سوپاسالارێ ئیراقێ یێ بەرێ و شیرەتكارێ سەرۆكێ هەرێما كوردستانێ بۆ كاروبارێن لەشكری، بابەكر زێباری ڕاگەهاند: میلیشیێن ئیراقی بۆ هێرشكرنێ ل سەر هەرێما كوردستانێ هیچ بەهانەیەك نینە و هەرێما كوردستانێ شوینگرا ئەمریكا و ئیسرائیلێ نینە، تاكو ژ ئالیێ ئەوان چەكداران ڤە هێرش ل سەر بهێتە كرن. هەروەسا دیاركر كو ئەو چەكێن ئەو میلیشیا بكاردئینن، چەكێ حوكمەتا ئیراقێ یە، بەلێ دیارە حوكمەتا ئیراقێ دەستهەلات ل سەر نەمایە.
بابەكر زێباری، گوت ژی» پێدڤیە هەموو ئالی ئەوان هێرشێن میلیشیێن ئیراقی دژی هەرێما كوردستانێ ئەنجام ددەن، شەرمزار بكەن، چونكی هیچ بهانەیەك بۆ ئەوان هێرشان نینە و هەرێما كوردستانێ شوونگرا ئەمریكا و ئیسرائیلێ نینە تاكو هێرش ل سەر بهێنە كرن».
ئاماژەكر» ئەو هێزێن ژ دەرڤەیێ قانوونێ باش دزانن هەرێما كوردستانێ هیچ پەیوەندیەك ب ئیسرائیلێ ڤە نینە، بەلێ بۆ شەرعیەتدانێ ب ئەوان هێرشان، باس ل بنگەهێن ئیسرائیلی دكەن، بەلێ هەموو وەلات باش د ئەوێ چەندێ دگەهن كو ئەو تۆمەت د راست نینن و د چێكری نە».
بابەكر زێباری دیاركر ژی» ئەو چەكێن ژ ئالیێ ئەوان میلیشیان ڤە دهێنە بكارئینان چەكێن حوكمەتا ئیراقێ نە، بەلێ دیارە حوكمەتا ئیراقێ دەستهەلات ل سەر ئەوان نەمایە».

نوونەرێ حوكمەتا هەرێما كوردستانێ ل فەرماندەیا ئۆپەراسیۆنێن هەڤپشك یێن ئیراقێ راگەهاند: بەرپرسیارەتیا حوكمەتا ئیراقێ و هەڤپەیمانایە رێگریێ ل هێرشێن میلیشیان بۆ سەر هەرێما كوردستانێ بكەن، دوپاتكر ژی، بەردەوامیا ئەوان هێرشان دێ كاریگەریا خراب ل سەر پەیوەندیێن د ناڤبەرا بەغدا و هەولێرێ هەبیت.
لیوا عەبدولخالق تەلعەت، نوونەرێ حوكمەتا هەرێما كوردستانێ ل فەرماندەیا ئۆپەراسیۆنێن هەڤپشك یێن ئیراقێ گوت» نەخشەیێ ئەوان هێرشێن ل سەر هەرێما كوردستانێ دهێنە كرن ددیارن و ئەو هێزێن هێرشان ئەنجام ددەن، ژ ئالیێ حوكمەتا هەرێما كوردستانێ و ئیراقێ ڤە د ئاشكرانە».
ئاماژەكر» هەرێما كوردستانێ ب هیچ شێوەیەكی د هەڤكێشەیا شەڕێ د ناڤبەرا ئەوان میلیشیێن ئیراقی و ئەمریكا دا نینە، ژ بەر ئەوێ چەندێ ئەركێ حوكمەتا ئیراقێ و هەروەسا هەڤپەیمانایە ژی، كو رێگریێ ل ئەوان هێرش و كریارێن تیرۆرستی بكەن، كو ژ ئالیێ ئەوان گرۆپێن میلیشیایی ڤە ل سەر هەرێما كوردستانێ دهێنە ئەنجامدان».
خویاكر ژی» هەلوەستێ حوكمەتا ئیراقێ ل بەرامبەر ئەوان هێرشان یێ ئەرێنی یە و دژی ئەوان كریارایە، بەلێ هەتا نوكە نەشیایە رێگریێ لێ بكەت، هەروەسا ئەو گرۆپ نەشێن سەقامگیریا هەرێما كوردستانێ تێكبدەن، چونكی حوكمەتا هەرێما كوردستانێ و هێزا پێشمەرگەی شیانێن پاراستنا هەرێما كوردستانێ یێن هەین، بەلێ ئەو كریارە دچینە دخانەیا كارێن تیرۆرستی و ئەركێ هەموو ئالیەكی یە ب هەڤپشكی روو ب روویێ تیرۆرێ بیت».
لیوا عەبدولخالق تەلعەت دوپاتر ل ئەوێ چەندێ ژی كر كو بەردەوامیا ئەوان هێرشان دێ كاریگەریا خراب ل سەر پەیوەندیێن بەغدا و هەولێرێ هەبیت و پێدڤیە حوكمەتا ئیراقێ لەزێ بكەت د كونترۆلكرنا ئەوان هێرشان دا».

بەرپرسەكێ كۆمسیۆنا بلند یا هەلبژارتنان ل ئیراقێ رەتكر هەلبژارتنێن پەرلەمانێ كوردستانێ بهێنە پاشئێخستن.
داود سەلمان، رێڤەبەرێ پێرابوونان و راهێنانێ ل كۆمسیۆنا بلند یا هەلبژارتنان ل ئیراقێ گۆت» جڤاتا كۆمسیاران پێشتر ل گەل شاندێ حوكمەتا هەرێما كوردستانێ كۆمبوویە و خشتەیێ كارێ هەلبژارتنێن پەرلەمانێ كوردستانێ بۆ 25/2/2024 پەسەندكریە، ل ئەگەرێ هەلوەشاندنا ئەوێ بڕیارێ پێدڤیە جڤاتا كۆمسیاران جارەكادی كۆمببیت».
