ئه‌ڤرۆ نیوز:
د.ئامانج ره‌حیم سكرتێرێ جڤاتا وه‌زیرێن هه‌رێمێ دیاركر، ئه‌ڤرۆ ناڤێن مامۆستایێن گرێبه‌ست ب نڤیسارا سه‌رۆكاتیا جڤاتا وه‌زیران ژماره 1669 ئاراسته‌ى وه‌زاره‌تا دارایى، پشكا میلاكات هاتیه كرن بۆ ده‌ستپێكرنا مامه‌له‌یێن وانێن دوماهیێ ب مه‌ره‌ما دامه‌زراندنێ.
جڤاتا وه‌زیران ل 24/12/2019 بڕیاردابوو مامۆستایێن گرێبه‌ست بهێنه دامه‌زراندن كو نێزیكى شه‌ش هزار ماموستایانه.
ئەڤرۆ نیوز:
ئەڤرۆ سەرۆک مەسعود بارزانی پێشوازی ل شاندەکێ پارێزگارێن عیراقێ کر کو ژ پارێزگار و جێگرێن چەندین پارێزگەهێن عیراقێ وەکو: نەینەوا، كەركووك، بەغدا، ئەنبار، دیوانیە، زیقار، سەلاحەددین، واست، میسان، نەجەف، كەربەلا، بەسڕا، دیالە، موسەننا و هەولێر پێکهاتبوون.
د کۆمبوونێ دا بەحسێ رەوشا عیراقێ و دەڤەرێ ب گشتی هاتە کرن و سەرۆک بارزانی راگەهاند هەکە ل عیراقێ پێگیری ب دستووری هاتبا کرن نها ئەو ئاریشێن ل بەغدا و دەڤەرێن دی هەنە روو نەددان و دیار کر کو دڤێت ل عیراقێ کەلتورێ پێکڤەژیانێ ئەساس بهێتە وەرگرتن و رێز ل هەموو پێکهاتێن عیراقێ بهێتە گرتن.
ئه‌ڤرۆ نیوز:
وه‌زیرێ پلاندانانێ یا حكومه‌تا هه‌رێما كوردستانێ دیاركر بێ ئاسایكرنا ده‌ڤه‌رێن كوردستانی یێن ده‌رڤه‌یی ئیدارا هه‌رێمێ سه‌رژمێرێ سه‌ركه‌فتی نابیت.
د. دارا ره‌شید وه‌زیرێ پلاندانانا حكومه‌تا هه‌رێما كوردستانێ راگه‌هاند: پێنگاڤ هاڤێتن بۆ برێڤه‌چوونا پرۆسا سه‌رژمێریا گشتی ل عیراقێ و هه‌رێما كوردستانێ به‌رده‌وامن، چه‌ند كۆمبوونه‌كێن گرنگ دناڤبه‌را هه‌رێم و به‌غدا دا هاتینه ئه‌نجامدان، بۆ هه‌رێما كوردستانێ گرنگه پرۆسه ب سه‌ركه‌فتی برێڤه بچیت و ده‌رئه‌نجامێن ئه‌وێ سه‌رژمێریێ بۆ پێشخستنا وه‌لاتی بیت.
د. دارا ره‌شید ئه‌و چه‌نده ژی دازانین چه‌ندین ساله سه‌رژمێریا گشتی ل عیراقێ نه‌هاتیه ئه‌نجام دان و بۆ هه‌رێما كوردستانێ ئه‌ڤ پرۆسه زۆرا گرنگ و دیرۆكی یه بۆ زانین و پێشخستنا بیاڤێن جودا جودایێن كاركرنێ ل سه‌ر به‌رفره‌هكرنا خزمه‌تگۆزاری و بكار ئینانا دادپه‌روه‌ریا جڤاكی، د كۆمبوونێن ل گه‌ل شاندنێن به‌غدا دا ب روونی ئه‌و چه‌نده مه گۆتیه كۆ بێ ئاسایكرنا ره‌وشا ده‌ڤه‌رێن ڤه‌قه‌تیایێن هه‌رێما كوردستانێ سه‌ركه‌فتی نابیت ته‌ڤایا پێكهاتێن عیراقێ ترس و داخوازیا وه‌ك كوردان هه‌یه.
