پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: جهێ داخێ یە حوكمەتا ئیراقێ سەرەڕای جینۆسایدا ئێزدیان و 11 سالێن ئاوارەیێ چ هاریكاری بۆ ئێزدییان نەكریە، شەش مەهە ژی ئاهێن خوارنێ نەداینە، لەوما مە كەیسا ئاوارەیان یا گەهاندیە نەتەوەیێن ئێكگرتی.
ڤیان دەخیل، پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» رەوشا ئاوارەیان ل كەمپان یا خرابە، پشتی ئەو جینۆسایدا ب سەرێ وان هاتی، 11 سالە ل ئاوارەیێ دانە، حوكمەتا ئیراقێ یا بەرپرسیارە و پێدڤییە ب ئەركێ خوە رابیت و ب چاڤەكێ مرۆڤایەتی بنێریتە وێ كەیسی، من بخوە كەیسا ئاوارەیێن شنگالێ گەهاندییە نەتەوەیێن ئێكگرتی، ئەو گەلەك گرنگیێ پێ د دەن، 11 سالە ئەم داخوازا مافێن ئاوارەیان دكەین بەلێ حوكمەتا ئیراقێ بێدەنگی هەلبژارتیە و چ هەلوەست و بزاڤ بۆ ئاوارەیان نەكرینە».
رۆهنكر ژی» ل ئیراقێ ب چو شێوەیەكی گرنگی ب ئاوارەیان ناهێتە دان، ب تایبەت ئاوارەیێن ئێزدی، كو زیانا مەزن ببەر وان كەفتیە و ژ قەرەبووكرنا چار ملیۆن دیناران ژی بێ بەهرن، لەورا ئەم دێ كەیسا ئێزدییان بەینە وەلاتێن جیهانێ، ئەو رێزێ ل مافێن مرۆڤی دگرن و گرنگیێ پێ ددەن».
دوپاتكر ژی» جهێ داخێ یە ژ بەر نێزیكبوونا هەلبژارتنێن جڤاتا نوونەرێن ئیراقێ، حوكمەتا ئیراقێ ل جهێ هاریكاریا ئاوارەیان بكەت دچیت كارێن دی دكەت، بۆ پڕۆپاگەندەیا هەلبژارتنان».

دلۆڤان ئاكرەیی

سەرۆكێ زانكۆیا دهۆك دیار كر، زانكۆیا دهۆك هەڤبەركرن ب زانكۆیێن جیهانێ زانكۆیەكا نوویە، تەمەنێ وێ ٣٣ سالن و ل سەر بریار و ب پشتەڤانییا سەرۆك مەسعود بارزانی هاتیە دامەزراندن، زانكۆیا دهۆك ژ دو كولیژان دەستپێكریە و ل وی دەمی ١٤٩ قوتابی هەبوون و نوكە ٢٠ كولیژ هەنە و ٥ كەمپس، كەمپسا سەرەكی ل گەرەكا مالتایێیە ل دهۆكێ كو پرانییا كولیژان ب سەر ڤێ كەمپسێ ڤەنە و گۆت: بڕیارە پشكێن ناڤخۆ و نەخۆشخانەیەكا فێركاریێ ل زانكۆیا دهۆك بهێتە ئاڤاكرن.

داود سلێمان ئەترووشی سەرۆكێ زانكۆیا دهۆكێ بۆ رۆژنانەیا ئەڤرۆ دیار كر، نوكە ژمارا قوتابییان گەهشتییە نێزیكی ٢٢ هزار قوتابییان و زێدەتری ١٥٠٠ قوتابی ل زانكۆیا دهۆك ل خواندنا بلند دخوینن و گۆت: نوكە كار ل سەر كوالێتیا خواندنا بلند دهێتە كرن دا كۆ بگەهیتە ئاستێ وەلاتێن پێشكەڤتی و گرنگی ب چاكسازییێ دایە و ل دووڤ بریارێن حوكمەتێ و مادەیێ‌ ١٣ د كارنامەیا وێدا بۆ كێمكرنا كرێیا خواندنێ و بلندكرنا ئاستێ خواندنێ گاڤێن باش هاتینە هاڤێتێن، ل سالێن بوری سەرۆكێن زانكۆیان هاتنە گۆهۆریێن و ئەركێ سەرۆكێن نوو بۆ چاكسازی د بیاڤێن ئەكادێمی و ئابووری و كارگێریدا و تەڤ بوارێن گرێدای سەرۆكێ زانكۆیێڤە، لەوما مە دەست ب چاكسازیان ب رێكا دیڤچوونان كریە.
