ئەندامەكێ كۆمیتەیا ناڤین یا پارتی دیموكراتی كوردستان ئاماژە ب وێ چەندێ دكەت كو هیچ بهەنەیەك یا قبوولكری نینە بۆ وێ ئێكێ هەلبژارتنێن پەرلەمانێ كوردستانێ بهێنە پاشئێخستن یان ئاستەنگ ل بەردەم بهێنە دروستكرن.
ئومێد خۆشناو، ئەندامێ كۆمیتەیا ناڤین یا پارتی دیموكراتی كوردستان گوت» هیڤیدارین ژ بەغدا هیچ ئالیەكی سیاسی یان هیچ ئاراستەیەك نەبیت بۆ وێ چەندێ ئاستەنگان ل بەردەم هەلبژارتنێن پەرلەمانێ كوردستانێ دروست بكەت، نابیت ل ناڤخوەیا هەرێما كوردستانێ ژی بەهانە بۆ هەر پاشئێخستنەكێ هەبیت ژ بەر كو پەرلەمانێ كوردستانێ وەكو دەزگەهەكێ قانوون دانانێ و چاڤدێریێ ژ ئەگەرێ بڕیارا دادگەها بلند یا فیدرالی ل ئیراقێ هاتیە ڕاگرتن، هەروەسا جڤاتێن پارێزگەهێن هەرێما كوردستانێ ژی ب هەمان شێوە هاتینە ڕاگرتن ب بڕیارەكا دادگەها بلند یا فیدڕالی ل ئیراقێ، كو ئەو هەردو دەزگەهە د گرنگن بۆ چاڤدێریێ بەلێ نوكە هاتینە پەككەفتیكرن، ژ بلی وێ چەندێ ژی كۆمسیۆنا بلند یا هەلبژارتن و ڕاپرسیان ژی ل هەرێما كوردستانێ ب هەمان شێوە هاتیە ژ کارکەفتن لەوما نابیت ئێدی دەزگەهێن فەرمی یێن هەرێما كوردستانێ ببنە قوربانیێن بهانەیێن سیاسی».
وی ئەندامێ كۆمیتەیا ناڤین یا پارتی دیموكراتی كوردستان ئەوژی بەرچاڤكر» هیڤیدارین ژ بەغدا ب زووترین دەم دەنگ ل سەر كۆمسیۆنا بلند یا سەربخوە یا هەلبژارتنان ل ئیراقێ بدەت و ئەو ژی ژ بەر بهانەیێن سیاسی نەهێتە پەكخستن تاكو گرفت ل بەردەم هەلبژارتنێن پەرلەمانێ كوردستان دروست ببیت و هەر چ زوویە دەست ب بەرهەڤیان بۆ ئەنجامدانا هەلبژارتنێن پەرلەمانێ كوردستانێ بهێنە كرن و ل دەم و ژڤانێ خوە یێ دیاركری دا بهیچنە ئەنجامدان كو ژ ئالیێ سەرۆكێ هەرێما كوردستانێ ڤە هاتیە دانان».

لەزگین جوقی

وەكیلێ‌ میرێ‌ ئێزدیان ڕاگەهاند، حوكمەتا هەرێما كوردستانێ‌ ب باشترین شێوە پشتەڤانیێ‌ ل ئێزدیان دكەت و د بەرامبەر دا حوكمەتا ئیراقێ چو پشتەڤانیێ‌ ل ئێزدیان ناكەت، هەروەسشا ئاماژەكر: ل سالا 2014ێ‌ شنگال تووشی جینوسایدێ‌ بوو، بەلێ هەتا نوكە ژی حوكمەتا ئیراقێ ئاگەهـ ژ ڕەوشا ئێزدیان نینە.
