چاڤدێرێن سیاسی ل تورکیا و باکورێ کوردستانێ دیار دکەن، نها ئاکپارتی و ئەردۆغان ب هەموو رەنگەکێ خوە بۆ هەلبژارتنێن باژێرڤانیان بۆ سالا بهێت بەرهەڤ دکەن، ب تایبەتی ژی ئاکپارتیێ دڤێت ڤێجارێ ئستەنبۆلێ ژ دەستێ پارتیا کۆماریا گەل دەرخینیت و ژ بەر هندێ ژی هەتا وی دەمی ژ بۆ پرسا کوردی چو تشتەک نوو نابیت.

ئەحمەد دەرە چاڤدێرێ سیاسی راگەهاند، نها ل تورکیا رەوشەکا نوو هاتیە پێش، پشتی هەلبژارتنێن سەرۆک کۆماریێ و پەرلەمانی، ئاکپارتی خوە بۆ هەلبژارتنەکا دی یا گرنگ بەرهەڤ دکەت، کو ئەو ژی هەلبژارتنێن باژێرڤانیانە، ئەو یەک بۆ ئاکپارتیێ گەلەک گرنگە، چونکی د هەلبژارتنێن هەری دووماهیێ یێ باژێرڤانیان دا ئاکپارتیێ دو باژێرڤانیێن گەلەک مەزن و گرنگ ژ دەست دان، کو ئەو ژی باژێرڤانیێن ئستەنبۆل و ئەنقەرە بوون، نها ئاکپارتیێ دڤێت ب هەر رەنگێ هەی جارەکا دی وان هەر دو باژێرڤانیان ژ دستێ پارتیا گەل یا کۆماری دەرخینیت، ژ بەر هندێ ژی نها دەست ب خەباتەکا مەزن هاتیە کرن، د رۆژەڤا ئاکپارتیێ دا نها تنێ هەلبژارتنێن باژێرڤانیان هەیە، ژ بەر هندێ ژی هەتا وی دەمی د بابەتێ چارەسەرکرنا پرسا کوردی دا ئەز باوەر ناکەم چو پێنگاڤێن نوو بهێنە ئاڤێتن.
ئەسمەر داغلی چالاکڤانا مافێ ژنان ژی راگەهاند، مخابن نها رەوشا کوردان ل تورکیا و باکورێ کوردستانێ یا باش نینە، د هەلبژارتنێن هەری دووماهیێ دا کوردان گەلەک شاشی کرن، ب تایبەتی ژی هەدەپێ، بێی کو چو دەستکەفتەکێ بدەستڤە بینن پشتەڤانیا پارتیا کۆماری کرن و ئەو یەک بۆ ئەگەرێ هندێ ل گەلەک دەڤەران دەنگێ کوردان ژی کێمتر لێ هات، ب تایبەتی ژی ل باکورێ کوردستانێ خەلک ژ سیاسەتا هەدەپێ رازی نینن، دڤێت هەدەپە دەست ژ سیاسەتا خوە یا شاش بەردەت، دڤێت هەدەپە بەرێ خوە بدەتە کورد و کوردستانێ و خوە ژ چەپێن تورک دوور بکەت، مخابن سیاسەتا نها یا هەدەپێ د خزمەتا دۆز رەوا یا گەلێ کورد ل تورکیا و باکورێ کوردستانێ دا نینە، ژ بەر کو د هەلبژارتنێن ڤێ دووماهیێ دا رێژەیا دەنگێن هەدەپێ گەلەک کێمتر لێ هات و هەکە هەدەپە ل سەر سیاسەتا خوە یا نها بەردەوام بیت دێ هێشتا ژی لاواز بیت.
