سەرۆكێ هەرێما كوردستانێ د كۆمبوونەكێ دا ل گەل قۆنسلێ كۆریا باشوور ل هەرێما كوردستانێ و سەرۆكێ رێكخراوا كۆیكا یا كۆری، پەیوەندیێن هەرێما كوردستانێ و كۆریا باشوور بلند هەلسەنگاندن.
نێچیرڤان بارزانی، سەرۆكێ هەرێما كوردستانێ دوهی سێشەمبی 6/2/2024 پێشوازی ل سۆنگ چۆل لیم، قۆنسلێ گشتیێ كۆریا باشوور ل هەرێما كوردستانێ و كۆ هیسۆك، سەرۆكێ رێكخراوا كۆیكا یا كۆری كر.
سەرۆكایەتییا هەرێما كوردستانێ راگەهاند» د كۆمبوونەكێ دا، پێشڤەبرنا پەیوەندیێن كۆریا باشوور ل گەل هەرێما كوردستانێ و كار و چالاكیێن رێكخراوا كۆیكا یا كۆری ل هەرێما كوردستانێ هاتە باسكرن. كو چەندین سالە هاریكارییا هەرێما كوردستانێ دكەت و چەندین پڕۆژەیێن خزمەتگوزاری ل دەڤەرێن جودا یێن هەرێما كوردستانێ بجهئیناینە».
نێچیرڤان بارزانی پەیوەندی و دۆستایەتییا كۆریا باشوور ل گەل هەرێما كوردستانێ بلند هەلسەنگاند، ب تایبەتی ئاماژە ب ئەوان كار و چالاكییان كر كو رێكخراوا كۆیكا یا كۆری ل چەندین كەرت و بوارێن جودا جودا دا بۆ هاریكارییا خەلكێ هەرێما كوردستانێ ئەنجام ددەت، هەروەسا باس ل كار و خزمەتا تیما زەیتون یا لەشكرێ كۆری كر كو بەری 20 سالان هاتییە هەرێما كوردستانێ و پەیوەندیێن هەرێمێ و كۆریا باشوور ب هێزكرین.

دوهی سێشەمبی 6/2/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل جەیمس گۆلدمان، قۆنسلێ گشتیێ نوو یێ بریتانیا ل هەرێما كوردستانێ كر.
سەرۆكێ حوكمەتا هەرێمێ پیرۆزباهیا دەستبكاربوونێ ل قۆنسلێ گشتی یێ نوو یێ بریتانیا كر و هیڤیا سەركەفتنێ بۆ خواست و پشتەڤانییا حوكمەتا هەرێما كوردستانێ دیاركر ژ پێحەمەت پێشڤەبرنا زێدەتر یا پەیوەندیێن دو ئالی.
قۆنسلێ گشتیێ بریتانیا، سوپاسییا هاریكاری و هەماهەنگییا دەزگەهێن حوكمەتا هەرێما كوردستانێ كر و بەرهەڤییا وەلاتێ خوە بۆ پتر ب هێزكرنا پەیوەندییان ل گەل هەرێما كوردستانێ دوپاتكر.
د پشكەكا دی یا دیدارێ دا، دووماهی پێشهاتێن ئیراقێ و دەڤەرێ و گرنگییا دابینكرن و پاراستنا مافێن دستووری یێن هەرێما كوردستانێ هاتە باسكرن.

دوهی سێشەمبی 6/2/2024، ب بەرهەڤبوونا د. سالار عوسمان، بەرپرسێ پشكا رەوشەنبیری و راگەهاندنا پارتی دیموكراتی كوردستان و هەژمارەكا رەوشەنبیر، نڤیسەر و راگەهاندكاران، كۆڕەك بۆ نڤیسەر و رۆژنامەنڤیس (سەنگەر شنۆیی) ب ناڤونیشانێ (زیرەكییا دەستكرد د ناڤبەرا دەلیڤێ و مەترسیێدا) هاتە سازكرن.
ل دەستپێكا كۆڕی، د. سالار عوسمان ل دۆر ناڤونیشانێ کۆڕی گوت: ئەڤی كۆڕی گرنگییا تایبەتی یا خوە یا هەی لەوما ب باشی گوهداریێ لێبكەن. هەروەسا چالاكیێن پشكا رەوشەنبیری و راگەهاندنێ تنێ خوە د فۆرمێ رەوشەنبیری و راگەهاندنێ دا نابینیت، بەلكو پێشكەفتنێن تەكنەلۆژیایێ دێ پشكەك بن ژ چالاكیێن مە».
پشكەكا بەرهەڤبوویان سەرنج و پرسیار ل دۆر بابەتی هەبوون و ل دووماهیێ ژی د. سالار عوسمان سوپاس و پێزانینا پشكا رەوشەنبیری و راگەهاندنێ پێشكێشی نڤیسەری كر و قەفتە گۆلا پشكا رەوشنبیری و راگەهاندنێ ژ ئالیێ محەمەد خدر، ئەندامێ پشكێ هاتە پێشكێشكرن بۆ نڤیسەری.

