كۆمسیۆنا بلند یا هەلبژارتنان ل ئیراقێ ل دۆر كورسیێن پێكهاتەیان پێشنیازا خوە دایە دادگەها فیدرالی و ئەو كورسی بەلاڤكرینە ل سەر سێ پارێزگەهان دا، سەرۆكێ حوكمەتا هەرێما كوردستانێ د نامەیەكێ دا بۆ ئالیێن پەیوەندیدارێن ئیراقی داخواز دكەت دەستكاری د كورسیێن پێكهاتەیان دا نەهێتە كرن.
ب گۆڕەی بەیاننامەیەكا حوكمەتا هەرێما كوردستانێ، دوهی دوشەمبی 11/12/2023، مەسرۆر بارزانی، سەرۆكێ حوكمەتا هەرێما كوردستانێ نامەیەك بۆ هەر ئێك ژ فایق زێدان، سەرۆكێ جڤاتا بلند یا دادوەری ل ئیراقێ، جێنین پلاسخارت، نوونەرا تایبەت یا سكرتێرێ گشتیێ نەتەوەیێن ئێگگرتی ل ئیراقێ و عومەر ئەحمەد محەمەد، سەرۆكێ جڤاتا كۆمسیارێن كۆمسیۆنا بلند یا سەربخوە یا هەلبژارتنان ل ئیراقێ هنارتیە و د ناڤەرۆكێ دا ڕاگەهاندیە كو نیگەرانیێ و نەرازیبوونێ ل بەرامبەر بزاڤێن گوهۆڕین و دەستكاریكرنێ د كورسی و مافێن پێكهاتەیێن كوردستانێ دەردبڕیت.
ب گۆڕەی بەیاننامەیێ، سەرۆكێ حوكمەتا هەرێما كوردستانێ پشتەڤانیا حوكمەتا هەرێمێ بۆ مافێن پێكهاتەیان دوپاتكر و داخوازكر» ڕێگری ل ئەڤان بزاڤان بهێتە كرن و دەستكاری د مافێن پێكهاتەیان دا نەهێتە كرن و د پاراستی بن».
پەیاما سەرۆكێ حوكمەتا هەرێما كوردستانێ د دەمەكی دایە، ب گۆڕەی پێزانینان، ل ڕۆژا پێنجشەمبیا بۆری 7/12/2023 كۆمسیۆنا بلند یا سەربخوە یا هەلبژارتنان ل ئیراقێ پێشنیازا خوە بۆ بەلاڤكرنا كورسیێن كۆتایان بۆ هەلبژارتنێن پەرلەمانێ كوردستانێ داینە دادگەها فیدرالی یا بلند ل ئیراقێ و 11 كورسیێن كۆتایێن پێكهاتەیێن پەرلەمانێ كوردستانێ بەلاڤكرینە، ب جۆرەكی چار بۆ پارێزگەها سلێمانیێ، چار بۆ پارێزگەها هەولێرێ و سێ بۆ پارێزگەها دهۆكێ بن.
جومانە غەلای، پەیڤدارا كۆمسیۆنا بلند یا هەلبژارتنان ل ئیراقێ ل ڕۆژا ئێكشەمبیا بۆری ڕاگەهاندبوو» ئەوا كۆمسیۆنێ پێشكێشكری پێشنیازە و دادگەها بلند یا فیدرالی دێ بڕیارێ ل دۆر وێ سكالایێ دەت كو ل بەردەستدایە دژی ئەو مادەیێن قانوونا هەلبژارتنێن پەرلەمانێ كوردستانێ كو د تایبەتن ب بەلاڤكرنا كورسیێن كۆتایان».
ب گۆڕەی خشتەیێ كۆمبوونێن دادگەها بلند یا فیدرالی ل ئیراقێ، ل ڕۆژا 27/12/2023 دادكەها ناڤبری دێ ڕوونشتنەكا دی ل دۆر وێ سكالایێ ئەنجامدەت كو دژی چەند مادەیێن قانوونا هەلبژارتنێن پەرلەمانێ كوردستانێ هاتیە تۆماركرن.
بڕیارە ل 25/2/2024 هەلبژارتنێن پەرلەمانێ كوردستانێ بهێنە ئەنجامدان و ژ ئالیێ كۆمسیۆنا بلند یا سەربخوە یا هەلبژارتنان ل ئیراقێ سەرپەرشتی ل سەر بهێتە كرن.

