سەرۆكێ هەرێما كوردستانێ، نێچیرڤان بارزانی د پەیامەكێ دا پێشوازی ل دەستپێكرنا كارێن كۆمیتەیا بلند یا لەشكری د ناڤبەرا ئیراقێ و ئەمریكا دا دکەت و تێدا دبێژیت: پێشوازیێ ل رێككەفتنا حوكمەتا فیدرال یا ئیراقێ و حوكمەتا ئەمریكا دكەین بۆ دەستپێكرنا كارێن كۆمیتەیا بلند یا لەشكری دناڤبەرا ئەواندا و بەر ب پێشڤەچوونا دانوستاندنان ل دۆر پەیوەندیێن دوقۆلی و پاشەڕۆژا هاریكاریا هەڤپشك د بوارێن سیاسی، ئابۆری، كەلتووری، ئەمنی و لەشكری دا.
گوت ژی: هەرێما كوردستانێ دێ پشتەڤانیێ ل ئەوێ رێككەفتنێ كەت و دێ هاریكار بیت بۆ پاراستنا ئارامی و ئاسایش و سەقامگیری و سەروەریا وەلاتی و بەر ب پێشڤەبرنا پەیوەندیان ل سەر بنەمایێ رێزگرتنێ و بەرژەدەندیێن هەڤپشك.

سەرۆك مەسعود بارزانی دوهی شەمبیێ 27/1/2024 ل سەلاحەدین پێشوازی ل مالبات و كەسوكارێن پێشڕەو دزەیی كر.
ب گۆڕەی بەیاننامەیەكا بارەگەهێ بارزانی» سەرۆك بارزانی د دیدارەكێ دا و سەبارەت روودانا شەهیدكرنا پێشڕەو دزەیی و مووشەكبارانكرنا مالا وی ژ ئالیێ لەشكرێ پاسدارێن ئیرانێ ڤە راگەهاند» ئەو تاوانە ستەمەكا مەزن بوو بەرانبەر مالباتا شەهید پێشڕەو دزەیی و خەلكێ كوردستانێ هاتیە كرن».
هەر د ئەوێ دیدارێ دا، موحسن دزەیی، كەسایەتیێ ناڤدارێ هەرێما كوردستانێ، سوپاسیا پشتەڤانی و هەلوەستێ سەرۆك بارزانی كر « كو هەر ژ رۆژا ئێكێ ئەو كارەساتە ب خەما خوە زانییە و هەروەسا سوپاسیا بەرهەڤبوونا سەرۆك بارزانی د رێورەسمێ ڤەشارتنا شەهیدێن ئەوێ روودانێ كر».
بارەگەهێ بارزانی ئاماژە كر» عەبدوللا مەجید دزەیی، ب ناڤێ خوە و مالباتا خوە پێزانینا خوە بۆ سەرۆك بارزانی نیشادا و سۆز دا» ل سەر رێكا شەهید پێشڕەو دزەیی بۆ ئاڤەدانی و خزمەتكرنا خەلكێ كوردستانێ بەردەوام بن».

سەرۆكێ حوكمەتا هەرێما كوردستانێ، راگەهان: سوپاسیا هەڤخەمی و هەلوەستێ وەلاتێن دۆست دكەین، كو بەردەوام ئەو هێرشە شەرمزار كرینە، بەلێ ب داخۆیانیان و شەرمزاركرنێ، دووماهی ب هێرشان ناهێت، هەروەسا داخواز كر ژی پێنگاڤێن كریاری ژ ئالیێ حوكمەتا ئیراقێ ڤە بۆ ب دووماهی ئینان ب ئەڤان كریاران بهێنە هاڤێتن.
مەسرور بارزانی، سەرۆكێ حوكمەتا هەرێما كوردستانێ پەیامەك ل دۆر هێرشێن ل سەر هەرێما كوردستانێ بەلاڤكر و گوت» ئەو هێرشێن هەمەجۆر ئەوێن ل سەر هەرێما كوردستانێ دهێنە كرن، بزاڤێن دوژمن و نەیار و خائینانە بۆ نەهێلانا قەوارەیێ هەرێما كوردستانێ و ب دیتنا ئەوان ب ئەڤان هێرش و فشارێن بەردەوام، دێ كوردستان ژناڤچیت».
