ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ پێنجشه‌مبى 12/12/2019 پێشوازى ل عومه‌ر ئه‌لكه‌نده‌رى كونسۆلێ گشتيێ كوێتێ ل هه‌ولێرێ كر.
د ديداره‌كێ دا كونسۆلێ كوێتێ ل هه‌ولێرێ سلاڤێن شێخ سه‌باح ئه‌حمه‌د ئه‌لسه‌باح ئه‌ميرێ ده‌وله‌تا كوێتێ گه‌هاندنه سه‌رۆك بارزانى و دووپاتى ل پێشڤه‌برنا په‌يوه‌نديێن دۆستانه د ناڤبه‌را هه‌رێما كوردستانێ و كوێتێ هاته كرن.
ئه‌ڤرۆ نيوز:
زانا مه‌لا خالد، ئه‌ندامێ په‌رله‌مانێ كوردستانێ ژ فراكسيۆنا پارتى ديموكراتى كوردستان راگه‌هاند، ئه‌وا د ناڤ پرۆژێ چاكسازيێ دا هاتى ب هيچ شێوه‌كى برينا ده‌رمالێن فه‌رمانبه‌رێن حوكمه‌تا هه‌رێما كوردستانێ نينه، به‌لكو رێكخستنا ده‌رمالايه و برينا وان ده‌رمالا يێن ب نه‌حه‌قى دهێنه وه‌رگرتن، له‌وما بلا فه‌رمانبه‌ر د پشت راست بن كو ده‌ستكارى د وان ده‌رمالان دا ناهێته كرن يێن ب قانوونێ هاتينه رێكخستن.
زانا مه‌لا خالد زێده‌تر گۆت” د هنده‌ك كه‌رتان دا ده‌رمالێن مه‌ترسيێ يێن هه‌ين، بۆ نموونه ل كه‌رتێ كاره‌بێ و ساخله‌ميێ، مخابن پشكه‌ك ژ فه‌رمانبه‌رێن هه‌ردو كه‌رتان ده‌رمالێن مه‌ترسيێ بۆ دهێنه مه‌زاختن و هيچ كاره‌كێ مه‌ترسيدار ژى ناكه‌ن”.
ناڤبرى زێده‌تر بۆ مالپه‌رێ فه‌رمى يێ پارتى ديموكراتى كوردستان گۆت” مه‌ره‌م ژ پرۆژێ قانوونا چاكسازيێ په‌يداكرنا يه‌كسانيێ و چه‌سپاندنا دادپه‌روه‌ريێ يه د ناڤ حوكمه‌تێ دا، ل به‌ر وێ چه‌ندێ ژى هه‌ر مووچه و ده‌رماله‌كێ قانوونى هه‌بيت، به‌لێ ده‌مێ گاڤ بۆ يه‌كسانيێ دهێته هاڤێتن، بێگومان هنده‌ك كه‌س دێ گازندێ كه‌ن”.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو دێ پێله‌كا دى يا به‌فر و بارانێ هه‌رێما كوردستانێ ڤه‌گريت.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو پێشبينى دهێته كرن ئه‌ڤ شه‌ڤه پێله‌كا دى يا به‌فر و بارانێ كارتێكرنێ بكه‌ته سه‌ر ده‌ڤه‌رێ.
ئاشكه‌را ژى كر كو ئه‌ڤ پێله دێ زێده‌تر كارتێكرنێ ل ده‌ڤه‌رێن چيايى يێن پارێزگه‌ها هه‌ولێر و دهۆكێ كه‌ت و ئاستێ به‌فر و بارانێ ل وێرێ زێده‌تر بيت.
پشكا پێشبينيان ئاماژێ ب وێ چه‌ندێ ژى دكه‌ت كو ئه‌ڤ پێله دێ زێده‌تر كارتێكرنێ ل ده‌ڤه‌رێن حاجى ئومه‌ران و چۆمان و سيده‌كان و مێرگه‌سۆرو ده‌ڤه‌رێن چيايى يێن ده‌وروبه‌رى سوران و كانى ماسێ و ديسا هنده‌ك ژ ده‌ڤه‌رێن چيايى يێن پارێزگه‌ها سلێمانيێ ژى.
