نوونەرێ حوكمەتا هەرێما كوردستانێ ل ئێكەتییا ئورۆپا راگەهاند، هەتا نوكە ئێكەتییا ئورۆپا، هەرێما كوردستانێ ب هۆكارێ گیرۆبوونا هەلبژارتنێن پەرلەمانێ كوردستانێ نادانیت، هەروەسا دبێژیت، پشكەك ژ وەلاتێن ئێكەتییا ئورۆپا هەست دكەن دادگەها فیدرالییا ئیراقی ب ئەنقەست ناخوازیت هەلبژارتن ل هەرێما كوردستانێ بهێنە ئەنجامدان.
دلاوەر ئاژگەیی، نوونەرێ حوكمەتا هەرێما كوردستانێ ل ئێكەتییا ئورۆپا گۆت: ژ دەستپێكا دامەزراندنا حوكمەتا هەرێما كوردستانێ ئێك ژ هۆكارێن هەرە سەرەكی كو بووینە ئەگەرێ ئەوێ چەندێ جڤاكێ نێڤدەولەتی پشتەڤانییا هەرێما كوردستانێ بكەت، ژ بەر ئەوێ چەندێ بوو هەرێما كوردستانێ وەكو گزیرتەك ل دەڤەرێ ددیت كو دەلیڤەیا ئەوێ چەندێ تێدایە دیموكراسی، مافێن مرۆڤی و پێكڤەژیان تێدا بەر ب پێش بچیت».
سەبارەت گیرۆبوونا هەلبژارتنێن پەرلەمانێ كوردستانێ، دلاوەر ئاژگەیی گۆت» بڕیارا دادگەها فیدرالییا ئیراقی بۆ هەلوەشاندنا بڕیارێن پەرلەمانێ كوردستانێ ل دۆر هەلبژارتنان بوویە بابەتەكێ كێشە ل سەر بۆ هەلبژارتنان ل هەرێما كوردستانێ، ب تایبەتی پشتی چەندین روونشتنێن دادگەها فیدرالییا ئیراقی یێن گرێدای قانوونا هەلبژارتنان ل هەرێما كوردستانێ هاتینە پاشئێخستن بۆ ئەوێ چەندێ هەلبژارتن نەهێنە ئەنجامدان، ئەڤە ژی وەكو زەنگەكا مەترسیدارە ژ ئالیێ نێڤدەولەتیڤە».
ب دیتنا نوونەرێ حوكمەتا هەرێما كوردستانێ ل ئێكەتییا ئورۆپا پرسا هەلبژارتنان ل هەرێما كوردستانێ تنێ ژ ئالیێ نەتەوەیێن ئێكگرتی ڤە گرنگی پێ ناهێتە دان و دبێژیت: هەموو جاران د كۆمبوونێن خوە دا ل گەل وەلاتێن ئێكەتییا ئورۆپا ئەوێ پرسێ ل گەل مە باس دكەن».
ئاماژە كر ژی» د ئێك ژ كۆمبوونان دا داخواز ژ ئیراقێ هاتە كرن هەلبژارتن ل هەرێما كوردستانێ بهێنە ئەنجامدان» هەروەسا گۆت «پشكەك ژ وەلاتێن ئێكەتییا ئورۆپا وەسا هەست دكەن دادگەها فیدرالییا ئیراقی ئەڤ پرسە كرییە سیاسی و ب ئەنقەست بزاڤێ دكەت هەلبژارتن ل هەرێما كوردستانێ نەهێنە كرن».
ب گۆڕەی نوونەرێ حوكمەتا هەرێما كوردستانێ ل ئێكەتییا ئورۆپا ئێكەتییا ئورۆپا فشارەكا مەزن ئێخستییە سەر حوكمەتا ئیراقێ بۆ ئەوێ چەندێ هەلبژارتنێن هەرێما كوردستانێ د نێزیكترین دەم دا بهێنە ئەنجامدان» .
خۆیاكر» جڤاكێ نێڤدەولەتی هەتا نوكە هەرێما كوردستانێ و ئالیێن سیاسی یێن كوردستانی ب هۆكارێ گیرۆبوونا هەلبژارتنان نادەنە زانین و ئاگەهداری ئەوێ چەندێ ژی یە كو سەرۆكێ هەرێما كوردستانێ دو جاران ژڤانێ ئەنجامدانا هەلبژارتنێن پەرلەمانێ كوردستانێ دیاركرییە».
بڕیار بوو ل 25/2/2024 هەلبژارتنێن پەرلەمانێ كوردستانێ بهێنە ئەنجامدان كو ژ ئالیێ كۆمسیۆنا بلند یا سەربخوە یا هەلبژارتنان ل ئیراقێ دێ سەرپەرشتی ل سەر هێتە كرن، بەلێ ژ ئەگەرێ ئێكلانەبوونا سكالایەكێ كێشە بۆ پێرابوونێن كۆمسیۆنێ دروستبوویە كو چاڤەڕێی ئێكلاكرنا ئەوێ سكالایێ یە.

هەولێر، قائید میرۆ

وەزیرێ هەرێمێ بۆ كاروبارێن پێكهاتەیان هۆشداریێ ل دۆر گیرۆكرنا هەلبژارتنێن هەرێما كوردستانێ ددەت و دبێژیت، هەكە ئەڤرۆ دادگەها فیدرالی سكالایێن ل سەر قانوونا هەلبژارتنان ئێكلا نەكرن، پێدڤیە هەرێما كوردستانێ چارەسەرییەكا دی بۆ ئەنجامدانان و هەلبژارتنان ببینیت و چاڤەڕێی بڕیارا دادگەهێ نەبیت هەروەسا ئاماژەكر، نیەتێن خراپ ل پشت بڕیارا دادگەهێ یێن هەین و دخوازن هەلبژارتن نەهێنە ئەنجامدان.
ئایدن مەعروف، وەزیرێ هەرێمێ بۆ كاروبارێن پێكهاتەیان بۆ رۆژنامەیا ئەڤرۆ گۆت: ل چەند رۆژێن بۆری دو كۆمبوون د ناڤبەرا پێكهاتەیێن هەرێما كوردستانێ دا ل دۆر بابەتێ هەلبژارتنێن پەرلەمانێ كوردستانێ و كۆرسیێن كۆتا هاتنە ئەنجامدان، د كۆمبوونێن بۆری دا هەردو پێكهاتەیێن كریستیان و توركمان پشكداربوون و تێدا دانوستاندن ل دۆر رەوشا هەلبژارتنان هاتە كرن، چونكە دادگەها فیدرالی رۆژا 18 ئەڤێ مەهێ بڕیار ل دۆر سكالایێن ل سەر قانوونا هەلبژارتنێن هەرێما كوردستانێ و كورسیێن كۆتا نەدا».
گۆت ژی: ئەم نیەتا دادگەها فیدڕالی باش دزانین تنێ دخوازیت دەمی بكوژیت و سكالایان ئێكلا نەكەت، چونكە چەندین جارە سكالا دهێتە گیرۆكرن و ناهێتە ئێكلاكرن، مخابن بڕیارێن داددگەهێ زێدەتر ئالیێ سیاسی پێڤە دیارە و تنێ دكەنە د ناڤا چارچۆڤەیەكێ قانوونی دا، دخوازین دادگەها فیدرالی بڕیارەكا عادیلانە ل دۆر كۆرسیێن كۆتا ل هەرێما كوردستانێ بدەت ،بەرۆڤاژی دێ هەردو پێكهاتەیێن كریستیان و توركمان هەلویستێ خوە هەبیت، چونكە ب گۆڕەی قانوونێ كورسیێن كۆتا هاتینە دیاركرن و دەستێوەردان د كارۆبارێن پێكهاتەیان دا دێ كاریگەری ل سەر پرۆسا هەلبژارتنان هەبیت».
