ئه‌ڤرۆ نیوز، مه‌حمود نهێلى:
ژ ئەگەرێ دروستبوونا ئاگره‌كێ ل گوندێ چه‌لكێ یێ سه‌ر ب ناحیا دێره‌لۆكێ ڤه‌، زیانێن زۆر گه‌هشتنه‌ ره‌ز و باغێن وەلاتیان و بۆ ته‌خمینكرنا زیانێن ڤى ئاگرى ژى لژنه‌ك ژ لایێ رێڤه‌به‌ریا ناحیێ هاته‌ پێكئینان.

نه‌قیب ئیحسان سه‌نعان به‌رپرسێ بنگه‌هێ به‌ره‌ڤانیا باژێرى ل دێره‌لۆ بو ئه‌ڤرۆ نیوز دیاركر، كو دورێن 25 دونه‌مێن ئه‌ردى ژ ئه‌نجامێ وى ئاگرى سوتینه‌ و گۆت: ( هه‌ر ده‌م و ل ده‌ست ئه‌م گه‌هشتینه‌ جهێ روودانێ لێ ژ به‌ر هه‌بوونا پیش و په‌له‌خه‌كى زۆر ئه‌م نه‌شیانه‌ زوو وى ئاگرى كونترول بكه‌ین، هه‌ر چه‌نده‌ هه‌ژماره‌كا زۆرا ره‌ز و ده‌خل و دانێ هاولاتیان ژ سوتنێ ب هاریكاریا خه‌لكێ ده‌ڤه‌رێ هاتنه‌ كونترولكرن لێ ئه‌ڤ ئاگره‌ بو ئه‌گه‌رێ سوتنا دورێن چار ره‌زێن خه‌لكێ گوندى).
ناڤهاتى دیار ژى كر، ژبۆ زانین و ته‌خمینكرنا زیانێن ڤى ئاگرى ژلایێ رێڤه‌به‌ریا ناحیا دێره‌لۆك لژنه‌یه‌ك هاتیه‌ پێك ئینان و دێ ڤه‌دیتن بو وان ره‌زان هێـته‌ كرن یێن زیانێن گه‌هشتینێ.
ئاشكرا كر: هەتا نوكه‌ ئه‌گه‌رێن دروستبوونا وى ئاگرى ب دروستى نه‌هاتینه‌ زانین، لێ لێكولین ل سه‌ر به‌رده‌وامن.

ئه‌ڤرۆ نیوز، مه‌حمود نهێلى:
رازیبوون هاتیه‌ كرن ل سه‌ر سه‌خبێكرنا به‌شه‌ك ژ رێیا سێ گوندێن سه‌ر ب قه‌زا ئامێدیێ ڤه‌ كو رێیا جهێن گه‌شتیارى ژى ب خوه‌ ڤه‌ دگریت.

ئه‌ندازیار ئه‌ڤراز ئامێدیێ، سه‌رۆكێ باژێرڤانیا ئامێدیێ بۆ ئه‌ڤرۆ نیوز دیاركر: كو هه‌ر چه‌ند مه‌ دڤیا ئه‌ڤ رێیه‌ ل سه‌ر پارێ تایبه‌تێ سندوقا نێڤده‌وله‌تى هاتبا چێكرن لێ نه‌ئێك ژ وان پرۆژه‌یان بوویه‌ و گۆت: ( ئه‌ڤ جاده‌یه‌ رێیا سه‌ره‌كى یا سێ گوندێن ده‌ڤه‌را به‌رێ گارێ یێن ده‌وروبه‌رێن سه‌نته‌رێ قه‌زایێ یه‌، زێده‌بارێ رێیا سه‌ره‌كى یا جهێ گه‌لیێ سێ پركایه‌ كو ئێكه‌ ژ جهێن گوزارى ل ده‌ڤه‌را ئامێدیێ).
ئه‌ندازیار ئه‌ڤراز ئامێدى دیار ژى كر، كو ل سه‌ر بودجێ تایبه‌تێ پارێزگه‌ها دهوكێ كوژمێ 60 ملیون دیناران بۆ سه‌خبێركرنا به‌شه‌كى ڤێ جاده‌یێ هاتینه‌ ته‌رخانكرن كو د بیته‌ به‌شه‌ك ژ رێیا تاخێ مرێبكا ژى ل سه‌نته‌رێ قه‌زایێ.
ناڤهاتی گۆت ژی: (بۆ چێكرنا ڤێ جادێ مه‌ پێدڤى ب كوژمه‌كى پتر یێ پاره‌ى هه‌یه‌ كو درێژاهیا وێ دبیته‌ پتر ژ حه‌فت كیلومه‌تران ) و ئاشكرا كر ، كو وان چه‌ندین جاران ڤه‌دیتن بۆ ئه‌نجامداینه‌ و ب نڤیسار بلند كرینه‌ لێ تا نوكه‌ رازیبوون ل سه‌ر چێكرنا وێ جاده‌یێ ب ره‌نگه‌كێ باش كو هه‌موو جادێ بخوه‌ بگریت نه‌هاتیه‌ كرن.

ئەڤرۆ نیوز، عەلی حاجی :
بەری دەمەکێ کێم ژ ئەگەرێ شەرەکێ دناڤبەرا دو بنەمالان دا ل کومەلگەها هیزاوا یا سەر ب قەزا زاخۆ ڤە، سێ کەس بریندار بوون و هاتنە رەوانە کرن بۆ نەخوشخانا هەوار هاتنێ ل زاخۆ .

خەلات ئوسمان هاریکارێ رێڤەبەرێ نەخوشخانا هەوار هاتنێ ل زاخۆ بۆ ئەڤرۆ نیوز گۆت : ل ئێڤاریا ئەڤرۆ دوشەمبی ٢٠/٧/٢٠٢٠ ژ ئەگەرێ شەرەکێ ل کومەلگەها هیزاوا سێ کەسێن بریندار ئینانە نەخوشخانا هەوار هاتنێ ل زاخۆ، پشتی ئەو بریندار هاتینە نەخوشخانێ ئێکسەر نۆشداران ئەو بریندارە ئێخستنە د بن چاڤدێریێ دا کو دیار بوو ئێک ژ وان ب کێران بریندار بوویە و دو کەسێن دیتر ژی ب دار و بەران بریندار بووینە و برینێن وان هەر سێ کەسان ژی برینێن سڤکن و ل ژێر چاڤدێریا نۆشداران دانە.