سەرۆكێ ڕێكخراوا دووربین بۆ پرسێن سیاسی و ئابۆری ئاماژە ب ڤێ چەندێ دكەت حوكمەتا ئیراقێ یا پێگیر نینە ب وان ڕێكەفتنێن دگەل حوكمەتا هەرێما كوردستانێ هاتینەكرن و هندەك گڤاشتنێن سیاسی ل سەر هەرێما كوردستانێ هەنە بۆ بجهئینانا ئەجێندایێن دەرەكی. هەروەسا دبێژیت، ئەوێن دگوت بلا هەرێما كوردستانێ پەترۆل و داهاتی خوە ڕادەستی بەغدا بكەت و دێ جیهان بیتە شاما شەریف، بەرپرسیارن ژ ڤێ ڕەوشێ.
د. نەوزاد عەزیز، سەرۆكێ چاڤدێرێ سیاسی و سەرۆكێ ڕێكخراوا دووربین بۆ پرسێن سیاسی و ئابۆری بۆ ڕۆژنامەیا (ئەڤرۆ) گوت» پرسا هنارتنا مووچەیێن فەرمانبەرێن هەرێما كوردستانێ ژئالیێ بەغدا ڤە بوویە پرسەكا سیاسی و حوكمەتا ئیراقێ یا پێگیر نینە ب ڕێكەفتنێن دگەل حوكمەتا هەرێما كوردستانێ هاتینە ئیمزاكرن، چونكە هەكە ڕێكەفتن بهێنە بجهئینان و حوكمەتا فیدڕال یا پێگیربیت ب قانوونا بودجەی، هنارتنا پشكا بودجێ هەرێما كوردستانێ نە منەتە ل خەلكی دكەن بەرۆڤاژی پشكا ئەڤسالە یا هەرێما كوردستانێ ١٦ ترلیۆن و ٣٠٠ ملیۆن دینارن ، ئاخڤتنێن سەرۆك وەزیرێن ئیراقێ محەمەد شیاع سودانی ژی تشتەكێ گەلەك باشبوو دەمێ گوتی مووچە نینە د ناڤا قانوونا بودجەی دا، چونكە مە مووچە نینە ڕاستە، بەرۆڤاژی پشكا بودجێ هەرێما كوردستانێ هەیە و د چوارچۆڤەیێ پشكا هەرێمێ دا مووچێ فەرمانبەران تێدایە، مخابن نوكە مووچە كریە بابەتەكێ سیاسی ل هەمبەر هەرێما كوردستانێ، ب تایبەتی ئیران گڤاشتنان دكەتە سەر هەرێما كوردستانێ تاكو حزبێن ڕۆژهەلاتێ كوردستانێ دەر بكەت و ب ڤێ ڕێكێ مووچە دهێنە ڕاگرتن و ب ڕێكا بەغدا هەرێمێ تەنگاڤ دكەت بۆ بجهئینانا ئەجێندایێن خوە، ئەڤەژی هەتا هەرێما كوردستانێ تووشی ئاریشەیێن ناڤخوەیی ببیت و خەلك بێزار ببیت و گڤاشتنان ل حوكمەتا هەرێمێ بكەن تاكو داخوازیێن ئیرانێ بجهبینیت و د هەمبەردا بەغدا مووچەیێن فەرمانبەران بمەزێخیت».
سەرۆكێ ڕێكخراوا دووربین گوت ژی» ئەوێن د گۆتن بلا هەرێما كوردستانێ پەترۆلێ و داهاتێ ناڤخوەیی ڕادەستی بەغدا بكەت هەر دو مەهان پێگیر بیت دێ جیهان بیتە شاما شەریف و مووچە و بودجە و هەموو تشتەك دێ ژئالیێ بەغدا ڤە هێنە هنارتن بەرپرسن ل ژ ڤێ ڕەوشێ، چونكە ئەم دزانین بەغدا یا پێگیر نینە ب ڕێككەفتن و سۆزێن خوە هەمبەر خەلكێ هەرێما كوردستانێ، هەتا هندەك پەرلەمانتار و كەسایەتیێن هەرێمێ داتایێن شاش داینە بەغدا ل دۆر پەترۆلێ و داهاتێ ناڤخوەیی».