ئایدن مەعروف گۆت ژی: پێدڤیە هەرێما كوردستانێ چارەسەریەكێ بۆ ئەنجامدانا پرۆسا هەلبژارتنان ببینیت و چاڤەڕیی دادگەها فیدرال نەكەت، چونكە ب ڤی شێوەیێ نوكە بیت هەلبژارتن ناهێنە ئەنجامدان، هەكە هەلبژارتن زێدەتر بهێنە گیرۆكرن دێ كاریگەریێن خراپ ل سەر هەرێما كوردستانێ هەبن، ئەم وەكو پێكهاتەیێن كوردستانێ پێداگیریێ ل سەر ئەنجامدانا پڕۆسەیا هەلبژارتنان دكەین و هیچ دەمەكی دگەل گیرۆكرنا هەلبژارتنان نەبووینە و نابین، ژ بەر كو هەر گیرۆكرنەكێ زیانێن خوە لسەر پرۆسا سیاسی ل هەرێما كوردستانێ یێن هەین، داخوازێ ژ هەموو ئالیێن كوردستانی دكەین كار بكەن بۆ ئەنجامدانا هەلبژارتنان و ئێدی چاڤەڕێی بڕیارا دادگەهێ نەكەن، چونكە ئێكلا نەكرنا سكالایان دێ بیتە ئەگەر هەلبژارتن نەهێنەكرن و هەرێما كوردستانێ دێ كەڤیتە ڤالاهییا قانوونی و دستووری».
هەروەسا گۆت: سەرۆكایەتییا هەرێما كوردستانێ چاڤەڕێی بڕیارا دادگەها فیدڕالە بۆ دەركرنا فەرمانا هەرێمی و دیاركرنا ژڤانێ ئەنجامدانا هەلبژارتنان، ب دیتنا من ئەم چاڤەڕێی دادگەهێ نەكەین و رێكەك بهێتە دیتن هەلبژارتن بهێنە ئەنجامدان باشترە».

پارێزگارێ نەینەوا رادگەهینیت، بجهئینانا رێككەفتنا شنگالێ دێ گەلەك ژ كێشەیێن ئەوێ قەزایێ چارەسەركەت، هەڤدەم دبێژیت: دخوازین ئەزموونا هەرێما كوردستانێ بۆ پێشكەفتنا نەینەوا ڤەگۆهێزین.
عەبدولقادر دەخیل، پارێزگارێ نەینەوا د داخۆیانییەكا رۆژنانەڤانی دا گۆت» رێككەفتنا سیاسی بۆ پۆستان ل پشتی سالا 2003 ل ئیراقێ بوویە عورف، هەڤدەم هەلبژارتنا من وەكو پارێزگارێ نەینەوا ب تێكراییا دەنگێن ئالیێن سیاسی بوو».
گۆت ژی» پشتی پڕۆسەیا ئازادیێ ل نەینەوا كۆمەكا كارنامەیێن حوكمەتێ و رێكخراوێن نێڤدەولەتی هەبوون بۆ ئاڤەدانكرنا نەینەوا، هەروەسا نوكە ل نەینەوا خزمەتگوزاری د ئاستەكێ باش دانە و كار بۆ دەڤەرێن دی ژی وەكو تلەعفەر و شنگالێ دهێتە كرن».
ئاماژەكر» نەینەوا مولكێ كەسێ نینە بەلكو ئیراقەكا بچووكرییە و یا فڕەپێكهاتەیە، ئەڤ فڕەپێكهاتەیێ ژی وەكرییە بڕیارێن دروست بدەین بۆ ئەوێ چەندێ خزمەتا پارێزگەهێ بكەین و پڕۆژەیێن پێشڤەبرنا زێدەتر بكەین».
پارێزگارێ نەینەوا خۆیاكر ژی» بۆ ئاڤەدانكرنا نەینەوا و پێشكەفتنا وێ مە پێدڤی ب ئەزموونا هەرێما كوردستانێ یا هەی».
ل دۆر شنگالێ، عەبدولقادر دەخیل دیاركر كو ژ ئەگەرێ كریارێن داعشێ هەتا نوكە ئێزدی د كەمپێن ئاوارەیان دا دژین» لەوما پێدڤییە جارەكادی بزڤڕین بۆ بجهئینانا رێككەفتنا شنگالێ، كو نەخشەرێكا چارەسەركرنا كێشەیێن شنگالێ و بەرقەراربوونا سەقامگیریێ یە ل ئەوێ دەڤەرێ».
پتر گۆت» ئەم وەكو حوكمەتا خوەجهی ل نەینەوا پشتەڤانیێ ل جهئینانا رێككەفتنا شنگالێ دكەین، هەكە سەقامگیری ل شنگالێ نەبیت هەموو پارێزگەها نەینەوا یا سەقامگیر نابیت».
رۆهنكر ژی» ئەو گرۆپێن ل قەزا شنگالێ هەین، هندەك ژ ئەوان ژ دەرڤەی قانوونێ كاردكەن، دۆسێیا شنگالێ ل دەف مە گەلەك یا گرنگە، لەوما ب رژدی دێ كار ل سەر كەین و پێدڤییە ل دەستپێكێ قایمقامەكێ نوو بۆ قەزا شنگالێ بهێتە دانان، ئەڤە ژی دێ پێنگاڤەكا دەستپێكی بیت بۆ چارەسەركرنا كێشەیێن گرێدای شنگالێ».
پارێزگارێ نەینەوا سەرنج بۆ ئەوێ چەندێ ژی راكێشا» رەوشا نەینەوا ل پێشبەری ئاستەنگێن مەزن دایە، گەلەك ژ كەتیبێن حەشدا شەعبی ل دەڤەرێن پارێزگەهێ هاتینە بەلاڤكرن و دۆسێیا ئەمنی ل پارێزگەها نەینەوا دێ رادەستی پۆلیسێن فیدرالی هێتە كرن كو د نوكە دا دۆسێیا ئەمنی ل هندەك پارێزگەهێن ئیراقێ رادەستی پۆلیسان هاتییە كرن، ل دەمەكێ نێزیك ل پارێزگەها نەینەوا ژی دێ دەستپێكەت».

تورکیا بەر ب هەلبژارتنێن باژێرڤانیان ڤە دچیت، ئاکپارتی ب هەموو شیانێن خوە کار دکەت دا بشێت سەرۆکاتیا باژێرڤانیا ئستەنبۆلێ ژ دەستێ پارتا کۆماری دەرخینیت و کۆمپانیەکا راپرسیان ژی دیار دکەت، بێی پشتەڤانیا کوردان پارتا کۆماری ل ئستەنبۆلێ یا سەرکەفتی نابیت.

کۆمپانیا سۆنار یا راپرسیان دوهی ئەنجامێ راپرسیا خوە یا مەها بۆری بۆ رایا گشتی ئاشکرا کر و راگەهاند، هەکە نها ل ئستەنبولێ هەلبژارتنێن باژێرڤانیان بهێنە کرن، ئاکپارتی ب رێژەیەکا گەلەک کێم ل پێش پارتا کۆماری دایە، چونکی دەنگدەرێن کورد د هەلبژارتنێن ڤێجارێ یێ ئستەنبۆلێ دا دەنگێ خوە نادەنە بەربژارێ پارتا کۆماری، بەلکو کوردان بەربژارێن خوە یێن جودا هەنە و ئەو یەک نها د بەرژەوەندیا ئاکپارتیێ دایە.
