ئەڤرۆ نیوز:
ئەڤرۆ سەرۆک مەسعود بارزانی پێشوازی ل مارتین وار کونسولێ گشتی یێ بریتانیا ل هەرێما کوردستانێ کر و د هەڤدیتنەکێ دا بەحسێ رەوشا گشتی یا عیراقێ و هەرێما کوردستانێ و گوهۆرینێن ل دەڤەرێ هاتە کرن.
کونسولێ گشتی یێ بریتانیا راگەهاند کو ئەرکێ وی وەکو کونسولێ گشتی ل هەرێما کوردستانێ ب دووماهی هاتیە و سوپاسیا سەرۆک بارزانی و هەرێما کوردستانێ کر کو د دەمێن بۆری دا پشتەڤانیا وی کرینە.
ل هەمبەر دا سەرۆک بارزانی سوپاسیا کونسولێ گشتی یێ بریتانیا کر و هێڤی خواست کو د ئەرکێ خوە یێ نوو دا سەرکەفتی بیت.
ئەڤرۆ نیوز، مەحمود نھێلی:
ژ ئەنجامێ درووست بوونا روودانەکا ئاگری ل سەنتەرێ ناحیا دێرەلۆک نیڤرۆ یا ئەڤرۆ 26/6/2019 دوکانەکا کەرەستەیێن جوانکاریێن ترۆمێلان ب تمامی ھاتە سوتن.
بەرپرسێ بنگەھێ بەرەڤانیا باژێری ل دێرەلۆک بۆ ئەڤرۆ نیوز دیار کر، کو تیمێن وان ھەر چەندە یێن مژیلی ڤەمراندنا رووانا ئاگرەکی پیش و
پەلەخی بووینە لی د زووترین دەم دا گەھشتنە جھێ روودانێ و شیان کونترول بکەن و نەھێلن زیان بگەھنە دوکانێن دەوروبەران.
ناڤھاتی دیار ژی کر، کو زیانێن زۆر گەھشتنە دوکانێ کو پرانیا کەرەستەیێن دناڤ دا ھاتینە سوتن.
ئاشکرا کر، چێدبیت ئەڤ روودانە ژ ئەنجامێ شورتەکا کارەبێ یان ژی پەقینا بوتلەکی بێھنێ دروست ببیت.
ئه‌ڤرۆ نيوز:
فازل ميرانى، به‌رپرسێ مه‌كته‌با سياسى يا پارتى ديموكراتى كوردستان به‌رسڤا گۆتنێن سه‌عدى ئه‌حمه‌د پيره دده‌ت ل دۆر وێ چه‌ندێ كو پارتى بزاڤێ دكه‌ت سه‌رۆك بارزانى وه‌كو مه‌رجه‌عێ هه‌موو كوردان بدانيت.
د ته‌وه‌ره‌كێ دى يێ ديدارا خوه ژى دا فازل ميرانى بۆ راديۆيا ده‌نگێ ئه‌مريكا به‌حس ل كه‌ركووك دكه‌ت و ئاماژێ ب وێ چه‌ندێ دكه‌ت كو هنده‌ك ژ براده‌رێن ئێكه‌تيێ كه‌ركووك كو دلێ كوردستانێ يه ئينا ده‌ر و دا ده‌ست هنده‌كێن دى و نها نشته‌رگه‌ريان بۆ دكه‌ن و ده‌رزيان بۆ ددانن و دبێژنه مه وه‌رن چاره كه‌ن.
ئه‌ڤرۆ نيوز:
جڤاتا نشتيمانى يا بزاڤا گۆڕأن بۆ ئێكلاكرنا ناڤێن چار وه‌زيرێن بۆ كابينا نوو يا حوكمه‌تا هه‌رێما كوردستانێ، رۆژا پێنجشه‌مبى ل باژێرێ سلێمانيێ دێ كۆم بيت.
ب گۆره‌ى ميديا بزاڤا گۆڕان، د كۆمبوونا جڤاتا نشتيمانى يا بزاڤا گۆڕأن دا، ناڤێ چار به‌ربژاران ئێكلا كه‌ت كو بڕياره د كابينا نوو يا حوكمه‌تا هه‌رێما كوردستانێ ب سه‌رۆكاتيا مه‌سرور بارزانى دا پۆستێن وه‌زارى وه‌رگرن.
