دوهی دوشەمبی 11/3/2024، مەسرور بارزانی، سەرۆكێ حوكمەتا هەرێما كوردستانێ، پەیامەك ب هەلكەفتا سالڤەگەڕا 54 یا رێككەفتنا 11 ئادارا 1970 بەلاڤكر و ئەڤە دەقێ وێ یە:
ئەڤرۆ 54 سال ب سەر راگەهاندنا رێككەفتنا 11 ئادارا 1970 دەرباز دبن كو دەستكەفتەكا دیرۆكی یا شۆڕەشا ئەیلوولا مەزن بوو ب رێبەرایەتییا بارزانیێ نەمر.
شۆرەش و خۆڕاگری و قوربانیدانا گەلێ كوردستانێ، حوكمەتا ئیراقی یا ئەوی سەردەمی نەچاركر دانپێدانێ ب پشكەك ژ مافێن رەوا یێن گەلێ كوردستانێ بكەت. ب تایبەتی رێككەفتن ل سەر راستڤەكرنا دەستوورێ بەروەخت و دانپێدان ب ئەوێ چەندێ ئیراق ژ دو نەتەوەیێن سەرەكی (ئەرەب و كورد) پێكهاتییە و دستوور ژی دانپێدانێ ب مافێن نەتەوەیی یێن گەلێ كورد بكەت.
بەلێ پاشی رژێما ئەوی سەردەمی ل ئیراقێ، ژ رێككەفتنێ پاشڤەزڤری و پەنا برە شەڕی و دژایەتیكرنا خەلكێ كوردستانێ و د ئەنجامدا ئیراق تووشی مالوێرانیێ و كارەساتێن مەزن كر كو هەتا نوكە ژی خەلكێ ئیراقێ، باجا وان ددەت.
د ئەڤێ هەلكەفتێدا، دوپاتیێ ل پێدڤی و گرنگییا پاراستن و رێزگرتنێ ل مافێن دستووریێن گەلێ كوردستانێ و قەوارەیێ دستووریێ هەرێما كوردستانێ دكەین. خەلكێ كوردستانێ چو جاران رێكێ نادەت مافێن وی بهێنە پێشێلكرن و ستەم و زۆرداری لێ بهێتە كرن و ئیراق بۆ سەردەمێ دیكتاتۆریەتێ و تاكرەویێ بزڤریت.