هەمان کۆمپانیێ ئەو یەک ژی دیار کریە، ل باژێرێ ئەنقەرە ژی بێی پشتەڤانیا کوردان پارتا کۆماری یا سەرکەفتی نابیت و رەوشا نها ب تەمامی د بەرژەوەندیا ئاکپارتیێ دایە.
ئەو یەک د دەمەکێ دایە کو بەری چەند رۆژان عەلی حەیدەر فرات ئەندامێ سەرکردایەتیا پارتا کۆماری بۆ دەزگەهێن راگەهاندنا تورکیا دیار کر، رەنگە رێککەفتنەکا نهێنی د ناڤبەرا ئاکپارتیێ و پارتا دەم دا هەبیت، چونکی پارتا دەم د هەلبژارتنێن ڤێجارێ یێن باژێرڤانیان ل باژێرێن مەزن یێن تورکیا دا پشتەڤانیێ ل بەربژارێن وان ناکەت و دێ بەربژارێن خوە هەبن، ئەو یەک د بەرژەوەندیا ئاکپارتیێ دایە، چونکی بێی پشتەڤانیا کوردان دێ گەلەک یا زەحمەت بیت کو پارتا کۆماری بشێت ل هەر دو باژێرێن مەزن یێن تورکیا ئانکۆ ل ئەنقەرە و ئستەنبۆلێ دا یا سەرکەفتی بیت، وەسا دیارە پشتی هەلبژارتنان ژی ئاکپارتیێ دڤێت دەست ب قۆناغەکا نوو یا چارەسەریێ بکەت، چونکی نها ژ بۆ ئاکپارتیێ بدەستڤەئینانا سەرۆکاتیا باژێرڤانیا ئستەنبولێ گەلەک یا گرنگە.
ل ئالیێ دی دوهی بەرپرسەکێ ئاکپارتیێ ژی بۆ رۆژنامەیا یێنی شەفەق یا تورکیا دیار کر، د هەلبژارتنێن ڤێجارێ یێ باژێرڤانیان دا وەکو ئاکپارتی ئەو گرنگیەکا گەلەک مەزن ددەنە ئستەنبۆل و ئەنقەرە، چونکی سەرۆکێ ئاکپارتیێ رەجەب تەیب ئەردۆغان یێ رژدە ڤێجارێ ئستەنبۆلێ ژ دەستێ پارتا کۆماری دەرخینین، ژ بەر ڤێ یەکێ ژی وەکو ئاکپارتی وان دەست ب بزاڤێن گەلەک مەزن کرینە و وان دڤێت د هەلبژارتنێن ڤێجارێ دا ئەنقەرە و ب تایبەتی ژی ئستەنبۆلێ ژ دەستێ پارتا کۆماری دەرخینن.
چاڤدێرێن سیاسی ژی دیار دکەن، پارتا دەم سیاسەتا خوە گوهۆڕیە و نەڤێت شاشیێن بەری نها هەدەپێ کری ئەو دوبارە بکەت، ژ بەر ڤێ یەکێ ژی پارتا دەم پتر پشتا خوە ب کوردان گەرم دکەت و دڤێت ل هەموو باژێرێن تورکیا و باکورێ کوردستانێ دا بەربژارێن خوە هەبیت، پارتا دەم نەڤێت ل باژێرێن مەزن یێن تورکیا پشتەڤانیێ ل بەربژارێن پارتا کۆماری بکەت، چونکی بەری نها هەدەپێ سیاسەتەکا وەسا ل دژی ئاکپارتیێ برێڤە بر و د ئەنجام دا زیانێن گەلەک مەزن گەهشتنە هەدەپێ و دەنگدەرێن کورد ژی ژ وێ سیاسەتێ نەرازی بوون و د هەلبژارتنێن بۆری دا رێژەیەکا بەرچاڤ ژ دەنگدەرێن کورد دەنگێ خوە نەدانە هەدەپێ، پارتا دەم نها نەڤێت هەمان شاشیان دوبارە بکەت و ژ بەر ڤێ یەکێ ژی د هەلبژارتنێن ڤێجارێ یێ باژێرڤانیان دا پارتا دەم پشتەڤانیێ ل بەربژارێن پارتا کۆماری ناکەت و دێ بەربژارێن خوە هەبیت.
چاڤدێرێن سیاسی وەسا دبینن د هەلبژارتنێن ڤێجارێ یێ باژێرڤانیان دا ئاکپارتی دێ شێت وەکو پارتا ئێکێ یا سەرکەفتی بیت، هەروەسا ئاکپارتی دێ ئستەنبولێ ژ دەستێ پارتا کۆماری دەرخینیت، چونکی رێژەیەکا زۆر کورد ل ئستەنبولێ دژین و ڤێجارێ دەنگێ خوە نادەنە بەربژارێن پارتا کۆماری، ئەڤ سیاسەتا پارتا دەم د بەرژەوەندیا ئاکپارتیێ دایە، ژ بەر ڤێ یەکێ ژی دبیت پشتی هەلبژارتنان ل تورکیا قۆناغەکا نوو یا سیاسی دەستپێ بکەت، هەکە پارتا دەم ل سەر هەلوەستێ خوە یێ نها بەردەوام بیت، دبیت ئاکپارتی و پارتا دەم نێزیکی هەڤدو ببن، چونکی ئاکپارتیێ ژی دڤێت دەست ب قۆناغەکا نوو بکەت دا بشێت پێگەهێ خوە ل باکورێ کوردستانێ بهێزتر لێ بکەت، ژ بەر ڤێ یەکێ ئەنجامێ هەلبژارتنێن ڤێجارێ یێ باژێرڤانیان دێ کاریگەریەکا گەلەک مەزن ل پاشەرۆژا تورکیا کەت.

سەرۆكێ حوكمەتا هەرێما كوردستانێ، مەسرور بارزانی پشكداری د گۆپیتكا حوكمەتێن جیهانێ ل دوبی كر و تێدا پەیڤەك پێشكێشكر و راگەهاند، چاڤێ خەلكێ مە ل ئەوێ چەندێیە چارەنڤیسێ خوە دیاربكەت و سەقایەكێ بۆ پەیدا بكەین كو ب ئاسودەیی بژیت و مە بزاڤ بۆ ئاسایشێ و سەقامگیریێ و باشكرنا رەوشا ئابۆری كرییە.
دوپاتی ل ئەوێ چەندێ ژی كر كو پێدڤییە وێرەكی هەبیت هەتا بشێین كێشەیان چارەسەر بكەین، مافێ مەیە ژی بگەهینە مافێ چارەنڤیس، بەلێ دۆستێن مە داخوازێ ژ مە دكەن نەدادپەروەریێ قەبوول بكەین.
سەرۆكێ حوكمەتا هەرێما كوردستانێ باس ل ئەوێ چەندێ ژی كر، نابیت هیچ كەسەك ژ رێزگرتنێ ل مافێن نەتەوەیی و مافێن گەلان بترسیت، گەلێ كورد داخوازییەكا رەوا هەیە بۆ مافێ چارەنڤیسی. هەروەسا گۆت ژی» ژ بەر هەلویستێن مە نوكە بووینە قوربانی و مەترسییا رژد ل دەڤەرا مە یا هەی».
