پەیڤدارێ پارتی دیموكراتی كوردستان راگەهاند: وەلات یێ هەموویانە و دڤێت پێكڤە بڕێڤەببەین، هەروەسا گۆت: خەلك ژی دزانیت دێ دەنگی دەنە كێ و دزانیت كیش ئالی ژی دشێت ڤی وەلاتی بڕێڤەببەت.
مەحموود محەمەد، پەیڤدارێ پارتی دیموكراتی كوردستان د كۆنفرانسەكێ رۆژنامەڤانیدا سەبارەت پڕۆسەیا دەنگدانێ گۆت» هیڤییان دخوازین پڕۆسە ب ئارانی بڕێڤەبچیت و خەلك ژی دزانیت دێ دەنگی دەتە كێ و دزانیت كیش ئالی دشێت وەلاتی بڕێڤەببەت».
ل دۆر پێشێلكاریێن رۆژا دەنگدانا تایبەت، پەیڤدارێ پارتی گۆت» مە ژی وەكو هەر ئالییەكێ دی، بریكار و سەرپەرشتێن مە ل بنگەهێن دەنگدانێ هەكە تێبینییەك هەبیت سكالا یا تۆماركری».
سەبارەت رەوشا پشتی هەلبژارتنێن پەرلەمانێ كوردستانێ، گۆت» ئەم وەكو پارتی دیموكراتی كوردستان دەرگەهێ مە بۆ هەموو ئالییان یێ ڤەكری بوو و دێ ڤەكری ژی بیت، هەكە هەموو گەفێن ل بانگەشەیا هەلبژارتنان هەین، تنێ بۆ بانگەشێ بن و تشتەكێ دی ل پشت نەبیت بێگومان دڤێت تێكگەهشتن هەبیت و وەلات یێ هەموویانە و دڤێت پێكڤە بڕێڤە ببەین».

دوهی ئێكشەمبی 20/10/2024، نێچیرڤان بارزانی، سەرۆكێ هەرێما كوردستانێ پشتی ل بنگەهەكێ تایبەت یێ دەنگدانێ ل هەولێرێ دەنگدای، د داخۆیانییەكێدا باس ل گرنگییا هەلبژارتنان كر و بەرسڤا پرسیارێن رۆژنامەڤانان دا.
نێچیرڤان بارزانی گۆت» هەرێما كوردستانێ پێنگاڤەكا گرنگ هاڤێت، د چارچۆڤەیێ پڕۆسەی دیموكراتی د ڤی وەلاتیدا. د ڤێ پڕۆسەیێدا سەركەفتیێ ئێكێ خەلكێ هەرێما كوردستانێیە، كوردستان یا سەركەفتییە».
پتر گۆت» ئەڤ هەلبژارتنە بۆمە د گرنگن، چونكە دیسان دێ رەوایەتیێ و شەرعییەتدانێ دەتە دامودەزگەهێن هەرێما كوردستانێ كو ژ ئالیێ خەلكێ كوردستانێ ڤە دهێنە هەلبژارتن».
گۆت ژی» د سەركەفتنا ڤێ پڕۆسەیێدا سوپاسییەكا تایبەت بۆ محەمەد شیاع سودانی، سەرۆك وەزیرێن ئیراقێ و دادوەر فایق زێدان، سەرۆكێ دەستهەلاتا دادوەرێ ل ئیراقێ و حاكم جاسم ژ كۆمسیۆنا هەلبژارتنان ل ئیراقێ و یوونامی و هەموو وان وەلاتان دكەم كو د ڤێ پڕۆسەیێدا ل گەل مە بوون و خوازیارێن وێ چەندێ ئەڤ پڕۆسەیە بهێتە ئەنجامدان».
د بەرسڤا پڕسیارەكێدا ل دۆر پێكئینانا كابینەیا داهاتی یا حوكمەتا هەرێمێ و پڕسەیا هەلبژارتنان ل گشتی، سەرۆكێ هەرێمێ گۆت» هیڤیدارم ب زووترین دەم دەست ب پێكئینانا حوكمەتێ بهێتە كرن چونكە د بەرژەوەندییا هەموو گەلێ كوردستانێ دایە و ب پشتڕاستیڤە دێ قۆناغەكا نوو دەستپێكەت. هەتا نوكە قۆناغا بانگەشەیا هەلبژارتنان و ئەنجامدانا هەلبژارتنان بوو، ژ ئەنجامێ وێ قۆناغێ دێ قۆناغەكا دی دەستپێكەت كو دڤێت هەموو ئالی پێكڤە روونن و حوكمەت و پەرلەمان و دامودەزگەهێن دی ب زووترین دەم بكەڤنە كاری».
سەرۆكێ هەرێمێ گۆت ژی» هەموو حزب د ئازادن د وێ چەندێ دا ل گەل هەڤدو روونن و نەخشەرێكا داهاتییا هەڤپەیمانیەتیێ دیار دكەن. ئەڤە تشتەكێ ئاسایییە د هەر پڕۆسەیەكا دیموكراسیدا. ئەوا من دڤێت دوپاتیێ لێ بكەم ئێك خالە، د ڤان هەلبژارتناندا سەركەفتنا خەلكێ كوردستانێ و هەموو وان پێكهاتەیان بوو كو ل كوردستانێ دژین. ئەڤ پڕۆسەیە سەركەفتنا كوردستانێ بوو، ئەوا دمینیت حزب د چارچۆڤەیێ سیاسەتا خوە دا چەند كورسیێن دێ هەڤپەیمانییەكێ پێكئینن».
ل دۆر سەرەدانا خوە بۆ توركیا گۆت» مە پەیوەندییەكا گەلەك باش یا ل گەل توركیا هەی و جار جار ئەو سەرەدان دهێنە ئەنجامدان، د چارچۆڤەیێ پێشئێخستنا زوورتر یا پەیوەندییان د ناڤبەرا ئیراقێ و هەرێما كوردستانێ ل گەل توركیا ئەو سەرەدان هاتە ئەنجامدان».
ئاماژەكر» وەكو هەموو خەلكێ كوردستانێ چاڤەڕێ دكەم ب زووترین دەم حوكمەتەكا ئێككرتییا ب رێكوپێك بهێتە پێكئینان كو بشێت زێدەتر خزمەتا وەلاتیێن هەرێما كوردستانێ بكەت، خوەشحالم ل كوردستانێ ب ئێكلاكرنا كێشەیان ئەم ب رێكا سندۆقێن دەنگدانێ وی كاری دكەین. ئەڤە پێشكەفتنەكا مەزنە و جهێ شانازییا گەلێ كوردستانێ یە».
