دهۆك، لەزگین جوقی

بەرپرسەكێ‌ پارتی ل شنگالێ‌ دیاركر، گرۆپێن نەشەرعی ژ ئەگەرێ لاوازیا خوە ل شنگالێ‌ بۆ خاپاندنا خەلكی ب ناڤێ‌ ئێزدیان وئۆلا ئێزدیان دانوستاندنێ‌ ل گەل وەلاتیان دكەن و خەلكێ‌ شنگالێ‌ ژی گەهشتینە وی باوەرێ‌ ئەو گرۆپێن نەشەرعی چەند ڕێگریێ‌ ونەخوەشیان ل شنگالێ‌ دروست بكەن دێ‌ خەلكێ‌ شنگالێ‌ ل سەر سندوقێن دەنگدانێ‌ بڕیارا خوە یا دووماهیی بۆ سزادانا گرۆپێن نەشەرعی دەن.
ئدریس زۆزانی، كارگێرێ‌ لقێ‌ 17 یێ‌ پارتی دیموكراتی كوردستان ل شنگالێ‌ گوت» بۆ تێكدانا ڕەوشا خەلكێ‌ شنگالێ، گرۆپێن نەشەرعی هاتینە د ناڤ شنگالێ‌ دا وئەو گرۆپ خەلكی د ترسینن و دئێشینن و دبەردەوامن ل سەر ڤان كاران و هەروەسا ئەو گرۆپ دناڤ خەلكی دا دگەریێن بەلێ نەشێن كارتێكرنێ‌ ل دەنگدەران بكەن ژ بەر كو خەلكێ‌ شنگالێ‌ ڕاستیا وان گرۆپێن نەشەرعی دزانن كو ئەڤە چەندین سالن دناڤ شنگالێ‌ دا و خەلكی د ترسینن و گەڤان ل وەلاتیان دكەن ونەشیاینە چو خزمەتێ‌ بۆ شنگالێ‌ بكەن وهەتا نوكە شنگالێ‌ یا وێرانكریە وئاوارە ژی ژبەر ڕەفتارێن گرۆپین نەشەرعی نەشێن ڤەگەرن».
زۆزانی خویا كر ژی» ب ڤان كاران گرۆپێن نەشەرعی نەشێن خەلكێ‌ شنگالێ‌ ب خاپینن و مە باوەری ب خەلكێ‌ خوە هەیە هەر ل دەستپێكا هاتنا خوە بۆ شنگالێ‌، گرۆپێن نەشەرعی كار ل سەر خاپاندنا وەلاتیان كریە ونوكە خەلك گەهشتیە وێ‌ باوەریێ ئەو گرۆپ ب تنێ‌ خەلكێ‌ شنگالێ‌ دخاپینن وب هیچ شێوەیەكی نەشێن خزمەتا شنگالێ‌ بكەن».
دیاركر ژی» پەكەكە و حەشدا شەعبی بۆ هەلبژارتنێن جڤاتێن پارێزگەهێن ئیراقی ڕێگرن بەرامبەر دەنگدەرێن شنگالێ‌ وگەڤ ومەترسیێ‌ د ئێخنە سەر ژیانا وەلاتیان كو نەشێن ل شنگالێ‌ ئازادانە دەنگێن خوە بدەن لێ‌ پتریا خەلكێ‌ شنگالێ‌ دێ‌ دەنگ ب لیستا پارتی دەت د هەلبژارتنێن جڤاتێن پارێزگەهان دا ژ بەر كو لیستا پارتی بۆ خزمەتكرنا وەلاتیان هاتیە پێكئێنان وخەلكێ‌ شنگالێ‌ باش دزانن پارتی چەند خزمەتا وان دكەت لەورا ژی د هەلبژارتنێن جڤاتا نوونەرێن ئیراقی دا خەلكێ‌ شنگالێ‌ بەربژارێن پارتی هەلبژارتن، هەروەسا بۆ هەلبژارتنێن جڤاتێن پارێزگەهان ژی دێ‌ خەلكێ‌ شنگالێ‌ بەربژارێن پارتی هەلبژێرن».