زێدەتر دبێژیت: سەرەرای هەبوونا گەلەك ئاستەنگان، بەلێ ب دلخوشیڤە گەلەك گاڤ هاتینە هاڤێتن و جودا ژێ ڤان زانكۆیا دهۆك د دارێژتنا پلانێن ستراتێژیدا زانكۆیا دهۆك د بەرنامێ باوەریێ دا مەسرۆر بارزانی سەرۆكێ حوكمەتا هەرێما كوردستانێ سەرۆكێ وی بوردییە و زێدەتری سالەكێیە ل پێشییا زانكۆیێن دی یێن هەرێما كوردستانێیە، ئەڤە ژی بۆ پشتەڤانی و هاریكاریێن سەرۆكێ حوكمەتێ كۆ ل پرس و داخوازییێن زانكۆیێ و ل ئاهەنگێن دەرچوونێن قوتابییان ئامادە دبیت دزڤریت، پشتی سەرۆكێ حوكمەتێ بریاردای كێشەیا ماموستایێن وانەبێژ ب گرێبەست بهێتە گۆهۆریێن چارەسەرییا گەلەك ل كێشەیێن كۆلیژێن بچووك هاتە كرن، د نۆكەدا وان ناڤێن زێدەتری ١٤٠٠ قوتابییێن ل رێزا ئێكێ هاتین بۆ حوكمەتا هەرێمێ هاتیە هنارتن بۆ مەبەستا دامەزراندنێ.
سەبارەت پەیوەندییێن زانكۆیا دهۆك ل گەل زانكۆیێن دی خویا كر: زانكۆیا دهۆك د بیاڤێ پەیوەندیاندا یا پێشەنگە ب دیدەڤانیا وەزارەتا خواندنا بلند، زانكۆیا دهۆك ب دەهان پرۆژەیێن نیڤدەولەتی ئیناینە كوردستانێ و زانكۆیێن دی كرینە هەڤپشك دگەل خۆ، ژ وان چەندین پرۆژەیێن ئێكەتیا ئەورۆپا كۆ بودجەیا هەر ئێك ژ ڤان زێدەتری ٤٠٠ هزار یورویان بووینە، بۆ جارا ئێكێ یە ل سەر ئاستێ ئیراقێ ژ بەسرا هەتا زاخۆ زانكۆیا دهۆك بوویە نوونەر ل پرۆگرامێ ئێكەتیا ئەورۆپا كۆ د هەمان دەمدا ب سەرپەرشتیا زانكۆیێن هەرێمێ یێن دناڤا ڤی پرۆگرامیدا دكەت، ئەڤە ژی بۆ وێ چەندێ دزڤریت كۆ زانكۆیا مە باوەری بۆ ڤی پرۆگرامی دروست كریە ژ روویێ پێگیریكرن و جێبەجێكرنا خال و مادە و پرۆژەیێن پرۆگرامێ ئێكەتییا ئەورۆپادا و ئەڤ داخازییە یا ئێكەتییا ئەورۆپا بوو بۆ زانكۆیا دهۆك كۆ د ڤێ خۆلێدا ب رۆلێ چاڤدێریێ راببیت .
سەرۆكێ زانكۆیا دهۆك ئاشكرا كر: ژبەر رەوشا خراب یا كۆ ئیراقێ‌ هەی و وان دۆرپێچێن ب سەر هەرێما كوردستانێدا هاتینە سەپاندن ژلایێ بەغدا ڤە كارتێكرن ل زانكۆیێ هەبوویە، بەلێ سەرەرای وێ چەندێ حوكمەتا هەرێما كوردستانێ بزاڤ كریە جهێ ڤەحەویانێ بۆ تەڤایا قوتابییێن زانكۆیێ ل پشكێن ناڤخۆ دابینكرینە ب رێكا مەزاختنا كرێیا پشكێن قوتابیان، جۆدا ژ قوتابییێن كۆلیژێن زانكۆیا دهۆك وان هەۆل دایە هاریكاربن ل گەل وان قوتابیێن ژ دەرڤەی دەستهەلاتا زانكۆیێ وانەیان دخوونن و جهەكی بۆ وان قوتابیان دابین بكەن و دڤی بیاڤیدا زانكۆیا دهۆك درێغی نەكریە بۆ تەڤایا پەیمانگە و زانكۆ و كۆلیژان.
