NO IORG
نوچێن گرنگ

ئەڤرۆ نیوز ، زنار تۆڤی :

په‌یڤدارێ حوکمه‌تا هه‌رێما كوردستانێ ره‌تكر و دا دیار کرن، كو حوکمه‌تا هه‌رێمێ و توركیا چ رێككه‌فتنه‌ك نەکرینە بۆ هاتنا سوپایێ توركیا بۆ ناڤ ئاخا هه‌رێما کوردستانێ.
سه‌فین دزه‌یی په‌یڤدارێ حوکمه‌تا هه‌رێما كوردستانێ ئەو ژی گوتیە: هاتنا سوپایێ توركیا بۆ ناڤ ئاخا هه‌رێمێ ڤه‌دگه‌ریته‌ ڤە بۆ رێككه‌فتنه‌كا سالێن هه‌شتیان،کو دناڤبه‌را توركیا و رژێما وی ده‌می یا عێراقێ دا هاتیە ئەنجامدان و حوکمه‌تا هه‌رێمێ چو رێككه‌فتنه‌ك بۆ هاتنا هێزێن تورکیا بۆ ناڤ هه‌رێمێ نەکرینه‌.

هەروەسا گۆت ژی: هه‌بوونا هێزێن په‌كه‌كێ وه‌كریه‌ كو هه‌موو ده‌مان ده‌ستدرێژی ل سه‌ر ئاخا هه‌رێما کوردستانێ بهێته‌ كرن،دیسا حوکمه‌تا هه‌رێمێ ژی ب چو ره‌نگان قه‌بوول ناكه‌ت كو ئاخا كوردستانێ ببیته‌ مه‌یدانا شه‌رێ چو ئالیان.
پەیڤدارێ حوکمەتا هەرێما کوردستانێ سه‌فین دزه‌یی ئەو ژی ئاشکرا کر:کو نابیت په‌كه‌كه‌ چ به‌هانه‌یان بده‌ته‌ ده‌ست توركیا كو ئاخا هه‌رێمێ ده‌رباز بكه‌ت و خه‌لكی ئاواره‌ و ده‌ربه‌ده‌ر بكه‌تە ڤە.

ئەڤرۆ نیوز ، زنار تۆڤی :

وه‌زاره‌تا دارایی و ئابووری یا حوکمه‌تا هه‌رێما كوردستانێ ئه‌ڤرۆ راگه‌هاند،کو به‌لاڤكرنا مووچه‌یێ هەیڤا شواتێ دێ 5 ڤێ هەیڤێ یان به‌ری وی ژڤانی ده‌ست پێكه‌ت.
ل گۆر زانیاریێن ئه‌ڤرۆ نیوز ،کو به‌لاڤكرنا مووچه‌یێ هەیڤا شواتێ هێشتا بریارا دوماهیێ پێ ده‌رنه‌كه‌فتیه‌، لێ ژبه‌ركو به‌لاڤكرنا مووچه‌یێ هەیڤا بۆری ل 5 هەیڤێ ده‌ستپێكربوو، له‌وما یێ ڤێ هەیڤێ ژی دێ ل 5 یان ژی به‌ری وی ژڤانی ده‌ست پێكه‌ت.
هەروەسا وەزارەتا دارایی و ئابووری دیارکریە،کو دێ به‌لاڤكرنا مووچەی ل گۆره‌ی خشته‌یێ هەیڤا بوری بیت و دێ ژ وه‌زارتێن په‌روه‌ده‌ و ساخله‌میێ ده‌ستپێكه‌ت.
هه‌روه‌سا ل دووڤ دا دێ وه‌زاره‌تا دارایی و ئابووری مووچه‌ی وه‌رگریت و پاش دێ یێ وه‌زاره‌تێن دی ده‌ست پێكه‌ن.

ئەڤرۆ نیوز ، زنار تۆڤی :

نێچیرڤان بارزانی، سەرۆكێ حوکمەتا هەرێما کوردستانێ راگه‌هاندیە کو هەرێما کوردستانێ و ئیرانێ پەیوەندیێن هەڤبەش هەنە و ئەم دێ دەڤەرەکا بازارێ ئازاد دروستكەین و د نوکە دا 359 كۆمپانیێن ئیرانی ل هەرێمێ کار دکەن.