ب هەلكەفتا سالڤەگەڕا 54 سا رێككەفتنا 11 ئادارێ، دوهی دوشەمبی 11/3/2024 مەكتەبا سیاسی یا پارتی دیموكراتی كوردستان پەیامەك بەلاڤكر و ئەڤە دەقێ وێ یە:
ئەڤرۆ سالڤەگەڕا 54 یا رێككەفتنا (11 ئادارێ) یە، ئەو رێككەفتنا د ناڤبەرا سەركردایەتییا سیاسی یا شۆڕەشا ئەیلوولێ ب رێبەرییا بارزانیێ نەمر و حوكمەتا ئیراقێ یا ئەوی سەردەمی هاتییە ئیمزاكرن، ئەو دەستكەفتە ژی بەرهەم و ئەنجامێ خەبات و خۆڕاگری و قوربانیدانا رۆلێن كوردستانێ و شۆڕەشا ئەیلوولا مەزن بوو.
رێككەفتنا 11 ئادارێ، وەكو بەلگەنامەیەكا سیاسی و قانوونی كاریگەرییەكا مەزن هەبوو ل سەر بزاڤا رزگاریخوازا گەلێ مە، ئێكەمین جار بوو حوكمەتا ئیراقێ بهێتە نەچاركرن دانپێدانێ ب مافێن سیاسی و نەتەوەیی و ئیداری یێن گەلێ مە بكەت، هەروەسا رێكا دانوستاندنێ بۆ چارەسەركرنا پرسا كوردی ل ئیراقێ، بكاربینیت.
تایبەتمەندییا ئەوی دەستكەفتێ مەزن د وێ چەندێ دایە سەرەرای پەیداكرنا دەلیڤەیا رەوشەكا نوو یا دانوستاندنێ و ئاشتبوونێ، هەتا دەمەكی ژی دووماهی ب شەڕ و كوشتار و مالوێرانیێ ئینا، هەروەسا هەژمارەكا بڕیارێن مەبدەئی و راست ژی هاتنە دان سەبارەت پرسا نەتەوایەتی ل ئیراقێ و پێنگاڤێن بەرچاڤ هاتنە هاڤێتن بۆ دەستەبەركرنا مافێن مە ژ وان : بڕیاردان ل سەر ئۆتۆنۆمیێ ل كوردستانا ئیراقێ و زمانێ كوردی بۆ زمانێ فەرمیێ دویێ و چەندین دەستكەفتێن دی.
رێككەفتنا (11 ئادارێ) ل سەر ئاستێ ناڤخوە و دەرڤە دا دەنگڤەدانەكا سیاسی هەبوو، لەوما دەلیڤەیەكا دی پەیداكر بۆ ناساندنا پرسا مە یا نەتەوەیی و رەوایەتییا خەباتا گەلێ مە بۆ گەهشتن ب ئارمانجێن مە و ب هێزكرنا بنەمایێن دیموكراسیێ و پێكڤەژیانێ، لەوما ئەو رێكەفتنە پێنگاڤەكا ب مفا بوو بۆ هەموو گەل و پێكهاتەیێن ئەوی وەلاتی.
ژ ئالییەكێ دی ڤە ئەوێ روودانا گرنگ رۆل و سەنگێ بزاڤا رزگاریخوازییا كوردی بۆ قۆناغەكا سیاسی یا پێشكەفتی ڤەگوهاست ب جۆرەكی ل سەر مەیدانا سیاسییا ناڤخوەیی و جیهانی وەكو هیزەكا كاریگەر و خودان بڕیار رۆلێ هەژیێ خوە بگێریت.
رۆل و پلان و حیكمەتا بارزانیێ نەمر د ئیمزاكرنا رێككەفتنا (11 ئادارێ) دا ئەو هیڤییە پەیداكر و ئەو سۆزە بجهئینا بۆ ڤەكرنا دەرگەهەكێ نوو یێ ئازادیێ و سەرفەرازیێ و نەچاركرنا حوكمەتا ئیراقێ بۆ بجهئینانا بەندێن رێككەفتنێ.
رێككەفتنا (11 ئادارێ) كو پشتی زنجیرەكا شۆڕەش و بەرخۆدان و دەردەسەرییان پەیدابووی و د ئەوێ قۆناغێدا بناغەیەكێ راست و دروست ژی بۆ چارەسەركرنا كێشەیا كوردی و ب هێزكرنا ئێكڕێزیێ و رێكخستنا ناڤمالا كوردی داڕێشت، هەروەسا باشتركرنا ژیانا وەلاتییان و رەوشا ژیارا وان و ئاڤەدانكرنێ.
ئارمانجا سەرەكی و ستراتیژییا سەركردایەتییا پارتیا مە د ئەوی دەمیدا بجهئینانا ئێك ب ئێك یا بڕگەیێن ئەوێ رێككەفتنێ بوو وەكو دەستپێكا قۆناغەكا نوو و پاشەڕۆژەكا گەش و بەرهەمدار بۆ گەلێ مە، بەلێ حوكمەتا ناڤەندییا ئیراقێ ل ئەوی سەردەمی بەرۆڤاژی هندی ژێ دهات ژ بجهئینانا بەندێن وێ پاشڤە دزڤری، ب هەموو شێوەیەكی نەدخواست رێككەفتن ب ئەنجام بگەهیت، لەوما بەردەوام ژ ماندەلكرنا ناسنامەیا نەتەوەیێ و كوردستانیبوونا كەركووكێ و ئەنجامدانا سەرژمێرییا ئاكنجییان ل ئەوان دەڤەرێن پترییا وان كورد بوون، هەروەسا گوهۆڕینا دیموگرافییا ئاخێ و شێواندنا واقعێ جیوگرافی و نەتەوەیی و دابڕینا وان ژ ئاخا كوردستانێ، ل گەل ئەوێ چەندێ ژی دا ئەو رێككەفتنە بۆ بناغەیەكێ راست و دروست یا پڕۆسەیێن دانوستاندنێ، كو شۆڕەشا كوردی ل گەل حوكمەتا ناڤەندییا ئیراقێ ئەنجامداین.
د ئەڤێ دەلیڤەیێ دا ل جهێ خوەیە جارەكادی ئاماژێ ب رەوشا هەستیار و مەترسیدارا سیاسی ل ئیراقێ بدەین، ئاماژە بدەین ب ئەوان بەربەست و ئاستەنگێن دهێنە پێشبەری بجهئینانا ئەوێ رێككەفتنا سیاسی یا كو هێزێن سیاسی ل سەر رێككەفتین بۆ بڕێڤەبرنا ئیراقەكا فیدرال، هەروەسا پاشڤە زڤرینێ ژ بنەمایێن قانوونی و دستووری یێن فیدرالییەتێ و (هەڤپشكی، سازان، هەڤسەنگی) یێ، كو ئەڤە ژی د بەرژەوەندییا ئیراقێ و پڕۆسەیا دیموكراسی و پێكڤەژیانێدا نینە و دیرۆكێ سەلماندییە پێگیربوون ب رێككەفتنان و قانوون و دستووری ژ ئالیێ هەر كەس و ئالییەكی ڤە، پاشەڕۆژ گەش نابیت.
د ئەڤێ هەلكەفتا دیرۆكیدا، ئەم ل پارتی دیموكراتی كوردستان، وەكو هەردەم دوپاتیێ ل سەر رێكخستنا ناڤمالا كوردستانی دكەین ب جۆرەكی ئەم هەموو ئالی ل سەر پرسێن ستراتیژیێن كوردستانی، ل داكۆكیكرن ژ مافێن خوە یێن رەوا و دستووری و ژ ئاخ و دەستكەفت و قەوارەیێ مە یێ نیشتمانی، هەڤئاراستە و ئێكگۆتار بین و هەموو بزاڤێن رژد و دلسۆز بكەین ژ پێخەمەت چارەسەركرنا كێشەیان و ئەم هەموو ئالی بەرپرسیارانە بەرژوەندییا گشتییا خەلكێ كوردستانێ ل بەرچاڤ بگرین و ئەركێ مە یێ بەراهیێ پاراستنا ئاخ و خەلكێ كوردستانێ و ئەڤی قەوارەی و دەستكەفتێن مە بیت.
هەر ب هەلكەفتا (11 ئادارێ) كو هەڤدەمە ل گەل ئازادكرنا باژێرێ هەولێرا ئەزیز ل (11 ئادارا 1991) ب ئەوێ هەلكەفتێ پیرۆزباهییەكا گەرم و تایبەت ل رۆلێن خۆڕاگرێن باژێرێ دێرین و پایتەختێ هەرێما كوردستانێ دكەین، هیڤیدارین هەردەم د ئاسوودە و ئارام و د پێشكەفتنێدا بن.
ل بیرەوەرییا رێككەفتنا (11 ئادارێ) پیرۆزباهییەكا گەرم ل جەماوەرێ دلسۆزێ كوردستانێ دكەین، سەرێ رێز بۆ شەهیدێن رێكا ئازادی و سەربخوەییا كورد و كوردستانێ د چەمینین، سلاڤ و رێز ل مالبات و كەسوكارێن سەربلندێن شەهیدێن مە یێن نەمر.

