سەرۆكێ حوكمەتا هەرێما كوردستانێ ل گەل مەزنە بەرپرسێن كۆچكا سپی ل واشنتۆن كۆمبوو و تەوەرێ سەرەكیێ كۆمبوونێ بەردەوامییا پشتەڤانییا ئەمریكا بوو بۆ هەرێما كوردستانێ و جارەكادی ئەمریكا پشتەڤانییا خوە بۆ كوردستانەكا ب هێز و مافێن دستووری یێن گەلێ كوردستانێ دوپاتكر.
مەسرور بارزانی، سەرۆكێ حوكمەتا هەرێما كوردستانێ جودا ل گەل هەر ئێك ژ جەیك سولیڤان، شیرەتكارێ ئاسایشا نیشتیمانییا ئەمریكا، برێت مەكگۆرك، هەماهەنكگارێ كۆچكا سپێ بۆ كاروبارێن رۆژهەلاتا ناڤین و باكوورێ ئەفریقیا و ئامۆس هۆكستین، مەزنە شیرەتكارێ سەرۆكێ ئەمریكا بۆ كاروبارێن وزێ و وەبەرئێنانێ كۆمبوو.
مەسرور بارزانی، سەرۆكێ حوكمەتا هەرێما كوردستانێ ل تۆرا جڤاكییا ئێكس (تویتەرا بەرێ) ل دۆر كۆمبوونا خوە ل گەل جەیك سولیڤان، شیرەتكارێ ئاسایشا نیشتیمانییا ئەمریكا نڤیسی» من سوپاسییا جەیك سولیڤان، شیرەتكارێ ئاسایشا نیشتیمانییا ئەمریكا كر بۆ پشتەڤانییا كۆچكا سپی ل كوردستانەكا ب هێز و مافێن دستووری یێن گەلێ كوردستانێ. هەروەسا مە ئاماژە ب گرنگییا بجهئینانا دستووری و پاراستنا مافێن پێكهاتەیان و پێكئینانا جڤاتا فیدرالی ل ئیراقێ كر».
نڤیسینگەها راگەهاندنا سەرۆكێ حوكمەتا هەرێما كوردستانێ بەلاڤكر» ل دەستپێكا كۆمبوونێ دا، شیرەتكارێ ئاسایشا نیشتیمانییا ئەمریكا ئاماژەكر كو سەرۆك جۆ بایدن سلاڤ و رێز بۆ سەرۆك بارزانی و سەرۆكێ حوكمەتێ یێن هەین و پشتەڤانییا كۆچكا سپی ژی بۆ كوردستانەكا ب هێز و مافێن دستووری یێن گەلێ كوردستانێ دوپاتكر».
هەروەسا كۆچكا سپی ل دۆر ناڤەرۆكا كۆمبوونێ بەیاننامەیەك بەلاڤكر و باس ل ئەوێ چەندێ كر» جەیك سولیڤان سوپاسی و پێزانینا خوە بۆ هەڤپشكییا درێژخایەن د ناڤبەرا هەرێما كوردستانێ و ئەمریكا دا دەربڕی، هەڤدەم دوپاتی ل ئەوێ چەندێ ژی كر كو هاریكاری و پشتەڤانییا ئەمریكا بۆ كوردستانەكا ب هێز و خودان شیان ژ ئالیێ ئابۆریڤە دێ بەردەوام بیت، هەروەكو چاوان د دستوورێ ئیراقێدا ئاماژە ژی ب هەبوونا هەرێمەكا ب هێز هاتییە كرن».
مەسرور بارزانی، سەرۆكێ حوكمەتا هەرێما كوردستانێ ل تۆرا جڤاكییا ئێكس ل دۆر كۆمبوونا خوە ل گەل هەماهەنكگارێ كۆچكا سپی بۆ كاروبارێن رۆژهەلاتا ناڤین و باكوورێ ئەفریقیا نڤیسی» ل گەل برێت مەكگۆرك، مە باس ل گوهۆڕینێن ئیراقێ و دەڤەرێ و پێشڤەبرنا پەیوەندیێن دوقۆلی كر و د هەڤڕا بووین ل سەر گرنگییا پاراستنا ئاسایش و سەقامگیرییا هەرێما كوردستانێ و رێزگرتنێ ل قەوارەیێ دستووری و فیدرالیێ هەرێما كوردستانێ و پاراستنا مافێ پێكهاتەیان».
سەرۆكێ حوكمەتا هەرێما كوردستانێ ل دۆر كۆمبوونا ل گەل مەزنە شیرەتكارێ سەرۆكێ ئەمریكا بۆ كاروبارێن وزێ و وەبەرئێنانێ ل تۆرا جڤاكییا ئێكس نڤیسی» د هەڤڕا بووین ل سەر دەستپێكرنا هنارتنا پەترۆلا هەرێمێ ب زووترین دەم و پێشڤەبرنا پەیوەندیێن هەرێما كوردستانێ و ئەمریكا ب تایبەتی د بوارێن وزێ و وەبەرئێنانێدا».
