بەرپرسەكێ پشكا هەلبژارتن یا پارتی دیموكراتی كوردستان ئاشكراكر، بەرهەڤی بۆ هەلبژارتنێن جڤاتێن پارێزگەهێن ئیراقێ هاتینەكرن و چو بەربژارێن پارتی ژئالیێ كۆمسیۆنا بلند یا سەربخوە یا هەلبژارتنان ل ئیراقێ نەهاتینە ڕەتكرن هەروەسا دبێژیت، دێ بارەگەهێن پارتی بۆ دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ ڤەگەڕن.
نیازی حەمە عەزیز، بڕیاردەرێ پشكا هەلبژارتن یا پارتی بۆ ڕۆژنامەیا (ئەڤرۆ) گوت» پارتی بۆ هەلبژارتنێن هەرێما كوردستانێ كو بڕیارە ل 25 شوباتا سالا داهاتی بهێنە ئەنجامدان و هەلبژارتنێن جڤاتێن پارێزگەهێن ئیراقێ كو ئەوژی بڕیارە ل دوماهیا ئەڤسالە بهێنە ئەنجامدان بەرهەڤی كرینە و بەردەوام هەماهەنگی هەیە د ناڤبەرا پشكا هەلبژارتن یا پارتی و مەكتەبێن ڕێكخستنێن پارێزگەهان و هەموو لقێن دكەڤنە وان سنورێن بڕیارە هەلبژارتن تێدا بهێنە ئەنجامدان، ژئالیەكێ دیڤە بەردەوام ئەم خولێن ڕاهێنانێ بۆ كادرێن خوە ڤەدكەین هەتا شارەزایی وپێزانینێن دروست ل دۆر پڕۆسەیا هەلبژارتنان هەبن، هەموو بزاڤان ژی دكەین بۆ وێ چەندێ ب گۆڕەی بڕیار و ڕێنمایێن كۆمسیۆنێ پشكداریێ د هەلبژارتناندا بكەین، پارتی بۆ هەلبژارتنێن جڤاتێن پارێزگەهێن ئیراقێ ل چار پارێزگەهان دێ پشكداریێ كەت ئەوژی ل پارێزگەهێن نەینەوا و كەركووك و دیالا و سەلاحەدین».
نیازی حەمە ئەوی گوت» جهێ كەیفخوەشیا مەیە هەموو ناڤێن وان بەربژاران پارتی دیموكراتی كوردستان بۆ هەلبژارتنێن جڤاتێن پارێزگەهان پێشكێشی كۆمسیۆنا هەلبژارتنێن ئیراقێ كری نەهاتینە ڕەتكرن ، ئانكو چو بەربژاران پارتی بۆ هەلبژارتنێن جڤاتێن پارێزگەهێن ئیراقێ نەهاتینە لادان و ناڤێن هاتینە پەسەندكرن».
ئاماژەكر» ئەگەرێن دوورئێخستنا بەربژاران بۆ كەیسێن گەندەلیێ و گرێدانا وان ب حزبا بەعسا ژناڤچوی و چەند ئەگەر و تۆمەتێن دی ڤەدگەڕیت، بەلێ بەربژاران پارتی هەموو فلتەر دەرباز كرینە و كەسێن خودان شیان و ژێهاتینە».
ناڤبری ئاشكراكر ژی» ل دەمەكێ نێزیك دێ پارتی بارەگەهێن خوە ل دەڤەرێن كوردستانی یێن دەرڤەی ئیدارەیا هەرێما كوردستانێ ڤەكەت و پارتی دێ ڤەگەڕیت بۆ چەندین دەڤەران ژوان كەركووك ، دێ هەموو بزاڤان ژی كەین بۆ وێ چەندێ ب بەرنامەیەكێ ڕێكوپێك ل ڕۆژا چارشەمبیا بهێت 1/11/2023 دەست ب هەوا هەلبژارتنان بكەین، چونكە ب گۆڕەی كۆمسیۆنا هەلبژارتنێن ئیراقێ بڕیارە سوباهی ڕۆژا چارشەمبی هەوا پرۆپاگندەیێن هەلبژارتنێن جڤاتێن پارێزگەهێن ئیراقێ بڕێڤەچیت و بۆ دەمێ 45 ڕۆژان دێ بەردەوام بیت».