ل رۆژا 3/8/2023، دلشاد شەهاب، پەیڤدارێ سەرۆكایەتیا هەرێما كوردستانێ راگەهاندبوو» سەرۆكێ هەرێما كوردستانێ د مەرسوومەكی دا رۆژا 25/2/2024 وەكو رۆژا ئەنجامدانا هەلبژارتنێن پەرلەمانێ كوردستانێ دیاركریە و هەموو ئالی راسپاردینە بۆ ئەنجامدانا پێرابوونێن پێدڤی».
دلشاد شەهاب گوتبوو ژی» دیاركرنا ژڤانێ ئەنجامدانا هەلبژارتنێن پەرلەمانێ كوردستانێ كودەنگیا ئالیێن سیاسی یێن هەرێما كوردستانێ ل سەر هەیە و ب رێكا دانوستاندنان ل گەل هەموو ئالیێن سیاسی، رێككەفتینە ل سەر دیاركرنا ئەوی ژڤانی (ئانكو 25/2/2024) بۆ ئەنجامدانا هەلبژارتنێن پەرلەمانێ كوردستانێ».

هەولێر، قائید میرۆ

جێگرێ بەرێ یێ سەرۆكێ جڤاتا نوونەرێن ئیراقێ ئاشكراكر، هندەك ئاماژە هەنە بۆ پەیدابوونا روودانێن مەزن د ئەڤسالەدا و دبێژیت، ئالیێن میلیشیایێ یێ بزاڤان دكەن ئیراق ببیتە پشكەك ژ شەڕێ د ناڤبەرا ئیسرائیلێ و حەماسێ دا ئەڤەژی مەترسیدارە و هەكە ئەڤە روو بدەت دێ كاریگەری ل سەر هەرێما كوردستانێ ژی هەبیت.
د. بەشیر حەداد، جێگرێ بەرێ یێ سەرۆكێ جڤاتا نوونەرێن ئیراقێ بۆ رۆژنامەیا (ئەڤرۆ) گوت» هندەك ژ سەركردەیێن ئیراقێ پەشێمانن ژ دەستوورێ نوكە یێ ئیراقێ و ب ئاشكرا دەمێ ئەز ل بەغدا هەژمارەك ژوان سەركردەیێن ئیراقی د گوتەمە وی دەمێ دەستوور هاتیە بەرهەڤكرن و پەسەندكرن مە ئەزموون نەبوویە وكوردان ب گۆڕەی بەرژەوەندیا خوە دەستوور بەرهەڤكریە، لەوڕا د دەمێ نوكە دا ئیراق یا پەشێمانە و هەكە بشێن دێ دەستوورێ ئیراقێ راستڤەكەن ب گۆڕەی حەزێن خوە، ژئالیێ دەستووری ڤە نەشێن دەستووری راستڤەبكەن ب مەرجەكی دشێن هەكە دەستوور ب ئێكجاری بهێتە گوهۆڕین، بەلێ كوردان ئەو رێك ژی گرتیە و ب گۆڕەی مادەیێ ١٥٢ یێ دەستوورێ نوكە هاتیە هەر گوهۆڕینەك بهێتەكرن و گرێدای دەستهەلاتا هەرێمان بیت دڤێت جڤاتا نوونەرێن ئیراقێ بڕیارێ ل سەر بدەت، ئانكو ب گۆڕەی دەستووری هەر گوهۆڕینەك بهێتەكرن پێدڤیە جڤاتا نوونەرێن ئیراقێ ئەڤێ گوهۆڕینێ پەسەند بكەت و بێی پەرلەمانی ناهێتەكرن، مادەیێ ١٤٢ ژی هاتیە هەكە د دەمێ راستڤەكرنا دەستووری سێ پارێزگا ب رێژەیا دو ل سەر سێ رازینەبوون و ڤیتۆ بكارئینا راستڤەكرنا دەستووری ناهێتە بجهئینان، لەوڕاژی سێ پارێزگا هاتینە دیاركرن هەتا بێی هەرسێ پارێزگەهێن هەرێمێ ئیراق نەشێت دەستكاریا دەستووری بكەت، ئەڤەژی بۆیە رێگر و بزاڤ دهێنەكرن ئەو گرێ بهێتە ڤەكرن ئەوژی پارێزگەها سلێمانیێ ژ هەرێما كوردستانێ ڤەقەتینن و تنێ دو پارێزگەهێن هەرێما كوردستانێ بمینن هەتا ل دووڤ حەزێن خوە دەستووری راستڤە بكەن نوكەژی كار یێ دهێتەكرن ل سەر ئەڤێ پیلانێ بۆ جوداكرنا پارێزگەها سلێمانیێ ژ هەرێما كوردستانێ».
جێگرێ بەرێ یێ سەرۆكێ جڤاتا نوونەرێن ئیراقێ ئاماژەكر» ل بەغدا حوكمەت هەیە و دەستهەلات هەیە، مە چو ئاریشە دگەل حوكمەتێن ئیراقێ نینن، چونكە هەموو سەرۆك وەزیرێن ئیراقێ هەتا رادەیەكی باش دگەل هەرێما كوردستانێ هەماهەنگ بووینە، بەلێ مخابن بڕیارێن وان سەرۆكێن حوكمەتا نەدهاتن بجهئینان، ژ بەر كو دەستهەلاتا سیاسی د دەستێ حوكمەتێ دا نینە و بەرۆڤاژی دەستهەلات یا د دەستێ وان هێزێن سیاسی یێن ئەو سەرۆك حوكمەت دیاركرین، ئالیێن چەكدار و میلیشیا دەستهەلاتدارن ل ئیراقێ و شیانێن راگرتنا هەموو بڕیارێن حوكمەتێ یێن هەین، مە بدەهان داخوازی هەنە ژ بەغدا ئاریشا هەرێما كوردستانێ تنێ دانا مووچێ فەرمانبەران نینە، راستە ئەركێ حوكمەتا هەرێما كوردستانێ یە مووچێ فەرمانبەران دابین بكەت، بەلێ ناڤەشێرین دەستهەلاتدارێن بەغدا پیلانەكا وەسا بجە دئینن چاڤێ خەلكێ مە ل سەر مووچەیە، گەلەك جاران باسێ خوەڤەكێشانێ ژ بەغدا دهێتەكرن، ب دیتنا من هەكە كورد ئێكگرتی و ئێك هەلویست بن دشێن خوە ڤەكێشن ژ بەغدا، بێی هەبوونا ئێكڕێزیا ئالیێن كوردی چاوا نوكە زیان گەهاندینە هەرێمێ ڤەكێشانێ ژی دێ زیانێن مەزنتر هەبن، كارەكێ گەلەك شاشە ئالیێن سیاسی دچنە بەغدا بۆ دانوستاندنان، چونكە مە حوكمەت هەیە و هەر دانوستاندنەكا بهێتەكرن دڤێت ب رێیا حوكمەتا هەرێما كوردستانێ بیت نەكو ئالیێن سیاسی».