سەرۆكێ حوكمەتا هەرێمێ د بەردەوامییا سەرەدانا خوە دا بۆ واشنتۆن ل گەل بریكارا وەزیرێ بەرگریێ ئەمریكا ب وەكالەت كۆمبوو، ل دۆر ئەوێ كۆمبوونێ ژی ل تۆرا جڤاكییا ئێكس نڤیسی» ل پنتاگۆنێ، ل گەل ساشا بەیكەر، بریكارا وەزیرێ بەرگریێ ئەمریكا ب وەكالەت كۆومبووین و دیدیارەكێدا كو سێلست والندەر، هاریكارێ وەزیرێ بەرگریێ ئەمریكا بۆ كاروبارێن ئاسایشا نێڤدەولەتی بەرهەڤبووی مە رەوشا گشتییا ئیراقێ و دەڤەرێ و گرنگییا پاراستنا ئاسایش و سەقامگیرییا هەرێما كوردستانێ گەنگەشەكر و هەردڤ ئالی د هەڤڕابووین ل سەر بەردەوامبوونا پشتەڤانی و هاریكاریكرنا پێشمەرگەی د بەرهنگارییا گەف و مەترسیێن تیرۆرستێن داعشێ و تیرۆرێ ب گشتی، پشتەڤانیكرنا ئێكخستنا هێزێن پێشمەرگەی و چاكسازیێن وەزارەتا كاروبارێن پێشمەرگەی، تەوەرەكێ دی یێ دانوستاندنێن كۆمبوونا مە بوو» .
ژ ئالییەكێ دیڤە، ل واشنتۆن شیڤ خوارنەكا تایبەت بۆ پێشوازیكرنێ ل مەسرور بارزانی، سەرۆكێ حوكمەتا هەرێما كوردستانێ ژ ئالیێ كەسایەتیێ ئەمریكی یێ ناڤدار رۆس پرۆ هاتە رێكخستن، تێدا هەژمارەكا مەزن ژ سیناتۆر و ئەندامێن گۆنگرێسی و بەرپرسێن حوكمەتا ئەمریكی بەرهەڤبوون ژ وان: مایك تێرنر سەرۆكێ لژنەیا هەوالگیریێ ل كۆنگرێسی، مایكل مەكاول سەرۆكێ لژنەیا پەیوەندیێن دەرڤە ل كۆنگرێسی، كەی گرنجەر سەرۆكێ لژنەیا تەرخانكرنا بودجەی ل كۆنگرێسی، كین كالڤێرت سەرۆكێ لژنەیا بەرگریێ ل كۆنگرێسی، و هەر ئێك ژ مایكل وولتر و جۆ ویلسن و جەیك ئیلزی، ئەندامێن كۆنگرێسی و سیناتۆر بیل هاگەرتی و ڤیكتریا تەیلەر، جێگرا هاریكارێ وەزیرێ دەرڤەیێ ئەمریكی هەروەسا و چەندین كەسایەتی و خودانكار و فەرماندەیێن بەرێ یێن لەشكری.
بەرهەڤبوویان ب خێر هاتنا مەسرور بارزانی كر بۆ واشنتۆن و پشتەڤانییا خوە بۆ ئاسایش و سەقامگیرییا هەرێما كوردستانێ دوپاتكر.
سەرۆكێ حوكمەتا هەرێما كوردستانێ سوپاسییا بەرهەڤبوویان كر و دوپات كر كو هەرێما كوردستانێ دێ هەردەم فاكتەرێ ئاسایش و ئارامیێ و بنگەهێ پێكڤەژیانا ئاشتییانەیا پێكهاتەیێن جودا جودا بیت ل دەڤەرێ.
مەسرور بارزانی ل گەل براین نیلسن، بریكارێ وەزارەتا گەنجینەیا ئەمریكا بۆ كاروبارێن پەیوەندیدار ب تیرۆرێ و هەوالگیرییا دارایی كۆمبوو و دیدارەكێدا باس پێشڤەبرنا پەیوەندیێن دوقۆلی و پشتەڤانیكرنا چاكسازیێن كابینەیا نەهێ د بوارێن سیستەمێ دارایی و كەرتێ بانكی و پڕۆژەیێ (هەژمارا من) و ب دیجیتالكرنا خزمەتكوزاریێن گشتی هاتە كرن.
سەرۆكێ حوكمەتا هەرێما كوردستانێ د بەردەوامییا سەرەدانا خوە دا بۆ ئەمریكا ل گەل سیناتۆر جاك رید، سەرۆكێ لژنەیا هێزێن چەكدار ل جڤاتا پیرێن ئەمریكا و سیناتۆر رۆجەر ویكر، ئەندامێ بلند یا ئەوێ لژنەیێ كۆمبوو هەروەسا سەرەدانا بالیۆزخانەیا ئیراقێ ل واشنتۆن ژی كر و پێشوازی لێ هاتە كرن ژ ئالیێ بالیۆز نزار ئەلخەیروللا.