هەروەسا گۆت» هەر حوكمەتەك ژی دەمێ دهێت یا گرنگ ئەوە رەوشا هەڤوەلاتیێن هەرێما كوردستانێ قۆناغەكێ ڤەگوهێزیتە قۆناغەكا باشتر. چاڤەڕێیا من ژ وێ حوكمەتێ ئەوە ب زووترین دەم بهێتە پێكئینان بۆ وێ چەندێ بشێت خزمەتا هەڤوەلاتیێن هەرێما كوردستانێ و هەموو هەڤوەلاتی و پێكهاتەیێن هەرێما كوردستانێ بكەت».
سەبارەت پاشەڕۆژا پەیوەندیێن هەولێرێ – بەغدا گۆت» هەرێما كوردستانێ پشكەكە ژ ئیراقا فیدرال و دێ پشكەك ژ ئیراقا فیدرال مینیت، سیاسەتا هەرێمێ ئەوە كو د ڤی چارچۆڤەیدا ب بەردەوام بزاڤ بهێتە كرن ئەو كێشەیێن ل گەل بەغدا هەین ب دانوستاندنێ بهێنە چارەسەركرن. ئەو چاڤەڕێبوونا هەی ب تایبەتی پشتی پێكئینانا ڤێ كابینەیێ، حوكمەتا هەرێما كوردستانێ دخوازیت كێشەیان ب دانوستاندنێ و د چارچۆڤەیێ دستوورێ ئیراقێدا چارەسەر بكەت».
خویاكر ژی» بجهئینانا دستووری، زڤرین بۆ روونشتنان و ب جدی راوەستییان ل سەر چارەسەركرنا كێشەیان، ب دیتنا من ئەڤە كلیلا سەقامگیرییا سیاسییە بۆ ئیراقێ و دڤێت بەغدا ڤێ چەندێ بزانیت، مە ژی ل هەرێما كوردستانێ ئەڤ چەندە زانییە، هیڤیدارم ل گەل بەغدا بگەهینە ئەنجامەكی كو خێرا هەموو ئیراقێ تێدا بیت ب هەموو پێكهاتەیان ڤە».
ل دۆر پاشەڕۆژا پەیوەندیێن هەرێما كوردستانێ ل گەل وەلاتێن دەوروبەر، گۆت» چار سالێن داهاتی و چار سالێن بۆری ژی، سیاسەتا هەرێما كوردستانێ سیاسەتا سەقامگیریێ بوو ل دەڤەرێ. ئەم فاكتەرەكین بۆ سەقامگیریێ ل دەڤەرێ. دخوازین ل گەل جیرانێن خوە ب خوەشی و پێشكەفتنا ئابووری، ب پێشكەفتنا جڤاكی پەیوەندیێن خوە پێشڤە ببەین».
سەبارەت توندییا بانگەشەیا یا هەلبژارتنان یا هندەك ئالییان ، سەرۆكێ هەرێمێ گۆت» بانگەشەیا هەلبژارتنان هندەك جاران د توندن و هندەك جاران ژی د نەرمن. ئەڤە واتەیا بانگەشەیا هەلبژارتنان، بەلێ بنێرنە پڕۆسەیا دیموكراسی ل كوردستانێ، ئەوا روودای دبیت هندەك جاران بلندی و نشیڤی تێدا هەبیت، ئاخڤتن تێدا هەبوو، بەلێ د ئەنجامدا ئەڤە پڕۆسەیەكا دیموكراسی بوو ب هەموو رامانانڤە. گەلێ مە گەهشتە وی ئاستێ دڤێت ب رێكا سندۆقێن دەنگدانێ، كێشەیان چارەسەر بكەت».
رۆهنكر ژی» بانگەشەیا هەلبژارتنان یا جودایە ژ واقعێ دهێتە پێش، یا گرنگ ئەوە مە دڤێت پێكڤە روونین، كوردستان مولكێ ئێك ئالی و ئێك حزب نینە، یا ڤی مللەتی پێكڤەیە، لەوما ب پشتڕاستیڤە ئاخڤتن ل گەل هەڤدو و روونشتن ل گەل هەڤدو ل رۆژێن داهاتی دێ دەستپێكەت، بانگەشیا هەلبژارتنان ب دووماهی هات، دێ قۆناغەكا نوو دەستپێكەت، قۆناغا نوو پێدڤی ب وێ چەندێ یا هەی ئالی د چارچۆڤەیێ بەرژەوەندییا هەرێما كوردستانێ و هەڤوەلاتیێن هەرێما كوردستانێدا، بڕیارا خوە بدەن».
ل دۆر پشكدارینەكرنا هندەك ئالییان د حوكمەتێدا كو پێشتر خوە ب ئۆپۆزسیۆن راگەهاندییە و دابوو دیاركرن كو هەر دێ ب ئۆپۆزسیۆن مینن، نێچیرڤان بارزانی گۆت» ئەو مافێ وانە، ئەو ئالیێن سیاسی یێن دخوازن پشكدار بن یان نە، ئەڤە پڕۆسەیەكا دیموكراسییە و مافێ وانە. وان ئەو ماف یێ هەی كا چاوان خوە د چارچۆڤەیێ بەرژەوەندییا خوە بڕیارێ بدەن، دروستە».

سەرۆكایەتییا هەرێما كوردستانێ راگەهاند: د كۆمبوونا نێچیرڤان بارزانی دا، سەرۆكێ هەرێما كوردستانێ ل گەل رەجەب تەیب ئەردۆگان، سەرۆككۆمارێ توركیا دوپاتی ل پێشڤەبرنا پەیوەندیێن ئەنقەرە ل گەل بەغدا و هەولێرێ، ب تایبەتی د بوارێ ئابووریدا هاتە كرن.
دوهی چارشەمبی 16/10/2024، نێچیرڤان بارزانی، سەرۆكێ هەرێما كوردستانێ ب سەرەدانەكا فەرمی گەهشتە توركیا و ل گەل تەیب رەجەب ئەردۆگان، سەرۆككۆمارێ توركیا كۆمبوو.
د بەیاننامەیا سەرۆكایەتییا هەرێما كوردستانێدا هاتییە» د كۆمبوونێدا هەردو ئالییان دوپاتی ل پێشڤەبرنا پەیوەندیێن توركیا ل گەل ئیراقێ و هەرێما كوردستانێ، ب تایبەتی د بوارێ ئابووریدا كر، سەبارەت ڤێ چەندێ چاوانییا بلندكرنا ئاشتییا لێكگوهارتنا بازرگانی و دەلیڤەیێن كاری و وەبەرئێنانا توركیا ل دەڤەرێن جودا یێن ئیراقێ و هەرێما كوردستانێ، گەنگەشە كر».
