سەرۆك ئەركانێ وەزارەتا پێشمەرگە ل حوكمەتا هەرێما كوردستانێ، فەریق روكن عیسا عوزەیر ل دیوانا وەزارەتێ پێشوازی ل كۆلۆنێل مایكل گاچیرۆ، بەرپرسێ نڤیسینگەها هاریكارییا ئاسایشێ ل قۆنسلخانەیا گشتی یا ئەمریكی ل هەولێرێ كر.
د ئەوێ دیدارێدا، بەرنامە و پلانێن هەڤپشك یێن داهاتی و گرنگیدان ب بنگەهێن مەشق و راهێنانێ، دووماهی بزاڤێن وەزارەتا پێشمەرگەد پڕۆسەیا دوبارە رێكخستنا یەكە و هێزێن پێشمەرگەی و هەلسەنگاندن بۆ چاوانییا بڕێڤەچوونا پڕۆسەیێ و پاشەڕۆژا هێزا پێشمەرگێ كوردستانێ هاتە باسكرن».
هەروەسا قۆناغێن بجهئینانا یاداشتنامەیا تێكگەهشتنێ دناڤبەرا وەزارەتا پێشمەرگە و وەزارەتا بەرگرییا ئەمریكی هاتنە یاسكرن و هەردو ئالیان ب گرنگی باس ل یاداشتنامەیا تێكگەهشتنێ كر و د هەڤڕابوون ل سەر بجهئینانا بڕگە و خالێن د ناڤ كارنامەیا تێكگەهشتنێ دناڤبەرا وەزتارەتا پێشمەرگە و وەزارەتا بەرگرییا ئەمریكی دا كر. سەرۆكێ ئەركانێ وەزارەتا پێشمەرگە دویاتپكر كو وەزارەتا پێشمرەگە یا پێگیرە ب پڕۆسەیا چاكسازیێ و رێكخستنا هێزا پێشمەرگەی و دێ بەردەوام بن ژی تاكو پڕۆسێ ب گەهیننە ئەنام.
هەردو ئالی د هەڤڕا بوون ل سەر هەماهەنگیێ و گرنگیدانا زێدەتر ب پەیوەندیێن د ناڤبەرا وەزارەتا پێشمەرگە و هێزێن ئەمریكی و هێزا هەڤپەیمانییا نێڤدەولەتی ل هەرێما كوردستانێ بۆ ب ئەنجامد گەهاندنا ئەوێ پڕۆسەیێ، كو وەزارەتا پێشمەرگە ب پشتەڤانییا تمام یا حوكمەتا هەرێما كوردستانێ و هاریكارییا هەڤپەیمانان د ناڤ پڕۆژەیێ قانوونا چاكسازیێ بۆ رێكخستنا هێزان كار ل سەر دكەت.

داخواز دهێتە كرن خوەنیشادان دژی بەغدا ل جادەیێن هەرێما كوردستانێ بهێنە دەستپێكرن و تێدا بهێتە گۆتن ئەم نەتەوەیەكین خوە رادەستكرنێ رەت دكەین، ئەو رۆژنامەنڤیس و چاڤدێرێن ژەهرێ بەلاڤ دكەن سەر ب دەزگەهێن سیخۆری یێن وەلاتان ڤە نە و كارێ ئەوان تیرۆرا هزرییە، چاڤدێرەكێ سیاسی یێ كورد ژی دبێژیت، بێگومان ئەوا بەغدا دكەت دژایەتی و دوژمنایەتییە.
مەهدی زریان، چاڤدێرێ سیاسی بۆ رۆژنامەیا (ئەڤرۆ) گۆت» ئەو سیاسەتا نوكە بەغدا دژی كوردان پەیڕەو دكەت، د چارچۆڤەیێ برسیكرنا خەلكێ كوردستانێ دایە، ئەڤە نە هێزا بەغدایە و نە پشتەڤانییا ئیرانێ، كێشە هندەك خەلكێ كورد ل بن دەستهەلاتا بەغدا پێخوەشترە ژ حوكمڕانییا كوردی، نموونە ژی بەری سالا 2013 وەلاتییان مەهانە مووچە وەردگرت، 20 ملیۆن هەتا 25 ملیۆن سولفەیا خانوبەران هەبوو، هزاران رێكخراو هەبوون حوكمەتێ بودجە بۆ تەرخانكربوو و هزاران خێزانان د چارچۆڤەیێ ئەڤان رێكخراوان د ژیانەكا شاهانە دا بوون، پارچەیێن ئەردی دهاتنە دان بەلێ خوەنیشادان دكر و نزانین ئەوان چ پێ باش نەبوو و خوەشگوزەرانی نەڤێت؟».