هه‌ر وه‌سان د كۆمبوونا جڤاتا نشتيمانى يا بزاڤا گۆڕان دا، 11 به‌ربژێر ژ لايێ لژنێ ب سه‌رۆكاتيا رێكخه‌رێ گشتى يێ بزاڤا گۆڕان هاتينه ئاماده‌كرن، دانوستاندن دێ ل سه‌ر سيڤيان هێته كرن و چار كه‌س بۆ پۆستان دێ هێنه هه‌لبژارتن دا كو راده‌ستى سه‌رۆك وه‌زيرێ راسپاردى يێ هه‌رێما كوردستانێ بكه‌ن.
ئەڤرۆ نیوز، عەلی حاجی:
ب گورەیی ئامارەکا رێڤەبەریا ھاتنوچوونا قەزا زاخۆ، د ماوەیێ 48 دەمژمێران دا چار روودانێن ھاتنوچوونێ رووداینە و نەھـ کەس ژی د وان روودانان دا بریندار بووینە.
کومیسەر بەشیر یوسڤ، ژ راگەھاندنا ھاتنوچوونا قەزا زاخۆ بۆ ئەڤرۆ نیوز ئاشکەرا کر د ماوێ 48 دەمژمێرێن بوری دا ل سنورێ رێڤەبەریا وان چار روودانێن ھاتنوچوونێ ھاتینە تومار کرن، ژ وان روودانان ژی ئێک د ناڤ سەنتەرێ باژێری زاخۆ دا بوو، سێ روودانێن دیتر ژی ژ دەرڤەی سەنتەرێ باژێری بوو، روودانەک ژ وان روودانا وەلاتیێن باکوورێ کوردستانێ بوون کو د ناڤبەرا دو ترۆمبێلێن بارھەلگر دا بۆ کو دو شوفێر بریندار ببوون، ب مخابنی ڤە د وان چار روودانان دا نەھـ کەس بریندار بووینە.
کومیسەر بەشیر یوسڤ ل دۆر ئەگەرێ روودانان ژی گۆت: ھەموو روودان ژی ژ ئەگەرێ ب لەز ھاژۆتنا ترۆمبێلێ بووینە و شوفێران لەزاتیەکا بێ سنور ب کار ئینایە.
ئه‌ڤرۆ نيوز:
بڕياره ئه‌ڤرۆ پارتى ديموكراتى كوردستان و ئێكه‌تى نشتيمانى كوردستان، ده‌رباره‌ى دانانا پارێزگاره‌كى بۆ كه‌ركووكێ و پێكئينانا كابينا نوو يا حوكمه‌تا هه‌رێما كوردستانێ كۆم بن.
خالد شوانى، ئه‌ندامێ سه‌ركرداتيا ئێكه‌تيێ و ئه‌ندامێ كۆميتا ئاسايكرنا كاودانان ل كه‌ركووك، بۆ كوردستان 24 راگه‌هاند، دوهى مه‌كته‌بێن سياسى يێن ئێكه‌تى و پارتى په‌يامێن ئه‌رێنى لێك گوهاڕتن، بڕياره ژى ئه‌ڤرۆ هه‌ردولا كۆم ببن.
ئاماژه ب وێ چه‌ندێ ژى كريه كو گرنگه پارتى و ئێكه‌تى ل سه‌ر ناڤه‌كى رێك بكه‌ڤن بۆ پارێزگارێ كه‌ركووك، يێ نشتيمانپه‌روه‌ر بيت و ژ هه‌موو لايان پشته‌ڤانى لێ بهێته كرن دا كو يێ هاريكار بيت بۆ ڤه‌گه‌راندنا كاودانێن كه‌ركووك بۆ ره‌وشا وێ يا ئاسايى.
خالد شوانى، هيڤى خواست كو لايه‌نێن كوردستانى د ئێك رێز بن د پێناڤى وێ چه‌ندێ دا كو گه‌ف ل سه‌ر ده‌ستكه‌فتێن كوردان بهێنه دوورخستن.
هه‌ر ب گۆره‌ى پێزانينێن ل به‌ر ده‌ست ته‌وه‌ره‌كێ دى يێ كۆمبوونا ئه‌ڤرۆ يا پارتى و ئێكه‌تيێ، دێ پێكئينانا كابينا نه‌هێ يا حوكمه‌تا هه‌رێما كوردستانێ بيت.