ل ڕۆژا 3/11/2023، نێچیرڤان بارزانی، سەرۆكێ هەرێما كوردستانێ گەهشتە كۆچكا ئەلیزێ ل پاریس و ژ ئالیێ ئیمانوێل ماكرۆن، سەرۆكێ فڕەنسا پێشوازی لێ هاتە كرن.
سەرۆكێ هەرێمێ پشتی كۆمبوونا خوە ل گەل ماكرۆنی د پۆستەكی دا ل تۆرا ئێكس (تویتەر یا كەڤن) بەلاڤكر» خوەشحال بووم ب دیدارا هەڤالێ خوە یێ عەزیز سەرۆك ماكرۆنی ل پاریس».
دیاركر ژی» مە باس ل پێشڤەبرنا پەیوەندیێن ئیراقێ و هەرێما كوردستانێ ل گەل فڕەنسا و دوماهی پێشهاتێن ئیراقێ و دەڤەرێ كر».
هەروەسا گوت ژی» پەیوەندیێن هەرێما كوردستانێ ل گەل فڕەنسا د دیرۆكی نە و بەلگەیا پێگیریا مە یا هەڤپشكە ب ئاشتیێ و سەقامگیریێ و پێشكەفتنێ».
سەرۆكێ فڕەنسا ژی ل بەر دەرگەهێ كۆچكا ئەلێزێ گوتە سەرۆكێ هەرێما كوردستانێ « گەلەك خوەشحالم كو تو ل ڤێرێی».
نێچیرڤان بارزانی، سەرۆكێ هەرێما كوردستانێ د چارچۆڤەیێ كۆنگرەیەكێ ڕۆژنامەڤانی دا كو پشتی كۆمبوونێ ل گەل ماكرۆنی ل پاریس پایتەختێ فڕەنسا ئەنجامدا دیاركر، ل كۆمبوونا ل گەل ئیمانوێل ماكرۆنی، سەرۆكێ فڕەنسا دوپاتی ل چارەسەركرنا كێشەیێن د ناڤبەرا بەغدا و هەولێرێ دا كر و ئاماژەكر كو هەتا پرسا پەترۆلێ ژی ل گەل ماكرۆنی باسكریە.
سەرۆكێ هەرێمێ ڕۆهنكر ژی كو بابەتێ هنارتنا پەترۆلا هەرێما كوردستانێ پەیوەندی ب بەغدا ڤە هەیە و كێشە ژ ئالیێ بەغدا ڤە نەهاتیە چارەسەركرن و ماكرۆنی پێ ڕاگەهاندیە كو دێ بزاڤێ كەت ل دۆر وێ چەندێ یێ هاریكار بیت.
نێچیرڤان بارزانی خویاكر ژی» توركیا بەرهەڤیا خوە بۆ دەستپێكرنا هنارتنا پەترۆلا هەرێما كوردستانێ دیاركریە، بەلێ هندەك بابەت و كێشە هەنە كو پێدڤیە حوكمەتا فیدرال پێنگاڤا چارەسەریا وان بهاڤێژیت، ب تایبەت بابەتێ كۆنتراككرنا پەترۆلێ ل هەرێما كوردستانێ دبیت ل گەل ئیراقێ یا جودا بیت، ب تایبەت ئەوا ئیراقێ سێرڤسە، بەلێ ئەوا هەرێما كوردستانێ هەڤپشكیە و د بودجەیا گشتی دا تنێ شەش دۆلار بۆ دەرئینانا بەرمیلەكا پەترۆلا هەرێما كوردستانێ هاتیە دانان د دەمەكی دا بۆ ئەوا ل ئیراقێ بها زێدەترە و دڤێت بەغدا چارەسەریا وی بابەتێ تەكنیكی بكەت».
سەرۆكێ هەرێما كوردستانی دیاركر ژی» سەرۆك ماكرۆن یێ پێگیرە ب وێ چەندێ سەرەدانا ئیراقێ بكەت، من داخوازكر كو د چارچۆڤەیێ سەرەدانا خوە دا، سەرەدانا هەرێما كوردستانێ ژی بكەت و ب خوەشحالی ڤە داخوازنامەیا من قەبوولكر».