ل ئالیێ دی گەلەک ژ چاڤدێرێن سیاسی یێن کورد وەسا دبینن دڤێت ژ بۆ هەلبژارتنێن باژێرڤانیان کورد ب ئێک لیست پشکداریێ بکەن، دڤێت بەری هەلبژارتنان هەموو هێزێن سیاسی یێن کوردی ل تورکیا و باکورێ کوردستانێ ل سەر بنەمایێ بەرژەوەندیێن نشتیمانی وەکو ئێک لیست پشکداریێ بکەن، ئەو یەک دێ بیتە ئەگەرێ هندێ رێژەکا مەزن یا کوردان دەنگێ خوە بدەنە هێزێن کوردی و ئەو یەک ژی بێگومان دێ ئەنجامێن خوە یێن گەلەک باش بۆ کوردان ل تورکیا و باکورێ کوردستانێ هەبیت.

سەرۆك مەسعود بارزانی ڕاگەهاند: پارتی ب دەنگێ خەلكی و پشتەڤانیا خەلكی هاتیە و پێدڤیە ئەو باوەریە بهیچتە پاراستن و هەلبژارتن بهێنە ئەنجامدان.
ل درێژیا سەرەدانێن خوە دا بۆ قەزایێن پارێزگەها دهۆكێ و ئیدارەیا سەربخوە یا زاخۆ، دوهی ئێكشەمبی 20/8/2023 سەرۆك بارزانی سەرەدانا باژێرێ زاخۆ كر و ل گەل تەخ و چینێن سنوورێ ئیدارەیا سەربخوە یا زاخۆ كۆمبوو.
د وێ كۆمبوونێ دا سەرۆك بارزانی پەیڤەك پێشكێشكر و خوەشحالیا خوە نیشاندا كو جارەكا دی دەلیڤە پەیدابوو ل گەل خەلكێ شەهید پەروەرێ سنوورێ زاخۆ كۆمبیت. هەروەسا ڕۆناهی ئێخستە سەر وان سۆزێن كو بۆ بجهئینانا پڕۆژەیان و خزمەتگوزاریێن زێدەتر ب خەلكی زاخۆ هاتبوونە دان و ڕاگەهاند، كو ب هەموو شێوەیەكی پشتەڤانێ وێ چەندێ مە كو خزمەتا ئیدارەیا سەربخوە یا زاخۆ بهێتە كرن.
سەرۆك بارزانی باس ل وێ چەندێ ژی كر كو پێدڤیە گرنگی ب كەرتێ چاندنێ و گەشتوگوزارێ بهێتە دان، بۆ وێ ئێكێ دەلیڤەیا گەشەكرن و خوەشگوزەرانیا زێدەتر بۆ خەلكی پەیدا ببیت. هەروەسا ڕاگەهاند كو شیرەتا وی بۆ حوكمەتێ و دەزگەهێن پەیوەندیدار ئەو بوو كو خزمەتكارێن خەلكی بن.
سەرۆك بارزانی ئاماژە ب ڕەوشا سیاسی یا هەرێما كوردستانێ كر و بۆ بەرهەڤبوویان ڕاگەهاند، كو د بزاڤان دانە بۆ وێ چەندێ ئێكدەنگی و ئێكڕێزیا ئالیان دروست ببیت ب تایبەتی ل سەر هێلێن گشتی یێن نیشتمانی و نەتەوەیی و پێدڤیە هیچ ئالیەك ژ وان هێل و بەرژەوەندیێن گشتی لانەدەت.
سەرۆك بارزانی ئەوژی بەرچاڤكر كو پارتی ب دەنگێ خەلكی و ب پشتەڤانیا خەلكی هاتیە و پێدڤیە ئەو باوەریە بهێتە پاراستن و هەلبژارتن بهێنە ئەنجامدان.
سەبارەت پەیوەندیێن د ناڤبەرا هەرێما كوردستانێ و ئیراقێ دا، سەرۆك بارزانی كورتیەكا دیرۆكی ل دۆر وان پەیوەندیان باسكر و ئاماژە ب وێ چەندێ كر، هۆكارێ سەرەكی یێ هەبوونا قەیران و نەسەقامگیریێ ل ئیراقێ بۆ پشتگوه هاڤێتنا ئیمزا و ڕێككەفتنان و بجهنەئینانا دستوورێ دزڤریت.
