سەرۆك مەسعود بارزانی، ب هەلكەفتا ڕۆژا ئالایێ كوردستانێ پەیامەك ل تۆرا جڤاكی یا ئێكس (تویتەرا بەرێ) بەلاڤكر و تێدا دبێژیت:
كوردستانیێن ئەزیز، ڕۆژا ئالایێ كوردستانێ ل هەوە هەموویان پیرۆز بیت.
ئالایێ مە هێمایێ بەرخوەدان و ئاشتیخوازی و باوەری ب خوەبوونا گەلێ مەیە.

سەرۆك مەسعود بارزانی ب مەبەستا گەهاندنا بەهیداریێ و هەڤخەمیێ بۆ وەغەركرنا میرێ كوێتێ سەرەدانا قۆنسلخانەیا كوێتێ ل باژێرێ هەولێرێ كر.
دوهی دوشەمبی 18/12/2023، سەرۆك مەسعود بارزانی سەرەدانا قونسلخانەیا كوێتێ ل باژێرێ هەولێرێ كر و بەهیداری و هەڤخەمیا خوە بۆ وەغەركرنا ڕەحمەتی (شێخ نەواف ئەلئەحمەد ئەلجابر ئەلسەباح) میرێ دەولەتا كوێتێ ب گەل و سەركردایەتیا دەولەتا كوێت و عوسمان داود ئەلداود، قونسلێ گشتیێ دەولەتا كوێتێ ل باژێرێ هەولێرێ گەهاند.

سەرۆكێ هەرێما كوردستانێ ل ڕۆژا ئالای داخوازكر، بلندكرنا ئالایێ كوردستانێ ببیتە ئەگەرێ دەربازكرنا دوبەرەكیێ هەروەسا گوت ژی: ئالایێ مە هێمایێ هیڤیێن مە یێن هەڤپشكە، هێمایێ ڕوو ب ڕووبوونا ئاستەنگایە و سەركەفتنا مە ل سەر بەربەستان.
ل سەرۆكایەتیا هەرێما كوردستانێ ب پشكداریا نێچیرڤان بارزانی، سەرۆكێ هەرێما كوردستانێ، ڕێوڕەسمێ بلندكرنا ئالایێ كوردستانێ بڕێڤەچوو.
نێچیرڤان بارزانی د وێ ڕێوڕەسمێ دا پەیڤەك پێشكێشكر و تێدا گوت» ئەڤ ئالایە، ل گەل ئەوێ چەندێ كو ئاماژەیە بۆ ئێك نیشتمان، ئێك ب ئێك دلێن ڤی نیشتمانی ل هەر جهەكی بن ژ كورد و هەموو پێكهاتەیێن دی پێكڤە گرێددەت. لەوما بلا بلندكرنا ئالای، ئەوێ پەیمانێ ژی د دەروونێ مە دا نوو بكەت كو دوبەرەكیێ دەرباز بكەین، ڕێزێ ل جوداهیێن خوە بگرین».
گوت ژی» ڕەنگێ سپی، ڕامانا دادپەروەریێ و ئاشتیێ و پێكڤەژیانێ یە. ڕەنگێ كەسك، ڕامانا ژیانێ و بەردەوامیێ و خەباتێ یە، ڕەنگێ سوور، ڕامانا بەرخوەدانێ و بەرهنگاربوونێ و پیرۆزیا خوینا شەهیدێن ڕێكا ئازادیا كوردستانێ یە. بلا هەتاڤا زەر ل سەر ئالایێ مە، ببیتە هێڤێنی هیڤی و ئومێدێن مە، بۆ گەهشتنێ ب مافێ چارەنڤیس».
هەروەسا گوت» دەمێ ئالای ل ئەسمانێ بێ سنوور دا بلند دكەین، بلا د گەلدا ورەیێن مە بلند بن. بلا هەموو ئەو شیانێن بێ سنۆر بینینە بیرا خوە كو د خەباتا مە یا پێكڤە دا هەین، بلا ئەوێ شكۆیا ئەڤرۆ هەست پێ دكەین، مە هانبدەت بۆ ئارمانجێن بلندتر، بۆ دەستكەفتێن مەزنتر، بۆ گیانێ پێكڤەییێ و سۆزا هەڤپشك، بۆ خوەشتڤیا هەڤپشك یا وەلاتی و هەموو ئەوێن كو ل كوردستانێ دژین. ل بن ڤی چەترێ كۆمكەر كو سیمبۆلا ناسنامەیا مە یا هەڤپشكە، بلا پێكڤە ب هێزتر بەر ب پێشڤە بچین، بۆ ئەوێ چەندێ مەزنیا نەتەوەیا خوە ل سەر بەرپەرێن دیرۆكێ تۆمار بكەین».

