ئه‌ڤرۆ نيوز:
قوباد ته‌له‌بانى جێگرێ سه‌رۆك وه‌زيرێن هه‌رێما كوردستانێ ئه‌ڤرۆ رۆژا دوشه‌مبى راگه‌هاند كو ره‌وشا تێكچوويا ئابوورى يا نها ل فه‌نزوێلا هه‌ى ژ ئه‌گه‌رێ پشت به‌ستنا وێ يا ته‌مام بوو ب وارێ په‌ترۆلێ.
قوباد ته‌له‌بانى د په‌يڤه‌كێ دا كو ئه‌ڤرۆ ل هه‌ولێر د چارچۆڤێ كۆنفرانسه‌كێ چاندنێ ل گه‌ل قونسليا هۆله‌ندى ل هه‌ولێر راگه‌هاند كو هه‌ر وه‌لاته‌كێ پشت به‌ستنێ ل سه‌ر ژێده‌رێن سرۆشتى دكه‌ت، دێ خودان ئابووره‌كێ لاواز و نه‌يێ بنه‌جهـ بيت و فه‌نزوێلا كره گرۆڤه ل سه‌ر ڤێ چه‌ندێ، “دڤێت ئه‌وا ئه‌ڤ وه‌لاته تووش بوويێ به‌رچاڤ وه‌ربگرين”.
گۆتژى: “ئه‌م د هنده‌ك كاودانان دا بۆرين كو بهايێ به‌رميلا په‌ترۆلێ پشتى به‌رهه‌ڤكرنێ د بازارێن جيهانى دا گه‌هشته 10 دۆلاران كو نێزيكى بهايێ پيتزايه‌كێ يه ل بازارى، د ده‌مه‌كى دا ئه‌م ل گه‌ل شه‌ره‌كێ دژوار بووين ل گه‌ل داعش”.
خۆيا ژى كر، ژ به‌ر داكه‌فتنا بهايێ په‌ترۆلێ ب ره‌نگه‌كێ گه‌له‌ك زێده ل هنده‌ك ده‌مان، پێدڤيه پشت به‌ستنا ته‌مام ل سه‌ر په‌ترۆلێ نه‌بيت، “دڤێت گرنگيێ ب چاندنا ناڤخۆى بده‌ين وه‌كو پێگوهۆڕه‌كێ باش”.
قوباد ته‌له‌بانى د درێژاهيا گۆتارا خوه ژى دا، ئاماژه ب هندێ كر كو هه‌موو لايه‌نێن سياسى نها شه‌رى ل سه‌ر پۆستان و پلا دكه‌ن و وه‌زاره‌تا په‌ترۆل و سامانێن سرۆشتى و دارايى و ئابوورى، “چو كه‌س گرنگيێ ب وه‌زاره‌تا چاندنێ ناده‌ت”.
هيڤى ژى خواست كو هه‌ماهه‌نگى د ناڤبه‌را كه‌رتێ تايبه‌ت و گشتى دا هه‌بيت ژبۆ پێشخستنا كه‌رتێ چاندنا ناڤخۆيى و گۆت: “هه‌كه نه‌شێن كه‌رتێ چاندنا ناڤخۆيى پێش بێخين، نه‌شێين كه‌رتێ پێشه‌سازى ژى پێش بێخين”.
ئه‌ڤرۆ نيوز:
ئه‌ڤرۆ ل پيرمام پارتى ديموكراتى كوردستان و بزاڤا گۆڕان كۆم بوون و رێكه‌فتنا ناڤبه‌را هه‌ردولا هاته ئيمزا كرن.
د كۆنگره‌كێ رۆژنامه‌ڤانى دا، د. رۆژ نورى شاويس راگه‌هاند كو بۆ پاراستنا ده‌ستكه‌فتێن ملله‌تێ مه، مه ب فه‌ر ديت ڤێ رێكه‌فتنێ ئيمزا بكه‌ين.
نوونه‌رێ بزاڤا گۆڕان ژى، جه‌لال جه‌هوه‌ر، پيرۆزباهيا خه‌لكێ كوردستانێ كر ب هه‌لكه‌فتنا ئيمزاكرنا ڤێ رێكه‌فتنێ و خواست هه‌موو لايه‌ن بچن و پشكدارى حوكمه‌تا هه‌رێما كوردستانێ بن دا كو پێكڤه كار بكه‌ن ژ ڤان قه‌يرانان ده‌رباز ببن.