د بەیاننامەیا سەرۆكایەتییا هەرێمێدا ئاماژە ب وێ چەندێ ژی هاتییە كرن» سەرۆككۆمارێ توركیا، بەردەوامییا هاریكاری و پشتەڤانییا وەلاتێ خوە بۆ ئیراقێ و هەرێما كوردستانێ و هاریكارییا هەڤپشك د ناڤبەرا واندا د هەموو بواراندا، دوپاتكر، هەروەسا بەرهەڤی و خواستا كەرتێ تایبەتێ وەلاتێ خوە بۆ كار و وەبەرئێنانێ د بواری و كەرتێن جودا دا نیشاندا».
ئێك ژ مژارێن كۆمبوونا هەردو ئالییان، رەوشا ئەمنییا دەڤەرێ بوو.
سەرۆكایەتییا هەرێما كوردستانێ راگەهاند ژی» د تەوەرەكێ دی یێ كۆمبوونێدا، هەردو ئالییان دلتەنگییا خوە ل دۆر ئالۆزییا رەوشا رۆژهەلاتا ناڤین و مەترسی و ئەگەرێن ئەنجامێن وێ ل سەر دەڤەرێ دیاركر. سەبارەت ڤێ چەندێ هەردو ئالی د هەڤڕا بوون كو پێدڤییە ئەم هەموو كار بكەین بۆ وێ چەندێ رێكێ ل پێشڤەچوونا زێدەتر یا ئالۆزییان بهێتە گرتن و كێشە ب شێوەیەكێ ئاشتییانە بهێنە چارەسەركرن».
ژ بلی وان بابەتان ژی ،ب گۆڕەی بەیاننامەیا سەرۆكایەتییا هەرێما كوردستانێ» پەیوەندیێن هەولێرێ – بەغدا، پڕۆژەیێ رێكا گەشەپێدانێ، پەیوەندیێن ئیراقێ و هەرێما كوردستانێ ل گەل وەلاتێن دەڤەرێ، مەترسیێن تیرۆرێ و بەرهنگارییا داعشێ، چەند تەوەرێن دی یێن كۆمبوونێ بوون».
هەر د چارچۆڤەیێ سەرەدانا خوە یا فەرمی بۆ توركیا، و پشتی گەهشتییە ئەنقەرە نیڤرۆیا دوهی چارشەمبی 24/10/2024، نێچیرڤان بارزانی، سەرۆكێ هەرێما كوردستانێ ل گەل هاكان فیدان، وەزیرێ دەرڤەیێ توركیا، كۆمبوو.
دكۆمبوونێدا كو ئیبراهیم كالن، بەرپرسێ دەزگەهێ هەوالگیرییا توركیا بەرهەڤبووی، پێشڤەبرنا پەیوەندیێن توركیا ل گەل ئیراقێ و هەرێما كوردستانێ، رەوش و ئالۆزیێن رۆژهەلاتا ناڤین و دەرئەنجامێن وێ، هەروەسا چەند پرسێن دی یێن جهێ گرنگییا هەڤپشك هاتنە گەنگەشەكرن.

دوهی چارشەمبی 16/10/2024، مەسرور بارزانی، سەرۆكێ حوكمەتا هەرێما كوردستانێ، بەنداڤا گۆمەسپان ڤەكر و هەڤدەم بەرێ بنیاتی بۆ جۆتسایدێ گۆمەسپان – سماقۆلی دانا.
د گۆتارەكێدا كو ل رێوڕەسمێن هەڤپشك یێن هەردو پڕژەیان پێشكێشكر، سەرۆكێ حوكمەتا هەرێما كوردستانێ باس ل وێ چەندێ كر كو ئەڤ پڕۆژەیە ب هاریكاری و سەرپەرشتی و بجهئینانا كۆمپانییا (سێنك) هاتییە ئەنجامدان و ئەو كۆمپانییە ل دەستپێكێ ئەركێ دروستكرنا ڤێ بەنداڤێ پێ هاتییە راسپاردن، پشتی چەندین قۆناغان، كابینەیا نەهێ یا حوكمەتا هەرێما كوردستانێ بڕیارا تمامكرنا وێ دا.
ئاماژە ب وێ چەندێ كر كو ئەڤ بەنداڤە دێ بیتە هۆكارەكێ گەلەك باش و دلخوەشكەر بۆ پێشڤەبرنا گەشتوگوزارێ ل دەڤەرێ و فێنكبوونا گوهۆڕینا سەقای ل دەڤەرێ و پێشڤەبرنا سامانێ ماسی و ژ هەموویان ژی گرنگتر، دێ بیتە دەڤەرەكا گەشتییارییا گەلەك گرنگ ل دەوروبەرێن هەولێرێ كو هەموو خەلكێ دۆلا خوەشناوەتی و ڤێ دەڤەرێ دشێت مفای ژێ بینن.
ل دۆر ناڤا عومباركرییا بەنداڤێ، سەرۆكێ حوكمەتا هەرێما كوردستانێ گۆت» ئەڤ ئاڤە ئاڤا بارانایە ویا وەرزییە كو هەردەم ب هەدەر دچوو، مە كو بڕیارا دروستكرنا بەنداڤان دای، چەندین هزر هەبوون كو بشێین مفای ژێ وەربگرین. ئەم هەموو دزانین ئەڤ بەنداڤە هاریكارییەكا مەزن دكەن بۆ جۆتیارێن مە ژ روویێ چاندنێڤە و دشیاندایە یا مفادار بیت بۆ ئاڤا ژێر ئەرد، هەروەسا دشیاندا گەلەك یا مفادار بیت كو ئاڤا ژێر ئەرد زێدە بكەت، مە بەرنامەیەكێ گەلەك مەزن یێ هەی بۆ پێشڤەبرنا كەرتێ گەشتوگوزاری ل ڤێ دەڤەرێ كو ئەو ژی نوكە ئەم مژوولێ دروستكرن و تمامكرنا ماستەر پلانا وێ نە، هیڤیدارم هەكە خودێ دەلیڤەیێ بدەتە مە و بشێین بەردەوام بین ل ڤی ئەركی و باشتركرنا رەوشا گشتییا دەڤەرێ ب پێشڤەبرنا ڤان جۆرە پڕۆژەیان».