پەیاما سەرۆكێ حوكمەتا هەرێمێ د دەمەكی دایە ل شەڤا 25/1/2024 هێرش ل سەر كیلگەها كۆرمۆر ل سنۆرێ قەزا چەمچەمال ل پارێزگەها سلێمانیێ هاتیە كرن كو د ئەگەر دا كۆگایەكا عومباركرنا سوتەمەنیێ هاتیە سوتن.
پشتی هێرشێ وەزارەتا كارەبێ ل هەرێمێ بەلاڤكر» ژ پێخەمەت سلامەتییا كارمەندان و كێلگەهێ، هنارتنا غازێ بۆ هەموو ویستگەهێن بەرهەمئینانا كارەبێ هاتە راگرتن و بوو ئەگەرێ كێمبوونا زێدەتر ژ دو هزار و 800 میگاواتێن بەرهەمئینانا كارەبێ».
مەسرور بارزانی د پەیاما خوە دا دبێژیت» سوپاسیا هەڤخەمی و هەلوەستێ وەلاتێن دۆست دكەین، كو بەردەوام ئەو هێرشە شەرمزار كرینە، بەلێ ب داخۆیانی و شەرمزاركرنێ، دووماهی ب ئەوان پیلان و هێرشێن نە رەوا ناهێت و رێگریێ ل دوبارە بوونا ئەوان هێرشان ناكەت».
سەرۆكێ حوكمەتا هەرێمێ دوپاتكر» ئیرادەیا خەلكێ خەباتكەر و نیشتمانپەروەر و حوكمەتا هەرێما كوردستانێ گەلەك ژ ئەوێ چەندێ ب هێزترە كو ب پیلان و ستەمكاریێ بشكێن، بەلكو ورەیێن مە ب هێزتر دبن و د ئەنجامدا تنێ شكەستن و روو رەشی بۆ دوژمن و خائینان دمینیت».
گوت ژی» داخوازێ ژ وەلاتێن دۆست دكەین، كو پێرابوونێن رژد وەربگرن و هاریكاریا مەیدانی بكەن بۆ ئەوێ چەندێ ئاسایشا خەلكی و ئاسایشا ئابۆری و سەقامگیریا سیاسی ل هەرێما كوردستانێ یا پاراستی بیت».
هەروەسا دبێژیت: داخوازێ ژ خەلكێ كوردستانێ ژی دكەم، ب خۆڕاگری و رەیەكا بلند، روو ب روویێ ئەوان پیلانان ببن و هەستێ نێشتمانپەروەریا ئەوان هەر یا ب هێز بیت و رێك ب خوە فرۆش و ئاخفرۆش و كوێلێن نەحەز نەدەن، كوردستان و خەبات و دەستكەفتێن وێ، بكەنە قوربانی ترسنۆكی و بێوژدانییا خوە».
ل دووماهیا پەیاما خوە دا، سەرۆكێ حوكمەتا هەرێمێ گوت: داخواز ژ خودایێ مەزن دكەم، هێزا زێدەتر ب مە ببەخشیت، تاكو بەردەوام بین د درێژەپێدانێ ب رێبازا پیرۆز یا كوردایەتیێ و وەفاداریێ بۆ خوینا شەهیدان و پشت پەنایێ مە بیت بەر ب سەركەفتنێ».

سەرۆك وەزیرێن ئیراقێ و فەرماندەیێ گشتیێ هێزێن چەكدارێن ئیراقێ بڕیارا پێكئینانا لژنەیەكا ڤەكۆلینێ د روودانا هێرشكرنێ ل سەر كێلگەها كۆرمۆر یا غازێ ل قەزا چەمچەمال دەركر كو پێدڤیە د دەمێ 48 ساتان دا ئەنجامان رادەستی ئەوی بكەن.
