دیدار، سالار محەمەد دۆسكی:
ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان ئاشكراكر كو هەتا نوكە سەردەریا حوكمەتا ئیراقێ ل گەل دەڤەرێن مادەیێ 140 یا زەلال نەبوو و تایبەت قەزا شێخان و ستەمەكا مەزن ل سەر هەبوویە و تایبەت ژ ڕوویێ ئەنجامدانا پڕۆژەیان لەوما چەندین پێنگاڤ ل سەر ئاستێ وەزارەتان دڤی بیاڤی دا هاڤێتی نە.
كاڤین شێخ سەعید، ئەنداما جڤاتا نوونەرێن ئیراقێ و نوونەرا دەڤەرێن كوردستانی یێن ژ دەرڤەی ئیدارا هەرێمێ ل پارێزگەها نەینەوا ژ فراكسیوونا پارتی دیموكراتی كوردستان بۆ ڕۆژنامەیا (ئەڤرۆ) گوت» ل دەمێ بۆری مە شیایە گەلەك پڕۆژەیان بۆ دەڤەرێن خوە ب دەست ڤە بینین و ژ پڕۆژەیێن هەرە گرنگ دروستكرنا جادەیا (بەدریك – باعەدرێ) كو ل سالێن (2010- 2017 – 2019) هاتبوو داخازكرن و ڕازیبوون ل سەر نەدهات چونكە بەغدا دگوت هەرێما كوردستانێ مفای ژ ئەڤێ جادەیێ دبینیت و ڕازیبوون ل سەر نەدا، ل خزیرانا سالا 2022 من سەرەدانا وەزارەتا ئاڤەدانكرنێ ل بەغدا كر وی دەمی خانم (نازەنین) وەزیرا وەزارەتا ناڤبری بوو كو درێژاهیا جوت سایدێ ب درێژیا (22)كم و ب گۆژمەیێ (31) ملیار و 63 ملیون دیناران بوو، ژ جادەیێن گرنگە وی دەمی گەلەك دەم نەمابوو هەموو وەزیر دا هێنە گوهۆڕین، دیسا پشتی ڕازیبوونێ مە سەرەدانا وەزارەتا پلاندانانێ كر و مە خواست ئەڤ پڕۆژە بكەڤیتە د ناڤا پلانا وەزارەتێ دا چونكە چەندین سالە هاتنوچوون تێدا دهێتەكرن و گەلەك وەلاتی بووینە قوربانی ڤێ جادەیێ و نوكە كارێ ل سەر دهێتەكرن و دیسا پێدڤی بوو كارەبا جادەیێ ژی بهێتە گوهۆڕین و دیسا مە سەردانا وەزارەتا كارەبێ كریە و گوژمەیێ 250 ملیون دینار بۆ هاتینە تەرخانكرن و ئەو ژی دێ كەڤیتە كاری، دیسا پڕۆژەیێ شەلالات – شێخان – نەوەران ئەو جادە ب درێژیا 21 كم ژ جادەیێن گرنگە و 12 ملیار و 500 ملیون دینار بۆ هاتینە تەرخانكرن و ئەڤە ژی ل سەر داخازا من بوویە بۆ خەلكێ دەڤەرێ بهێتە دروستكرن».