ب هەلكەفتا سالڤەگەرا 45 یا وەغەركرنا رێبەرێ نەتەوا كورد (بارزانیێ نەمر) پشكا رەوشەنبیری و راگەهاندنا پارتی دیموكراتی كوردستان د رێ و رەسمەكێ هەژی دا پەرتووكا (هزر و فەلسەفا رێبازا بارزانی د گۆتنێن بارزانیێ نەمر دا) یا عەبدولعەزیز محسن بارزانی دا نیاسین. د ئەوی رێورەسمی دا فازل میرانی، سەرۆكێ دەستەیا كارگێرییا مەكتەبا سیاسی یا پارتی دیموكراتی كوردستان پەیڤەك پێشكێشكر و ئەڤە دەقێ وێیە:

د بیرهاتنا وەغەركرنا هەر كەسەكی دا نەخاسمە مرۆڤەكێ سومبۆل وەكو بارزانیێ نەمر پەیدابوونەكا نوویە ئانكو ئەم نوكە یێ هزرا وی دكەین و گۆتنێن وی دبێژین ئانكو ئەو یێ دناڤ مە دا و وەغەر نەكریە و ئەڤە رەوالەكە هەموو جڤاكێن جیهانێ پەیڕەوییا ئەڤێ بۆچوونێ دكەن.
دهێتە گوتن هەكە ل سەردەمێ شۆڕەشا ئەیلوولێ دا بەرپرسێن هێزا و كۆمیتەیا ناڤەندی یان ژی كادر ئاریشەیەك هەبا دچوونە ژۆرا بارزانیێ نەمر و (لال) د بوون ئەو (لالبوونە) ژ ترسا دا نەبوو، بەلكو زالبوونا كەسایەتییا رێبەرەكی بوو. ئەز ژی ئەڤرۆ د ئەڤێ هەلكەفتێدا ل من نەگرن هەكە ئەز ژی بكەڤمە د رێزا (لالان) دا و ئەز دزانم ئەز نە (لال) ژی بوویمە. ئەڤرۆ د ئەڤێ بیرەوەریێدا سەرێ رێزێ دچەمینین بۆ ئەڤی مرۆڤێ مەزن ئەوێ دوهی باب و باپیرێن مە كۆمكرین و ئەڤرۆ ئەم كۆمكرین ئەڤە ئێك ژ هونەرایە، بارزانیێ نەمر دەمێ پەیدابووی یا خوە دیتی وەكو كەسەكێ ئازاد ب تنێ و دەمێ چاڤێ خوە ڤەكری دیت ئەو یێ ب تنێ نینە بەلكو مللەتەكە بەلێ مللەتەكێ بن دەست نەكو مللەتەكێ ئازاد و ئەڤێ چەندێ پالدا كو هزر بكەت چاوان ژ تاكەكێ ئازاد ببیتە مللەتەكێ بن دەست چ رێك بگریتە بەر كو ئەڤی تاكی و ئەڤی مللەتی ژ بندەستیێ رزگار بكەت، ئەوبوو هزر ل خەباتێ كر كو خەباتەكا نە رێكخستی پشكداربیت تێدا چ ل رەخێ رۆژهەلات و چ ل رەخێ باكوور یان باشوور و چ ئەو شەڕێ ل سەر هاتییە سەپاندن بەلێ ئەو شەڕە نە ل سەر وی هاتە سەپاندن بەلكو ل سەر هزرا وی ل دۆر ئازادكرنا مللەتەكی بوو.
ئەڤرۆ دەمێ ئەم ئاخڤتنێن بارزانیێ نەمر دبینین ( ئەز ل ڤێرێ دەستخوەشیێ ل كاك عەبدولعەزیزی دكەم كو گەلەك خوە پێڤە وەستاندی و من ژی چەند رێزكەك وەكو پێشەكی بۆ نڤیسییە ومن پشتەڤانی لێكر كو بهێتە چاپكرن) دبێژین كو گوتنێن باش د گرنگن بەلێ تشتەكێ گرنگتر ژ ئەوێ چەندێ یا هەی ئەوژی پەیڕەوكرنا ئەوان گوتنێن باشە، نە كێ كر و كێ خار، كێ گوت و كێ پەیڕەوكر بلا ئەم ئەڤێ چەندێ بێژین. یا گرنگ ئەوە ئەم وەكو مللەتەك چونكە ئەوی رێبەرییا مللەتەكی كریە و ژ مللەتی ئەم وەكو پارتی ئەم چەند ئاخڤتنێن بارزانیێ نەمر پەیڕەو دكەین ل هەموو ئەوان بوارێن نڤیسەری هەلبژارتین چونكە مرۆڤ گەلەكن بەلێ ئایا مرۆڤبوون و پەیڕەوی ل پرنسیپێن مرۆڤایەتیێ وەكهەڤییەك هەیە ل گەل هەژمارا مرۆڤان؟ هەژمارا ئەندم و كادرێن پارتی ل گەل پارتیبوونا مەبدەئی د گونجیت؟ دڤێت ئەم هەموو وێرەكییەكێ بدەینە خوە و باشە مرۆڤ پێداچوونێ د دیرۆكا خوە دا بكەت و هەردو بەرپەران بخوینیت نەكو تنێ بەرپەرەكی هەر مرۆڤەكی و هەر مللەتەكی و هەر بزاڤەكێ و هەر سەركردەیەكی دو بەرپەر یێن هەی ئێك یێ باشیێە و ئێك یێ خرابیێ و هەكە ئێك ب تنێ خواند و تنێ تە ل ئەرێنیێن خوە گەریای تو هزر ناكەی كا تە ل كیرێ شاشی كریە بەلێ هەكە تو نیرینەكێ ل بەرپەرێ دی ژی بكەی دێ پتر ل سەر باشیان رژد بی بەلێ دێ وێرەكتر بی د دەستنیشانكرنا شاشیان دا، چاككرنا شاشیێن دوهی ئەڤرۆ چاوان راست بیتن ئانكو دڤێت ئەوا دوهی ئەڤرۆ دوبارە نەكەی ب رامانا ئەوێ چەندێیە ئانكو تە یا دوهی دروستكر، ژ بەر ئەڤێ چەندێ پرنسیپێن مرۆڤبوونێ گەلەكن ئەوژی هەڤدوڤیانە و رێزگرتنە ل هەڤدو و تەعدایی نەكرنە.
راستە بارزانی ئەڤ ئاخڤتنە هەموو بۆ هینگێ یێن گوتین بەلێ چونكە لۆژیكە، بارزانی پەیڕەوی هێزا لۆژیكێ بوو و پەیڕەوێ لۆژیكا هێزێ نەبوو چونكە ئەوی دزانی لۆژیكا هێزێ یا بەروەختە بەلێ هێزا لۆژیكێ هێزەكا بەردەوامبوو و هەكە هێزا لۆژیكێ ب سەرنەكەڤیت ئانكو رامان دادپەروەری حەقی و نەحەقییە، هێزا لۆژیكێ حەقە و لۆژیكا هێزێ ستەمە لەوما ئەوی دزانی ئەو ستەما ل سەر مللەتی یا بەردەوام نابیت.