سەرۆكێ حوكمەتا هەرێما كوردستانێ ب هەلكەفتا هاتنا مەها رەمەزانا پیرۆز، پەیامەكا پیرۆزباهیێ بەلاڤكر و دبێژیت: لاڤا ژ خودایێ مەزن و میهرەبان دكەین، مەها رەمەزانا پیرۆز، ببیتە ئەگەرێ خوەشگوزەرانیێ و ب دووماهی هاتنا نەهامەتی و قەیرانانا ل جیهانێ.
مەسرور بارزانی، سەرۆكێ حوكمەتا هەرێما كوردستانێ د پەیاما خوە دا گۆت ژی» ب هەلكەفتا هاتنا مەها رەمەزانا پیرۆز، گەرمترین پیرۆزباهییان ل موسلمانێن كوردستانێ و جیهانێ دكەم، هیڤیدارم مەها خێرێ و خوەشیێ و ئاشتیێ و ئارامیێ بیت».
گۆت ژی» لاڤا ژ خودایێ مەزن و میهرەبان دكەین، كو نڤێژ و رۆژی و عیبادەتێ مە هەموویان قەبوول بكەت و مەها پیرۆزا رەمەزانێ، ببیتە جهێ خوەشگوزەرانیێ و ب دووماهی هاتنا نەهامەتیێ و قەیرانان ل جیهانێ».