محەمەد شاكر، چاڤدێرێ سیاسی و ئەندامێ بەرێ یێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان، ڕاگەهاند، پێدڤیە مووچەیێن فەرمانبەرێن هەرێما كوردستانێ بێ كێشە بهێنە مەزاختن و پێدڤی ناكەت شاند بەردەوام بۆ مووچەیان بچیتە بەغدا.
محەمەد شاكر گوت ژی» مووچە مافەكێ سروشتیێ خەلكێ هەرێما كوردستانێ یە، مخابن كو ل بەغدا دبینین ب ڤی شێوەی ڕەفتارێ ل گەل پرسا مووچەیێن فەرمانبەرێن هەرێمێ دهێتە كرن».
پتر گوت» كاكلكا كێشەیا مووچەیان د وێ چەندێ دایە كو ل دووماهی كۆمبوونا جڤاتا وەزیرێن ئیراقێ، تەیف سامی، وەزیرا دارایی یا ئیراقێ ڕاگەهاندبوو، هەكە میزانیا پێداچوونا مەهێن تەمووز، ئاب و ئەیلوول یا هەرێما كوردستانێ نەهێتە هنارتن بۆ وەزارەتا دارایی یا ئیراقێ، 700 ملیار دینارێن مووچەیێن فەرمانبەرێن هەرێمێ ناهێنە هنارتن، د دەمەكی دا پێشتر حوكمەتا هەرێما كوردستانێ میزانیا پێداچوونا شەش مەهێن دەستپێكا ئەڤسالە هنارتیە، ب د دیدەڤانیا وان ب خوە هەموو هەژمار و پێزانینێن د ناڤ دا د زەلال بوون» .
ل ڕۆژا 14 ئێلۆنا ئەڤسالە شاندەكێ بلند یێ هەرێما كوردستانێ ب سەرۆكایەتیا مەسرور بارزانی، سەرۆكێ حوكمەتا هەرێما كوردستانێ بۆ چارەسەركرنا كێشەیێن دناڤبەرا بەغدا و هەولێرێ دا یێن تایبەت ب بودجەی و مووچەی سەرەدانا بەغدا كربوو، ژ بلی كۆمبوونێ ل گەل محەمەد شیاع سودانی، سەرۆك وەزیرێن ئیراقێ، ل گەل بەرپرسێن دی یێن ئیراقێ و ئالیێن سیاسی یێن ئیراقی كۆمببوو. پاشی جڤاتا وەزیرێن ئیراقێ بڕیاردا گۆژمەیێ دو ترلیۆن و 100 ملیار دیناران ب قەر بدەتە هەرێما كوردستانێ بۆ دەمێ سێ مەهان، ئانكو مەهانە 700 ملیار دیناران، ئەوژی بۆ دابینكرنا مووچەیێ فەرمانبەرێن هەرێما كوردستانێ.
هەرێما كوردستانێ مەهانە پێدڤی ب 920 بۆ 940 ملیار دینارایە بۆ مەزاختنا مووچەیێن فەرمانبەرێن هەرێمێ، پێشتر ژ داهاتێ پەترۆلا هەرێما كوردستانێ زێدەتر ژ 700 ملیار دیناران بۆ مووچەی دهاتە تەرخانكرن، بەلێ پشتی ڕاگرتنا هنارتنا پەترۆلا هەرێما كوردستانێ ژ ئەگەرێ بڕیارەكا دادگەها ناڤبەریێ ل پاریس ل 25 ئادارا 2023 هنارتنا پەترۆلا هەرێما كوردستانێ هاتە ڕاگرتن و بۆ بەلاڤكرنا مووچەیێن فەرمانبەرێن هەرێمێ پشتبەستن ب داهاتێ ناڤخوەیی و ئەو پارەیێ ئیراق بۆ هەرێما كوردستانێ دهنێریت دهێتە كرن.