د نسكۆیا 1975 دا بارزانیێ نەمر ئەم وەكو كادرێن پێشكەفتی یێن پارتی داخوازكرین و باسێ رەوشێ و رێككەفتنا جەزائیر كر و بژاردەیەك دا خەلكی كی بمینیت و كی بچیتە ئیراقێ و دوپاتی ل سەر دو تشتان كر و گوت ئەز حەزن ناكەم كادرێن حزبی یێن لەشكری و ئەكادیمی و ئەفسەرێن لەشكری و نوشدار بچن و ئەو سەرمایێن چەندین سالایە مللەتێ كورد بەرهەڤكری و بەعس یا باوەریێ نینە و هەكە ئەڤێ سەرمایێ ژناڤ ببەت چەند سالێن دی مە پێدڤییە هەتا ئەم سەرمایەكا وەسا پەیدا بكەین، و یا دویێ گوت ئەڤ رەوشا ئەم نوكە تێدا بەردەوام نابیت.
ژ بەر ئەڤێ چەندێ گۆتنێن بارزانیێ نەمر تنێ ئەو نینە ئەم بێژین ئەم پەیڕەوێن وی نە بەلكو ئەم چەند پەیڕەویێ ل پەیرەوكرنا ئاخڤتنێن وی دكەین هەر ژ من و هەتا یێن دی یا گرنگ ئەوە زانا تشتەكە و زانیبوون تشتەكێ دی یە كو زانا ئەوە یێ كو پەیڕەویێ ل زانینێ بكەت نەكو زانینا خوە ب نەزانینبوون ب كاربینیت
بەلێ شرۆڤەكرنا من زانا تنێ ئەو نینە یێ د ئایینی دا پێشكەفتینە یان د خواندنێ دا ماستەر و دكتۆرا بدەستڤەئیناینە ، بەلكو پەیڕەوی ل ئەوێ زانینا خوە چاوان بكاردئینیت، مرۆڤەكی سەرمایەك هەبیت چاوا ئەوی سەرمای بكاردئینیت دا و ب پارێزیت و زێدە بكەت، ب بۆچوونا من ئەم زانینبوونا خوە ل ئەڤێ چەندێ ب مەزێخین كا چاوان خوە رێكبێخین و چاوان ئێكەتییا خوە بپارێزین و چاوان ل سەر ملێن هەڤدو بلند نەبین و چاوا هەڤدو نە ئێخین و باسێ هەڤدو نەكەین و ستەمێ ل هەڤدو نەكەین و بەرگریێ ژ هەڤدو بكەین نەكو ل گەل نەحەز و دوژمنێ خوە رێزبین، ئەڤە ژ بهایێ زانابوونێ كێم دكەت، پەیڕەویێ ل زانین و زانینبوونێ كێم دكەت.
پێدڤییە ئەم پێداچوونێ د خوەدا بكەین، چەند ئەم پەیڕەوێن گوتنێن بارزانیێ نەمرین، بێگومان گوتنێن وی بۆ پارتییا ب تنێ نینن و بۆ حزبان ژی ب تنێ نینن و بۆ كوردان ژی ب تنێ نینن بەلكو بۆ مللەتێ كوردستانێ و بۆ هەر مرۆڤەكی كو دەردەسەریێن وی د ئەوان گوتنان دا جهێ خوە دبینن و دەمێ ئەو باسێ ئازادیێ دكەت ئەو ناڤێ مللەتەكێ بن دەست دئینیت بەلێ رامانا وێ ئەو نینە داخوازییا وی بۆ ئازادیێ بۆ ئەوان مللەتێن بن دەست ژی نینە، هەر چ تشتێن بۆمە گوتی بۆمە ب تنێ نینن.
بارزانیێ نەمر سەرۆكێ حزبەكێ نەبوو بەلكو رێبەرێ مللەتەكی بوو و ئێكانە رێبەر بوو كو شیای ل هەر چار پاچان ئێكڕێز و ئێكدەنگ بیت یان ئێك هێز و ئێكدەنگ بیت و ب كێمی ژ زاخۆ هەتا مەندلی ئێك رێبەر هەبوو ب ئێك پەیڤ دشیا هەموویان بلڤینیت و ل پارچێن دی یێن كوردستانێ ژی ب رێبەرییا بارزانیێ نەمر د رازی بوون، پارتی دیموكراتی كوردستان ل سووریێ كو ل سالا 1957 هاتییە دامەزراندن و هەتا نوكە ژی بارزانیێ نەمر سەرۆكێ فەخریێ ئەوێ پارتێیە و ل كوردستانا توركیا ژی هەمان تشت، ئەو پارتییا بارزانیێ نەمر دروستكری خەلك ژ ئەڤان وەلاتان دچوونە ئەورۆپا ئێكسەر دبوونە ئەندامێن پارتییا وی، ئانكو بارزانی سومبۆلێ ئێكەتییا كوردستانیان بوو و نە تنێ یێ پارتییا بوو و نە تنێ یێ كوردان ژی بوو ژبەر ئەڤێ چەندێ رەشمالا وی رەشمالا پارتییا ب تنێ نەبوو و رەشمالا كوردان ژی ب تنێ نەبوو بەلكو یا ئێزدیا و توركمانا و ئاشووریا و كلدانا و موسلمانا و مەسیحیان … هتد بوو و هەتا ئەرەبێن ژ ئەگەرێ خەباتا ژ ئیراقێ قەستا رێبەرییا بارزانیێ نەمر دكر جهێن ئەوان د وێ رەشمالێدا هەبوو.
ئەوا گرنگ د ئەڤان هەلكەفتاندا تنێ ئاخڤتن نینن بەلكو پەیڕەوی گرنگە بۆ ئاخڤتنێ چ خەمساری د مە دا نینە و رێبازا بارزانی شیعار نینە بەلكو باوەرییە، هندەك دبێژن عەقیدەیە و هندەك دبێژن باوەرییە و هندەك دبێژن پرنسیپە بەلێ هەموو نە شیعارە بەلكو كریارن و نوكە ژی ژ هەر دەمەكی پتر ئەم پارتی و ئەم كورد و ئەم كوردستانی ئەم ئەڤێ پەرتووكێ بخوینن و بزاڤێ بكەین چەند د شیانێن مە دا بیت بجهبینین و هەكە مە ئەڤە كر پارتییا مە دێ ب هێز بیت و كوردستانا مە دێ ب هێز بیت و خۆراگرییا مە دێ خۆراگرتر بیت و دێ دوژمن پتر رێزێ ل مە گریت. وئەم هەموو دشێین پەیڕەوێن رێبازا بارزانی بین هەكە مە ئیرادەیا باوەریێ ب ئەوێ رێبازێ هەبیت.