ل دۆر كار و گاڤێن هاتی یێن زانكۆیا دهۆك دیار كر، پشتی كوومبوونا مە ل گەل سەرۆكێ حوكمەتێ مە دو داخوازی پێشكێش كرن، ئەو ژی ئاڤاكرنا نەخۆشخانەیەكا فێركاری و بەشێن ناڤخۆ بۆ قوتابیان كۆ بەری نۆكە پارچە زەڤی بۆ د سنۆرێ زەڤیا زانكۆیا دهۆكدا بۆ هاتیە دابینكرن ب دلخۆشیڤە لێژنەیەك بۆ ڤان پرۆژەیان ژلایێ حوكمەتا هەرێما كوردستانێڤە هاتیە پێكئینان، ب ئاڤاكرنا ڤان پرۆژەیان دێ ئاریشەیێن مەزن ب سەر ملێ زانكۆیا دهۆك رابن، چونكو ژ بەر سەرەدانا قوتابییێن كۆلیژێن نۆژداری ل دهۆكێ بۆ نەخوشخانەیا فێركاری یا ئازادی فشار ل سەر ڤێ نەخۆشخانێ دروست بوویە.
زانكۆیا دهۆك ژ ٢٠ كولیژ و ٥ كەمپسان پێك دهێت، ٢٢ هزار قوتابی و زێدەباری زێدەتر ل ١٥٠٠ قوتابییێن خواندنا بلند ل زانكۆیا دهۆك دخینن، زانكۆیا دهۆك دەست ب چاكسازییان كریە و ناڤێن زێدەتر ل ١٤٠٠ قوتابییێن رێزێن ئێكێ یێن پشكێن كولیژان بۆ دامەزراندنێ بۆ حوكمەتا هەرێمێ هاتیە بلند كرن.

دوهی دوشەمبی 16/6/2025، مەسرور بارزانی، سەرۆكێ حوكمەتا هەرێما كوردستانێ پێشوازی ل شەیخە بەشیر فەرحان، كاربرێكەرا قۆنسلخانەیا گشتییا ئیماراتێ ل هەرێما كوردستانێ كر.
ب گۆڕەی بەیاننامەیەكا حوكمەتا هەرێما كوردستانێ» مەسرور بارزانی، سەرۆكێ حوكمەتا هەرێما كوردستانێ پیرۆزباهییا دەستبكاربوونێ ل شەیخە بەشیر فەرحان كر و هیڤییا سەركەفتنێ بۆ خواست وپشتەڤانییا حوكمەتا هەرێما كوردستانێ بۆ سەرئێخستنا ئەركێ وێ دەربڕی».
د بەیاننامەیا حوكمەتا هەرێمێ دا هاتیە ژی» هەروەسا سەرۆكێ حوكمەتا هەرێمێ ئاماژە ب هەڤبەندیێن تایبەت و دۆستانە د ناڤبەرا دەولەتا ئیماراتێ و هەرێما كوردستانێ كر و سوپاسییا هەرێما كوردستانێ بۆ هاریكاری و پشتەڤانییا خەلك و سەركردایەتییا ئیماراتێ دوپاتكر».
ئەوژی هاتە بەرچاڤكرن» كاربرێكەرا قۆنسلخانەیا گشتییا ئیماراتێ، سلاڤ و رێزێن سەرۆكێ ئیماراتێ شێخ محەمەد بن زاید ئال نەهیان و جێگرێ سەرۆكی و سەرۆك وەزیران شێخ محەمەد بن راشد ئال مەكتووم گەهاندنە سەرۆكێ حوكمەتا هەرێما كوردستانێ و دوپاتی ل زێدەتر ب هێزكرنا هەڤبەندیێن دو ئالییانە كر».

دوهی دوشەمبی 16/6/2025، سەرۆكێ حوكمەتا هەرێما كوردستانێ پێشوازی ل ئاتیلا تۆس، قۆنسلێ گشتیێ هنگاریا ل هەرێما كوردستانێ كر ب هەلكەفتا دووماهی هاتنا ئەركی وی یێ دیپلۆماسی ل هەرێمێ.