سەرۆك بارزانی داخواز ژی كر كو وەلاتی ل دۆر وان گەف و ئاستەنگان بهێنە ئاگەهداركرن، كو دهێنە بەردەم خەلكێ كوردستانێ و دوپاتی ل پێگیریبوونێ ب گیانێ نیشتمانپەروەری و پاراستنا بهایان و دۆزا ڕەوا یا گەلێ كوردستانێ كر.
د پشكا دوماهیا كۆمبوونێ دا، دەرگەهێ پرسیار و ڕەخنە و تێبینیان بۆ بەرهەڤبوویێن كۆمبوونێ هاتە ڤەكرن و سەرۆك بارزانی بەرسڤ و بەرچاڤ ڕۆهنیێن پێدڤی بۆ بەرهەڤبوویان بەرچاڤكرن.
هەر د وێ سەرەدانێ دا بۆ باژێرێ زاخۆ سەرۆك بارزانی سەرەدانا پڕۆژەیێ گەشتیاریێ كورنێشێ پرا دەلال كر.

ئەندامەكێ مەكتەبا سیاسی یا پارتی دیموكراتی كوردستان ڕاگەهاند: سەرۆك بارزانی بەردەوام دوپاتیێ ل ئەنجامدانا هەلبژارتنێن پەرلەمانێ كوردستانێ دكەت و هاندانا هەموو ئالیان ددەت هەلبژارتن ل ژڤانێ خوە یێ دیاركری دا بهێنە ئەنجامدان.هەروەسا گوت ژی: سەرۆك بارزانی ل دهۆكێ ل گەل كادر و ڕێكخستنێن پارتی كۆمبوو و ژ نێزیك گوه ل داخوازیێن خەلكێ دەڤەرێ گرتیە.
هێمن هەورامی، ئەندامێ مەكتەبا سیاسی یا پارتی دیموكراتی كوردستان گوت» سەرەدانا سەرۆك بارزانی بۆ باژێرێ دهۆكێ و ئیدارەیا سەربخوەیا زاخۆ و هەردو قەزایێن ئاكرێ و ئامێدیێ بۆ وێ چەندێ یە ژ نێزیك گوهداریا بیر و بۆچوونێن خەلكێ دەڤەرێ و تەخ و چینێن جودا ببیت».
هەڤدەم هێمن هەورامی گوت ژی» ل هەموو كۆمبوون و دیدارێن سەرۆك بارزانی دبێژیت ئەز دخواز كێمتر باخڤم و زێدەتر گوهداریا هەوە بكەم، ئەڤە ژی د چارچۆڤەیێ گرنگیا سەرۆك بارزانی یە ب ڕا و بۆچوونێن وەلاتیان چونكە سەرۆك بارزانی بەردەوام د بێژیتە مە كو د خزمەتا وەلاتیان دابین و مە ڕاستەوخوە پەیوەندی ل گەل وەلاتیێن خوە هەبیت و كادرێن مە نێزیكی وەلاتیان بن و خزمەتكارێن وەلاتیان بن».
ئاماژەكر ژی» پەیوەندیا سەرۆك بارزانی ل گەل وەلاتیێن هەرێما كوردستانێ و هەبوونا كەنالێ پەیوەندیێ د ناڤبەرا سەرۆك بارزانی و وەلاتیێن كوردستانێ، هیچ پەیوەندی ب هەلبژارتنان ڤە نینە، ئەڤ بابەتە ژی پشتی هەلبژارتنان ژی دێ بەردەوام بیت، ئەنجامدانا هەلبژارتنان ژی ئێكە ژ وان ئەركێن كو سەرۆك بارزانی دوپاتیێ ل سەر دكەت بۆ وێ چەندێ ڕەوایەتیا دەزگەهێن حوكمەتا هەرێما كوردستانێ بهێتە نووكرن و هاندانا هەموو ئالیەكی ددەت هەلبژارتن د دەمێ خوە یێ دیاركری دا بهێنە ئەنجامدان».
دیاركر ژی» د كۆمبوونێن سەرۆك بارزانی ل گەل كادرێن پارتی دیموكراتی كوردستان زێدەتر مەبەست ژێ بزانیت پشتی كۆنگرەیێ 14 یێ پارتی هەلسەنگاندنەك بۆ كارێ حزبێ ژ ڕوویێ ڕێكخستنێ ڤە و ژ ڕوویێ ڕەفتارا كادرێن مە كا چاوان دنێرنە گۆڕانكاریان».