سەرۆكێ هەرێما كوردستانێ پیرۆزباهییا هاتنا مەها رەمەزانێ ل موسلمانێن كوردستانێ، ئیراقێ و جیهانێ كر و داخوازكر ببیتە هاندەرا تەباییێ ژ پێخەمەت ئاشتیێ و نیشتمانی دا.
نێچیرڤان بارزانی، سەرۆكێ هەرێما كوردستانێ د پەیامەكێدا گۆت» ب هەلكەفتا هاتنا مەها رەمەزانا پیرۆز، ب گەرمی و ژ دل پیرۆزباهیێ ل هەموو موسلمانان ل كوردستانێ و ئیراقێ و جیهانێ دكەم، هیڤیدارم سەقامگیریێ و ئاسودەییێ د گەل خوە دا بینیت و بۆمە هەموویان ببیتە ئەگەرێ خێر و خوەشیێ و دلئارامیێ».
سەرۆكێ هەرێما كوردستانێ داخوازكر» هاتنا ئەڤێ مەها پیرۆز و وانە و چەمك و رامانێن وێ، دەلیڤە و هاندەرا هەموویان ئالییان بیت بۆ پێشڤەبرنا تەباییێ و لێبۆرینێ و پێكڤە كاركرنێ ژ پێخەمەت خێر و باشی و بهایێن بلند یێن مرۆڤی و ئاشتیێ و نیشتمانی».

ب هەلكەفتا هاتنا مەها رەمەزانا پیرۆز، سەرۆك مەسعود بارزانی د پەیامەكێ دا پیرۆزباهی ل هەموو موسلمانێن كوردستانێ و ئیراقێ و جیهانێ كر.
سەرۆك بارزانی د پەیاما خوە دا دبێژیت» ب هەلكەفتا هاتنا مەها رەمەزانا پیرۆز پیرۆزباهیێن خوە ئاراستەی هەموو موسلمانێن كوردستانێ و ئیراقێ و جیهانێ دكەم. ژ خودایێ مەزن دخوازم رۆژی و نڤێژێن هەموویان قەبوول بكەت و ئەڤ مەها پیرۆز ببیتە جهێ خێر و بەرەكەت و ئارامیێ بۆ گەلێ مە».

سەرۆك بارزانی ب هەلكەفتا رۆژا جیهانییا ئافرەتان پەیامەك د تۆا جڤاكییا ئێكس دا بەلاڤكر و ئەڤە دەقێ وێ یە:
هەشتێ مارس، رۆژا جیهانییا ئافرەتان، ل هەموو ئافرەتێن كوردستانێ و ئیراقێ و جیهانێ پیرۆز بیت.
ب ڤێ هەلكەفتێ پشتەڤانییا خوە بۆ مافێن ئافرەتێن كوردستانێ دوپات دكەم و رۆلێ ئافرەتێن كوردستانێ د خەبات و ئازادیخوازییا گەلێ مە دا بلند د هەلسەنگینم.

سەرۆكێ هەرێما كوردستانێ د پەیامەكێ دا پیرۆزباهییا رۆژا ئافرەتێن جیهانێ ل ئافرەتێن كوردستانێ و ئیراقێ و جیهانێ كر و پشتەڤانییا خوە بۆ «ب دەستڤەئینانا یەكسانیێ و هەموو مافێن ئافرەتان» دوپات كر. هەروەسا داخواز ژ ئالیێن سیاسی كر د هەلبژارتنێن داهاتیدا گرنگییا زێدەتر ب بەربژاركرنا ئافرەتان بدەن.
نێچیرڤان بارزانی، سەرۆكێ هەرێما كوردستانێ د پەیاما خوە دا گۆت ژی» د بزاڤ و كار و خەباتا خوە دا بۆ بدەستڤەئینانا یەكسانیێ و هەموو مافێن ئافرەتان، وەكو هەردەم ب هەموو باوەری و شیانان هاریكار و پشتەڤانێ ئەوانم، هێڤییا بەر ب پێشڤەچوونا بەردەوام و سەركەفتنێ بۆ دخوازم».
سەرۆكێ هەرێما كوردستانێ د پەیاما خوە دا گۆت ژی» ب ڤێ هەلكەفتێ ب رێز و پێزانین ڤە هەموو ئەو ئافرەتێن وێرەك دئینینە بیرا خوە كو د كارەوانێ خەباتا ئەوان دا بۆ پاراستن بەرگریێ ژ مافێن خوە سەرێ خوە دانی، یان ب نەحەق بووینە قوربانیێن توندوتیژیێ وهزرا توندرەویێ و پاشڤەمانێ».
نێچیرڤان بارزانی دوپاتكر ژی» ب هەموو شیانان دێ ل بەرانبەر هەر هزر، پەیڤ، ستەم، دەستدرێژی و نەحەقییەكێ دا راوەستین كو ل بەرانبەر ئافرەتان بهێتە كرن» .
نێچیرڤان بارزانی ج ئەوێ پەیاما خوە دا داخواز ژ ئالیێن سیاسی كر د هەلبژارتنێن داهاتی دا» گرنگییا زێدەتر ب بەربژاركرنا ئافرەتان بدەن».