هه‌رديسا رێڤه‌به‌ريا كه‌شناسێ د نڤيسارا خوه دا ئاماژه ب وێ چه‌ندێ ژى كريه كو كارتێكرنا ڤێ پێلێ دێ ل سپێده‌هيا رۆژا شه‌مبى ل سه‌ر هه‌رێما كوردستانێ ب دووماهى هێت.
ئەڤرۆ نیوز:
ئه‌ڤرۆ رۆژا پێشنجبه‌مى 12ى كانوونا ئێكێ 2019 پرۆژێ قانوونا چاكسازيێ كو دوهى د كۆمبوونا جڤاتا وه‌زيرێن هه‌رێما كوردستانێ دا هاته په‌سه‌ندكرن، ئه‌ڤرۆ ئاراسته‌ى په‌رله‌مانێ كوردستانێ هاته كرن و ژ لايێ وه‌زيرێ هه‌رێمێ بۆ كاروبارێن په‌رله‌مانى گه‌هشته ده‌سته‌يا سه‌رۆكاتيا په‌رله‌مانێ كوردستانێ و بڕياره سه‌رۆكاتيا په‌رله‌مانێ ئه‌ندامان گازى بكه‌ت بۆ روونشتنا په‌رله‌مانى ب مه‌ره‌ما خواندنا ئێكێ.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو د ماوێ ئه‌ڤ ساله دا هه‌تا نها 137.2ملم بارانێ ل پارێزگه‌ها دهۆكێ بارينه و ل پارێزگه‌ها هه‌ولێر ژى 56ملم و سلێمانيێ كو پترترين رێژه‌يه 191.1ملم و ل هه‌له‌بچه ژى 134.4 و ل كه‌ركووك ژى 103.1ملمێن بارانێ بارينه.
ئەڤرۆ نیوز:
لیژنا دوفچوونا بازاری ل قائیمقامیا قەزا دهوکێ، سەرەدانا هژمارەکا مارکێت وسەمونخانا وجهێن بازرگانی دا و(٥)جهێن جودا سزادان.
یوسف محمەد حەسەن سەروکێ لیژنا دوفچوونا بازاری ئاشکراکر سەرەدانا چەندین جهان هاتە کرن وگوت پشتی دوفچوونێ ئەڤ جهە هاتنە سزادان.
۱-نڤێسنگەها موئەید دوسكى هاته سزادان ب گوژمێ (۳۰۰)هزار دینارا ژبه ر هه بونا مێلاكا مريشكا بیانی یا قەدەغەکری وچه ندين كه رستين ئکسپایر.
۲-سه مونخانا جودى هاته سزادان بگوژمێ( ۱۰۰)هزار دیناران ژ به ر نه پێگريا وان ب رێنمايێن ساخلەمیێ.
۳-جهێ زركا يێ فروتن وسەرژێکرنا مريشكا هاته سزادان بگوژمێ( ۲۰۰)هزار دیناران ژبەر نە پێگريا وان ب رێنمايێن ڤێتێرنەری.
٤-مارکێت بابێ سەحەر ب گوژمێ (۱۰۰)هزار دیناران هاتە سزادان ژبەر نەپێگری ب رێنمایێن لیژنێ.
٥-مارکێت رامان هاتە سزادان ب گوژمێ (۱۰۰)هزار دیناران ژبەر نەپێگری ب رێنمایان.