سەبارەت شەڕێ داعشێ گۆت: بەرانبەر داعشێ راوەستیاین و هەكە مە وەنەكربا نوكە رەوشا دەڤەرێ دا ب جۆرەكێ دی بیت، ئەم سەركەفتین».
ل دۆر گوهۆڕینا كەشوهەوای باسكر كو هەولێر و دوبەی یێن د ناڤ گەردۆنەكا گەرم دا و ئەم ئاگەهدارێ ئەوێ مەترسیێ نە و دبیت ببیتە ئەگەرێ ئەوێ چەندێ د دەمەكێ كێم دا تێچوویەكێ مەزن ل دۆر پیسبوونا ژینگەهێ بچیت و ئالۆزی و كێشەیێن دی پەیدا ببن.
دەقێ پەیڤا سەرۆكێ حوكمەتا هەرێمێ…

ئەڤرۆ وەكو سەرۆك وەزیرێن هەرێما كوردستانا ئیراقێ بۆ هەوە د ئاخڤم. ئەو هەرێما ب درێژاهییا بیست سالێن بۆری شیای ژناڤ پاشمایێن ئیراقا بەرێ خوە ئێكبێخیت. ل گەل ئەوێ چەندێ دا، ئەز وەكو كەسەكی بۆ هەوە د ئاخڤم كو مل ب ملێ ئەو خودان بڕیارێن دەڤەرا مە یا خوەشتڤی راوەستیایمە، پێكڤە روو ب روویێ گەلەك ئاستەنگێن هەڤپشك بووینە.
شەڕ، یاخیبوون، دژواری و نەبوونا سەقامگیرییا ئابۆری، مخابن یێن بووینە پشكەك ژ پێكهاتەیا مە، نابیت ماندەلیێ ل ئەوی تێچووی بكەین كو ژ ئەنجامێ ئەوان ئاستەنگان ل سەر ئاستێ گەشەپێدانا جڤاكی و ئابۆری روو ب روویێ مە بووینە.
بەلێ د چارچۆڤەیێ دانوستاندنێن مە دا ل گەل خودانێن بڕیارێن رۆژهەلاتا ناڤین و دەرڤە، من هەست ب هەبوونا خواستەكێ بۆ رزگاربوونێ ژ نەهامەتیێن هەڤپشكێن مە یێن بۆری كر.
ل سەرانسەری دەڤەرا مە خواست و ئیرادەیەك بۆ پێشكەفتنێ یا هەی، هەست ب ئەوێ چەندێ ژی هاتییە كرن، گوهۆڕین نە تنێ یا پێدڤییە، بەلكو پێدڤییەكا حەتمی ژی یە. مللەتان چ ل سەر ئاستێ تاكی یان كۆم چاڤێ ئەوان ل مافێن ئەوانە بڕیارێ ل چارەنڤسێ خوە بدەن. مافێ دەستەبەركرنا سەقایەكی كو وەلاتی پشێن تێدا ب ئاسوودەیی بژیت.
ب دیتنا من ل ڤێرێ چار پێنگاڤ بۆ ئەوێ پێشكەفتنێ یێن هەین، كو ئەم هەموو بزاڤێ بۆ دكەین، ئەوژی: سەقامگیرییا سیاسی، ئاسایش، پێشكەفتنا ئابۆری و روو ب رووبوونا گوهۆڕینێن سەقای. ئەڤە پرسێن ئالۆزن. بەلێ چارەسەركرنا ئەوان پێدڤی ب رێیازەكا تایبەت ب هەر ئێك ژ ئەوان یا هەی.
گومان تێدا نینە هەژمارەكا بابەتێن جیۆسیاسی ل دەڤەرا مە بۆ دەمەكێ گەلەك دوور و درێژ هاتینە خستن د ناڤ سەبەتا كێشەیان دا، بەلێ بۆچی دهێنە پشت گوه هاڤێتن؟ هەبوونا وێرەكیێ بۆ بڕیاردانێ ل دەمێ هەبوونا كێشەیێ دا پێنگاڤا ئێكێ یە بەر ب چارەسەركرنا كێشەیێ ب خوە.
ئەو قەیرانا ل فلستینێ دبینین سەبارەت ب گەلەك ژ مە هەتا رادەیەكی جهێ دلتەنگیێ یە. زیانێن مرۆڤایەتی گەلەك گرانبەهانە ل سەر وەلاتیێن سڤیل. سەرەرای چارەسەرنەكرنا هۆكارێن ریشەیی یێن ستەمكاریێ, هەكە بەری 80 سالان مامەلە ل گەل مافێن بنەرەتی یێن فلستینییان هاتبا كرن، یان ژی د دەمێ ئەوان سالێن بۆری دا، ئەوی دەمی دەلیڤەیا روودانا ئەو نەهامەتیێن نوكە دبینین دا كێمتر بن، بەلێ ل شوینا ئەڤێ چەندێ، پرس هاتە پشت گوهـ هاڤێتن و ئالۆزتربوو، د دەمەكی دا خودان بەرژەوەندییان ئەو ڤالاهییە وەكو دەلیڤە بۆ ئەجندەیێن خوە بكارئینا.
دشیاندایە هەمان پێناسە بۆ گەلێ كورد ژی بهێتە كرن. مە ژی داخوازییەكا رەوا یا هەی بۆ بڕیاردانێ ل مافێ چارەنڤیس. دۆست و هەڤپەیمانێن مە دانپێدان ب ئەوی مافی كرییە، بەلێ د هەمان دەمدا دبێژنە مە، پێدڤیێن سیاسی ئاستەنگان دئێخنە پێشبەری هاریكاریێن ئەوان و رێگرن ل پێشبەری دادپەروەرییا دیرۆكی دا.
داخواز ژ مە دهێتە كرن ئەڤێ نە دادپەروەریێ قبوول بكەین. د دەمەكی دا ئەو نەدادپەروەرییە بوویە خۆراكەك بۆ نەیەكسانیێ، هەژاریێ، گەندەلیێ و نەسەقامگیرییا سیاسی. بۆ ئەوێ چەندێ وەلاتی و جڤاك و ئالیێن دی یێن جڤاكی ب ئەڤی شێوەی دلسۆزییا خوە بۆ ئەوان دیاربكەن. پێدڤییە هەست بكەن پشكەك ژ دادپەروەرییا سروشتی بدەستڤەئینایە. پێدڤییە رێك پێ بهێتە دان ب گۆڕەی مەرجێن خوە یێن تایبەت نەخشەیێ پاشەڕۆژا خوە بكێشن. نابیت هیچ كەسەك ژ رێزگرتنێ ل مافێن خوە بترسیت، یان ژی وەكو رەوشا مە ژ مافێ مللەتان بترسیت. رێزگرتن ل ئەوان مافان سەقامگیریێ ب هێز دكەت و بەر پێشڤەچوونێ پەیدا دكەت.
ل سەر ئاستێ ئەمنی، مە پێدڤی ب بزاڤێن زێدەترە بۆ چارەسەركرنا ئاسایشا مە یا گشتی. هاریكاریێن هەرێمایەتی بۆ شكەستنا داعشێ نموونەیەكە بۆ ئەوێ چەندێ مفای ژێ وەرگرین كا چاوان ئارمانجێن خوە بدەستڤەدئینین و چاوان خودان مەژی دشێن مل ب ملی هەڤدو ب راوەستن.