هەرمان میرزا بەگ، وەكیلێ‌ میرێ‌ ئێزدیان گوت» ڕەوشا ئێزدیان ل شنگالێ‌ ڕۆژ بۆ ڕۆژی خراپترە و حوكمەتا ئیراقێ یا بەرهەڤ نینە ڕەوشا شنگالێ‌ چارەسەر بكەت هەتا پرۆژەیێن خزمەتگوزاری ژی بۆ وەلاتیان ل شنگالێ‌ دروست ناكەت. ئەو كارەساتا ب سەرێ‌ ئێزدیێن توركیا و سووریێ هاتی نوكە ب سەرێ‌ ئێزدیێن شنگالێ‌ دهێت دبن دەستێ‌ گرۆپێن نەشەرعی دا كو ئەو گرۆپ بتنی بۆ مالویرانیا ئێزدیان كاردكەن لێ‌ كەس نەشێت ئاخا شنگالێ‌ ژ هەرێما كوردستانێ‌ جوداكەت وهەر دێ‌ ڕۆژەك هێت ئەو گرۆپێن نەشەرعی دێ‌ دەستان ژ شنگالێ‌ بەردەن».
هەرمانی ئاماژە دا وی چەندی ژی كو» شنگال ل سەر دەستێ‌ پارتی و سەرۆك بارزانی ببیتە پارێزگەهـ هەموو ئاوارە دێ‌ زڤرنە شنگالێ‌ و ئەو پێكڤەژیانا ل كوردستانێ‌ هەی بوویە ئەگەر ئێزدی هەست ب هەبوونا خوە بكەن ونوكە ب ديدەڤانیا هەموو وەلاتێن جیهانێ‌ ئەزموونا پێكڤەژیانا ل هەرێما كوردستانێ‌ هەی ل گەلەك وەلاتان نینە وحوكمەتا هەرێما كوردستانێ‌ بێی جوداهی پشتەڤانیا هەموو ئایین ونەتەوەیان دكەت لەورا ژی خەلكێ‌ شنگالێ‌ دبن خیڤەتان دا ماینە ونەشیاینە بزڤرن شنگالێ‌ چونكە پێكڤەژیان ل شنگالێ‌ ژئالیێ گرۆپێن نەشەرعی ڤە یا هاتیە تێكدان».
هەرمان میرزا بەگ ڕۆهنكر ژی» حوكمەتا هەرێما كوردستانێ‌ یا ڕژدە ل سەر بجهئێنانا ڕێككەفتنا شنگالێ‌ بەلێ‌ حوكمەتا ئیراقێ پێنگاڤان ناهاڤێژیت وڕێككەفتنی بجهنائینیت ونوكە بەغدا دستووری و قانوونێ‌ بجهنائینیت، ژ بەر كو هەكە دستوور و قانوونێ‌ بجهبینیت دێ‌ ڕەوشا شنگالێ‌ خوەش بیت ودێ‌ ئاوارە ژی ڤەگەرن «.
وەكیلێ میرێ ئێزدیان ئەوژی گوت» گوهۆڕینا دیموگرافی ل شنگالێ‌ هەیە ونوكە خانی و ئەرد دهێنە كرین ودێ‌ ڕۆژەك هێت گەلەك كارتێكرن ل ئێزدیان هێتە كرن وبەردەوام خەلكێ‌ شنگالێ‌ دهێنە هاندان قەستا دەرڤەی وەلاتی بكەن وئەو گرۆپین نەشەرعی مەترسی نە ل سەر ژیانا ئێزدیان ونوكە چو پێكڤەژیان و خوەشی ل شنگالێ‌ نینە».
زێدەتر گوت» هەتا پێشمەرگێ‌ كوردستانێ‌ وپارتی دیموكراتی كوردستان نە زڤرنە شنگالێ‌، ڕەوشا شنگالێ‌ خوەش نابیت وئارامی و خوەشی لێ پەیدا نابیت ژ بەر كو ئەو جه و دەڤەرێن پێشمەرگە و پارتی تێدا بیت ئارامی و خوەشی تێدا هەیە ونوكە هەموو خەلكێ‌ شنگالێ‌ چاڤەڕێی زڤرینا پارتی بۆ شنگالێ‌ دكەن وهەر دەمێ‌ پێشمەرگە و پارتی زڤرینە شنگالێ‌ دێ‌ ئاوارە ژی زڤرن».