محەمەد شیاع سۆدانی د بەیاننامەیەكێ دا گۆت: مەرەم ژ ئەوان جۆرە كاران ئارمانجا ئابۆرێ گەلێ ئیراقێ یە و ئەو گرۆپا ئەو كارێ تاوانكاری ئەنجامدای كو گەفان ل پڕۆژەیێن وزێ ل هەرێما كوردستانا ئیراقێ و پارێزگەهێن دی دكەت، دێ گەهیتە سزایێ خوە».
هەر د ئەوێ بەیاننامەیا ل سەر زارێ سۆدانی هاتیە بەلاڤكرن هاتیە» ئارمانج ژ ئەوی كارێ تێكدەر ب ئەنقەست دهێنە كرن دژی ئارمانجێن ئابۆری یێن گەلێ ئیراقێ و ئەو گرۆپ دێ گەهیتە سزایێ خوە».

پەیڤدارێ حوكمەتا هەرێما كوردستانێ رادگەهینیت، هێرشا ئیرانێ ل سەر هەولێرێ ب هیچ هەوەكا نە راست و سەختەكرنا دەنگوباسان و وێنەیەكێ دروستكری ناهێتە ڤەشارتن.
پێشەوا هەورامی، پەیڤدارێ حوكمەتا هەرێما كوردستانێ پەیامەك بەلاڤكر و تێدا هاتیە» جهێ حێبەتیەكا مەزنە، سەرەرای ئەوێ چەندێ شاندێ حوكمەتا ئیراقێ و جڤاتا نوونەرێن ئیراقێ و هەژمارەكا مەزن یا دەزگەهێن راگەهاندنێ و رێكخراوێن جڤاكێ مەدەنی سەرەدانا مالا شەهید پێشڕەو دزەیی كریە و هەموو ئالیەك دیدەڤانێن ئەوێ چەندێ نە كو هێرشا مۆشەكی یا ئیرانێ تاوانەك بوو ل بەرانبەر خەلكێ سڤیل و ژن و زارۆكان هاتیە ئەنجامدان، بەلێ هێشتا بەرپرسێن ئیرانێ د رژدن ل سەر هەوێن خوە یێن بێ بنەما».
پێشەوا هەورامی د پەیاما خوە دا دبێژیت» ئایەتا قورئانا پیرۆز (أَخَذتْهُ العزة بالإثم) ب دروستی ئەوێ شانازیێ دگریت كو بەرپرسێن ئیرانێ رۆژانە بێ گوهدانا رایا گشتی یا ئیراقی و ئیرانی و دەڤەرێ و جیهانێ كو دوپاتیا ئاخڤتنێن نەراست یێن ئەوان دكەن».
گوت ژی» ئەوا لەشكرێ پاسدارێن كۆمارا ئیسلامی یا ئیرانی ب مووشەكێن (نوفتە زن و كودك زن) یێن زارۆك كوژ ئەنجامدای، تاوانەكا مەزنە دژی وەلاتیێن ئاسایی یێن هەرێما كوردستانێ و كوشتن و برینداركرنا ژن و زارۆكان بوو. هەروەسا ئەو كریارە پێشێلكرنا ئاشكرا یا سەروەریا ئیراقێ و هەرێما كوردستانێ و بنەمایێن هەڤسنووریێ و قانوونا نێڤدەولەتی و رێككەفتنان بوو. ئەو تاوانە ب هیچ هەوەكا نەراست و ساختەكرنا دەنگوباسان و وێنەیەكێ دروستكری ناهێتە ڤەشارتن و رایا گشتی یا ئیرانی و ئیراقی و دەڤەرێ ناهێتە خاپاندن».
دیاركر ژی» نوكە پرسیار و بۆچوونا سەرەكی یا دەزگەهێن راگەهاندنێ و رایا گشتی یا جیهانی و دەڤەرێ ئەوە، مووشەك و (نوقتەیێن زن) یێن كۆمارا ئیسلامی یا ئیرانی دشێن بگەهنە گەلەك وەلاتێن دی كو ئیران ب دوژمنێن خوە دزانیت، بەلێ بۆچی ب مۆشەك و (نوقتە زن) یێن خوە تنێ بێتاوان و بێ پەناییا هەرێمێ دكەنە ئارمانج؟ نەوێرن مۆشەكان ئاراستەی ئەوان وەلاتێن هێز و مۆشەك و چەكێ پێشكەفتی هەبیت و تنێ بۆ خەلكێ بێ چەك و بێتاوانێ كوردستانێ د ئازانە».