جێگرێ سەرۆكێ پارتی دیموكراتی كوردستان، مەسرۆر بارزانی، د پەیامەكێ دا ب هەلكەفتا سالڤەگەرا 71 یا دامەزراندنا ئێكەتیا ئافرەتێن كوردستانێ، پیرۆزباهی ئاراستەی سكرتێر و ئەندامێن مەكتەبا سكرتاریەت و هەموو ئافرەتێن كوردستانێ دكەت و ڕادگەهینیت: ئێكەتیا ئافرەتان قوتابخانەیەك بوو بۆ پێگەهاندنا چەندین ئافرەتێن خودان شیان و سەركردە.
د پەیاما مەسرۆر بارزانی دا هاتیە» ل سالڤەگەرا 71 یا دامەزراندنا ئێكەتیا ئافرەتێن كوردستانێ، گەرمترین پیرۆزباهیان ئاراستەی سكرتێر و ئەندامێن مەكتەبا سكرتاریەتێ و هەموو ئافرەتێن كوردستانێ دكەم و هیڤیا پێشكەفتن و سەركەفتنا زێدەتر بۆ دخوازم، ئێكەتیا ئافرەتێن كوردستانێ، ڕۆلەكێ گرنگ و دیار د دیرۆكا ڕزگاریخوازا گەلێ كوردستانێ گێرایە و قوتابخانەیەك بوو بۆ پێگەهاندنا چەندین ئافرەتێن خودان شیان و سەركردە».
د پشكەكا دی یا پەیاما خوە دا دبێژیت» پێگیریا خوە ب پاراستنا مافێن ئافرەتێن كوردستانێ و ب هێزكرنا ڕۆل و پێگەهێ ئافرەتان د ڕێڤەبرن و پێشڤەبرنا شێانێن وان دوپات دكەین».

مەسرۆر بارزانی، سەرۆكێ حوكمەتا هەرێما كوردستانێ دوهی دوشەمبی 11/12/2023، پێشوازی ل نیكۆلۆس ستێریولاس، قۆنسلێ گشتیێ نوو یێ وەلاتێ یۆنانێ ل هەرێما كوردستانێ كر.
ب گۆڕەی بەیاننامەیەكا حوكمەتا هەرێما كوردستانێ، مەسرۆر بارزانی، سەرۆكێ حوكمەتا هەرێما كوردستانێ پیرۆزباهیا دەستبكاربوونێ ل قونسلێ گشتیێ نوو یێ یۆنانێ كر و هیڤیا سەركەفتنێ د ئەركێ وی دا بۆ خواست و بەرهەڤیا حوكمەتا هەرێما كوردستانێ ژی بۆ هەر هاریكاری و هەماهەنگیەكا پێدڤی دەربڕی.
ئەوژی هاتە بەرچاڤككرن» قۆنسلێ گشتیێ یێ نوو یێ وەلاتێ یۆنانێ، خواستا وەلاتێ خوە بۆ پێشڤەبرنا زێدەتر یا پەیوەندیان ل گەل هەرێما كوردستانێ دوپاتكر، ب تایبەتی د بوارێن كەلتووری و بازرگانی و چاندنێ دا».

د. فوئاد حسێن وەزیرێ‌ دەرڤە یێ‌ ئیراقێ، د داخۆیانیەكێ دا بۆ ڕۆژنامەیا (ئەڤرۆ) ڕاگەهاند: ئەو ئاریشەیێن د ناڤبەرا حوكمەتا هەرێما كوردستانێ و حوكمەتا ئیراقێ دا هەین دێ‌ چارەسەر بن، هندەك ژ وان ئاریشەیان زوو دێ‌ چارەسەر بن، هندەك ژ وان ئاریشەیان ژی پاشی دێ‌ هێنە چارەسەر كرن، د هەمان دەمدا ئاریشەیا دارایی ژی ل گەل حوكمەتا ئیراقێ دێ‌ هێتە چارەسەركرن، دیسان گوهۆڕین ژی دێ‌ د قانوونا بودجەیا ئیراقێ دا هێتە كرن و پێدڤیە ئەو گوهۆڕین هەر بهێنە كرن، ژ پێخەمەت هەموو ئاریشە بهێنە چارەسەركرن.
د. فوئاد حسێن وەزیرێ‌ دەرڤە یێ‌ ئیراقێ ئاشكراكر كو ل نێزیك شاندەكێ‌ حوكمەتا ئیراقێ دێ‌ سەرەدانا وەلاتێ‌ توركیا ب مەرەما دانوستاندنان ل گەل حوكمەتا توركی ژ پێخەمەت ئەو ئاریشەیێن د ناڤبەرا ئیراقێ و توركیا دا دروست بووین بهێنە چارەسەر كرن.