د. نەوزاد عەزیز ئاماژەكر» ئێكڕێزی مەرجە بۆ كوردان ناڤمالا خوە بكەنە ئێك و ب ئێكدەنگ و دەست كار بكەن بۆ بدەستڤەئینانا مافێن گەلێ كورد ل بەغدا، مخابن ئەز باوەرم ئەو ئێكڕێزیا نوكە هەی سەرناگریت هەتا دوماهیێ، چونكە هندەك ئالیێن كوردستانێ ئەجێندایێن دەرەكی بجه دئینن و گرێدای سیاسەتا دەرڤەنە، هندی كورد ئێكگرتی بن هەر كێمە،ژ بەر كو بەرهەمێ ئێكڕێزیێ مەیێ دیتی ل ٣٠ سالێن بۆری چەندین دەستكەفت هەبووینە، بەلێ چو گەرەنتی بۆ ئێكگرتنێ ژی نینە و ئەو پەرت و بەلاڤبوون و تێكچوونا د ناڤبەرا ئالیێن سیاسی دا هەی كاریگەریێن خراپ ل سەر بەرژەوەندیێن گشتی هەبووینە».

قونسلخانەیا بریتانیا ل هەرێما كوردستانێ سەبارەت ڕێككەفتنا د ناڤبەرا بەغدا و هەولێرێ دا ل سەر پرسا بودجەی ڕاگەهاند، ئەڤە پێنگاڤەكا گرنگە بۆ ژیار و سەقامگیریا هەرێما كوردستانێ.
قونسلخانەیا بریتانیا ل هەولێرێ دیاركر» بریتانیا پێشوازیێ ل ڕێككەفتنا د ناڤبەرا حوكمەتا ئیراقێ و حوكمەتا هەرێما كوردستانێ دكەت ل دۆر دابینكرنا پارەیێ فەرمانبەرێن هەرێما كوردستانێ».
هەروەسا ئاماژەكر» ئەڤە پێنگاڤەكا گرنگە بۆ پاراستنا ژیار و سەقامگیریا هەرێما كوردستانێ».
ئەڤە د دەمەكی دایە كو ل ڕۆژا ئێكشەمبیا بۆری جڤاتا وەزیرێن ئیراقێ ب سەرۆكایەتیا محەمەد شیاع سۆدانی بڕیار دا بۆ دەمێ سێ مەهان گۆژمەیێ دو ترلیۆن و 100 ملیار دیناران بۆ مووچەیێن فەرمانبەرێن هەرێما كوردستانێ بهنێریت كو بۆ هەر مەهەكێ كۆژمەیێ 700 ملیار دیناران بۆ هەرێما كوردستانێ بهنێریت. ئەو بڕیارا جڤاتا وەزیرێن ئیراقێ ژی پشتی وی چەندێ هات كو ل دووماهیا حەفتیا بۆری شاندەكێ بلند یێ حوكمەتا هەرێما كوردستانێ ب سەرۆكایەتیا مەسرور بارزانی سەرۆكێ حوكمەتا هەرێما كوردستانێ بۆ چارەسەریا پرسا مووچەیێن فەرمانبەران و بودجەیا هەرێما كوردستانێ سەرەدانا بەغدا كربوو.

بڕیاردەرێ پشكا هەلبژارتنان یا پارتی دیموكراتی كوردستان ڕادگەهینیت: پارتی دیموكراتی كوردستان بۆ هەردو هەلبژارتنێن پەرلەمانێ كوردستانێ و جڤاتێن پارێزگەهێن ئیراقێ یا بەرهەڤە، بۆ وێ مەبەستێ ژی مە بەرهەڤیێن ئەنجامداین، ب تایبەت بۆ هەلبژارتنێن جڤاتێن پارێزگەهێن ئیراقێ.
