ل سالڤەگەرا 35ێ یا ئەنفالا بەهدینان، سەرۆكێ هەرێما كوردستانێ پەیامەك بەلاڤكر و تێدا دبێژیت» دڤێت حوكمەتا ئیراقێ ئەركێ خوە بۆ قەرەبووكرنا كەسوكارێن قوربانیێن ئەنفالێ بجهبینیت».
نێچیرڤان بارزانی، سەرۆكێ هەرێما كوردستانێ د پەیاما خوە دا دبێژیت» ب ڕێز ڤە سالڤەگەرا شەهیدێن خەلكێ سڤیل یێن بەهدینان و هەموو قوربانیێن هەوا ئەنفالێ دكەین. ل سالا 1988 ل گەرمیان هەتا بەهدینان 182 هزار وەلاتیێن بێ تاوانێن كوردستانێ ب زارۆك و ئافرەت و پیر و گەنج ڤە، بوونە قوربانیێن وێ تاوانێ».
دادگەها بلند یا تاوانان ل ئیراقێ، ئەنفال ب جینۆساید و تاوانا شەڕی دژی مرۆڤایەتیێ ناساندیە، نێچیرڤان بارزانی دبێژیت «دوپات دكەین كو دڤێت حوكمەتا ئیراقێ ئەركێ خوە بۆ قەرەبووكرنا خێزان و كەسوكارێن قوربانیان بجهبینیت و ئێش و ئازارێن وان كێم بكەت».
وەكو سەرۆكێ هەرێما كوردستانێ دبێژیت» خزمەتكرنا باشتر یا كەسوكارێن ئەنفالكریان، تەبایی و ئێكڕێزیا مە یا ناڤخوەیە، كارێ ڕژد و بزاڤكرن بۆ دوبارە نەبوونا تاوانێن وەكو ئەنفالێ و ناساندنا وێ ب جینۆساید ل سەر ئاستێ جیهانێ، باشترین بیرئینانە و وەفاداریە بۆ گیانێ پاقژێ قوربانیێن ئەنفالێ و هەموو شەهیدێن كوردستانێ».
نێچیرڤان بارزانی دبێژیت» پێدڤیە دیرۆك و بۆریێ تەحل یێ گەلێن ئیراقێ، وانە و پەند و هاندەر بن بۆ پێكڤە كاركرنێ و هەڤدو قەبوولكرنێ و مسوگەركرنا مافێن هەموو پێكهاتەیان د ئیراقا نوو دا، بۆ وێ چەندێ كارەساتێن بۆری دوبارە نەبن و ئازادی و مافێن دستووری یێن هەموویان د پاراستی بن».

سەرۆكێ حوكمەتا هەرێما كوردستانێ ل سالڤەگەرا 35 ێ یا ئەنفالا بەهدینان پەیامەك بەلاڤكر و تێدا دبێژیت» ب ڕێز ڤە بیرئینانا قوربانیێن وێ تاوانا مەزن و هۆڤانە یا ڕژێما بەرێ یا ئیراقێ دكەین كو ئارمانجا وێ قڕكرن و جینۆسایدكرنا گەلێ كوردستانێ بوو ب هەموو پێكهاتەیێن وێ ڤە».
مەسرور بارزانی، سەرۆكێ حوكمەتا هەرێما كوردستانێ، د پەیاما خوە دا دبێژیت» جهێ داخێ و دلتەنگییێ یە هەتا نوكە مادەیا 132 ژ دستوورێ ئیراقێ نەهاتیە بجهئینان كو تایبەتە ب قەرەبووكرنا زیانڤێكەفتیان و كەسوكارێن قوربانیێن هەوا ئەنفالێ و تاوانێن ڕژێما بەعسا ئیراقێ».