عەزیز هەورامی:

هەوا هەلبژارتنان بۆ لیستا 197 یا پارتی دیموكراتی كوردستان بۆ هەلبژارتنێن جڤاتا پارێزگەها كەركووكێ یا بەردەوامە و خەلكێ كەركووكێ پشتەڤانیا خوە بۆ لیستا 197 دوپات دكەن، بەربژارەكێ پارتی ژی ل كەركووكێ دبێژیت: دێ لیستا پارتی سەركەڤیت و پارێزگەرێ سەپاندی ل سەر كەركووكێ دێ دەینە دادگەهێ و قەرەبوویا شەش سالێن بۆری بۆ خەلكێ كەركووكێ كەین.
ئارەزوو جەبار شوانی، بەربژارا هەژمار 12 ژ لیستا 197 یا پارتی دیموكراتی كوردستان بۆ هەلبژارتنێن جڤاتا پارێزگەها كەركووكێ بۆ ڕۆژنامەیا (ئەڤرۆ) گوت» هەوا هەلبژارتنان ل كەركووكێ یا بەردەوامە و وەكو پارتی دیموكراتی كوردستان ل سەر ڕاسپاردێن سەرۆك مەسعود بارزانی هەوەكا ئارام بڕێڤەدبەین، سەرۆك بارزانی ئەم ڕاسپاردینە ڕێزێ ل هەموو نەتەوەیێن كەركووكێ بگرین، لیستا 197 یا پارتی دیموكراتی كوردستان تاكە لیستە هەموو نەتەوەیێن كەركووكێ بخوەڤە گرتینە».
ئارەزوو جەبار شوانی گوت ژی» سوپاسیا جەماوەرێ باژێرێ كەركووكێ دكەین بۆ ئەوێ پێشوازیا گەرم ل پارتی دیموكراتی كوردستان و بەربژارێن وێ دكەن، داخوازا لێبۆرینێ ژێ دكەین كو ژ ئەگەرێ خیانەتا 16 ئۆكتۆبەرا 2017، ل چەند سالێن بۆری ل كەركووكێ نەبووین، سۆزێ ددەینە خەلكێ كەركووكێ دێ پشتەڤانێن وان بین بێی جوداهی».
گوت ژی» لیستا 197 لیستا خزمەتگوزاری و پێكڤەژیانێ یە و خەلكێ كەركووكێ پشت ڕاستكەین كو دێ هەموو خزمەتگوزاریان بۆ دابین كەین، ل گەل پێكئینانا جڤاتا نوو یا پارێزگەها كەركووكێ و دەست بكاربوونا پارێزگەرێ نوو و لادانا پارێزگەرێ سەپاندی دێ شۆڕەشا ئاڤەدانیێ و خزمەتگوزاریێ دەست پێكەین» .
ل دووماهیێ گوت» لاوێن كەركووكێ پشتڕاست دكەین كو دێ هەموو خزمەتگوزاریێن ئەوان بۆ دەستەبەر كەین، پشتی 18/12 دێ حوكمەتەكا خوەجهی دێ ڕاگەهینین و پارێزگەرێ سەپاندی ژ بەر ئەوان كارێن نە قانوونی ئەوێن ئەنجامداین دێ ڕەوانەی دادگەهێ كەین».