نێچیرڤان بارزانی سەرۆكێ حوکمەتا هەرێمێ ئەڤرۆ چارشه‌مبی‌ 2 گولانا 2018 ل چارەمین كۆنفرانسێ ئابووری یێ ل ژێر ناڤێ (پەرەپێدانا پەیوەندیێن ئابووری یێن دناڤبەرا هەرێما کوردستانا-عێراقێ و كۆمارا ئیسلامی یا ئیرانێ) گوتیە دێ گرنگیەکا زۆر ب پەیوەندیێن بازرگانی یێن هەرێمێ و ئیرانێ دەین و دێ هەموو بزاڤێن خوە ئێخینە کار بۆ باشتركرنا پەیوەندیێن دناڤبەرا کوردستانێ و ئیرانێ و دا.

هەروەسا سەرۆکێ حوکمەتا هەرێمێ گوت ژی:نوکە 359 كۆمپانێن ئیرانی تایێن خوە ل هەرێمێ هەنە و هەروەسا شەش ملیار دۆلار ئاڵوگۆرا بازرگانی دناڤبەرا هەرێمێ و ئێرانێ دا هەیە.
ئەو ژی دیارکر: 135 كارگەهێن ئیرانێ ل هەرێما کوردستانێ هەنە و سێ مەرزێن سەرەكی هەنە،ئەڤە و ل گەل پێنج مەرزێن لاوەكی ژی هەنە،دێ بزاڤێ کەین ئەو هەر پێنجێن دی ژی ببنە دەرگەهێن فەرمی.

نێچیرڤانی گوت ژی،دێ دەڤەرەکا بازارێ ئازاد ل پەروێزخان ڤەكەین دناڤبەرا ئیرانێ و هەرێما کورستانێ و دێ هەموو بزاڤان کەین بۆ باشتركرنا پەیوەندیێن مە ل گەل ئیرانێ،هەروەسا ئیرانێ د شەرێ داعش هاریكاریا مە کریە و جهێ رێزێ یە،دیسا ژ مێژە مە پەیوەندیێن باش ل گەل كۆمارا ئیسلامیا ئیرانێ هەنە و دێ بەردەوامیێ ژی پێدەین.

سەبارەت پەیوەندیێن دناڤبەرا هەولێرێ و بەغدا سەرۆكێ حوکمەتا هەرێمێ دیارکر پەیوەندیێن مە ل گەل بەغدا بەرەف پێشڤەچووینە،هەروەسا رێكخستنا پەیوەندیان د وارێ بازرگانی ل سەر بنەمایێ دستوری دناڤبەرا هەولێر و بەغدا دا كاریگەریەکا زۆر هەیە و د نوکە دا یا بەرەف باشتر دچیت.

ئه‌ڤرۆ نيوز:

نێچيرڤان بارزانى، سه‌رۆك وه‌زيرێن هه‌رێما كوردستانێ د كۆنفرانسه‌كێ په‌ره‌پێدانا په‌يوه‌نديێن ئابوورى يێن ناڤبه‌را هه‌رێما كوردستان و ئيرانێ گۆتاره‌ك پێشكێش كر و تێدا راگه‌هاند: دێ ده‌ڤه‌ره‌كا بازرگانى ل په‌راوێزخان ل گه‌ل ئيرانێ دروست كه‌ين.

ئاماژه‌ ب وێ چه‌ندێ ژى كر كو دێ بزاڤێ كه‌ن هنده‌ك ژ وان پێنج سنورێن لاوه‌كى يێن هه‌رێما كوردستانێ و ئيرانێ بكه‌نه‌ سنورێن نێڤده‌وله‌تى.

184

ئه‌ڤرۆ نيوز:

بڕیارە ئەڤرۆ ب بەرھەڤبوونا ھژمارەکا بەرچاڤا بەرپرسێن بلندێن ھەرێما کوردستانێ و ئیرانێ کۆنفڕانسێ چوارێ یێ بازرگانی د ناڤبەرا ھەرێم و ئیرانێ بھێتە ئەنجام دان ژوورا بازرگانی و پیشەسازیا ھەرێما کوردستانێ ژی دیارکر، بزاف یێ دھێنەکرن دەڤەرەکا بازرگانیا ئازاد د ناڤبەرا ھەرێم و ئیرانێ دا بھێتە ڤەکرن.