ل دۆر شەڕێ ئیسرائیلێ و حەماس، گۆت» هندەك ئاماژە هەنە ئەڤسالە دێ هندەك روودان پەیدابن بۆ نموونە شەڕێ د ناڤبەرا ئیسرائیلێ و حەماس نێزیكی سێ مەهانە یێ بەردەوامە و گەلەك بزاڤ دهێنەكرن شەڕ بەرفرەهتر نەبیت، هندەك میلیشیا ل ئیراقێ هەر یێ بزاڤان دكەن ئیراق ژی ببیتە پشكەك ژ شەڕێ ئیسرائیلێ و حەماس وهەر یێ ئەمریكا د ئازرینن بۆ وێ چەندێ ئیراق پشكداری شەڕی بكەت، بێگومان هەر دەمێ ئیراق ببیتە پشكەك ژ ئەڤی شەڕی دێ كاریگەری ل سەر هەرێما كوردستانێ ژی هەبیت و زیانێن مەزن دێ هەبن».

ژ سەرجەمێ 29 كورسیێن پارێزگەها نەینەوا هیچ ئالیەكی نیڤا كورسیان بدەستڤەنەئیناینە، مەزنترین سەركەفتیێ هەلبژارتنێن جڤاتا پارێزگەهان تنێ 17% ژ كورسیان بدەستڤەئیناینە، بەلاڤكرنا كورسیان ل سەر هەڤپەیمانی و ئالیان، پێكئینانا جڤاتا پارێزگەهێ و هەلبژارتنا سەرۆكێ جڤاتێ و پارێزگارێ نەینەوا ب زەحمەت دكەت.
سەرۆكێ تۆرا (شەمس) بۆ چاڤدێریا هەلبژارتنان دبێژیت» هەلبژارتنا پارێزگاری ل نەینەوا دێ ب زەحمەت بیت، یا رۆهن ژی نینە هەڤپەیمانی دێ چاوان بن».
ل دووڤ ئەنجامێن هەلبژارتنێن جڤاتێن پارێزگەهێن ئیراقێ ل ئەوێن ل 18/12/2023 هاتینە ئەنجامدان، هەڤپەیمانیا (نەینەوا لاهلها) كو نەجم جبووری، پارێزگارێ بەرێ یێ نەینەوا سەرۆكایەتیا وێ دكەت پێنج كورسی ژ سەرجەمێ 29 كورسیێن جڤاتا پارێزگەها نەینەوا بدەستڤەئیناینە، پشتی وی پارتی دیموكراتی كوردستان چار كورسی و پاشی هەڤپەیمانیا عەقدا نیشتمانی سێ كورسی و هەژمارا كورسیێن ئالیێن دی د ناڤبەرا ئێك بۆ دو كورسیانە.
سەعەد وەزان، شرۆڤەكارێ سیاسی ل دۆر پرسا هەلبژارتنا سەرۆكێ جڤاتا پارێزگەها نەینەوا و دو جێگرێن وی و هەلبژارتنا پارێزگارێ نەینەوا، دبێژیت» نەینەوا ئێك ژ ئەوان پارێزگەهایە كو پێكئینانا حوكمەتا خوەجهی تێدا ژ ئەنجامێ هەلبژارتنان دێ یا ب زەحمەت بیت، ژ بەر كو پێدڤی ب ئەوێ چەندێ هەیە چەند ئالیەك پێكڤە هەڤپەیمانیێ بۆ پێكئینانا حوكمەتا خوەجهی پێكبینن، بەروڤاژی چەندین پارێزگەهێن دی كو چەند ئالیەكێن كێم دشێن ئەوی كاری بكەن».
سەبارەت سیناریۆیێن هەلبژارتنا پارێزگارێ نەینەوا گوت» ئەگەر هەیە پارتی دیموكراتی كوردستان و پارێزگارێ بەرێ یێ نەینەوا و پشكەكا سوننەیان (تەقەدوم، سەروەری، حەسم و دبیت ئێك كۆتا ژی دگەلدا بیت) پێكڤە كو سەرجەمێ كورسیێن ئەوان دبیتە 16 كورسی، بشێن پۆستێ پارێزگاری نەینەوا بۆ خوە مسۆگەر بكەن».
ئاماژەكر ژی» سیناریۆیا دویێ ئەوە هەر ئێك ژ (چارچۆڤەیێ هەماهەنگیێ، رەیان كلدانی، ئێكەتی، عەزم، سەروەری، تەقەدووم و كۆتا پێكڤە) پۆستێ پارێزگاری بدەستڤەبینن كو كورسیێن ئەوان زێدەتر ژ 16 كورسیانە».