هەولێر، قائید میرۆ

شارەزایەكێ قانوونی ئاماژە ب وێ چەندێ دكەت بكارئینانا دادگەها فیدرالی بۆ دژایەتیا هەرێما كوردستانێ كاریگەری ل سەر سیستەمێ فیدرالی هەیە و مخابن دەستهەلاتدارێن نوكە یێن ئیراقی باوەری ب سیستەمێ فیدڕالی و سیستەمێ دیموكراسیێ نینە هەروەسا دبێژیت، هەرگاڤا حوكمەتا فیدرالی بهێز كەفت ئەو هەموو شیانێن خوە بكاردئینن ل دژی حوكمەتا هەرێمێ. ژوانا شێوازێ تایبەتكرنا كەیسێ هەلوەەشاندنا بڕیارا سەرۆك وەزیرێ ئیراقێ سەبارەت ڕادەستكرنا بارەگەهێ پارتی ل پارێزگەها كەركوكێ.
شارەزایێ قانوونی جەواد مستەفا ستوپەیی، بۆ ڕۆژنامەیا (ئەڤرۆ) گوت «یاریكرن ب دادگەها فیدرالی كاریگەریێ نە بتنێ دكەتە سەر دەسەلاتێن هەرێمێ، بەلكو ژبۆ بێ ئەرزشكرنا سیستەمێ فیدرالی ل ئیراقێ بكاردئینن، چونكی وان هیچ باوەری نە ب سیستەمێ فیدرالی و نە ب دیموكراسیێ نینە، بەلكو هەموو شیانێن خوە بكاردئێخن بۆ ڤەگەراندنا سیستەمێ مەركەزی ل ڤی ولاتی، داكو ڕاستەوخوە دیكتاتوریەتا خوە ل سەر گەلێ كورد بسەپینن و هندەك ئالیێن دی دا، ل هەر ولاتەكێ فیدڕالی هەرێمێن فیدڕالی دەست ژ گەلەك دەستهەلاتێن خوە بەرددەت بۆ حوكمەتا فیدڕالی وەكو دەستهەلاتا دەرڤە و بەرگری و دارایی و هندەك دەستهەلاتێن دی دا حوكمەتا فیدڕالی بهێز بكەڤیت، د بەرامبەردا دا بشێت هەموو پێدڤیێن هەرێمان دابین بكەت، بەلكو ل ڤی وەلاتی ئەڤ كریارە بەروڤاژییە، هەرگاڤا حوكمەتا فیدڕالی بهێز كەفت ئەو هەموو شیانێن خوە بكاردئینن ل دژی حوكمەتا هەرێمێ. ژوانا شێوازێ تایبەتكرنا كەیسێ هەلوەشاندنا بڕیارا سەرۆك وەزیرێ ئیراقێ سەبارەت ڕادەستكرنا بارەگەهێ پارتی ل پارێزگەها كەركوكێ، كو ڕێككەفتن ل سەر هاتیەكرن د ناڤبەرا سەرۆك وەزیرێ هەرێمێ و سەرۆك وەزیرێ حوكمەتا فیدراڵی دا، د بەرامبەردا ئالیگرێن حەشدا شەعبی و شوڤینیێن ئەرەب و توركمان ڕێكا د ناڤبەرا هەولێر و كەركوكێ دا بۆ دەمێ چەندین ڕۆژان دادئێخن، ئەڤ بابەتێ دائێخستنا ڕێكێ و خوەپیشاندەرێن كورد بابەتەكێ لاوەكییە و تایبەتە ب دادگەهێن ناڤخوەیی، بەلكو وان تایبەت كریە ب دادگەها فیدڕالی، شێوازێ ڕێڤەبرنا ڤێ كەیسێ ب شێوازەكی نەقانوونی بوویە، د ئێك ڕۆژ دا ئەڤ كەیسە پێشكێشی دادگەها فیدڕالی كریە و هەر د هەمان ڕۆژدا بڕیارا پاشئێخستنێ ل سەردا بێ لێڤەكولین، كو ئەڤە كریارەكا نە قانوونی یە، كریارێن ب ڤی ڕەنگی ل هیچ دادگەهێن جیهانێ ڕوونادەن. كو پێدڤی بوو ئەڤ كەیسە ل دژی وان كەسان با ئەوێن خیڤەت هەڵداین و ڕێكا سەرەكی یا هەولێر – كەركوكێ دائێخستی، ئەڤ كەیسە پێشكێشی دادگەهەكا ناڤخوەیی كربا نەكو دادگەها فیدرالی، هەروەسا نەكو ل دژی خوەنیشادەرێن كورد، چونكی وان ئێكەم جار كێشە دروستكریە».