ئەندامەكێ لژنەیا ئاسایش و بەرگریێ ل جڤاتا نوونەرێن ئیراقێ دبێژیت، ئیران رێزێ ل سەروەریا ئیراقێ ناگریت و دانپێدانێ ب رێككەفتنێن خوە ل گەل بەغدا ناكەت.
سەگڤان سندی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لژنەیا ئاسایش و بەرگریێ ل جڤاتێ گوت» هێشتا سالەك ب سەر رێككەفتنا ئەمنی دناڤبەرا ئیراقێ و ئیرانێ دا دەرباز نەبوویە، بەلێ ئیرانێ رێككەفتن پێشێلكر و هێرشی سەروەریا ئیراقێ كر ب رێكا مووشەكبارانكرنا هەولێرێ».
سەگڤان سندی دوپاتكر» ئیران ب هیچ شێوەیەكی دانپێدانێ ب سەروەریا ئیراقێ ناكەت و رێزێ ل رێككەفتنێن خوە ل گەل ئیراقێ ناگریت» ئاماژە كر ژی» پشتی هێرشكرنا ل سەر مالا شێخ باز ل سالا 2022، ب هەمان شێوە چەندین هێرشێن دی كرینە سەر هەرێما كوردستانێ».
ناڤبری باس ل ئەوێ ژی كر» هێرشێن ئیرانێ ل سەر هەرێما كوردستانێ ژ دەرڤەی هەموو قانوون و بنەما و نەریتێن نێڤدەولەتیە، ب تایبەت كو جهێن سڤیل ل هەرێما كوردستانێ دبنە ئارمانج».
سەگڤان سندی ئاماژە ب ئەوێ چەندێ ژی كر» راپۆرتا خوە سەبارەت هێرشا ل سەر مالا شەهید پێشڕەو دزەیی دەنە سەرۆكایەیتا جڤاتا نوونەرێن ئێراقێ تاكو سەرۆكایەتیا جڤاتا نوونەران ژی رادەستی حوكمەتا ئیراقێ بكەت بۆ ئەوێ چەندێ كۆمبوون ل دۆر بهێتە كرن و بڕیار ل سەر بهێتە دان».
ئەوی ئەندامێ لژنەیا ئاسایش و بەرگریێ ل جڤاتا نوونەرێن ئیراقێ پێشبینی كر ئیراقێ كارڤەدانەكا ئاست بلند نەبیت، وەكو ئەوێ كارڤەدانا پاكستانێ بەرامبەر ئیرانێ كری، بەلكو بڕیار و كارڤەدان دێ هەمان چارەنڤیسێ بڕیار و كارڤەدانێن بۆری بیت، هەروەسا ب پێدڤی ژی زانی حوكمەتا ئیراقێ داكۆكیێ ل سەروەریا خوە بكەت و بۆ ئەوێ مەبەستێ ژی ب رێكا نەتەوەیێن ئێكگرتی و جڤاتا ئاسایشا نێڤدەولەتی سكالایێ ل سەر ئیرانێ تۆمار بكەت.

زنار تۆڤی:

كارۆخ خۆشناو، سەرۆكێ پەیمانگەها ڤەكۆلینێن ئەمریكی _كوردی بۆ رۆژنامەیا ئەڤرۆ دبێژیت: ئەڤە چەندین جاران هێرشێن مووشەكی دهێنە سەر هەولێرا پایتەختا هەرێما كوردستانێ، یا رۆهن و ئاشكرایە كو ئەو هێرشە راستەوخوە یان نەراستەوخوە ژئالیێ ئیرانێ ڤە دهێنە ئەنجامدان، هێرشا ئەڤێجارێ یا ئیرانێ ل سەر هەولێرێ راستەوخوە ژ ئالیێ لەشكرێ پاسدارانڤە هاتییە ئەنجامدان، ب بەها‌نەیا هەبوونا ناڤەندا سیخوڕییا ئیسرائیلێ، كو ئەڤێ بەهانەیێ چو بنەمایەك بۆ نینە و یا دوورە ژ راستییێ.
