ئه‌ڤرۆنيوز:

رێكخراوا نڤيسه‌رێن بێ سنور/ رۆژهه‌لاتا ناڤين دێ كۆنگره‌كێ مه‌زن ب هه‌ڤكارى ل گه‌ل چه‌ندين ده‌زگه‌هێن ره‌وشه‌نبيرى يێن عه‌ره‌بى ل رۆژا 8/3/2019 ل هۆلا (نه‌جيب مه‌حفووز) ل باره‌گايێ رۆژناما ئه‌هرام يا مسرى ل قاهيره‌ سازكه‌ت وتێدا دێ باشترين كه‌سايه‌تى وده‌زگه‌هان ل عيراقێ ورۆژهه‌لاتا ناڤه‌راست بۆ سالا 2018 خه‌لات كه‌ت.

د. قه‌يس ئه‌لره‌زوانى، سه‌رۆكێ رێكخراوا نڤيسه‌رێن بێ سنور/ رۆژهه‌لاتا ناڤين و سه‌رۆكێ لژنا به‌رهه‌ڤكارا كۆنگره‌ى بۆ (ئه‌ڤرۆنيوز) گۆت ” دوى كۆنگره‌ى دا هژماره‌كا كه‌سايه‌تى وده‌زگه‌هان ل عيراقێ وهه‌رێما كوردستانێ دێ هێنه‌ خه‌لاتكرن”.

زێده‌تر گۆت ” ل سه‌ر ئاستێ هه‌رێما كوردستانێ نێچيرڤان بارزانى وه‌كو باشترين كه‌سايه‌تيێ سياسى ل هه‌رێمێ وفرۆكخانا هه‌ولێر يا نێڤده‌وله‌تى وه‌كو باشترين فرۆكخانه‌ ل عيراقێ وهه‌رێمێ وكه‌نالێ كوردستان تى ڤى وه‌كو باشترين ده‌زگه‌هێ راگه‌هاندنێ ل هه‌رێمێ وزانكۆيا سۆران وه‌كو باشترين ده‌زگه‌هێ فێركرنێ ل هه‌رێمێ دێ هێنه‌ خه‌لاتكرن”.

دياركر ژى” هژماره‌كا دى يێ كه‌سايه‌تيێن عيراقى دێ هێنه‌ خه‌لاتكرن وه‌كو محه‌مه‌د حه‌لبووسى سه‌رۆكێ په‌رله‌مانێ عيراقێ وه‌كو باشترين كه‌سايه‌تيێ سياسى ل عيراقێ و كه‌نالێ شه‌رقيه‌ وه‌كو باشترين ده‌زگه‌هێ راگه‌هاندنێ ل عيراقێ وزانكۆيا نه‌هرێن وه‌كو باشترين ده‌زگه‌هێ فێركرنێ ل عيراقێ وچه‌ندين كه‌سايه‌تى وده‌زگه‌هێن دى يێن عيراقى دێ هێنه‌ خه‌لاتكرن”.

دياركر ژى” كو لژنه‌كا تايبه‌ت هاتيه‌ پێكئينان بۆ ده‌ستنيشانكرنا باشترين كه‌سايه‌تى وده‌زگه‌هێن عيراقى وكارێ لژنا ناڤبرى هه‌تا رۆژا 22/2/2019 دێ يێ به‌رده‌وام وهه‌تا وێ رۆژێ هژماره‌كا دى يێ كه‌سايه‌تى وده‌زگه‌هان دێ هێنه‌ دياركرن دا ل رۆژا كۆنگره‌ى بهێنه‌ خه‌لاتكرن”.

ئەڤرۆ نیوز ، زنار تۆڤی:

کۆنفرانسێ میونخ جهەکە بۆ گۆهارتنا بۆچوونا و راوێژا سیاسى و ئەنجامدانا روونشتنێن سیاسى دناڤبەرا وەلاتان و ناڤەندێن سیاسی دا، دڤی کۆنفرانسى دا چو بریار ناهێنە دەرکرن، بەلێ تێدا بابەتێن گرنگ یێن ئاسایشا نێڤدەولەتی دهێنە گوتۆبێژکرن، د ڤی کۆنفرانسی دا کەسێن سیاسی شارەزایێن وارێ ئاسایشا نەتەوەیى، ناڤچەیى، نێڤدەولەتى، سەربازى و خودانێن کۆمپانیێن وارێ چەکی و تەکنەلۆژیا سەربازى پشکداریێ تێدا دکەن.