وەكو مەسرور بارزانی دبێژیت» مافێ ڕەوا یێ خەلكێ كوردستانێ و ب تایبەتی كەسوكار و زیانڤێكەفتیێن سەرۆكی یێن دەستێ ڕژێما بەرێ یا ئیراقێ یە كو ب شێوەیەكێ هەژی بهێنە قەرەبووكرن و پشتڕاستكرن كو جارەكادی تووشی جینۆسایدێ نابن»

سەرۆك مەسعود بارزانی ل سەلاحەدین پێشوازی ل هاكان فیدان، وەزیرێ دەرڤەیێ توركیا و شاندەكێ دگەلدا كر.
بارەگەهێ بارزانی بەلاڤكر» د دیدارەكێ دا ڕەوشا سیاسی یا ئیراقێ و دەڤەرێ و پەیوەندیێن هەردو ئالیان هاتە باسكرن».
بارەگەهێ بارزانی بەلاڤكر ژی» پەیوەندیێن توركیا ل گەل ئیراقێ و هەرێما كوردستانێ و بوارێن هاریكاریا هەڤپشك دناڤبەرا واندا، پەیوەندی و كێشەیێن هەولێر و بەغدا و دانوستاندنێن چارەسەركرنا وان، ڕەوشا ئیراقێ و هەرێما كوردستانێ ب گشتی هاتنە باسكرن».
ژ ئالیێ خوەڤە نێچیرڤان بارزانی، سەرۆكێ هەرێما كوردستانێ پێشوازی ل هاكان فیدان، وزیرێ دەرڤەیێ توركیا كر و سەرۆكایەتیا هەرێما كوردستانێ ڕاگەهاند «نێچیرڤان بارزانی دوپاتكر كو هەرێما كوردستانێ ب گرنگی دنێریتە پەیوەندیێن خوە ل گەل توركیا كو بەرژەوەندیێن هەڤپشك یێن ئابۆری، بازرگانی و ئەمنی پێكڤە وان گرێدەت و بەرهەڤڤە د هەموو بواران دا پەیوەندیێن هەولێر – ئەنقەرە پێشڤە ببەت، هەروەسا سوپاسیا توركیا كر كو پشت ل هەرێما كوردستانێ ل هەموو بواران و ب تایبەتی ل دەمێن دژوار دا نەكریە و ئاماژە كر كو هەرێما كوردستانێ چو جاران پشتەڤانی و هاریكاریا توركیا ژبیر ناكەت».
وەزیرێ دەرڤەیێ توركیا د كۆمبوونا خوە دا ل گەل سەرۆكێ هەرێما كوردستانێ، دوپاتی ل وێ چەندێ كر» توركیا گرنگیەكا تایبەت ب پەیوەندیێن خوە ل گەل ئیراقێ و هەرێما كوردستانێ ددەت و بەغدا و هەولێرێ گرنگیەكا تایبەت بۆ توركیا هەیە. هەروەسا ئارامی و سەقامگیریا هەولێرێ و هەرێما كوردستانێ ب بلند هەلسەنگاند و بەرهەڤیا وەلاتێ خوە بۆ بەرفرەهكرنا پەیوەندیان و هاریكاریا هەڤپشك د ناڤبەرا هەردو ئالیان د هەموو بواراندا دەربری و سوپاسیا ڕۆلێ نێچیرڤان بارزانی كر د پێشڤەبرنا پەیوەندیێن ئیراقێ و هەرێما كوردستانێ ل گەل توركیا».
سەرۆكایەتیا هەرێمێ دیاركر ژی» د تەوەرەكێ دی یێ كۆمبوونێ دا ب گرنگی باس ل پرسا هنارتنا پەترۆلا هەرێما كوردستانێ ب ڕێكا بەندەرێ جەیهان یێ توركی هاتە كرن».