هەروەسا خویاكر» من گومان ژ وێ چەندێ نینە كو دێ بیتە جهەكێ گەلەك گەلەك خوەش و خەلك دشێت ژ هەولێرێ و باژێرێن دی یێن كوردستانێ سەرەدانا وی بكەن. من ماستەرپلانا وی یا دیتی، تشتەكێ گەلەك نایاب و گەلەك جانە، هێشتا ب تمامەتی نەگەهشتینە قۆناغا دوماهیێ، بەلێ دەمێ تمام دبیت، وی دەمی ئێكسەر دەست ب بجهئینانا شكێن وێ ماستەر پلانێ ژی دكەین كو هەموو جارەكادی دێ كەڤیتە د خزمەتا هەڤوەلاتیێن كوردستانێدا و گەلەك دەلیڤەیێن كاری بۆ خەلكێ دەڤەرێ دروست دكەت، نەكو تنێ ل دروستكرنا پڕۆژەی، بەلكو ل بەردەوامبوون و بڕێڤەبرنا وان جهێن ل پڕۆژەیدا دێ هێنە دروستكرن، ئەڤە هەموو دێ بیتە پشكەك ژ پێشڤەبرنا كەرتێ ئابوروی و دروستكرنا ژێرخانەیا ئابوورەكێ ب هێزتر، هەروەسا دروستكرنا دەلیڤەیێن كاری بۆ خەلكێ دەڤەرێ».
مەسرور بارزانی ئەوژی بەرچاڤكر كو پشتی كو ئەڤ دەریاچە دهێتە دروستكرن، گەلەك خەلك دێ سەرەدانا وێ كەت و دێ هێنە ڤێرێ، بەلێ هندەك جاران مخابن ژینگەهپارێزیێ ل بەرچاڤ وەرناگرن و بەرمایكێن خوە دهاڤێژن. لەوما هیڤی خواست هەڤوەلاتی وێ چەندێ ل بەرچاڤ وەربگرن كو كوردستان مالا مە هەموویانە و پاراستنا ژینگەهێ ژی ئەركێ مە هەموویانە، ئەوێن دهێنە ڤێرێ بۆ دەم بۆراندنێ، هیڤیدارم ژینگەها ڤێ دەریاچەیێ یان ل هەر جهەكێ دی كو سەرەدانا وی دكەن، بپارێزن هەر بۆ ڤێ مەبەستێ ژی مە هەژمارەكا هەڤوەلاتیێن دلسۆز و خەلكێ ڤێ دەڤەرێ وەكو گرێبەست داناینە و نوكە د ئەركی دانە بۆ وێ چەندێ هاریكارییا گەشتییاران بكەن كو پاشمایێن خوە نە هاڤێژن و كۆمڤەكەن، هیڤیدارم هەموو ئالییەك هاریكارییا هەڤدو بكەین، تاكو بشێین جهەكێ جوانتر و سەرنجڕاكێشتر و خوەشتر بۆ خوە و بۆ پاشەڕۆژێ و بۆ زارۆكان و هەموو هەڤوەلاتیێن هەرێما كوردستانێ ژی دابین بكەین.
هەر د پەیڤا خوەدا، سەرۆكێ حوكمەتا هەرێما كوردستانێ راگەهاند» ئەڤە ئێك ژ وان پڕۆژەیێن گەلەك جوان و نایابن كو ل دەوروبەرێن باژێرێ هەولێرێ مە دەستپێكری و دێ پێشڤەبەین و دێ مەزنتر كەین. ژبلی ڤێ چەندێ پڕۆژەیێن دی ژی یێن هەین كو د چارچۆڤەیێ سیستەمێ پێشڤەبرنا عومباركرنا ئاڤێ و دروستكرنا بەنداڤاندا، ل هندەك جهێن دی ژی نوكە مژوولی دروستكرنا وان جۆرە پرۆژەیانە كو هەر هەموو ئەو پڕۆژە جارەكادی دێ كەڤنە د خزمەتا هەڤوەلاتیێن كوردستانێدا. هیڤیدارم خەلكێ هەولێرێ، خەلكێ باژێرین دی، شەقلاوە ژی یا ل پشت ڤێرێ، هەموو د دەمەكێ نێزیكدا بهێن و ئێدی ڤێرێ ببیتە جهەكێ خوەش یێ دەم بۆراندنێ».
سەرۆكێ حوكمەتا هەرێما كوردستانێ ل دۆر پڕۆژەیێ دویێ كو دروستكرنا جووتسایدێ گۆمەسپان – سماقۆلییە، ئاماژە ب وێ چەندێ كر»ئەركێ ڤی پڕۆژەی ب كۆمپانییا (هێمن گرۆپ) هاتییە دان، هەروەكو هوون خوە ژی دزانن (هێمن گرۆپ) چەندین پرۆژەیێن مەزن و ستراتیژی ل سەر ئاستێ هەرێما كوردستانێ یێن دروستكرن، د دەمەكێ ب لەز، ب شیانێن باش و ب ستانداردەكێ نێڤدەولەتی، هەر ڤێ چەندێ ژی وەكرییە كو ئەم بشێین باوەرییەكا زێدەتر پێ بدەین و ئەو جۆرە پڕۆژەیێن ئەو بجه دئینن كو بێگومان ئەم ژ تمامكرنا وان و جۆرێ كوالێتییا وان د پشتڕاستین. ئەڤ پڕۆژەیە پشكا ئێكێ یا دروستكرنا جووتسایدێ گۆمەسپان بۆ سماقۆلییە، بەلێ پشتی وی ل قۆناغا داهاتی، رێك دێ ل دەوروبەرێن دەریاچەیێ زڤریت، ئەڤە ژی دیسات هەر بۆ بابەتێ گەشتییاریێ بۆ هەڤوەلاتییان دێ بكارهێت، هەروەسا گرێدانا رێكا ژی ژ ئالییەكی ڤە د ناڤبەرا هەولێرێ و ئیدارەیا سەربخوەییا راپەرینێ، هەروەسا گرێدانا هەولێرێ ب سلێمانیێ كە ئەڤە دێ بیتە رێكەكا دی ب رێكا دۆلا سماقۆلیڤە، ئەڤە پشكەكە، پشكەكا دی دیسان دێ زڤریت بۆ كۆڕێ و هەر ژ وێرێ دشێن بچنە شەقلاوە، یان ژی هەر ب رێكا چیایێ سەفین بچن بۆ شەقلاوە، ئانكو دروستكرنا تۆڕەكا رێك و پران ل ڤی دەڤەرێ, هەموو ئەو دەڤەرێن جوان و خوەش دێ پێگڤە هێنە گرێدان. ئەڤ جووتسایدێ كو ل دەوروبەرێن دەریاچەیێ دزڤریت، پاشی د چارچۆڤەیێ وی بەرنامەی و ماستەر پلانێیە كو بۆ دەڤەرێ هاتییە دەستنیشانكرن، دێ ب شێوەیەكێ گەلەك جوان و سەردەمییانە هێتە دروستكرن كو خەلك هەم بشێن ب دەوربەرێن دەریاچەیێ بزڤرن، هەم ژی بشێن سەرەدانا وان جهان ژی بكەن كو د پاشەڕۆژێدا دێ ل ڤێ دەڤەرێ هێنە دروستكرن».
