هەولێر، قائید میرۆ

سەرۆكێ ناڤەندا چاوی كورد بۆ پرسێن سیاسی ڕادگەهینیت، چو ڕاستی بۆ لاوازكرنا هەرێما كوردستانێ نینە ژئالیێ بەغدا ڤە و بەری نوكە چەندین جاران بزاڤێن لاوازكرنا هەرێما كوردستانێ هاتبوونە كرن، بەلێ هەموو ئەو بزاڤ هاتنە ژناڤبرن و دبێژیت، پێدڤیە فڕاكسیۆنێن كوردستانی چاڤدێریا بجهئینانا قانوونا بودجەی بكەن و د دەمێ بجهـ نە ئینانێ ڕێككەفتنا سیاسی بهێتە بكارئینان.
دلشاد نامیق، سەرۆكێ ناڤەندا چاوی كورد بۆ ڕۆژنامەیا (ئەڤرۆ) گوت « پێدڤیە هەرێما كوردستانێ چاڤدێریا بجهئینانا قانوونا بودجەیا ئیراقێ بكەت، بتایبەتی فڕاكسیۆنێن كوردستانی و یا پارتی ب هووری چاڤدێریا قانوونا بودجەی بكەن، چونكە بەری پەسەندكرنا قانوونا بودجەی ڕێككەفتنا سیاسی دناڤبەرا هەرێما كوردستانێ و بەغدا هەبوویە، چونكە ژ ئەنجامێ دەركەفتنا موقتەدا سەدری پرۆسەیا سیاسی، حوكمەتا نوكەیا ئیراقێ ژئالیێ كەمینەیەكا شكەستن ئینای ڤە هاتیە پێكئینان و ڕێككەفتنا سیاسی بۆ پێكئینانا حوكمەتا ئیراقێ هاتیەكرن و پارتی ژی پشكدارەكێ سەرەكیێ وێ ڕێككەفتنێ یە، لەوڕا دڤێت بەری قانوونا بودجەی بهێتە بجهئینان چاڤدێری ل سەر هەبیت، هەتا ڕێككەفتنا سیاسی وەكی خوە بهێتە بجهئینان و هەر پاشڤەچوونەك هەبیت د سیاسەتا قانوونا بودجەی دا دێ ڕێككەفتنا سیاسی هێتە بجهئینان و ل سەر ئاستێ سیاسی كار ل سەر بهێتەكرن».
دیاركر» پشتی ١٠ سالان بۆ جارا ئێكێ یە دێ بەغدا پشكا هەرێما كوردستانێ هنێریت و ل سالێن بۆری قانوونا بودجەی دهاتە پەسەندكرن ل ئیراقێ، بەلێ هەرێما كوردستانێ داهات هەبوو، نوكە هەرێما كوردستانێ داهات نینە و چاڤەڕێی بەغدا دكەت، ئەز ب باوەرم نابیت هەرێما كوردستانێ چو هێلێن سۆر هەمبەری بەغدا هەبن، بەروڤاژی هەكە ئالیێن سیاسی ل هەرێما كوردستانێ هەڤڕكی هەبیت و ناكۆكی ژی هەبن د ناڤبەرا خوە دا، بەلێ دڤێت سنۆرەك بۆ بەغدا هەبیت و بێدەنگ نەبن، هەتا بنەمایێن دستووری هەمبەری هەرێما كوردستانێ نەهێنە بنپێكرن، ب دیتنا من دڤێت ئالیێن سیاسی لەزێ بكەن بۆ دانانا دستوورێ هەرێما كوردستانێ بۆ وێ چەندێ دەزگەهێن هەرێما كوردستانێ بهێنە موكمكرن و ئالیێن سیاسی نەشێن ل بەغدا دژی هەرێما كوردستانێ بن».
خویاكر» ئەو پڕۆپاگندەیێن باسێ لاوازكرنا هەرێما كوردستانێ دكەن چو ڕاستی بۆ نینن، چونكە بەغدا نەشێت ئیرادەیا خوە ل سەر هەرێمێ ب سەپینیت، چونكە بەری نوكە بزاڤێن لاوازكرنا هەرێما كوردستانێ هاتینە کرن ل سالێن ٢٠١١و ٢٠١٧و ٢٠٢٠، بەلێ هەموو وان بزاڤان شكەستن ئینا و نەشیان هەرێما كوردستانێ لاواز بكەن، ئیراق وەلاتەكێ تەوافوقیە و نەشێت هەرێما كوردستانێ لاواز بكەت، بەلێ هەكە بەرهەڤی بۆ بهێنەكرن دشێن دستووری بن پێبكەن، بەلێ ئەو پێزانینێن باس ل هنارتنا هێزا لەشكری بۆ سنۆرێن هەرێما كوردستانێ ژئالیێ بەغداڤە دكەن تنێ پڕۆپاگندەنە و هندەك وەلاتێن هەرێمی ل پشت وان پرۆپاگندەیانە، پێدڤی بوو ڕێككەفتنا سیاسی وەكوخوە بهێتە بجهئینان، بەلێ مخابن هندەك هێزێن دەرڤەی پارتی نەشێن بڕیارا خوە بدەن و قانوونا بودجەی ب ڤی شێوەی هاتە دەربازكرن و ڕێككەفتنا هەرێمێ و بەغدا یا بوویە ڕێككەفتنا پارتی و بەغدا، ئەڤەژی دەرئەنجامێ ناكۆكیێن ئالیێن سیاسی و دەستێوەردانێن دەرەكی ل بڕیارێن هندەك ئالیێن كوردی یە، ئەڤە د دەمەكیدایە ئەو هێزێن سیاسی پشكەكن ژ هەرێما كوردستانێ و لاوازبوونا هەرێمێ لاوازبوونا وانایە ژی».