سەبارەت پرسا هەلبژارتنێن پەرلەمانێ كوردستانێ، نێچیرڤان بارزانی گوت» پێگیرین ب ئەنجامدانا هەلبژارتنان د دەمێ خوە دا و هیچ ڕێككەفتنەك ل گەل ئێكەتیێ نەهاتیە كرن بۆ پاشئێخستنا هەلبژارتنان و پێدڤیە هەموو ئالی پێگیر بن ب وێ چەندیچ كو د دەمێ خوە دا هەلبژارتن بهێنە ئەنجامدان».
خویاكر ژی كو ئەوا ل دەڤەرا ڕۆژهەلاتا ناڤەراست ڕوو ددەت تنێ پەیوەندی ب وی جهی ڤە نینە كو ئالۆزی تێدا هەنە، بەلكو كاریگەری ل سەر هەموو دەڤەرێ هەیە.
ئاماژەكر كو هەلوەستێ هەرێما كوردستانێ سەبارەت وان ڕوودانان ب ماكرۆنی گۆتیە و ب پێدڤی زانی بلەز هاریكاریێن مرۆڤایەتی بگەهنە غەزە، هەڤدەم ئەوێن ب بارمەتە هاتینە دەستەسەركرن، ژ ئالیێ حەماسێ ڤە بهێنە ئازادكرن، هەروەسا ڕێك بهێتە خوەشكرن بۆ وێ چەندێ چارەسەریەكا ستراتیژی و بنەڕەتی بۆ وێ كێشەیێ بهێتە دیتن كو بۆچوونا هەرێما كوردستانێ ئەوە دروستبوونا دولەتێ یە د ناڤبەرا ئیسرائیلێ و فلستینیان دا.
سەرۆكێ هەرێما كوردستانێ دوپاتكر كو هیچ مەترسیەك ل سەر قەوارەیێ دەستووری یێ هەرێما كوردستانێ نینە، بەلێ ئەو درۆنێن ژ ئالیێ گرۆپێن چەكدار ڤە ئاراستەی هەولێرێ و عەینولئەسەد دهێنە كرن، هیچ خزمەتەكێ ناگەهینیتە ئیراقێ و هەرێما كوردستانێ.
سەرۆكێ هەرێمێ ڕۆناهی ئێخستە سەر وێ چەندێ ژی كو ڕێككەفتنەكا ئەمنی د ناڤبەرا ئیراقێ و ئیرانی دا هاتیە ئیمزاكرن و هەرێما كوردستانێ ژی پشكەكە ژ وێ ڕێككەفتنێ و یا پێگیرە ب پرەنسیپێن وێ، ب تایبەت كو نابیت ژ ئاخا هەرێما كوردستانێ زیان بگەهیتە بەرژەوەندیێن وەلاتێن دەوروبەر و هێزێن كوردی یێن ئۆپۆزسیۆنا ئیرانێ ل دۆر وێ چەندێ هەلوەستێ هەرێما كوردستانێ ل بەرچاڤ وەرگرتیە و ب گرنگی ڤە لێ دنێڕن و هەتا ڕادەیەكێ مەزن ژی هاریكار بوون.
دوپاتكر ژی كو پێدڤیە ل سەر هەموویان ئاسایشا ئیراقێ بپارێزن و ڕێكێ نەدەن هیچ گرۆپەك ب ناڤێ ئیراقێ گەفان ل هەرێما كوردستانێ و ئیراقێ ب خوە ژی بكەت، بۆ وێ مەبەستێ ژی ب پێدڤی زانی محەمەد شیاع سۆدانی، سەرۆك وەزیرێن ئیراقێ وەكو فەرماندەیێ گشتیێ هێزێن چەكدار ڕێكێ ب وێ چەندێ نەدەت ئیراق بكەڤیتە دناڤ وان ئالۆزیێن ل دەڤەرێ هەین.