حوكمەتا هەرێما كوردستانێ د بەیاننامەیەكێدا راگەهاند» مەسرور بارزانی، سەرۆكێ حوكمەتا هەرێما كوردستانێ سوپاسییا قۆنسلێ گشتیێ هنگاریا كر و هیڤییا سەركەفتنێ د ئەركێ وی یێ داهاتیدا بۆ خواست.
بەیاننامەیا حوكمەتا هەرێمێ دیاركر ژی» قونسلێ گشتیێ هنگاریا، پێزانینا خوە بۆ هاریكاری و هەماهەنگییا ئالیێن پەیوەندیدارێن حوكمەتا هەرێما كوردستانێ بۆ سەرئێخستنا ئەركێ وی دیاركر».

دوهی دوشەمبی 16/6/2025، وەزیرێ دەرڤەیێ بریتانیا راگەهاند: پشتەڤانییا خوە بۆ ئارامییا ئیراقێ و بێلایەنییا ئیراقێ دوپات دكەین د هەر هێرش و ململانێیەكێدا.
دەیڤید لامی، وەزیرێ دەرڤەیێ بریتانیا ئاماژە ب وێ چەندێ ژی كر» پێدڤییە رێگری ل هەر دەستێوەردانەكا گرۆپێن چەكداری یێن ئیراقی د شەڕ و ململانێیا بەردەوام دناڤبەرا ئیسرائیلێ و ئیرانێدا، بهێتە كرن».
وەزیرێ دەرڤەیی بریتانیا دیاركر ژی» دوپاتیێ ل سەر زڤرینێ ل سەر مێزا دانوستاندنان سەبارەت بەرنامەیێ ئەتۆمیێ ئیرانێ دكەین».
ژ ئەگەرێ گرژی و ململانێیێن دەڤەرێ، وەلاتێن زلهێز دوپات دكەن كو دڤێت رێگری ل دەستێوەردانا گرۆپێن چەكداری یێن ئیراقێ ل هەر ململانێیەكا ئیسرائیلێ وئیرانێ بهێتە كرن و ئەو گرۆپێن چەكدار ئالۆزی و گرژییان بۆ ئیراقێ و دەڤەرێ دروست نەكەن.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: ئەڤرۆ دادگەها فیدرالییا ئیراقی ل دۆر مووچەیێن فەرمانبەرێن هەرێما كوردستانێ دێ كۆمبیت.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» ل رۆژا سێشەمبی دادگەها فیدرالی دێ ل سەر وێ تانەیا حوكمەتا هەرێما كوردستانێ دای بۆ پرسا مووچەی و داخوازا دەركرنا فەرمانا وەلائی دكەت ل سەر بڕیارا وەزارەتا داراییا ئیراقێ بۆ راگرتنا مووچەیێن فەرمانبەرێن هەرێما كوردستانێ و چاڤەڕێ دهێتە كرن دادگەها فیدرالی د بەرژەوەندییا فەرمانبەرێن هەرێما كوردستانێ دا بڕیارێ بدەت ب بەردەوامییا خەرجكرنا مووچەی ژ بەغدا».
د. ڤیانێ گوت ژی» رەوشا ئیراقێ یا وێ چەندێ نینە كو قەیرانەكا دی بۆ بهێتە دروستكرن، شەڕێ ل دەڤەرێ و رەوشا ناڤخوەیی وێ چەندێ دخوازیت كو قەیران نەهێنە زێدەكرن، لەوما پێشبینی دهێتە كرن كو د بەرژەوەندییا خەلكێ كوردستانێدا بڕیار بهێتە دان و ئاخڤتنێن سەرۆكێ دادگەها فیدرالی ژی هەر ئەو ژێ دهاتە چاڤەڕێكرن كو ب وی ئاراستەی بڕیار بهێتە دان، ئەوژی دەركرنا ئەمرێ وەلائی».
ئەڤە د دەمەكی دایە كو پێشتر سەرۆكایەتییا جڤاتا نوونەرێن ئیراقێ و چەندین ژێدەرێن جۆراوجۆر راگەهاندبوو كو بڕیارا راگرتنا مووچەیێن فەرمانبەرێن هەرێما كوردستانێ، سزادانا ب كۆم یا خەلكێ كوردستانێیە و بەروڤاژی دستوور و قانوونێن ئیراقێیە.