ژ ئالیێ خوەڤە مەسرور بارزانی، سەرۆكێ حوكمەتا هەرێما كوردستانێ پێشوازی ل هاكان فیدان، وەزیرێ دەرڤەیێ توركیا و ئالپئارسلان بایراكتار، وەزیرێ وزا توركیا كر و ب گۆرەی بەیاننامەیەكا حوكمەتا هەرێما كوردستانێ « د دیدارەكێ دا باس ل هنارتنا پەترۆلێ، پرۆژەیێ ڕێكا گەشەپێدانێ، ئالۆگۆڕیا بازرگانی و گەشتیاری هاتە كرن».
سەبارەت هنارتنا پەترۆلێ، وەكو د بەیاننامەیا حوكمەتا هەرێمێ دا هاتی» باس ل پێدڤی و گرنگیا دەستپێكرنا هنارتنا پەترۆلا هەرێما كوردستانێ ب ڕێكا بەندەرێ جەیهان یێ توركی و نەهێلانا هەموو ئاستەنگ و كێشەیەكا تایبەت ب ڤی بابەتی ڤە، هاتە كرن، چونكە ڕاوەستیانا هنارتنا پەترۆلێ زیانێ ب هەموو ئالیەكی گەهاندیە».
سەرۆكێ حوكمەتا هەرێما كوردستانێ دوپاتی ل گرنگیا ب هێزكرنا پەیوەندیان ل گەل توركیا د وارێن ئالۆگۆڕیا بازرگانی و ئاسانكاریكرن بۆ هاتنوچوون گەشتیارێن هەردو ئالیان كر.
ل دۆر پڕۆژەیێ (ڕێكا گەشەپێدانێ) و گرێدانا ئیراقێ و وەلاتێن كەنداڤی ب توركیا و جیهانێ ب ڕێكا هێلا ئاسنی، مەسرور بارزانی دوپاتی ل ئەنجامدنا پڕۆژەی ب هەماهەنگی ل گەل هەرێما كوردستانێ كر ب شێوەیەكی كو» د بەرژەوەندیا هەموو وەلاتی و پێكهاتەیێن جودا یێن ئیراقێ دا بیت».
ب گۆرەی بەیاننامەیا حوكمەتا هەرێمێ» وەزیرێ دەرڤەیێ توركیا بەرهەڤیا وەلاتێ خوە بۆ ب هێزكرنا پەیوەندیان ل گەل هەرێما كوردستانێ د هەموو واراندا دەربری».

سەرۆك مەسعود بارزانی د درێژیا سەرەدان و كۆمبوونێن خوە دا ل پارێزگەها دهۆكێ ل گەل جەماوەر و تەخ و چینێن دەڤەرا بەردەرەش كۆمبوو.
بارەگەهێ بارزانی بەلاڤكر» سەرۆك بارزانی د پەیڤەكێ دا ڕۆناهی ئێخستە سەر ڕەوشا ناڤخوەیا هەرێما كوردستانێ و دوپاتكر كو سەركەفتن د ئێكبوونێ دایە ود بزاڤێن خوە دا بۆ بدەستڤەئینانا ئێكڕێزیێ ل سەر بابەتێن نیشتمانی و نەتەوەیی دێ بەردەوام بیت».
سەرۆك بارزانی ڕاگەهاند ژی» نابیت ئالی بكەڤنە سەر ڕێكەكێ كو بۆ دروستكرنا كێشەیان بۆ پارتی یاریان ب بابەتێن نەتەوەیی بكەن و كاری بۆ لاوازكرنا هەرێمێ بكەن. چونكە كوردستان ب سەر پارتی و ب سەر هەموو بەرژەوەندیێن دیترە و هەلبژارتن سەنگێ مەحەكێ یە بۆ حوكمڕانیێ و پێگەهێ ئالیان و پێدڤیە ب وێ ڕێكێ ئالی باوەریا مللەتی وەربگرن».