گۆت ژی» د ئەڤێ رەوشێ دا ب ئاشكرا چاڤدێر و بەرپرسێن ئەرەب ب خوە دبێژین، بەغدا ستەمێ ل دەستهەلات و خەلكێ هەرێما كوردستانێ دكەت، بەلێ پشكەكا خەلكێ كوردستانێ دبێژنە ئیراقێ دەستێن تە خوەشبن!».
خۆیاكر» پێدڤییە گەلێ كورد بهێتە سەر جادێ و خوەنیشادانان دژی دەستهەلاتا ئیراقێ بكەت ل بەغدا و پێ رابگەهینن بەسە ئەم نەتەوەیەكین، خوە ب كێم نزانین و ناهێلین ب ئەڤی شێوەی رەفتارێ ل گەل مە بكەی، ئەوی دەمی دێ كێشە چارەسەر بیت».
ئەحمەد حاجی رەشید، كو سەركردەیەكێ كۆمەلا دادگەرییە و ئەندامێ بەرێ یێ جڤاتا نوونەرێن ئیراقێیە، داخواز ژ ئێكەتیێ كر سلێمانیێ رادەستی بەغدا بكەت، ل دۆر ئەوێ چەندێ مەهدی زریان دبێژیت» ب راستی ئەو سویاری پێلەكێ بووینە ب ناڤێ چاڤدێرین سیاسی و رۆژنامەنڤیس كو هندەك ژ ئەوان ب سەر دەزگەهێن سیخۆری یێن هەرێمایەتی ڤە نە وكارێ ئەو دكەن تیرۆرا هزرییە».
زێدەتر گۆت» هەر كەسەكێ ژێیاتییا نیشتمانی هەبیت ژ هەر نەتەوەیەكی بیت داخوازا خوەرادەستكرنێ ناكەت، باوەر ناكەم ژی ل هەر نەتەوەیەكێ ل ئەڤێ جیهانێ كەسەك هەبیت ب نە بەرپرسیارەتییە باخڤیت و بێژیت دێ خوە رادەستكەم، كوردان ب درێژاهییا دیرۆكێ خوە رادەستكربا نوكە مە نە دزانی هەر ئەم كوردین».

نڤیسەرەكێ ناڤدار یێ ئەمریكی د گۆتارەكێ دا ب ناڤونیشانێ (عەقیدەیا بایدنی) تێدا باس ل پلانا سەرۆكێ ئەمریكی بایدن دكەت بۆ بەرهنگارییا ئیرانێ و گرۆپێن ب سەر وێ ڤە.
نڤیسەرێ ئەمریكی، تۆماس فریدمان د گۆتارا خوە دا دبێژیت: هەكە ئەمریكا و جیهان و دەڤەر بكەڤنە د شەڕەكێ هەمەلایەنی دا، پلانەكا بەدیل یا هەی كو ب كێمترین زیان دشێت سەركەفتی بیت، ئەوژی ب ئەڤی شێوەی:
1-زێدەكرنا هێرشێن ئەسمانی ل سەر میلیشیێن ب سەر ئیرانێ ڤە كو نەچار بكەن خوە ژ دەڤەرێن باكووری هەتا حەمرین و دەڤەرێن رۆژئاڤایێ ئیراقێ تاكو بەغدا ڤەكێشن.
2-ئەو دەڤەرێن مە باس لێ كرین رادەستی پۆلیس و لەشكری و هێزا پێشمەرگەی بهێنە كرن.
3-دروستكرنا هەرێمەكا سوننی ل رۆژئاڤایێ ئیراقێ ل ئەنبارێ و مووسلێ، هەروەسا دامەزراندنا هێزا ناڤخوەیی و زێرەڤانێن سنۆری ل دەڤەرێ.