كەرنەڤالێ‌ جەماوەری بۆ پشتەڤانیا لیستا 197 پارتی دیمۆكراتی كوردستانی بۆ هەلبژارتنێن جڤاتێن پارێزگەهێن ئیراقێ‌ ل باژێرێ‌ دەڤەرداریا سێمێلێ‌ برێڤە چوو.
بەرپرسێ‌ مەكتەبا رێكخستنا پارتی ل نەینەوا د پەیڤەكێ‌ دا، راگەهاند، خەلكێ‌ شنگالێ‌ وەفادار بوویە بۆ رێبازا بارزانی و لیستا پارتی ل نەینەوا هەر دێ‌ مینیت لیستا ئێكێ‌.
نەوزاد هادی گۆت ژی: (سەقامگیری و ئاڤەدانیا شنگالێ‌ و شنگالی هەر د لیستا پارتی دا رەنگڤەددەن و بۆ خزمەتكرنا خەلكێ‌ نەینەوا، بەربژارێن پارتی هەمی كەسێن ژێهاتی نە بۆ خزمەتكرنا وەلاتیان).

بارەگەهێ بارزانی د بەیاننامەیەكێ دا دبێژیت، سەرۆك بارزانی ب پێدڤی دزانیت، ڕێك بهێتە دان پێكهاتە ب خوە بڕیارێ ل چارەنڤیسێ خوە بدەن و هیچ چارچۆڤەیەكێ دیاركری ل سەر ئەوان نەهێتە سەپاندن.
دەقێ بەیاننامەیا بارەگەهێ بارزانی:
سەبارەت بابەتێ میكانیزما بەلاڤكرنا كورسیێن پێكهاتەیان د هەلبژارتنێن هەرێما كوردستانێ دا و هەبوونا هندەك بزاڤان بۆ گوهۆڕین و دەستكاریكرنێ د كورسی و مافێن پێكهاتەیان دا و چاوانیا پشكداریا ئەوان د هەلبژارتنان دا، بۆچوونا سەرۆك بارزانی ب ڤی شێوەیە كو پێدڤیە ڕێك بهێتە دان پێکهاتە ب خوە بڕیارێ ل چارەنڤیسێ خوە بدەن و هیچ چارچۆڤەیەكێ دیاركری ل سەر وان نەهێتە سەپاندن، پێكهاتە پشكەكا ئەزیز و گرنگێن جڤاكێ كوردستانێ نە و نابیت ئیستیحقاق و مافێن ئەوان تێكهەلی هیچ بەرژەوەندیەكا سیاسی و نەدادپەروەرانە بهێتە كرن.

ئەندامەكێ مەكتەبا سیاسی یا پارتی دیموكراتی كوردستان ڕاگەهاند: هەرێما كوردستانێ د قۆناغەكا هەستیار دایە و دبیت گوهۆڕین ل دەڤەرێ ڕوو بدەن، هەروەسا دیاركر كو هیچ كێشەیەك د ناڤبەرا پارتی دیموكراتی كوردستان و ئێكەتی نیشتمانی كوردستان دا نینە چارەسەر نەبیت و پێشتر ژی هەردو ئالی ڕێككەفتینە كو ڕێكێ ل دروستبوونا كێشەیێن دی بگرن.
سەربەست لەزگین، ئەندامێ مەكتەبا سیاسی یا پارتی دیموكراتی كوردستان و بەرپرسێ مەكتەبا ڕێكخستنا هەولێرێ یا پارتی گوت» هەرێما كوردستانێ د قۆناغەكا هەستیاردایە و دبیت گوهۆڕین ل دەڤەرێ ڕووبدەن، لەوما باشترین ڕێك ژی بۆمە ئەوە ل ناڤخوەیا خوە كێشە و ناكۆكیان چارەسەر بكەین و بەردەوام پێكڤەبین».
ل دۆر پەیوەندیێن د ناڤبەرا پارتی دیموكراتی كوردستان و ئێكەتی نیشتمانی كوردستان، سەربەست لەزگین دبێژیت» ئەو كێشەیێن كو ل پێشتر د ناڤبەرا هەردو حزبان دا هەبوون، ڕێككەفتن هاتیە كرن كو كێشەیێن نوو دروست نەكەین، ئەڤە ژی یا گرنگە بۆ ڤێ قۆناغێ». هەروەسا گوت ژی» هیچ كێشەیەك د ناڤبەرا پارتی و ئێكەتیێ دا نینە چارەسەر نەبیت».
پێشتر دەرباز كۆسرەت ڕەسول، ئەندامێ مەكتەبا سیاسی یا ئێكەتی نیشتمانی كوردستان د كۆنگرەیەكێ ڕۆژنامەڤانی دا گوتبوو» خوەشبەختانە د دەمێ بۆری دا دانوستاندنێن مە ل گەل پارتی هاتینە دەستپێكرن، مە شیایە هەتا ڕادەیەكی ل سەر كۆمەكا پرسان د هەڤڕابین».
گوتبوو ژی» ل گەل پارتی دیموكراتی كوردستان ل سەر چەند بابەتەكان ڕێككەفتینە و دخوازین ل بەغدا كۆدەنگیەكا كوردی هەبیت».

