم من دیتی پشكەك ژ كارمەندێن ل ڤی جهی كاردكەن خەلكێ ڤێرێ نە و فێری كارێ پیشەیی دبن. نەك تنێ ترۆمبیل دهێنە ڤێرێ و پاشی دهێنە هنارتن، بەلكو ل ڤێرێ ب شێوەیەكێ گەلەك باش ژ كۆنترۆلا جۆری كو ل ڤێرێ دهێتە كرن، ژ ئالیێ ستانداردەكێ چاپۆنی و پشكەك ژ پارچەیێن وان ترۆمبێلان ژی ل ڤێرێ دهێنە گرێدان. ئەڤە هەموو دروستكرنا دەلیڤەیێن كارییە، زێدەتر شارازەییێ دئینیتە د ناڤ وەلاتیدا، خەلكێ مە دێ فێری كارێ باشتر بن و هیڤیدارم زێدەتر ژ ڤێ چەندێ كارێ پیشەیی بهێتە دروستكرن، كارێن ژ ڤی جۆری، و ئەڤ كۆمپانییا ژی بشێت كارێن گەلەك ژ ڤی مەزنتر ژی ئەنجام بدەت.
پشتڕاست بن ژ وێ چەندێ كو حوكمەتا هەرێما كوردستانێ دێ پشتەڤانا هەوە بیت بۆ پاراستنا هەموو مافێن بازرگان و وەبەرهێنەران و د هەمان دەمدا حوكمەتا هەرێمێ وەكو هەردەم دێ پارێزەرا مافێن وەلاتییان ژی بیت و ئەو هەڤبەندییا ساخلەم كو پێدڤییە د ناڤبەرا بارزگان و وەلاتییاندا بهێتە دروستكرن، دێ حوكمەت هاریكار و پشتەڤان بیت و ئاسانكاریێن پێدڤی ژی دێ بۆ كەت.