هەروەسا گوت»نوكە ل بەغدا تنێ حساب بۆ پارتی دهێتەكرن و پێدڤیە ئالیێن دی ژی پێداچوونێ د سیاسەتا خوە دا بكەن، هندەك خالێن ناڤا بودجەیا هەرێما كوردستانێ ب دلێ هەرێمێ نینە ژوان ژی ئەو بڕگا ئاماژە دكەت هەكە داهات وەكی خوە نەهێتە بەلاڤكرن سەرۆك وەزیرێن ئیراقێ دەستێوەردانێ بكەت، هەموو خەلك دزانیت بەری نوكە ژی تشتێ وەسا نەبوویە».

نەتەوەیێن ئێکگرتی راپۆرتەک سەبارەت ب چەکدارکرنا زارۆیان ل سووریێ بەلاڤ کریە و د راپۆرتێ دا هاتیە دیار کرن، کو سالا بۆری هێزێن سووریا دیموکرات ٦٣٧ زارۆ چەکدار کرینە و ئەو یەک ژی بنپێکرنا مافێن مرۆڤی یە، دڤێت هێزێن سووریا دیموکرات دەست ژ چەکدارکرنا زارۆیان بەردەت، چونکی د جیهانێ دا نابیت زارۆ بۆ شەڕی و ئارمانجێن دی بهێنە بکارئینان و دڤێت هێزێن سووریا دیموکرات چو زارۆیان چەکدار نەکەن.
د راپۆرتێ دا ئاماژە ب هندێ ژی هاتیە کرن، بەری نها ژی وان ل دۆر چەکدارکرنا زارۆیان ل سووریێ چەندین راپۆرت بەلاڤ کرینە، لێ مخابن رەوش وەکو خوە هەریا بەردەوام و سالا بۆری هێزێن سووریا دیموکرات ٦٣٧ زارۆ چەکدار کرینە کو ئەو یەک ژی رێژەکا مەزنە و دڤێت ئێدی چەکدارکرنا زارۆیان ژ ئالیێ هێزێن سووریا دیموکرات و هێزێن دی یێن چەکدار ڤە ل سووریێ بهێتە راگرتن.

بڕیارە ئەڤرۆ نێچیرڤان بارزانی، سەرۆكێ هەرێما كوردستانێ ل بەرلین ل گەل شیرەتكارێ ئەلمانیایێ كۆمبیت و هەژمارەكا پەرلەمانتارێن ئەلمانی ژی سەرەدانا سەرۆكێ هەرێما كوردستانێ بۆ وەلاتێ وان ب گەلەك گرنگ د هەژمێرن.
ماكس لوكس، ئەندامێ پەرلەمانێ ئەلمانیا ژ پارتا كەسك دبێژیت» ئەو كۆمبوونە یا گرنگە و دیاردكەت ژی كو هەرێما كوردستانێ ژ ڕوویێ پەیوەندیێن ئابۆری و بهایێن مە یێن هەڤپشك بۆ ئەلمانیا ئێكە ژ نێزیكترین هەڤپەیمانێن دەڤەرێ».
ل ڕۆژا ئەینیا بۆری، كریستیان هۆفمان، جێگرێ پەیڤدارێ حوكمەتا ئەلمانیا ڕاگەهاندبوو، ل ڕۆژا دوشەمبی ل بەرلین پاریتەختێ ئەلمانیا ئۆلاف شۆلتز، شیرەتكارێ ئەلمانیا و نێچیرڤان بارزانی، سەرۆكێ هەرێما كوردستانێ دێ پرسێن ناڤخوەیی، هەرێمی و نێڤدەولەتی باس كەن.
هەڤدەم دەریا تورك، پەرلەمانتارێ پارتا سۆسیال دیموكرات گوت» ئەڤ سەرەدانە نیشانەكا گرنگ و باشە چونكە دانوستاندن ل گەل هەرێما كوردستانێ و ئیراقێ ئێكجار د گرنگن بۆ هەموو دەڤەرێ».