شیرەتكارێ سەرۆكێ هەرێما كوردستانێ بۆ كاروبارێن لەشكری ڕادگەهینیت: پڕۆسەیا ئێكخستنا هێزا پێشمەرگەی دێ یا بەردەوام بیت، ب گۆرەی بەرنامەیەكێ دارێژتی هەموو هێزا پێشمەرگەی دێ هێتە ئێكخستن، پاشی لیوا پشتی دروستكرنا فیرقەیان دێ بنە فەیلەق یان ژی فەرماندەیێن ئۆپەراسیۆنان.
بابەكر زێباری، شیرەتكارێ سەرۆكێ هەرێما كوردستانێ بۆ كاروبارێن لەشكری گوت» ئێكخستنا 28 لیوایێن هێزا پێشمەرگەی پێنگاڤەكا گرنگە وپڕۆسە ژی دێ بەردەوام بیت بۆ وێ چەندێ هەموو هێزا پێشمەرگەی كو ب گۆرەی بەرنامەیەكێ هاتیە دانان بهێتە ئێكخستن، لەوما ئەو پڕۆسەیە دێ بەردەوام بیت و بەرنامەیەكێ گەلەك باش بۆ هاتیە دانان، هەردو یەكەیێن 70 و 80 بهێنە ئێكخستن و ببنە لیوایێن هەڤپشك ئەڤە ژی دێ وەكەت هێزەكا ئێكگرتی یا پێشمەرگەی بهێتە دروستكرن، هیچ كێشەیەك نینە و نابیت ژی، چونكە د ڕژدین ل سەر ئێكخستنا هەموو هێزا پێشمەرگەی».
بابەكر زێباری گوت ژی» هیچ دەمەكێ دیاركری نینە بۆ وێ چەندێ هێزا پێشمەرگەی ل دەمەكێ دیاركری دا ب تمامی بهێتە ئێكخستن، چونكە پڕۆسە یا درێژخانەیە و پێدڤی ب دەمی هەیە و یا ب ساناهی نیننە، چونكە ئینانا پێشمەرگەی ژ ڕەبیان پاشی فەرماندەیێ سریێ و فەرماندەیێ فەسیلێ و جێگرێن وان و برنا وان بۆ مەشق و ڕاهێنانێ و پڕكرنا جهێن وان دەم بۆ دڤێت، بەلێ ب شێوەیەكێ گەلەك ب ڕێكوپێك دێ هێنە ڕێكخستن و ئێكخستن.
دیاركر ژی «پشتی دروستكرنا فیرقەیان بڕیارە فەیلەق یان ژی فەرماندەیێن ئۆپەراسیۆنان بهێنە دروستكرن، بەلێ میحوەر هەر دێ مینن ودێ ب وان لیوایێن هەڤپشك ئەوێن دێ هێنە دروستكرن دێ هێنە پڕكرن».

بەرپرسێ لقێ ئێكێ پارتی دیموكراتی كوردستان ڕاگەهاند: سەرۆك بارزانی د سەرەدانا خوە دا بۆ دهۆكێ ڕۆناهی ئێخستە سەر ڕەوشا حزبێ و بڕیارێن كۆنگرەیێ 14 یێ پارتی هەروەسا ژ نێزیك گوهداریا تەخ و شینێن ڤێ دەڤەرێ گرت.سەبارەت هەلبژارتنێن پەرلەمانێ كوردستانێ، گوت: پشكەك ژ ئالیان ئاستەنگان بۆ هەلبژارتنان پەرلەمانێ كوردستانێ دورست دكەن.