وه‌زیرێ پلاندانانا حكومه‌تا هه‌رێما كوردستانی داخاز ژ نه‌ته‌وه‌یێن ئیكگرتی و رێكخراوێن نێڤ ده‌وله‌تی رۆل و به‌رپرسیاریا گرنگ بگێرن بۆ چاڤدێریكرن و هاریكرنا سه‌رخستنا پرۆسه‌یا سه‌رژمێریێ ل عیراقێ و هه‌رێما كورستانێ.
ئەڤرۆ نیوز:
ئەڤرو(۲۰۲۰/۲/۱۲)ب ئامادەبونا بەرێز جەهوەر عەلی قائیمقامێ قەزا دهوکێ هاریکاریێن دراڤی یێن پارێزگەها دهوکێ، لسەر دوکاندارێن بازارێ پەروکان ل دهوکێ هاتنە بەلافکرن.
بەرێز (جەهوەر عەلی) قائیمقامێ قەزا دهوکێ ئاشکرا کر ئەڤرو پارێزگەها دهوکێ پتر ژ (۱٤۰) ملیون دیناران لسەر (۳۹) دوکاندارێن بازارێ پەروکا ل بازارێ دوبەی ل سەنتەرێ باژێرێ دهوکێ بەلاڤکرن و گوت ئەڤ هاریکاریێن دراڤی وەک پشتەڤانیەک ژ بو نوژەنکرنا بازارێ ناڤبری بوویە.
دەربارەی قەرەبویا دوکاندارێن بازارێ پەروکان، قائیمقامێ قەزا دهوکێ دیارکر پشتی رێڤەبەریا بەرەڤانیا باژێری زیانێن ڤی بازاری ب راپورتەک ئامادەکرێن مە ژی ب رێکا پارێزگەها دهوکێ ب نڤێسارەک ئاراستەی وەزارتا نافخویا حکومەتا هەرێما کوردستانێ کریە، ئەگەر دشیاندا بیت بهێنە قەرەبوکرن.
ل (۲۰/۱/۲۰۲۰) ژئەنجامێ شورتەکێ کارەبێ ،ئاگر بەربو بازارێ پەروکا لدهوکێ و زیان گەهشتە (٤۳) دوکانا.
ئەڤرۆ نیوز:
ئه‌ڤرۆ سپێدێ 12 / 2/2020 ل هولا كونفرانسا ب چاڤدێریا فه‌رهاد ئه‌مین ئه‌تروشى پارێزگه‌رێ دهوكێ وب ئاماده‌بونا د.سالار ئوسمان بریكارێ وه‌زاره‌تا ره‌وشه‌نبیرى ولاوان وچه‌ند به‌رپرسێن حزبى وئیدارى سێیه‌مین ڤیستیڤالا لاوێن داهێنه‌ر یا كو ژلایێ ماڵا لاوان یا سه‌ر ب ئێكه‌تیا لاوێن دیموكراتا كوردستانێ هاتیه رێكخستن هاته ئه‌نجامدان.
درێ ورسمێن ڤه‌كرنا ڤیستیڤالێدا پارێزگه‌رێ دهوكێ بناڤێ كارگێریا پارێزگه‌هێ ده‌ست خوشى ل رێكخه‌رێن ڤیستیڤالێ كر وپیروزباهیا لاوێن داهێنه ر كر كو شیاینه داهێنانێن باش بكه‌ن وسه‌ركه‌فتن بو هه‌موو پشكدارا خواست ، هه‌روه‌سا دیاركر كو پێدڤیه مروڤ ژخو ده‌ست پێبكه‌ت نه‌خاسمه گه‌نجێن جڤاكێ مه پتر خو رێكبێخن وژهه‌موو رویه‌كیڤه كو بشێن پتر داهێنانان بكه‌ن وپشته‌ڤانیا پارێزگه‌هێ نیشان دا بو ڤان جوره چالاكییان.