نیازی حەمە عەزیز، بڕیاردەرێ پشكا هەلبژارتنان یا پارتی دیموكراتی كوردستان گوت» ب گۆڕەی وان ڕێنمایێن ژ كۆمسیۆنا بلند یا سەربخوە یا هەلبژارتنان ل ئیراقێ دەردچن ئەم ژی كاری ل سەر دكەین، نوكە ئەم زێدەتر مژوولی بەرهەڤیاینە بۆ هەلبژارتنێن جڤاتێن پارێزگەهێن ئیراقێ كو بەری هەلبژارتنێن پەرلەمانێ كوردستانێ دێ هێنە ئەنجامدان، بەلێ بۆ هەلبژارتنێن پەرلەمانێ كوردستانێ وەكو ڕاهێنانێن جۆرا و جۆر مە خوە بەرهەڤكریە، لەوما ئەوا پێدڤی بیت ئەم ژی كار و بەرهەڤیێ دكەین، چونكە كۆمسیۆن ب گۆڕەی قانوونا هەلبژارتنان ڕێنمایێن خوە دەردكەت و پێنگاڤ ب پێنگاڤ كاری ل سەر دكەن، ئەم ژی ل گەل وان دچین، لەوما مە گرفت نینن و د بەرهەڤین».
نیازی گوت ژی» بۆ هەلبژارتنێن جڤاتێن پارێزگەهێن ئیراقێ ئەوا پێدڤی بوو مە ئەنجامدایە و مە بەرهەڤی یێن كرین، لەوما پێشبینی دهێتە كرن دەنگێن باش دوان هەلبژارتنان دا بدەستڤەبینین ب تایبەت ل دەڤەرێن كوردستانی ل كەركووكێ و مووسلێ، لەوما ئەم وەكو پارتی دیموكراتی كوردستان بۆ هەلبژارتنێن پەرلەمانێ كوردستانێ و جڤاتێن پارێزگەهێن ئیراقێ د بەرهەڤین هەر دەمەكێ بهێنە ئەنجامدان».

پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕادگەهینیت: بڕیارا هنارتنا گۆژمەیێ دو ترلیۆن و 100 ملیار دیناران بۆ سێ مەهان بۆ هەرێما كوردستانێ، دەستپێكەكە بۆ بجهئینانا ڕێككەفتنێن سیاسی دناڤبەرا هەرێما كوردستانێ و ئیراقێ دا.
ڤیان دەخیل، پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» بڕیارا ناڤبری گرێدایە ب بزاڤێن چڕ یێن مەسرور بارزانی، سەرۆكێ حوكمەتا هەرێما كوردستانێ بۆ دابینكرنا مووچە و شایستەیێن فەرمانبەرێن هەرێما كوردستانێ ب تایبەت كو بڕیارا نوكە یا تایبەتە ب مەهێن ئیلۆن، چریا ئێكێ و چریا دویێ یا ئەڤسالە ڤە».
ڤیان دەخیل ئاماژەكر» شاندێ دانوستاندكارێ حوكمەتا هەرێما كوردستانێ كو سەرەدانا بەغدا كری ل گەل شاندێ حوكمەتا فیدرال دانوستاندن ل دۆر مووچەیێن هەردو مەهێن تیرمەهـ و تەباخێ ژی كریە، بزاڤا دابینكرنا مووچەیێن وان دو مەهان ژی كر و مەسرور بارزانی سەرۆكێ حوكمەتا هەرێمێ د چارچۆڤەیێ سەرەدانا خوە دا بۆ بەغدا پێداگیری ل سەر مووچەیێن فەرمانبەرێن هەرێما كوردستانێ كریە، لەوما بۆ مووچەیێن هەردو مەهێن حەفت و هەشت ژی چارەسەری هەبوو».
پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕۆهنكر ژی» بڕیارا ڕۆژا ئێكشەمبی یا حوكمەتا فیدرال بۆ هنارتنا گۆژمەیێ دو ترلیۆن و 100 ملیار دیناران بۆ مەهێن ئیلۆن، چریا ئێكێ و چریا دویێ یا ئەڤسالە، دەستپێكەكە بۆ بجهئینانا ڕێككەفتنێن سیاسی دناڤبەرا هەرێما كوردستانێ و ئیراقێ دا».