کاروان سورچی، بەرپرسێ راگەھاندنا ژۆرا پیشەسازی و بازرگانیا ھەرێما کوردستانێ بۆ رۆژناما ئەڤرۆ گۆت” بڕیارە ئەڤرۆ رۆژا چوارشەمبی کۆنفڕانسێ چوارێ یێ ئابووری د ناڤبەرا ھەرێما کوردستانێ و کۆمارا ئیسلامیا ئیرانێ ل ھەولێرێ بھێتە ئەنجامدان و تێدا سەرۆک بارزانی و بەرپرسێن بلندێ ھەرێما کوردستانێ و ئیران و بەغداژی دێ بەرھەڤبن، مەرەم ژ کۆنفڕانسی بۆ پتر گرنگیدان و گەشەکرنا کەرتێ ئابووری و پیشەسازیە دناڤبەرا ھەرێما کوردستان و بەغدا، چونکە ئەم دو وەلاتێن جیرانین و قەبارێ بازرگانیا ناڤبەرا مەدا زۆرە و ئیرانێ ژلایێ بازرگانی ڤە گرنگیا خوە بۆ ھەرێما کوردستانێ ھەیە.

کاروان سورچی گۆتژی” ئێک ژ مژارێن کو بڕیارە د چوارچوڤێ کۆنفڕانسێ ئابوریێ ناڤبەرا ھەرێم و ئیرانێ بھێتە بەحسکرن، ڤەکرنا دەڤەرەکا بازرگانیا ئازادە دناڤبەرا ھەرێماکوردستان و ئیرانێ، ب ڤەکرنا ئەڤێ دەڤەرا بازرگانیا ئازاد دێ پتر ئاسانکاری ھەبیت بۆ کەرتێ بازرگانی و گەشەکرنا پەیوەندیێن ئابوری و بازرگانیێن ناڤبەرا ھەردو لایەنێن ھەرێم و ئیرانێ، لەوڕا ھەموو بزاڤەک دێ ھێتەکرن بۆ ڤەکرنا دەڤەرا بازرگانیا ئازاد.

184

ئه‌ڤرۆ نيوز:

ئەندامەکا لیژنا دارایی یا پەرلەمانێ کوردستانێ ئەشکرەکر، ئەولەویەتا فڕاکسیۆنا پارتی ئەڤە پڕۆژە قانوونا چاکسازیێ ددەمێ خوە بھێتە پەسەندکرن و دیارکر، ب ئەڤی داھاتێ د ئەنجامێ چاکسازیێ ڤەدگەڕیت بۆ حکوومەت دێ ئێکسەر چیتە سەر مووچێ فەرمانبەران و تشتەک بناڤێ پاشەکەفت و گیرووبونا مووچەی نامینیت.

مەدینە ئەیوب، ئەنداما فڕاکسیۆنا پارتی لپەرلەمانێ کوردستانێ بۆ رۆژناما ئەڤرۆ گۆت” ھەموو بزاڤێن فڕاکسیۆنا پارتی ئەڤن ھەتا 15ی ئەڤێ ھەیڤێ پڕۆژە قانوونا چاکسازیێ بھێتە پەسەندکرن و بکەڤیتە بیاڤێ بجە ئینانێ دا، ئەف بڕگە و مادەیێن خەلکێ گازندە لسەر ھەی دێ راستڤەکرن، ھەموو داھاتێ ب ئەگەرێ قانوونا چاکسازیێ ڤەدگەڕیت بۆ حوکمەتێ دێ چیتە سەر مووچێ فەرمانبەران ، لەوڕا وی دەمی تشتەک بناڤێ سیستەمێ پاشەکەفت نامینیت و مووچێن فەرمانبەران ھەیڤانە بێ گیرووبون دێ ھێنە بەلافکرن،

مەدینە ئەیوب گۆتژی” ئەگەر پشتی نەھێلانا پاشەکەفتێ لسەر مووچەی پارە بۆ حوکمەتێ بمینیت ئەڤە پلان ھەیە ئێکەم پێنگاڤ دەستپێکرنا پێشینەیا خانی و بەران بیت، چونکە وەلاتیان پێدڤی ب دانا پێشینەیان ھەیە و بەری قەیرانێ ژی ھژمارەکا زۆرا وەلاتیان مفاداربووینە ل پێشینەیێن حوکمەتێ بتایبەتی پێشینەیا خانی و بەرا، لەوڕا دێ ھەموو بزاڤەک ھێتەکرن پشتی ئاسایی بوونا مووچەی پێشینەیێن خانیان بھێنە بەلافکرن.