حوكمەتا هەرێما كوردستانێ ڕاگەهاند: بڕیار بوو ل هەفتیا بۆری گۆژمەیێ 700 ملیار دینار وەكو مووچەیێن فەرمانبەرێن هەرێما كوردستانێ بهێنە هنارتن و دەست ب بەلاڤكرنا مووچەی بهێتە كرن، بەلێ جارەكادی بەرۆڤاژی هەموو داخۆیانی و ئاخڤتن و باسێن دناڤ كۆمبوونان دا و ڕێككەفتنان هنارتنا وی پارەی هاتە پاشئێخستن.
پێشەوا هەورامانی، پەیڤدارێ حوكمەتا هەرێما كوردستانێ د بەیاننامەیەكێ گوت» د ڤێ هەفتیێ دا شاندێ هەرێما كوردستانێ دێ چیتە بەغدا و ل ڕۆژا سێشەمبی حوكمەتا فیدرالی كۆمبوون هەیە، دخوازین بڕیارەكا ڤەبر و دوماهیێ ل دۆر ڤێ چەندێ بدەت و ئێدی فەرمانبەرێن هەرێما كوردستانێ د نە ڕەحەتیێ دا نەمینن».
پەیڤدارێ حوكمەتا هەرێما كوردستانێ گوت ژی» د دەمێ بۆری دا نیەتا ڕۆهن یا حوكمەتا هەرێما كوردستانێ هاتینە نیشاندان بۆ ڕێككەفتنێ و گەهشتن ب ئەنجامەكی ل گەل حوكمەتا فیدرالی. هیچ تشتەك ل سەر مە نەمایە كو ئەنجام بدەی، بەلێ هەكە ڕەوش ب ڤی جۆری بەردەوام بیت، ل بەرانبەر پێشێلكرنا مافێ دەستووریێ خەلكێ هەرێما كوردستانێ نەشێین بێ دەنگ بین».
پێشەوا هەورامانی باس ل وێ چەندێ ژی كر» بڕیاربوو ل هەفتیا بۆری گۆژمەیێ 700 ملیار دینارێن مووچەیێن فەرمانبەرێن هەرێما كوردستانێ بهێنە بهنارتن و دەست ب بەلاڤكرنا مووچەیان بكەین، بەلێ جارەكادی بەرۆڤاژی هەموو داخۆیانی و ئاخڤتن و باسێن دناڤ كۆمبوونان و ڕێككەفتنان دا هنارتنا پارەی هاتە پاشئێخستن».

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕادگەهینیت: كابینەیا نوكە یا حوكمەتا ئیراقێ ژ هەموو حوكمەتێن پێشتر باشترە، هەروەسا دبێژیت: گەلەك بڕیار ب دلێ وێ حوكمەتێ نەبوون، بەلێ د بن فشارێن سیاسی دا دەركرینە.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ل دۆر سەرەدانا شاندێ هەرێما كوردستانێ بۆ بەغدا گوت» مەسرور بارزانی، سەرۆكێ حوكمەتا هەرێما كوردستانێ، لژنە و شاندێ هەرێما كوردستانێ ڕاسپارد، بەرپرسێن حوكمەتا ئیراقێ هەر داخوازیەك هەبیت، د دەمێ خوە دا بجهبینن و هیچ گومانەكێ بۆ ئەوان نەهێلن».