سەرۆك بارزانی ئاماژە ب پەیوەندیێن د ناڤبەرا هەرێمێ و بەغدا كر و بەرچاڤكر كو حوكمەتا نوو یا ئیراقێ ل سەر بنەمایێ كۆمەكا ڕێككەفتن و پرنسیپێن هەڤپشكیێ و هەڤسەنگیێ و لهەڤهاتنێ هاتیە دامەزراندن بەلێ مخابن هێشتا نیازا خراب یا پشتگوه هاڤێتنا ڕێككەفتنان هەر مایە و پشتەڤانیا سودانی دكەین بۆ وێ چەندێ بشێت وان ڕێككەفتنان بجهبینیت و ڕێگری لێ نەهێتە كرن».
د كۆمبوونێ دا دەرگەهێ دانوستاندنێ بۆ بەرهەڤبوویان هاتە ڤەكرن و سەرۆك بارزانی بەرسڤا پرسیار و تێبینیێن بەرهەڤبوویان دا و بەرچاڤكر كو كابینەیا نەهێ یا حوكمەتا هەرێمێ سەرەرای هەبوونا گرفت و قەیرانان ئەوا دشیاندا بوو بۆ خزمەتكرنا خەلكی كریە و دبزاڤێن وێ چەندێ دا بوو ژێدەرێن دی یێن داهاتێ ب تایبەتی د وارێ چاندنێ و گەشتوگوزارێ دا بۆ هەرێما كوردستانێ دابین بكەت.

سەرۆك مەسعود بارزانی د سەرەدانا خوە دا بۆ قەزا شێخان ل گەل تەخ و چینێن وێ دەڤەرێ كۆمبوو.
بارەگەهێ بارزانی بەلاڤكر: سەرۆك بارزانی ئارمانجا سەرەدانا خوە بۆ دەڤەرێ ڕۆهنكر و سەرەرای ئاماژەدان ب پێگیریا خەلكێ دەڤەرێ ب فەرهەنگا پێكڤەژیانێ، داخوازكر كو ڕێك نەهێتە دان هیچ كەسەك و ئالیەك وێ فەرهەنگا زەنگێن ب شێوینن.
سەرۆك بارزانی ئاماژە ب ڕەوشا ناڤخوەیا هەرێمێ و پەیوەندیێن هەرێمێ كر و ڕاگەهاند دێ هەموو بزاڤەكێ كەت كو ڕەوشا ناڤخوەیی بهێتە چارەسەركرن و هەموو ئالیەك ل سەر ستراتیژیەكا نەتەوەیی و نیشتمانی ڕێكبكەڤن. ئەوژی بەرچاڤكر كو حوكمەتا نوو یا ئیراقێ ل سەر بنەمایێ ڕێككەفتنەكا گشتی و ل بەرچاڤ وەرگرتنا هەڤپشكیێ و هەڤسەنگیێ و لهەڤهاتنێ هاتیە دامەزراندن بەلێ مخابن ئەو بنەما یێن هاتینە پشتگوه هاڤێتن. پشتی سەرەدانا شاندێ بلند یێ پارتی بۆ بەغدا ئەو چاڤەڕێ هەیە گرفت بهێنە چارەسەركرن.
سەرۆك بارزانی دیاركر كو پێدڤیە هەرێما كوردستانێ پشتبەستنێ ب شیان وژێدەرێن خوە ببەستیت و بۆ وێ مەبەستێ ژی كابینەیا نەهێ یا حوكمەتا هەرێمێ بەرنامە و پلانێن باش ئەنجامداینە و دەرئەنجام ژی دێ دیار بن.
سەرۆك بارزانی باس ل وان مەترسی و ئاستەنگان كر كو ل بەردەم گەلێ كوردستانێ هەنە، داخواز ژی كر كو هەموو ئالیەك پێكڤە هاریكار بن بۆ ب هێزكرنا هەستا نیشتمانپەروەری و هشیاركرنا خەلكی بۆ بەرهنگاریا وێ هەوێ ببن یا جڤاك و گەنجێن مە دكەتە ئارمانج.