هژمارا تەلەفونا گازندان(۰۷٥۰۱٦۱۲٦۲۲)
ئەڤرۆ نیوز:
ئۆمێد خوشناو سەرۆکێ فراکسیۆنا پارتی ل پەرلەمانێ کوردستانێ راگەهاند کو پرۆژێ چاکسازیێ ژ ئالیێ کەسێن بسپۆر و چەندین وەزیران ڤە هاتیە بەرهەڤکرن و بێگومان ئەو پرۆژە دێ د خزمەتا خەلکێ کوردستانێ دا بیت.
ناڤهاتی راگەهاند کو پشتی پرۆژێ چاکسازیێ ژ ئالیێ حوکمەتێ رەوانەی پەرلەمانی بهێتە کرن دێ بزاڤان کەین دا د زووترین دەم دا ئەو پرۆژە بهێتە پەسەند کرن، چونکو بەرهەڤیێن باش بۆ هندێ هاتینە کرن.
ئه‌ڤرۆ نيوز، نيوار محه‌مه‌د سه‌ليم:
حوكمه‌تا هه‌رێما كوردستانێ دێ ده‌ست ب وه‌رگرتنا قه‌رێن خوه يێن ل لايێ وه‌به‌رهێنه‌ر و سه‌رمايه‌داران كه‌ت، ئاخفتنكه‌رێ ب ناڤێ فراكسيۆنا پارتى ل په‌رله‌مانێ كوردستانێ ژى دده‌ته دياركرن كو هه‌ر خودان قه‌ره‌كێ پێگريێ ب بڕيارێ نه‌كه‌ت، دێ ده‌ست ب سه‌ر ملك و مالێ وى دا هێته گرتن.
وه‌زاره‌تا دارايى و ئابوورى ل حوكمه‌تا هه‌رێما كوردستانێ د نڤيساره‌كا فه‌رمى دا ل 17ى شوباتا 2019ێ داخواز ژ سه‌رمايه‌دارێن قه‌ردارێن حوكمه‌تێ كربوو كو قه‌رێن وان ژ مێژوويا ده‌ركه‌فتنا نڤيسارێ و هه‌تا شه‌ش هه‌يڤان ب ڤه‌گه‌رينن. به‌لێ ئه‌ڤه 10 هه‌يڤ ژى ب سه‌ر دا ده‌رباز بوون و هێشتا چو پێرابوونێن دى ئه‌نجام نه‌داينه.
پێشه‌وا هه‌ورامى ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو حوكمه‌تا هه‌رێمێ بڕيار دايه كو وان قه‌رێن ل لايێ سه‌رمايه‌داران كو دبنه 740 مليار دينار ب ڤه‌گه‌رينيت و يێ نه‌ده‌ت دێ ئێخيته د ليستا ره‌ش دا و گۆت: “ئێك ژ وان به‌رپرسێ حزبه‌كێ يه”.
پێشتر ژى ليزا فه‌له‌كه‌دين كاكه‌يى ئه‌نداما فراكسيۆنا پارتى ل په‌رله‌مانێ كوردستانێ راگه‌هاند بوو كو ل سالێن بۆرى حوكمه‌ت د پێناڤى ڤه‌ژاندنا ئابوورى دا، حوكمه‌تا هه‌رێمێ بره‌كا پاره‌ى دايه هنده‌ك كۆمپانيا و وه‌به‌رهێنه‌ران، به‌لێ پشتى چه‌ندين سالان هه‌تا نها پاره بۆ حوكمه‌تێ نه‌ڤه‌گه‌رانديه.
ئاشكه‌را ژى كر كو ئه‌و كۆژمێ پاره‌ى نێزيكى 700 مليار دينارايه و پتريا وان ل لايێ شاسوار عه‌بدولواحده كو 42 مليار ديناره، دڤێت وى پاره‌ى بۆ حوكمه‌تێ ب ڤه‌گه‌رينيت.
د به‌رامبه‌ر دا سه‌عيد هه‌ركى، سه‌رۆكێ لژنا ده‌ستپاكيێ ل په‌رله‌مانێ كوردستانێ راگه‌هاند كو هه‌رێما كوردستانێ دێ ب ميكانيزمه‌كێ تايبه‌ت وان قه‌ران ڤه‌گه‌رينيت ب ره‌نگه‌كى كو هه‌موو وه‌به‌رهێنه‌ر وى قه‌رى ب ڤه‌گه‌رينن.