ڤیانێ دوپاتكر ژی» هنارتنا وی گۆژمەیێ پاری بۆ وان سێ مەهانە كو ئاماژە بۆ هاتیە كرن، پشتی وێ چەندێ ژی دانوستاندن ل دۆر دابینكرنا مووچەیێ مەها 12 یا ئەڤسالە دێ هێتە كرن، كو دوبارە بڕیار دێ كەڤیتە ستوویێ حوكمەتا فیدرال».
خویاكر ژی» هەتا نوكە عەقلیەتەك ل ئیراقێ هەیە، نزانیت و نەڤێت بزانیت ژی فیدرالیەت چیە و پەیوەندیێن فیدرالی د ناڤبەرا بەغدا و هەولێرێ دا چنە».

بەرپرسێن پارتی دیموكراتی كوردستان ل پارێزگەهێن كەركووكێ و نەینەوا دیار دكەن كو پارتی پێشبینیێ دكەت ڤێجارێ ل هەلبژارتنێن جڤاتێن پارێزگەهێن ئیراقێ دەنگێن زۆر ب دەستڤەبینیت، چونكە ژ ئەگەرێ هەستا نەتەوەیی و هەلوەستێن نەتەوەیی یێن پارتی خەلك پشتەڤانیێ ل پارتی دكەن، هەروەسا دبێژن مە بەرهەڤیێن باش بۆ وان هەلبژارتنان كرینە.
مەناف حەسەن، بەرپرسێ هەلبژارتنێن پارتی دیموكراتی كوردستان ل مووسل، دبێژیت» ل ڕۆژا شەمبیا بۆری ب فەرمی هەژمارا لیست و هەڤپەیمانیان هاتە ڕاگەهاندن، هەژمارە 197 ژی لیستا پارتی دیموكراتی كوردستانە، مە ژی دەست ب بەرهەڤیان كریە ل سنۆرێ لقێن خوە، ڤێجارێ دەنگێن باش دێ ب دەستڤەئینین، ل هەلبژارتنێن جڤاتا نوونەرێن ئیراقێ مە 10 كورسی ب دەستڤەئینابوون كو ئێك كورسی ژ مە هاتبوو وەرگرتن و مە 9 كورسی هەنە، ڤێجارێ ژی پێشبینیێ دكەین هەژمارەكا باش یا كورسیان ب دەستڤەبینین، ل نەینەوا ب گشتی مە 52 بەربژار یێن هەین كو ب خوە نەینەوا 26 كورسی هەنە، ژبلی پێكهاتەیان، لەوما پێشبینیێ دكەین نێزیكی هەشت كورسیان ب دەستڤەبینین».
ژ ئالیێ خوەڤە مەسعود مەلا پەروێز، بەرپرسێ پەیوەندیێن لقێ سێ یێ پارتی دیموكراتی كوردستان ل كەركووكێ دبێژیت» پشتی پەسەندكرنا لیستەیان، مە بەرهەڤیێن باش كرینە و مە دەست ب لڤین و سەرەدانان كریە و خەلك ژی بەر ب پارتی ڤە دهێن، چونكە پارتی ل كەركووكێ خوە دكەتە خودانا كێشەیێن نەتەوەیی و خەلك ژی پشتەڤانیێ ل پارتی دكەت، لەوما ڤێجارێ پارتی دێ دەنگێن زۆر ب دەستڤەئینیت، د لیستا پارتی دا دو حزبێن توركمانی و دو حزبێن دی یێن كوردی یێن هەین، لەوما ئەم پێشبینی دکەین كو ڤێجارێ دەنگێن زۆر ب دەستڤەبینین».
ناڤبری باسكر ژی» هەتا نوكە دەست ب هەوا هەلبژارتنان نەهاتیە كرن، بەلێ بەربژار بۆ خوە سەرەدانان ئەنجام ددەن، ئەم پێشتر ژی بەردەوام ل گەل خەلكێ خوە بووین و خەلك ژی پشتەڤانیێ ل پارتی دكەت».