هه‌روه‌سا ته‌كه‌زكر كو دڤێت داهێنان پتر بهێنه رێكخستن وژلایێ زانستى ژى ڤه بهێته كونترولكرن بو وێ یه‌كێ زیان نه‌گه‌هنه جڤاكى هه‌روه‌سا داهێنه‌ر بخو یێ رژد و بێهن فره‌ه بیت بو وێ یه‌كێ بشێت داهێنانێ دچێكرنا ئالاڤ وهزرێن نوو بكه‌ت وسه‌ركه‌فتن بو هه‌موو پشكدار خواست.
پاش مه‌یسه‌ر نهێلى سكرتێرێ ئێكه‌تیا لاوێن دیموكراتا كوردستانێ په‌یڤه‌ك خاند وسوپاسیا وان هه‌موو لایه‌نان كر یێن پشته‌ڤانى ل ڤیستیڤالێ كرى وپیروزباهى ل هه‌موو پشكدارا كر وسه‌ركه‌فتن بو خواست.
لدوڤدا داهێنه‌رێن پشكدار داهێنان خو به‌رچاڤكرن ئه‌وژى ئه‌ڤه‌بون (رێبین على – ئاریان محمود – مه‌روا فه‌یسه‌ل – عایشه ئیسلام – شاكر عبدالرحمن – احمد یوسف – مه‌تین دلێر – رێگر سعدالله )
پاش په‌نه‌له‌كێ هزرى ل دور ره‌وشا لاوان ژلایێ هه‌ردوو به‌رێزان (د.سالار ئوسمان) بریكارێ وه‌زاره‌تا ره‌وشه‌نبیرى ولاوان و(عسمه‌ت خابور) ماموستایێ زانكویێ هاته پێشكێشكرن وگه‌نگه‌شه ژلایێ ئاماده‌بویان ڤه ل سه‌ر هه‌ردوو بابه‌تان هاتنه كرن.
ل دووماهیا ڤیستیڤالێ خه‌لات ل سه‌ر داهێنه‌ران هاتنه به‌لاڤكرن.
ئەڤرۆ نیوز،عەلی حاجی :
جار قوتابیێن کچ ل ئامادەیا دهۆکێ ب مەرەما پشکداری کرن د کۆنفرانسێ پاقژی و راگرتنا ساخلەمیا ژینگەهێ و سروشتێ دووفچوونا زیانێن بورجێن پەیوەندیان ل پارێزگەها دهۆکێ دکەن .
سیلاڤ جەعفەر ئێک ژ وان قوتابیان دووفچوونا ڤی بابەتی دکەت بۆ ئەڤرۆ نیوز گوت : پشتی کو ئاگەهدار بووین ل سەر ب رێڤەچوونا کۆنفراسەکێ تایبەت ل دور پاقژی و راگرتنا ساخلەمیا ژینگەهێ و سروشتێ وێ و پشتی بابەتەک ل ئەڤرۆ نیوز بەلاڤ بوویی ل دور نەخوەش کەڤتنا هەشت مامۆستایان ل زاخۆ ب ئێشێن گران ژئەگەرێ هەبونا وان بورجان، چار کچێن ئامادەیا دهۆک یا کچان کو هەر ئێک ژ قوتابیان ( سوز ئاماد، وارین ئەیاد، نیدار خەلیل) دگەل دا ژی ئەز ژ ئێک ژ وان قوتابیان بوم مە دووفچوونا خوە دەست پێکر و مە سەرەدانا چەندین دکتور و کەسانێن تایبەتمەند کر دبیاڤێن ساخلەمیبو ژینگەهێ و هەر دیسان مە راپرسیەک ل زانکۆیا دهۆکێ بۆ قوتابیێن وێ ئەنجام دا ل سەر زیانێن بورجێن پەیوەندیان.
و گوت : پشتی دیفچوونا مە ب دوماهی هاتی ئەم شیاین بگەهینە دەرەنجامەکێ زانستی و ب چەند خالەکان مە ئەو دەرەنجام دیار کرینە وئامادەکرینە دا کو پێشکێش کونفرانسی بکەین و ئەو ژی ژلایێ خوە دیفچوونەکێ ل سەر وان بورجان بکەن.