ل دوماهیێ مەسرور بارزانی دوپاتكر» ئەڤە بەرنامەیەكێ گرنگ بوو بۆ وێ چەندێ بشێین كەرتێ گەشتییاری ل دەڤەرێ بەر ب پێشڤە ببەین، هاریكارییا هەڤوەلاتیێن خوە بكەین، بابەتێ ئاڤێ و عومباركرنا ئاڤێ، تشتەكێ گەلەك گەلەك گرنگە بۆ بابەتێ دەستنیشانكرن یان پشتڕاستبوون ژ ئاسایشا ئاڤێ كو ئەم بشێین مفای ژێ وەرگرین. ئەو بەرنامەیێن دی ژی یێن من باس كرین، ئەڤە هەموو ئینشائەللا د دەمەكێ نێزیكدا دێ كەڤنە روو و دێ مفای ژێ وەرگرین».

دوهی سێشەمبی 15/10/2024، ل سەلاحەدین سەرۆك مەسعود بارزانی پێشوازی لد. محەمەد ئەلحەسان، نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ كر.
ب گۆڕەی بەیاننامەیەكا بارەگەهێ بارزانی» د دیدارەكێدا سەرۆك بارزانی پیرۆزباهی ل د. محەمەد ئەلحەسان كر و هیڤییا سەركەفتنێ بۆ خواست د ئەرك و كارێ وی یێ نوو دا».
هەر د وێ دیدارێدا، وەكو د بەیاننامەیا بارەگەهێ بارزانی دا هاتی» بیر و بۆچوون سەبارەت رەوشا سیاسی و پێشهاتەیێن ئیراقێ و دەڤەرێ و گەفێن پێشبەری سەقامگیرییا ئیراقێ و دەڤەرێ و رۆلێ (یونامی) د چارەسەركرنا كێشەیان و پەیداكرنا سەقامگیریێ، هاتنە لێكگوهارتن».
پەیوەندیێن د ناڤبەرا هەرێما كوردستانێ و حوكمەتا ئیراقا فیدرال و هەروەسا هەلبژارتنێن پەرلەمانێ كوردستانێ وپێدڤییا ئەنجامدانا وان د سەقایەكێ ئارام و زەلالدا تەوەرێن دی یێ وێ دیدارێ بوو.

دوهی سێشەمبی 15/10/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل د. محەمەد ئەلحەسان، نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ كر.
ب گۆڕەی بەیاننامەیەكا حوكمەتا هەرێما كوردستانێ» سەرۆكێ حوكمەتا هەرێمێ سەرەرای پیرۆزباهییا دەستبكاربوونێ، پشتەڤانییا حوكمەتا هەرێما كوردستانێ ژ پێخەمەت سەرئێخستنا ئەركێ وی وەكو نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ دوباتكر» .
سەرۆكێ حوكمەتا هەرێمێ دوپاتی ل گرنگییا بەردەوامبوونا رۆلێ (یۆنامی) ژ پێخەمەت پاراستنا سەقامگیریێ و ئاشتیێ و ئاسایشا ئیراقێ و هەرێما كوردستانێ كر.
نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ ئاماژە ب وێ چەندێ كر» هەرێما كوردستانێ نموونەیەكا گەش و جوان یا پێشكەفتنێ و ئاڤەدانیێیە و دبیت ببیتە مودێلەك بۆ هەموو دەڤەرێن دی یێن ئیراقێ» . هەروەسا بەرهەڤییا نەتەوەیێن ئێكگرتی ژی بۆ هەر هەماهەنگییەكێ ل گەل حوكمەتا هەرێما كوردستانێ دیاركر.
وەكو د بەیاننامەیا حوكمەتا هەرێمێدا ئاماژە پێ هاتییە كرن» تەوەرەكێ كۆمبوونێ یێ تایبەت بوو ب بەرهەڤیێن هەلبژارتنێن پەرلەمانێ كوردستانێ، هەردو ئالی د هەڤڕا بوون ل سەر گرنگییا ئەنجامدانا هەلبژارتنان د رەوشەكا ئارام و دادپەروەرانە و دوور ژ پێشێلكاری و سەختەكاریێ».
د پشكەكا دی یا كۆمبوونێدا، بیر و بۆچوون ل دۆر ئەنجامدانا سەرژمێرییا گشتی یا ئاكنجیبوویان ل ئیراقێ كو بڕیارە ل 20/11/2024 بهێتە ئەنجامدان، هاتنە لێكگوهارتن.
سەرۆكێ حوكمەتا هەرێما كوردستانێ دوپاتكر» پشتەڤانیێ ل پڕۆسەیا سەرژمێرییا گشتی دكەین، بەلێ دڤێت تنێ ژ پێخەمەت پێشئێخستن و پێشڤەبرنا خزمەتگوزارییان و د بەرژەوەندییا هەموو هەڤوەلاتی و پێكهاتەیێن ئیراقێ بیت و بۆ هیچ مەبەست و ئارمانجەكا سیاسی نەهێتە بكارئینان».

نێچیرڤان بارزانی، جێگرێ سەرۆكێ پارتی دیموكراتی كوردستان داخواز ژ خەلكێ سلێمانیێ كر بۆ ئێك جار ژی بیت پارتی تاقی بكەن و دەنگی بدەنە پارتی.
دوهی دوشەمبی 14/10/2024، نێچیرڤان بارزانی، جێگرێ سەرۆكێ پارتی دیموكراتی كوردستان، د چارچۆڤەیێ پشكداریكرنێ د كەرنەڤالێ جەماوەریێ پارتیدا ل سلێمانیێ پەیڤەك پێشكێشكر و راگەهاند: پارتی و بارزانییان دیرۆكەكا تایبەت یا ل گەل سلێمانیێ هەی، هیچ ئالییەك نەشێت دەرزێ بێخیتە وێ پەیوەندیێ».