پشكا كاروبارێن رۆژهەلاتا نێزیك ل وەزارەتا دەرڤەیا ئەمریكا رادگەهینیت، دۆستایەتییا مە ل گەل حوكمەتا هەرێما كوردستانێ بوارێن بازرگانی و كەلتووری ژی ڤەدگریت.
ل تۆرا جڤاكییا ئێكس (تویتەرێ بەرێ) پشكا كاروبارێن رۆژهەلاتا نێزیك ل وەزارەتا دەرڤە یا ئەمریكا بەلاڤكر» ستیڤ بیتنێر رێڤەبەرێ كاروبارێن ئیراقێ ل وەزارەتا دەرڤەیا ئەمریكی ل گەل ئانۆ جەوهەر، وەزیرێ ڤەگوهاستنێ و گەهاندنێ ل حوكمەتا هەرێما كوردستانێ كۆمبوو و د دیدارەكێدا دۆستایەتییا واشنتۆن و هەولێرێ هاتە گەنگەشەكرن».
ل دەقێ پەیاما پشكا كاروبارێن رۆژهەلاتا نێزیك ل وەزارەتا دەرڤە یا ئەمریكی دا هاتییە» دۆستایەتییا مە ل گەل حوكمەتا هەرێما كوردستانێ بوارێن بازرگانی و كەلتووری ژی ڤەدگریت، و ستیڤ بێتنێر، رێڤەبەرێ كاروبارێن ئیراقێ ل وەزارەتا دەرڤە یا ئەمریكی ئەڤ بوارە و چەندین بوارێن دی ژی ل گەل وەزیرێ ڤەگوهاستنێ و گەهاندنێ ل حوكمەتا هەرێما كوردستانێ باسكرن».

شاندەكێ سەرۆكایەتییا هەرێما كوردستانێ ب سەرپەرشتییا فەوزی حەریری، سەرۆكێ دیوانا سەرۆكایەتییا هەرێما كوردستانێ و ئەندامەتییا فەلاح مستەفا، هاریكارێ سەرۆكێ هەرێما كوردستانێ بۆ كاروبارێن سیاسەتا دەرڤە و نیاز سالح مستەفا، بەرپرسێ پەیوەندیێن دەرڤە و دبلۆماسی ل سەرۆكایەتییا هەرێما كوردستانێ ل گەل (سێلست والندەر) هاریكارا وەزیرێ بەرگرییا ئەمریكی بۆ كاروبارێت ئاسایشا نێڤدەولەتی كۆمبوو.
د دیدارەكێ دا ب بەرهەڤبوونا تریفە عەزیز، نوونەرا حوكمەتا هەرێما كوردستانێ ل واشنتۆن، پێنگاڤێن پڕۆسەیا چاكسازیێ ل وەزارەتا پێشمەرگەی ل حوكمەتا هەرێما كوردستانێ و ئێكخستنا هێزا پێشمەرگەی، پێشهاتێن رەوشا ئەمنی ل ئیراقێ و هەرێما كوردستانێ و پێدڤییا هەماهەنگییا بەردەوام یا ئەمریكا ل گەل ئیراقێ و هەرێما كوردستانێ بۆ بەرهنگاربوونا ئاستەنگێن ئەمنی د چارچۆڤەیێ رێككەفتنا ستراتیژی د ناڤبەرا ئیراقێ و ئەمریكا دا هاتنە باسكرن.