تارا شوان بەرپرسا پەیمانگەها ئابوووری یا ئەمریکی كوردی بۆ ئەڤرۆ نیوز گۆت: پشکداریا شاندێ هەرێما کوردستانێ ب سەرۆکاتیا مەسرۆر بارزانی شیرەتکارێ جڤاتا ئاسایشێ ل هەرێما کوردستانێ، گەلەک گرنگیا خوە هەبوویه د کۆنفرانسێ ئاسایشێ ل میونخ ل ئەلمانیا، چونکی ئەڤ کۆنفرانسە ل سەر ئاستێ نێڤدەولەتی دهێتە ئەنجامدان، چەندین سەرۆک وەزیر و وەزیرێن بەرگریێ و ناڤخۆ و یێن کارێن وان ل گەل ئێمناهیێ پشکداری دڤی کۆنفرانسی دا کریە، دیسا داخوازکرنا هەرێما کوردستانێ بۆ ڤی کۆنفرانسی گەلەک یا گرنگ بوو، ئەڤە وێ چەندێ نیشا ددەت، کو هەموو وەلاتێن جیهانی ب تایبەتی یێن ئورۆپا و ئەمریکا بەردەوام بەحسێ وێ ئێمناهیێ دکەن یاکو ل کوردستانێ هەی، هەروەسا ڤێ چەندێ گەلەک سەرنجا وان راکێشایە، دیسا وان بەحسێ رۆلێ پێشمەرگێ کوردستانێ و ئەو هێزێن کار ل سەر ئاسایشا هەرێما کوردستانێ دکەن کریە، چونکی هەرێما کوردستانێ ل جهەکێ یە، کو وەلاتێن دەوروبەرێن وێ هەموو یان کێشە هەنە و ئاسایشا وان نەیا سەقامگیرە، هەر چەندە ل دەمێ شەرێ داعش دا، ئەو رێکخراوا تیرۆرستی گەلەک نێزیکی هەولێرێ ببوو، لێ هەولێر هەر یا ئارام بوو، لەوما ئورۆپا و ئەمریکا سەرسامن ب وێ ئاسایشا ل کوردستانێ هەی، ژبەر ڤێ چەندێ وان شاندەکێ کوردستانی ب سەرۆکاتیا شیرەتکارێ جڤاتا ئاسایشا هەرێما کوردستانێ مەسرۆر بارزانی داخوازکریە ڤی کۆنفرانسی.

ناڤهاتیێ دیار کر ژی: دامەزرێنەرێ ڤێ کۆنفرانسی ئیدوارد هاینریش ڤۆن کلایست شمنتسین، ئیدوارد ئەو سەربازێ ناسیار یێ ئەلمانیە، کو ل گەل گروپەکێ ژ دژبەرێن هێتلەری بزاڤکربوو ل سالا ١٩٤٤ هێتلەری بکوژن و ئەڤ کۆنفرانسە ل سالا 1960 هاتیە بەستن، ئیدواردی ل سالا ١٩٦٢ ب شێوەکی فەرمى ناڤێ ڤی کۆنفرانسێ گوهۆری بۆ کۆنفرانسێ ئاسایشا میونخ. کۆنفرانسێ ئاسایشا نێڤدەولەتی یێ میونخ ژ سالا ١٩٦٢ وەرە برێڤە دچیت، هەروەسا ل سالا ٢٠٠٨ ڤۆلڤگانگ ئیشینگر سەرۆکاتیا کۆنفرانسێ میونخ دکەت، ڤۆلڤگانگ پێشتر بالیۆزێ ئەلمانیا بوویە ل ئەمریکا، ب دپلۆماتکارەکێ ب شیان ل ئاستێ جیهانێدا دهێتە نیاسین.

ناڤهاتیێ زێدەتر گۆت: ل ڤان سالێن دووماهیێ پتر ژ ٣٥٠ کەسایەتى و بسپۆران پشکداری تێدا کریە، کەسێن پشکدار ژ وەلاتێن ئەندام د ناتۆ، ئێکەتیا ئورۆپا، رووسیا، چین، ژاپۆن، هندستان و هژمارەکا کەساتیان ژ وەلاتێن دیتر یێن جیهانی، هەموو سالان ل هەیڤا شواتێدا و ل باژێرێ میونخ یێ ئەلمانیا و ل ئوتێلا (بایریشر هۆف) برێڤە دچیت، هەروەسا کۆنفرانسێ میونخ بوویە جهەک بۆ دیارکرنا روویێ سیاسەتا جیهانى د وارێن سیاسەتا ئاسایشێ و دەرڤە دا، ئەڤ کۆنفرانسە جهێ گوهۆرینا بۆچوونا و راوێژکاریێ یە و هیچ بریارەکا دیارکری دەربارەى هیچ پرس و بابەتەکێ ناهێتە دەرکرن.