سیپان شێروانی گوت ژی» حوكمەتا هەرێمێ ب بێهنفرەهی و ئارامی مامەلە ل گەل بەرپرسێن حوكمەتا ئیراقێ كریە، بۆ وێ چەندێ ب شێوازەكێ دستووری ئەو باوەریا مە بدەستڤەبینن. ئەو هووربینیا كو ل دەمێ خوە هەردو دیوانێن چاڤدێریا هەرێمێ و فیدرالی ئەنجامدای ب باشی بڕێڤەچووی، ل گەلەك قۆناغان دا جهێ دەستخوەشیێ بوو ل دەف ئەوان، سوپاسیا حوكمەتا هەرێمێ كریە بەرامبەر وان پێزانینێن كو پێ هاتینە دان».
دیاركر» د ئیراقا نوو دا حوكمەت گەلەك لاوازتر بوویە ل بەرامبەر چەند ئالیەكێن سیاسی، یان ژی حوكمەتا ئیراقێ چەندین جاران ل بن كاریگەریا حزبێن سیاسی دا بوویە، دبیت گەلەك بڕیار هەبن ب دلێ حوكمەتا ئیراقێ نەبن، بەلێ ئالیێ سیاسی فشار كریە و قەبوول كریە، یان ژی هندەك جاران هندەك ژ وەزیران پێگیر نابن ب بڕیارێن سەرۆكایەتیا جڤاتا وەزیرێن ئیراقێ، یان پێگیرن ب ئەجندەیێن حزبێن خوە».
ڕۆهنكر ژی» كابینەیا نوكە یا حوكمەتا ئیراقێ، ب سەرۆكایەتیا محەمەد شیاع سودانی گەلەك باشترە ژ وان حوكمەتێن كو ل پێشتر هەبوون، حوكمەتا محەمەد شیاع سودانی حوكمەتەكا ڕژدە و ناخوازیت كێشەیێن هەلاویستی د ناڤبەرا حوكمەتا هەرێما كوردستانێ و حوكمەتا فیدرال دا بمینن، بەلێ كێشە حزب و ئالیێن سیاسی نە».

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕادگەهینیت، وەزارەتا دارایی یا ئیراقێ یا پێگیر نینە ب ڕێككەفتنێ ل گەل حوكمەتا هەرێما كوردستانێ و بابەتێ مووچەی وەكو فشار دژی حوكمەتا هەرێما كوردستانێ دهێتە بكارئینان.
شێروان دوبەردانی، ئەندامێ جڤاتا نوونەرێن ئیراقێ ژ فراكسیۆنا پارتی گوت» وەزارەتا دارایی یا ئیراقێ یا پێگیر نینە ب وێ ڕێككەفتنا كو د ناڤبەرا حوكمەتا هەرێما كوردستانێ و حوكمەتا ئیراقێ دا هاتیە كرن، ب گۆڕەی ڕێككەفتنێ پێدڤیە مەهانە 700 ملیار دینار وەكو قەر بۆ هەرێما كوردستانێ بهنێرن، تاكو قانوونا بودجەیا گشتی دهێتە بجهئینان و پشكا هەرێما كوردستانێ دهێتە هنارتن، نە هنارتنا وی گۆژمەیێ پارەی د دەمێ خوە دا ستەمە بەرامبەر هەرێما كوردستانێ دهێتە كرن».
شێروانی گوت ژی» هندەك ئالی دخوازن فشارێ ل سەر حوكمەتا هەرێما كوردستانێ دروست بكەن، دەستێ هندەك ئالیێن سیاسی یێن كوردستانێ ژی تێدایە، ئەو گۆژمەیێ پارەی كو ڕێككەفتن ل سەر هاتیە كرن، پێدڤیە مەهانە ددەمێ خوە دا بۆ هەرێما كوردستانێ بهێتە هنارتن».
دوپاتكر ژی» ئەو فشارا ل سەر حوكمەتا هەرێما كوردستانێ وپارتی دیموكراتی كوردستان دهێتە كرن دبیت پەیوەندی ب هەلبژارتنێن جڤاتێن پارێزگەهێن ئیراقێ و هەلبژارتنێن پەرلەمانێ كوردستانێ ڤە هەبیت، ئەوێن كو هەڤپشكێن پارتی نە د حوكمەتا هەرێما كوردستانێ دا، بزاڤێ دكەن فشارێ بێخنە سەر حوكمەتێ وپارتی، بۆ وێ چەندێ موزایەدێ ب بابەتێ مووچەیێن فەرمانبەران بكەن».