هاریكارێ ئێكێ یێ بەرپرسێ مەكتەبا رێكخستنا پارتی دیموكراتی كوردستان ل پارێزگەها نەینەوا راگەهاند، ب گۆڕەی رێككەفتنێ د ناڤبەرا ئالیێن سیاسی پۆستێن سەرۆكایەتییا جڤاتا پارێزگەها نەینەوا و پارێزگارێ نەینەوا ئێكلابووینە و پۆستێ جێگرێ ئێكێ یێ پارێزگارێ نەینەوا دێ بۆ پارتی بیت و ل رۆژا پێنجشەمبی دێ دەنگدان ل سەر هێتە كرن.
مەحمود ئێزدی، هاریكارێ ئێكێ یێ بەرپرسێ مەكتەبا رێكخستنا پارتی ل نەینەوا گوت» ل رۆژا دوشەمبییا بۆری جڤاتا پارێزگەها نەینەوا كۆمبوونا خوە یا ئێكێ ئەنجامدا و تێدا سەرۆكێ جڤاتێ و جێگرێ پارێزگار ژی ب رێككەفتن هاتنە دیاركرن و نوكە تنێ هەردو پۆستێن جێگرێن پارێزگاری یێن ماین، كو جێگرێ ئێكێ بۆ پارتی ئێكلابوویە، بەلێ گرفت د ناڤبەرا لیستێن دی دا ل سەر پۆستێ جێگرێ دویێ یێ پارێزگاری یا هەی، كو سوننە داخوازا ئەوی پۆستی دكەن، لەوما نوكە گرفتا ل پێشبەری ئەوان هەردو پۆستان جێگرێ دویێ یێ پارێزگارێ نەینەوا یە».
مەحمود ئێزدی گوت ژی» ئەو دەنگوباسێن ئاماژە دكەن كو گرفت ژ ئەگەرێ وێ چەندێ یە جێگرێ ئێكێ یێ پارێزگاری بۆ پارتی بیت، چو راستی بۆ نینە، چونكە ئەو یێ ئێكلابووی و تنێ كێشە ل سەر پۆستێ جێگرێ دویێ یێ پارێزگاری یا هەی، لەوما بڕیارە ل رۆژا پێنجشەمبی جارەكادی جڤاتا پارێزگەها نەینەوا كۆمبیت وئەوان هەردو پۆستان ئێكلابكەت».
ناڤبری باس ل ئەوێ چەندێ ژی كر» ل ئەڤان دو رۆژان دێ رێككەفتن ل سەر پۆستێ جێگرێ دویی یێ پارێزگاری ژی هێتە كرن و پشتی نیڤرۆییا رۆژا پێنجشەمبی دێ كۆمبوون هێتە كرن و ئەو پۆستە ژی دێ هێتە ئێكلاكرن» .
دیاركر ژی» گەلەك پۆست دێ مینن د ئیدارەییا خوەجهییا نەینەوا دا و پارتی ژی ب گۆڕەی ئیستیحقاقا هەلبژارتنان دێ پشكا خوە ژ ئەوان پۆستان وەرگریت، بەلێ ئەو پۆستێن رێككەفتن ل سەر هاتییە كرن دێ هێنە ئێكلاكرن».

بێوار حەمدی:

باشترین و چاڵاكترین سیاسەتڤان ئەون یێن ژ گەنجاتیێ دەسپێدكەن، ژبەركۆ هەست و هوشیاری ل دەڤ گەنجان پەیدادبیت و هەر زوو هەست ب دەرد و ژانێن گشتی دكەن. شارەزایەكێ سیاسی ژی گۆت: هەر رێكخستنەكا سیاسی هەبیت ژ كومێن گەنجان دەسپێدكەن و هەر رێكخستنەكا سیاسی گەنج د ناڤدا نەبن، د چاڵاك نابن و كارتێكرنا بزاڤێن وان د جڤاكی دا د لاوازن.