هەروەسا ژ بلی سەرکردە و وەزیرێن دەرڤە و بەرگریێ یێن وەلاتان، کۆمپانی و بازرگانێن نێڤدەولەتی و رێکخراوێن مافێ مرۆڤی پشکداریێ دڤی کۆنفرانسى دا دکەن.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى ئه‌ڤرۆ سێشه‌مبى 19/2/2019 پێشوازى ل ئه‌لێكسه‌نده‌ر دى كرو جێكرێ سه‌رۆك وه‌زيرێن به‌لجيكا وكريستۆس ستايليناديس كۆمسيارێ ئێكه‌تيا ئورۆپى بۆ هاريكاريا مرۆڤايه‌تى وشاندێ دگه‌لدا كر.

دكۆمبوونه‌كێ دا، زێده‌بارى به‌حسكرنا پێشهات وكاريگه‌ريا شه‌رێ تيرۆرستان ل ده‌ڤه‌رێ، پێشڤه‌برنا په‌يوه‌نديێن دو قۆلى وده‌ليڤا بازرگانى ووه‌به‌رئێنانێ دناڤبه‌را هه‌ردو لايه‌نان دا وهاريكاريا مرۆڤايه‌تى وهه‌ماهه‌نگيا ئێكه‌تيا ئه‌ورۆپى هاته‌ به‌حسكرن.

مه‌سرور بارزانى سوپاسيا گه‌ل وحوكمه‌تا به‌لجيكا كر ل به‌رامبه‌ر هاريكاريێن وان بۆ هێزێن پێشمه‌رگه‌ى دشه‌رێ دژى تيرۆرستان دا وهيڤى خواست هاريكاريێن به‌لجيكا وئێكه‌تيا ئورۆپى بۆ ئاڤه‌دانكرنێ ل ده‌ڤه‌ري وهاريكاريا ئاواره‌ وپه‌نابه‌ران ل هه‌رێما كوردستانێ بهێته‌ به‌رفره‌هكرن وده‌ليڤه‌كا گونجاى بۆ ڤه‌گه‌راندنا ئاوارين ناڤخوه‌يێ عيراقێ بۆ جهێن وان يێن ره‌سه‌ن بهێته‌ خوه‌شكرن.

ژلايێ خوه‌ڤه‌ جێگرێ سه‌رۆك وه‌زيرێن به‌لجيكا پێزانين هه‌بوون ل به‌رامبه‌ر قوربانيێن هێزێن پێشمه‌رگه‌ ورۆناهى خسته‌ سه‌ر ئارمانجا سه‌ره‌دانا خوه‌ كو هاريكاريا هه‌رێما كوردستانێ وعيراقێ يه‌ وراگه‌هاند” بۆ وێ چه‌ندێ ئه‌م يێن ل ڤێرێ تاكو هه‌لسه‌نگاندنێ بۆ ره‌وش وپێدڤيێن هه‌رێما كوردستانێ وعيراقێ بكه‌ين، هه‌ڤده‌م به‌رهه‌ڤيا وه‌لاتێ خوه‌ بۆ پێشڤه‌برنا په‌يوه‌نديان دبوارێن جودا دا دياركر.

ژلايێ خوه‌ڤه‌ كۆمسيارێ ئێكه‌تيا ئورۆپى بۆ هاريكاريێن مرۆڤايه‌تى ئاماژه‌ ب رۆلێ هه‌رێما كوردستانێ دحه‌واندنا وێ هژمارا مه‌زن يا ئاواره‌ وپه‌نابه‌ران وبه‌رهه‌ڤيا ئيكه‌تيا ئورۆپى نيشان دا د زێده‌كرنا هاريكاريێن مرۆڤايه‌تى وهه‌ماهه‌نگيێ دهه‌موو بواران دا.

ئه‌ڤرۆنيوز:

وه‌زاره‌تا ناڤخوه‌ ل هه‌رێما كوردستانێ بريار دا ژنوكه‌ وپێڤه‌ بۆ نووكرنا سالناما ترومبێلێن بارهه‌لگر وكرێ وته‌كسێ، ئانكو هه‌لگرێن تابلۆيێن سور وزه‌ر پێدڤيه‌ شۆفێرێن وان پشتگيريا سه‌نديكا كرێكاران وڤه‌گوهاستنێ ب ده‌ستڤه‌بينن.

كاروان محه‌مه‌د، په‌يڤدارێ رێڤه‌به‌ريا هاتنوچوونا سلێمانيێ، ل دووڤ كوردستان تى ڤى، راگه‌هاند” وه‌زاره‌تا ناڤخوه‌ ل هه‌رێما كوردستانێ ل 19/1/2019 ب نڤيساره‌كێ هه‌موو رێڤه‌به‌ريێن هاتنوچوونێ ئاگه‌هدار كرينه‌ كو وه‌كو چاوان پێشتر خودانێن ترومبێلێن بارهه‌لگر وكرێ بۆ نووكرنا سالنامێن خوه‌، پشتگيريا باجا ده‌رامه‌تى دئينا، پێدڤيه‌ ب هه‌مان شێوه‌ پشتگيريا سه‌نديكا كرێكاران وڤه‌گوهاستنێ بينن”.