سەبارەت بابەتێ مووچەیێن فەرمانبەرێن هەرێما كوردستانێ نێچیرڤان بارزانی دیاركر كو حوكمەتا هەرێما كوردستانێ سەبارەت وی بابەتی ب تمامی ل گەل حوكمەتا ئیراقێ چوویە پێش و ب زەلالی ڕەفتار ل گەل وی بابەتی كریە و هەموو داتا ب سیستەم پێشكێشی بەغدا كرینە و بۆ ڕۆهنكرینە. ب وی شێوەی هیچ بهانەیەك بۆ حوكمەتا فیدرال نەمایە كو مووچەیێن فەرمانبەرێن هەرێما كوردستانێ وەكو پشكەك ژ ئیراقێ نە هنێریت، هەروەسا دیاركر هەرێما كوردستانێ چاڤەڕێی هەلوەستێ حوكمەتا ئیراقێ یە بۆ وێ چەندێ ئێدی وەلاتیێن هەرێما كوردستانێ چاڤەڕێی دەنگوباسێن دەزگەهێن ڕاگەهاندنێ نەبن بۆ گەهشتنا ماف و شایستەیێن وان.

سەرۆك مەسعود بارزانی پێشوازی ل لیۆ جیۆن، قونسلێ گشتیێ نوو یێ چینێ ل هەولێرێ و شاندەكێ د گەلدا كر.قونسلێ چینی سەرەرای ئاماژە دان ب پەیوەندیێن دیرۆكی د ناڤبەرا بارزانیێ نەمر و سەركردەیێن چینێ و جزبا شیوعی یا چینی و پارتی، خواست پەیوەندیێن چینی و هەرێمێ د بوارێن جۆرا و جۆرێن ئابۆری، كەلتووری، زانستی، بازرگانی و گەشتكرنا وەلاتیان زێدەتر بەر پێشڤە بچن. سەرۆك بارزانی پێزانین بۆ دیرۆك و شارستانیەتا چینێ و گەل وسەركردایەتیا چینێ هەبوون كو ئاستەنگێن گەلەك مەزن دەرباز كرینە و خزمەتەكا مەزن پێشكێشی مرۆڤایەتیێ و جیهانێ كریە و خوەشحالیا خوەژی بۆ بەرفرەهكرنا پەیوەندیێن د ناڤبەرا هەردو ئالیان دا نیشا دا.

نێچیرڤان بارزانی، سەرۆكێ هەرێما كوردستانێ ل گەل ئالینا ڕۆمانۆسكی، بالیۆزا ئەمریكا ل ئیراقێ كۆمبوو ، د دیدارەكێ دا پێشڤەبرنا زێدەتر یا پەیوەندیێن ئیراقێ و هەرێما كوردستانێ ل گەل ئەمریكا د چارچۆڤەیێ ڕێككەفتنا ستراتیژی ئەمریكی – ئیراقی دا هاتە باسكرن و هەردو ئالیان دوپاتی ل بەردەوامیا هاریكاریا هەڤپشك و گرنگ یا پاراستن و ئاسایش و سەلامەتیا هێزێن هەڤپەیمانان و هنارتیێن دبلۆماسی ل هەموو ئیراقێ كر. هەر د وێ كۆمبوونێ دا كو قونسلێ گشتیێ ئەمریكا ل هەولێرێ بەرهەڤبوو بوو، دانوستاندن ل دۆر ڕەوشا ناڤخوەیێ یا هەرێما كوردستانێ و دووماهی پێشهاتەیێن دەڤەرێ هاتنە كرن.

مەسرۆر بارزانی، سەرۆكێ حوكمەتا هەرێما كوردستانێ پێشوازی ل كاتی بونكا، بالیۆزا نوو یا وەلاتێ كەنەدا ل ئیراقێ كر. د دیدارەكێ دا باس ل گرنگیا دابینكرنا مافێن دەستووری یێن هەرێما كوردستانێ و ب هێزكرنا سیستەمێ فیدرالی ل ئیراقێ و چەند بابەتێن دی هاتە كرن. سەرۆكێ حوكمەتا هەرێمێ هیڤیا سەركەفتنێ بۆ بالیۆزا نوو یا كەنەدا ل ئیراقێ خواست، د بەرامبەر دا كاتی بونكا خواستا وەلاتێ خوە بۆ پێشڤەبرنا پەیوەندیان ل گەل هەرێما كوردستانێ ب تایبەتی د بوارێن وەبەرهینانێ و ئالوگۆریا بازرگانی و كەلتووری دەربری.