بالیۆزخانەیا ئەمریكا ل بەغدا، ل دۆر رێكخراوێن تیرۆرستی هەڤوەلاتیێن خوە ئاگەهدار دكەت و دبێژیت: ل جهێن قەرەبالغ دوور بكەڤن، هەروەسا نەچنە وان جهێن كو هەڤوەلاتیێن بیانێ لێ هەین، ژ ئەگەرێ مەترسییا هێرشا رێكخراوێن تیرۆرستی.
بالیۆزخانەیا ئەمریكا ل بەغدا، د بەیاننامەیەكێدا بۆ هەڤوەلاتیێن ئەمریكی ئەوێن ل ئیراقێ، ئاماژە ب وێ چەندێ كر كو د ئاگەهدارین ژ ئەگەرێ هەبوونا هێرشا رێكخراوێن تیرۆرستی ل سەر بالیۆزخانەیێ و جهێ ئاكنجیبوونا هەوە.
بالیۆزخانەیا ئەمریكی باس ل وێ چەندێ ژی كر، دێ بەردەوام بین د هەلسەنگاندنا رەوشێ و دانا پێزانینێن پێدڤی ب هەڤوەلاتیێن مە. هەڤدەم داخواز ژ هەڤوەلاتیێن خوە ل ئیراقێ كر نەچنە جهێن قەرەبالغ ب تایبەت ئەو جهێن كو خەلكێ بیانی لێ هەین.
بالیۆزخانەیا ئەمریكا ل بەغدا دیاركر ژی، داخوازێ ژ هەڤوەلاتیێن ئەمریكی دكەین بۆ هیچ مەبەستەكێ سەرەدانا ئیراقێ نەكەن.

دیدار/ دلۆڤان ئاكرەیی

ئەندامەكا كۆمیتەیا ناڤەندییا پارتی دیموكراتی كوردستان راگەهاند: هەلبژارتنا رێكا دانوستاندنان بۆ چارەسەركرنا كێشەیان ل دووڤ دستوری باشترین رێكە و ئەو پرسێن رۆژانە و ب بەردەوامی دهێنە د رۆژەڤێدا ، د فەرهەنگا هەرێما كوردستانێدا دانوستاندن و ئاشتی و دابەشكرنا دەستهەلاتی و هەڤپشكی و باوەری ب فیدرالیەتێ هەیە ، بەلێ ب مخابنیڤە د فەرهەنگا بەغدایێ دا بەردەوام خوەڤەدزین ژ بەرپرسیارەتییان و كۆمكرنا دەستهەلاتان و هەناسەیا ناڤەندیێ هەیە.
د. ئەشواق جاف، ئەنداما كۆمیتەیا ناڤەندییا پارتی دیموكراتی كوردستان سەبارت ب رۆلێ ئالیێن نێڤدەولەتی بۆ چارەسەركرنا كێشەیێن د ناڤبەرا هەرێمێ و بەغدایێ دا، گوت» د نوكە دا ئالیێن نێڤدەولەتی رۆلێ خوە دبینن ب شێوەیەكێ دیپلۆماسی ل گەل ئالیێن ناڤخوە، پەیوەندیێ ب حوكمەتا فیدرال دكەن ب رێكا كۆمبوون و داخۆیانییان ، بەلێ ئالیێن ناڤخوە ژبەركو ئەڤسالە ئەم د سالا هەلبژارتنان داینە ب رێكا وێ دیاردەیا كو ل ئیراقێ دروستبووی نەشێن ب رۆهنی هەلوەستێ خوە دیاركەن ، ئەگەر نە هندەك ژ ڤان ئالییان پێ باش نینە ئەو گاڤێن نە دەستوری و نە قانوونی و سیاسی یێن هەمبەر هەرێما كوردستانێ و فەرمانبەرێن وێ هاتینە هاڤێتن ، و ئەو ئالیێن دژی هەرێما كوردستانێ كار دكەن بۆ كۆمكرنا دەنگێن پتر، زێدەتر دژایەتییا ماف و قەوارەیێ هەرێما كوردستانێ دكەن ، و ب ڤێ رێكێ هەڤڕكییا هەڤدوو دكەن و ژئالییەكێ دیڤە بزاڤا ڤەشارتنا گەندەلییێن خوە دكەن ، كو هندەك ژ وان ب دزێن چەرخی دناڤدارن».