ل گەل زێدەبوونا گرژییان ل غەزە، ئیراق، سووریێ و دەریا سوور، بزاڤ بووینە پێدڤییەك تاكو پلانەكا نوو بۆ پاراستنا بەرژەوەندیێن نیشتمانی و هەرێمایەتی و جیهانی بهێنە دانان.
پێدڤییە روو ب روویێ ئەوان بین یێن ب هێرشكرنێ ل جیرانێن خوە و ژ پێخەمەت بەرژەوەندیێن خوە بزاڤا شەڕی دكەن. دڤێت ئەوێن بەرپرسیار بهێنە نیاسین. نابیت جڤاكێ نێڤدەولەتی بەرامبەر ژێدەرێ گەفان نەرمیێ نیشا بدەت، هەتا هەكە ئەو گەف ل گەل بەرژەوەندییا تایبەت ژی دژی ئێك بن.
ل سەر ئاستێ هەرێمی ژی ژ بەر هەلوەستێن خوە باجەكا گەلەك گران ددەین. نوكە دەڤەر روو ب روویێ جۆرەكێ جودا یێ قەیرانان بوویە. دڤێت هەموو پێكڤە كاری بۆ پاراستنا ئاسایش و سەقامگیرییا هەرێمی بكەین. بێ بەهانە ئەم بووینە ئارمانج. دڤێت ئەڤ شەڕە بهێتە راگرتن. وەكو پێشتر من گۆتی. ل ڤێرێ و ل پایتەختێن دی ژی، كوردستان چ جاران نەبوویە گەف ل سەر هیچ كەسەكی. ئەم فاكتەرێ ئاشتیێ و سەقامگیریێ نە. ئەم دخوازین رەفتارێن هەرێمایەتی ل سەر بنەمایێ رێزگرتنێ و بەرژەوەندییا هەڤپشك بیت. ئەم پێشبینییا پشتەڤانیێ دكەین و مە پێدڤی ب كارێ هەڤپشك یێ هەی بۆ روو ب رووبوونا گەفێن ئەمنی یێن مەترسیدار كو دبیت هەموو ئەو تشتان ژناڤ ببەت كو مە ب دەستڤەئیناینە.
بلا ئەڤە ساتەكا دیرۆكی بیت، سەركردە تێدا بشێن ب ئەوێ رێكێ ل هەموو جهەكی سنوورەكی بۆ دانن. مە پێدڤی ب چارەسەرییا بەردەوامە بۆ كێشەیێن ئاشكرا.
ئەم ل سەر دەمێ شەڕێ داعشێ مل ب ملێ هەڤپەیمانێن خوە بووین. ئەوی دەمی مە باشترین كار پێكڤە ئەنجامدا، هەكە ئەو چەندە مە ب دەستڤەنەئینابا، نوكە دەڤەر ب تمامی دا بیتە جهەكێ جودا، دا دەڤەرەكا پڕ بیت ژ تیرۆرستێن بیانی ئەوێن دخوازت جهێ پێین خوە ل رۆژهەلاتا ناڤین بكەن، بۆ ئەوێ چەندێ هەر ساتەكا ئەوان ڤیابا گرژی بۆمە دروست كربا. بەلێ ئەم سەركەفتین، خەباتا بیست سالێن بۆری و بەرخۆدانا چەندین سالان كورد بوونە رێكخوەشكەر بۆ ئەوێ سەركەفتنێ، ئەم وەكو مللەتەك مە مافێ ئەوێ چەندێ یێ هەی خودان سەروەری و پشكەكا نە ڤەقەتیای بین ژ رۆژهەلاتا ناڤین.
دامەزراندنا ئابۆرێ مە ل سەر بناغەیەكێ ب هێزە، بناغەیێ بنەرەتیێ ئەوان دەستكەفتان بوو كو ل كوردستانێ مە ب دەستڤەئینان، گەشەپێدانا ئابۆری ژی د ئاستەكێ بەرفرهە دا بوو بنەمایەكێ زیندی بۆ گەشەكرن و سەقامگیرییا هەرێمایەتی.
پێدڤیە سەرنجا سەركردەیان ل سەر خوەشگوەزەرانییا خەلكی بیت و بەردەوام بن ل وەبەرئێنانێ د ژێدەرێن مرۆڤی دا. پراكتێزەكرنا حوكمڕانییا باش گەلەك یا گرنگە بۆ پێشئێخستنا جڤاك و كەلتوورێن مە یێن سیاسی، مافێ وەلاتیانە ژی چاڤەڕێی ئەوێ چەندێ ژ مە بكەن كو گەشەپێدان و بەر ب پێشڤەچوون و دەلیڤەیێن كاری دروست دكەن و خۆراكن ژی بۆ هیڤی و ئارمانجان. هەكە مە شیا سەقایەكێ ئابۆری و سیاسی بۆ كێمكرنا رێژەیا هەژاریێ و گەندەلیێ پەیدا بكەین، دێ شێین دەلیڤەیێن بەلاڤبوونا توندرەویێ ژی بەرتەنگ بكەین و پلەیێن سەقامگیرییا سیاسی و ئەمنی ژی بەر ب پێش ببەین.
دشێم بێژم ل ڤێرێ خواستەكا ب كۆم بۆ روو ب رووبوونا ئێك ژ مەزنترین ئاستەنگان كو تووشی مە دبیت، یا هەی، ئەوژی گوهۆڕینێن سەقایانە، ئەڤە ژی دێ ب رێكا پەیڕەوكرنا رێبازەكا نوو و جودا بیت. ئەو سەركەفتنا وەلاتێ ئیماراتێ د مێهڤانداریكرنا گۆپیتكا 28 یا سالێن بۆری ب دەستڤەئینای، بوویە ئەگەرێ پێدانا سۆزەكێ بۆ روو ب رووبوونا زێدەبوونا گەرمێ ل جیهانێ, بەری وێرانكاری بال ب سەر هەسارا مە بكێشیت.
ئەو ئاستەنگێن ئەڤرۆ ل پێشبەرییا مە پێدڤی ب بڕیارێن وێرەكە بۆ هەمەجۆركرنا ژێدەرێن وزێ و وەبەرئێنانێ د وزا نوو دا. دەولەتا ئیماراتێ پێشەنگەكا جیهانییە د بوارێ بكارئینانا تەكنەلۆژیا نوو دا. دوبەی و هەولێر هەردو د نیڤا هەسارەكێ گەرمن دانە، ئەم ب تمامی ئاگەهداری مەترسیێن پشت گوهـ هاڤێتنا راستیەكا كارەساتبارین.
گەلەك ژ ئەوان پێگیریێن هەتا نوكە هاتینە ئەنجامدان، دژی بەرژەوەندیێن ئابۆری یێن كورتخایەنن، ئەو پێگیری و سۆز هاتینە دان بۆ پاراستنا نڤشێ داهاتی بوون، گۆمان د ئەوێ چەندێ دا نینە ڤەگوهاستن و گەهشتن و ژێدەرێ وزەیا پاقژ دبیت د دەمەكێ كورت دا تێچوویا ئەوێ یا زێدەتر بیت. بەلێ پاشكەفتێ درێژخاەین بۆ مە هەموویانە. مە ژ ئەڤی رووی ڤە پێدڤی ب وێرەكیێ، راستگۆیێ و دانپێدانێ یا هەی بۆ ئەوێ چەندێ بڕیارەكا وەسا گران بدەین. هەكە د ئەنجامدانا ئەوێ بڕیارێ شكەستنێ بینین، ژ ئەگەرێ ئەوێ چەندێ پشكەكا بەرفرهە یا ئەردی نامینیت بۆ ژیانێ، ژێدەرێن ئاڤێ دێ هشك بن و ئاسایشا خۆراكی دێ روو ب روویێ ئاستەنگەكا مەزن بیت، ژ وان ژی بیابانیبوون، كۆچكرنا ب كۆم و ژناڤچوونا ئابۆری ب دووڤ خوە دا دئینیت. پاشی دێ كۆچكرنا ناڤخوەیی، كۆچكرنا نێڤدەولەتی و گوهۆڕینا دیموگرافی بینین. هەڤڕكی ل سەر ژێدەرێن بچووك، دێ مللەتان روو ب روویێ ناكۆكییان كەت، ئەڤە ژی دێ وەكەت كێشەیەكا نێڤدەولەتییا فرە رەهەند دروست بیت.