ڕۆهنكر ژی» د كۆمبوونا جڤاتا وەزیرێن ئیراقێ دا بڕیار ل سەر وێ چەندێ هاتیە دان مەهانە 700 ملیار دینار بۆ هەرێما كوردستانێ بهێنە هنارتن، كو وەزیرێ دارایی ب خوە بەرهەڤی كۆمبوونێ بوو، پرسیار ئەوە بۆچی نوكە ڕێگرە ل هنارتنا پارەی بۆ هەرێما كوردستانێ، ئەڤە ژ بلی فشارا سیاسی ل سەر هەرێما كوردستانێ چ دیتر نینە».
دەربارەی هەلویستێ كوردان ل بەرامبەر ب سیاسیكرنا مووچە و بودجەیا هەرێما كوردستانێ ل بەغدا، شێروان دوبەردانی دبێژیت» پێدڤیە كورد ل بەرامبەر بەغدا ئێك هەلویست بن و نابیت ئێدی یاری ب قوتێ خەلكێ هەرێما كوردستانێ بهێتە كرن».
سەبارەت كۆمبوونێن داهاتی یێن جڤاتا نوونەران، گوت» ل 9/11/2023 هەتا 9/1/2024 بێهنڤەدانا فەرمی یا جڤاتا نوونەرێن ئیراقێ یە، بەلێ كۆمبوونێن شاندێ حوكمەتا هەرێما كوردستانێ و حوكمەتا ئیراقێ ل سەر پرسێن گشتی دێ د بەردەوام بن».

چاڤدێرەكێ سیاسی دبێژیت، بۆ چارەسەركرنا كێشەیان د ناڤبەرا حوكمەتا هەرێمێ و ئیراقێ دا بڕیارا بەغدا ل دەف هندەم ئالیێ سیاسی یە نەكو حوكمەتا ئیراقێ.
دانا جەزا چاڤدێرێ سیاسی و ئەندامێ بەرێ یێ جڤاتا نوونەرێن ئیراقێ زێدەتر گوت» ل بەغدا بڕیار ل دەف حوكمەتا ئیراقێ نینە بۆ چارەسەركرنا كێشەیان، بەلكو بڕیار ل دەف ئالیێن سیاسی یێن ئیراقی یە، ب تایبەتی ئەو بڕیارێن گرێدای بابەتێن ستراتیژی یێن گرنگ، ئەو ئالیێن سیاسی ل پشت پەردێ حوكمەتا ئیراقێ ب ڕێڤە دبەن و ئەوان كاریگەری ل سەر هەر پرسەكا گرێدای ب بڕیارێ ڤە بیت هەیە، لەوما دڤێت پرسیارێ ژ وان بكەین ئایا وان نیازا چارەسەریا كێشەیان هەیە یان نە؟».
گوت ژی» نەشێین بێژین ل بەغدا نیازەكا سەدا سەد هەیە بۆ چارەسەركرنا كێشەیان، لەوما هەر دەمەكێ ل سەر چەند مەلەفان بگەهینە ڕێككەفتنێ ئەو مەلەفەكێ دی دبینن، ئەڤ چەندە ژی هەم دروستكرنا فشارێ یە ل سەر هەرێما كوردستانێ و هەم ژی مژوولكرنا جادەیێ یە، هەروەسا دخوازن بێژن كو ل بەغدا ب شێوەیەكێ مەركەزی بڕیارێ ددەن».