سەرۆك مەسعود بارزانی، داخواز ژ مامۆستایێن زانكۆیێ و ئەكادیمیان دكەت، هاریكار و پشتەڤان و ڕێنیشاندەرێن حوكمەتێ و ئالیێن پەیوەندیدار بن.
د درێژیا سەرەدانا خوە دا بۆ پارێزگەها دهۆكێ و كۆمبوونان ل گەل تەخ و چینێن جودا جودا دوهێ سێشەمبی 22/8/2023 ل باژێرێ دهۆكێ سەرۆك مەسعود بارزانی ل گەل مامۆستایێن زانكۆێ و پەروەردێ و ئەكادیمیێن سنوورێ پارێزگەها دهۆكێ كۆمبوو.
د وێ كۆمبوونێ دا سەرۆك بارزانی پەیڤەك پێشكێشكر و تێدا سەرەرای ئاماژەدان ب ڕۆلێ سەرەكیێ مامۆستایان د پێگەهاندنا گەنجان و پێشئێخستنا جڤاكی و زانستی، سوپاسی و پێزانینا خوە ئاراستەی مامۆستایێن زانكۆیێ كر كو ل هەموو ڕەوشان دا ل سەنگەرێ پێگەهاندنێ و زانستێ بوون و ب دلسۆزانە خزمەتا خەلكێ كوردستانێ كریە و نەهێلایە پڕۆسەیا خواندنێ و فێركرنێ بهێتە ڕاگرتن.
سەرۆك بارزانی ڕۆناهی ئێخستە سەر ڕەوشا سیاسی یا هەرێما كوردستانێ و دوپاتی ل وێ چەندێ كر كو هەموو بزاڤیان كەت بۆ پەیداكرنا دەلیڤێ بۆ ئێكبوون و ئێكدەنگیێ د ناڤبەرا ئالیان دا. هەروەسا ئەوژی باسكر كو جوداهیا بیرو بۆچوونان بابەتەكێ سروشتیە، بەلێ پێدڤیە هەڤڕابوونەكا تمام دناڤبەرا ئالیان دا هەبیت ل سەر ئارمانجێن ستراتیژی و نیشتمانی.
سەرۆك بارزانی ئاماژاە ب دیرۆكا دەولەتا ئیراقێ كر كو ل سەر بنەمایێ هەڤپشكیا كورد و ئەرەبان هاتیە دامەزراندن، بەلێ ئەو هەڤپشكیە هاتیە پشتگوه هاڤێتن و پشكا كوردستانێ جینۆساید و بزاڤا ژناڤبرنا مللەتێ مە بوو و پشتی ژناڤچوونا ڕژێما بەرێ ئەو دەلیڤەیە هاتە پێش كو ئیراق ل سەر بنەمایێن هەڤپشكیێ و هەڤسەنگیێ و لهەڤهاتنێ و ب پشتبەستن ب دستووری ژیانەكا نوو دەست پێ بكەت، بەلێ دیسان پشت ل وان بنەمایان و دستووری هاتە كرن و نیازا لاوازكرنا هەرێما كوردستانێ و برسیكرنا خەلكێ كوردستانێ ل ناڤ پشكەك ژ دەستهەلاتدارێن ئیراقێ پەیدا بوو.
هەر گرێدای ڤی بابەتی و دوماهی پێنگاڤ بۆ چارەسەركرنا كێشەیان ،سەرۆك بارزانی بەرهەڤبوویێن كۆمبوونێ ب ئەنجامێن سەرەدانا ڤێ دووماهیێ یا شاندێ بلند یێ پارتی دیموكراتی كوردستان بۆ دانوستاندنێ ل گەل ئالیێن ئیراقی ئاگەهداركرن.
