ئەڤرۆ نیوز:
لدووڤ راگەهاندنا فەرمی یا دیوانا پارێزگەهان، بهێنڤەدانا فەرمی ل پێنج پارێزگەهێن ناڤەراست و باشورێن عیراقێ هاتە راگەهاندن.
ھەر ئێک ژ پارێزگەهێن (كەربەلا، نەجەف، دیوانیە، واست و بابل) د بەیاننامەکا تایبەتدا راگەهاند: کو سوبەهی بهێنڤەدانا فەرمیە.
د راگەهاندنا پارێزگەهان دا ھاتیە: ئەو بهێنڤەدانە سەرجەم سازی و فەرمانگەهـ و ناڤەندێن خواندنێ ڤەدگریت، ژ بلی فەرمانگەهێن خزمەتگوزاری، ھۆكارێ ڤێ بهێنڤەدانێ بۆ سەرمایێ ڤەگەراندیە.
ئەڤرۆ نیوز:
سوبەهی چارشەمبی 2020/2/12 ب سەرپەرشتیا مەسرور بارزانی سەرۆک وەزیرێن هەرێما کوردستانێ و ب ئامادەبوونا قوباد تالەبانی جێگرێ سەرۆک وەزیران، دێ کۆمبوونا ئاسایی یا جڤاتا وەزیران هێتە ئەنجام دان.
هەروەسا تەوەرێ سەرەکی یێ وێ کۆمبوونێ دێ گوتۆبێژ کرن بیت، دەربارەی پێنگاڤێن جێبەجێکرنا قانوونا چاکسازیێ.
ئەڤرۆ نیوز، زنار تۆڤی:
ل گژە بەران وەلاتیەک ب سۆتی ل خانیەکێ ڤە هاتیە دیتن و هێشتا تەرمێ بۆ نۆشداریا داد نەهاتیە ڤەگۆهاستن.
موقەدەمێ مافپەروەر بێوار عەبدولعەزیز ژ راگەهاندنا رێڤەبەریا بەرەڤانیا باژێرێ دهۆکێ بۆ ئەڤرۆ نیوز دیار کر: کو وەلاتیەکێ 35 سالی د خانیەکێ ڤە ل نێزیک قوتابخانا رەوا ل گژە بەرا ل دهۆکێ ب سۆتی د مالدا هاتیە دیتن، ئەو کەسە دێ هێته ڤەگۆهاستن بۆ نۆشداریا داد ل پارێزگەها دهۆکێ، ژ پێخەمەت ئەگەرێن سۆتنا وی بهێنە دیار کرن، هەروەسا دووڤچوون دێ ل سەر بابەتێ سۆتنا وی هێته کرن.
ئەڤرۆ نیوز:
وەزیرێ دەرڤە یێ ئەمریكا راگەهاند: دێ سزایێن زێدەتر ئێخینه سه‌ر ئیرانێ، ب ئەگەرێ هەلدانا هەیڤا دەستكرد، كو ئارمانجا ئیرانێ ژ ڤێ چەندێ ب هێزكرنا شیانێن موشەكا بالستیە.
ئەڤرۆ سێشەمبێ مایك پۆمپیۆ وەزیرێ دەرڤە یێ ئەمریكا، د تویتەکێ نڤێسیە رژێما ئیرانێ دێ هەلدانا مانگا دەستكرد ب كار ئینین بۆ بەرەف پێشبرنا شیانێن موشەكا بالیستی یێن خوە، دەکو گەفان ل ركابەرێن خوە بكەت و گەفان ل ئارامیا ڤێ دەڤەرێ بكەت، لەوما نابیت رێک ب دەولەتەکێ بهێتەدان کو پالپشتیا تیرۆرێ ل جیهانێ دکەت، داکو مووشەکێن خوە پێش بێخیت و تاقی بكەت.
ئەڤرۆ نیوز:
ئەڤرۆ سێشەمبی میدیایێن عیراقێ ئاماژە ب وی ئەرکێ زەحمەت یێ محەمەد تۆفیق عەللاوی پێ هاتیە راسپاردن بۆ پێكئینانا حوکمەتا نوو یا عێراقێ كرە و ئاماژە ب هندێ دایە، ئەگەر هەیە عەللاوی خوە ڤەكشێت و داخوازا لێبورینێ بكەت.