ئاماژەكر» نوكە ئیراق مەیدانەكا بەرهەڤكریە بۆ وێ چەندێ گەلەك وەلاتێن دەڤەرێ و یێن دی ژی كێشەیێن خوە بینن وێ مەیدانێ، ئەو بابەتێن ڕوو ب ڕوویێ هەرێما كوردستانێ دبن، پشكەك ژێ گرێدای ب وێ چەندێ كو ناكۆكی و بۆچوونێن جودا ل سەر دەستووری هەنە، كێشە ل سەر ماغان هەیە و تێكگەهشتن نینە بۆ بابەتێ فیدرالیەتێ ل ئیراقێ، هەڤدەم پەشێمان بوونەك هەیە ل دەف هندەك ئالیێن ئیراقێ كو ب دیتنا وان پێدڤی بوو ئیراق یا فیدرالی نەبا، بەلكو وەكو پێشتر مەركەزی با و هەرێما كوردستانێ وەكو پارێزگەهەكێ با، لەوما نوكە ڕێگریێ ل سوننەیان دكەن هەرێمەكا دی ل ئیراقێ دروست بكەن، هەروەسا دەستێوەردانەكا هەرێمایەتی ل ئیراقێ هەیە كو كار بۆ بەرژەوەندیێن خوە دكەن، دبیت بزاڤێن هندەك ئالیان بۆ وێ چەندێ بیت هەرێما كوردستانێ لاواز بكەن یان ڕێگرێ ل گەشەكرنا وێ بكەن».

عەزیز هەورامی:

نڤیسەرەكێ دیار یێ كوردستانا ڕۆژهەلات دبێژیت پاراستنا قەوارەیێ دەستووریێ هەرێما كوردستانێ و كاركرنا حزبان بۆ بەرژەوەندیا هەرێما كوردستانێ بەری بەرژەوەندیێن حزبی، بلا كارێ سەرەكی یێ ڤێ قۆناغێ بیت، هەروسا دیاردكەت: حوكمەتا هەرێما كوردستانێ بوویە جهێ ئومێدا هەموو كوردان.
حامد عەبدولمەلیك عارف، بۆ ڕۆژنامەیا ئەڤرۆ گوت» مە ل كوردستانا ڕۆژهەلات ئومێد ب هەرێما كوردستانێ هەیە و دخوازین یا سەركەفتی بیت».
دیاركر ژی» گەلەك گرنگە حزب و ئالیێن سیاسی ل هەرێما كوردستانێ پێكڤە كاربكەن و گەشێ ب حوكمەت و دەزگەهێن هەرێما كوردستانێ بدەن و ئەڤە دێ بیتە ئەگەرێ گەشەكرنا ڤێ هەرێمێ و پێدڤیە چو جاران هزر د دو هەرێمیێ دا نەهێتە كرن ژبەركو هەرێما كوردستانێ جهێ ئومێدا هەر كوردەكی یە».
ئاماژەكر» پێدڤیە ئالیێن سیاسی ل هەرێمێ پێگیر بن ب خواستا وەلاتیان د پاراستنا قەوارەیێ دەستووریێ هەرێما كوردستانێ دا كو ئومێدا 40 ملیۆن كوردایە، خەلك دخوازیت حوكمەتەكا ئێكگرتی ل هەرێمێ هەبیت كو حزب نەشێت پێگەهێ خوە ب سەر حوكمەتێ دا بلند بكەت».
هەروەسا دبێژیت» د دەستوورێ ئیراقێ دا هاتیە پێدڤیە هەرێما كوردستانێ یا سەربخوە بیت د وان دەستهەلاتێن هەین دا، دڤێت ئالیێن سیاسی ئاگەهدار بن و دەست ژ ئارمانجێن خوە یێن حزبی بەردەن و بۆ كوردستانەكا ئازاد كار بكەن تاكو بشێت خواستا گەلێ كورد بەرهەم بینیت، ئەوژی تاكە ڕێكە و وەلاتی ژی دێ پشتەڤانێن وێ بن ونابیت ئەو هزرە هەبیت هەرێما كوردستانێ جارەكادی بچیتە دبن دەستهەلاتا ئیراقێ دا».