ناڤهاتی هێشتا دبێژیت» د ڤی چارچۆڤەی دا هێرشا ئەڤێجارێ یا ئیرانێ ل سەر هەولێرێ، ب مەرەما گەهاندنا كۆمەكا پەیامانە” ژ وان ژی: ئیران بزاڤان دكەت پێگەهێ سەقامگیری و پێكڤەژیانێ ل هەرێما كوردستانێ تێكبدەت، پەیاما ئیرانێ بۆ هەرێما كوردستانێ ئەوە، هەڤسەنگییا پەیوەندییێن سیاسی و دبلۆماسی تێكبدەت و تایێ ترازییێ د بەرژەوەندییا ئیرانێ دا بشكێنیت، هەروەسا كارڤەدانەكا نەرەوا یا ئیرانێیە بەرامبەر هەرێمێ، وەكو تۆلڤەكرنا هێرشا ئەمریكا و هەڤپەیمانێن وێ ل سەر حوسییێن یەمەنێ».
ئەو چەند ژی دیاركر» ئەو هێرشە، هنارتنا پەیامەكێیە بۆ (ئیدارا بایدنی) كو شیعە خوینا (موسەوی و سلێمانی و موهەندسی) و قوربانییێن پەقینا (كرمان) ژبیر ناكەن، دیسان تێركرن و رازیكرنا جادەیا شیعییە ب مەرەما بكارئینانا ناڤخوەیی و ریكلامكرن و كۆمكرنا دەنگانە بۆ هەلبژارتنێن بهێت یێن ئیرانێ و تاقیكرنا (ئیدارا بایدنی) یە، داكو بزانن هەتا چەند دێ بایدن بەرگرییێ ژ هەڤپەیمانێن خوە كەت، هەروەسا فشارەكە ل سەر ئەمریكا داكو پشتەڤانییێ ل ئیسرائیلێ نەكەت و شەرێ غەززە رابگریت».
گوت ژی» دوبارەبوونا هێرشێن مووشەكی دڤێت مە نەچار بكەت هەلویستەكێ وەربگرین بۆ ئەنجامدانا سێ خالێن گرنگ، ئەو ژی : گرنگە هەرێما كوردستانێ داخوازێ ژ ئەمریكا بكەت، چاوا ب رێكا سیستەمێ پاتریۆت بنگەه و بارەگەهێن خوە دپارێزن وەسا (ئەسمان و ئاخ و خەلكێ) هەرێمێ ژی ژ هێرشێن نەیاران بپارێزن، چونكی سەرەكیترین بەهانە بۆ هێرشكرنا ئەڤان گروپان پێكهاتییە، ژ هەبوونا هێزێن ئەمریكا ل هەرێمێ، هەروەسا گرنگە هەرێما كوردستانێ ب ئاشكرایی داخوازێ ژ ئیراقێ بكەت، داكو سەروەرییا هەرێمێ و ئیراقێ بپارێزیت، هەكە ئیراق نەشێت ئەڤێ چەندێ بكەت، گرنگە داخواز بهێتەكرن جڤاتا ئاسایشا نێڤدەولەتی ب بڕیارەكا هەڤشێوەیێ بڕیارا (688) هەرێمێ ژ هێرشێن ئالیێن ناڤخوەیی و دەرڤە بپارێزیت، دیسان پێدڤییە سەركردایەتییا سیاسی یا كوردستانێ لەزێ بكەت د پڕۆسەیا ڕێكخستن و یەكخستنا هێزێن پێشمەرگەی دا، ب مەرەما ئامادەباشییێ و بەرسینگگرتنا هەر هێرشەكێ و گەفێن لەشكری و ئەمنی بۆ سەر ئاخ و خەلكێ هەرێما كوردستانێ».