نێچیرڤان بارزانی گۆت ژی» جاران خەلكێ سلێمانیێ تشتەك دگۆت، دگۆت بۆ ئاڤەدانیێ و خزمەتێ پارتیبوونەكێ قەردارین، لەوما خەلكێ سلێمانیێ و ڤێ دەڤەرێ، داخوازێ ژ هەوە دكەم، بۆ ئێك جار ژی بیت پارتی تاقی بكەن و دەنگی بدەنە پارتی و دەستێ پارتی ل ڤێ دەڤەرێ ب هێز بكەن، هەوە پشتڕاست دكەین دێ پارتی ل ئاستێ سۆزێن خوە بیت و بۆ ئاڤەدانیێ و خوەشگوزەرانیێ خەمساریێ ناكەت».
جێگرێ سەرۆكێ پارتی گۆت ژی «دڤێت گەنج د ئاگەهدار بن، ب ئاخڤتن و لڤینێن بێ ناڤەرۆك و بەتال نەهێنە ب سەردابرن، ئەوا د مفایێ وان و پاشەڕۆژا وان و كوردستانێدا بیت تنێ و تنێ كار و كریارە، پارتی حزبا پڕۆژەیان و كار و كریارایە».
رۆهنكر ژی « لەوما دەمێ هوون دچنە دناڤ خەلكیدا، ل سلێمانیێ، ل هەلەبجە، ل هەموو جهان. بێژنە وان پارتی دێ وان پڕۆژەیان تمام كەت كو دەست پێكرینە، ئەوان ژی دێ دەست پێكەین كو مە نەكرینە. پارتی د تاریترین دیرۆكا سیاسییا كوردستانێدا چرایەكا رۆهن بوو، دژی ملكەچیێ، ژ پێخەمەت خۆڕاگریێ، ئازادیێ، دیموكراسیێ و دادپەروەریێ، سەرەرای هەموو وان فشارێن كو ل ڤێ دەڤەرێ ل سەر پارتی هەین، هوون جەماوەرێ پارتی نموونەیا وێ خۆڕاگریێ نە. لەوما پشتڕاست بن كو دێ هەموو بزاڤ و شیان و ئەزموون و شارەزاییا خوە بكارئینین بۆ ب هێزكرنا بنەما و میكانیزما سیستەمێ دیموكراسی ژ پێخەمەت باشتركرنا خزمەتان بۆ هەموو دەڤەر و پێكهاتەیێن كوردستانێ».

سەرۆكێ حوكمەتا هەرێما كوردستانێ، بەنداڤا بەستووڕە ل هەولێرێ ڤەكر و راگەهاند: ل نێزیك جهێ بەنداڤا بەستووڕە، ل سەردەمێ سەنحاریبی بەنداڤ لێ هاتییە دروستكرن و ئاڤ بۆ ناڤ باژێرێ هەولێرێ هاتییە برن.
دوهی دوشەمبی 14/10/2024، مەسرور بارزانی، سەرۆكێ حوكمەتا هەرێما كوردستانێ، د رێوڕەسمەكێ تایبەتدا، بەنداڤا بەستووڕە ل پارێزگەها هەولێرێ ڤەكر كو ب هاریكارییا گرۆپێ كۆمپانیێن كار هاتییە دروستكرن.
پشتی ڤەكرنا بەنداڤێ ،سەرۆكێ حوكمەتا هەرێما كوردستانێ د پەیڤەكێدا، خوەشحالییا خوە ب ڤەكرنا پڕۆژەی دیاركر كو بەری سالەكێ بەرێ بنیاتی بۆ هاتبوو دانان، هەروەسا سوپاسییا شێخ باز بەرزنجی، سەرۆكێ گرۆپێ كۆمپانیێن كار كر بۆ تمامكرنا پڕۆژەی ل دەمێ خوە كو د دەمێ سالەكێدا و ژ ئالیێ ئەندازیار و پسپۆر و شارەزایێن ناڤخوەیی هاتە بجهئینان.
سەرۆكێ حوكمەتا هەرێما كوردستانێ ئاماژە ب وێ چەندێ دا كو دروستكرنا ڤان بەنداڤان، پشكەكە ژ ستراتیژییەتا حوكمەتا هەرێمێ بۆ مفا وەرگرتنێ ژ ژێدەرێن ئاڤی یێن كوردستانێ ژ پێخەمەت دابینكرنا ئاسایشا ئاڤێ.
مەسرور بارزانی دوپاتكر ژی كو ئەڤ جۆرە بەنداڤە، دێ كاریگەرییەكا هەمە ئالییانە ل سەر پێشئێخستنا ئابوورێ كوردستانێ د بوارێن جۆرا و جۆر دا هەبیت، چ ژ روویێ گەشتوگوزاریڤە، یان دابینكرنا وزێ و سامانێ ماسێ و باشتركرنا رەوشا ئاڤا ژێر ئەرد و گوهۆڕینێن سەقای.
مەسرور بارزانی گۆت ژی” ل نێزیك جهێ بەنداڤا بەستووڕە، ل سەردەمێ سەنحاریبی بەنداڤ لێ هاتییە دروستكرن و ئاڤ بۆ ناڤ باژێرێ هەولێرێ هاتییە برن، لەوما جهەكێ گرنگ یێ دیرۆكیییە ژی و دشیاندایە بۆ گەشتوگوزاریێ سەرەدانا وی بهێتە كرن”.
سەرۆكێ حوكمەتا هەرێمێ داخواز ژ خەلكێ كوردستانێ كر كو هاریكارێن حوكمەتێ بن د پاراستنا وان پڕۆژەیێن دهێنە دروستكرن و ژینگەهێ ژی بپارێزن و دەستكاریێ نەكەن.

دوهی دوشەمبی 14/10/2024، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، كۆنفرانسێ (خزمەتگوزاریێن ساخلەمی، چاكسازیێن دەرمانان و پێدڤێن نوشداری و ستراتیژییا ریفۆرمێ د سیستەمێ ساخلەمیێدا. چاكسازی د خزمەتگوزاریێن ساخلەمی و دەرمانان) بڕێڤەچوو.
د پەیڤەكێدا كو د چارچۆڤەیێ كۆنفرانسیدا پێشكێشكری، مەسرور بارزانی، چاكسازیكرن د كەرتێ ساخلەمیێدا ب پێدڤییەكا هەنووكەیی و داهاتی هەژمارت. بۆ وێ چەندێ بەردوام بشێین ڤی كەرتی بەر ب پێشڤە ببەین تاكو خزمەتەكا باشتر پێشكێشی وەلاتییان بكەین و پشتڕاستبوونەكا زێدەتر ب هەڤوەلاتییان بدەین.