ل درێژیا ئاخڤتنێن خوە دا سەرۆك بارزانی ئاماژە ب وێ پێلێ دا كو ب نیازە نە ئومێدیێ بەلاڤ بكەت و هەستا نیشتمانپەروەریێ و بهایان دناڤ جڤاكی دا نەهێلیت و داخوازكر كو مامۆستایێن بەرێز ڕوو ب ڕوویێ وێ پێلێ ببن و كاری بۆ ب هێزكرنا هەستێ نیشتمانپەروەری و پێكڤەژیانا سیاسی و جڤاكی بكەن.
سەرۆك بارانی باسێ بزاڤێن حوكمەتا هەرێما كوردستانێ كر بۆ ئاڤاكرن پەروەردەیێ و ڤەدینا دەلیڤەیێن كاری بۆ گەنجان و ژێدەرێن دی یێن داهاتی بۆ هەرێمێ و هەروەسا ڤەدیتنا هۆكارێن مشەختبوونێ و ڕوو ب ڕووبوونا مادەیێن هۆشبەر و داخواز ژی ژ مامۆستا و ئەكادیمیان كر كو د وی ئەركێ هەستیار دا هاریكار و پشتەڤان و ڕێنیشاندەرێن حوكمەتێ و ئالیێن پەیوەندیدار بن.
هەر د وێ كۆمبوونێ دا دەرگەهێ ئالۆگوركرنا ڕا و بۆچوونان و پرسیار و پێشنیازان بۆ بەرهەڤبوویان هاتە ڤەكرن و سەرۆك بارزانی بەرچاڤڕۆهنی و بەرسڤێن پێدڤی بۆ تێبینی و پرسیارێن بەرهەڤبوویێن كۆمبوونێ دان.

دوهی سێشەمبی 22/8/2023 ل باژێرێ دهۆكێ سەرۆك مەسعود بارزانی ل گەل ئەفسەر و پلەدارێن پێشمەرگەی و دەزگەهێن ئەمنی یێن سنووری پارێزگەها دهۆكێ كۆمبوو.
د وێ كۆمبوونێ دا سەرۆك بارزانی پێزانین بۆ قوربانی و وەستیانا هێزا پێشمەرگەی و دەزگەهێن ئەمنی هەبوو و سوپاسیا وان كر كو وان شیایە سەقامگیریێ و ئاسایشا خەلكێ كوردستانێ دابین بكەن، ئەوژی بەرچاڤكر كو پێشمەرگە و هێزێن ئەمنی هەردەم ل هێلا بەراهیێ یا بەرهنگاریا دەفانە و خەلكێ كوردستانێ قەدرێ وان دزانیت و ڕاگەهاند هوون بەردەوام ددلێ من دانە.
ل درێژیا پەیڤا خوە دا سەرۆك بارزانی باس ل ڕەوشا سیاسی یا هەرێما كوردستانێ و پەیوەندیێن د ناڤبەرا هەرێما كوردستانێ و ئیراقا فیدرال هەروەسا دۆزا گەلێ كوردستانێ و ئەو گەفێن ل بەردەم گەلێ كوردستانێ بەرچاڤكر و ئەو چەندە دوپاتكر كو د ئەنجامدا ئیرادەیا گەلێ كوردستانێ ب سەر ئاستەنگ و پلاناندا دێ سەركەڤیت، هەروەسا سەرۆك بارزانی ئەوژی بۆ بەرهەڤبوویێن كۆمبوونێ بەرچاڤكر كو پێدڤیە گەلێ كوردستانێ پشتبەستنێ ب شیان و ئیرادەیا خوە بكەت و دوپاتی ل وێ چەندێ كر كو كوردستان ل سەر بەرژەوەندیێن هەموو ئالیەكی یە و پێدڤیە هەلبژارتن باوەریا گەلێ كوردستانێ ب ئالیان نوو بكەت.