هۆگر چەتۆ، سەرۆكێ تۆرا (شەمس) بۆ چاڤدێریا هەلبژارتنان، سەبارەت پێكئینانا حوكمەتا خوەجهی ل پارێزگەها نەینەوا، گوت» هەلبژارتنێن ناڤخوەیی یێن جڤاتا پارێزگەها نەینەوا و پارێزگارێ نەینەوا دێ یا ب زەحمەت بیت، چونكە ئەنجام ب شێوەیەكێ وەسا نەبوون كو ئالیەك یان دو ئالی بشێن پۆستێ پارێزگاری مسۆگەر بكەن».
ل دۆر سیناریۆیان ژی، هۆگر چەتۆ دبێژیت» ژ ئەگەرێ چوونا پشكەك ژ ئەندامێن دەرچوویێن هەڤپەیمانیێن خوە بۆ ناڤ هەڤپەیمانیەكا دی و ڤەگۆهاستنا سەنگەری ب تایبەت ژ ئالیێ ئەندامێن فراكسیۆنێن سوننی ڤە، هێشتا یا رۆهن و بەرچاڤ نینە دێ چاوان بیت، بەلێ ئەگەرێ مەزن هەیە هەڤپەیمانیا برێڤەبرنا دەولەتێ فراكسیۆنەكێ پێكبینیت و ل سەر پۆستێ پارێزگاری رێكبكەڤن، ئەوی دەمی ئەگەر هەیە پۆستێ پارێزگاری ل بەرامبەر پۆستێ دی بۆ ئالیەكێ دی بیت، یان پۆستێ پارێزگارەكێ دی ل پارێزگەهەكا دی بۆ ئالیەكێ دی بیت».

سەرۆك مەسعود بارزانی، د پەیامەكێ‌ دا ل دۆر هاتنا سالا نوو راگەهاند، دەڤەر ب گشتی ل بن گەفێن نەئارامی و دروستكرنا قەیران و شەڕ و ئالۆزیان دایە. پێدڤیە هەمی ئالی ئەوێ چەندێ باش بزانن مافێ گەلێن دەڤەرێ یە بشێن د ئارامی و ئاشتی و دوور ژ ناكۆكیان بژین و ئێدی دەڤەرا مە شیانێن بارێ‌ ئاریشە و توندوتیژی و تیرۆر و نەسەقامگێرییێ نینن. د ئەڤێ دەربارەی دا ئەركێ جڤاكێ نیڤدەولەتی یە ژ پێخەمەت پاراستنا ئاشتی و ئاسایش و ڕێگرتن ل بەرفرەهبوونا قیران و گەفان ل دەڤەرێ‌، ڕۆلێ خۆ بگێڕیت و پێگیریان بێختەركار.
سەرۆك بارزانی ئاماژە ژی كر كو د سالا نوو دا ئەو چاڤەڕێ بوونە ژ حكومەتا ئیراقا فیدرال دهێتە كرن، كو ب ئاراستەیێ چارەسەركرنا ئاریشەیان دگەل هەرێما كوردستانێ و پێگیر بوون ب بنەمایێن دستووری و بەرژەوەندیا گەلێن ئیراقێ پێنگاڤان ب هاڤێژیت. پەیاما گەلێ كوردستانێ ژی بۆ هەمی لایەكی هەمی دەما پەیاما دانوستاندن و تێكگەهشتن و چارەسەریێ بوویە و ئەڤە باشترین ڕێكە بۆ بجهئینانا سەقامگیری و ئارامی و پێشكەفتنێ.
هیڤیدارم سالا 2024ێ سالا ب دووماهیئینانا ئاریشەیێن ئیراقێ و دەڤەرا مە بیت و ئارامی بۆ هەمی وەلاتیێن كوردستانێ‌ و عیراقێ‌ و گشت دەڤەرێن مە بیت.

6/1/2023 نێچیرڤان بارزانی، سەرۆكێ هەرێما كوردستانێ ب هەڤالینیا شاندەكێ هەرێمێ گەهشتە باژێرێ بەسرا بۆ پشكداریكرنێ د ئاهەنگا ڤەكرنا جاما كەنداڤی یا 20 دا.
6/1/2023 مەسرور بارزانی، سەرۆكێ حوكمەتا هەرێما كوردستانێ راگەهاند: بەختەوەر وخوەشحالم بەسرا مێهڤانداریا جاما كەنداڤی دكەت
9/1/2023 حازم تەحسێن بەگ، میرێ ئێزدیان ل كوردستانێ و ئیراقێ و جیهانێ ڕاگەهاند: هەتا نوكە 18 وەلات و ناڤەندێن نێڤدەولەتی دانپێدان ب جینۆسایدكرنا ئێزدیان كریە.
10/1/2023 ڕێبوار تالەبانی، شیرەتكارێ سەرۆكێ حوكمەتا هەرێما كوردستانێ بۆ كاروبارێن دەڤەرێن كوردستانی یێن دەرڤەی ئیدارەیا هەرێمێ ڕاگەهاند: حوكمەتا ئیراقێ یا ڕژد نینە ل سەر ڕێگریكرنێ ل ئەرەبكرنێ.
11/1/2023 مەسرور بارزانی، سەرۆكێ حوكمەتا هەرێما كوردستانێ، گەهشتە بەغدا وەكو ئێكەمێن سەرەدان بۆ بەغدا پشتی پێكئینانا كابینەیا حوكمەتا محەمەد شیاع سۆدانی و ل گەل سەرۆك وەزیرێن ئیراقێ سۆدانی و سەرۆكێ جڤاتا نوونەران ل وی دەمی محەمەد حەلبۆسی و سەرۆك كۆمارا ئیراقێ لەتیف ڕەشید و سەرۆكێ جڤاتا بلند یا دادوەری ل ئیراقێ فایق زێدان كۆمبوو.
11/1/2023 مەسرور بارزانی، سەرۆكێ حوكمەتا هەرێمێ ل بەغدا ل گەل ئەحمەد سەفەدی، سەرۆكێ جڤاتا نوونەرێن ئوردنێ كۆمبوو.
16/1/2023 سەرۆك بارزانی پێشوازیێ ل ئۆسامە نجێفی، سەرۆكێ بەرەیێ ڕزگاری و گەشەپێدانێ دكەت.