پێدڤییە هەر وەلاتەك مامەلێ ل گەل ئەوان كێشەیێن ئابۆری، سیاسی، كەلتووری و ئەمنی بكەت كو دێ بنە ئەگەرێ كۆچكرنا ب كۆم. نوكە سەركردایەتی بۆ مەبەست و ئارمانجەكا دیاركری ژ هەموو دەمەكێ پێدڤیترە. ئەم نوكە د ناڤبەرا بڕیارب دەستێن جیهانێ و نڤشێن داهاتی دا دڤێن سەركردەیێن باوەرپێكری خەلات بكەین و زێدەتر هان بدەین. پێدڤییە ب رۆهنی ئەوێن ل گەل پێشكەفتنێ و مۆدێرنییەتێ دانە، جودا بكەین ژ ئەوێن دخوازن مە ب راوەستینن و بۆ پشتڤە بزڤرینن.
ئەم دشێین حەزێن خوە كۆمڤەبكەین بۆ روو ب رووبوونا ئەوان كێشەیێن دبنە بەربەست ل بەرمە. هەردەم یا ب ساناهی نینە وەكو سەركردەیان بنێرینە پاشەڕۆژێ. بەلێ بەرپرسیارەتییا مە ئەوە دڤێت بكەین. ئەم قەرداری ئەوانین كو باوەری دایە مە.

وەلاتیێن کورد ل رۆژئاڤایێ کوردستانێ دیار دکەن، مانا هێزێن ئەمریکا د رەوشا نها دا بۆ سووریێ و رۆژئاڤایێ کوردستانێ گەلەک یا گرنگە، چونکی رەوشا سووریێ گەلەک ئالۆزە و هەکە هێزێن ئەمریکا نەمینن دێ ل ئالیەکێ تورکیا و رژێما سووریێ و ل ئالیێ دی ژی رێکخستنا تیرۆرستی یا داعشێ ئێرشی رۆژئاڤایێ کوردستانێ کەن.

وەلاتیێن کورد ل رۆژئاڤایێ کوردستانێ دیار دکەن، نها رەوشا سووریێ گەلەک یا ئالۆزە و ئالۆزیێن دی یێن رۆژهەلاتا ناڤین ژی کاریگەریا خوە ل رەوشا سووریێ دکەن، ژ بەر ڤێ یەکێ ژی مانا هێزێن ئەمریکا بۆ ئارامیا سووریێ و رۆژئاڤایێ کوردستانێ گەلەک یا گرنگە، هەکە نها ئەمریکا هێزێن خوە ڤەکێشیت دێ جارەکا دی رێکخستنا تیرۆرستی یا داعشێ ل سووریێ و رۆژئاڤایێ کوردستانێ دەست ب کریارێن تیرۆرستی کەت و ئەو یەک دێ کاریگەریەکا خوە یا گەلەک خراب ل رەوشا سووریێ ب گشتی و یا رۆژئاڤایێ کوردستانێ ب تایبەتی کەت.
وەلاتیێن کورد ل رۆژئاڤایێ کوردستانێ وەسا دبینن، هەکە هێزێن ئەمریکا ژ سووریێ و رۆژئاڤایێ کوردستانێ نەمینن دێ تورکیا دەست ب ئۆپەراسیۆنەکا نوو ل رۆژئاڤایێ کوردستانێ کەت و ئەو یەک دێ بیتە ئەگەرێ ڤێ یەکێ جارەکا دی ب هزاران وەلاتیێن سڤیل ژ بەر شەری کۆچبەری دەڤەرێن دی ببن، ئەو یەک دێ بارێ ئابووری یێ خەلکێ ل رۆژئاڤایێ کوردستانێ گەلەک خرابتر لێ کەت، چونکی نها هێزێن ئەمریکا هەنە لێ دیسان ژی تورکیا ئێرش دکەت، ژ بەر ڤێ یەکێ ژی گەلەک یا گرنگە هەموو هێزێن سیاسی یێن رۆژئاڤایێ کوردستانێ ل گەل بەرپرسێن ئەمریکی کۆم ببن و داخواز بکەن جارێ ئەمریکا هێزێن خوە ل سووریێ و رۆژئاڤایێ کوردستانێ بهێلیت.
چاڤدێرێن سیاسی ژی وەسا دبینن هەکە ئەمریکا هێزێن خوە ڤەکێشیت، رژێما سووریێ و تورکیا دشێن ل دژی رۆژئاڤایێ کوردستانێ رێککەفتنەکا نوو بکەن و پێکڤە ئێرشی رۆژئاڤایێ کوردستانێ بکەن، چونکی بەری نها چەندین جاران تورکیا دیار کریە ئەو بەرهەڤن ل دژی رێڤەبەریا خوەسەر و هێزێن سووریا دیموکرات هاریکاریا شامێ بکەن.
ل گۆر باوەریا چاڤدێرێن سیاسی، ژ بەر شاشیێن هێزێن سیاسی ل رۆژئاڤایێ کوردستانێ نها رەوش گەلەک هەستیارە و دڤێت هێزێن کوردی هەر زوو پێکڤە دەست ب ئاڤاکرنا بەرەیەکێ کوردی بکەن، چونکی هێزێن ئەمریکا بۆ هەتا هەتای ل رۆژئاڤایێ کوردستانێ و سووریێ نامینن و دێ هەر رۆژەکێ هێزێن ئەمریکا ژ سووریێ چن، وی دەمی دڤێت هێزێن کوردی ل رۆژئاڤایێ کوردستانێ خوە بۆ هەر ئەگەرەکێ بەرهەڤ بکەن، دڤێت کورد خوە بهێز بکەن و رێ نەدەن تورکیا و رژێما بەشاری ئێرشی رۆژئاڤایێ کوردستانێ بکەن، دڤێت د ئاستێ دبلۆماسی دا کارێن مەزن بۆ پشتەڤانیا رۆژئاڤایێ کوردستانێ بهێنە کرن، ژ بۆ ڤێ یەکێ ژی دڤێت هەر دو جڤاتێن کوردی ل رۆژئاڤایێ کوردستانێ هەموو ئاریشێن هەی د ناڤبەرا خوە دا چارەسەر بکەن.

سەرۆكێ هەرێما كوردستانێ، نێچیرڤان بارزانی د پەیامەكێ دا پیرۆزباهی ل ئێكەتییا نڤیسەرێن كورد كر.