رێكه‌فتنا ناڤبه‌را پارتى ديموكراتى كوردستان و بزاڤا گۆڕان ژ 30 خالان پێك دهێت كو 18 خال گرێداى هه‌رێما كوردستانێ و 12 خال ژى گرێداى به‌غدا نه.
بزاڤا گۆڕان وه‌كو دايه دياركرن ژ بۆ وێ مه‌ره‌مێ يه كو زێده‌تر خزمه‌تێ بكه‌ت و ئێك هه‌لويست بيت ل گه‌ل پارتى ديموكراتى كوردستان ل سه‌ر ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ژى دا.
بزاڤا گۆڕان د ڤێ رێكه‌فتنێ دا، شه‌ش هه‌يڤ ژى ده‌ستنيشان كرينه كو د وى ماوه‌ى دا دێ ته‌ماشه‌ى رێكه‌فتنێ كه‌ت كا چه‌ند ژێ هاتيه بجهئينان.
ئه‌ڤرۆ نيوز:
ده‌سته‌يا ده‌ستپاكيێ ئه‌ڤرۆ رۆژا دوشه‌مبى راگه‌هاند كو ل سالا 2018ێ 56 حوكم ل سه‌ر 45 وه‌زير و پله بلند و تايبه‌ت و رێڤه‌به‌رێن گشتى ده‌ركرينه.
سه‌رۆكێ ده‌سته‌يا ده‌ستپاكيێ دادوه‌ر عزه‌ت ته‌وفيق جه‌عفه‌ر د چارچۆڤێ كۆنگره‌كێ رۆژنامه‌ڤانى دا، ئه‌وێ ژبۆ راگه‌هاندنا راپۆرتا سالانه ل دۆر 2018ێ ده‌ركرى خۆيا كر كو حه‌فت بڕيارێن دادگه‌هێ د ده‌رحه‌قێ چار وه‌زيران دا هاتينه دان.
دا زانين ژى كو حوكم د ده‌رحه‌قا ژماره‌كا رێڤه‌به‌رێن گشتى و پله تايبه‌ت ژى دا ده‌ركه‌فتيه ب ره‌نگه‌كى كو 49 بڕيارێن دادگه‌هێ د ده‌رحه‌قێ 41 به‌رپرسێن پله بلند و پله تايبه‌ت دا ده‌ركه‌فتين.
ئه‌ڤرۆ نيوز:
ده‌مژمێر 11:00 بۆرى و زه‌نگا گازيكرنا په‌رله‌مانتاران بۆ چوونا ناڤ هۆلا په‌رله‌مانى لێنه‌دا ئه‌ڤه ژى ئاماژه‌كه بۆ وێ چه‌ندێ كو كۆمبوون هاته پاشخستن.
نها سه‌رۆكێ ده‌مى يێ په‌رله‌مانێ كوردستانێ و سه‌رۆك فراكسيۆنێن ناڤا په‌رله‌مانى ل سه‌ر داخوازيا ئێكه‌تى نشتيمانى كوردستان يێ د كۆمبوونێ دا.
هيڤيدار ئه‌حمه‌د، ئه‌ندامێ په‌رله‌مانێ كوردستانێ راگه‌هاند كو بێگه‌رد ته‌له‌بانى نها د كۆمبوونا سه‌رۆك فراكسيۆنا ل گه‌ل سه‌رۆكێ په‌رله‌مانى دايه و داخواز كريه بۆ به‌رژه‌وه‌نديا گشتى بۆ چه‌ند ده‌مژمێران كۆمبوون بهێته پاشخستن.
ئاشكه‌را ژى كر كو ئێكه‌تيێ دڤێت هه‌تا ماوه‌كێ دى پۆستێ سه‌رۆكاتيا په‌رله‌مانى ئێكلا بكه‌ن و ل گه‌ل پارتى ژى رێكه‌فتنێ ئيمزار بكه‌ن.
هێشتا كۆمبوونا سه‌رۆكێ ده‌مى يێ په‌رله‌مانێ كوردستانێ و سه‌رۆك فراكسيۆنان ب دووماهى نه‌هاتيه و نه‌هاتيه زانين كا دێ كۆمبوونا په‌رله‌مانى بۆ چه‌ند ماوه‌ى هێته پاشخستن، به‌لێ هيڤيدار ئه‌حمه‌د ته‌كست ل سه‌ر وێ چه‌ندێ كر كو چاوان بيت دێ ئه‌ڤرۆ ده‌سته‌يا سه‌رۆكاتيێ هێته هه‌لبژارتن.