دوهی ڕۆژا شەمبی ٢ـێ‌ ئادارا ٢٠٢٤ ب ئامادەبوونا فازل میرانی، بەرپرسێ‌ دەستەیا كارگێڕی یا مەكتەبا سیاسیا پارتی دیموكراتی كوردستان و ژمارەیەكا بەرچاڤ ژ بەرپرسێن حزبی و حكومی، ڕۆشنبیر، نڤیسەر، ڕۆژنامەنڤیسان كتێبا “هزر و فەلسەفا ڕێبازا بارزانیی، د گۆتنێن بارزانیێ‌ نەمردا” ژ نڤێسینا ( عەبدولعەزیز موحسن بارزانی) هاتە ئیمزاكرن.

مەراسیمان ب دەقیقەكا راوەستانێ‌ بۆ گیانێ‌ پاقژێ‌ شەهیدان و سەروەرێ‌ وان بارزانیێ‌ نەمر و كاك ئیدریسێ‌ هەردەم ل بیر دگەل سرۆدا ئەی رەقیب دەستیپێكر.

د.سالار عوسمان، بەرپرسێ‌ پشكا ڕۆشنبیری و ڕاگەهاندنا پارتی دیموكراتی كوردستان پشتی پەیڤا ب خێرهاتنێ‌، ب ناڤێ‌ پشكا ڕۆشنبیری و ڕاگەهاندنا پ.د.ك گۆتی: بارزانیێ‌ نەمر ئەو ڕێبەرێ‌ نەتەوەییە یێ‌ دناڤ مێژوویێ‌ دا هاتی و كووراتیا مێژوویێ‌ كۆمكری بۆ وێ‌ چەندێ‌ ئەڤرۆیەكێ‌ دروست بكەت، كو پرە ل بەرهەمداری، پاش وێ‌ كو ئەڤڕۆ ل شۆڕش و ل هزرا نیشتمانی و ل ڕێككەفتنێن بەرهەمدار دگەل بەغدا و ئاشتیا كۆمەلایەتی، ئاشتییا سیاسی و پێكڤەژیان و ژینگەهپارێزی و ئێكسانی و عەدالەت، ب كۆمەكا چرا ڕێكا سپێدەهیەكێ‌ بۆ مە دروستكر، هەتا ل سایە و سییبەرا وێدا بەردەوامبین ژ پێخەمەت خەباتێ‌ بۆ نەتەوەیەكێ‌ هەرەشە ل سەر و نیشتمانەكێ‌ پڕی ئاریشە و ئایندەیەكێ‌ پڕی ئەركان، ئەم ئەڤڕۆ ئاخفتنێ‌ لسەر ڕێبەرەكێ‌ نەتەویی دكەین، كو كاركریە بۆ وێ‌ چەندێ‌ تاریێن زەمەنێ‌ خۆ بێخیتە ناڤ كۆمەكا ڕووناهیان و دەستێ‌ نڤشێن نوی بگریت بۆ بجهئینانا ئارمانجێن مەزنێن نیشتمانی.

ل دووماهیا ئاخفتنێن خۆ دا گۆتی: ڕێبازا بارزانی ڕێبازا ژیان و ئازادیێ‌ یە، مە دڤێت سەرنجا وە بۆ چەمكێ‌ ژیانێ‌ ڕابكێشین، كو خەباتا بارزانی ب تنێ‌ خەباتا نیشتیمانی و نەتەوەیی ل ستوویێ‌ خۆ نەگرتیە ب قەد وێ‌ چەندێ‌ هەموو ژیانا خۆ ل ستوو گرتیە، ژیان ب ڕامانا قوول و فرەرەهەندییا وێ‌، هەر ل زمان و ئەدەب و كەلتوور و ژینگەپارێزیێ‌ و هەر ل مافێن ژنان و یەكسانیێ‌ و هەر ل گرنگیدان ب لاوان و ئافرەتان و ل ئێكسانیا ب ڕامانا نیشتیمانیەكێ‌ هەتا دگەهیتە پێكڤەژیانێ‌ و هزرا نیشتیمانی.

پاشان فلمەكێ‌ دۆكیۆمێنتاری سەبارەت كتێبا “هزر و فەلسەفا ڕێبازا بارزانی د گۆتنێن بارزانیێ نەمردا” هاتە نیشادان.

ددووڤدا فازل میرانی، بەرپرسێ‌ دەستەیا كارگێڕیا مەكتەبا سیاسییا پارتی دیموكراتی كوردستان د پەیڤەكێدا ڕاگەهاند، بیرئینانا مالئاڤاهیا هەر مرۆڤەكی، ب تایبەت ئەوێن سیمبول، وەك بارزانیێ‌ نەمر، نووبوونا ژیانێ‌ یە نەك مالئاڤاهیە، بەلكو ژ دایكبوونەكا نوی یە، چونكو ئەم نوكە هزر ل وی زاتێ‌ پیرۆز دكەین و ل بیردئینین، ئانكۆ د دلێ مەدایە و مالئاڤاهی نەكریە، ئەڤەژی دیتنەكە د هەموو كۆمەلگەهێن جیهانێ‌ دا دهێتە پەیرەوكرن.
د درێژیا پەیڤا خۆ دا گۆتی: بارزانیێ‌ نەمر هەموو خەباتا وی ئەوبوو مللەتێ‌ وی بەرەف سەرفرازیێ‌ ببەت، پاشان سوپاسیا نڤیسەرێ‌ كتێبێ‌ كر بۆ نڤیسین و چاپكرنا ئەوێ‌ كتێبێ‌ و ئاماژە دا “گۆتنێن باش د گرنگن، ژ وێ‌ گرنگتر پەیرەوكرنا وانە”.
پاش تابلۆیەكێ‌ میوزیكا دەڤەرا بارزان ژلایێ سەفەت كانیبۆتی هاتە پێشكێشكرن.
هەر د مەراسیمان دا گۆتارا نڤیسەرێ‌ كتێبێ‌ عەبدولعەزیز موحسن بارزانی هاتە پێشكێشكرن و سوپاسیا فازل میرانی، بەرپرسێ‌ دەستەیا كارگێڕی یا مەكتەبا سیاسییا پارتی دیموكراتی كوردستان و، پشكا ڕۆشنبیری و ڕاگەهاندنا پ.د.ك و، هەموو ئەوان كەسان كر كو هاریكاربوون ل نڤیسین و بەلاڤكرنا ئەڤێ‌ كتێبێ‌ كر ب (١٠) زمان و زاراڤێن جودا بەلاڤكری.
ل دووماهیا مەراسیمان دا سوپاسناما پشكا ڕۆشنبیری و ڕاگەهاندنا پارتی دیموكراتی كوردستان، ژلایێ‌ فازل میرانی پێشكێشی نڤیسەری كر.