4-دابینكرنا دەڤەرا قەدەغەكرنا فرینێ ودانانا سیستەمێ مووشەكی ل وێرێ و ل رۆژئاڤا.
5-فشارئێخستن ل سەر بەغدا بۆ پێكئینانا حوكمەتا نوو پشتی ئەنجامدانا هەلبژارتنان دبن چاڤدێرییا نێڤدەولەتی دا. ب پشكدارییا رەوتێ سەدری و كێمكرنا رۆلێ میلیشیێن ئیرانی تێدا.
و دیاردكەت كو ئەڤ پێنج پێنگاڤە د كاریگەرن بۆ قوتكرنا هێلێن دابینكرنێ د ناڤبەرا ئیرانێ و حزبوللا دا ، هەروەسا د ناڤبەرا ئیرانێ و رژێما سووریێ دا. ژ بەر كو ب ئەڤان پێنج پێنگاڤان، هەموو سنوورێن ئیراقێ و سووریێ دێ دبن كونترۆلا هێزێن دلسۆز ل گەل ئەمریكا بن، هەروەسا سنۆرێن سعودیێ و ئوردنێ ژی دێ دبن كاریگەرییا ئەمریكا دا بن».
ئاماژە كر ژی» هەر دەمێ ئەڤ هێلێن دابینكرنێ بهێنە بڕین، میلیشیا حزبوللا و هەموو هێزێن ب سەر ئیرانێ ڤە ل سووریێ دێ ژناڤچن و رۆلێ ئیرانێ ژی ل ئیراقێ دێ سنۆردار بیت و تنێ دێ ل بەغدا و باشوورێ ئیراقێ رۆل مینیت، هەتاكو ل وێرێ ژی هەڤڕكی دناڤبەرا رەوتێ سەدری و گرۆپێن دی دێ دروست بیت».

پارتییا چاكسازییا توركمانی راگەهاند، ناكۆكی چەند د مەزن بن نابیت بهێلین كاریگەری ل سەر پێگەهێ هەرێما كوردستانێ هەبیت، دیاركر ژی دێ پشتەڤانییا هەر بزاڤەكێ بین بۆ پاراستنا قەوارەیێ دستووریێ هەرێما كوردستانێ.
پارتییا چاكسازییا توركمانی د بەیاننامەیەكێ دا بەلاڤكر: پاراستنا قەوارەیێ دستووریێ هەرێما كوردستانێ ئەركەكێ نیشتمانپەروەریێ هەموو تاكەكێ دلسۆزێ كوردستانێیە، ناكۆكی چەند د مەزن بن نابیت بهێلین كاریگەری ل سەر پێگەهێ هەرێما كوردستانێ هەبیت».
هەروەسا د ئەوێ بەیاننامەیێ دا هاتییە» یا گرنگە هەموو ئالیێن سیاسی هاریكار و هەماهەنگ و ئێكڕێز بن بۆ رێگریكرن ل هەر بزاڤەكێ بۆ لاوازكرنا پێگەهێ هەرێما كوردستانێ «.
ئاماژە كرییە ژی: پارتییا چاكسازییا توركمانی پشتەڤانییا هەموو بزاڤەكێ دكەت بۆ پاراستنا قەوارەیێ دستووریێ هەرێما كوردستانێ و ئەنجامدانا هەلبژارتنێن پەرلەمانێ كوردستانێ دنێزیكترین دەم دا و چارەسەركرنا كێشەیێن دارایی و باشتركرنا ژیانا وەلاتیێن كوردستانێ».
هەڤدەم ئەڤ پارتە دوپاتیێ ل ئەوێ چەندێ دكەت: هەرێما كوردستانێ بەرهەمێ خوینا هزاران شەهید، ئەنفال، قوربانیدان و بەرخوەدانا گەلێ كوردستانێیە و ب هیچ شێوەیەكی نابیت داگیران ژ مافێن دستووری یێن هەرێما كوردستانێ بهێتە كرن».