ئه‌ڤرۆ نيوز:
جوان حه‌سه‌ن، ئه‌نداما فراكسيۆنا برايه‌تى د ناڤ جڤاتا پارێزگه‌ها كه‌ركووك دا ل سه‌ر پشكا ئێكگرتوو ئيسلامى كوردستان بۆ كوردستان 24 راگه‌هاند كو سه‌رۆكێ جڤاتا پارێزگه‌ها كه‌ركووك ئه‌و ئاگه‌هدار كرينه كو كۆمبوونا ئه‌ڤرۆ يا جڤاتا پارێزگه‌ها كه‌ركووك بۆ ده‌مه‌كێ نه‌ديار هاتيه پاشخستن.
بڕيار بوو ئه‌ڤرۆ رۆژا دوشه‌مبى 18ى شوباتا 2019ێ كۆمبوونا جڤاتا پارێزگه‌ها كه‌ركووك هاتبا ئه‌نجام دان، به‌لێ ئه‌ڤ كۆمبوونه بۆ ده‌مه‌كێ نه‌ديار هاته پاشخستن.
ب گۆره‌ى پێزانينێن ئه‌ڤرۆ نيوز ژ به‌ر رازى نه‌بوونا ئێكه‌تى كۆمبوون هاتيه پاشخستن كو ئێكه‌تيێ داخواز دكر كو جهێ كۆمبوونێ ژ هه‌ولێر بۆ قه‌ره‌هه‌نجير بهێته ڤه‌گوهاستن كو د كۆمبوونێ دا ده‌نگ ل سه‌ر كانديدێ وان بهێته دان.
ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كى ژ نه‌وه‌ى نوێ راگه‌هاند كو ئه‌وان دێ به‌ربژار بۆ هه‌رسێ پۆستێن سه‌رۆكاتيا هه‌رێمێ هه‌بن و بۆ پۆستێ سه‌رۆكاتيا په‌رله‌مانى دهۆكيه‌ك به‌ربژار كريه.
ئه‌وى ژێده‌رى كو نه‌ڤيا ناڤێ خوه ئاشكه‌را بكه‌ت بۆ ئه‌ڤرۆ نيوز گۆت: “نه‌وه‌ى نوێ دێ بۆ هه‌رسێ پۆستێن سه‌رۆكاتيا په‌رله‌مانێ كوردستانێ به‌ربژار هه‌بن”.
ئاشكه‌را ژى كر كو سيپان ئامێدى بۆ پۆستێ سه‌رۆكاتيا په‌رله‌مانى و كاوه عه‌بدولقادر بۆ جێگرێ ئێكێ و مژده مه‌حمود بۆ جێگرا دويێ د به‌ربژارن.
ئه‌ڤه د ده‌مه‌كى دايه كو دێ هه‌لبژارتنا سه‌رۆكاتيا په‌رله‌مانى ب رێكه‌فتن هێته هه‌لبژارتن ب ره‌نگه‌كى سه‌رۆكا په‌رله‌مانى بۆ پارتى و جێگره‌ك بۆ پارتى و ئێك ژى بۆ توركمانان.
ئێكه‌تى نشتيمانى كوردستان هێشتا بڕيار نه‌دايه پشكدارى كۆمبوونا په‌رله‌مانى بيت و دبێژيت كو هه‌تا پارتى رێكه‌فتنێ ئيمزا نه‌كه‌ت ئه‌و پشكدار نابن و هه‌كه وان به‌ربژێر نه‌بيت و كه‌سێ دى خوه به‌ربژار نه‌كه‌ت ل وى ده‌مى سيپان ئامێدى بێ هه‌لبژارتن دێ بيته سه‌رۆكێ په‌رله‌مانى و هه‌كه رێكه‌فتن ژى هاته كرن، ل وى ده‌مى دێ ب رێكه‌فتن كه‌سه‌ك هێته هه‌لبژارتن.
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ په‌رله‌مانێ كوردستانێ يێ ده‌مى راگه‌هاند كو ئه‌ڤرۆ رۆژا دوشه‌مبى 18ى شوباتا 2019ێ ل ده‌مژمێر 11:00ى نيڤرۆ دێ كۆمبوونا په‌رله‌مانێ كوردستانێ هێته كرن و ده‌سته‌يا سه‌رۆكاتيا په‌رله‌مانى هێته هه‌لبژارتن.