سەرۆك مەسعود بارزانی، راگەهاند: دیمۆكراسی ل ئیراقێ‌ ل سەر هەردو ئاستێن ناڤخۆ و دەرڤە مەترسی ل سەر هەیە و گۆت:( سەرۆك وەزیرێن نوكە یێ‌ ئیراقێ‌ دێ‌ روو ب روو ئاستەنگێن دژوار بیت).
سەرۆك بارزانی، د چاڤپێكەفتنەكا تایبەت دا، بۆ رادیۆیا (مۆنت كارلۆ) یا فرەنسی كو دوهی بەلاڤ بوویە، ل دۆر رەوشا ناڤخۆ یا هەرێما كوردستانێ‌ دوپات كر كو بزاڤ د بەردەوامن ژ پێخەمەت نەهێلانا ناكۆكیان و دروستكرنا ئێكرێزیێ‌.
سەرۆك بارزانی ل دۆر دانوستاندنێن بەغدا و واشنتونێ‌ یێن تایبەت ب هەبوونا سوپایێ‌ ئەمریكا ڤە ل ئیراقێ‌ ئاماژە ب وێ‌ چەندێ‌ كر كو، ترس ژ دوبارەبوونا سیناریۆیا 2011 هەیە كو پشتی دەمەكێ‌ كێم ژ ڤەكێشانا سوپایێ‌ ئەمریكا ئێك ل سەر سێ‌ یا ئاخا ئیراقێ‌ ژ ئالیێ‌ رێكخراوا داعشێ‌ ڤە هاتە داگیركرن و ل دووڤ دا ب هاریكاری و پشتەڤانیا هەڤپەیمانان داعش هاتە شكاندن.
رۆهنكرن ژی دانە سەر بڕیارێن ڤێ‌ دووماهیێ‌ یێن دادگەها فیدرالی دژی هەرێما كوردستانێ‌ و دادگەه ب بنپێكرنا دەستهەلاتێن دستووری سووچدار كر.
سەبارەت پەیوەندیێن هەرێما كوردستانێ‌ و ئیرانێ‌، ب تایبەتی پشتی هێرشێن مووشەكی بۆ سەر هەولێرێ‌، تۆمەتێن ئیرانێ‌ رەتكرن كو بەردەوام تەهران هەرێما كوردستانێ‌ ب پەناگەه و جهێ‌ حەواندنا دوژمنێن خوە سووچدار دكەت، سەرۆك بارزانی گۆت: (هندەك ئالیان ل تەهرانێ‌ بۆ بەرسڤدانا یێن ب هێز، شكەستن ئینایە، لەورا هەولێر بۆ ڤەشارتنا شكەستنێن خۆ كریە ئارمانج).

سەرۆك مەسعود بارزانی پەیامەك بەلاڤكر و تێدا سوپاسییا هەموو ئەوێن د بەهییا خووشكا وی (زەكیا مستەفا بارزانی) دا پشكدار بووین دكەت,
دەقێ پەیاما سەرۆك بارزانی ..
ب ناڤێ خوە و هەموو ئەندامێن مالباتا بارزانی، سوپاسییا خوە ئاراستەی بەرپرسێن فەرمی و حكومی و حزبی یێن ئیراقێ و هەرێما كوردستانێ و ئەندامێن جڤاتا نوونەرێن ئیراقێ و بالیۆز و قونسل و نوونەرێن وەلاتان و رێكخراوێن نێڤدەولەتی و هێزێن هەڤپەیمانان و زانایێن ئایینی و نوونەرێن پێكهاتەیێن نەتەوەیی و ئایینی و سەرۆك و نوونەرێن عەشیرەتێن باشوور و ناڤەڕاست و رۆژئاڤایێ ئیراقێ و نوونەرێن رێكخراوێن جڤاكێ مەدەنی و كەسایەتیێن سیاسی و جڤاكی و فەرهەنگی و ئەكادیمی و وەرزشی و فەرماندە و هێزێن قەهرەمانێن پێشمەرگەی و دەزگەهێن ئەمنی و هێزێن ناڤخوەیی و بەرپرسێن ئیداری و سیاسی و راگەهاندكاران و هەموو تەخ و چینێن هەرێما كوردستانێ و ئیراقێ و هەموو كوردستانیێن عەزیز ل هەر چار پارچە و دەرڤەی وەلاتی دكەم كو تەشریف ئینای بۆ پشكداریكرنێ د بەهییا خووشكا مە یا رەحمەتی (زەكیا مستەفا بارزانی) و هەڤسۆزی و هەڤخەمییا خوە دەربڕی و خەما مە سڤككری.
هەروەسا سوپاسییا هەموو ئەوان سەرۆك و بەرپرس و كەسایەتیێن وەلاتان و دۆستێن بیانی و هەموو ئەوان برێزێن دەرڤە و ناڤخوەییا كوردستانێ و ئیراقێ دكەم كو ب رێكا تەلەفۆنێ و بروسكا و پەیامێن سەرەخوەشیێ د خەما مە دا هەڤپشك بوون.
هەڤپشكییا خەلكێ ئەزیز یێ كوردستانێ و دۆستێن مە، د خەما مە دا هەردەم جهێ رێز و تەقدیرا مەیە. سوپاسییا هەموو وی خەلكێ ژ دوور و نێزیك هاتین و ئەرك كێشای و د خەما مە دا پشكدار بووین. ل ڤێرێ سوپاسییا وەلاتیێن خوەشتڤی یێن باژێركێ سەلاحەدین دكەم كو د ئەوان چەند رۆژان دا هەدار ل سەر زەحمەتی و قەرەبالغییا بەهیێ كری و مێهڤاندارییا خەلكی كری. هەروەسا سوپاسییا ئەرك و وەستییانا هێزێن پێشمەرگەی و دەزگەهێن ئەمنی و هێزێن ناڤخوەیی و تیمێن ساخلەمی دكەم كو ئەركێ رێكخستنا رێك و پران و ئاسایش و ئاسانكاری بۆ مێهڤانان ل سەر ملێ ئەوان بوو.
ژ خودایێ مەزن دخوازم خێرا هەموویان بنڤیسیت و دووری بەلا و نەخوەشییان بن، رەحمەتێن خودای ل وەغەركریێن هەموو ئالییەكی بن.