سەرۆكێ حوكمەتا هەرێمێ گۆت ژی» خوەشحالم ب وان داتایێن هاتینە بەرچاڤكرن، ب راستی ئەڤە جهێ دلخوەشیێیە و پشتڕاستیێ ددەتە هەڤوەلاتییان كو كەرتێ مە یێ ساخلەمیێ د ئاستەكێ باش دایە، بەلێ مە دڤێت باشتر بكەین، ئێك ژ ئەركێن گرنگ یێن كابینەیا حوكمەتێ ئەنجامدانا پڕۆسەیەكا بەرفرهە یا چاكسازیێ بوو د كەرتێ ساخلەمیێدا و چەندین بزاڤ ژی هاتینە كرن ل گەل ئالیێن پسپۆر یێن بیانی ژی ئاخڤتن و گەلەك كۆمبوون و كۆنفرانس یێن هاتینە كرن، بۆ وێ چەندێ ئەم بشێین وان خالان دەستنیشان بكەین كو پێدڤی ب چارەسەریێ و چاكسازیێ و ریفۆرمێ هەیە كو چەندین سالە دبیت كەرتێ ساخلەمیێ ژێ دنالیت».
سەرۆكێ حوكمەتێ ئاماژە ب وێ چەندێ كر» هندەك كار یێن هاتینە ئەنجامدان و بەرهەمێ وان ژی بۆمە یێ دیارە، بابەتێ رێنمایێن ئینانا دەرمان و خۆراكی و وەرگرتنا پێرابوونێن قانوونی بەرامبەر سەرپێچكاران، دزانم كو گەلەك ئالی هەبوون پێشتر مامەلە ب ئینان و بازرگانیكرن ب بابەتێ دەرمانان كریە و ژ سنوورێن جودا ئینانا ڤان دەرمانان، مخابن بۆ وێ چەندێ مفای بگەهینیتە هندەك بازرگانان، ب تایبەت ژی بۆ ئەوین كو نە بەرپرسیار بوون. دەستخوەشیێ ل وەزارەتا ساخلەمیێ و وەزارەتێن پەیوەندیدار دكەم كو ئەڤ پێرابوونە وەرگرتین و كارەكێ باش ژی بۆ كۆنترۆلكرنا دەرمانان و خۆراكی كریە».
رۆناهی ژی ئێخستە بابەتەكێ دی كو حوكمەتا هەرێمێ ئەنجامدایە ئەوژی ئەوە كو گرنگی هاتیە دان ب دروستكرنا نەخۆشخانەیان ل جهێن جودا ل هەرێما كوردستانێ و گۆت» مە چەندین نەخوەشخانەیێن نوو ب ئاست و كوالێتییەكا باش یێن دروست كرین و ئەوێن هەین ژی، مە دەست ب نووژەنكرنا هندەكان یا كری و نوكە ئەو پڕۆسەیە یا بەردەوامە و هندەك ژ وان نەخوەشخانەیان ژی كو پێشتر هەبوون، مە بەرنامە یێ هەی كو ئاستێ وان نەخوەشخانەیان باشتر بكەین ژ روویێ دابینكرنا ئامیرە و تەكنەلۆژیا نوو بۆ نەخوەشخانەیان، هەروەسا باشتركرنا كارێن خزمەتگوزاری ل وان نەخوەشخانەیان».
ل دۆر بزاڤێن حوكمەتا هەرێمێ ژی بۆ چارەسەركرنا نەخوەشێن پەنجەشێرێ، سەرۆكێ حوكمەتا هەرێمێ راگەهاند» جهێ خوەشحالیێیە كو حوكمەتا هەرێمێ گرنگییەكا مەزن دایە بابەتێ چارەسەركرنا نەخوەشێن پەنجەشێرێ و مە بڕیارا دروستكرن و دامەزراندنا چەندین سەنتەرێن نوو ژی ل سەرانسەری كوردستانێ یا دای، ل هندەك جهان یێن د قۆناغا دروستكرنێدا و هیڤیدارم زوو ئەو سەنترە بهێنە تمامكرن و بكەڤنە د خزمەتا هەڤوەلاتییاندا. بیگومان دێ ئامیرەیێن پێشكەفتی د وان سەنتەراندا هەبن كو دێ وەكەت هەڤوەلاتیێن مە پێدڤی ب وێ چەندێ نەبیت ژ هەرێما كوردستانێ بچنە دەرڤە و هەر ل ڤێرێ دێ چارەسەرییا خوە وەرگرن، دێ هاریكار ژی بیت بۆ هەڤوەلاتیێن دی یێن ئیراقێ و رۆژهەلاتا ناڤین كو بشێن وەكو جهەكێ پێشكەفتی، سەرەدانا وان نەخوەشخانەیان بكەن ل هەرێما كوردستانێ».
باس ل وێ چەندێ ژی كر كو مە بزاڤ كریە تنێ ئەم گرنگیێ ب سەنتەرێن باژێران نەدەین، گەلەك ژ وان نەخوەشحانەیان یێن ل باژێرك و گوند و جهێن دەرڤەی باژێرێن مەزن هاتینە دروستكرن، ئەڤە ژی بۆ وێ چەندێیە كو ئاسانكاری بۆ هەڤوەلاتییان بهێنە كرن تاكو نەچار نەبن هەردەم بۆ چارەسەرییێ سەرەدانا باژێرێن مەزن بكەن، بەلكو ئەو سەنتەر و ئەو پسپۆریێن كو پێدڤینە بۆ وان بهێنە هنارتن بۆ جهێن نێزیكی وان و گونجای.
مەسرور بارزانی دوپاتكر كو ئێك ژ وان بابەتێن گرنگی پێدای، بابەتێ قانوون و مافێن نەخوەش و نوشداری بوو كو د كابینەیێدا بەردەوام ل سەر ڤێ چەندێ گەنگەشێن چڕ هاتینە كرن، كا چاوان دێ مافێن نوشداری د پاراستی بن، د هەمان دەمدا مافێن هەڤوەلاتی و نەخوەشی ژی د پاراستی بن، بۆ وێ چەندێ پشتڕاست بن ژ روویێ قانوونی ڤە هاریكاری و پشتەڤانی ل مافێن هەموو تاكەكی دهێتە كرن.