184

ئەڤرۆ نيوز:
رێڤەبەرێ گشتی یێ پەروەردا پارێزگەھا دھۆکێ ب وەکالەت بۆ رۆژناما ئەڤرۆ دیار کر کو ل دووڤ بڕیارا وەزارەتا پەروەردا حوکمەتا ھەرێما کوردستانێ رەنگە سوبەھی رۆژا 3/5/2018ێ د رێورەسمەکی دا رێڤەبەرێن پەروەردێن سێ قەزایێن سنوورێ پارێزگەھا دھۆکێ بھێنە گوھۆڕین.

عەمەر عەلی تەھا، رێڤەبەرێ گشتی یێ پەروەردا پارێزگەھا دھۆکێ ب وەکالەت ئاشکرا کر کو پشتی وەزارەتا پەروەردا حوکمەتا ھەرێما کوردستانێ بڕیارا گوھۆڕینا رێڤەبەرێن ھەر ئێک ژ پەروەردێن قەزایێن (سێمێل) و (دھۆک رۆژھەلات) و (بەردەرەش) دەرکری د قووناغا ئێکێ دا بڕیارە سوبەھی رۆژا پێنجشەمبی د رێورەسمەکی دا (درباس مستەفا) ل جھێ (عەبدوللا حەسەن) وەکو رێڤەبەرێ نوو یێ پەروەردا قەزا سێمێلێ بھێتە دانان و (فادیا عەبدولقەھار) وەکو رێڤەبەرا نوو یا پەروەردا قەزا دھۆک رۆژھەلات ل جھێ (سەمیر عەبدولعەزیز) بھێتە دانان.

ناڤھاتی ئاماژە دا وێ چەندێ کو د قووناغا دویێ یا گوھۆڕینا رێڤەبەرێن پەروەردێن قەزایێن سنوورێ پارێزگەھا دھۆکێ دا بڕیارە پشتی ب دووماھی ھاتنا ئەزموونێن دووماھیا وەرزێ دویێ یێن سالا خواندنێ 2017 – 2018ێ د رێورەسمەکی دا رێڤەبەرێ پەروەردا قەزا بەردەرەش ژی بھێتە گوھۆڕین و (مەھدی خەلیل) وەکو رێڤەبەرێ نوو یێ پەروەردا قەزا بەردەرەش ل جھێ (غازی گوران) بھێتە دانان.

pdk 184

 

ئەڤرۆ نیوز ، زنار تۆڤی :
یانا ریال مەدرید یا ئیسپانی شیا خوە بگەهینیتە یاریا دوماهیێ یا چامپیونزلیگا ئورۆپی پشتی دیاریا هاتنێ دا لناڤا یاریگەها سانتیاگۆ برنابیو ل گەل یانا بایرن میۆنشن وەکهەڤبووی،ب دو گولان و ب ڤی ئەنجامی یانا شاهانە گەهشته یاریا دوماهیا چامپیۆنزلیگێ،ژبەرکو دیاریا چوونێ دا ریال شیابوو سەرکەفتنی ل سەر یانا باڤاری تومار بکەت،ب دو گولان هەمبەری گولەکێ.

 ئەڤرۆنیوز، سالار دۆسكی

سەرۆكێ‌ ژۆرا بازرگانی وپيشه‌سازى ل پارێزگه‌ها دهۆكێ‌ راگه‌هاند، سوباهى چارشه‌مبى 2/5/ 2018 دێ‌ كومفرانسەكێ‌ ئابووری دناڤبەرا ژۆرێن بازرگانی ل هەرێما كوردستانێ‌ و كۆمپانیێن ئیرانی ل هەولێرێ‌ هێتە سازكرن و بۆ ده‌مێ دو رۆژان دێ به‌رده‌وام بيت و نێزییكی 150 كۆمپانیێن ئیرانی و كۆمپانیێن هەرسێ‌ پارێزگەهێن هەرێمێ‌ ل گەل كۆمپانیێن عراقی پشكداری كونفرانسی نە، ژپارێزگەها دهۆكێ‌ پتر 100 كۆمپانیان پشكداری كونفرانسی نە.