دوهی سێشەمبی 27/2/2024 نێچیرڤان بارزانی، سەرۆكێ هەرێما كوردستانێ د دیدارەكێدا ل گەل سۆلتان بن موبارەك ئەلكوبەیسی، بالیۆزێ نوو یێ قەتەر ل ئیراقێ، سەرەرای پیرۆزباهیێ بۆ دەستبكاربوونا وی و هیڤییا سەركەفتنێ د ئەركێن وی دا، خوەشحالییا خوە ب ئاستێ پەیوەندیێن قەتەر ل گەل ئیراقێ و هەرێما كوردستانێ دیاركر و دوپاتكر كو دەلیڤەیەکا باش بۆ پێشڤەبرنا پەیوەندییان و بەفرەهكرنا هاریكاریێن هەڤپشك د ناڤبەرا وان دا یێن هەین.
ژ ئالیێ خوەڤە بالیۆزێ نوو یێ قەتەرێ ل ئیراقێ، خوەشحالیا خوە ب دەستبكاربوونێ وەكو بالیۆزێ وەلاتێ خوە ل ئیراقێ نیشادا، هەروەسا دوپاتی ل ئەوێ چەندێ كر كو هەموو دەرگەهێن قەتەرێ ب روویێ ئیراقێ و هەرێما كوردستانێ د ڤەكرینە. سەبارەت ئەڤێ چەندێ ژی ئاماژە كر كو قەتەر دخوازیت د بوارێن وەبەرئێنانێ، ئابۆری، كەلتووری وچەندین بوارێن دی دا پەیوەندیێن خوە ل گەل ئیراقێ و هەرێما كوردستانێ پێشڤە ببەت.

سەرۆكێ حوكمەتا هەرێما كوردستانێ د چارچۆڤەیێ سەرەدانا خوە دا بۆ واشنتۆن، ل گەل بریكار و هاریكارێن وەزیرێ دەرڤە یێ ئەمریكا كۆمبوو و رەوشا شنگالێ، دەستپێكرنا هنارتنا پەترۆلا هەرێما كوردستانێ و پێشئێخستنا كەرتێ وزێ ل هەرێما كوردستانێ گەنگەشەكر.
ل رۆژا دوشەمبی 26/2/2024، مەسرور بارزانی، سەرۆكێ حوكمەتا هەرێما كوردستانێ، ل واشنتۆن، د سێ كۆمبوونێن جودا دا، ل گەل هەر ئێك ژ باربارا لیف، هاریكارا وەزیرێ دەرڤە یێ ئەمریكا بۆ كاروبارێن رۆژهەلاتا نێزیك، عەزرا زییا، بریكارێ وەزارەتا دەرڤە یا ئەمریكا بۆ كاروبارێن ئاسایشا سڤیل و دیموكراسیێ و مافێن مرۆڤی و جیۆفری پیات، هاریكارێ وەزیرێ دەرڤە یێ ئەمریكا بۆ ژێدەرێن وزێ كۆمبوو.
د ئەوان كۆمبوونان دا پێشڤەبرنا پەیوەندیێن دو قۆلی و پاراستنا مافێن پێكهاتەیان و پێشڤەبرنا كەلتۆرێ پێكڤەژیانا ئاشتییانە و ئازادییا ئایینی و ئاساییكرنا رەوشا شنگالێ، هەروەسا دەستپێكرنا هنارتنا پەترۆلا هەرێما كوردستانێ و پێشئێخستنا كەرتێ وزێ ل هەرێما كوردستانێ هاتە گەنگەشەكرن.

پەیڤدارێ وەزارەتا دارایی و ئابۆری ل هەرێما كوردستانێ راگەهاند، لیستا مووچەخۆرێن هەرێما كوردستانێ یا پاقژە و كێشە تێدا نینە. هەروەسا دبێژیت، ل ئیراقێ سەدان هزار مووچەخۆرێن وەهمی یێن هەین و هەتاكو كەس نەشێت لیستا مووچەخۆرێن حەشدا شەعبی ببینیت.
هونەر جەمال، پەیڤدارێ وەزارەتا دارایی و ئابۆری ل هەرێما كوردستانێ د داخۆیانییەكا رۆژنامەڤانی دا ل دۆر دووماهی بڕیارێن دادگەها بلند یا فیدرالی ل ئیراقێ سەبارەت مووچەیێن فەرمانبەرێن هەرێما كوردستانێ و داخۆیانیێن تەیف سامی، وەزیرا داراییا ئیراقێ ل دۆر ڤەكرنا هەژمارا بانكی بۆ مووچەخۆران، گۆت» پشكەك ژ پەرلەمانتاران دبێژن، لیستا مووچەخۆر و فەرمانبەرێن هەرێما كوردستانێ یا پاقژ نینە و كێشە یا تێدا، ب گۆڕەی دووماهی لیستا مەها 10 یا بۆری كو پێشكێشی جڤاتا نوونەرێن ئیراقێ هاتییە كرن، هەرێما كوردستانێ ئێك ملیۆن و 114 هزار و 194 مووچەخۆر یێن هەین و سەرجەمێ مووچەیێن وان یێن مەهانە دبیتە نێزیكی 913 ملیار دیناران. ئەو لیستە ژی گەلەك یا پاقژە و هیچ كێشەیەك تێدا نینە».
پەیڤدارێ وەزارەتا دارایی و ئابۆری ل هەرێما كوردستانێ دپرسیت» دەمێ دبێژن لیستا مووچەیێن هەرێما كوردستانێ یا پاقژ نینە و كێشەیێن تێدا، هەوە پرسیار كریە هەژمارا مووچەخۆرێن فعلی ل ئیراقێ چەندە؟ هەژمارا مووچەخۆرێن فەرمانبەرێن فعلی یێن بەردەوام تنێ ئەوا د بودجەی دا دیار كو هەژمارا وان چار ملیۆنن. ئەو هەتا نوكە نزانن چەند چەكدارێن حەشدا شەعبی مووچەی ژ حوكمەتا ئیراقێ وەردگرن و ئێك كەس نەشێت لیستا مووچەخۆرێن حەشدا شەعبی ببینیت».
ل دووڤ پەیڤدارێ وەزارەتا دارایی و ئابۆری ل هەرێما كوردستانێ» حوكمەتا ئیراقێ و ئالیێن سیاسی ل بەغدا بەردەوام خواستییە هەرێما كوردستانێ ب چەوسینن. بەردەوام بەهانە ئیناینە بۆ ئەوێ چەندێ كێشەیان بۆ مووچەیێن فەرمانبەر و مووچەخۆرێن هەرێما كوردستانێ دروست بكەن».
ژ ئالییەكێ دی ڤە پەیڤدارێ وەزارەتا دارایی و ئابۆری گۆت « ژ دەمێ دەستبكاربوونا كابینەیا نەهێ یا حوكمەتا هەرێما كوردستانێ ل سالا 2019 و هەتا نوكە سێ سالان بودجەیا فیدرالی هەبوو، دو سالان ژی ب گۆڕەی قانوونێن دی، پێدڤی بوو د ئەوان پێنج سالان دا 59 ترلیۆن و 29 ملیار دینار بۆ هەرێما كوردستانێ هاتبانە هنارتن، بەلێ حوكمەتا ئیراقێ د ئەوان پێنج سالان دا تنێ 13 ترلیۆن و 401 ملیار دینار هنارتینە كو پشكەكا مەزن ژێ ب شێوەیێ قەر بوو، ئانكو د پێنج سالێن بۆریدا هەرێما كوردستانێ تنێ 22,7% شایستەیێن خوە یێن دارایی ژ حوكمەتا فیدرالی وەرگرتینە».