ل ڕۆژا ئالایێ كوردستانێ ب بەرهەڤبوونا مەسرۆر بارزانی، سەرۆكێ حوكمەتا هەرێما كوردستانێ و نوونەرێن پێكهاتەیێن كوردستانێ، د ڕێوڕەسمەكێ تایبەت دا ڕۆژا ئالایێ كوردستانێ بڕێڤەچوو.
د وی ڕێوڕەسمی دا مەسرۆر بارزانی، سەرۆكێ حوكمەتا هەرێما كوردستانێ، ڕاگەهاند» ل ڕۆژا ئالایێ كوردستانێ، ئالایێ هەموو پێكهاتەیێن كوردستانێ بلند و پیرۆز ڕادگرین».
سەرۆكێ حوكمەتا هەرێمێ گوت ژی» سەرێ ڕێزێ بۆ شەهیدێن سەربلندێن خوە د چەمینین كو ژ پێخەمەت ڤی ئالای و ئاخا كوردستانێ گیانێ خوە بەخشكری».

سەرۆك مەسعود بارزانی ل سەلاحەدین ل گەل سكرتێر و ئەندامێن سكرتاریەتا ئێكەتیا ئافرەتێن كوردستانێ كۆمبوو.
د كۆمبوونێ دا سەرۆك بارزانی د پەیڤەكێ دا سەرەرای ئاماژەكرن ب ڕۆلێ ئێكەتیا ئافرەتێن كوردستانێ د قۆناغێن جودا جودا یێن خەباتا گەلێ كوردستانێ، قوربانیدان و وەستیانا ئافرەتێن كوردستانێ بلند هەلسەنگاند و ب پێدڤی زانی كو ل قۆناغێن داهاتیدا ئێكەتیا ئافرەتێن كوردستانێ د پێگەهاندن و ب هێزكرنا هشیاریا نەتەوەیی و نیشتمانی یا ئافرەتان بەردەوام بیت. هەروەسا كار بۆ بەرگریكرن و پاراستنا مافێن ئافرەتان ل بوارێن جودا جودا یێن جڤاكێ كوردستانی دا بكەت.
هەر د وێ كۆمبوونێ دا سەرۆك بارزانی سوپاسیا سكرتێر و ستافێ سكرتاریەتا ئێكەتیا ئافرەتێن كوردستانێ كر كو ئەركێن خوە ب باشێ ئەنجامداینە و ل دۆر كۆنگرەیێ نەهێ یێ ئێكەتیا ئافرەتێن كوردستانێ كو دێ ل نێزیك هێتە گرێدان شیرەت و ڕێنمایێن پێدڤی بەرچاڤكرن.

مەسرۆر بارزانی، سەرۆكێ حوكمەتا هەرێما كوردستانێ، ب مەبەستا پشكداریكرنێ د بەهیا میرێ كوێتێ دا بەر ب ئەوی وەلاتێ چوو.
دوهی دوشەمبی 18/12/2023، مەسرۆر بارزانی، سەرۆكێ حوكمەتا هەرێما كوردستانێ ب سەرۆكایەتیا شاندەكێ حكومی، بەر ب وەلاتێ كوێتێ بڕێكەفت بۆ پشكداریێ د بەهیا شێخ نەواف ئەحمەد ئەلجابر ئەلسەباح، میرێ كوێتێ.