ڤی شارەزایێ قانوونی گوت ژی» ل هەموو وەلاتێن جیهانێ دادگەەــ ب تایبەتی دادگەها فیدڕالی بكاردهێت ژ بۆ ئێكلاكرن و چارەسەركرنا ئاریشەینا بتایبەتی ئاریشەیێن دەستووری، نەكو ژ بو مەزنكرنا برینان، بەلكو ئەڤ دادگەهە بكار دهێت ژبۆ دەركرنا بڕیارێن سیاسی ل دژی هەرێما كوردستانێ و دروستكرنا ئاریشەیان، كو ڤان بڕیاران شیانێن تانە لێدانێ نینە. ژبەر ڤی ئەگەرێ پێدڤیە سەركردایەتیا كوردستانێ كارڤەدانەكا توند ل بەرامبەر ڤان كریارێن حوكمەتا ئیراقێ هەبیت».
ل دۆر هۆكارێن بكارئینانا دادگەها فیدڕالی دژی هەرێمێ، جەواد مستەفا ستوپەیی دبێژیت» هوكار ڤەدگەرن ژبۆ خراب داڕێشتنا قانوونا ڤێ دادگەهێ كو بەری دو سالان هاتیە دارێشتن، د ڤێ قانوونێ دا هیچ گەرەنتیەك ژ بو هەردو ئەندامێن كورد ل ڤێ دادگەهێدا نینە. هەر ژبەر خراب داڕێشتنا قانوونا دادگەها فیدڕالی، بوو ئەگەرێ وێ چەندێ هەر كەیسەكێ وان خواست ب ڕێكا ڤێ دادگەهێ ب بڕیارەكا سیاسی یان ئاراستە كری ژ ئالیەكێ سیاسی ڤە ئێك لایەنە دبەرژەوەندیا خوە دا بریارێ ل سەر ددەن، بێی ئالیێ بەرامبەر بشێت بەرگریێ ژ مافێ خوە بكەت. هەر ژبەر ڤی ئەگەرێ ئەو شیانە ل گەلەك ئالیێن دارایی و دەستهەلاتێڤە هەرێما كوردستانێ سنوردار بكەن و ل قالب بدەن، چونكی بڕیارێن دادگەها فیدڕالی قابلی تانە لێدانێ نینن، ژبەر ڤان ئەگەران هەكە سەركردایەتیا كوردستانێ یا هوشیار نەبیت و ڤان بابەتان گەلەك ب جدی وەرنەگریت، ڤان ئەرەبێن شوڤینی نیازێن گەلەك خراب یێن هەین و وان دڤێت گەلەك ژ دەستهەلاتێن هەرێمێ قەید و زنجیر بكەن، بتایبەتی ل داڕێشتنا چەند قانوونێن دی دا وەكو قانوونا پەترۆل و غازێ و قانوونا گومرك و دەروازێن سنووری و چەندین قانوونێن دی. دا كو ل پاشەڕۆژێ ل دژی هەرێمێ بكار بینن».

سەرۆك مەسعود بارزانی پێشوازی ل شاندەكێ بلند یێ بزاڤا دیموكراتی یا ئاشووری ب سەرۆكایەتیا یەعقوب گورگیس سكرتێرێ وێ حزبێ كر.
د دیدارەكێ دا هەردو ئالیان هەڤخەمیا خوە بۆ كەسوكارێن قوربانیێن ڕوودانا دلتەزین یا ئاگربەربوونێ ل قەزا حەمدانیە ڕاگەهاند كو تێدا ب سەدان وەلاتیان گیانێ خوە ژ دەستدا و بریندار بوون. د پشكەكا دی یا دیدارێ دا ڕەوشا سیاسی یا ئیراقێ و هەرێما كوردستانێ و ب هێزكرنا بنەمایێن پێكڤەژیانێ و سەقامگیریێ و پەیوەندیێن دو قۆلی هاتنە باسكرن و سەرۆك بارزانی پیرۆزباهی ل یەعقوب گورگیس كر ب هەلكەفتا هەلبژارتنا وی وەكو سكرتێرێ بزاڤا دیموكراتی یا ئاشووری.