د چارچۆڤەیێ سەرەدانا خوە دا بۆ فڕەنسایێ، نێچیرڤان بارزانی سەرۆكێ هەرێما كوردستانێ ل گەل سێباستیان لوكۆرنۆ، وەزیرێ بەرگریێ فڕەنسا كۆمبوو.
د دیدارەكێ دا نێچیرڤان بارزانی سوپاسی و پێزانین بۆ پشتەڤانی و هاریكاریا لەشكری و ئەمنی یا فڕەنسا بۆ ئیراقێ و هەرێما كوردستانێ دەربڕی و ئاماژە ب ڕۆلێ كاریگەر و قوربانیێن هێزێن فڕەنسی د چارچۆڤەیێ هەڤپەیمانیا نێڤدەولەتی یا دژی داعشێ كر. هەروەسا هەڤخەمیا خوە ئاراستەی مالباتێن وان سەربازێن فڕەنسی كر كو ل ڤێ دووماهیێ د ڕوودانەكێ دا ل ئیراقێ ژیانا خوە ژ دەستدای.
ژ ئالیێ خوەڤە، وەزیرێ بەرگرییێ فڕەنسا، سەرەرای دەربڕینا پێزانینێن خوە بۆ ڕۆل و قوربانیێن پێشمەرگەی د شكاندنا داعشێ و بەرهنگاربوونا تێرۆرێ دا، دوپاتی ل پێگیری و بەردەوامیا پشتەڤانیا لەشكری یا وەلاتێ خوە بۆ ئیراقێ و هەرێما كوردستانێ كر و بەرهەڤیا وەلاتێ خوە بۆ بەرفرەهكرنا هاریكاریا هەڤپشك د چارچۆڤەیێ ڕێككەفتنا ستراتیژی د ناڤبەرا ئیراقێ و فڕەنسا دا د بوارێ لەشكری و ئەمنی دا دوپاتكر.
سەرۆكایەتیا هەرێما كوردستانێ بەلاڤكر، د كۆمبوونەكێ دا كو سوپاسالارێ فڕەنسا و هەژمارەكا پلەدارێن لەشكرێ بەرهەڤبوون، هەردو ئالیان دوماهی پێشهاتێن ڕەوشا ئالۆز یا ڕۆژهەلاتا ناڤین باسكر و دوپاتی ل گرنگیا بزاڤان بۆ ڕێگریێ ل بەرفرەهبوونا زێدەتر یا شەڕی كر، هەروەسا د هەڤڕا بوون ل سەر وێ چەندێ كو پێدڤیە ئیراق و وەلاتێن دەڤەرێ نەبنە پشكەك ژ ئالۆزیان.
د تەوەرەكێ دی یێ كۆمبوونێ دا بەرپێشڤەچوونا هاریكاری و هەماهەنگیا پێشمەرگەی و لەشكرێ ئیراقێ و مەترسیێن داعشێ ل سەر ئارامی و سەقامگیریا ئیراقێ و سووریێ و چەند پرسێن دی یێن جهێ گرنگیا هەردو ئالیان، هاتنە باسكرن.

پەیڤدارێ پارتی دیموكراتی كوردستان ڕاگەهاند: ب فەرمی پەیاما ئێكەتی نیشتمانی كوردستان بۆمە هاتیە كو تێدا داخوازا كۆمبوونێ ل گەل پارتی دكەت و ل چەند ڕۆژێن بهێن دا دێ بەرسڤێ دەین، ژ ئالیێ خوەڤە پەیڤدارێ ئێكەتی نیشتمانی كوردستان ئاشكرا دكەت كو ئێكەتیێ شاندێ خوە دیاركریە و تنێ دیاركرنا دەم و جهێ كۆمبوونێ مایە.