سەرۆكێ دەستەیا دەڤەرێن كوردستانی یێن دەرڤەی ئیدارەیا هەرێما كوردستانێ دبێژیت، ئارمانج ژ دەنگدانێ، زڤراندنا كەركووكێ یە بۆ سەر ب كوردستانێ ڤە، ئاماژە ب ئەوێ چەندێ ژی دكەت كو پێدڤیە بڕێڤەبرنا كەركووكێ بكەڤیتە دەستێ خەلكێ ڕاستەقینە یێ كەركووكێ.
فەهمی بورهان، سەرۆكێ دەستەیا دەڤەرێن كوردستانی یێن دەرڤەی ئیدارەیا هەرێما كوردستانێ گوت» وەلاتیێن كورد ب هەستا نیشتمانی و نەتەوەیی چوونە سەر سندۆقێن دەنگدانێ و ئارمانج ژ پشكداریكرنێ د هەلبژارتناندا تنێ دیاركرنا پارێزگاری ژ ئالیێ كوردان ڤە نینە، بەلكو ئارمانج زڤراندنا كەركووكێ یە بۆ سەر ب كوردستانێ ڤە».
پشتی هێرشێن 16 ئۆكتۆبەرا 2017 گوهۆڕینێن مەزن ب سەر ڕەوشا كەركووكێ و دەڤەرێن كوردستانی یێن دی یێن دەرڤەی ئیدارەیا هەرێما كوردستانێ هاتینە، كورد ل كەركووكێ دبێژن: كورد ل ئەوان دەڤەران ب تمامی هاتینە پشتگوهـ هاڤێتن و ستەم لێ دهێتە كرن، سەرۆكێ دەستەیا دەڤەرێن كوردستانی یێن دەرڤەی ئیدارەیا هەرێما كوردستانێ دبێژیت ئەوا كو هەی «ئەو ب ئەرەبكرنا نوویە كو ل كەركووكێ و دەڤەرێن كێشە ل سەر دهێتە دیتن».
فەهمی بورهان دیاركر ژی» ب پشكداریكرنێ د هەلبژارتنێن جڤاتا پارێزگەها كەركووكێ، كورد دێ بنە پشكەك ژ بڕیاردەرێن سیاسی و كارگێری ل ئەوی باژێری كو پشتی 16 ئۆكتۆبەرا 2017 هیچ بڕیارەك د دەستێ كوردان دا نەمابوو، بەلكو هندەك كەس تێدا كاربدەست بوون كو خەلكێ ڕەسەنێ كەركووكێ نەبوون و بێگومان پشكداریكرن د هەلبژارتناندا گەلەك ژ ئەوان كێشەیان دێ چارەسەركەت».

ئەندامەکێ سەرکردایەتیا ئاکپارتیێ راگەهاند، د ناڤ ئاکپارتیێ دا سەبارەت ب سیاسەتا قەیومان و هەروەسا پرسا کوردی نێرینێن جودا هەنە، چونکی نابیت کەسێن ب دەنگێ خەلکی هاتینە هەلبژارتن ژ کاری بهێنە دوورخستن، ئەو یەک زیانەکا خوە یا مەزن بۆ ئاکپارتیێ ژی هەیە.