15/1/2023 مەسرور بارزانی، سەرۆكێ حوكمەتا هەرێمێ پێشوازیێ ل فەرماندەیێ گشتیێ هێزێن هەڤپەیمانان ل ئیراقێ و سووریێ دكەت.
16/1/2023 مەسرور بارزانی: سەركردایەتیا ئێكەتیێ بەرپرسیارە ژ وێ ڕەوشا ل سنۆرێ سلێمانیێ دروست بووی.
16/1/2023 مەسرور بارزانی، سەرۆكێ حوكمەتا هەرێما كوردستانێ پشكداری د كۆڕبەندی دافۆس یێ ئابۆری ل سویسرا كر.
17/1/2023 سەرۆك مەسعود بارزانی پێشوازی ل برێت مەككۆرك، ڕێكخەرێ كۆچكا سپی بۆ كاروبارێن ڕۆژهەلاتا ناڤین و باكورێ ئەفریقیا كر.
17/1/2023 نێچیرڤان بارزانی، سەرۆكێ هەرێما كوردستانێ پێشوازیێ ل برێت مەككۆرك، ڕێكخەرێ كۆچكا سپی بۆ كاروبارێن ڕۆژهەلاتا ناڤین و باكورێ ئەفریقیا كر.
19 و 20/1/2023 مەسرور بارزانی، سەرۆكێ حوكمەتا هەرێما كوردستانێ ل داڤۆس چەندین دیداران ل گەل بەرپرس و سەركردەیێن وەلاتان ئەنجام ددەت.
19/1/2023 نێچیرڤان بارزانی، سەرۆكێ حوكمەتا هەرێما كوردستانێ پشكداریێ د ڕێوڕەسمێن سالڤەگەرا تیرۆركرنا محەمەد باقر ئەلحەكیم ل بەغدا دكەت.
22/1/2023 سەرۆك بارزانی پێشوازیێ ل شاندەكێ هەڤپشك یێن هەردو بالیۆزخانەیێن فرەنسا و ئەلمانیا دكەت
22/1/2023 نێچیرڤان بارزانی، پشكداریێ د ڕێوڕەسمێن ڕێزگرتنێ ل زانایێ كورد د. فریاد فازل عومەر كر.
24/1/2023 نێچیرڤان بارزانی، سەرۆكێ هەرێما كوردستانێ پێشوازی ل هەلبژارتیێ ئیراقێ یێ تەپا پێی كر ب هەلكەفتا ب دەستڤەئینانا جاما كەنداڤی 25.
7/2/2023 سەرۆك بارزانی و سەرۆكێ هەرێمێ و سەرۆكێ حوكمەتا هەرێمێ سەرەخوەشیێ ل قوربانی و زیاندارێن بیڤەلەرزا توركیا و سووریێ دكەن.
9/2/2023 جڤاتا وەزیرێن هەرێمێ هەوەكا مەزن بۆ هاریكاریا زیاندارێن بیڤەلەرزێن توركیا و سووریێ ڕاگەهاند.
12/2/2023 سەرۆك بارزانی دووڤچوونا گەهاندنا هاریكاریێن دەزگەهێ خێرخوازیێ بارزانی بۆ عەفرینێ دكەت
12/2/2023 مەسرور بارزانی، سەرۆكێ حوكمەتا هەرێمێ ل دوبەی ل گەل شێخ محەمەد بن راشد ئال مەكتووم، جێگرێ سەرۆكێ وەلاتێ ئیمارات و سەرۆك وەزیرێن ئیمارات كۆمبوو.
13/2/2023 سەرۆك بارزانی پێشوازیێ ل شاندەكێ بلند یێ حزبا شیوعی یێ چینی دكەت.
14/2/2023 سەرۆكێ هەرێما كوردستانێ ب ناڤێ سەرۆك بارزانی و گەلێ كوردستانێ سەرەدانا زیاندارێن بیڤەلەرزا باكورێ كوردستانێ و توركیا دكەت.
17 و 18/2/2023 نێچیرڤان بارزانی، سەرۆكێ هەرێما كوردستانی چەندین كۆمبوون ل گەل سەركردەیێن جیهانێ ل كۆنفرانسێ میونشن ئەنجدامدان.
18/2/2023 مەسرور بارزانی، سەرۆكێ حوكمەتا هەرێما كوردستانێ و سەرۆكێ فرەنسا ماكرۆن ل پاریس كۆمبوون.
19/2/2023 مەسرور بارزانی، سەرۆكێ حوكمەتا هەرێمێ پێشوازی ل تیما هاوارهاتنێ یا كوردستانێ بۆ توركیا و سووریێ كر.
21/2/2023 مەسرور بارزانی، سەرۆكێ حوكمەتا هەرێمێ: چەند بڕیارێن گرنگ بۆ پاراستنا زمانێ كوردی دێ دەركەین.
6/3/2023 نێچیرڤان بارزانی ،سەرۆكێ هەرێما كوردستانێ پێشوازی ل حازم تەحسین بەگ میرێ ئێزدیان ل كوردستانێ و جیهانی كر.
6/3/2023 سەرۆكێ حوكمەتا هەرێمێ، مەسرور بارزانی داخواز ژ تیما وەزاری یا ئێكەتیێ دكەت بزڤریتە كۆمبوونێن جڤاتا وەزیران.
7/3/2023 سەرۆك بارزانی پێشوازی ل لوید ئۆستون وەزیرێ بەرگریا ئەمریكا كر.
7/3/2023 مەسرور بارزانی، سەرۆكێ حوكمەتا هەرێمێ دوپاتیێ ل پرۆژەیێ (هەژمارا من) دكەت.
10/3/2023 نێچیرڤان بارزانی، سەرۆكێ هەرێما كوردستانێ ل ئیمارات ل گەل شێخ محەمەد بن زاید سەرۆكێ وەلاتێ ئیمارات كۆمبوو.