بالیۆزا ئەمریكا ل ئیراقێ بزاڤێن حوكمەتا هەرێما كوردستانێ و حوكمەتا ئیراقێ بۆ گەهشتنێ ب چارەسەریەكێ ل سەر پشكا بودجەیا هەرێمێ و بجهئینانا وێ بلند د هەلسەنگینیت.
ئەلینا ڕۆمانۆسكی، بالیۆزا ئەمریكا ل ئیراقێ، د پێگەهێ خوە یێ تایبەت دا ل تۆرا جڤاكی یا ئێكس (تویتەر یا بەرێ) بەلاڤكر» بزاڤێن حوكمەتا هەرێما كوردستانێ و حوكمەتا ئیراقێ بۆ گەهشتنێ ب چارەسەریەكێ ل سەر بودجەی و بجهئینانا وی، بلند د هەلسەنگینین».
هەروەسا ڕۆمانۆسكی دبێژیت» چاڤەڕێی بەردەوامبوونا دانوستاندنان دكەین، بۆ گەهشتنێ ب چارەسەریا بەردەوام كو د بەرژەوەندیا ئیراقیان دا بیت» .
ل ڕۆژا 14/9/2023 شاندەكێ بلند یێ حوكمەتا هەرێما كوردستانێ ب سەرۆكایەتیا مەسرۆر بارزانی، سەرۆكێ حوكمەتا هەرێما كوردستانێ ل گەل قوباد تالەبانی، جێگرێ سەرۆكێ حوكمەتا هەرێمێ سەرەدانا بەغدا كر و 14 كۆمبوونێن جودا ل گەل سێ سەرۆكایەتیێن ئیراقێ و ئالیێن سیاسی یێن ئیراقی و فراكسیۆنێن كوردستانی ل جڤاتا نوونەرێن ئیراقێ ئەنجامدان و ئەنجامێن وێ سەرەدانێ ژی بڕیارا ڕۆژا ئێكشەمبی یا جڤاتا وەزیرێن ئیراقێ بوو ب دابینكرنا 700 ملیار دیناران بۆ دەمێ سێ مەهان بۆ مووچەیێن فەرمانبەرێن هەرێما كوردستانێ.

چاڤدێرەكێ سیاسی دبێژیت: گەلەك كەس وەسا تێگەهشتینە، كو دروستكرنا ئاریشەیان بۆ بابەتێ شایستەیێن دارایی یێن هەرێما كوردستانێ ژ ئالیێ بەغداڤە ئاریشەیا هەژماران، دارایی و تەكنیكی یە، هەرچەندە ئەز نابێژم بابەتێ بودجەی كێماسی تیدا نینن، یان بەغدا سەركەفتی نەبوویە، ژ وێ چەندێ كو یاریەكا هەژمارەیی یان دارایی یا زیرەكانە ل دژی هەرێما كوردستانێ بكەت، بەلێ، دڤێت ئەوێ ڕاستییێ بزانین، وان هەر ل دەستپێكێ ئەو پلانە دانابوو بۆ وێ چەندێ هەرێمێ تووشی قەیرانا دارایی بكەن و ب چ ڕەنگان پێگیری ڕێككەفتنان نابن، باشە هەكە ئەم بێژێن، كو بابەتێ شایستەیێن دارایی یێن هەرێمێ و ناكۆكی یێن هەرێمێ و بەغدا ب ئەگەرێ ئاریشەیا هەژمارەیی و دارایی و (نەفەقاتێن فێعلی) و تەخمینی بووینە، بەلێ بابەتێ ڕێگریكرنێ ل ڤەگەراندنا بارەگەهێن پارتی بۆ كەركووكێ ب ئەگەرێ ئاریشەیێن هەژمارەیی و دارایی یە یان ب ئەگەرێ شاشیێن تەكنیكینە؟.