رێڤينگ هرۆرى، سه‌رۆكێ ده‌مى يێ په‌رله‌مانێ كوردستانێ گۆت: “هه‌موو ئاماده‌كارى بۆ روونشتنا ئه‌ڤرۆ يا په‌رله‌مانێ كوردستانێ هاتينه كرن، چو داخوازى بۆ پاشخستنا كۆمبوونا ئه‌ڤرۆ يا په‌رله‌مانێ كوردستانێ نه‌گه‌هشتينه ده‌ستێ مه”.
ب گۆره‌يى پێزانينێن ئه‌ڤرۆ نيوز، ئێكه‌تيێ هێشتا به‌ربژارا خوه بۆ پۆستێ سه‌رۆكا په‌رله‌مانى ئێكلا نه‌كريه كو هه‌ر ئێك ژ رێواز فايه‌ق و بێگه‌رد ته‌له‌بانى به‌ربژارن و بۆ پۆستێ جێگرێ ئێكێ ژى هێمن هه‌ورامى ژ پارتى ديموكراتى كوردستان به‌ربژاره و جێگرا دويێ ژى مونا قه‌هوه‌چيه ژ به‌ره‌ى توركمانى، به‌لێ نها ده‌نگويه‌ك هه‌يه كو كێشه كه‌فتيه ڤێ چه‌ندێ ژى كو محه‌مه‌د سه‌عده‌دين ژ پارتيا گه‌شه‌پێدانا توركمان ژى داخوازا ڤى پۆستى كريه و دبيت هه‌تا ده‌مژمێر 11:00 ئه‌و ژى ئێكلا ببيت.
هه‌ر ل دۆر پشكداريكرن د كۆمبوونا په‌رله‌مانێ كوردستانێ يا ئه‌ڤرۆ دا، بزاڤا گۆڕان راگه‌هانديه كو ئه‌و دێ پشكدار بن و ده‌نگى ب ده‌سته‌يا سه‌رۆكاتيا په‌رله‌مانى ده‌ن ل دۆر وێ رێكه‌فتنا ل گه‌ل پارتى ديموكراتى كوردستان هاتيه كرن.
ئه‌ڤرۆ نيوز ئه‌و چه‌ند ژى زانيه كو هه‌كه پارتى رێكه‌فتنا ل گه‌ل ئێكه‌تيێ ئيمزا نه‌كه‌ت، ئێكه‌تى پشكدارى كۆمبوونا ئه‌ڤرۆ يا په‌رله‌مانێ كوردستانێ نابيت و دايه زانين ژى كو چو رێكه‌فتن ناهێنه كرن و ده‌سته‌يا سه‌رۆكاتيێ ژى ناهێته هه‌لبژارتن.
د ده‌مه‌كى دا كو د راگه‌هاندنه‌كێ دا، فراكسيۆنا نه‌وه‌ى نوێ بايكوتا روونشتنا ئه‌ڤرۆ يا په‌رله‌مانێ كوردستانێ كربوو، به‌لێ سيپان ئامێدى ئه‌ندامێ فراكسيۆنا نه‌وه‌ى نوێ ل په‌رله‌مانێ كوردستانێ ل سه‌ر په‌يجێ خوه يێ تۆڕا جڤاكيا فه‌يسبۆكى پۆسته‌ك به‌لاڤكربوو و ئاماژه ب وێ چه‌ندێ كربوو كو دێ ئه‌و پشكدارى كۆمبوونا په‌رله‌مانى بن و دێ وان به‌ربژار بۆ ده‌سته‌يا سه‌رۆكاتيا په‌رله‌مانى هه‌بن.
هه‌كه ئێكه‌تى به‌رى كۆمبوونێ به‌ربژارا خوه ئێكلا نه‌كه‌ت و پشكدارى كۆمبوونا په‌رله‌مانى نه‌بيت، ل وى ده‌مى نه‌وه‌ى نوێ دێ به‌ربژاره‌كى بۆ وى پۆستى به‌ربژار كه‌ت و ل وى ده‌مى هه‌كه چو هه‌ڤرك نه‌بن، دێ ب سه‌رۆكێ په‌رله‌مانى هێته هه‌لبژارتن، هه‌ر وه‌سا نه‌وه‌ى نوێ دێ به‌ربژار بۆ پۆستێن دى ژى هه‌بن، به‌لێ هه‌موو بۆچوون بۆ وێ چه‌ندێ دچن كو ئه‌و نه‌شێن چو پۆستان ژ سه‌رۆكاتيا په‌رله‌مانى وه‌ربگرن، ژ به‌ر كو نه‌شيايه ل گه‌ل چو لايه‌نان چو رێكه‌فتنان بكه‌ت.