ب دیتنا پیتر هێدیت، پەرلەمانتارێ پارتا لیبرالیان، كۆمبوونا نێچیرڤان بارزانی و ئۆلاف شۆلتز گەلەك یا گرنگە و حوكمەتا فیدرالی یا ئەلمانی ب ڤی شێوەی دسەلمینیت كو هەرێما كوردستانێ هەڤپەیمانەكا گەلەك گرنگە بۆمە و پێشكەفتنا د ڤێ هەرێمێ دا جهێ گرنگیا سەرەكی یا حوكمەتا فیدرالی یە».
ماكس لوكس كو ئەندامێ لژنەیا مافێن مرۆڤی یە ل پەرلەمانێ ئەلمانی، پاراستنا سیستەمێ فیدرالی ل ئیراقێ و پێگەهێ سیاسی یێ هەرێما كوردستانێ ب (كارەكێ باش بۆ دیموكراسیێ) دبینیت و دبێژیت» هەرێما كوردستانا ئیراقێ تنێ هەرێمەك نینە ژ هەرێمان، بەلكو وەكو بڕبڕا پشتا ئابۆری و سیاسی و كەلتووری یا هەموو ئیراقێ یە، هەروەسا سەردەمترین دەڤەرە ل وی وەلاتی، بەراوركرن ل گەل دەڤەرێن دی یێن ئیراقێ ژی باشترین دەڤەرە كو مافێن مرۆڤی تێدا دپاراستی نە، لەوما داخواز ژ حوكمەتا ئیراقێ دكەین ڤێ فیدرالیەتێ وەكو تشتەكێ بلند ب هەلسەنگینن، چونكە دێ سەرانسەری وەلاتی مفادار بیت».
دیاركر ژی» دزانین ل هەرێما كوردستانا ئیراقێ مە گەلەك دۆست یێن هەین و ئەو دشێن پشتڕاست بن كو ئەم د بەرهەڤین پشتەڤانیا وان یا لەشكری بكەین و دێ پشتەڤانیا پێشمەرگەی كەین، هەروەسا ژ ڕوویێ ئابۆری و دارایی ڤە دێ پشتەڤانیێ لێكەین و پێكڤە دێ هەماهەنگیەكا ب هێز بۆ نەڤیێن بهێت پەیدا كەین».

ب بەرهەڤبوونا فازل میرانی، بەرپرسێ دەستەیا كارگێریا مەكتەبا سیاسی یا پارتی دیموكراتی كوردستان و مەحمود محەمەد، ئەندامێ دەستەیا كارگێریا مەكتەبا سیاسی و سەربەست لەزگین و زاگرۆس فەتاح ئەندامێن مەكتەبا سیاسی و سالار عوسمان، بەرپرسێ پشكا ڕەوشەنبیری و ڕاگەهاندنێ و هەژمارەكا بەرپرسێن حزبی و حكومی و ڕەوشەنبیر و ڕۆژنامەڤان و هونەرمەندان ، ڕێورەسمێن ڕێزگرتنێ ل نڤیسەر و ئەكادیمی پ.د. ئیبراهیم ئەحمەد سمۆی ل بن ناڤێ ( پێنوس ژ پێخەمەت مرۆڤایەتیێ) ل پشكا ڕەوشەنبیری و ڕاگەهاندنا پارتی دیموكراتی كوردستان بڕێڤەچوو.
فازل میرانی، بەرپرسێ دەستەیا كارگێریا مەكتەبا سیاسی یا پارتی دیموكراتی كوردستان د پەیڤەكێ دا د وێ ڕێورەسمێ دا گوت» پشكا ڕەوشەنبیری و ڕاگەهاندنا پارتی ب ئەنجامدانا ڤان جۆرە چالاكیان ئەركێ مرۆڤایەتی و نیشتمانی بجهـ دئینیت و ئەم سەرفەرازین مە خەلكێ وەسا هەیە ڤان پشكان بڕێڤەببەن و هیڤیخوازم پشكا ڕەوشەنبیری و ڕاگەهاندنا پارتی بەردەوام بیت ل سەر ڤان چالاكیان و ب وێ ڕێكێ خزمەتا ڕێبازا پیرۆزا بارزانی بكەت».
هەروەسا سالار عوسمان، بەرپرسێ پشكا ڕەوشەنبیری و ڕاگەهاندنا پارتی د پەیڤەكێ دا گوت» ئەنجامدانا ڤان چالاكیێن ڕەوشەنبیری هەموو پشكێن كوردستانێ كۆم ڤەدكەت كو ڕامانا وێ ژی ئەوە كو پارتی دیموكراتی كوردستان پارتیا هەموو دەڤەر و جوگرافیایە».