ئەندامەکێ بەرێ یێ پەرلەمانێ تورکیا و سیاسەتمدارێ ناڤدار یێ باکورێ کوردستانێ راگەهاند، هەکە ل تورکیا زۆرداری ل کوردان نەهاتبا کرن و مافێن وان نەهاتبا بنپێکرن بێگومان دا رەوشا تورکیا گەلەک باشتر بیت، مخابن هەتا نها ژی دەستهەلاتدارێن تورکیا وانە ژ دیرۆکێ وەرنەگرتینە و ل سەر شاشیێن چەندین سالێن بۆری د رژدن و ژ بەر ڤێ یەکێ ژی رەوشا تورکیا هەر رۆژ خرابتر لێ دهێت.

ئەحمەد تورک سیاسەتمەدارێ ناڤدارێ کورد و ئەندامێ بەرێ یێ پەرلەمانێ تورکیا راگەهاند، ب سالانە ل تورکیا و وەلاتێن دی یێن رۆژهەلاتا ناڤین زۆرداری ل گەلێ کورد دهێتە کرن، مافێ کوردان دهێتە بنپێکرن و ژ بەر ڤێ یەکێ ژی نە ل تورکیا و نە ژی ل وەلاتێن دی یێن رۆژهەلاتا ناڤین ئارامی نینە، هەردەم ئالۆزی هەنە، مخابن بەرپرسێن تورکیا هەتا نها ژی وەکو پێدڤی وانە ژ دیرۆکێ وەرنەگرتینە، هێشتا ژی دخوازن ب تەپەسەرکرنێ و ژناڤبرنا ل گۆر خوە پرسا کوردی چارەسەر بکەن، لێ دیرۆکێ سەلماندیە کورد ژناڤ ناچن و هەتا نها ژی کورد بۆ بدەستڤەئینانا مافێن خوە خەباتێ دکەن، ژ بەر ڤێ یەکێ ژی دەم یێ هاتی بەرپرسێن تورکیا ب رەنگەکێ راست سەرەدەریێ ل گەل کوردان بکەن، دڤێت کورد ژی وەکو هەموو گەلێن دی یێن رۆژهەلاتا ناڤین و جیهانێ بگەهنە مافێن خوە.
ناڤهاتی د پشکەکا د یا داخۆیانیا خوە دا ئەو یەک ژی دیار کر، ژ بەر شەری و ئالۆزیێن چەندین سالێن بۆری زیانێن گەلەک مەزن ژی گەهشتینە تورکیا، مە بەری نها ژی گەلەک جاران دیار کریە، کو ب شەری و کوشتنێ چو پرسەک ناهێتە چارەسەرکرن، مخابن نها دەستهەلاتا ئاکپارتیێ جارەکا دی دڤێت ب شەری و کوشتنێ کوردان ژناڤ ببەت، لێ ئەو ژی باش دزانن د بزاڤێن خوە دا سەرکەفتی نابن، دڤێت ب رەنگەکێ زانستی و ل گۆر راستیا نها یا جیهانێ پرسا کوردی ل تورکیا بهێتە چارەسەرکرن، دڤێت کورد ژی بگەهنە مافێن خوە یین رەوا و گۆت: (مخابن نها وەسا لێ هاتیە دەمێ تو بەحسێ ئاشتیێ دکەی دێ سکالا ل سەر تە هێنە تۆمار کرن، ل وەلاتەکێ ئاشتی وەکو تاوان بهێتە دیتن بێگومان رەوش باش نابیت، پێدڤیا تورکیا ب ئاشتیێ و دیموکراسیێ هەیە، تورکیا نەچارە خوە بگوهۆڕیت، ب سالانە ئەم دبێژین ب شەری و کوشتنێ نابیت، دڤێت تورکیا خوە نێزیکی ئۆرۆپا بکەت دا پێش بکەڤیت، مخابن یێن نها تورکیا برێڤە دبەن تنێ هزرا بەرژەوەندیێن خوە دکەن و ژ بەر ڤێ یەکێ ژی رۆژ ب رۆژێ رەوشا سیاسی، ئابووری، جڤاکی و ژیانێ ل تورکیا خرابتر بوویە).