فەرماندەیا پێشمەرگێ زێرەڤانیێ راگەهاند، بەلاڤكرنا دەنگوباسێ فەرمانكرن ب هێزێن سەر ب زێرەڤانیێ ڤە بۆ روو ب رووبوونا چەكدارێن پەكەكێ یێ دوورە ژ راستیێ و ناڤەڕۆكا دەنگوباسی ژی رەت دكەین.
فەرماندەیا پێشمەرگێ زێرەڤانی د رۆهنگرنەگێ دا بەلاڤكر» د تۆرێن جڤاكی دا دەنگوباس و نڤیسارەكا سەختە و دوور ژ راستیێ هاتیە بەلاڤكرن كو فەرمان ب هێزێن سەر ب فەرماندەییا مە هاتیە كرن كو روو ب روویێ چەكدارێن پەكەكێ ببن، ل ڤێرێ بۆ رایا گشتی رادگەهینین كو ئەڤ نڤیسارە یا سەختەیە و ناڤەڕۆكا ئەوی دەنگوباسی رەت دكەین».
د رۆهنكرنا فەرماندەیا پێشمەرگێ زێرەڤانیێ هاتیە ژی» ب دیتنا مە وەكو فەرماندەیا پێشمەرگێ زێرەڤانیێ، ئەو دەنگوباسێ سەختە د دەمێ نوكە دا درێژەپێدانا ئەوێ هەوا چاواشەكاریانەیە كو چەند رۆژە پشتی مۆشەكبارانكرنا باژێرێ هەولێرێ ژ ئالیێن نەحەزان ڤە دەستپێكریە».
ئەڤ رۆهنكرنا فەرماندەیا پێشمەرگێ زێرەڤانیێ پشتی ئەوێ چەندێ هات كو چەند دەزگەهێن راگەهاندنێ ل تۆرێن جڤاكی نڤیسارەكا سەختە بەلاڤكربوو كو وەسا هاتبوو دیاركرن ژ ئالیێ فەرماندەیا پێشمەرگێ زێرەڤانیێ فەرمان ب پێشمەرگێ زێرەڤانیێ هاتیە كرن روو ب روویێ چەكدارێن پەكەكێ ببن و دەستهەلاتا تەقەكرنێ پێ هاتیە دان، بەلێ فەرماندەیا پێشمەرگێ زێرەڤانیێ راگەهاند» ئەو نڤیسارە یا سەختەیە و ئەو دەنگوباسێ فەرمانكرن ب پێشمەرگەی بۆ روو ب رووبوونا پەكەكێ یێ دوورە ژ راستیێ».

عەزیز هەورامی:

پێلەكا مەزن یا شەرمزاركرنا ئیرانێ ل سەر ئاستێ نێڤدەولەتی ل بەرامبەر مووشەكبارانكرنا هەولێرێ، كو داخواز دهێتە كرن هەموو پشتەڤانیەك بهێتە كۆمكرن و بڕیارەكا سیاسی ژ جڤاتا ئاسایشا نێڤدەولەتی بهێتە دەركرن، ئاسمانێ كوردستانێ یێ پاراستی بیت و چەكێ پێشكەفتی بدەستخوەڤە بینیت بۆ پاراستنا خوە.
جەلیلێ ئازادیخواز، سیاسەتمەدارێ رۆژهەلاتا كوردستانێ بۆ رۆژنامەیا (ئەڤرۆ) گوت: ل ئیرانێ تشتەك ب ناڤێ لۆژیكا دەولەتێ و دەولەتداریێ نینە، كارێ ئەوان ترس و تیرۆرە و دڤێت ب ئەوێ لۆژیكێ بنێریتە دەستهەلاتدارێن ئیرانێ، ئەوژی سیاسەتەكا زالە ل سەر دەزگەهێن بڕێڤەبرنێ ل ئیرانێ».