مەكتەبا سیاسی یا ئێكەتی نیشتمانی كوردستان پەیامەك بۆ مەكتەبا سیاسی یا پارتی دیموكراتی كوردستان هنارتیە و چاڤەڕێی بەرسڤێ یە. ئێكەتیێ خواستا خوە نیشاندایە بۆ سەردانا پارتی و كۆمبوونێ د گەلدا و پارتی ژی ب نیازە ل چەند ڕۆژێن بهێن بەرسڤا ئێكەتیێ بدەت.
مەحمود محەمەد، پەیڤدارێ پارتی دیموكراتی كوردستان گوت» مە پێكڤە كاركریە، پێكڤە مە كێشە ژی هەبوون، پەیامەك ژ ئالیێ ئێكەتیێ ڤە هەیە بۆ دەستپێكرنا كۆمبوونان د ناڤبەرا ئێكەتیێ و پارتی، ئەم ل ڤان چەند ڕۆژان مژوولی هندەك بابەتێن دی بووین، لەوما ئەم نەشیاین دەمەكی بۆ بەرسڤا پەیاما ئێكەتیێ دابنین، ب پشتڕاستی ڤە پشتی كۆنگرەیێ 14 یێ پارتی مە نیازا وێ چەندێ هەیە پێكڤە كۆمببین».
ئەڤە دێ ئێكەمین كۆمبوونا سەركردایەتیا نوو یا ئێكەتیێ بیت ل گەل پارتی دا. چەندین بابەت ل سەر مێزا كۆمبوونا هەردو ئالیان هەنە ژوان پەیوەندیێن سیاسی د ناڤبەرا هەردو ئالیان دا، هەلبژارتنێن پەرلەمانێ كوردستانێ، پێنگاڤێن حوكمەتا هەرێما كوردستانێ ل گەل حوكمەتا ئیراقێ سەبارەت دابینكرنا مووچەی و شایستەیێن دارایی یێن هەرێما كوردستانێ.
ژ ئالیێ خوەڤە سەعدی ئەحمەد پیرە، پەیڤدارێ ئێكەتی نیشتمانی كوردستان گوت» پارتی و ئێكەتی د بەرهەڤن بۆ كۆمبوونێ، مە شاندێ خوە یێ دەستنیشانكری و تنێ دیاركرنا دەم و جهێ كۆمبوونێ مایە».

سەرۆك مەسعود بارزانی ل سەلاحەدین پێشوازی ل شاندەكێ بلند یێ هەڤپەیمانیا حەموورابی كر.
د كۆمبوونەكێ دا، ئەندامێن هەڤپەیمانیێ سوپاسیا ڕۆلێ سەرەكی یێ سەرۆك بارزانی كر بۆ هاریكاریا بریندارێن كارەساتا (بەخدیدا/ حەمەدانیە) و هەردو ئالیان هەڤخەمیا خوە یا مەزن بۆ كەسوكارێن قوربایێن ڕوودانا دلتەزین یا ئاگربەربوونێ ل قەزا حەمەدانیە ڕاگەهاند كو تێدا پتر ژ سەد وەلاتیان گیانێ خوە ژ دەستدا وچەندید وەلاتیێن دی ژی بریندار بوون.
شاندێ هەڤپەیمانیا حەمۆرابی سوپاسیا سەرۆك بارزانی كر بۆ پشتەڤانیكرنێ ل پاتریارك كاردینال مار لویس ساكۆ، سەرۆكێ كەنیسەیا كلدانی ل جیهانی.
د پشكەكا دی یا وێ دیدارێ دا نوونەرێن (دەستەیا سیاسی یا بلند یا كلدانی) كو پشكەكن ژ وێ هەڤپەیمانیێ باسێ ڕەوشا كریستیانێن كلدان و ئاشۆری و سریان و ئەرمەن ل ئیراقێ و هەرێما كوردستانێ و ب تایبەت ل دەشتا نەینەوا كر ددەمەكی دا كو ئیراق بەر ب هەلبژارتنێن جڤاتێن پارێزگەهێن ئیراقێ پێنگاڤان د هاڤێژیت.