ئیحسان ئامێدی، شارەزایێ سیاسی و بەرپرسێ ناڤەندا خانی یا رەوشەنبیری و راگەهاندنێ د دیدارەكێ دا بۆ رۆژناما ئەڤرۆ گۆت: گەنجێ كورد نوكە و د كەڤندا هەر د ناڤ سیاسەتێ دایە و هەر كەسەكێ حەز بكەت كارەكێ گشتی بكەت كۆ خزمەتا مرۆڤایەتیێ و جڤاكی بكەت، ئەو ب خۆ سیاسەتە و دیسان هەر چاڵاكیەكا گشتی یاكۆ د بەرژەوەندیا گشتی دابیت ئەو چاڵاكی دهێتە هەژمارتن ژ بزاڤێن سیاسی.
ناڤهاتی هێشتا گۆت: باشترین و چاڵاكترین سیاسەتڤان ئەون یێن ژ گەنجاتیێ دەسپێدكەن، ژ بەر كۆ هەست و هوشیاری ل دەڤ گەنجا پەیدا دبیت و هەر زوو هەست ب دەرد و ژانێن گشتی دكەن، ژ بەر هندێ گەنجێ كورد هەردەم بزاڤ كریە كار و چاڵاكیێن وی د بەرژەوەندیا گشتی دابن و گۆت: (هەموو دەما گەنج د مەیدانا سیاسەتێ دا هەنە و ئەو رێكخستنێن سیاسی دەما چێدبن ل بەراهیێ كۆمێن گەنجان وان رێكخستنا چێدكەن و دگەل بورینا دەمی ئەو گەنج ب تەمەن دكەڤن و سەربۆرێن وان دەولەمەند دبن و دبنە بسپور و شارەزا، لەوما ژی هەر رێكخستنەكا گەنج دناڤدا نەبن د چاڵاك نابن و كارتێكرنا بزاڤێن وان د جڤاكی دا دێ د لاواز بن).
د بەردەوامیا ئاخفتنا خۆدا ئیحسان ئامێدی گۆت: گەنجێ مە هەمی دەما حەز دكەت بچیتە د ناڤ سیاسەتێ دا، ژ بەر هندێ ئەڤرۆ دناڤ رێكخستنێن سیاسی دا ل كوردستانێ و ل جیهانێ ب گشتی گەلەك تەخێن گەنجا هەنە، هەتا سەروكێن گەلەك وەڵاتان ژی گەنجن و گۆت: (هەتا ل كوردستانێ ژی رێكخستنێن مە یێن سیاسی رێ‌ ل بەر گەنجان خوش دكەن و وەدكەن ئەڤ گەنجە حەز ژ سیاسەتێ بكەت، بەلێ ژبەركۆ بارودوخێ سیاسی ل كوردستانێ یێ ئاڵوزە، ژ بەر هندێ هندەك گەنج خوە ل بەرڤان ئالۆزیان ناگرن و خوە دوور دكەن، لێ ئەڤ دووركەفتنا وان ژی هەر سیاسەتە).
ل دووماهیێ ئەو چەندە ژی دا زانین: (تەخەكا گەنجان هەیە حەزدكەت د بیاڤێ سیاسەتێ دا كاربكەن و تەخەك هەیە تووشی شوكێ دبن د كار و چاڵاكیان دا، لەوما یاخی دبن و خوە دووردكەن، لێ د هەمان دەمدا مە گەنج هەنە حەزا نوویاتیێ و پێشڤەچوونێ هەیە و شیایە پێگەهێ خۆ چێكەن و كاروباران برێڤەببەن).

د ئێكەم روونشتنا جڤاتا نوو یا پارێزگەها نەینەوا دا، عەبدولقادر دەخیل ب پتریا دەنگان وەكو پارێزگارێ‌ نەینەوا و سیروان رۆژبەیانی وەكو جێگرێ‌ ئێكێ‌ ‌ یێ‌ پارێزگاری هاتنە هەلبژارتن.
هەروەسا د. ئەحمەد حاسوود ب سەرۆكێ‌ جڤاتێ‌ و محەمەد جبووری ب جێگرێ‌ سەرۆكێ‌ جڤاتا پارێزگەها نەینەوا هاتنە هەلبژارتن.
پارێزگارێ‌ نەینەوا، پشتی هاتیە هەلبژارتن راگەهاند، مە چەندین پرۆژەیێن گرنگ بۆ نەینەوا یێن هەین و د دەمەكێ‌ نێزیك دا دێ‌ گوهۆڕینێن مەزن بینن، مە د ڤێت ل گەل هەموویان كار بكەین بۆ وێ‌ چەندێ‌ نەینەوا ڤەگەڕیتە رەوشا جاران.
سەبارەت كۆمبوونا جڤاتا پارێزگەها كەركووكێ‌ ژی، كو ژڤان بوو دوهی هاتبا ئەنجامدان، لێ‌ ژ بەر ئامادەنەبوونا ئەندامێن فراكسۆنێن عەرەبی و توركمانی، كۆمبوون برێڤە نەچوو.

