شێخان، بارزان مزوورى:

عه‌مید ئیحسان حسێن  به‌رپرسێ دارستان و پاوانى ل ناحیا ئه‌ترۆش بۆ ئه‌ڤرۆ نیوز گۆت: (ل پێنج شه‌مبیا بورى رێكکه‌فتى 18/7/2020 ئاگره‌كێ مه‌زن ب ئاقارێ ده‌ڤه‌را ئه‌ترۆش كه‌فت ژ ئه‌گه‌ره‌كێ نه‌دیار پولیسێن دارستانێ دگه‌ل تیمێن ئاگرڤه‌مراندنا ئه‌ترۆش و قه‌سرۆك پێشمه‌رگه‌یێن زێره‌ڤانى هه‌تا نها ئه‌و ئاگر نه‌هاتینه‌ كونترۆلكرن د ئه‌نجام دا زێده‌ترى هزار دونه‌مێن عه‌ردى یێن پیش و په‌له‌خى و پاوانى هاتینه‌ سوتن دگه‌ل سوتنا سه‌دان ره‌زێن سمقامێ و یێن مێوێن ترى، كونترۆلكرنا ڤى ئاگرى ئاسته‌نگێن مه‌زن بۆ مه‌ دروست كرن ژ به‌ر كۆ ئه‌و ئه‌لغامێن ل سه‌ر ده‌ستێ رژێما به‌عس هاتینه‌ چاندن دڤى ئاگرى دا په‌قین به‌لێ سوپاس بۆ خودێ پولیس و تیمێن مه‌ ب سلامه‌ت وان ته‌قینا ده‌رباز بون).

ناڤهاتى خویاكر ئه‌ڤ ئاگره‌ ژ به‌ر پیش و په‌له‌خى بله‌ز به‌لاڤ بوو چیایێن پشتا ده‌ڤه‌را ئه‌ترۆش هه‌موویێ به‌لاڤ بوو هزاره‌ها دارێن كاژێن ژیێ وان 100 سالى هاتنە سوتن ئه‌و كاژێن وه‌كو دارستانه‌كا كه‌ڤنار دهاتنە هژمارتن ل ده‌ڤه‌را ئه‌ترۆش وه‌كو جهه‌كێ گه‌شتیارى یێ كه‌ڤنار دهات هژمارتن).

ناڤهاتى گۆت: (پێشبینى دهێتە كرن ئه‌و ئاگر ئه‌ڤرۆ بهێت كونترۆلكرن ب هاریكاریا تیمێن به‌شدار و وه‌لاتیێن ده‌ڤه‌رێ).

ئه‌ڤرۆ نیوز، ئامێدیێ:

بو هه‌یاما چه‌ند رۆژایه‌ ئاریشه‌یا كێمبوونا ئاڤا ڤه‌خوارنێ ل سنورێ قه‌زا ئامێدیێ دروستبوویه‌ و ئه‌ڤه‌ ژى بوویه‌ ئه‌گه‌رێ دلگرانیا وه‌لاتیان و قایمقامێ قه‌زا ئامێدیێ دیار دكه‌ت كو ئه‌گه‌رێ ڤێ ئاریشه‌یێ ل وه‌لاتێ توركیایه‌.

ئیسماعیل مسته‌فا قایمقامێ قه‌زا ئامێدیێ بۆ ئه‌ڤرۆ نیوز دیاركر، بو هه‌یاما چه‌ند رۆژایه‌ ژ ئه‌نجامێ شێلیبونا زێده‌ یا ئاڤا رووبارێ زێ یه‌ كو ژێده‌رێ سه‌ره‌كى یێ شێلیبوونا وێ ل وه‌لاتێ توركیا یه‌ و پرۆژه‌یێ ستراتیژێ یێ ئاڤا ئامێدیێ نه‌شیایه‌ ب دروستى كار بكه‌ت و گۆت: (ژ به‌ر كو  ل دووڤ سیسته‌مێ كاركرنا پرۆژه‌یێ ئاڤێ ده‌مێ رێژا شێلیبونا ئاڤێ د سه‌ر هزارێ دا بیت پرۆژه‌ نه‌شێت ب دروستى كار بكه‌ت د بیست چار ده‌مژێران د).

و دیار كر، نوكه‌ رۆژانه‌ دو بو سێ ده‌مژێران گوهورین ب سه‌ر ئاڤێ دا دهێت و دشێت ئاڤێ وه‌ربگریت و ل گه‌ل پرۆژێن به‌رێ ئاڤێ كوم دكه‌ت و هه‌ر دو رۆژان جاره‌كێ ئاڤێ بده‌ته‌ هاولاتیان و گۆت: ( چ ئاریشه‌یێن ته‌كنیكى د پرۆژه‌ى دا نینن و ئه‌م به‌ر ده‌وام ل سه‌ر هێلێ نه‌ ژ بو چاره‌سه‌ركرنا ڤێ ئاریشه‌یێ و هه‌روه‌سا مه‌ كارگێریا وێ ده‌ڤه‌رێ ژى ب رێیا ته‌له‌فونێ ئاگەهدار‌كریه‌ كو پرۆژه‌یێن وانا نه‌بنه‌ ئه‌گه‌رێ شێلیبوونا ئاڤا رووبارێ زێ ).

و دیاركر،  نوكه‌ دو جاده‌ ل وێ ده‌ڤه‌رێ دهێنه‌ دروستكرن كو ئاخا وان رێكان دكه‌نه‌ ئاڤا رووبارێ زێ و هه‌روه‌سا گه‌له‌ك جاران ژى ژ ئه‌گه‌رێ بارانێن ڤى ده‌مێ سالێ ئه‌ڤ ئاڤه‌ شێلى دبیت).

ناڤهاتى داخاز ژ هاولاتیان ژى كر، كو ئابوورێ د ئاڤا ڤه‌خوارنێ دا بكه‌ن تا كو ئه‌ڤ ئاریشه‌ چاره‌سه‌ر دبیت.