د. نەوزاد هێتۆتی، چاڤدێرێ سیاسی و پسپۆرێ زانستێن سیاسی ل زانكۆیا سەلاحەدین ل هەولێرێ بۆ ڕۆژنامەیا (ئەڤرۆ) گوت» ئەرێ ئاساییكرنا ڕەوشا كەركووكێ و دەڤەرێن ڤەقەتیای ب ئەگەرێ تێنەگەهشتنێ یە ب نەفەقاتێن ڕاست و هەژماران و دارایی؟، ئەرێ خوەڤەدزین ژ ڕێككەفتنا ئیدارا دەولەتێ بۆ ئاساییكرنا بابەتێ شنگالێ ب ئەگەرێ ئاریشەیا هەژماران و دارایی یە؟، ئەرێ ڕێكگرتن ژ وێ چەندێ كو دوبارە هەرێما كوردستانێ پەترۆلا خوە ب هنێریتە ژ دەرڤە، ب ئەگەرێ ئاریشەیا هەژماران و دارایی یە؟، ئەرێ بزاڤكرن كو ل دووڤ ڕێككەفتنا هەڤپەیمانیا ئیدارا دەولەتێ قانوونا پەترۆلێ و غازێ ل جڤاتا نوونەران بهێتە دەربازكرن، ب ئەگەرێ ئاریشەیا هەژماران و تینەگەهشتنێ یە ل (نەفەقاتێن فێعلی) و تەخمینیی، بەرسڤا ڤان هەموو پرسیاران نەخێرە، چونكی ئاریشە ئەوە، كو بەغدا چ نیاز نینن ڕێزێ ل مافێن دستووری یێن هەرێما كوردستانێ بگریت و ئەوا بەغدا دكەت یاریەكا سیاسی یە ل دژی هەرێما كوردستانێ و هەر دەمێ چ بەهانە نەمان، ژ ڕوویێ قانوونی ڤە بۆ دروستكرنا ئاریشەیان ل گەل هەرێمێ، دێ پەنایێ بەتە دادگەها فیدرالی یا بلند بۆ لێدانا قەوارەیێ دستووری یێ هەرێما كوردستانێ».

سەرۆك مەسعود بارزانی ل سەلاحەددین پێشوازی ل شاندەكێ بلند یێ ئیئتیلافا نیشتمانی یا ئیراقی ب سەرۆكایەتیا ئەیاد عەلاوی كر.
ب گۆڕەی بارەگەهێ بارزانی» د دیدارەكێ دا باس ل دۆر ڕەوشا سیاسی یا ئیراقێ و دوماهی پێشهاتان هاتە كرن».
هەروەسا گرێدای ب كێشەیێن د ناڤ پڕۆسەیا سیاسی و پەیوەندیێن هەرێما كوردستانێ و حوكمەتا فیدرال هەردو ئالیان دوپاتی ل پێدڤیا چارەسەركرنا گرفتان كر بەری وێ چەندێ گرفت كوورتر ببن، ئەوژی ب گۆڕەی دستووری و ب ڕێكا دانوستاندنێن بەردەوام.

سەرۆكێ حوكمەتا هەرێما كوردستانێ، مەسرۆر بارزانی، پێشوازی ل پڕۆفیسۆر لیۆناردۆ جیالۆریتی، ڕێڤەبەرێ پشكا ڕۆژهەلاتا ناڤین و ئاسیا یا كۆمەلا سانت ئیگیدیۆ كر كو ڕێكخراوەكا مرۆڤی یە و بنگەهێ وێ ل ڕۆما پایتەختێ ئیتالیا یە.
د كۆمبوونەكێ دا پڕۆفیسۆر جیالۆریتی كورتیەك سەبارەت كار و چالاكیێن كۆمەلا خوە بەرچاڤكر. هەروەسا ڕەوشا پێكڤەژیانا ئاشتیانە یا پێكهاتەیێن جودا و ئازادیا ئایینی و میهڤانداریكرنا سەدان هزار پەنابەر و ئاوارەیان ل هەرێما كوردستانێ بلند هەلسەنگاند.
سەرۆكێ حوكمەتا هەرێما كوردستانێ پێزانینێن هەرێما كوردستانێ بۆ پڕۆژە و كار و چالاكیێن كۆمەلا ناڤبری دیاركر و هیڤیا سەركەفتنێ بۆ خواست.