گوت ژی» ئەوا نوكە و د بەرێ ژی دا دهاتە كرن پلانەكا دومدرێژە بۆ لاوازكرن و نەهێلانا قەوارەیێ دستووریێ هەرێما كوردستانێ، ب رێكا نەدانا مووچەیێن پێشمەرگەی ئەڤ پلانە دەستپێكریە و ب رێكا راگرتنا بودجەیا مادەیا 140 یا دەستوری بۆ مەبەستنا بجهنەئینانا وێ و كارپێنەكرن ب قانوونا پەترۆل و غازێ و وان هەموو خال و مادەیێن د بەرژەوەندی و ماف و شایستەیێن جوتیار و خەلكێ كوردستانیدا هەین د ناڤا دستوورێ ئیراقێدا و ب رێكا ئامادەكرنا جادەیا ئیراقی ل دژی خەلكێ كوردستانێ ب شێوەیەكی كو بودجەیا ئیراقێ هندی بودجەیا چوار وەلاتێن دەوروبەر یا مەزنە نەشیاینە خزمەتا وەلاتیێن ناڤەڕاست و باشوورێ ئیراقێ بكەن ژ بەر گەندەلیێ ، دبێژنە جادەیا ئیراقی كو هەرێما كوردستانێ بودجەیا وە دبەت ، بەلێ پاشی ب رێكا دیدار و شلۆڤەكرنێن هوور ب رێكێن میدیایی مە بۆ وەلاتیێن ئیراقێ رۆهنكریە كو هەرێمێ دەستهەلات ب سەر وەدا نینە و هەرێم دەڤەرەكا فیدرالییە و یێ دەستهەلاتی ل وە دكەت جڤاتا پارێزگەهان و ئەندامێن جڤاتا نوونەرێن ئیراقێ و سەروكێ جڤاتا وەزیرێن ئیراقێیە كو پێدڤییە هوون لێپرسینێ ل گەل وان بكەن نەك هێرشان بكەنە سەر هەرێما كوردستانێ ، لەوما گرنگە هەموو ئالییێن هەرێما كوردستانێ كو دزانن بڕیارا بڕینا مووچەیێن كوردستانێ بڕیارەكا تەمام سیاسییە و ب هووری ئالیێن ئیراقی كار ل سەر پلانێ دكەن بۆ لاوازكرنا هەرێمێ و شكاندنا ئیرادەیا خەلكێ وێ، ئێكدەنگ و ئێكهەلوەست بن بۆ زێدەتر بدەستڤەئینانا دەنگان و زێدەكرنا كورسییان ل جڤاتا نوونەرێن ئیراقێ كو ب رێكا بزاڤێن زێدەتر خزمەتا وەلاتیێن هەرێمێ بهێتە كرن، نەك پەیامێن بڕینا قویتێ خەلكێ كوردستانێ كو ماف و شایستەیێن فەرمانبەرێن كوردستانێیە ب دەستكەفت ببینین».
د. ئەشواق جاف زێدەتر گوت « كەلتۆرێ هەرێما كوردستانێ ئاشتی و دانوستاندن و دابەشكرنا دەستهەلاتێ و فیدرالیزمە، بەلێ ئەو بەروڤاژی خوە ژ بەرپرسیارەتییان ڤەددزن و بزاڤان بۆ كومكرنا دەستهەلاتا ناڤەندی دكەن و باوەری ب فیدرالیزمێ نینە ، بۆ میناك قانوونا پەترۆل و غازێ كو چارەسەرییە بۆ گەلەك كێشەیان ب ئامادەبوونا نوونەرێ ئەمریكا و وەزیرێن پەیوەندیدار رەشنڤیسەك هاتبوو ئامادەكرن بەلێ پاشی ژ ئالیێ وانڤە هاتە رەتكرن، ل خولا دویێ یا جڤاتا نوونەرێن ئیراقێ ژی ب هەمان شێوە نڤیسینەك ژ حوكمەتا ئیراقێ بۆ جڤاتا نوونەرێن ئیراقێ هات كو ب دەستەكێ ئاسنی تەڤ دەستهەلات گرتبوونە دەست لەوما كورد و سوننی و هندەك پەرلەمانتارێن شیعە ئەو نڤیسین رەتكر، چونكە ل دووڤ مادەیا 112 ژ دەستوری ماف ب پارێزگە و هەرێمان هاتییە دان بۆ گەشەكرنا وان ، بەلێ حوكمەتا ئیراقێ دڤیا ل دووڤ مادەیا 130 كو هەمان قانوونا رژێما بەعسا ژناڤچووی بوو و بەری 2003 هاتبوو نڤیسین كو كار پێ بهێتەكرن ودەستێ خوە ب سەر هەموو ژێدەرێن ئابۆری ب شێوەیەكێ ناڤەندی بگرن ، هەرچەندە مە ل هەرێما كوردستانێ قانوونا پەترۆل و غازێ هەبوو كو دژی چو خالێن دستووری نەبوو ب دیدەڤانییا وان هەموو پسپورێن د وارێ پترۆلێدا ژ نەتەوەیێن دی ژی».