سەرۆك مەسعود بارزانی پێشوازی ل شاندەكێ بلند یێ پەرلەمانێ ڕۆمانیا ب سەرۆكایەتیا سینلاتۆر تینۆس كورلاتسیان، سەرۆكێ لژنەیا سیاسەتا دەرڤە ل پەرلەمانێ ڕۆمانیا كر.
د دیدارەكێ دا سیناتۆر تینۆس ڕۆلێ سەرۆك بارزانی د خەباتا بزاڤا ئازادیخوازا كوردستانێ ب بلند هەلسەنگاند و پێزانین بۆ ڕۆل و قوربانیێن گەلێ كوردستانێ و هێزا پێشمەرگەی د بەرهنگاریا تیرۆرێ هەبوون و دوپاتكر كو وەلاتێ وی ب گرنگی دنێریتە پەیوەندیێن خوە ل گەل ئیراقێ و هەرێما كوردستانێ. ژئالیێ خوەڤە سەرۆك بارزانی خواست پەیوەندیێن هەرێما كوردستانێ ل گەل ڕۆمانیا بەرفرەهتر ببن ب تایبەتی د بوارێن ئابۆری و چاندنێ و وەبەرئێنانێ دا.

د سالڤەگەرا 60 سا دامەزراندنا ئێزگێ دەنگێ كوردستانێ، سەرۆك مەسعود بارزانی پەیامەك بەلاڤكر و د پشكەكا وێ دا دبێژیت، دامەزراندنا ئێزگێ دەنگێ كوردستانێ، شۆڕەش و وەرچەرخانەك بوو د گەهاندنا دەنگێ ڕەوا یێ گەلێ مە دا و د هەمان دەم دا ژی بوو ژێدەرێ ئیلهام و بەرچاڤڕۆهنی بۆ شۆڕەشگێر و پێشمەرگێن قەهرەمان و ڕێكخستنێن حزبی و هەموو تەخ و چینێن گەلێ كوردستانێ و ڕۆلەكێ كارگەر هەبوو د گەهاندنا پەیاما شۆڕەشێ بۆ سەرانسەری كوردستانێ و دەڤەرێ و جیهانێ و ڕۆلێ ئێزگێ خەباتكەرێ دەنگێ كوردستان د قۆناغێن جودا یێن شۆڕەشێ دا وەكو بیرئینان دێ مینن.

سەرۆكێ هەرێما كوردستانێ، نێچیرڤان بارزانی د كۆنگرەیێ ئێكەتی نیشتمانی كوردستان دا ل سلێمانیێ پەیڤەك پێشكێشكر و تێدا گوت» ب ڕێز ڤە د ڤێ ڕۆژێ دا ڕەحمەتی مام جەلال دئینینە بیرا خوە و گیانێ وی شاد و ئاسوودە بیت.
سەرۆك هەرێما كوردستانێ گوت ژی» ئێكەتی نیشتمانی كوردستان ڕۆلەكێ دیار و سەرەكی د بزاڤا ڕزگاریخوازا كوردستانی دا هەبوو و ل گەل پارتی دیموكراتی كوردستان دو هێزێن سەرەكی بوون د دامەزراندنا ئەزموون و دەستكەفتێن هەرێما كوردستانێ بوون».
هەروەسا دیاركر» ئەزموونا پێكڤە كاركرنا ئێكەتی نیشتمانی كوردستان و پارتی دیموكراتی كوردستان، سەرۆك مەسعود بارزانی و ڕەحمەتی سەرۆك مام جەلال سەلماند كو سەركەفتن د ئێكڕێزیێ و هەڤپشكیێ و پێكڤە كاركرنێ دایە».
نێچیرڤان بارزانی پتر گوت» سەركەفتنا سەرهلدانێ و جهگیركرنا فیدرالیێ بەرهەمێ ڕاستەوخوە یێ هاریكاری و برایەتیێ بوو، نوكە ژی بۆ پاراستنا دەستكەفت و مافێن دستووری یێن هەرێما كوردستانێ تاكە ڕێك هەڤپشكی و پێكڤە كاركرنە ل هەرێما كوردستانێ و بەغدا و بەرۆڤاژیا وێ ژی دێ زیانێ ب هەرێما كوردستانێ كەهینیت».