هەولێر، قائید میرۆ

شرۆڤەكارەكا سیاسی ئاماژە ب وێ چەندێ دكەت، سەركەفتنا پارتی دیموكراتی كوردستان دهەلبژارتنێن جڤاتێن پارێزگەهێن ئیراقێ دا سەركەفتنا هەموو كوردایە، ژ بەر كو پارتی دێ بەرگریێ ژ دەڤەرێن كوردستانی كەت و داخوازكر ل ڕۆژا 18/12/2023 كورد بچنە سەر سندۆقێن دەنگدانێ و هەستا خوە یا كوردینیێ بكاربینن بۆ ڤەگەڕاندنا دەستهەلاتا كوردی بۆ دەڤەرێن كوردستانی یێن ژ دەرڤەی ئیدارەیا هەرێما كوردستانێ.
ئاشنا بابان، شرۆڤەكارا سیاسی بۆ ڕۆژنامەیا (ئەڤرۆ) گوت» ڤەگەڕیانا پارتی بۆ مووسلێ و كەركووكێ د دەمێ نوكەدا یا گرنگە و دێ كاریگەری ل سەر ڕەوشا ئەوان دەڤەران هەبیت، چونكە هەلبژارتن دێ هێنە ئەنجامدان و هەكە ئەو هەلبژارتن جارەكێ بۆ ئیراقێ د گرنگ بن، ب دەهان جاران هند بۆ كوردان د گرنگن، چونكە پشتی شەڕێ داعشێ و ڕوودانێن ١٦ی ئۆكتۆبەرێ گوهۆڕین ب سەر ڕەوشا دەڤەرێن كوردستانی یێن ژ دەرڤەی ئیدارەیا حوكمەتا هەرێما كوردستانێ هاتینە و پشتی هەلبژارتنان هەكە كورد شیان ڕێژەیەكا مەزن یا دەنگان بدەستڤەبینن دێ دەستهەلات بۆ كوردان ڤەگەڕیت، لەوڕا ژی پێدڤیە دەنگدەرێن كورد ل هەموو ئەوان دەڤەرێن هەلبژارتن تێدا دهێتە ئەنجامدان بچنە سەر سندۆقێن دەنگدانێ و دەنگی بدەنە كوردان».
ئاشنایێ گوت ژی» ل ڕۆژا هەلبژارتنان پێدڤیە وەلاتیێن كورد دەستان ژ هەموو گازندەیێن خوە بەردەن و هەستا خوە یا كوردینیێ بكاربینن بۆ سەركەفتنا كوردان، هەتا كورد بشێن زۆرترین دەنگ بدەستڤەبینن و ڕۆل هەبیت ل پێكئینانا حوكمەتێن نافخوەیی ل پارێزگەهێن نەینەوا و كەركووكێ، دەنگێ كوردان پیڤەرە بۆ ڤەگەڕاندنا دەستهەلاتا كوردی و دشێم بێژم هەلبژارتنێن ئەڤێجارێ وەكو راپرسیەكێ یە بۆ دیاركرنا ڕێژەیا هەر پێكهاتەیەكی».
ئاشنا بابان ئاماژەكر» ئەركە بۆ دەنگدەرێن كورد پشكداریێ د پڕۆسەیا هەلبژارتنێن جڤاتێن پارێزگەهان دا بكەن، چونكە ئەم یێ ل هەمبەر قۆناغەكا دی ل ئیراقێ و زڤرینا بارەگەهێن پارتی ژی بۆ كەركووك و نەینەوا دێ زێدەتر دەستهەلاتێ دەتە كوردان و ڤەگەڕیانا پارتی ئانكو ڤەگەڕیانا كوردایە بۆ ئەوان دەڤەران، ژ بەر كو تنێ پارتی دشێت بەرگریێ ژ خەلكێ ئەوان دەڤەران بكەت و ژبلی پارتی چو ئالیێن دی نەشێن وەكو پێدڤی بەرگریێ ژ كوردان بكەن، ئەز باوەرم هەر دەمێ پارتی سەركەڤیت ئانكو كورد سەركەفتن، دەنگدان بۆ لیستەیا ١٩٧ یا پارتی دیموكراتی كوردستان ئەركەكێ نەتەوەیی و نیشتیمانی یە بۆ ڤەگەڕاندنا سەنگا كوردان، بەری نوكە خەلكێ ئەوان دەڤەران دەستهەلاتا پارتی تاقیكریە و دەركەفتیە هەر جهێ پارتی تێدا بیت ئەو جهەكێ سەقامگیر و ئارام و ئاڤەدانە و بەرۆڤاژی مەدیت پشتی ١٦ی ئۆكتۆبەرێ ئەو دەڤەرێن پارتی تێدا نەمای چو كارەسات ب سەرێ كوردان ئینان».