سەبارەت ب بڕیارا وەزارەتا داراییا ئیراقێ بۆ بڕینا مووچەیێن فەرمانبەرێن هەرێما كوردستانێ خویا كر «ئەو بڕیار تەمام ل دژی بڕیارا دادگەها فیدرالییە و بڕیارەكا سیاسییە، چونكە پێدڤی بوو هەموو دەستهەلاتداران كار ب وێ بڕیارا دادگەها فیدرال كربا بێی بەهانە و مەبەست ، هەرچەندە هەتا بەرژەوەندیێن خەلكێ ئیراقێ نەبیتە هەژمار ئێك و بەندێن دستوورێ ئیراقێ ب شێوەیەكێ قانوونی خواندن بۆ نەهێتە كرن و هەتا مەژیێ سیاسەتمەدارێن ئیراقی ئیراقا فیدرال قەبوول نەكەت ئەڤ بادەكە چارەسەر نابن و دێ بەردەوام بەرپرسێن ئالیێن سیاسی یێن ئیراقی كێشەیان بۆ بودجە و مووچە و ماف و شایستەیێن خەلكێ كوردستانێ دروستكەن»

سەرۆك بارزانی و سەرۆكێ هەڤپەیمانییا عەزم، دانوستاندن ل دۆر كێشەیێن هەرێما كوردستانێ و حوكمەتا ئیراقا فیدرال كر، هەڤدەم هەردو ئالییان دوپاتی ل پێدڤییا پێگیریبوونێ ب دستووری، هەڤپشكیێ و هەڤسەنگیێ كر.
ل سەلاحەدین، سەرۆك مەسعود بارزانی، پێشوازی ل موسەننا سامەرائی، سەرۆكێ هەڤپەیمانییا عەزم كر.
بارەگەهێ بارزانی بەلاڤكر» د دیدارەكێدا دووماهی گوهۆڕین و پێشهاتێن دەڤەرێ و ئیراقێ هاتنە باسكرن، هەروەسا گەنگەشە ل دۆر پڕۆسەیا سیاسییا ئیراقێ هاتە كرن».
هەڤدەم هەردو ئالییان دوپاتی ل پێدڤییا پێگیریبوونێ ب دستووری، هەڤپشكیێ و هەڤسەنگیێ كر.
كێشەیێن د ناڤبەرا هەرێما كوردستانێ و حوكمەتا ئیراقا فیدرال تەوەرەكێ دی یێ دیدارێ بوو.

سەرۆكایەتییا هەرێما كوردستانێ د بەیاننامەیەكێدا هێرشا ئیسرائیلێ ل سەر ئیرانێ پرۆتەستۆكر و داخواز ژ جڤاكا نێڤدەولەتی كر كارڤەدانەكا ب لەز هەبیت.
سەرۆكایەتییا هەرێمێ دیاركر»هێرشا ئیسرائیلێ ل سەر كۆمارا ئیسلامییا ئیرانێ و بكارئینانا هێزا سەربازی د ئێكلاكرنا ناكۆكییاندا شەرمزار دكەین. ئەڤ پێشهاتانە ئارامییا دەڤەرێ ئالۆزتر دكەن و دبنە گەف ل سەر ئاسایش و ئارامییا هەرێمایەتی و نێڤدەولەتی».
رۆهنكر ژی» روو ب رووبوون و پێرابوونێن سەربازی، رەوشێ خرابتر دكەت. د ڤی دەمێ هەستیاردا، ئەركێ جڤاكا نێڤدەولەتییە كو كارڤەدانا ب لەز هەبیت و كاری بۆ وێ چەندێ بكەت ئالۆزی زێدەتر لێ نەهێن و هندی زووترە رێ ل ئالۆزبوونا رەوشێ بهێتە گرتن».