دوهی سێشەمبی 22/8/2023 نێچیرڤان بارزانی، سەرۆكێ هەرێما كوردستانێ د دیدارەكێ دا ل گەل مادان گۆپال، قونسلێ گشتیێ نوو یێ وەلاتێ هندستانێ ل هەرێما كوردستانێ و شاندەكێ دگەلدا، سەرەرای ب خێرهاتنێ، پشتەڤانیا خوە و ئالیێن پەیوەندیدارێن هەرێما كوردستانێ بۆ سەرئێخستنا ئەركێ وی و پێشڤەبرنا پەیوەندیێن هندستانێ ل گەل هەرێما كوردستانێ، دەربری.
سەرۆكێ هەرێما كوردستانێ د وێ دیدارێ دا دوپاتكر كو هندستان وەلاتەكە، ئیراق و هەرێما كوردستانێ ب شێوەیەكێ گشتی دشێن د گەلەك بواراندا مفای ژ شارەزایی و پسپۆری و ئەزموونێن وێ وەربگرن، لەوما یا فەرە هەرێما كوردستانێ گرنگیێ ب پەیوەندیان ل گەل هندستانێ بدەت. ب تایبەتی ئاماژە ب گرنگیا ڤەكرنا گەشتێن ڕاستەوخوە یێ ئەسمانی د ناڤبەرا هەرێما كوردستانێ و هندستانێ دا كر.
ژ ئالیێ خوەڤە قونسلێ گشتیێ نوو یێ وەلاتێ هندستانێ ل هەرێما كوردستانێ خوەشحالیا خوە ب دەستبكاربوونێ ل هەرێما كوردستانێ نیشاندا و دوپاتی ل كار و بزاڤان كر بۆ پێشڤەبرنا پەیوەندیێن وەلاتێ خوە ل گەل هەرێما كوردستانێ.

جێگرێ سەرۆكێ جڤاتا نوونەرێن ئیراقێ ڕادگەهینیت: هەرێما كوردستانێ هیچ بهانەیەك بۆ بەغدا نەهێلایە بۆ وێ چەندێ پشكا بودجە و مووچەی بۆ نەهنێریت.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ گوت» هەرێما كوردستانێ هەموو پێگیریێن خوە بەرامبەر حوكمەتا فیدرالی بجهئیناینە و هیچ بهانەیەك نەمایە بۆ ویچ چەندێ حوكمەتا فیدرال بودجە و مووچە و شایستەیێن هەرێمێ نەهنێریت».
ڕۆهنكر ژی» بهانەیێن بەرێ یێن حوكمەتا فیدرال پێكهاتبوون ژ هووربینیێ د داهاتێن هەرێما كوردستانێ دا ژ ئالیێ دیوانا چاڤدێریا دارایی یا فیدرال ، كو پاشی كارێ خوە كر و ڕاپۆرتا خوە ل ڕۆژا سێشەمبیا هەفتیا بۆری پێشكێشی جڤاتا وەزیرێن فیدرال كریە، ب ڤێ چەندێ ژی دوماهی ب بهانەیێن وان هاتیە».
شاخەوان عەبدوللا گوت ژی» هیچ تشتەك د ستوویێ هەرێما كوردستانێ دا نەمایە، دو تەمویلێن دارایی پشتی پەسەندكرنا بودجەی دكەڤیتە ئالیێ حوكمەتا فیدرال».

ئەندامەكێ مەكتەبا سیاسی یا پارتی دیموكراتی كوردستان ڕاگەهاند: پارتی هێز و شیانێن خوە ژ جەماوەرێ خوە وەردگریت و هەروەسا پارتی ل بڕیارا سیاسی یا سەربخوەیە.
هێمن هەورامی، ئەندامێ مەكتەبا سیاسی یا پارتی دیموكراتی كوردستان، گوت» پارتی ل سەر چەند بنەمایان دروست بوویە و ژ ڕوویێ هزری ڤە ناسنامەیەكا تایبەت هەیە، هەروەسا پارتی كۆمكەرا خەباتكەرێن كوردستانێ یە و پارتی هێز و شیانێن خوە ژ جەماوەرێ خوە وەردگریت».