ئاشكه‌را ژى كر كو هه‌موو قه‌ردار هاتينه ئاگه‌هداركرن كو قه‌رێن خوه بده‌ن، د حاله‌ته‌كى دا هه‌كه قه‌رێن خوه نه‌ده‌ن هه‌رێما كوردستانێ دێ رێكارێن قانوونى ل به‌رامبه‌ر گرتيه به‌ر”.
حوكمه‌تا هه‌رێما كوردستانێ زێده‌تر ژ 750 مليار ديناران وه‌كو قه‌ر داينه بازرگان و سه‌رمايه‌داران، پێشتر د هه‌يڤا شوباتا ئه‌ڤ ساله دا وه‌زاره‌تا دارايى شه‌ش هه‌يڤ وه‌كو مۆله‌ت دابوونێ دا كو وان قه‌ران ب ڤه‌گه‌رينن.
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ جڤاتا وه‌زيرێن هه‌رێما كوردستانێ دێ پرۆژێ قانوونا چاكسازيێ هنێريته په‌رله‌مانێ كوردستانێ.
ڤالا فه‌ريد، وه‌زيرا هه‌رێمێ بۆ كاروبارێن په‌رله‌مانى ئاشكه‌را كر كو ئه‌ڤرۆ رۆژا چارشه‌مبى، جڤاتا وه‌زيران دێ قانوونا چاكسازيێ په‌يه‌سند كه‌ت و ئێكسه‌ر هنێريته په‌رله‌مانى بۆ دووباره گه‌نگه‌شه كرنێ.
هه‌ڤده‌م ژێده‌ره‌كى ژ جڤاتا وه‌زيران راگه‌هاند كو ئه‌ڤرۆ دێ كۆمبوونا حه‌فتيانه يا جڤاتا وه‌زيران هێته ئه‌نجام دان و ژبلى په‌سه‌ندكرنا پرۆژێ قانوونا چاكسازيێ و ره‌وانه‌كرن بۆ په‌رله‌مانى دێ چه‌ند پرسێن دژى هێنه گه‌نگه‌شه كرن.
ئه‌ڤرۆ نيوز، نيوار محه‌مه‌د سه‌ليم:
لژنا دووڤچوونا كافێ و كازينۆيان شڤێدى سه‌ره‌دانا چه‌ندين كافێيان ل پارێزگه‌ها دهۆكێ كر و كافێيا ئاغا ديوان ب كۆژمه‌كێ پاره‌ى هاته سزادان ژ به‌ر كو مه‌عه‌سه‌لێ نارگيلێ يێ ئێكسپايه‌ر بوو.
سه‌رۆكێ لژنا دووڤچوونا کافێ و كازینۆیان ل قائیمقامیا قەزا دهوکێ ئاشكه‌را كر كو شڤێدی 10ى كانوونا ئێكێ 2019 سەرەدانا هه‌ر ئێك ژ کافێ یا ئاغا دیوان و کافێ ئاغا شوپ وکافێ فسته‌ق زادە و کافێ لاکس زەری ل سه‌نته‌رێ پارێزگه‌ها دهۆكێ كرن.
رائید ئدریس عەبدوللا سەرۆکێ لیژنا دووڤچوونا کافێ و كازینویان ئاشکرا ژى کر ژنێزیک هایداری بجهئینانا رێنمایێن ساخلەمیێ بوون ل ڤان جها و گۆت: “کافێ یا ئاغا دیوان هاتە سزادان ب گوژمەکێ پارەی ژ بەر هەبوونا موعەسلێ نارگیلێ یێ ئکسپایر و زێدەباری نەپێگری ب رێنمایێن لژنێ”.
نيشاندان