شیرەتكارێ ئاسایشا نیشتمانییا ئەمریكا دبێژیت، هێرشێن شەڤا ئەینییا بۆری ل سەر گرۆپێن چەكدار ل ئیراقێ و سووریێ، دوماهی ئارمانج نینن و مە پلان یێن هەین ل دەم و جهێن هەلبژارتی هێرشێن زێدەتر بكەین.
جەیك سولیڤان، شیرەتكارێ ئاسایشا نیشتمانییا ئەمریكا د هەڤپەیڤینەكێدا ل گەل كەنالێ NBC نیوز یێ ئەمریكی دوپاتكر كو هێرشێن ئەمریكا ئارمانجێن خوە ئیناینە، بەلێ د پشتڕاست نینین چەند چەكدار و سەركردەیێن كرۆپێن میلیشیایان د هێرشان دا هاتینە كوشتن.
سۆلیڤان دیاركر: پلانا مە ئەوە هێرشێن خوە زێدەتر بكەین بۆ ئەوێ چەندێ د پەیامێن دا دبەردەوام بین، هەر دەمەكی هێرش ل سەر هێزێن مە بهێتە كرن و سەربازێن مە بهێنە كوشتن، دێ ئەمریكا بەرسڤێ دەت».

نێچیرڤان بارزانی سەرۆكێ هەرێما كوردستانێ دوهی پێشوازی ل ئانو سارێلا بالیۆزا فینلەندا ل ئیراقێ كر.
د كۆمبوونەكێ‌ دا، هەردو ئالیان دوپانی ل پێشڤەبرنا پەیوەندیان و بەرفرەهكرنا هاریكاریێن فینلەندا دگەل ئیراقێ و هەرێما كوردستانێ د وارێن جودا دا كر، هەروەسا هزروبیر دەربارەی ڕەوشا سیاسی و ئەمنیا ئیراقێ و گرنگیا پاراستنا ئارامی و سەقامگیریا وەلاتی لێكگوهاڕتن.
نێچیرڤان بارزانی، سوپاسی و پێزانینێن هەرێما كوردستانێ بۆ پشكداریا فینلەندا د هەڤپەیمانیا نێڤدەولەتیا دژی داعشێ دا دەربڕین و پەسنا پشتەڤانیا فینلەندا ل ئیراقێ و هەرێما كوردستانێ بۆ بەرهنگاربوونا تیرۆرێ كر، دیسا ئاماژە ب ڕۆلێ هێزێن فینلەندا كر كو هێشتا ل هەرێما كوردستانێ د ئەركی دانە.
كاریگەری و دەرئەنجامێن شەڕی ل ئۆكراینا و دووماهی پێشهاتێن ڕەوشا ئالۆزا ڕۆژهەلاتا ناڤین و شەڕێ غەززە و چەندین بابەتێن دییێن گرنگ، تەوەرەكێ دی یێ كۆمبوونێ بوون.

دوهی ئێكشەمبی 4/2/2024 ل دەباشان ل سلێمانیێ كۆمبوونا هەڤپشك یا هەردو مەكتەبێن سیاسی یێن پارتی دیموكراتی كوردستان و ئێكەتی نیشتمانی كوردستان هاتە ئەنجامدان، هەردو ئالی ل سەر سێ خالێن سەرەكی د هەڤڕا بوون ژ وان ژی ئەركێ ئەوان و هەموو ئالیێن كوردستانی قەوارەیێ هەرێما كوردستانێ بپارێزن، هەروەسا دانانا پارێزگارەكێ كورد بۆ كەركووكێ.
دەقێ بەیاننامەیا هەڤپشك یا هەردو مەكتەبێن سیاسی یێن پارتی و ئێكەتیێ:
كۆمبوونا هەڤپشك یا هەردو مەكتەبێن سیاسی یێن پارتی دیموكراتی كوردستان و ئێكەتی نیشتمانی كوردستان ل دەباشان هاتە ئەنجامدان.