ئەیاد حەسەن، سەرۆكێ‌ ژۆرا بازرگانی وپيشه‌سازى ل پارێزگه‌ها دهۆكێ‌ بۆ ئه‌ڤرۆنيوز گۆت” ئارامانجا كونفرانسی پەیوەندیێن ئابووری ل گەل ئیرانێ‌ بهێنە خورتكرن و ئیران وەلاتەكێ‌ ب هێزە ژلايێ ئابوورى ڤه‌ و بازرگانیەكا باش د ل گەل ئیرانێ‌ هێتەكرن و مە دڤێت ئەڤ پەیوەندیە بەر ب باشبوونێ‌ ڤە بچن و تایبەت خەلكێ‌ مە ئەوێن ل گەل وی وەلاتی بازرگانیێ‌ دكەن” .

ئەیادی گۆت ژى” دێ‌ هەموو بزاڤان كەین كێشێن دناڤبەرا بازرگانێن هەرێمێ‌ و ئیرانێ‌ دا بهێنە چارەسەكرن  و پتر بزاڤا ئابووری بهێتە خورتكرن و ب رێيا ڤان كونفرانسان پتر بازرگانێن مە هه‌ڤدو بنیاسن و بشێن كارێ‌ بازرگانی ووه‌ بەرهێنانێ‌ پتر خورت بكەن”.

دياركر” پێشبینی دكەین چەندین گرێبەست دناڤبەرا بازرگانێن هەرێمێ‌ و‌ ئیرانێ‌ بهێنە گرێدان و خەلكێ‌ مە پتر بزاڤا بازرگانی دناڤبەرا هەر دو وەلاتان دا خورت  بكەت.

ئه‌ڤرۆنيوز:

ئه‌ندامه‌كێ مه‌كته‌با سياسى يا پارتى ديموكراتى كوردستان راگه‌هاند، پارتى دێ به‌رده‌وام بيت ل سه‌ر بده‌ستڤه‌ئينانا مافێن نه‌ته‌وى يێن گه‌لێ كوردستانێ وژ سه‌ربخوه‌يێ ژى پاشگه‌ز نابيت.
ئەندامێكی مەكتەبی سیاسیی پارتی دیموكراتی كوردستان ڕای گەیاند، پارتی لەسەر بەدەستهێنانی مافە نەتەوەییەكانی گەلی كوردستان بەردەوام دەبێت و لەسەربەخۆیی كوردستان سڵ ناكات.

كه‌مال كه‌ركووكێ، ئه‌ندامێ مه‌كته‌با سياسى يا پارتى ديموكراتى كوردستان، ئه‌ڤرۆ سێشه‌مبى 1/5/2018 دچارچۆڤێ ب رێڤه‌چوونا كه‌رنه‌ڤاله‌كا ليستا 184 يا پارتى راگه‌هاند” هنده‌ك لايه‌نين سياسى بانگه‌شه‌كا مه‌زن دكه‌ن وبه‌حسێ وێ چه‌ندێ دكه‌ن كو دشێن هه‌موو تشتان باش بكه‌ن، به‌لێ پرسيار ئه‌وه‌ بۆچى ده‌مێ دحوكمه‌تێ دا وان ئه‌و كاره‌ نه‌دكر؟”.

كه‌ركووكى زێده‌تر گۆت”پارتى ل سه‌ر بده‌ستڤه‌ئينانا مافێن نه‌ته‌وى يێن گه‌لێ كوردستانێ دێ به‌رده‌وام بيت وچو رۆژه‌كێ ژى ژ سه‌ربخوه‌يا كوردستانێ پاشگه‌ز نابيت”.

دياركر” ئه‌وێن دبێژن دێ كوردستانێ به‌ر ب ئاقاره‌كێ باشتر دا به‌ن، پێدڤيه‌ بۆمه‌ رۆهن بكه‌ن دا چاوان وه‌كه‌ن؟”.

website security
WP Facebook Auto Publish Powered By : XYZScripts.com