سەرەدانا سەرۆكێ حوكمەتا هەرێما كوردستانێ و شاندێ بلند یێ حوكمەتا هەرێمێ بۆ بەغدا و ئەنجامدانا دیدار و كۆمبوونێن گرنگ ل گەل سەرۆك وەزیرێن ئیراقێ و سەرۆك كۆمار و سەرۆكێ جڤاتا نوونەران و سەركردەیێن ئالیێن سیاسی یێن دی یێن ئیراقێ ل سەر پرسێن بودجەی و شایستەیێن دارایی یێن هەرێما كوردستانێ و ئەو پرسێن كو ب هەلاویستی د ناڤبەرا هەردو ئالیان دا ماینە، ل سەر ئاستێ ڕاگەهاندنا ئەرەبی و جیهانی كارڤەدانا خوە ئینا و ب گرنگی دنێرنە سەرەدانێ و ئەنجامێن وێ.
پەیمانگەها واشنتۆن بۆ ڕۆژهەلاتا ناڤین د ڕاپۆرتەكێ دا ڕۆناهی ئێخستە سەر سەرەدانا سەرۆكێ حوكمەتا هەرێما كوردستانێ مەسرۆر بارزانی بۆ بەغدا و بەلاڤكر» مەسرۆر بارزانی ئومێدەوارە د دانوستاندنێن ل گەل هەرسێ سەرۆكایەتیێن ئیراقێ چارەسەریەك بۆ كێشەیێن هەلاویستی د ناڤبەرا بەغدا و هەولێرێ دا بهێتە دیتن».
هەروەسا ئاماژەكر» د دیدارا د ناڤبەرا مەسرۆر بارزانی و محەمەد شیاع سۆدانی دا باس ل وان دۆسێیان هاتە كرن كو جهێ ناكۆكیا هەردو ئالیانە ب تایبەتی پرسا شایستەیێن دارایی یێن هەرێما كوردستانێ».
ڕۆژنامەیا (الیوم السایع) یا مسری ب گرنگی دنێریتە سەرەدانا مەسرۆر بارزانی بۆ بەغدا و بەلاڤكر» د كۆمبوونا سەرۆكێ حوكمەتا هەرێما كوردستانێ و سەرۆكێ كۆمارا ئیراقێ دا، دوپاتی ل باوەریێ د ناڤبەرا هەردو ئالیان بۆ چارەسەریا هەموو كێشەیێن هەلاویستی ب گۆرەی دستووری و قانوونێ هاتە كرن، كێشەیان كەركووكێ ژی پرسەكا دی یا كۆمبوونێ بوو».
مەسرۆر بارزانی و محەمەد شیاع سۆدانی دانوستاندن ل دۆر چارەسەریا كێشەیێن قانوونی و دارایی د ناڤبەرا بەغدا و هەولێرێ دا ئەنجامدان، ئەڤە ناڤونیشانێن ڕۆژنامەیا (الزمان) یا ئیراقێ بوون و ب كو سەرەدانا مەسرور بارزانی بۆ بەغدا ب گرنگ هەژمارت و بەلاڤكر ژی» هەردو حوكمەتێن بەغدا و هەولێرێ دوپاتی ل سەر دیتنا چارەسەریان بۆ كێشەیێن قانوونی و دارایی د ناڤبەران خوە دا ب گۆرەی دستووری و قانوونێ كر».
پێگەهێ (بەغداد تایمز) یێ ئیراقێ ژی ب گرنگی ڤە باس ل دیدارا دناڤبەرا محەمەد شیاع سودانی، سەرۆك وەزیرێن ئیراقێ و مەسرۆر بارزانی، سەرۆكێ حوكمەتا هەرێما كوردستانێ دكەت و ئاماژە ب وێ چەندێ كر كو» هەردو حوكمەتێن فیدرالی و هەرێما كوردستانێ دانوستاندن ل دۆر چارەسەركرنا بنەرەتی بۆ كێشەیێن دارایی و قانوونی یێن ل بەردەم شایستەیێن دارایی یێن هەرێما كوردستانێ كریە».