12/3/2023 مەسرور بارزانی، سەرۆكێ حوكمەتا هەرێمێ پشكداریێ د دیدارا لاوان ل دهۆكێ دا كر.
14/3/2023 سەرۆك بارزانی پێشوازیێ ل محەمەد شیاع سودانی، سەرۆك وەزیرێن ئیراقێ دكەت
18/3/2023 سەرۆك بارزانی بۆ پێگەهێ مونیتۆر یێ ئەمریكی: چو بهانەیەك بۆ پاشئێخستنا هەلبژارتنان نینە
18/3/2023 سەرۆك بارزانی پێشوازیێ ل هەژمارەكا بالیۆوز و قۆنسل و نوونەرێن وەلاتان و هێزێن هەڤپەیمانان ل ئیراقێ و كوردستانێ كر.
25/3/2023 سەرۆك بارزانی بۆ پێگەهی مۆنیتۆر یێ ئەمریكی: هیچ هێزەك نەشێت ناسنامەیا كەركووكێ بگوهۆڕیت
4/4/2023 ب بەرهەڤبوونا سەرۆكێ هەرێما كوردستانێ پێكئینانا هەردو فیرقەیێن ئێك و دو یێن لەشكرێ كوردستانێ هاتنە راگەهاندن
4/4/2023 ڕێككەفتنا پەترۆلی د ناڤبەرا مەسرور بارزانی، سەرۆكێ حوكمەتا هەرێمێ و محەمەد شیاع سودانی سەرۆك وەزیرێن ئیراقێ هاتە ئیمزاكرن.
9/4/2023 نێچیرڤان بارزانی، سەرۆكێ هەرێمێ ل بەغدا پشكداری د هەلكەفتا دامەزراندنا رێكخراوا بەدر كر.
13/4/2023 نێچیرڤان بارزانی ل فاتیكانێ ل گەل پاپایێ فاتیكان كۆمبوو، هەروەسا د سەردانا خوە دا بۆ ئیتالیا ل گەل چەندین بەرپرسێن وی وەلاتی كۆمبوو.
17/4/2023 نێچیرڤان بارزانی، سەرۆكێ هەرێمێ سەرپەرشتیا كۆمبوونەكا بەرفرەه یا پێشمەرگەی و هەڤپەیمانان كر.
29/4/سەرۆك بارزانی پێشوازیێ ل شاندەكێ هەڤپشك یێ نوونەرێن وەلاتان كر.
3/5/2023 سەرۆك بارزانی پشكداری د ئێكەمین كۆنفرانسێ زانستی یێ نێڤدەولەتی بۆ جینۆساید ناساندنا كوردێن فەیلی ل هەولێرێ كر.
6/5/2023 نێچیرڤان بارزانی سەرۆكێ هەرێمێ ل بەغدا پشكداریێ د دیدارا بەغدا دا دكەت.
7/5/2023 مەسرور بارزانی، سەرۆكێ حوكمەتا هەرێمێ د پەیوەندیەكا تەلەفۆنی دا ل گەل كاردینال لویس ساكۆ پشتەڤانیا هەرێمێ بۆ مافێن پێكهاتەیان دوپاتكر.
8/5/2023 مەسرور بارزانی و قوباد تالەبانی دوپاتیێ ل سەر پاراستنا تەڤایی و ئێكڕێزیا ناڤخوەیی كر.
11/5/2023 ب سەرپەرشتیا سەرۆك بارزانی مۆزەخانەیا بارزانی یا نیشتمانی ل بارزان هاتە ڤەكرن.
23/5/2023 مەسرور بارزانی، سەرۆكێ حوكمەتا هەرێمێ: خەلكێ ئاكرێ هەژی خزمەتەكا گەلەك زێدەترە.
27/5/2023 سەرۆك بارزانی ب هەلكەفتا 100 سالیا ڕێككەفتنا لۆزان دا: زیاندارێ سەرەكیێ وێ ڕێككەفتنێ گەلێ كوردستانێ بوو.
30/5/2023 مەسرور بارزانی سەرۆكێ حوكمەتا هەرێمێ كارگەها زۆم یا بەرهەمێن شیری ل مێرگەسۆرێ ڤەكر.
3/6/2023 سەرۆكێ هەرێمێ پشكداری د ڕێوڕەسمێن دەست بكاربوونا سەرۆك كۆمارا توركیا دا كر.
10/6/2023 سەرۆك بارزانی پشكداریێ د كۆنگرەیێ 12 یێ پارتی دیموكراتی كوردستان – سووریا دا كر.
12/6/2023 ب بەرهەڤبوونا مەسرور بارزانی، سەرۆكێ حوكمەتا هەرێمێ دیدارا ساخلەمیێ یا كوردستانی – ئوردنی دەستپێكر.
18/6/2023 گرێدانا كۆنفرانسێ ( كوردستان لاندكا پێكڤەژیانا ئاشتیانە) ل هەولێرێ.
20/6/2023 مەسرور بارزانی، سەرۆكێ حوكمەتا هەرێمێ ل ئەنقەرە ل گەل سەرۆكێ توركیا تەیب ئەجەب ئەردوگان كۆمبوو.
14/7/2023 سەرۆك بارزانی ڕۆژا نیشتمانی یا فڕەنسا پیرۆز دكەت
18/7/2023 نێچیرڤان بارزانی، سەرۆكێ هەرێمێ ل باكۆ ل گەل ئیلهام عەلیێڤ، سەرۆكێ ئازەربایجانێ كۆمبوو.
25/7/2023 سەرۆك بارزانی دوەمین پیشانگەها ڕۆژهەلاتا ناڤین بۆ پەروەردێ و فێركرنێ ڤەكر.
14/8/2023 مەسرور بارزانی، سەرۆكێ حوكمەتێ پارێزگارێ دهۆكێ راسپارد هەر چ یا پێدڤیە بۆ ئاكنجیێن تاخێن دهۆكێ بهێتە كرن.