چەندین ژێدەرێن بەرپرس یێن عێراقێ بۆ میدیایێن وەلاتێ خۆە راگەهاندینە، کو عەللاوی ڕوو ب روو ئاستەنگێن مەزنتر ژ شیانێن خوە بوویە و نەشێت لایەنێن سیاسی ل سەر پێكئینانا كابینا خوە رازی بكات، كو ڕەزامەندیا جادا عیراقی ل سەر بیت.
هەتا نوکە عەللاوی چەند جاران هێرشێن ڤەكێشانا كرینە ژ پێكئینانا حوکمەتا دەمکی، ئەگەر لایەنێن سیاسی رژد بن ل سەر سەپاندنا كاندیدێن خوە بۆ وەزارەتێن حوکمەتا دەمکی ل عێراقێ.
هەروەسا لایەنێن سیاسی یێن عێراق گەف ل عەللاوی كرینە، ئەگەر وەزیران ب دلێ فراكسیۆنێن مەزن یێن پەرلەمان دانەنیت، ل دەمێ دەنگدانێدا، پەرلەمانتارێن وان كابینا وی پەسەند ناكەن.
ئەڤرۆ نیوز:
وەزارەتا بەرگریا ئەمریکا د ره‌شنڤیسێ بوودجێ سالا داهاتیدا داخواز ژ کۆنگرێسی كریه، وی برا پارێ بۆ هارركاریكرنا هێزێن پێشمەرگێ كوردستانێ ته‌رخانكری، په‌سه‌ند بكەت.
پنتاگۆنێ د رەشنڤیسێ بوودجێ سالا 2021 دا خالەک بۆ به‌رده‌وامبوون ژ پڕچەککرن و هارکاریکرنا 12 لیوایێن پێشمەرگەی ته‌رخان كرینه و د وی رەشنڤێسی دا هاتیە، هەکە بوودجێ پێدڤی نەهێتە پەسەند کرن، دێ کاریگەری ل سەر روو ب رووبوونا تیرۆرێ هەبیت.
به‌رده‌وامبوونا وان هاوکاریێن سه‌ربازی یێن ئەمریکا بۆ هێزێن پێشمەرگێ کوردستانێ د چارچۆڤێ شه‌رێ ل دژی تیرۆرستان دا، وێرای هندێ ل دەمێ بوری‌كاریگه‌ریا ئه‌رێنی ل سه‌ر شیانێن پێشمه‌رگه‌ی دا هه‌بوو ل به‌رهنگاربوونا داعش و تیرۆرێ دا، ب هه‌مان شێوه د داهاتیدا به‌رده‌وامبوونا وێ پالپشتیێ و هاریكاریێن سه‌ربازی دێ خزمه‌تا ئاسایشیا ڤێ دەڤەرێ و جیهانێ کەت و دێ رۆل هەبیت ل سه‌ركه‌فتنێن هەڤپه‌یمانیا نێڤده‌وله‌تیا ل دژی داعشێ.
ئەڤرۆ نیوز، نەوزاد هلۆری:
هه‌رده‌ما به‌فر بارى و دوڤدا ئاسمان بویه ساهى، هه‌موو جادده‌یێن ده‌ڤه‌را ئامێدیێ و دینارته و کانی ماسێ و زاویتە و سەرسنکێ و دەڤەرێن دی دبنه به‌ستى، ب ب خوێ نه‌بیت رێ ناهێنه ڤه‌كرن.
سه‌رجون خوشابا، سه‌رۆكێ باژێرڤانیا سه‌رسنكێ دیاركر كو پرانیا رێیێن سه‌رسنكێ ژ ئه‌گه‌رێ به‌ستیبوونێ هاتینه گرتن و بۆ ئەڤرۆ نیوز گۆت: (ب مه‌ره‌ما ڤه‌كرنا رێیا و نه‌هێلانا ئاسته‌نگان هه‌مبه‌رى شوفێران ب تایبه‌تى ل سه‌نته‌رێ باژێرى، باژێرڤانیا سه‌رسنكێ ژ شه‌ڤا بورى هه‌تا ئێڤارى ل سه‌ر ڤه‌كرنا رێیا به‌رده‌وامه و پرانیا رێیا ب خوێ هاتینه ڤه‌كرن، به‌لێ هێشتا ژى هنده‌ك ماینه، ئه‌گه‌ر ب خوێ نه‌بیت رێ ژ به‌ر به‌ستیبوونێ ناهێنه ڤه‌كرن).