سەرۆك بارزانی سەرەرای دوپاتكرنێ ل پشتەڤانیا كریستیانان و هەموو پێكهاتەیان، دوبارە پشتەڤانی بۆ هەموو بزاڤێن ژ پێخەمەت مانا كریستیانان ل سەر ئەردێ باب و باپێرێن وان و مشەخت نەبوونا وان بۆ دەرڤەی وەلاتی دوپاتكر.
ڕەوشا سیاسی یا گشتی یا ئیراقێ و هەرێما كوردستانێ و ب هێزكرنا بنەمایێن هەڤپشكیێ و لهەڤهاتنێ و هەڤسەنگیێ و ئێكڕێزیا سیاسی و پێكڤە ژیانێ و سەقامگیریا پێكهاتەیێن كوردستانێ تەوەرەكێ دی یێ وێ دیدارێ بوو.

سەرۆكێ فەرمانگەها میدیا و زانیاری ل حوكمەتا هەرێما كوردستانێ ڕادگەهینیت: پشتی پەسەندكرنا بودجەیا گشتی یا ئیراقێ، حوكمەتا هەرێما كوردستانێ تەرازیا پێداچوونێ و هەموو پێزانین و داتایێن دارایی بۆ وەزارەتا دارایی یا ئیراقێ هنارتیە. هەڤدەم دبێژیت: نابیت مووچە وەكو بارمتە دژی خەلكێ هەرێما كوردستانێ بهێتە بكارئینان.
جوتیار عادل، سەرۆكێ فەرمانگەها میدیا و زانیاری ل حوكمەتا هەرێما كوردستانێ گوت» هەردو دیوانێن چاڤدێری (یا فیدرال و هەرێما كوردستانێ) بەردەوام د هەماهەنگیێ دانە» گوت ژی» تەرازیا پێداچوونا شەش مەهێن ئێكێ یێن ئەڤسالە، كو ژ ئالیێ هەرێما كوردستانێ ڤە هاتیە هنارتن، ژ ئالیێ بەغدا ڤە هاتیە پەسەندكرن».
دیاركر» ب پشتبەستن ب قانوونا بودجەیا گشتی یا ئیراقێ، پشتی ئێكلابوونا تەرازیا پێداچوونێ و پەسەندكرنێ، پێدڤیە شایستەیێن دارایی بهێنە هنارتن، كو هەتا نوكە پشكەكا گەلەك كێم هاتیە هنارتن».
جۆتیار عادل ڕۆهنكر ژی» ژ بلی شاندێ هەرێما كوردستانێ، سەرۆكێ حوكمەتا هەرێمێ مەسرور بارزانی سەردانا بەغدا كریە و ڕەوشا دارایی یا هەرێما كوردستانێ بۆ حوكمەتا ئیراقێ و ئالیێن سیاسی ڕۆهنكریە، ل شەش مەهێن دەستپێكا سالا 2023 هەموو پێرابوون ژ ئالیێ هەرێما كوردستانێ ڤە هاتینە بجهئینان، كو پێدڤیە مەهانە ترلیۆن دیناران بۆ هەرێما كوردستانێ بهنێرن».
ئەوژی بەرچاڤكر» هیچ گرفتەك ل بەردەم هنارتنا 700 ملیار دیناران نینە، دبیت هندەك بابەتێن تەكنیكی یێن هوور پشتی شەش مەهێن دەستپێكا ئەڤسالە، كو گرفت گەلەك دبچووكن، مابن، كو نابیت ببنە ڕێگر بۆ هنارتنا شایستەیێن دارایی یێن هەرێما كوردستانێ».
خویاكر» ئەو 700 ملیار دینارێن كو بۆ مووچەیان دهێنە هنارتن، قەرە و نابیت مەرج ل سەر بهێتە دانان».