عەلی عەونی، ئەندامێ كۆمیتەیا ناڤین یا پارتی دیموكراتی كوردستان و بەرپرسێ لقێ ئێك یێ پارتی گوت» سەرەدانا سەرۆك بارزانی بۆ پارێزگەها دهۆكێ، ئیدارەیا سەربخوە یا زاخۆ، قەزایێن ئاكرێ و ئامێدیێ بۆ وێ چەندێ بوو تاكو ژ نێزیك گوهداریا بیر و بۆچوونێن خەلكێ دەڤەرێ و تەخ و چینێن جودا بكەت، هەڤدەم سەرۆك بارزانی بەردەوام دبێژیت، دخوازم كێمتر باخڤم و زێدەتر گوهداریا هەوە بكەم، ئەڤە ژی د چارچۆڤەیێ گرنگیا سەرۆك بارزانی یە ب بۆچوونێن وەلاتیان».
بەرپرسێ لقێ ئێك یێ پارتی گوت ژی» سەرۆك بارزانی ڕۆناهی ئێخستە سەر ڕەوشا حزبێ و بڕیارێن كۆنگرەیێ 14 یێ پارتی دیموكراتی كوردستان و هەروەسا ژ نێزیك ڤە گوهداریا داخوازیێن تەخ و چینێن ڤێ دەڤەرێ بكەت».
سەبارەت هەلبژارتنێن پەرلەمانێ كوردستانێ ژی، عەلی عەونی دبێژیت» هندەك ئالیێن سیاسی یێن كوردستانی ئاستەنگان بۆ هەلبژارتنێن پەرلەمانێ كوردستانێ دروست دكەن، و دبێژن د بەرهەڤین بۆ هەلبژارتنان، بەلێ كو دهێنە سەر واقعی هەموو خوە ژ ئەنجامدانا هەلبژارتنان ڤەددزن».
هەروەسا دیاركر» پارتی دیموكراتی كوردستان بۆ هەلبژارتنێن پەلەمانێ كوردستانێ یا بەرهەڤە، چونكە پارتی دیموكراتی كوردستان دخوازیت ب ڕێكا ئەنجامدانا هەلبژارتنان ڕەوایەتیا دەزگەهێن حوكمەتا هەرێما كوردستانێ بهێتە نووكرن و ئەڤە ژی ئەركەكە پێدڤیە بەرامبەر وەلاتیێن خوە بجهبینین».
عەلی عەونی ڕۆهنكر ژی» ئەو ئالیێن ئاستەنگان بۆ هەلبژارتنان دروست دكەن، بووینە هۆكارێ وێ چەندێ كو هەلبژارتن گیرو ببن، ب ڕێكا دادگەها فیدرالی یا ئیراقی وەكر كۆمسیۆنا بلند یا هەلبژارتن و ڕاپرسیان ل هەرێما كوردستانێ شەرعیەت نەمینیت، پێدڤی بوو كۆمسیۆنا بلند یا هەلبژارتن و ڕاپرسیان ل هەرێما كوردستانێ هەلبژارتنێن پەرلەمانێ كوردستانێ بڕێڤەبربان نەكو كۆمسیۆنا ئیراقێ».
بەرپرسێ لقێ ئێك یێ پارتی خویاكر» حوكمەتا ئیراقێ بەردەوام مافێن گەلێ كورد پێشێلكرینە، هەروەسا ئیراق یا بەردەوام بهانەیان ب هەرێما كوردستانێ دگریت، هەڤدەم دستوورێ ئیراقێ ژی وەكو خوە نەهاتیە بجهئینان و مافێن هەرێما كوردستانێ ژی تێدا هاتینە پێشێلكرن».
گوت ژی» 52 مادەیێن دستووری بەرامبەر هەرێما كوردستانێ نەهاتینە بجهئینان، هەروەسا پێدڤیە كورد ئێكدەنگ و ئێكڕێز بن بۆ وێ چەندێ ب سەر ئاستەنگان سەركەڤن»

سکرتێرێ گشتی یێ پارتیا دیموکرات یا کوردستان/ سووریا راگەهاند کو وان دڤێت ل سووریێ و رۆژئاڤایێ کوردستانێ دەست ب قۆناغەکا نوو بکەن، چونکی پێدڤیا کوردان ب ئێکگرتنێ هەیە، لێ مخابن هەتا نها ژی پەیەدە ئاستەنگیان دروست دکەت.