د كۆمبوونێ دا پشتی هەلسەنگاندن و دانوستاندنێ ل سەر رەوشا سیاسی و ئابۆرییا هەرێما كوردستانێ و كێشەیێن چارەسەرنەكری ل گەل حوكمەتا فیدرالی ب گشتی و بودجە و ژیار و مووچەیێن فەرمانبەران ب تایبەتی، ژ ئالیەكی و هەلبژارتنێن جڤاتێن پارێزگەهان ژ ئالییەكێ دی ڤە، پشتی لێكگوهارتنا بۆچوونان و ل بەرچاڤ وەرگرتنا بەرژەوەندییا بلند یا نەتەوەیی و نیشتمانی، هەڤڕا بووین ل سەر ئەڤان خالێن ل خوارێ:
1-هەردو ئالی د هەڤڕا بووین د ئەڤێ قۆناغێ دا ژ پێخەمەت بەرژەوەندییا وەلاتیێن پارێزگەها كەركووكێ ب هەموو پێكهاتەیێن خوەڤە پارێزگارەكێ كورد بهێتە دیاركرن بۆ خزمەتا خەلكێ باژێر و باژێركان.
2-هەردو ئالی د هەڤڕا بووین ئەركێ سەر ملێ ئێكەتی و پارتی و هەموو ئالیێن كوردستانی قەوارەیێ هەرێمێ دەستكەفتێن شۆڕەش و خەباتێ و خوینا شەهیدێن كوردستانێ بپارێزن.
3-بۆ چارەسەرییا كێشەیێن سیاسی و ئابۆری یێن هەرێما كوردستانێ ل گەل حوكمەتا فیدرالی ل سەر ئاستەكێ بلند هەردو ئالی پێكڤە بزاڤا چارەسەركرنا كێشەیان ب گشتی و ژیان و خزمەتگوزارییان و بودجەی و مووچەیان ب تایبەتی بكەین.
شاندێ پارتی دیموكراتی كوردستان پێكهاتبوو ژ فازل میرانی، ئازاد بەرواری، مەحموود محەمەد، عەلی حسێن و جەعفەر ئێمینكی و شاندێ ئێكەتیێ ژی پێكهاتبوو ژ بافل تالەبانی، دەرباز كۆسرەت، سەعدی پیرە، سالار سەرحەد و ئاراس ئاغا.
پشتی هەلبژارتنێن جڤاتێن پارێزگەهێن ئیراقێ كو ل 14 پارێزگەهێن ئیراقێ و كەركووكێ ل 18/12/2023 هاتینە ئەنجامدان، ئەڤە ئێكەمین كۆمبوونا پارتی و ئێكەتیێ یە ل سەر ئاستێ بلند.

سكرتێرێ حزبا سۆسیالیستا دیموكراتا كوردستانێ راگەهاند، هەتا نوكە هیچ سەرۆك وەزیرێن ئیراقێ، وەكو محەمەد شیاع سودانی دژی كوردان كار نەكریە و ئەوێ هزرێ ژی ب شاش دهەژمێریت كو چارەسەرییا هەموو كێشەیان ل بەغدایە.
محەمەد حاجی مەحموود د سمینارەكێ دا ل باژێرێ سلێمانیێ گۆت: پشتی ژناڤچوونا رژێما بەعس كو ئیراقەكا نوو دروستبووی، كورد وەكو پێدڤی نەشیان ئەوێ دەلیڤەیا زێرین د بەرژەوەندییا خوە دا بكاربینن».
گۆت ژی: پشتی ژناڤچوونا رژێما بەعس، ئەم ب خوە چووینە بەغدا و مە پەیوەندی ب ئۆپۆزسیۆنا ئیراقی دكر بۆ ئەوێ چەندێ ژ ئورۆپا و ئەمریكا بزڤڕن ژبۆ دروستكرنا ئیراقێ، ئەڤە ژی ئێك ژ ئەوان شاشییان بوو كو ل سەر مە كوردان دەرباز بووی».
سكرتێرێ حزبا سۆسیالیستا دیموكراتا كوردستانێ ئاماژە ب ئەوان بزاڤان كر كو كوردان ل نڤیسینا دستوورێ ئیراقێ كرین ( ب شاش ئەنجامدان) و گوت» نە چەسپاندنا مافێن كوردان وەكو نەتەوە، دیارنەكرنا سنوورێ كوردستانێ و كۆمەكا خالێن بنەڕەتی یێن دی كو بۆ كوردان رۆلێ ئێكلاكەر ددیت و ئەم دشیاین د دستووریدا بگونجینین، مە نەكرن».