نێچیرڤان بارزانی ئاماژەكر» ئاسایی یە جوداهیا هزرا سیاسی د ناڤبەرا ئالیان دا هەبیت، بەلێ پێدڤیە بەرژەوەندیەكا هەڤپشك هەموویان كۆم ڤەكەت ئەوژی پاراستنا هەرێما كوردستانێ و دەستكەفتێن وێ بیت».
سەرۆكێ هەرێما كوردستانێ خویاكر ژی» سەرەرای هەموو ئەڤراز و نشیڤی وكێماسیان، هەرێما كوردستانێ ئەزموونەكا جوان ل دەڤەرێ نیشاندا و بوو ئەگەرێ وێ چەندێ ل ئیراقێ و جیهانێ ب ڕێزڤە لێ بنێرن».
سەرۆكێ هەرێمێ د پەیڤا خوە دا ب گرنگی باس ل هەلبژارتنێن داهاتی یێن پەرلەمانێ كوردستانێ كر و گوت» هەلبژارتن وەكو بنەمایێ سەرەكیێ ڕەوایەتیا دەستهەلات و حوكمڕانیێ بۆ هەرێما كوردستانێ پێدڤی ئێكەم و ل بەراهیێ بیت، دڤێن هەموو ئالیێن سیاسی كار بكەن بۆ وێ چەندێ ل مەها شوباتا داهاتی هەلبژارتنێن سەركەفتی بهێنە ئەنجامدان، هەرێما كوردستانێ یا ب هێز دشێت ڕۆل و كاریگەریا باشتر ل هەموو ئیراقێ هەبیت و بەرگریێ ژ مافێن خوە یێن دستووری بكەت».
سەبارەت ناكۆكیێن د ناڤبەرا بەغدا و هەولێرێ دا، سەرۆكێ هەرێما كوردستانێ گوت» دوپات دكەین كو هەرێما كوردستانێ دخوازیت هەموو كێشە و ناكۆكیێن خوە ل گەل حوكمەتا ئیراقێ ب گۆرەی دستووری چارەسەر بكەت. نابیت بودجە و مووچەیێ هەرێما كوردستانێ ببنە بارمتێن سیاسی. پێدڤیە هەموو ئالیێن ئیراقی بزانن دروستكرنا كێشەیان بۆ هەرێما كوردستانێ خزمەتا ئیراقێ ناكەت».

سیاسەتمدار و چاڤدێرێن سیاسی ل سەر ڕوودانان، باس ل گرنگیا ئێكگرتن و ئێكڕێزیا نیشتمانی یا كوردی د چارچۆڤەیێ وێ پەیڤا نێچیرڤان بارزانی ل ڕۆژا گرێدانا كۆنگرەیێ ئێكەتی نیشتمانی كوردستانی ل سلێمانیێ پێشكێشكری بۆ پاراستنا قەوارەیێ دستوروی یێ كوردستانێ و ب هێزمانا وەلاتێ مە.
لوقمان پێنجوینی، چاڤدێرێ سیاسی و ئەندامێ مەكتەبا سیاسی یا حزبا سۆشیال دیموكراتا كوردستانی بۆ ڕۆژنامەیا (ئەڤرۆ) گوت» نێچیرڤان بارزانی، سەرۆكێ هەرێما كوردستانێ ل سلیمانیێ پەیڤەكا دیرۆكی پێشكێشكر كو تێدا كێشەیێن هەرێما كوردستانێ و ئیراقێ و دەڤەرێ باسكرن و ئاماژەكر ژی كورد چەند ئێكڕێز بن دێ هند ل سەر ئاستێ ئیراقێ و هەرێمی و جیهانی ب هێز بن».
هەروەسا گوت» پێدڤیە پەیڤا سەرۆكێ هەرێما كوردستانێ ببیتە نەخشە ڕێكەك بۆ دەربازبوونێ ژ وان كێشەیێن تووشی هەرێما كوردستانێ بووین ژ ڕوویێ سیاسی و ئابۆری ڤە».