ناڤهاتی ئەو یەک ژی دیار کر، بەری نها ئەمریکا و فرەنسا و هەم ژی سەرۆک بارزانی و هەرێما کوردستانێ گەلەک بزاڤ کرن دا پرسێن هەی د ناڤبەرا مە و پەیەدێ دا بهێنە چارەسەرکرن، لێ پەیەدە ئاستەنگی دروست کرن، هەتا نها ژی پەیەدە ئاستەنگیان دروست دکەت، چونکی مە دڤێت وەکو پارتی دیموکراتی کوردستان/ سووریا و وەکو ئەنجوومەنێ نشتیمانی یێ کوردی ل سووریێ ئەم ل گەل هەموو هێزێن کوردی دەست ب قۆناغەکا نوو بکەین دا پرسێن هەی چارەسەر بکەین، چونکی نها پتر ژ هەر دەمەکێ دڤێت کورد ل سووریێ و رۆژئاڤایێ کوردستانێ د ناڤ خوە دا ئێکگرتی بن، لێ پەیەدە ئاستەنگیان دروست دکەت، هەتا نها ژی ب سەدان هەڤالێن مە ل زیندانێن پەیەدێ دانە و رۆژانە ژی ئەو ئاستەنگیان ل هەمبەر کار و خەباتا مە یا نەتەوەیی ل رۆژئاڤایێ کوردستانێ و سووریێ دروست دکەن.

ل ڕۆژا شەمبیێ 19/8/2023، سەرۆك مەسعود بارزانی ل قەزا ئامێدیێ ل گەل تەخ و چینێن جودا جودا و پێشمەرگە و هەلگرێن مەدالیا بارزانی و كەسایەتیێن جڤاكی و پێكهاتەیان و بەرپرسێن حزبی و حكومی و جەماوەرێ سنوورێ لقێ 18 یێ پارتی دیموكراتی كوردستان ل ئامێدیێ كۆمبوو.
سەرۆك بارزانی د كۆمبوونێ دا پەیڤەك پێشكێشی بەرهەڤبوویان كر و ڕۆناهی ئێخستە سەر خەبات و قوربانیدانا وێ دەڤەرێ ل قۆناغێن شۆڕەشێ و پێزانین ژی بۆ قوربانیدان و وەستیانا خەلكێ وێ دەڤەرێ هەبوو و باس ل وێ چەندێ ژی كر كو بۆ گوهلێبوونا ڕاوبۆچوون و داخوازی و كێشەیێن خەلكێ خوەشتڤیێ وێ دەڤەرێ هاتیە.
سەرۆك بارزانی ئەوژی ڕاگەهاند كو ئالیێن پەیوەندیدار و حوكمەتا هەرێما كوردستانێ بزاڤێن خوە ئەنجامداینە و ئەنجام ددەن تاكو دەستێ ئاڤەدانیێ و خزمەتكرنا زێدەتر بگەهیتە دەڤەرێ و ڕۆهنكر ژی كو هندەك گرفت ژ ئەگەرێ ڕەوشا ئەمنی ل ڤێ دەڤەرێ یێن هەین چونكە هندەك جه و گوندێن ڤێ دەڤەرێ ژبەر هۆكارێن ئەمنی دشیاندا نەبوو دەستێ خزمەتكرنێ بگەهیتێ و ئەوژی بوویە جهێ كێمبوونا دەلیڤەیێن كاری ل سنوورێ وێ دەڤەرێ و لاوازیا كەرتێ تایبەت، هەروەسا سەرۆك بارزانی ڕاگەهاند كو پێدڤیە حوكمەت و حزب خزمەتكارێن مللەتێ خوە بن.
سەرۆك بارزانی د درێژیا پەیڤا خوە دا ل دۆر ڕەوشا ناڤخوەیا هەرێما كوردستانێ ڕاگەهاند كو هەبوونا بۆچوونێن جودا دناڤ ئالیێن سیاسی یێن كوردستانێ دا بابەتەكێ سروشتیە، بەلێ پێدڤیە هەموو ئالی ل سەر پاراستن و ب هێزكرنا قەوارەیێ هەرێما كوردستانێ و بەرژەوەندیێن هەرێما كوردستانێ د هەڤڕا بن.