ل دۆر كوالێتییا كۆنترۆلی ژی، سەۆكێ حوكمەتا هەرێمێ گۆت» دەمێ من دیتی ئەو سێكتەرێن نوكە ب هووری ئاخڤتن ل سەر هاتییە كرن، ئەڤە پشتڕاستیێ ددەتە هەڤوەلاتی، كو دەمێ دچیت دەرمانەكی ژ دەرمانخانەیێ بكریت، پشتڕاست بیت كو ئەڤە یێ ژ پشكنین و كوالێتییا كۆنترۆلی یا دەزگەهێن پەیوەندیدارێن حوكمەتێ دەرچووین و هەڤوەلاتی دشێت باوەریێ ب وان دەرمانان بینیت. ل ڤێرێ داخوازێ ژ هەڤوەلاتییان دكەم، ئەوێن كو سەرەدانا جهێن پێدڤی دكەن بۆ وەرگرتنا دەرمانان ژ دەرمانحانەیان، وێ چەندێ ل بەرچاڤ وەربگرن، ئەو ستێكەر بۆ پشتڕاستبوونا هەوەیە، هەر جۆرە دەرمانەكی ئەڤ ستێكەرە پێڤە نەبیت كو یێ رێپێدایە ژ ئالیێ حوكمەتا هەرێما كوردستانێ و وەزارەتا ساخلەمیێ هیڤییە وان دەرمانان وەرنەگرن، چونكە ئەو ژ دەرڤەی پێرابوونێ حوكمەتێ، دبیت ب شێوەیێ قاچاخ، مخابن ل هندەك خالێن سنووری یێن هەرێمێ هێشتا د بەردەوامن و ئیننە دناڤ هەرێما كوردستانێدا. مە هەموو بزاڤ یێن كرین بۆ وێ چەندێ پێرابوونێن پێدڤی بهێنە وەرگرتن ل بەرامبەر ب قاچاخ ئینانا هەر جۆرە كەرەستەكی ل هەر سنوورەكێ كوردستانێ نەمینیت، بەلێ هێشتا یا مای و هەتا ئەم پشتڕاست نەبین كو هەموو خالێن سنووری ب شێوەكێ ب هێز یێن هاتینە كۆنترۆلكرن. لەوما پشكەكا كۆنترۆلی ل سەر هەڤوەلاتی دمینیت كو یێ هشیار و ژێر بیت و سەحكەنە وان دەرمانان و یێ ستێكەر پێڤە نەبیت، باوەریێ پێ نەئینن. د بەرنامەیێ حوكمەتێدا بوو بۆ دابینكرنا سیستەمێ بیمە و دلنیایێ بۆ نەخوەشی، بۆ كێمكرنا مەزاختییان ل سەر هەڤوەلاتی و هاریكارییا وی د وەرگرتنا چارەسەرییا ساخلەمییا باش و رێكوپیكدا كو پێدڤی بیت بۆ وان هەڤوەلاتیێن كو نەچارن چارەسەرییا بەردەوام وەربگرن» .
هەروەسا ئاماژە كر كو بابەتێ ساخلەمیێ تنێ ئەركێ حوكمەتێ و وەزارەت و نوشداران نینە، پشكەك ژێ هەڤوەلاتی ب خوە پێدڤییە جۆرێ دەرمانی، جۆرێ ژیانێ، وەرزشكرن، گرنگیدان ب شێوازێ ژیانێ و كێمكرنا سترێس و سەرەدانا نەخوەشخانەیان و پشكنینێن بەردەوام، ب تایبەتی وان رێنمایێن كو نۆشدار ددەنە هەموویان، گەلەك یا گرنگە چ ئافرەت بیت و چ زەلان بیت، گەنج بیت یان پیر بیت، كو هەست ب وێ چەندێ بكەین مە پێدڤی ب پشكنینایە یان ژی ل هندەك تەمەنان دا، گەلەك دێ باش بیت ئەم سالانە ئەوان پشكنینێن بەردەوام بكەین و ژئەگەرێ وێ چەندێ كو ئامیرە و تەكنەلۆژیایا پێشكەفتی یا هەی، دشیاندایە ب دەستنیشانكرنا دەستپێكا نەخوەشیێ، چارەسەرییەكا باش و گونجای بۆ بهێتە دیتن، ژ وێ چەندێ كو گرنگیێ پێ نەدەین یان پاشبێخین تاكو خودێ نەكەت نەخوەشیێ كارێ خوە كربیت و ئێدی ژ دەستێ نۆشداری ژی دەربكەڤیت، لەوما داخوازێ ژ هەڤوەلاتییان دكەم، ئەوژی هاریكارێن حوكمەتێ و نۆشدارێن خوەشتڤی بن وسەرەدانا بنگەهێن نوشداری بكەن و پشكنینێن پێدڤی بۆ خوە بكەن تاكو مە هەموویان پێكڤە جڤاكەكێ ساخلەم هەبیت.
ل دوماهیێ سەرۆكێ حوكمەتا هەرێمێ دویاتكر كو» بابەتێ چاكسازی و ریفۆرمێ تشتەك نینە د كۆنفرانسەكیدا ب دوماهی بهێت یان ژی د كابینەیەكا حوكمەتێدا ب دوماهی بهێت، تشتێ باش یێ هاتییە كرن و پێنگاڤێن باش یێن هاتینە هاڤێتن، بەلێ ریفۆرما نۆشداری و ریفۆرم د كەرتێ ساخلەمیێدا تشتەكێ بەردەوامە، مە پێدڤی ب راهێنانا نۆشداران یا هەی، ب راهێنانا ستافێن نەخوەشخانەیان یا هەی، ب بلندكرنا ئاستێ خواندنێ ل كولیژێن نۆشداری یا هەی، مە پێدڤی ب ئینان و مفا وەرگرتن ژ تەكنەلۆژییا سەردەم یا هەی، گەلەك جاران چارەسەرییا باشتر ژ ئەگەرێ بكارئینانا تەكنەلۆژییایێ دهێتە كرن، پێدڤییە ئەم مفای ژێ وەرگرین و نۆشدارێن بەرێزێن مە پشكدار ببن د كۆنفرانسێن نێڤدەولەتیدا تاكو ئاشنا ببن ب چارەسەرییا پێشكەفتی كو نوكە ل وەلاتێن پێشكەفتی مفا ژێ دهێتە وەرگرتن. ب هەر حال ئەڤە دێ پڕۆسەیەكا بەردەوام بیت و هیڤیدارم كەرتێ ساخلەمیێ و وەزارەتا ساخلەمیێ و نۆشدارێن بەرێز و هەموو هەڤوەلاتیێن كوردستانێ، ئەم هەموو پێكڤە، بەر ب ریفۆرمەكا باشتر، چاكسازییەكا ب لەزتر، وەلاتەكێ ئاڤەدانتر و وەلاتەكێ ساخلەمتر پێنگاڤان ب هاڤێژین».