سیاسەتمەدارێ کورد ئەو یەک ژی دیار کر، دڤێت هەموو کەس بزانن هەکە پرسا کوردی ل تورکیا بهێتە چارەسەرکرن دێ تورکیا گەلەک بهێز کەڤیت، دەمێ پرسا کوردی ل تورکیا بهێتە چارەسەرکرن دێ رەوشا ناڤخوەیی یا تورکیا ئارام بیت، ئەو پارێن نها بۆ شەری دهێتە مەزاختن هەکە بۆ ئاڤەدانیێ بهێتە مەزاختن دێ تورکیا د چەند سالان دا بیتە ئێک ژ وەلاتێن هەری پێشکەفتی و خوەش بۆ ژیانێ ل دەڤەرێ و هەتا ل جیهانێ ژی، ژ بەر ڤێ یەکێ ئەم دبێژین شەر چارەسەری نینە و دڤێت ب رێیا دانوستاندنان و ئاشتیێ پرسا کورد ل تورکیا بهێتە چارەسەرکرن.
ئەحمەد تورک د دووماهیا ئاخڤتنا خوە دا داخواز ژ دەستهەلاتا نها یا تورکیا ژی کر، دەست ب قۆناغەکا نوو یا ئاشتیێ ل گەل کوردان بکەت، چونکی نها پتر ژ هەر دەمەکێ پێدڤیا تورکیا ب ئاشتیێ هەیە و خەلکێ تورکیا ژی دخوازن ئێدی شەرێ نها بهێتە راگرتن.

سەرۆك مەسعود بارزانی ل سەلاحەددین پێشوازی ل ئێریك شوڤالییێ بالیۆزێ فڕەنسا ل ئیراقێ كر.
د دیدارەكێ دا شوڤالییێ سلاڤێن سەرۆكێ فڕەنسی ماكرۆن گەهاندنە سەرۆك بارزانی هەروەسا هەردو ئالیان باس ل ڕەوشا سیاسی و ڕوودانێن دەڤەرێ كر. پەیوەندیێن دناڤبەرا حوكمەتا هەرێما كوردستانێ و حوكمەتا ئیراقا فیدرال تەوەرەكێ دی یا دیدارێ بوو و بزاڤێن چارەسەركرنێ بلند هاتنە هەلسەنگاندن. بالیۆزێ فڕەنسا ل ئیراقێ دەستخوەشی ل بڕیارا سەرۆك بارزانی كر كو ژ پێخەمەت ئارامكرنا ڕەوشێ بارەگەهێ جڤاتا سەركردایەتیا پارتی دیموكراتی كوردستان پێشكێشی زانكۆیا كەركووك كر و بڕیارەكا حەكیمانە هەژمارت.

سەرۆك مەسعود بارزانی ب هەلكەفتا وەغەركرنا نڤیسەر و ڕەوشەنبیرێ ناڤدارێ ئوردنێ سالح قەلاب پەیامەكا هەڤخەمیێ بەلاڤكر و تێدا هاتیە: ب مخابنیەكا مەزن ڤە دەنگوباسێ وەغەركرنا نڤیسەر و ڕەوشەنبیرێ ناڤدارێ ئوردنی سالح قەلاب گەهشتە من، كو دۆستەكێ نێزیك یێ من بوو و بەرگریكارێ دلسۆزێ گەلێ كوردستانێ بوو. سەرەخوەشیێ ل برایێ بەڕێز شاهـ عەبدوللایێ دویێ پاشایێ ئوردن و مالباتا ڕەحمەتی سالح قەلاب دكەم.