سەرۆكێ حوكمەتا هەرێما كوردستانێ، مەسرور بارزانی د پۆستەكێ تۆرا جڤاكی یا ئێكس (تویتەرا بەرێ) دا راگەهاند، ل كۆمبوونا د گەل بەرپرسێن وەزارەتا دەرڤە یا ئەمریكا دا داخوازا پشتەڤانییا بەردەوام یا ئەمریكا ل سیستەمێ فیدرالیێ و مافێن دستووری یێن هەرێما كوردستانێ كریە.
مەسرور بارزانی، سەرۆكێ حوكمەتا هەرێما كوردستانێ ئاماژە ب ئەوێ چەندێ ژی كریە، ل گەل هەڤپشكێن خوە ل وەزارەتا دەرڤە یا ئەمریكا پەیوەندیێن هەولێر و بەغدا گەنگەشەكریە، هەروەسا داخوازا پشتەڤانییا بەردەوام یا ئەمریكا ل سیستەمێ فیدرالیێ و مافێن خەلكێ هەرێما كوردستانێ كریە.
سەرۆكێ حوكمەتا هەرێما كوردستانێ باس ل ئەوێ چەندێ ژی دكەت، ل گەل بەرپرسێن وەزارەتا دەرڤە یا ئەمریكا باس ل رێكێن دەستپێكرنا هنارتنا پەترۆلا هەرێما كوردستانێ كریە.
سەبارەت پرسا شنگالێ ژی، مەسرور بارزانی بەرچاڤكر كو هەلوەستێ ئەوان یا رۆهنە پشتی 10 سالان ژ جینۆسایدێ پێدڤییە رێككەفتنا شنگالێ بهێتە بجهئینان، بۆ ئەوێ چەندێ ئێزدی بزڤڕن بۆ جهێن باپ و باپیرێن خوە.
سەرۆكێ حوكمەتا هەرێما كوردستانێ خۆیاكر ژی كو دێ بەردەوام بن ل بەرگریكرنێ ژ مافێن هەموو پێكهاتەیان و وەكو پەناگەهـ بۆ ئاوارەیان دێ مینن. هەروەسا مە باس ل رێكێن دەستپێكرنا هنارتنا پەترۆلا هەرێما كوردستانێ كر.
ئەنتۆنی بلینكن، وەزیرێ دەرڤە یێ ئەمریكا ل تۆرا جڤاكییا ئێكس (تویتەرا بەرێ) بەلاڤكر: ل گەل مەسرور بارزانی ،سەرۆكێ حوكمەتا هەرێما كوردستانێ كۆمبووین و مە دانوستاندن ل دۆر هەڤپشكییا ئەمریكا ل گەل هەرێما كوردستانا ئیراقێ و هاندانا بەردەوام یا هاریكاریێ ل گەل حوكمەتا فیدرالی یا ئیراقی كر». هەروەسا دبێژیت: ئەمریكا وەكو پشتەڤانا هەرێما كوردستانا ئیراقێ دێ مینیت».
ژ ئالییەكێ دی ڤە ماتیۆ میلەر، پەیڤدارێ وەزارەتا دەرڤە یا ئەمریكا ل دۆر كۆمبوونا مسەرور بارزانی، سەرۆكێ حوكمەتا هەرێما كوردستانێ و ئەنتۆنی بلینكن، وەزیرێ دەرڤە یێ ئەمریكا، د كۆنفرانسەكێ رۆژنامەڤانیدا گۆت: ئەنتۆنی بلینكن، وەزیرێ دەرڤە یێ ئەمریكا و مەسرور بارزانی، سەرۆكێ حوكمەتا هەرێما كوردستانێ باس ل گرنگییا هەڤپشكیێن ئەمریكا ل گەل هەرێما كوردستانێ كر.
ماتیۆ میلەر ئاماژە كر: وەزیرێ دەرڤە بلینكن پشتەڤانییا خوە بۆ هەماهەنگییا ئاڤاكەر د ناڤبەرا حوكمەتا ئیراقێ و حوكمەتا هەرێما كوردستانێ دا و ئێكگرتنەكا زێدەتر د ناڤخوەییا هەرێما كوردستانێ دیاركر بۆ ب هێزتركرنا سەقامگیریێ و ڤەژاندنا ئابۆری بۆ خەلكێ ئیراقێ».
د پشكەكا دی یا داخۆیانییا خوە دا، پەیڤدارێ وەزارەتا دەرڤە یا ئەمریكا رۆهنكر» ئەڤە جارا ئێكێ نینە وەزیرێ دەرڤە ل گەل سەرۆكێ حوكمەتا هەرێما كوردستانێ كۆم دبیت، چەند جارێن دی ژی مە كۆمبوونێ یێن ئەنجامداین، ئەم دخوازین ئەو دانوستاندنێن مە هەین بەردەوامیێ پێ بدەین».

دوهی دوشەمبی 26/2/2024 ل سەلاحەدین سەرۆك مەسعود بارزانی پێشوازی ل پاتریك دۆرێل، بالیۆزێ فڕەنسا ل ئیراقێ كر.
د دیدارەكێ دا كو یان برێم، قونسلێ گشتیێ فڕەنسا ل هەولێرێ بەرهەڤ بوو رەوشا سیاسی و دووماهی پێشهاتێن ئیراقێ و دەڤەرێ هاتە گەنگەشەكرن.
هەر د ئەوێ دیدارێ دا بالیۆزێ فڕەنسا ل ئیراقێ و شاندێ د گەلدا سەرەخوەشییا خوە گەهاندە سەرۆك بارزانی بۆ وەغەركرنا زەكیا مستەفا بارزانی خووشكا سەرۆك مەسعود بارزانی.