هەورامی گوت ژی» ئەو سەربخوەییا دناڤ پارتی دا هەی د ناڤ هیچ حزبەكا سیاسی دا نینە، مە باوەریەكا تمام ب كادر و جەماوەرێ خوە هەی و تاكە حزبا ڕێكخستی نە ل كوردستانێ، پارتی حزبەكا پۆپۆلیستی نینە، پارتی حزبا خودان پترین باوەریە دناڤ هەرێما كوردستانێ دا».
سەبارەت هەلبژارتنێن پەرلەمانێ كوردستانێ، هێمن هەورامی ئاشكراكر» مە باوەری ب خوە هەیە د وان هەلبژارتنان دا دێ حزبا هەژمار ئێك بین، ئەركێ سەرەكی یێ پارتی دیموكراتی كوردستان دڤان هەلبژارتنان دا پشكداریكرنا پترین ڕێەیا دەنگدەرایە د هەلبژارتنان دا بۆ وێ چەندێ وەلاتیان بۆ پڕۆسەیا سیاسی ل هەرێما كوردستانێ بزڤریت، هەروەسا پێدڤیە باوەری د ناڤبەرا خەلكی و حوكمڕانیێ دا زێدەتر ببیت».
دیاركر ژی» هندەك ئالیێن سیاسی مژوولی خوە دەرخستن و مەزنكرنێ بوون ل پەرلەمانی بۆ ڕاكێشانا سەرنجا وەلاتیان و هند قانوون دانان و پرسیاركرن ژ وەزیرێن خوە گرنگ نەبوو».
خویاكر ژی» د ڤێ خولا پەرلەمانێ كوردستانێ دا پترین پرسیار ئاراستەی حوكمەتا هەرێمێ هاتنە كرن و پترین بەرسڤ هاتنە وەرگرتن، كابینەیا نەهێ یا حوكمەتا هەرێمێ شەفافترین كابینە بوو، كو ب سەرۆكایەتیا مەسرور بارزانی، سەرۆكێ حوكمەتا هەرێما كوردستانێ هاتبوو پێكئینان، هەڤدەم بەرسڤا پتریا پرسیارێن پەرلەمانی هاتیە دان، پتریا وەزیران هاتینە پەرلەمانی وبەرسڤێن پەرسیاران ژی هاتینە دان».
سەبارەت پەیوەندیێن پارتی و ئێكەتیێ گوت» ل گەل ئێكەتیێ سەرەرای ئاستەنگ هەنە د پەیوەندیێن د ناڤبەرا مە دا، بەلێ ئیرادەیەكا باش هەیە كو زالبین ل سەر ڤان ئاستەنگان دا، ژبەركو باوەریا وەلاتیان ب پڕۆسەیا سیاسی بۆ هەلبژارتنان گرێدایە ب چەند پەیوەندیا پارتی وئێكەتیێ یا باش بیت».
ڕاگەهاند ژی» مە ل گەل ئێكەتیێ ڕێككەفتنا ستراتیژی ژمێژە هەیە، چەندین جاران مە داخوازكریە پێداچوون د ڕێككەفتنا مە یا بۆری دا بهێتە كرن، یان ژی ڕێككەفتنەكا دی سەر ژ نوو ئیمزا بكەین».
سەبارەت دانوستاندنێن هەولێر و بەغدا، هەورامی ئاماژە كر» بەر ب پێشڤەچوونەكا باش هەیە و تێكگەهشتنەكا باش دناڤبەرا مە دا هەیە، بەلێ هەتا نوكە نە گەهشتینە ڕێككەفتنا دوماهیێ، هەڤدەم مە هەموو پێگیریەكا خوە بەرامبەر حوكمەتا ئیراقێ بجهئینایە، ئەوا مای ل سەر ئیراقێ یە كو پێگیریێن خوە بەرامبەر ڕێككەفتنان بجهبینیت و پشكا بودجەیا هەرێما كوردستانێ بهنێریت».