ژ ئالیەكی دی ڤە، نامق هەورامی، نڤیسەر و چاڤدێرێ سیاسی بۆ ڕۆژنامەیا (ئەڤرۆ) گوت» ئێكگرتنا سیاسی ئێكە ژ وان فاكتەرێن نەتەوەیەكی بەر ب پێشڤە دبەت، هەكە بزڤرین بۆ سالا 1991 تاكو سالێن دووماهیێ ئێكدەنگی و ئێكڕێزیا نیشتمانی هەبوو، ڕەوشا كوردان یا ب هێز ب جۆرەكێ دی بوو، بەلێ د دەمەكی دا كو نوكە كورد د ئێكڕێز نینن پەرت و بەلاڤبوون هەیە د ناڤمالا هەرێما مەدا، ب ڤێ چەندێ دوژمن دشێن زێدەتر مفای ژ ڤێ ڕەوشێ وەربگرن، لەوما دروستكرنا ئێكگوتارا نیشتمانی گرەنتیا زێدەتر یا ب هێز بوونا كوردانە».
زێدەتر گوت» د پەیڤا خوە دا ل كۆنگرەیێ ئێكەتیێ ل سلێمانیێ، نێچیرڤان بارزانی، سەرۆكێ هەرێما كوردستانێ باس ل وان دەمان كر كو تێدا كوردان ئێگ گوتار هەبوو و حزبان ب ئێكدەنگی ڕەفتار دكر، وان دەمان كوردان ب هێز ڕەفتار دكر، بەلێ نوكە ل گەل وێ پەرت و بەلاڤبوونا هەی دبینین چاوان ڕەوش هاتیە گوهۆڕین، لەوما وەكو چاڤدێرەكێ ڕوودانان ب دیتنا من پێدڤیە مە ئێكگرتن و ئێكڕێزیا نیشتمانی هەبیت بۆ پاراستنا قەوارەیێ سیاسی یێ هەرێما كوردستانێ».

وەزیرەكێ بەرێ یێ حوكمەتا ئیراقێ ڕادگەهینیت، دڤێت قانوونا پێكئینانا دادگەها فیدرالی یا بلند ل ئیراقی دوبارە بهێتە داڕێشتن ،هەروەسا دبێژیت: نابیت بەغدا سیاسەتا برسیكرنا ل بەرامبەر خەلكێ كوردستانێ پەیڕەو بكەت.
دیندار دۆسكی، وەزیرێ بەرێ یێ كۆچ و كۆچبەران ل ئیراقێ گوت» سەیرە بۆچی لەشكرێ ئیراقێ و حەشدا شەعبی و میلیشیا ل ئیراقێ مووچەی و پارەی و چەكی وەرگرن، و ئەڤ چەندە بۆ هێزا پێشمەرگەی نەهاتیە كرن، مخابن مە دادگەها فیدرالی هەیە و ئالیێن ئیراقی ل دژی هەرێما كوردستانێ پەنایێ بۆ دبەن، بەلێ بۆ وان پرسێن دستووری یێن نەهاتینە بجهئینان كا دادگەها فیدرالی؟ ب تایبەت بابەتێن بودجەی و پێشمەرگەی و مادەیا 140، هندی عەقلیەتا دادگەها فیدرالی ب ڤی شێوەی بیت چو جاران چاڤەڕێی باشبوونا وێ ناهێتە كرن چونكە ئەو دبن فشارەكا سیاسی دایە ب تایبەت ژ ئالیێن شیعی ڤە كو وان دادگەها فیدرالی كریە چەكەكێ سیاسی».