ئەڤرۆ نیوز، عەلی حاجی:
سەرۆکێ باژێرڤانیا قەزا زاخۆ بۆ ئەڤرۆ نیوز ئاشکرا کر، ئەو د دەمەکێ نێزیک دا دێ دەست ب رێکخستنا بەرلێڤێن خابیری کەن و دبێژیت: د پلانا مە دایە دو پرێن پیادە یێن داری ل سەر خابیری دروست بکەین کو دو گەرەک و دو پارکان دێ پێکڤە گرێدەن.
بژار مونیب، سەرۆکێ باژێڕڤانیا قەزا زاخۆ د داخویانیەکێ دا دیار کر، د بەرنامێ وان دایە د دەمەکێ نێزیک دا دەست ب رێکخستنا بەرلێڤێن خابیرێ زاخۆ بکەن، ھەر ژ باژێرڤانیا زاخۆ ھەتا پرا خانی و گۆت: “بۆ ھەردو لایێن خابیری دێ ستاندجیداری دانین، ھەردیسا د پلانا مە دایە ھەر ژ پرا خانی ھەتا دگەھیتە پارکا لایێ دیێ ئاڤێ کو دبێژنێ تاخێ جوھیان، پرەکا داری یا پیادە بھێتە دروستکرن، د گەل دا ژی پرەکا دی یا پیادە ژ پارکا تاخێ جوھیان ھەتا دگەھیتە پارکا دانعەمران بھێتە دروستکرن، ب ڤی رەنگی پرا خانی و یا ناڤ بازاری و د گەل دا دو تاخ و دو پارک دێ پێکڤە ھێنە گرێدان و وەلاتی ژی دشێن ل سەر خابیری پەیاسێ بکەن، ئەڤ چەندە ژی دێ جوانیەکا دیتر دەتە وان تاخان، ژ بەکو جھێن شوونواری ژی ل وان تاخان ھەنە و ئاڤا خابیری ژی تێدا دەرباز دبیت”.
ناڤھاتی گۆتژی: “ئەم د نوکە دا چاڤەڕێی پێشینەیا ھەیڤانەینە یا باژێرڤانیا زاخۆ، ژ بەرکو ئەڤ کارە دێ ب پێشینەیا باژێرڤانیا زاخۆ ھێتە ئەنجامدان، راستەوخو ژی ئەڤ پرۆژە دێ ژ لایێ مەڤە ھێتە بجھئینان، ھەرچەندە ئەو پارێ دھێت یێ کێمە، بەلێ ب وی پارەی دێ شێین چەندین پرۆژە و کارێن باش بۆ باژێرێ زاخو َئەنجام دەین”.
ئه‌ڤرۆ نيوز:
جێگرێ سه‌رۆكێ په‌رله‌مانێ عيراقێ دياركر، ل گه‌ل پارێزگه‌هێن دى يێن عيراقێ، هه‌لبژارتنێن جڤاتا پارێزگه‌ها كه‌ركووكێ دێ هێنه ئه‌نجامدان.
گۆت ژى” كێشێن كه‌ركووكێ وگه‌فێن تيرۆرێ وفره‌پێكهاته‌يى يا وێ پارێزگه‌هێ، ژ مه دخوازيت كو كارێ جدى بكه‌ين تاكو هه‌لبژارتن ل كه‌ركووكێ بهێنه ئه‌نجامدان”.
دياركر ژى” ل گه‌ل پارێوگه‌هێن دى، ل دووماهيا سالا 2020 دێ هه‌لبژارتن ل كه‌ركووكێ هێنه ئه‌نجامدان”.
ئه‌ڤرۆ نيوز:
وه‌زيرێ چاندنێ وژێده‌رێن ئاڤێ ب وه‌كاله‌ت ل هه‌رێما كوردستانێ، رێباز حه‌ملان سێ بريار ل دۆر رێكخستنا بازارى وبهايێ هێكا ده‌ركرن وراگه‌هاند، پێدڤيه گرنگيدان ب كه‌رتێ چاندنێ بهێته دان بۆ ڤه‌ژاندنا ژێرخانا ئابوورى ل هه‌رێما كوردستانێ.
ل دووڤ رۆهنكرنه‌كا وه‌زارتا چاندنێ، دێ وه‌زاره‌تا ناڤخوه ژى هێته راسپارد بۆ وێ چه‌ندێ كونترۆلكرنا هاورده‌كرنا هێكا بكه‌ت تاكو ب رێێن نه قانوونى نه‌هێنه د ناڤ هه‌رێما كوردستانێ دا.