نوونەرێ هەرێما كوردستانێ ل ژۆرا ئۆپەراسیۆنێن هەڤپشكێن ئیراقێ، لیوا عەبدولخالق تەلعەت، راگەهاند، شەڕێ ئەمریكا ل گەل گرۆپێن جودا جودا یێن ئیراقی دێ بەردەوام بیت و بڕیارە بابەتێ ئابۆرێ ئەوان گرۆپان ژی ببیتە ئارمانج، دیاركر ژی، وەكو هەرێما كوردستانێ پێدڤیە د بەرهەڤ بین.
لیوا عەبدولخالق تەلعەت گۆت ژی: هێرشا مووشەكییا ئەمریكا ل سەر گرۆپێن حەشدا شەعبی ل ئیراقێ و سووریێ یا چاڤەڕێكری بوو، پێشتر ئەمریكا چەندین جاران هوشداری دایە حوكمەتا ئیراقێ كو بەردەوامبوونا هێرشێن گرۆپان ل ئیراقێ ل سەر بنگەه و بارەگەهێن ئەمریكی یا بێ بەرسڤ نابیت، ب تایبەت ئەو بنگەهێن ل هەولێرێ، لەوما بەردەوامییا هێرشان و بەرسڤدانا ئەمریكا دێ كاریگەری ل سەر ئارامییا دەڤەرێ هەبیت و بەر ب ئالۆزییا زێدەتر دچیت، چونكە ئەمریكا دوپاتیێ ل ئەوێ چەندێ دكەت دێ هێرشێن وێ د بەردوام بن، ناهێتە زانین ژی ئەڤ شەڕە دێ كەنگی ب دوماهی هێت و د ئەنجامدا گرژی و ئالۆزێ روو ددەت».
ئاماژەكر» پێدڤییە هێرشێن ل سەر هەولێرێ بهێنە راگرتن و لژنەیا تەكنیكی و تایبەتمەند ژ بەغدا هاتیە هەولێرێ و راپۆرتا خوە ل سەر هێرشێن ئیرانێ ل سەر هەولێرێ نڤیسییە، ل دووڤ پێزانینێن من پێدڤیە ئەو راپۆرتە ل بۆ سەرۆك وەزیرێن ئیراقێ ل حەفتییا بۆری هاتبا ئاراستەكرن، هەتا نوكە ژی هیچ بڕیارەك ل دۆر ئەوێ چەندێ نەهاتییە دان، بەلێ دڤێت ل سەر بنەمایێ ئەوان راپۆرتان ئێدی بەهانە بۆ هێرشكرنێ ل سەر هەولێرێ نەهێنە دان».
خویاكر: ئەو هێرشا ل سەر هەولێرێ هاتییە كرن ب تایبەت ئارمانج گرتنا مالا شەهید پێشڕەو دزەیی پێشێلكرنا سەروەرییا هەرێما كوردستانێ یە، ئەو ل بەغدا باسێ سەروەرییا ئیراقێ دكەن، پێدڤییە سەروەرییا كوردستانێ ژی بۆ ئەوان یا گرنگ بیت».
هەروەسا رۆهنكر» ئەڤ شەڕێ ئەمریكا ل گەل گرۆپێن ئیراقی نا راوەستیت، بەلكو بابەتێە سزایێن دارایی ژی دێ هێتە سەر، ئەڤە چەندین بانك هاتنە سزادان و بڕیار ژی دایە هێرشێن بەردەوام بكەتە سەر ئەوان دەڤەرێن هێرش ژێ بۆ سەر بنگەهێن ئەمریكی دهێنە كرن، ئەوا گرنگ پێدڤییە ئەم كورد خوە بەرهەڤ بكەین بۆ هەر ئەگەرەكی ل دەڤەرێ ژ بەر كو كورد پشكەكا گرنگن ل دەڤەرێ».