سەبارەت ڕەوشا ئیراقێ وپەیوەندیێن د ناڤبەرا هەرێما كوردستانێ و بەغدا، سەرۆك بارزانی كورتیەكا دیرۆكی ل دۆر پەیوەندیێن د ناڤبەرا هەرێما كوردستانێ و بەغدا پشتی ژناڤچوونا ڕژێما بەعس باسكر و دوپاتی ل وێ چەندێ كر د بزاڤێن خوە دا د بەردەوامین بۆ چارەسەركرنا كێشەیان و بۆ ڤێ مەبەستێ دانوستاندن د بەردەوامن و ب ئومێدین بۆ چارەسەركرنا ناكۆكیان، هەروەسا ئاماژە ب وێ چەندێ كر كو پێدڤیە ڕێز ل ڕێككەفتنان و دستووری بهێتە گرتن و ئالیێن ئیراقی بنەمایێن هەڤپشكیێ و لهەڤهاتنێ و هەڤسەنگیێ ل بەرچاڤ بگرن.
د پشكەكا دی یا وێ كۆمبوونێ دا سەرۆك بارزانی داخواز ژ بەرهەڤبوویێن كۆمبوونێ كر كو سەرنج و پێشنیاز و داخوازیێن خوە بەرچاڤ بكەن و ل دووماهیا كۆمبوونێ سەرۆك بارزانی بەرسڤا پرسیار و داخوازیێن بەرهەڤبوویان دا.

سەرۆك مەسعود بارزانی ل ڕۆژا ئەینیێ 18/8/2023 د چارچۆڤەیێ كۆمبوونەكێ ل گەل تەخ و چینێن دەڤەرا ئاكرێ ڕاگەهاند: پێدڤیە خزمەتا زێدەتر یا وەلاتیان بێی جوداهی بهێتە كرن و دیاركر، حوكمەتا هەرێما كوردستانێ كاردكەت بۆ خزمەتكرنا هەموو دەڤەرێن هەرێما كوردستانێ و دابینكرنا خزمەتگوزاریێن زێدەتر بۆ وەلاتیان.
ل ڕۆژا ئەینیا بۆری، سەرۆك بارزانی د سەرەدانەكێ دا بۆ قەزا ئاكرێ ل بارەگایێ لقێ 9 یێ پارتی دیموكراتی كوردستان ژ ئالیێ بەرپرسێن حزبی و حكومی ل دەڤەرێ پێشوازیەكا گەرم لێ هاتە كرن.
بارەگەهێ بارزانی بەلاڤكر، سەرۆك بارزانی ل قەزا ئاكرێ د كۆمبوونەكا بەرفرهە دا ب پشكداریا تەخ و چینین جودا جودا و كەسوكارێن سەربلندێن شەهیدێن وی سنۆری و پەككەفتیێن سەنگەری و خەباتكەرێن وی سنۆری و مامۆستا و كەسایەتیێن ئایینی و كاسبكار و جوتیار و گەنج و ئافرەتان كۆمبوو.
سەرۆك بارزانی د پەیڤەكێ دا بۆ بەرهەڤبوویێن كۆمبوونێ، ڕۆناهی ئێخستە سەر خزمەتكرنا دەڤەرێ ب گشتی و ئاماژە ب وێ چەندێ كر كو پێدڤیە خزمەتا زێدەتر یا وەلاتیان بهێتە كرن بێی جوداهی و ڕۆهنكر ژی كو حوكمەتا هەرێما كوردستانێ كاردكەت بۆ خزمەتكرنا هەموو دەڤەرێن هەرێما كوردستانێ و دابینكرنا خزمەتگوزاریێن زێدەتر بۆ وەلاتیان.