ئۆرهان میر ئۆغلۆ ئەندامێ سەرکردایەتیا ئاکپارتیێ و هەروەسا پەرلەمانتارێ بەرێ یێ وێ پارتیێ د داخۆیانیەکێ دا راگەهاند، دەمەکە د ناڤ ئاکپارتیێ دا سەبارەت ب سیاسەتا قەیومان و هەروەسا چاوانیا چارەسەرکرنا پرسا کوردی دانوستاندنێن باش دهێنە کرن، یا راست د ناڤ جڤاتا سەرکردایەتیێ دا سەبارەت ب سیاسەتا قەیومان و هەروەسا چاوانیا چارەسەرکرنا پرسا کوردی دا نێرینێن جودا هەنە و گۆت: (کەسێن دبنە سەرۆکێن باژێرڤانیان ب تایبەتی ژی ل باژێرێن کوردی ل تورکیا ئەو ب دەنگێن خەلکی دهێنە هەلبژارتن، نابیت ژ کاری بهێنە دوورخستن، ئەو یەک ل دژی دیموکراسیێ یە، ئەو یەک زیانەکا خوە یا مەزن بۆ تورکیا و ب تایبەتی ژی بۆ ئاکپارتیێ یا هەی، ژ بەر ڤێ یەکێ ژی هندەک ژ سەرکردێن ئاکپارتیێ وەسا دبینن دڤێت دووماهی ب سیاسەتا قەیومان بهێت).
ناڤهاتی ئەو یەک ژی دیار کر، ئاکپارتیێ د ناڤ باژێرێن کوردی ل تورکیا دا جەماوەریەکێ خوە یێ مەزن هەیە، رێژەکا مەزن ژ دەنگدەرێن کورد د هەلبژارتنێن هەری دووماهیێ دا ژی دەنگێ خوە دانە ئاکپارتیێ، بێگومان وان ژی داخوازیێن خوە هەنە، لێ هەتا نها وەکو پێدڤی داخوازیێن وان نەهاتینە بجهئینان، ئەو یەک ژی بۆ سیاسەتا نها یا ئاکپارتیێ ڤەدگەریت، چونکی دڤێت ئاکپارتی سیاسەتەکا جوداتر ژ جاران ل هەمبەر پرسا کوردی هەبیت، د ناڤ سەرکردێن ئاکپارتیێ دا هندەک کەس وەسا دبینن دڤێت ئاکپارتی سیاسەتا خوە ل هەمبەر پرسا کوردی بگوهۆڕیت و سیاسەتەکا نەرمتر هەبیت، لێ گەلەک کەس ژی پشتەڤانیێ ل سیاسەتا نها یا ئاکپارتیێ دکەن و گۆت: (یا راست سیاسەتا چەند سالێن بۆری یا ئاکپارتیێ ل هەمبەر پرسا کوردی ب تایبەتی ژی سیاسەتا قەیومان زیانا خوە بۆ تورکیا و ب تایبەتی ژی بۆ ئاکپارتیێ هەبوویە، چونکی ئەو یەک دشێت د پاشەرۆژێ دا ژی ئاریشێن گەلەک مەزن بۆ تورکیا دروست بکەت، زیانا خوە بۆ دیموکراسیێ هەیە، ژ بەر ڤێ یەکێ ژی گەلەک ژ سەرکردێن ئاکپارتیێ دخوازن ئێدی دووماهی ب سیاسەتا قەیومان بهێت و سەرۆکێن باژێرڤانیان ژ کاری نەهێنە دوورخستن).
ئەندامێ سەرکردایەتیا ئاکپارتیێ ئەو یەک ژی دیار کر، پێدڤیا تورکیا ب گوهۆڕینێن مەزن هەیە، ئاکپارتی دشێت تورکیا بەر ب قۆناغەکا نوو ڤە ببەت، لێ ژ بۆ هندێ ژی دڤێت د ناڤخوەیێ تورکیا دا ب تایبەتی ژی پارتێن ئۆپۆزسیۆنێ بۆ بەرژەوەندیێن گشتی یێن وەلاتی پشتەڤانیێ ل پرۆژێن نوو یێن ئاکپارتیێ بکەن.