دیندار دۆسكی گوت ژی» ب گۆرەی دستوورێ ئیراقێ كو ل سالا 2005 هاتیە پەسەندكرن، هەموو ماف و شایستەیێن دارایی یێن هێزا پێشمەرگەی د چارچۆڤەیێ دەوگەهێن ئەمنی یێ ئیراقێ هاتیە دیاركرن وەكو دەزگەهەكێ فەرمی، هێزا پێشمەرگێ كوردستانێ یا دستووری یە بەلێ مخابن هەتا نوكە گەلەك تشت د ناڤبەرا بەغدا و هەولێرێ دا نەهاتینە چارەسەركرن، نیازێن وان د تمام نینن و سیاسەتا برسیكرنێ پەیڕەو كریە و فیدرالی قەبوول ناكەن و دخوازن ب مەركەزیەتێ كارێ خوە بكەن، هەتا نوكە ژی ئەو دانوستاندنێن ل گەل هەرێما كوردستانێ كرین بۆ ماوەیەكێ دەمكی كرینە و چارەسەركرنا گرفتان ب شێوەیەكێ بنەرەتی نەهاتیە كرن، هەموو ئەو گرفت یێن كەفتینە سەر ئێك و نوكە یێن تەقین، ل دەستپێكێ گرفت ل سەر خالێن دستووری هەبوون، نوكە ژی ل سەر بابەتێ قانوونا بودجەی ل شوونا وێ چەندێ بەغدا بجهبینیت هاتیە ب قەر و سولفەیان دخوازیت گرفتان چارەسەر بكەت».
دیاركر ژی» یا گرنگ ئەوە ئەم كورد د ناڤخوە دا د ئێكگرتی و ئێك هەلویست بین، مە پێكڤە گرفت ل گەل بەغدا هەیە، هەكە خوە د ناڤخوە ژی دا د ناكۆك بین».
ئاماژەكر» مخابن دادگەها فیدرالی ب گۆرەی دستوورێ ئیراقێ نەهاتیە پێكئینان و دوبارە ئەندامێن جڤاتا نوونەران دەنگ ل سەر نەدایە و ئالیێن كوردستانی تێبینی ل سەر قانوونا دادگەها ناڤبری و ئەندامێن وێ و دادگەهێ ب خوە هەنە، لەوما پێدڤیە قانوونا دادگەها فیدرالی یا بلند ب فەرمی ل جڤاتا نوونەرێن ئیراقێ ب گۆرەی دستووری بهێتە پێكئینان، نابیت ل سەر ڤی بنەمای كارێ خوە بكەت چونكە دەستێوەردانێ د سیاسەتێ دا دكەت و دخوازیت ب ئاراستەیا سیاسی فشارێ دروست بكەت، ئەڤە ژی شاشیە دەزگەهەكێ قانوونی یێ مەزن ل ئیراقێ ب ڤی شێوەیی بیت».

دوهی دوشەمبی 25/9/2023 ل سەلاحەددین، سەرۆك مەسعود بارزانی پێشوازی ل ڕۆزی كەیف قونسلا گشتی یا بریتانیا ل هەولێرێ كر.
د دیدارەكێ دا قونسلا گشتی یا بریتانیا ل هەولێرێ كو ب هەلكەفتا ب دووماهی هاتنا ئەركێن وێ و خاتر خاستنێ سەرەدانا سەرۆك بارزانی كربوو، خوەشحالیا خوە ب كاركرنێ ل هەرێما كوردستانێ ڕاگەهاند و سەرۆك بارزانی ژی سەرەرای دەستخوەشیێ ،هیڤیا سەركەفتنێ بۆ خواست د ئەرك و كارێ وێ یێ نوو دا.
هەر د وێ دیدارێ دا هەردو ئالیان دوپاتی ل دۆستایەتی و پێشڤەبرنا پەیوەندیان د ناڤبەرا هەرێما كوردستانێ و بریتانیا دا كر.
هەر بۆ هەمان مەبەست قونسلا گشتی یا بریتانیا سەرەدانا مەسرور بارزانی، سەرۆكێ حوكمەتا هەرێما كوردستانێ كر و د دیدارەكێ دا سەرۆكێ حوكمەتا هەرێمێ سوپاسیا قونسلا بریتانیا كر كو د دەمێ كاركرنا وێ دا، كار بۆ پێشڤەبرن و ب هێزكرنا پەیوەندیێن دو قۆلی د ناڤبەرا هەرێما كوردستانێ و بریتانیا دا كربوو و هیڤیا سەركەفتنێ د ئەركێ وێ یێ داهاتی دا بۆ خواست. ژ ئالیێ خوەڤە قونسلا گشتی یا بریتانیا سوپاس و پێزانینێن خوە بۆ كارئاسانی و هەماهەنگیكرنیا ئالیێن پەیوەندیدارێن حوكمەتا هەرێما كوردستانێ ل گەل قونسلخانەیا وەلاتێ خوە دەربری.