سێ بريارێن هاتينه ده‌ركرن ژى بۆ رێكخستنا بازارى وبهايێن هێكا ب ڤى شێوه‌ى نه:
- ئه‌نجامدانا كۆمبوونه‌كێ د ناڤبه‌را رێڤه‌به‌ريا گشتى يا پلاندانانێ ودووڤچوونێ ورێڤه‌به‌ريا گشتى يا سامانێن ئاژه‌لى وڤيتێرنه‌رى ب به‌رهه‌ڤبوونا رێڤه‌به‌رێن سامانێن ئاژه‌لى ل پارێزگه‌هێن هه‌رێمێ وخودانێن پرۆژێن ب خودانكرنا مريشكان بۆ به‌حسكرنا بابه‌تێ به‌رهه‌مێ هێكێ ورێكخستنا بازارى ودابينكرنا پێدڤيێن خودانێن وان پرۆژان ودياركرنا بهايێ هێكا.
- پێكئينانا لژنه‌كا تايبه‌ت ل رێڤه‌به‌ريا گشتى يا سامانێن ئاژه‌لى وڤيتێرنه‌رى ب مه‌ره‌ما سه‌ره‌دانا وه‌زاره‌تا چاندنێ يا عيراقى بۆ يه‌كخستنا رێنمايێن هاورده‌كرنا هێكا وبه‌رچاڤ وه‌رگرتنا پاراستن وپێشڤه‌برنا به‌رهه‌مێ ناڤخوه.
- ئاگه‌هداركرنا وه‌زاره‌تا ناڤخوه ولايه‌نێن په‌يوه‌نديدار بۆ توندكرنا خالێن سنوورى ورێگرتنێ ل هاورده‌كرنا هێكا ب رێێن نه قانوونى ژبه‌ر هه‌بوونا مه‌ترسيێ ل سه‌ر ساخله‌ميا وه‌لاتيان.
ئەڤرۆ نیوز، لەزگین جوقی:
رێڤەبەرێ فەرمانگەھا ژینگەھا دھۆکێ دیار کر کو ٩٧ جھێن موەلیدێن کارەبێ ل سەرانسەری دھۆکێ ھەنە ژوان ژی ٩٤ جھێن موەلیدان د پیس بوون ئەو ژی پشتی پشکنینا گازوائیلا وان ژ لایێ رێڤەبەریا گازی و نەفتی ل دھۆکێ ھاتیە کرن د ڤان ھەر ٩٧ جھێن موەلیدان دا ٥٢٥ موەلێدین کارەبێ ھەنە و بتنێ ١٤ موەلیدە گازا پاقژ ل دووڤ ستاندەران بکاردئینن.
مەحمەد تاھر بریفکانی، رێڤەبەرێ فەرمانگەھا ژینگەھا بۆ ئەڤرۆ نیوز دیار کر کو پشتی وان دووڤچوون ل سەر جۆری گازوائیلا موەلیدە بکاردئینن کری دەرکەفت گازا پیس بکاردئینن، چونکو بھایێ وێ یێ ئەرزانە و خۆدانێن موەلیدان بکاردئینن و ئەڤە دبیتە ئەگەرێ زیانێ ل سەر ژینگەھێ و ساخلەمیا وەلاتیان و گۆت: “ھەکە نوکە زیان دیارنەبن دێ د پاشەرۆژی دا دیاربن، پێدڤیە ئەم رێگریێ ل وان بکەین بۆ پاراستنا بەژەوەندیا خەلکێ خوە و نەھێلین ژینگەھا مە بھێتە پێس کرن”.
ناڤھاتی ئاماژە دا وێ چەندێ کو ئەڤ موەلیدێن کارەبێ یێن رۆژانە ل دھۆکێ کار دکەن بۆ دابینکرنا کارەبی دێ ئاریشێن ساخلەمیێ بۆ خەلکێ دھۆکێ دروست کەن، ھەکە نوکە نەبیت دێ پاشەرۆژێ دیاربیت، چونکو پتریا وان موەلیدێن کارەبی گازوائیلا پێس بکاردئینن، ھەکە گازوائیلا وان نەھێتە کونترۆلکرن دێ گەلەک ئاریشە ژێ دروست بن و گۆت: “پشتی پشکنین ھاتیە کرن ژ سەرجەمێ ٥٢٥ موەلیدان بتنێ ١٤ موەلیدە گازوائیلا پاقژ بکاردئینن یێن دی ژی ھەموو گازوائیلا پێس بکاردئینن و دووکێلەکا سوور ژ موەلیدان دەرکەڤیت و کارتێکرنێ ل ژینگەھێ دکەن”.
نيشاندان