سوپاسالارێ بەرێ یێ ئیراقێ باس ل هێرشێن چەكداری بۆ سەر بنگەهێن ئەمریكا ل ئیراقێ و سووریێ دكەت و دبێژیت: سەرۆك وەزیرێن ئیراقێ كەفتیە بەردەم ئاستەنگێن گەلەك مەزن.
بابەكر زێباری، سوپاسالارێ بەرێ یێ ئیراقێ و شیرەتكارێ سەرۆكێ هەرێما كوردستانێ بۆ كاروبارێن لەشكری گوت» حوكمەتا ئیراقێ نەشێت هیچ ئێك ژ وان گرۆپێن چەكداری كونترۆل بكەت، نوكە گرۆپا نوجەبا و حزبوللا چو هزران بۆ سۆدانێ ناكەن، د بنەڕەت دا دبێژنێ مە تو كریە سەرۆك وەزیران، بێی مە ژی نەشێی چ تشتەكی بكەی».
گوت ژی» پێشبینیێ دكەم ئەمریكا بچیتە شەڕێ ڕاستەوخوە ل گەل ئەوان گرۆپان، هەكە نەچیت چارە نینە، شەڕەكە و یا تووشبوویێ و ل بەردەم دو ئەگەران دا نینە و ئەمریكا نوكە گرۆپ ژی دەستنیشان كرینە، ئانكو ئاخڤتنێن وەزیرێ بەرگریا ئەمریكی ل گەل سودانی د ڕۆهن بوون، كو یان ئەمریكا دێ ل گەل ئەوان گرۆپان چیتە شەڕەكێ ڕاستەوخوە، یان پێدڤیە حوكمەتا ئیراقێ بخوە وێ چەندێ بكەت، چونكە وەزیرێ بەرگریا ئیرانێ ب ڕاشكاوانە دبێژیت هێرشان ڕابگرن، ئەگەر نە مە مافێ بەرسڤدانێ دێ هەبیت».
بابەكر زێباری دیاركر ژی كو د ڕەوشا نوكە یا ئیراقێ دا هەموو پێشبینی دهێنە كرن و دبیت ژ نشكەكێڤە ئەو گرۆپە هێرشێ بكەنە سەر هێزێن ئەمریكی و بالیۆزخانەیا ئەمریكی، ل پشت ئەوان گرۆپان بڕیارا هەرێمایەتی هەیە، ئەڤە د كرێگرتی نە، مخابن ئەو دخوازن هەرێما كوردستانێ تێكهەلی د ئەڤی شەڕی بكەن، بەلێ خەلكێ كوردستانێ پشتڕاست دكەین كو ئەم د پاراستی نە و پێدڤیە سەرۆك وەزیرێن ئیراقێ بەرسڤا گەلەك پرسیاران بدەت».
ل دووماهیێ گوت» ڕاستە ئیراقێ هێز هەیە، بەلێ ڕادەستی سەركردایەتیا میلیشیان كریە و ڕۆل نەمایە، ب ڤی حالەتی پێشبینیێ دكەم هەكە ئەمریكا بچیتە دناڤ شەڕی دا، دێ هێزێن زێدەتر هنێریتە ئیراقێ».