سەرۆكێ فەرمانگەها میدیا و زانیاری ل حوكمەتا هەرێما كوردستانێ باس ل وێ چەندێ ژی كر» بەری ڕاگرتنا هنارتنا پەترۆلا هەرێما كوردستانێ، حوكمەتا هەرێمێ بەردەوام 30 ڕۆژان جارەكێ مووچە بەلاڤكریە». سەبارەت گیروبوونا هنارتنا 700 ملیاران، جوتیار عادل دبێژیت» وەزارەتا دارایی یا ئیراقێ ئەگەرێ گیروبوونا هنارتنا 700 ملیار دینارێن مووچەیێن فەرمانبەرێن هەرێما كوردستانێ یە».
ناڤبری هوشداری ژی دا كو «بزاڤ ل بەغدا بۆ لاوازكرنا هەرێما كوردستانێ هەنە و نابیت حاشا لێ بكەین، ئەڤە زیانێ ب كوردان تنێ ناگەهینیت، بەلكو زیانێ دگەهینیتە هەموو ئیراقێ».
ل دۆر بەلاڤكرنا ڕاستەوخوە یا مووچەیێن فەرمانبەرێن هەرێمێ ژ ئالیێ بەغدا ڤە، جوتیار عادل گوت» ئەو ئاخڤتنێن سەبارەت وێ چەندێ دهێنە گوتن، د ڕاست نینن و نابیت بابەتێ مووچەیان دژی خەلكێ هەرێما كوردستانێ بهێتە بكارئینان، ئەم ڕێككەفتنێ دكەین، بەلێ ل بەغدا پێگیریێ پێ ناكەن».
سەبارەت هنارتنا پەترۆلا هەرێما كوردستانێ، دبێژیت» وەكو حوكمەتا هەرێمێ، بۆ دەستپێكرنا هنارتنا پەترۆلا هەرێما كوردستانێ مە هەموو پێگیریێن خوە نیشانداینە، ئەوا مای حوكمەتا ئیراقێ و توركیایە بگەهن تێكگەهشتنێ و دوبارە دەست ب هنارتنا پەترۆلا هەرێما كوردستانێ ب ڕێكا بەندەرێ جەیهان بهێتە كرن».

بریكارێ وەزارەتا دارایی یا ئیراقێ ڕاگەهاند، د ڤێ هەفتیێ دا 700 ملیار دینارێن مووچەیێن فەرمانبەرێن هەرێما كوردستانێ دێ چنە سەر هەژمارا وەزارەتا دارایی و ئابۆری ل حوكمەتا هەرێما كوردستانێ.
دوهی دوشەمبی 30/10/2023، مەسعود حەیدەر، بریكارێ وەزارەتا دارایی یا ئیراقێ ب ڕێكا پێگەهێ خوە یێ تایبەت ل سەر تۆرا جڤاكی یا فەیسبووكێ بەلاڤكر» بۆ دانا مووچەیێن فەرمانبەرێن هەرێما كوردستانێ، د ڤێ هەفتیێ دا گۆژمەیێ 700 ملیار دیناران دێ چیتە سەر هەژمارا وەزارەتا دارایی و ئابۆری ل حوكمەتا هەرێما كوردستانێ».
سەبارەت ڤێ چەندێ، دوهی دوشەمبی وەزارەتا دارایی و ئابۆری ل حوكمەتا هەرێما كوردستانێ د بەیاننامەیەكێ دا ئاماژەكر» ل ڕۆژا دوشەمبی پێرابوونێن هنارتنا 700 ملیار دیناران ژ ئالیێ وەزارەتا دارایی یا ئیراقێ بۆ هەرێما كوردستانێ دەستپێكر، پشتی تمامكرنا پێرابوونان، بڕیارە ل نێزیكترین دەم گۆژمەیێ 700 ملیار دیناران ب ڕێكا بانكێن ڕەشید و ڕافیدەین و بانكا بازرگانی یا ئیراقێ بچیتە سەر هەژمارا بانكی یا وەزارەتا دارایی و ئابۆری ل حوكمەتا هەرێما كوردستانێ».