كاڤین شێخ سەعید ئەوژی گوت» د دیفچوونێن مە دا ل سەر ڕەوشا كارەبێ ڕازیبوون بۆ دانانا وێسگەهەكا كارەبێ یا 33 KV ل ئەلقۆش ب گوژمەیێ پێنچ ملیار و 620 ملیون دیناران، ل شێخان ب هەمان شێوە 132 KV ب گوژمەیێ 40 ملیار، دیسا داقوق 132 KV ب گوژمەیێ 20 ملیار، قەزا شنگالێ ژی 132 KV و د هەمان دەم دا ویسگەهەكا KV 132 ل مەخمور ژی مە ب دەست ڤە ئینایە، ڕازیبوون ل سەر ئینانا هەژمارەكا پێگوهۆرك و ستینان بۆ كارەبا دۆمیز ل فەیدیێ و زێدەباری باشتركرنا كارەبا گوندێن(وەلید، ئوم ڕەبیعین، تل زیبان، عوێنە، ماسكە، كلهی،عەلی عەبار) و بدەستڤە ئینانا (600) پارچەیێن بلاجكتورا بۆ (شێخان، ئەلقۆش، دۆمیز، فەیدیێ، تەل عەدس و منارە) زێدەباری چێكرنا جادەیێن چەندین گوندان ل دەڤەرێن ناڤبری هەروەسا مە ڕازیبوونا دانانا بنگەهەكێ ساخلەمیێ ل فەیدیێ ب دەستڤەئینایە و ڕازیبوون بۆ ئاڤاكرنا نەخوەشخانەیەكا 100 تەختی ل شێخان و زێدەباری پێدڤیان بۆ نەخوەشخانەیا شێخان كو بتنێ شیانێن حەواندنا 12 نەخوەشێن گولچیسكان هەبوون مە داخازكریە هەژمارا تەختان بۆ 24 تەختان بهێنە زێدەكرن و داخازكرنا چەندین ئامیران و ئەو نەخوەشخانە بهێتە بەرفرەهكرن وپشكا ژدایكبوونێ بهێتە بەرفرهكرن و قاتێ دویێ بهێتە ئاڤاكرن، زێدەباری داخازكرنا ئاڤاكرن و نووژەنكرنا چەند قوتابخانە و باغچەیێن زارۆیان ل دەڤەرێن جودا جودا و ڕازیبوونا چێكرنا پرەكێ ل شێخان و بۆ دروستكرنا جادەیا شێخان بۆ پەرستگەها لالش ب درێژاهیا 10 كم مە ڕازیبوون وەرگرتیە و مە داخازا مولیدەكێ ژی بۆ یاریگەها شێخان كریە و ڕازیبوون ل سەر هاتیە».
كاڤین شێخ سەعید دیاركر ژی» بۆ ئەنجامدانا ئەڤان كاران مە خواستیە گەنجێن دەڤەرێ بكار بكەڤن و دیسا ترۆمبێل و ئامیرێن خەلكی ل سەر كاربكەن، هەروەسا من ڕازیبوون ل سەر وەرگرتنا مووچەیێن چاڤدێریا جڤاكی بۆ سێ هزار خێزانان وەرگرتیە ونوكە هندەكا وەرگرتیە و هندەك ژی یێ كارێن خوە تەمام دكەن».
ئەو ژی دیاركر كو هەر دەم بۆ دەڤەرێن مادەیێ 140 بەهرا پانزینێ كێم دهێتە هنارتن و ئەو خەلكێ زیان ڤێكەفتی یە و بەغدا گەلەك جاران دبێژیت ئەڤ دەڤەرە سەر ب هەرێما كوردستانێ ڤە نە، بەلێ گرنگە ئیراق چەوا بۆ پارێزگەهێن دی دابین دكەت پێدڤیە ب وی شێوەی بۆ ئەڤان دەڤەران ژی دابین بكەت و مە دووفچوون كریە و ئەوان دەڤەران پلێتەكا گازا سپی وەرگرتیە و چاڤەرێی وەرگرتنا پلێتا دویێ نە».