شێركو جه‌وده‌ت، سه‌رۆكێ فراكسيۆنا ئێكگرتوو ئيسلامى كوردستان ل په‌رله‌مانێ كوردستانێ راگه‌هاند كو ئه‌و دێ ئه‌ڤرۆ پشكداريێ د كۆمبوونا په‌رله‌مانێ كوردستانێ دا كه‌ن، به‌لێ وه‌كو فراكسيۆنا وان ده‌نگى ب ده‌سته‌يا سه‌رۆكاتيا په‌رله‌مانى ناده‌ن.
هه‌ر چه‌نده كو هێشتا كۆمه‌لا ئيسلامى چو بڕيارێن روون نه‌داينه ل دۆر پشكداريكرن يان نه‌كرن د حوكمه‌تا هه‌رێما كوردستانێ و كۆمبوونا په‌رله‌مانى يا ئه‌ڤرۆ دا، به‌لێ بزاڤا گۆڕان دخوازيت كو كۆمه‌لا ئيسلامى ژى پشكدار حوكمه‌تێ ببيت.
د هه‌لبژارتنێن په‌رله‌مانێ كوردستانێ دا، پارتى ديموكراتى كوردستان 45 كورسى، ئێكه‌تى نشتيمانى كوردستان 21 كورسى، بزاڤا گۆڕان 12 كورسى، نه‌وه‌ى نوێ هه‌شت كورسى، كۆمه‌لا ئيسلامى حه‌ف كورسى، به‌ر ب ئيسلاحێ پێنج كورسى، هه‌ڤپه‌يمانيا ديموكراسى و ليستا ئازادى ژى كورسيه‌ك ب ده‌ست خوه ڤه ئينايه و كورسيێن توركمان ژى پێنج كورسى نه.
ئه‌ڤرۆنیوز:
رێڤه‌به‌رێ ته‌موینا دهۆكێ، حسێن سه‌بری بۆ ئه‌ڤرۆنیوز راگه‌هاند، لژنا ئابووری ل جڤاتا وه‌زیرێن عیراقێ بریاره‌ك بۆ مه‌زاختنا ده‌رماله‌كی بۆ هه‌موو فه‌رمانبه‌رێن وه‌زاره‌تا بازرگانی یا عیراقێ ده‌ركریه وفه‌رمانبه‌رێن هه‌رێما كوردستانێ ژ وێ ده‌رمالێ دبێ به‌هرن.
حسێن سه‌بری، رێڤه‌به‌رێ ته‌موینا دهۆكێ ۆ ئه‌ڤرۆنیوز گۆت ژی” گۆژمێ وی ده‌رمالێ هه‌یڤانه 150 هزار دینارن وژ هه‌موو فه‌رمانبه‌رێن وه‌زاره‌تا بازرگانی یا عیراقێ دگریت ب تایبه‌تی ئه‌وێن دبیاڤێ ئاهێن خوارنێ دا كاردكه‌ن وه‌كو ( پلێتا ئاهێن خوارنێ وسایلویان …هتد) ودێ ژ 1/1/2018 هێته هژمارتن ومه‌زاختن وهه‌موو فه‌رمانبه‌رێن وه‌زاره‌تا بازرگانیا عیراقی ژ پارێزگه‌ها نه‌ینه‌وا هه‌تا به‌سرا ئه‌و ده‌رماله یا وه‌رگرتی، به‌لێ بریارا مه‌زاختنا وی ده‌رمالی ژ فه‌رمانبه‌رێن وه‌زاره‌تا بازرگانی ل هه‌رێما كوردستانێ ناگریت”.
گۆت ژی” ئه‌م دبینن ئه‌ڤ چه‌نده سته‌مه‌كا ل فه‌رمانبه‌رێن هه‌رێمێ دهێته كرن وداخوازێ ژ وه‌زاره‌تا بازرگانی ل هه‌رێما كوردستانێ دكه‌ین بزاڤان بكه‌ت كو ئه‌و ده‌رماله ژ فه‌رمانبه‌رێن وه‌زاره‌تا بازرگانی ل هه‌رێما كوردستانێ ژی بگریت”.
نيشاندان