د پەیاما سەرۆكێ هەرێما كوردستانێ دا هاتییە» ل سالڤەگەرا 54 یا دامەزراندنا ئێكەتییا نڤیسەرێن كورد، ب گەرمی پیرۆزباهیێ ل نڤیسەرێن كورد دكەم، هیڤییا سەركەفتنێ و پێشكەفتنا بەردەوام بۆ دخوازم، ب رێز و پێزانین ڤە ل رۆل و خزمەتا ئەوان یا پیرۆز بۆ پێشڤەبرنا زمان و وێژەیا كوردی دنێرم».
نێچیرڤان بارزانی گوت ژی» نڤیسەرێن دلسۆزێن كورد هەردەم بۆ هشیاری و پاراستنا ناسنامەیا نەتەوەیی و نیشتمانی یا كورد و كوردستانێ و ئاڤاكرنا جڤاكەكێ مەدەنی، رەنج و خزمەتەكا مەزن كرییە و بزاڤێن بەردەوام بۆ چەسپاندنا بهایێن پێكڤەژیانێ و هەڤدو قەبوولكرنێ و لێبۆرینێ كرینە».
ل دووماهییا پەیاما خوە دا، سەرۆكێ هەرێما كوردستانێ گوت» سلاڤ ل گیانێ ئەوان نڤیسەرێن مەزن یێن ب خزمەت و بەرهەمێن ئەوان هەردەم دێ د هزرا مە دا مینن و ب رێز ڤە بیرئینانا ئەوان دكەین».

سەرۆكێ حوكمەتا هەرێما كوردستانێ، مەسرور بارزانی، ب سەرۆكایەتییا شاندەكێ حوكمەتا هەرێمێ بۆ پشكداریكرنێ د گۆپیتكا جیهانی یا حوكمەتان بەر ب وەلاتێ ئیمارات چوو.
نڤیسینگەها راگەهاندنا سەرۆكێ حوكمەتا هەرێما كوردستانێ د بەیاننامەیەكێ دا بەلاڤكر»
مەسرور بارزانی، سەرۆكێ حوكمەتا هەرێما كوردستانێ ل سەر داخوازنامەیەكا تایبەت یا شێخ محەمەد بن راشد ئال مەكتووم، جێگرێ سەرۆكێ دەولەتا ئیمارات و سەرۆكێ جڤاتا وەزیرێن ئیمارات و حاكمێ دوبەی، بەر ب ئیمارات چوو بۆ پشكداریكرنێ د گۆپیتكا جیهانییا حوكمەتان كو دێ ل رۆژێن 12 هەتا 14 ئەڤێ مەهێ بەردەوام بیت.
هەروەسا سەرۆكێ حوكمەتا هەرێما كوردستانێ د چارچۆڤەیێ گۆپیتكێ دا، دێ چەندین دیدار و كۆمبوونان ل گەل بەرپرس و بیرمەند و خودانكارێن ئەرەب و هەرێمی و جیهانی هەبن.
مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت ل سەر تۆرا جڤاكی یا ئێكس (تویتەرا بەرێ) بەلاڤكر» خوەشحالم ب پشكداریكرنێ د گۆپیتكا جیهانی یا حوكمەتان 2024».

نێزیكی شەش رۆژان بوو شاندێ سەرۆكایەتییا هەرێما كوردستانێ ل ئەمریكابوو، پشتی چەندین كۆمبوونان ل گەل بەرپرسێن كۆنگرێس و كۆچكا سپی و وەزارەتا دەرڤە و بەرگرییا ئەوی وەلاتی، دوهی دوماهی ب سەرەدانا خوە ئینا. فەلاح مستەفا، هاریكارێ سەرۆكێ هەرێمێ بۆ كاروبارێن دەرڤە و ئەندامێ شاندێ دیاركر، د هەموو كۆمبوونێن شاندێ سەرۆكایەتییا هەرێمێ ل واشنتۆن ئەمریكا پشتەڤانییا خوە بۆ هەرێمێ دوپات دكر.
دوهی ئێكشەمبی 11/2/2024، سەرۆكایەتییا هەرێما كوردستانێ بەلاڤكر» شاندەك ب سەرۆكایەتییا فەوزی حەریرێ، سەرۆكێ دیوانا سەرۆكایەتییا هەرێمێ و ئەندامەتییا فەلاح مستەفا، هاریكارێ سەرۆكێ هەرێما كوردستانێ بۆ كاروبارێن سیاسەتا دەرڤە، نیاز سالح مستەفا، بەرپرسێ پەیوەندیێن دەرڤە و دبلۆماسی ل سەرۆكایەتییا هەرێما كوردستانێ و دگەلدا تریفە عەزیز، نوونەرا حوكمەتا هەرێما كوردستانێ ل واشنتۆن ل رۆژا 5/2/2024 سەرەدانا ئەمریكا كربوو و چەندین دیدار و كۆمبوون ل گەل ئالیێ ئەمریكی ئەنجامدابوون».
ب گۆڕەی بەیاننامەیەكا سەرۆكایەتییا هەرێمێ» د چارچۆڤەیێ سەردانا خوە دا، شاندێ سەرۆكایەتییا هەرێمێ ل گەل بەرپرسێن كۆنگرێسێ و كۆچكا سپی و وەزارەتا دەرڤە و بەرگریێ كۆمبوویە و دەربارەی پەیوەندیێن ئەمریكا ل گەل هەرێما كوردستانێ د چارچۆڤەیێ رێككەفتنا ستراتیژی د ناڤبەرا ئیراقێ و ئەمریكا دا دانوستاندن كرییە و رەوشا گشتییا ئیراقێ و هەرێما كوردستانێ و دەڤەرێ و چەندین پرسێن جهێ گرنگییا هەڤپشك باسكرن».
هەروەسا شاندێ سەرۆكایەتییا هەرێما كوردستانێ سوپاس و پێزانین بۆ پشتەڤانییا كۆنگرێسی و حوكمەتا ئەمریكی ل ئیراقێ و هەرێما كوردستانێ دەربڕی و دوپاتی ل گرنگییا بەردەوامییا هاریكارییا هەڤپشك و بەرهنگاربوونا تیرۆرێ و پاراستنا ئارامی و سەقامگیرییا ئیراقێ و ب دوورگرتنێ ژ ئالۆزیێن دەڤەرێ كر».
سەرۆكایەتییا هەرێما كوردستانێ دبێژیت ژی» ژ ئالیێ خوەڤە بەرپرسێن ئەمریكی بەردەوامییا هاریكاری و پشتەڤانییا وەلاتێ خوە بۆ ئیراقێ و هەرێما كوردستانێ دوپاتكر».
فەلاح مستەفا، هاریكارێ سەرۆكێ هەرێما كوردستانێ بۆ كاروبارێن دەرڤە د داخۆیانییەكێ دا راگەهاند» ئەمریكا دۆستایەتی و پشتەڤانییەكا مەزن بۆ هەرێما كوردستانێ یا هەی و ل هەموو كۆمبوونان دا پشتەڤانییا خوە بۆ هەرێما كوردستانێ دوپاتكر».
فەلاح مستەفا گوت ژی» پەیوەندیێن هەرێما كوردستانێ و ئەمریكا د چارچۆڤەیێ پەیوەندیێن ئەوی وەلاتی دانە ل گەل ئیراقێ و ئەم چ بۆ هەرێما كوردستانێ و چ بۆ ئیراقێ بیت، دخوازین د بەرژەوەندییا هەردو ئالیان پەیوەندییەكا ستراتیژی یا دۆمدرێژ هەبیت» .