رۆهنكر ژی كو مادەیا 140 ئێك ژ ئەوان شاشییان بوو كوردان د ناڤ دستوورێ ئیراقێدا گونجاندی و ب دیتنا وی» هەكە ئەو دەڤەرە د داگیركرینە، رۆژەك دێ هێت كوردان دێ هێز هەبیت و ب رێكا هێزێ دێ بدەستڤەئینیت، بەلێ دانپێدان ب مادەیا 140 وەكو ئەوێ چەندێیە تو ب رێكا قانوونێ ئەوان دەڤەران پێشكێشی ئیراقێ بكەی، ژ بەر ئەوێ چەندێ هەكە نوكە هەلبژارتن بهێنە ئەنجامدان ل پترییا ئەوان دەڤەران كورد دەنگێن پێدڤی نائینن».
محەمەد حاجی مەحموود دبێژیت: دەمێ حوكمەتا محەمەد شیاع سۆدانی هاتییە دامەزراندن، هەموویان وەسا هزركر دو مێشێن هنگڤینی د ئێك دارێدا دیتینە و ب لەز پێشوازی و پیرۆزباهی لێكرن، بیێ كو رێككەفتنێ ل گەل بكەن و پاشەڕۆژا رێككەفتنێ دیار بكەن».
ئاماژەكر ژی» سۆدانی ئێك ژ كاریگەرترین سەرۆك وەزیرێن ئیراقێیە كو دژی كوردان كاركرییە، سۆدانی ل گەل پاریس و توركیا رێككەفت بۆ راگرتنا پەترۆلا هەرێما كوردستانێ و شیا ژێدەرێ داهاتێ خەلكێ كوردستانێ هشك بكەت، ژ ئالییەكێ دی ڤە ب رێكا نەمەزاختنا بودجەیا كوردستانێ و فشارئێخستنێ ل سەر كوردان ل دەڤەرێن دابرای دژی مە لڤین كرینە».
محەمەد حاجی مەحموود ئەوێ هزرێ ب دروست نزانیت كو دبێژیت هەموو چارەسەریێن هەرێما كوردستانێ ل بەغدانە و گوت» هیچ مللەتەكێ بن دەست نەشێت چارەسەرییا هەموو گرفتێن خوە بكەت، هەكە یێ سەربخوە و ئازاد نەبیت و ب خوە چارەنڤیسێ خوە دیار بكەت».
زێدەتر رۆهنكر: مە هیچ كێشە ل گەل بەغدا نینن، بەلكو مە دۆزەك هەیە كو ئیراقێ كێشە ل گەل ئەوێ دۆزا مە یا هەی، لەوما ب دیتنا هەكە ب بۆچوونا مە ئیراق دێ كێشەیێن مە چارەسەركەت، ئەم د شاشین. نابیت رۆژەكێ ل گەل بەغدا رێكبكەڤین و سوباهی پەشێمان ببیت».
ب گۆڕەی سكرتێرێ حزبا سۆسیالیستا دیموكراتا كوردستانێ» نوكە ئیراقێ كەسایەتییا كوردی ب جۆرەكێ شكاندییە كو هیچ ئیرادەیەك بۆ نەهێلایە و وەكرییە هەردەم چاڤێ ئەوی ل بەغدا بیت و بزانیت كا مووچە هات یان نەهات».

دوهی ئێكشەمبی 4-2-2024، دادگەها بلند یا فیدرالییا ئیراقی بۆ بڕیاردانێ ل دۆر سكالایەكی كو دژی هەژمارەكا مادەیێن قانوونا هەلبژارتنێن پەرلەمانێ كوردستانێ هاتیە تۆماركرن، كۆمبوو. د روونشتنا دوهی دا، دادگەها فیدرالی سكالا ئێكلانەكر و بڕیاردان ل دۆر قانوونا ناڤبری بۆ رۆژا 11/2/2024 پاشئێخست.