سەرۆك مەسعود بارزانی، ب هەلكەفتا سالڤەگەرا 71 یا دامەزراندنا ئێكەتیا ئافرەتێن كوردستانێ پەیامەك ئاراستەی سكرتێر و ئەندامێن مەكتەبا سكرتاریەتا ئێكەتیا ئافرەتێن كوردستانێ كر و ڕاگەهاند: ڕۆلێ هەوە د خەباتا گەلێ مە و هەروەسا ناساندن و بەرگریكرنێ ژ مافێن ئافرەتێ یێ بەرچاڤ و دیارە.
د پەیاما سەرۆك بارزانی دا هاتیە» ب هەلكەفتا سالڤەگەرا 71 یا دامەزراندنا ئێكەتیا ئافرەتێن كوردستانێ، پیرۆزباهیێن گەرم ئاراستەی هەوە و هەموو ئەندامێن ڕێكخراوا هەوە یا خەباتكەر و هەموو ئافرەتێن كوردستانێ دكەم. ئێكەتیا ئافرەتێن كوردستانێ، ئەزموونەكا زەنگین و بێ وێنەیا پشكداری و پێگەهاندنا ئافرەتا كوردستانێ د ژیانا سیاسی دا هەبوو و ڕۆلێ وێ د خەباتا گەلێ مە دا و هەروەسا ناساندن و بەرگریكرن ژ مافێن ئافرەتێ یێ بەرچاڤ و دیارە».
سەرۆك بارزانی، ڕاگەهاند ژی» بەردەوام ئەو چاڤەڕێیە ژ ئێكەتیا ئافرەتێن كوردستانێ كو ژێدەرێ هشیاریا نەتەوەیی و نیشتمانی و پیشەیی بیت بۆ هەموو ئافرەتێن كوردستانێ و كاری بۆ پاراستنا مافێن ئافرەتێ د ناڤ خێزان و جهێ كاری و مەیدانا سیاسەتێ و بوارێن دی یێن جڤاكی دا بكەن».

جێگرێ سەرۆكێ پارتی دیموكراتی كوردستان، نێچیرڤان بارزانی، دوهی دوشەمبی 11/12/2023 پەیامەك ب هەلكەفتا سالڤەگەرا 71 یا دامەزراندنا ئێكەتیا ئافرەتێن كوردستانێ بەلاڤكر و ڕاگەهاند: ئەڤێ هەلكەفتێ ب گەرمی ل هەموو ئافرەتێن كوردستانێ پیرۆز دكەم. خەبات و قوربانیدانا ئەوان ژ پێخەمەت پاراستنا مافێن ئافرەتان و ئازادیێ و یەكسانیێ، ب ڕێز و پێزانین ڤە د هەلسەنگینم، هیڤیا سەركەفتنا بەردەوام بۆ دخوازم.
نێچیرڤان بارزانی د پەیاما خوە دا دبێژیت» ئێكەتیا ئافرەتێن كوردستانێ وەكو ڕێكخراوەكا پێشەنگ بۆ پاراستن و داكۆكیكرنێ ژ مافێن ئافرەتان، ل هەردو سەردەمێن شۆڕەشێ و ئازادیێ دا، ڕۆلەكێ دیار د خەباتا مەدەنی یا جڤاكێ كوردستانێ دا گێرایە. سەرەرای پارێزگاریكرن ژ مافێن ئافرەتان، ب سەدان ئافرەتان خودان شیان د هەموو بواراندا و چەندین كادر و سەركردە ژی پێگەهاندینە، كو ل هەموو بوارێن ژیانێ دا خزمەتا وەلاتێ كریە و دكەن».
جێگرێ سەرۆكێ پارتی دیموكراتی كوردستان ل دوماهیا پەیاما خوە دوپاتیێ ل ئەوێ چەندێ دكەت كو جڤاكەكێ مەدەنی یێ ڤەكری و ئازاد و پێشكەفتی بێی ئازادیا ئافرەتێ و مسۆگەریا هەموو مافێن وێ پەیدا نابیت» لەوما د ڤێ هەلكەفتێ دا هەموو پشتەڤانیەكێ ل خەباتا ئافرەتان دوپات دكەم. بلا ئێكەتیا ئافرەتێن كوردستانێ و هەموو ڕێكخراوێن ژنان ل كوردستانێ پشتڕاست بن كو بەردەوام ژ پێخەمەت مافێن وان، دێ هاریكار و پشتەڤان بم».