ئەڤرۆ نیوز، زنار تۆڤی:
ل دەمێ بوری رێژەکا باش یا بەفرێ ل سنورێ ناحیا كانی ماسێ باریە و سەقا ڤێ دەڤەرێ ژی گەلەک ساربوویە و پلێن گەرمێ گەلەک داکەفتینە، سەرەرای هەبوونا بەستیێ، لێ رێیا هاتنوچوونێ بۆ دەروازێ سەرزێری نەراوەستیایە و هاتنوچوونا رێڤنگان د ڤی دەروازی را یا بەردەوامە.
شینوار سادق بەرپرسێ راگەهاندنا كومەلگەها دەروازێ نێڤدەولەتی یێ سەرزێری، یێ هەڤ سنۆر ل گەل باکورێ کوردستانێ، تایبەت بۆ ئەڤرۆ نیوز دیار كر: ل رۆژانێن بوری رێژەکا باش یا بەفرێ ل سەرزێری باریە، نوكە پتری 100سم بەفرێ دەروازێ سنوری یێ سەرزێری بارینە، لێ هاتنوچوونا رێڤنگان یا بەردەوامە.
هەروەسا گۆت ژی: د نوکە دا رۆژانە ژ دەمژمێر 8:30 سپێدێ هەتا 5 ئێڤاری وەلاتی دشێن هاتنوچوونێ د ڤی دەرگەهی را بکەن و ل دەمێ بەفر بارینێ ژی هەر زوو تیمێن رامالینا بەفرێ رێکێ پاقژ دکەن ژ بەفرێ.
ئه‌ڤرۆ نیوز:
وه‌زیرێ به‌ره‌ڤانیا ئیرانێ راگه‌هاند: ئه‌مریكا دزانیت چ ب سه‌رێ وان هاتیه ل بنگه‌هێ سه‌ربازی یێ عه‌ین ئه‌سه‌د ل عیراقێ.
ئه‌میر حاته‌می وه‌زیرێ به‌ره‌ڤانیا ئیرانێ راگه‌هاند: ئاراسته‌كرنا هه‌یڤا ده‌ستكر بۆ بوشاهیا ئاسمانی په‌یوه‌ندی ب پرۆگرامێ موشه‌كێن ئیرانێ ڤه نینه، به‌لكۆ ته‌مامكرنا پرۆگرامێ ئاسمانی و ره‌وانه‌كرنا هه‌یڤا ده‌ستكر مافه‌كێ ره‌وایێ ئیرانێ یه.
وه‌زیرێ به‌ره‌ڤانیا ئیرانێ ئه‌و چه‌نده ژی دیاركر كۆ ئیران خودانا چه‌ندین جورێن موشه‌كێن شه‌ری یه ژ وان ژی ئه‌و موشه‌كێن هاتینه ئاراسته‌كرن بۆ بنگه‌هێ عه‌ین ئه‌سه‌د یێن هێزێن ئه‌مریكا ل عیراقێ، ئه‌مریكا دزانیت چ ب سه‌رێ وان هاتیه ل وی بنگه‌هێ سه‌ربازی .
ناڤبری ئاماژه ب وێ چه‌ندێ دا كۆ ئه‌و موشه‌كێن نوكه كۆ هه‌یڤا ده‌ستكرد هه‌لدگرن بۆ مه‌به‌ستا به‌ره‌ڤانیێ نائینه بكار ئینان به‌لكۆ ل ده‌مێن بهێت چه‌ندین هه‌یڤین ده‌ستكرد ب مه‌به‌ستا به‌ره‌ڤانیێ ره‌وانه‌ی ئاسمانی كه‌ین و تاران دێ به‌رده‌وام بیت د پێشڤه‌برنا پرۆگرامێ ئاسمانی و چ تشته‌ك ل جیهانێ نه‌شێت وان ژ وی كاری راوه‌ستینیت.
نيشاندان