ئەڤە جارا نەهێیە دادگەها فیدرالی بڕیاردانێ ل دۆر قانوونا هەلبژارتنێن پەرلەمانێ كوردستانێ پاشبێخیت. ل رۆژا 21/1/2024، دادگەها بلند یا فیدرالی ل ئیراقێ بۆ جارا هەشتێ بڕیاردان ل دۆر سكالایێ بۆ دوهی ئێكشەمبی 4/2/2024 پاشئێخستبوو، بەلێ دوهی ژی جارەكادی هاتە پاشئێخستن.
پێشتر نێچیرڤان بارزانی، سەرۆكێ هەرێما كوردستانێ د مەرسوومەكا هەرێمی دا رۆژا 25/2/2024 بۆ ئەنجامدانا هەلبژارتنێن خولا شەشێ یا پەرلەمانێ كوردستانێ دیاركربوو، بەلێ پاشی سكالایەكا دژی قانوونا هەلبژارتنێن پەرلەمانێ كوردستانێ، بەرهەڤیێن كۆمسیۆنا بلند یا سەربخوە یا هەلبژارتنان ل ئیراقێ بۆ هەلبژارتنان راگرت.
سكالا دژی پێنج مادەیێن قانوونا هەلبژارتنێن پەرلەمانێ كوردستانێ هاتییە تۆماركرن كو تایبەتەن ب هەژمارا كورسیێن پەرلەمانی، ئێك بازنەیی و فرە بازنەییا هەلبژارتنان و هەژمارا كورسیێن كۆتایان ل پەرلەمانێ كوردستانێ كو ژ ئالیێ زیاد جەبار، سەرۆكێ فراكسیۆنا ئێكەت نیشتمانی كوردستان ل خۆلا پێنجێ یا پەرلەمانێ كوردستانێ و ئامانج نەجیب شەمعوون، ئەندامێ كریستیانان ل جڤاتا پارێزگەها سلێمانیێ هاتینە تۆماركرن.
مادەیێن قانوونا هەلبژارتنێن پەرلەمانێ كوردستانێ كو سكالا ل سەر هاتینە تۆماركرن پێك دهیچن ژی مادەیا ئێكێ (پەرلەمانێ كوردستانێ – ئیراق ژ 111 ئەندامان پێك دهێت) و مادەیا نەهێ (هەرێما كوردستان – ئیراق ب ئێك دەڤەرا دەنگدانێ دهێتە دانان و ب سەر چەند بنگەهێن دەنگدانێ دهێتە دابەشكرن) و مادەیا 15 ( بۆ هەرێما كوردستانێ، خشتەیێ ب ناڤێ دەنگدەران بۆ دەنگدانێ، ب گۆڕەی بنگەهێن هەلبژارتنان دهێنە بەرهەڤكرن و ب رێزبەندییا پیتێن ئەبجەدی دهێنە رێكخستن كو كار و ناڤونیشانێن ئەوان و مێژوو و جهێ ژ دایكبوونا ئەوان تێدا هاتییە تۆماكرن، هەكە د شیان دا نەبوو ئەو بهێتە كرن، ئەوی دەمی بۆ دەستەیا بلند هەیە رێكەكا دی یا گونجایتر بۆ بدەستڤەئینانا مەرەما پێدڤی دیار بكەت). هەروەسا مادەیا 22 ( هەر كیانەكێ سیاسی ل هەرێما كوردستانێ – ئیراق بۆ هەیە لیستەكا تایبەت ب ناڤێن بەربژارێن خوە ل سەر ئاستێ كوردستانێ – ئیراق هەبیت كو رێژەیەكا ئافرەتان تێدا بیت ژ 30% كێمتر نەبیت و ناڤێن بەربژاران ژی ب شێوەیەكێ رێزبەند بن كو سەركەفتننا نوونەرایەتییا رێژەیا ناڤبری یا ئافرەتان د پەرلەمانیدا گەرەنتی بكەت، ب مەرجەكی هەژمارا بەربژاران د هەر لیستەكا هەلبژارتنان دا ژ سێ بەربژاران كێمتر نەبیت و لیستا بەربژاران د دەمیچ 15 رۆژان دا ژ رێككەفتا راگەهاندنا ژڤانێ هەلبژارتنان پێشكێشی سەرۆكێ دەستەیا بلند بهێتە كرن و هەموو بەلگەنامە د گەلدا بن كو ل مادەیا 21 هاتینە داخوازكرن). هەروەسا برگەیا ئێك ژمادەیا 36 ( پێنج كورسی بۆ كلدان، سریان و ئاشووری دێ هێنە تەرخانكرن. بەربژارێن ئەوی پێكهاتەیی دێ هەڤڕكیێ ل سەر دكەن) و برگەیا دو ژ مادەیا 36 (پێنج كورسی بۆ توركمانان دێ هێنە تەرخانكرن و بەربژارێن ئەوی پێكهاتەیی دێ هەڤڕكیێ ل سەر كەن) و برگەیا 3 ژ مادەیا 36( ئێك كورسی بۆ ئەرمەنان دێ هێتە تەرخانكرن و بەربژارێن ئەوی پێكهاتەیی دێ هەڤڕكیێ ل سەر كەن).