ل دۆر ئێكخستنا هێزێن پێشمەرگەی، فەلاح مستەفای ئاماژەكر، ئەمریكی سەبارەت ئێكخستنا هێزێن پێشمەرگەی د بێهن فرەهن و گوت» راستە هندەك جاران تووشی بێ ئومێدیێ بوون و پێشبینییا ئەوێ چەندێ دكر كو پێدڤی بوو بلەزتر هاتبا كرن، بەلێ یا گرنگە ئەوە سەرۆكایەتییا هەرێما كوردستانێ ل گەل بڕێڤەچوونا پڕۆسەیێ یە وەكو هەی».
دیاركر ژی» رەخنەیێن ئەمریكییان ل ئێكخستنا هێزێن پێشمەرگەی یێن كێمبووین و چەند پێشكەفتن هەبین، وەسا زێدەتر ژی رەخنە دێ كێمتر بن، بەلێ رەخنەیێن ئەوان د خانەیا دۆستایەتی و خەمخۆرییا ئەوان بوو بۆ مە».
هێزێن هەڤپەیمانان و ئەمریكا ل دەستپێكرنا شەڕێ داعشێ ل سالا 2014 ب مەبەستا بەرهنگاربوونا تیرۆرێ، هاریكارییا پێشمەرگەی دكەن، ئەو هاریكاری ژی د چارچۆڤەیێ بودجەیا تایبەت یا پێنتاگۆنێ یە بۆ پڕچەككرن و مەشقپێكرنا پێشمەرگەی و لەشكرێ ئیراقێ یە. قەلاح مستەفا دبێژیت» ب گۆڕەی ئەوی بەرنامەیێ هەی، دێ هاریكاریێن ئەوان بۆ هێزێن پێشمەرگەی بەردەوام بن».
پشتی 7 ئۆكتۆبەرێ و دەستپێكرنا شەڕێ د ناڤبەرا بزاڤا حەماس و ئیسرائیلێ و پەیدابوونا ئالۆزییان، هێزێن نێزیك ژ ئیرانێ ب بەهانەیا ئەوێ چەندێ ئەمریكا پشتەڤانیێ ل ئیسرائیلێ دكەت، زێدەتر ژ 150 جاران هێرش كرینە سەر بەرژەوەندیێن ئەوی وەلاتی ل سووریێ و ئیراقێ. ئەمریكا ژی چەندین جاران بەرسڤا ئەوان دایە. نوكە پترییا ئالیێن شیعی دخوازن هێزێن ئەمریكی و هەڤپەیمانان ژ ئەگەرێ (پێشێلكرنا سەروەرییا) ئاخا ئیراقێ ژ ئەوی وەلاتی دەركەڤن.
فەلاح مستەفا ل دۆر ئەوێ چەندێ دبێژیت» پشتی 10 سالان ژ هەبوونا هێزێن هەڤپەیمانان ل ئیراقێ و هەرێما كوردستانێ، بێگومان پێدڤییە ئالیێ ئەمریكی و ئیراقێ پێكڤە روونن بۆ ئەوێ چەندێ هەلسەنگاندنێ بۆ رەوشێ بكەن و شێوازێ پەیوەندیێن داهاتی دیار بكەن».
هاریكارێ سەرۆكێ هەرێما كوردستانێ بۆ كاروبارێن دەرڤە دوپاتی ل ئەوێ چەندێ كر» ل گەل كۆمبوون و تێكگەهشتنا د ناڤبەرا حوكمەتا ئیراقێ و ئەمریكا داینە بۆ ئەوێ چەندێ بگەهنە ب بڕیارەكا ئێكلاكەر» هەروەسا گوت» بێگومان هەلسەنگاندنەكا بابەتیانە ل سەر ئەوان گەفێن هەین، هەروەسا بەرهەڤییا هێزێن ئیراقی و هەرێما كوردستانێ، دێ بڕیارێ ل شێوازێ مانا هەڤپەیمانان و پاشەڕۆژا پەیوەندیێن ئەوان ل گەل ئیراقێ دەن»

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، وەزارەتا كۆچ و كۆچبەران ل ئیراقێ چەندین جاران كەلوپەل و خورانا دەم ب سەرڤوچووی ل سەر كەمپێن ئاوارەیێن شنگالێ ل هەرێما كوردستانێ بەلاڤكرییە، هەڤدەم دخوازن ب زۆری ئاوارەیان بزڤرینن دەڤەرێن ئەوان د دەمەكی دا حوكمەتا هەرێما كوردستانێ ئەو كارە رەتكرییە.
ماجد شنگالی، ئەندامێ جڤاتا نوونەران ژ فراكسیۆنا پارتی و سەرۆكێ لژنەیا ساخلەمیێ ل جڤاتا ناڤبری گوت» مە گەلەك رەخنە ل كارێن وەزارەتا كۆچ و كۆچبەرێن ئیراقێ یێن هەین، ژ ئەگەرێ ئەوێ چەندێ ئاوارەیێن شنگالێ وەكو كارتەكا سیاسی بەرانبەر هەرێما كوردستانێ دهێنە بكارئینان».
ماجد شنگالی ئاماژەكر» ژبلی ئەوێ چەندێ گەلەك جاران خوارنا دەم ب سەرڤەچووی ل كەمپێن ئاوارەیێن شنگالێ هاتییە بەلاڤكرن، هەڤدەم ل سالا 2023 تنێ سێ جاران كەلوپەل و ئاهێن خوارنێ ل سەر كەمپێن ئاوارەیێن شنگالێ هاتییە بەلاڤكرن كو پێدڤی بوو مەهانە كەلوپەل و ئاهێن خوارنێ ل سەر ئەوان هاتبانە بەلاڤكرن».
دوپاتكر» بۆ هەموو ئالییەكی یا رۆهنە كو وەزارەتا كۆچ و كۆچبەران ل ئیراقێ گەندەلیێ د بەلاڤكرنا كەلوپەل و ئاهێن خوارنێ دا دكەت و چەندین جاران ئەو كەلوپەلە ب پارە ل دەرڤەی كەمپان هاتینە فرۆتن».
خویاكر ژی» مخابن وەزیرا كۆچ و كۆچبەران ل ئیراقێ ل سەردەمێ مستەفا كازمی وەزیرا ئەوێ وەزارەتێ بوو كو نەشیابوو د ئەنجامدانا كارێن خوە دا یا سەركەفتی بیت، بەلێ مخابن د ئەڤێ كابینەیێ ژی دا دوبارە ب وەزیرا ئەوێ وەزارەتێ هاتیە دانان و سەرۆك وەزیرێن ئیراقێ ژی ب گەندەلیێن وەزارەتا كۆچ و كۆچبەران یێ ئاگەهدارە، بەلێ مخابن هەتا نوكە هیچ هەلویستەك نەبوو ل بەرانبەر كارێن ئەوێ وەزارەتێ».
رۆهنكر ژی» ئارمانجا وەزیرا ناڤبری دائێخستنا كەمپێن ئاوارەیانە ل هەرێما كوردستانێ و دخوازیت ب زۆری خەلكێ ل ئەوان كەمپان بۆ جهێن وان بزڤرینیت، د دەمەكی دا حوكمەتا هەرێمێ ئەو كارە رەتكرییە، بەلێ بەهانەیا ئەوان بۆ ئەڤی كاری ئەوە كو هەرێما كوردستانێ ل گەل وەزارەتا كۆچ و كۆچبەران یا هەماهەنگ نینە، بەلێ ئەڤ ئاخڤتنە د دوورن ژ راستیێ».