هەروەسا دبێژیت» وەزارەتا كارەبێ داخاز ژ وەزارەتا پەترۆلێ كریە كو گازێ بۆ وەلاتێ ئیرانێ ڤرێكەت دا بەرامبەر غازێ بدەتە ئیراقێ تاكو بۆ كارەبێ بهێتە بكارئینان، وەزارەتا كارەبا ئیراقێ ژی لژنەیەك هنارتیە هەرێما كوردستانێ ب وێ مەرەمێ دا بزانن كا هەرێما كوردستانێ چەوا كارەبا كارت بەلاڤكریە و هەروەسا چەوا قانوون و ڕێنمایێن كارەبێ داناینە و دا مفای ژ ڤێ ئەزموونێ وەربگریتو پتریا كارەبا پارێزگەها نەینەوا ژ هەرێما كوردستانێ دهێتە دابینكرن، حوكمەتا ئیراقێ پلان هەیە كارەبێ ب تیشكا ڕۆژێ دابین بكەت بەلێ مە كێشەیا كێمبوونا ئەردی هەیە و ئەڤێ چەندێ پێدڤی ب ئەردەكێ بەرفرهە هەیە چونكە ل هندەك پارێزگەهان سەركەفتنێ نائینت چونكە ئەو ڕۆژا گەلەك زێدە كارتێكرنێ ل سەر شاشێ دكەت و شاشە خوە ب دروستی ب كارێ خوە نارابیت و دیسا توزێ ژی كارتێكرنا خوە ل سەر هەیە و گەلەك ئالوزیێن دی ل سەر كارەبا ئیراقێ هەنە».
كاڤین شێخ سەعید دیاكر ژی» هەتا نوكە چ ڕێگری ژئالیێ چ وەزارەتان ڤە ل سەر نەهاتیەكرن و بەلكو دەرگەهێن وەزارەتان د ڤەكرینە بتنێ بۆ پڕۆژەیێن ڕێكا بەدریك – باعەدرێ و وێستگەها شێخان ئاستەنگ بۆ من هاتنە چێكرن و ئەوان دگوت ڕازیبوونێ نادەین چونكە سەر ب هەرێما كوردستانێ ڤە نە و پشتی من گەف ب ڕاگەهاندنێ لێكرین كو دێ بەلاڤكەین و بێژین داگیران ژڤان ئەردان بۆ هەرێما كوردستانێ هاتیە كرن، لەوما ئەو ڕازیبوون ل سەر ئەنجامدانا ئەڤان پڕۆژەیان».
ڤێ ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕۆهنكر ژی»حوكمەتا بەغدا ڕازیبوون ل سەر وەرگرتنا 375 تەنێن گەنمی دابوو كو ژ هەرێما كوردستانێ وەربگریت و من داخازیەك ژ محەمەد شیاع سۆدانی، سەرۆك وەزیرێن ئیراقێ كر كو دەڤەرێن كوردستانی گەلەك باران دهێت نە وەكو پارێزگەهێن ئیراقێ نە كو بارانێن گەلەك كێم بن و من داخاز كر ئەو رێژەیا وەرگرتنا گەنمی بهێتە زێدەكرن و مە داخاز كر بیتە 600 تەن ل شوینا 375 تەنا و ڕازیبوون ل سەر 500 هزار تەنا كر».
كاڤینێ ئەو ژی ئاشكراكر كو من داخاز كریە قەزا شێخان ژی وەكو هەر قەزایەكا ئیراقێ سەرەدەری ل گەل بهێتەكرن چونكە گەلەك جاران بۆ هەوێن هەلبژارتنان ئەو دبێژن شێخان سەر ب هەرێما كوردستانێ ڤەیە و گەلەك جاران من داخازا پڕۆژەیان بۆ شێخان كریە و دهاتنە ڕەدكرن و پشتی من دووفچوونەك ل سەر كری دیار بوو 98610 كەس پلێتا وان سەر ب پارێزگەها نەینەوا ڤە یە و د ڤیابا پڕۆژە ب ڕێژەیا 100% ل قەزا شێخان هاتبانە بجهئینان بەلێ بتنێ پڕۆژە ب ڕێژیەیا 40% بۆ دهاتنە دابینكرن و من داخاز ژ وەزیرێ پلاندانانێ ل ئیراقێ كریە قەزا شێخان ژبن ڤێ ستەمێ دەربێخن وبوچی بۆ دەنگدانێ دهێن و داخازا دەنگان دكەن و بۆ ئەنجامدانا پڕۆژەیان ژی ئەوان ماف نەبیت».
نيشاندان