وەزارەتا دەرڤە یا ئەمریكی راگەهاند، هێرشێن مە ل سەر بنگەهێن میلیشیێن سەر ب ئیرانێ ڤە تنێ دەستپێكەكە و ل رۆژێن بهێن پێنگاڤێن دی ژی دێ هاڤێژین.
ساموێل ووربێرگ، پەیڤدارێ هەرێمی یێ وەزارەتا دەرڤە یا ئەمریكی گۆت: ب رێكا هێرشان مە پەیامەكا رۆهن و ئاشكرا ب ئیرانێ و میلیشیان دایە كو ئێدی دەمێ ئەوێ چەندێ یە هێرشێن خوە ل سەر بنگەهێن ئەمریكی ب راوەستینین».
ساموێلی گوت ژی: هێرشێن ئەمریكی ل سەر میلیشیێن سەر ب ئیرانێ ڤە، دەستپێكا كارڤەدانا ئەمریكا بوو بۆ ئەوان هێرشێن ل سەر مە هاتینە كرن و دووماهی هێرش نابن، چونكە ئەڤان میلیشیان هێرشەكا بێ بنەما كریە سەر هێزێن ئەمریكی، ب پشتڕاستی ڤە ل رۆژێن بهێن دێ كارڤەدانێن دی ژی بینین».
ناڤبری ئاماژە ب ئەوێ چەندێ ژی كر»مە خواست ب رێكا ئەڤان هێرشێن دووماهیێ پەیامەكا رۆهن ب ئەوان میلیشیان و رژێما ئیرانێ ژی بدەین كو پشتەڤانییا ئەوان دكەت، و بێژینە ئەوان، ئێدی دەمێ ئەوێ چەندێ هاتییە هێرشان ل سەر بنگەهێ ئەمریكی ب راوەستینن، ئەم نزانین كارڤەدانا ئەوان میلیشیان دێ چاوان بیت بەلێ پەیاما ئەمریكا پەیامەكا رۆهن و ئاشكرایە».
ل سپێدەهیا رۆژا شەمبییا بۆری 3/2/2024، فەرماندەییا ناڤەندی یا هێزێن ئەمریكی راگەهاندبوو، هێزێن ئەمریكی ل ئیراقێ و سووریێ هێرشێن ئەسمانی دژی 58 ئارمانجێن لەشكرێ پاسداران، لەشكرێ قودس و گرۆپێن ب سەر ئەوان ڤە ئەنجامدا. د بەرامبەر ئەوان هێرشان دا، یەحیا رەسول، پەیڤدارێ فەرماندەیێ گشتیێ هێزێن چەكدارێن ئیراقێ گوتبوو» هێرشێن ئەمریكا ل قائیم و دەڤەرێن سنۆری یێن ئیراقێ پێشێلكرنا سەروەرییا ئیراقێ یە و تێكدانا بزاڤێن حوكمەتا ئیراقێ یە».
ب گۆڕەی ئاژانسا دەنگوباسێن رویتەرز» د هێرشا ئەمریكی ل سەر بنگەهێن هەردو لەشكرێن پاسدار و قودس یێن ئیرانی و گرۆپێن ب سەر ئەوان ڤە ل ئیراقێ و سووریێ نێزیكی 40 كەسان هاتبوونە كوشتن».