مەسرور بارزانی ،سەرۆكێ حوكمەتا هەرێما كوردستانێ، ب هەلكەفتا رۆژا جیهانییا ئافرەتان پەیامەك بەلاڤكر و تێدا راگەهاند: رۆژا جیهانییا ئافرەتان، ل ئافرەتێن كوردستانێ و جیهانێ پیرۆز دكەم.
مەسرور بارزانی د پەیاما خوە دا گۆت ژی» ب ڤێ هەلكەفتێ، پێگیربوونا خوە ب پاراستنا مافێن ئافرەتێن كوردستانێ و باشتركرنا رەوشا ژیانا وان و ب هێزتركرنا پێگەهێ وان د جۆمكێن دەستهەلاتێ و حوكمڕانیێ و ب هێزكرنا بنەمایێن یەكسانییا رەگەزی دوپات دكەین».
دیاركر ژی» ئافرەتێن كوردستانێ پشتڕاست دكەم، كو دێ هەردەم پشتەڤانێ مافێن وان یێن رەوا بم، بۆ ئەوێ چەندێ ب گۆڕەی شیانێن خوە رۆل و پێگەهێ هەژی د هەموو بوارێن جڤاكی دا هەبیت».

سەرۆك بارزانی پێشوازی ل ڤیكتۆریا تەیلەر، جێگرا وەزیرێ دەرڤەیێ ئەمریكا كر، د كۆمبوونەكێ دا باس ل سەرەدانا سەرۆكێ حوكمەتا هەرێمێ بۆ واشنتۆن هاتە كرن و ب سەرەدانەكا سەركەفتی هاتە هەژمارتن. هەروەسا باس ل پەیوەندیێن د ناڤبەرا حوكمەتا هەرێمێ و بەغدا هاتە كرن و دوپاتی ل پێدڤییا پاراستنا سەقامگیرییا ئیراقێ و رۆلێ هێزێن هەڤپەیمانان د سەقامگیرییا ئیراقێ و دەڤەرێ هاتە كرن. سەرۆك بارزانی پشتەڤانییا خوە بۆ ئەنجامدانا هەلبژارتنان دوپاتكر و نێگەرانییا خوە ل دۆر بڕیارا دادگەها فیدرالی یا نەهێلانا كورسیێن كۆتایا پێكهاتەیان بەرچاڤكر و ئەو بڕیار ب زیانگەهاندن ب پڕۆسەیا دیموكراسی هەژمارت.

سەرۆك مەسعود بارزانی ل سەلاحەدین پێشوازی ل شاندێ لژنەیا هەرێم و پارێزگەهان ل جڤاتا نوونەرێن ئیراقێ ب سەرۆكایەتییا خالد سامەرایی كر.
د كۆمبوونەكێ دا شاندێ لژنەیا هەرێم و پارێزگەهان ل جڤاتا نوونەرێن ئیراقێ ئەزموونا هەرێما كوردستانێ د بوارێ كاروبارێن پێشڤەبرنا پارێزگەهان و هەروەسا پێكئینانا ئیدارەیێن سەربخوە ل زاخۆ و سۆران و راپەرین بلند هەلسەنگاند، هەروەسا ئەو شاندە خوازیارێن وێ چەندێ بوون كو ئەو ئەزموونە بۆ جهێن دی یێن ئیراقێ ژی بهێتە ڤەگۆهاستن. باسكرن ل رەوشا سیاسی ل ئیراقێ تەوەرەكێ دی یێ كۆمبوونێ بوو.