فوئاد میكائیل، سه‌رۆكێ باژێرڤانیا دینارته دیاركر كو چیایێ پیرس ژى ب تمامى بویه به‌ستى بۆ ئەڤرۆ نیوز گۆت: (هه‌ر چه‌نده تیمێن مه پشكه‌ك ژ رێیێن سنورێ دینارتێ ڤه‌كرینه ب تایبه‌تى یێن سه‌نته‌رێ دینارتێ، به‌لێ رێیا سه‌ره‌كى یا چیایێ پیرس ب تمامى بویه به‌ستى و هاتن و چوون نینه، له‌وا داخوازێ ل وه‌لاتیان و شوفێران دكه‌ین هه‌تا كو به‌ستى نه حه‌لیێت قه‌ستا پیرس نه‌كه‌ن، مه وه‌كو باژێرڤانى ده‌ست ب ره‌شاندنا خوێ كریه ب تایبه‌تى ل لوفێن زه‌حمه‌ت و سیبه‌ر ژبه‌ر هه‌تا ئێڤارى به‌ستى دمینیت).
كامیران محه‌مه‌د سه‌رۆكێ باژێرڤانیا كانى ماسێ بۆ ئەڤرۆ نیوز گۆت: (شه‌ڤا بورى پێله‌كا بهێز یا به‌فرێ ده‌ڤه‌را به‌روارى بالا و كانى ماسێ بخوڤه گرت و هه‌موو رێیێن هاتن و چوونێ هاتنه گرتن، تیمێن مه هه‌موو ئه‌و رێیێن دكه‌ڤنه سه‌نته‌رێ باژێرى ل گه‌ل هنده‌ك رێیین ده‌وروبه‌ر پێخه‌مه‌ت خوشكرنا رێیا و نه‌هێلانا ئاسته‌نگا هاتن و چوونێ ژ به‌فرێ پاقژكرن، به‌لێ ل هنده‌ك جادده‌یان به‌ستى دروست بوویه و پێدڤى یه شوفێر زور هوشیارێ خوه بن).
رەمەزان سالح، سەرۆکێ باژێرڤانیا زاویتە بۆ ئەڤرۆ نیوز گۆت: (ئەڤرۆ مە رێیێن زاویتە ب خوێ ڤەکرن، چونکی هەموو ببویە بەستی، ب تایبەتی رێیا گەلیێ زاویتە کو جهەکێ گەشتوگۆزاری یە).
هه‌ر ئێك ژ باژێرڤانیێن ئامێدیێ، چه‌مانكێ، بامه‌ڕنێ و دێره‌لووكێ ژى ل سنوورێ باژێرڤانیێن خوه جادده ژ به‌فرێ پاقژكرینه.
ئەڤرۆ نیوز:
سەرۆک مەسعود بارزانی پێشوازی ل محەمەد عەلی ئەلحەکیم وەزیرێ دەرڤە یێ عیراقێ کر و د روونشتنەکێ دا بەحسێ رەوشا عیراقێ و ئالۆزیێن ڤێ دووماهیێ و داخوازیێن خوەنیشادەران هاتە کرن.
هەر د کۆمبوونێ دا بەحسێ چاوانیا چارەسەرکرنا ئالۆزیێن نها ل عیراقێ ژی هاتە کرن و هاتە دیار کرن کو دڤێت مافێن هەموو پێکهاتێن ل عیراقێ بهێنە پاراستن و مەترسی ل سەر وان دروست نەبن.
بابەتێ شەرێ ل دژی داعشێ و مەترسیا هزرێن توندرەوی ژی تەوەرەکا دی یا دیدارا سەرۆک بارزانی ل گەل وەزیرێ دەرڤە یێ عیراقێ بوو.
نيشاندان