سەبارەت پەیوەندیێن د ناڤبەرا هەرێما كوردستانێ و ئیراقێ دا، سەرۆك بارزانی ئاماژە ب وێ چەندێ كر كو ئەم د دانوستاندنێن خوە دا بەردەوامین ل گەل بەغدا و چاڤەڕێی بجهئینانا ڕێككەفتنێ نە بۆ پاراستنا ماف و شایستەیێن دارایی یێن گەلێ كوردستانێ و قەوارەیێ دستووری یێ هەرێما كوردستانێ د چارچۆڤەیێ دستووری و بنەمایێن لهەڤهاتنێ و هەڤپشكیێ و هەڤسەنگیێ.
ل دووماهیێ سەرۆك بارزانی دەرگەهێ دانوستاندنێ بۆ بەرهەڤبوویان ڤەكر و ب گرنگی گوه ل داخوازی و پێشنیازێن خەلكێ دەڤەرێ گرت.

سەرۆك مەسعود بارزانی ل گەل وەزیر و ئەندامێن فراكسیۆنا پارتی دیموكراتی كوردستان ل جڤاتا نوونەرێن ئیراقێ و بەرپرسێن پارتی ل بەغدا كۆمبوو و ڕاگەهاند: پێدڤیە مافێن دستووری یێن قەوارەیێ قانوونی و دستووری یێ كوردستانێ و گەلێ وی یێ پاراستی بیت.
ب گۆرەی بەیاننامەیەكا بارەگەهێ بارزانی، د كۆمبوونێ دا ڕەوشا سیاسی و دووماهی پێشهات هاتنە باسكرن.
د بەیاننامەیا بارەگەهێ بارزانی هاتیە، د. فوئاد حسێن وەزیرێ دەرڤەیێ ئیراقێ و ئەندامێ مەكتەبا سیاسی یا پارتی دیموكراتی كوردستان باس ل بەرهەڤیێن هەلبژارتنێن جڤاتێن پارێزگەهان و وان قانوونان كر كو ل ڤی وەرزێ جڤاتا نوونەرێن ئیراقێ دێ دانوستاندن ل سەر هێنە كرن، ژ وان ژی قانوونا پەترۆل و غازێ، قانوونا جڤاتا فیدرالی و قانوونا دادگەها فیدرالی.
سەرۆك بارزانی د كۆمبوونێ دا بۆ بەرهەڤبوویان ئاخڤت و گوت» ئەم خودان پرسەكا ڕەواینە، د هەموو قۆناغان ژی دا د پڕۆسەیا سیاسی دا، بەردەوام د پێگیرین ب هەرسێ بنەمایێن لهەڤهاتنێ و هەڤپشكیێ و هەڤسەنگیێ».
سەرۆك بارزانی د پشكەكا دی یا ئاخڤتنێن خوە دا ڕاگەهاند» پێدڤیە مافێن دستووری یێن قەوارەیێ قانوونی و دستووری یێ كوردستانێ و گەلێ وێ د پاراستی بن، چونكە ئەڤ هەرێمە بەرهەمێ خەباتەكا دوور و درێژە ژ پێخەمەت ئازادیێ».

سەرۆك مەسعود بارزانی ل سالڤەگەرا 77 یا دامەزراندنا پارتی پەیامەك بەلاڤكر و تێدا ڕاگەهاند، پارتی و ڕێبازا بارزانی ل دەمێن بۆری و نوكە و ل پاشەڕۆژێ بەردەوام جهێ ئومێدێ و دەست و بازێن ب هێز یێن كوردستانێ و پارێزەر و بەرگریكارێن دۆزا ڕەوا یێن گەلێ كوردستانێ نە.
سەرۆك بارزانی د پەیاما خوە دا پیرۆزباهی ل خێزانێن سەربلندێن شەهیدان و پێشمەرگێن قەهرەمان و سەركردایەتی و كادر و ئەندام و لایەنگرێن پارتی و هەموو خەلكێ كوردستانێ دگەت و دبێژیت» ب ڤێ هەلكەفتێ من پێزانین بۆ خەبات و قوربانیدانا جەماوەرێ پارتی هەیە كو ل قۆناغێن دژوار دا هەردەم هێڤێنێ خۆڕاگری و ب هێزتربوونا گەلێ كوردستانێ بوون».