14/8/2023 سەرۆكێ حوكمەتا هەرێمێ پڕۆژەیێ كۆرنیشێ پرا دەلال یێ گەشتیاری ڤەكر.
18/9/2023 سەرۆك بارزانی ل گەل تەخ و چینێن ئاكرێ كۆمبوو.
19/9/2023 سەرۆك بارزانی ل گەل تەخ و چین و بەرپرسێن حزبی و حكومی و هەلگرێن میدالیا بارزانی ل ئامێدیێ كۆمبوو.
20/8/2023 سەرۆك بارزانی ل گەل تەخ و چینێن سنوورێ ئیدارەیا سەربخوە یا زاخۆ كۆمبوو.
21/8/2023 سەرۆك بارزانی ل گەل مالباتێن شەهیدان و خەباتكەر و هەلگرێن میدالیا بارزانی و كێمئەندامێن سەنگەری و زیندانیێن سیاسی ل پارێزگەها دهۆكێ كۆمبوو و گوت: ئەز یێ هاتیم دا گوهـ ل ڤازندە و ئێش و ئازارێن هەوە ببم.
21/8/2023 ل سەر راسپاردەیا سەرۆك بارزانی، سەرۆكێ حوكمەتا هەرێمێ وەرگرتنا قەرێن سولفێن هەڤژینیێ و خانوبەران ڕادگریت.
22/8/2023 سەرۆك بارزانی ل گەل مامۆستایێن زانكۆیێ و پەروەردێ و ئەكادیمیان ل پارێزگەها دهۆكێ كۆمبوو.
22/8/2023 سەرۆك بارزانی ل گەل ئەفسەر و پلەدارێن پێشمەرگەی و دەزگەهێن ئەمنی ل پارێزگەها دهۆكێ كۆمبوو.
29/8/2023 ب بەرهەڤبوونا نوونەرێ سەرۆكێ حوكمەتێ جەنازێ مەتران (رەبان ئەلقەس) ل كوانێ هاتە ڤەشارتن.
5/9/2023 جەماوەرێ پارێزگەها دهۆكێ دژی بڕیارێن بەغدا و هەڤسۆزی بۆ كەركووكێ خوەنیشادان كر.
30/9/2023 سەرۆكێ حوكمەتا هەرێمێ سەرەدانا بریندارێن روودانا ئاگربەربوونێ ل حەمدانیە ل نەخوەشخانێن هەولێرێ دكەت.
17/10/2023 سەرۆكێ حوكمەتا هەرێمێ كارگەها دوبارە بكارئینانا قێری ڤەكر.
17/10/2023 حوكمەتا هەرێما كوردستانێ توپبارانكرنا نەخوەشخانەیا مەعمەدانی ل غەزە شەرمزاركر.
3/11/2023 نێچیرڤان بارزانی، سەرۆكێ هەرێمێ و ماكرۆن سەرۆكێ فرەنسا ل پاریس كۆمبوون.
6/11/2023 ب فەرمانا سەرۆك بارزانی، ئاڤاهیا مەكتەبا ڕێكخستنا پارتی ل كەركووكێ پێشكێشی زانكۆیا كەركووكێ هاتە كرن.
6/11/2023 سەرۆكێ حوكمەتا هەرێمێ بەرێ بنیاتێ ئاڤاكرنا سەنتەرێ چارەسەركرنا پەنجەشێرێ ب تێشكێ ل دهۆكێ دانا.
9/11/2023 سەرۆك بارزانی پێشوازیێ ل محەمەد شیاع سودانی سەرۆك وەزیرێن ئیراقێ دكەت.
20/11/2023 سەرۆكێ حوكمەتا هەرێمێ كارگەها (دستار) یا ئاری ل دهۆكێ ڤەكر.
20/11/2023 سەرۆكێ حوكمەتا هەرێمێ بەرێ بنیاتێ پڕۆژەیێ دەڤەرا پیشەسازی و كارگەها ژێك جوداكرنا گلێشی ل سنۆرێ ئیدارەیا سەربخوە یا زاخۆ ڤەكر.
21/11/2023 كوڕبەندێ چارێ یێ ئاشتیێ و ئاسایشا ڕۆژهەلاتا ناڤین ل زانكۆیا دهۆكێ هاتە ڤەكرن.
26/11/2023 بارەگەهێ لقێ سێ یێ پارتی ل كەركووكێ هاتە ڤەكرن.
28/11/2023 سەرۆكێ حوكمەتا هەرێمێ كارگەها (ڤان ستیل) یا ئاسنی ل هەولێرێ ڤەكر.
1/12/2023 سەرۆكێ هەرێمێ و سەرۆكێ حوكمەتا هەرێمێ دگەل سەرۆك و سەركردەیێن جیهانی پشكداری د گۆپیتكا جیهانی یا سەقای ل ئیمارات كر.
9/12/2023 سەرۆك بارزانی پەیامەكا بەهیداریێ ئاراستەی كەسوكارێن روودانا ئاگربەربوونا شۆران دكەت.
18/12/2023 سەرۆك بارزانی سەرەدانا قۆنسلخانەیا كوێت كر بۆ گەهاندنا هەڤخەمیێ ب هەلكەفتا وەغەركرنا میرێ دەولەتا كوێت.
18/12/2023 هەلبژارتنێن جڤاتێن پارێزگەهێن ئیراقێ دەستپێكر و كوردان ل دەڤەرێن كوردستانی یێن دەرڤەی ئیدارەیا هەرێما كوردستانێ پشكداری كر، هەروەسا چەندین بنگەهێن دەنگدانێ بۆ ئاوارەیان ل هەرێما كوردستانێ ژی هاتنە ڤەكرن.