گوت ژی: هێرشكرن ل سەر هەولێرێ ژ ئالیێ لەشكرێ پاسدارێن ئیرانێ ڤە كریارەكا تیرۆرستی بوو بۆ ترساندنا كوردان، ئیران یا كەفتیە د ناڤ شەڕەكی دا كو ئەوێ ب خوە یێ هەلكری، د ناڤبەرا حەماسێ وئیسرائیلێ دا و نەشیایە هیچ كارڤەدانەك هەبیت، ل ئیراقێ و یەمەنێ توپبارانكرنا گرۆپێن حەشدا شەعبی و حۆسیان دهێتە كرن، بەلێ ئیران نەشێت هیچ بەرسڤەكێ بدەت، بەلێ دهێت و هێرشی هەرێما كوردستانێ دكەت، تاكو بێژیتە حەشدا شەعبی و حەسیان، ئەڤە بۆ پشتەڤانیا هەوە بوو».
خویاكر ژی» دەولەتا داگیركەر یا ئیرانێ، ب ناڤێ هەبوونا مۆسادا ئیسرائیلی هێرشی كوردستانێ دكەت، ئەڤە تۆرا هەوالگیریا ئیسرائیلی ل ئازەربایجان یا هەی بۆچی لێنادەت؟ ب گۆڕەی رۆژنامەیەكا توركی، ئیران پەترۆلێ ب رێكا توركیا دفرۆشیتە ئیسرائیلێ».
زێدەتر دبێژیت: هیچ بەلگەیەكا پشتڕاستكری نینە كو ئیسرائیلێ هەبوون ل هەولێرێ هەبیت، هەكە هەبوون ژی هەبیت، هیچ پەیوەندیەك ب ئیرانێ ڤە نینە و كوردستان هەرێمەكە ب فەرمی هاتیە نیاسین د چارچۆڤەیێ دەولەتەكێ دا یە، ئیران ب خوە یا شكەستیە و بۆ قەرەبووكرنا شكەستنا خوە هێرشی كوردستانێ دكەت».
ل دۆر كارڤەدانێن نێڤدەولەتی بەرامبەر ئیرانێ و شەرمزاركرنا وێ ل سەر ئاستێ جیهانی، گۆت: نوكە كارڤەدانا رژد بەرامبەر دەستدرێژیا ئیرانی ل سەر هەولێرێ ژ ئالیێ ئەمریكا و ئورۆپا و پاپایێ فاتیكانێ و ئیراقێ ب خوەژی ڤە یا هەی» .
هەروەسا دبێژیت» پێدڤیە شەرمزاركرنا مووشەكبارانكرنا هەولێرێ ل ئاستێ دەزگەهێن راگەهاندنێ و هەلوەست وەرگرتن ب تنێ نەمینیت، بەلكو میكانیزمەكا تایبەت بۆ هەبیت، و هەرێما كوردستانێ بزاڤێن رژد بكەت كو جڤاتا ئاسایشا نێڤدەلەتی و نەتەوەیێن ئێكگرتی بڕیاران بدەن بۆ پاراستنا ئەسمانێ كوردستانێ و ب هێزكرنا پێگەهێ كوردستانێ و چەكێ پێشكەفتی ب دەستڤەبینیت بۆ پاراستنا خوە».

سەرۆكێ حوكمەتا هەرێما كوردستانێ، مەسرور بارزانی سەرەدانا ئەكادیمیا ساند هێرست یا شاهانە یا لەشكری ل بریتانیا كر و د چارچۆڤەیێ ئەوێ سەرەدانێ دا راگەهاند، بریتانیا هەڤپشكەكا ب هێز یا هەرێما كوردستانێ و ئیراقێ یە.
سەرۆكێ حوكمەتا هەرێما كوردستانێ ڤیدیۆیا سەرەدانا خوە بۆ ئەكادیمیا ساند هێرست یا شاهانە یا لەشكری ل بریتانیا ل تۆرا جڤاكی یا ئینستیگرام بەلاڤكر و نڤیسی» د سەرەدانا من دا بۆ ئەكادیمیا ساند هێرست یا شاهانە یا لەشكری، گرنگیا هاریكاریێن بریتانیا بۆ چاكسازیێن پێشمەرگەی د ئینینە بیرا خوە».
ل دەستپێكا شەڕێ داعشێ، بریتانیا هەژمارەكا شیرەتكارێن لەشكری ل هەرێما كوردستانێ جهگیركرن كو مەشقێ ب هێزێن پێشمەرگەی دكەن.