مەزلوم عەبدی فەرماندارێ گشتی یێ هێزێن سووریا دیموکرات د داخۆیانیەکێ دا راگەهاند، ئەمریکا ژ ئێرشێن ڤێ دووماهیێ یێن تورکیا دلگرانە و د هەڤدیتنا دووماهیێ ل گەل بەرپرسێن ئەمریکا دا وان سۆز داینە دێ ئێرشێن تورکیا ڕاگرن، چونکی ئەمریکی ژی باش دزانن ئێرشێن نها یێن تورکیا زیانەکا مەزن بۆ وەلاتیێن سڤیل هەیە و هەروەسا وەکو هێزێن سووریا دیموکرات وان چو بەهانە ژی نەداینە دەستێ تورکیا دا ئێرشی رۆژئاڤایێ کوردستانێ بکەت.
ناڤهاتی ئەو یەک ژی دیار کر، هەلوەستێ نها یێ ئەمریکا جهێ دلخوەشیێ یە، ئەمریکی ژی باش دزانن وەکو رۆژئاڤایێ کوردستانێ ئەم چو دەمەکێ نەبووینە مەترسی بۆ تورکیا، بەلکو ئێرشێن تورکیا دێ بنە ئەگەرێ بهێزبوونا داعشێ و گرۆپێن دی یێن تیرۆرستی، ژ بەر ڤێ یەکێ ژی بەرپرسێن ئەمریکا سۆز داینە دێ ئێرشێن تورکیا ڕاگرن و ئەو یەک ژی جهێ دلخوەشیێ یە.

نێچیرڤان بارزانی، جێگرێ سەرۆكێ پارتی دیموكراتی كوردستان پەیامەكا پیرۆزباهیێ ئاراستەی ئێكەتیا ئافرەتێن كوردستانێ كر ب هەلكەفتا سەركەفتنا كۆنگرەیێ نەهێ یێ ئێكەتیا ئافرەتێن كوردستانێ.
دەقێ پەیاما نێچیرڤان بارزانی:
سەركەفتنا كۆنگرەیێ نەهێ ب گەرمی ل سكرتێر و ئەندامێن نوو یێن سكرتاریەتا ئێكەتیا ئافرەتێن كوردستانێ و هەموو ئافرەتێن كوردستانێ پیرۆز دكەم، هیڤیا سەركەفتن و پێشكەفتنا بەردەوام بۆ دخوازم.
هیڤیدارم ئێكەتیا ئافرەتێن كوردستانێ وەكو ڕێكخراوەكا پێشەنگ و زیندی یا ئافرەتان زێدەتر بەردەوام و سەركەفتی بیت د پاراستن و داكۆكیكرن ژ مافان و پێشڤەبرن ب ژێهاتن و شیانێن ئافرەتان د هەموو بواران دا.
ب ئەڤێ هەلكەفتێ ئێكەتیا ئافرەتێن كوردستانێ پشتڕاست دكەم كو وەكو هەردەم دێ هاریكار و پشتەڤانێ خەباتا ئافرەتان بم بۆ یەكسانیێ و ب دەستڤەئینان و پاراستنا مافێن ئەوان و مسۆگەریا پشكداریا كارا یا ئافرەتان د هەموو بوارێن ژیانێ دا.

سەرۆك مەسعود بارزانی ل سەلاحەدین پێشوازی ل ڤیكتۆریا نولاند، جێگرا وەزیرێ دەرڤە یێ ئەمریكا بۆ كاروبارێن سیاسی و شاندەكێ دگەلدا كر كو پێكهاتبوو ژ ئەلینا ڕۆمەنسكی، بالیۆزا ئەمریكا ل ئیراقێ و مارك سترۆ، قونسلێ گشتیێ ئەمریكا ل هەولێرێ و هەژمارەكا دبلۆماتكارێن ئەمریكی.
د كۆمبوونەكێ دا ڕەوشا سیاسی یا ئیراقێ و دەڤەرێ و پەیوەندیێن د ناڤبەرا حوكمەتا هەرێما كوردستانێ و حوكمەتا فیدرالی یا ئیراقێ و پێدڤیا چارسەەركرنا كێشەیان د ناڤبەرا ئەوان دا و بابەتێ مافێن دستووری و شایستەیێن دارایی یێن هەرێما كوردستانێ هاتنە گەنگەشە كرن.
هەر د ئەوێ كۆمبوونێ دا باس ل گەفێن ئەمنی و مەترسیا دیاربوونا داعشێ ل ئیراقێ و دەڤەرێ و دوپاتی ل هەماهەنگیا د ناڤبەرا هەرێما كوردستانێ و حوكمەتا ئیراقا فیدرال و هەڤپەیمانان هاتە كرن بۆ ڕوو ب ڕووبوونا گەفێن تیرۆرێ و ئاستەنگێن ئەمنی.
ڕەوشا سیاسی یا ناڤخوەیا هەرێما كوردستانێ تەوەرەكێ دی یێ دیدارێ بوو و شاندێ ئەمریكی پێزانین بۆ پێشڤەچوونا ژێرخانەیا هەرێمێ و ئارامی و سەقامگیریا هەرێما كوردستانێ هەبوو و دوپاتی ژی ل پێدڤیا هەماهەنگیێ و ئێكڕێزیێ د ناڤبەرا ئالیێن سیاسی یێن هەرێما كوردستانێ كر.
د پشكەكا دی یا ئەوێ كۆمبوونێ دا سەرۆك بارزانی ئاماژە ب ئەوێ چەندێ دا كو هەرێما كوردستانێ هەردەم بزاڤ كریە د ئیراقێ دا فاكتەرێ سەقامگیریێ و چارەسەریێ بیت و هەرێم خوازیارا ئەوێ چەندێ ژی بوو كو گرفتێن خوە ل گەل حوكمەتا فیدرالی ب دانوستاندنێ چارەسەر بكەت بەلێ كۆمەكا فاكتەران هەنە كو بووینە ڕێگر ل چارەسەركرنا كێشەیێن د ناڤبەرا حوكمەتا هەرێما كوردستانێ و حوكمەتا فیدرالی دا و زڤرینا ئاوارەیان و ئاساییبوونا ڕەوشا دەڤەرا شنگالێ.