هەروەسا گوت» هەموو بزاڤێن بۆ وێ چەندێ نە ڕێزێ ل شەهیدێن بوارێ ڕەوشەنبیری و ڕاگەهاندنێ و ئەوێن وەغەركرین بگرین و بەرهەمێن وان چاپ بكەین، ل گەل وێ چەندێ دخوازین ڕێزێ ل یێن د ژیانێ ژی دا ماین بگرین و بێژینە وان هوون كاراكتەرێن كارا و خەمخۆرێن نیشتمانی نە.
هەر د وێ ڕێورەسمێ دا بەلگە فلمەك ل سەر ژیان و كار و بەرهەمێن پ.د ئیبراهیم ئەحمەد سمۆی پێشكێشە بەرهەڤبوویان هاتە كرن.
پ.د. ئیبراهیم ئەحمەد سمۆ د پشكەكا پەیڤا خوە دا سوپاسیا فازل میرانی كر بۆ پشتەڤانیكرنا وی یا بەردەوام د هەموو بوارێن ژیێ وی دا. ل دووماهیێ خەلاتێ ڕێزلێنانا پشكا ڕەوشەنبیری و ڕاگەهاندنا پارتی ژ ئالیێ فازل میرانی ڤە پێشكەشی پ.د ئیبراهیم ئەحمەد سمۆی هاتە كرن.

ئەندامێ مەكتەبا سیاسی و بەرپرسێ مەكتەبا ڕێكخستنا پارێزگەها كەركووك – گەرمیان یا پارتی دیموكراتی كوردستان، كەمال كەركووكی ڕاگەهاند: پرسا كەركووكێ بۆ پارتی دیموكراتی كوردستان و سەرۆك بارزانی بابەتەكێ هەرە گرنگە.
كەمال كەركووكی د وێبنارەكا تایبەت دا كو ژ ئالیێ لقێ شەشێ ئۆرۆپا یێ پارتی دیموكراتی كوردستان ڤە بۆ هاتیە سازكرن دبێژیت» ئەو ڕەوشا نوكە ل كەركووكێ هەی بەرهەمێ خیانەتا 16 ئۆكتۆبەرێ یە و جهێ قەبوولكرنێ نینە و پارتی چو جاران بێ دەنگ نابیت ل بەرامبەر وێ ستەم و نەحەقیا دەرهەقێ كەركووكێ و كەركووكیان دهێتە كرن و ئەڤرۆ بیت یان سوباهی پێدڤیە كەركووك و هەموو دەڤەرێن دی بزڤرن سەر جهێ خوە یێ سروشتی كو هەرێما كوردستانێ یە».
كەمال كەركووكی گوت ژی» ئەو فێلێن ل بەرگێ قانوونی دهێنە بكارئینان بۆ گوهۆڕینا دیموگرافیا وی باژێری و پێكهاتە و خەلكێ وی یێ ڕەسەن هەموو دژی دستووری و ناڤەرۆكا مادەیا 140 و مافێن دیموكراتی یێن خەلكێ كەركووكێ نە، ل گەل هەموو وێ پیلانگیری و گوهۆڕین و ئەرەبكرنا كو ل كەركووكێ دهێتە ئەنجامدان، بەلێ هێشتا ل زوورینەبوونا كوردان ل كەركووكێ دترسن چونكە ئەو بخوە ژی دزانن كەكووك باژێرەكێ كوردستانیە، لەوما ئەستەمە بشێن وێ ڕاستیێ بگوهۆڕن».
هەروەسا دیاركر» گرۆپێن میلیشیایی ل كەركووكێ ب بەردەوامی مژوولی ستەمێ و زۆرداریێ و گوهۆڕینا دیموگرافیا وی باژێری نە».
سەبارەت زڤرینا پارتی دیموكراتی كوردستان بۆ كەركووكێ و ڤەكرنا بارەگەهێن پارتی، كەمال كەركووكی ڕاگەهاند كو پارتی ب سەربلندی و ل بن ئالایێ كوردستانێ دێ زڤریتە كەركووكێ، هەروەسا باسێ دووماهی ڕێككەفتنا ئالیێن هەڤپەیمانیا ئیدارەیا دەولەتێ ژی كر بۆ پێكئینانا حوكمەتا فیدرالی كو پرسا كەركووكێ و مادەیا 140 ژ دستووری پشكەكا سەرەكی یا وێ ڕێككەفتنێ یە، داخواز ژی ژ حوكمەتا فیدرالی كر وێ ڕێككەفتنێ ب هەموو بڕگەیێن خوەڤە وەكو خوە بجهبینیت.
كەمال كەركووكی ڕۆناهی ئێخستە سەر وێ چەندێ كو گەلێ كوردستانێ ب سەر گەلەك پیلانگیریێن ناڤخوەیی و دەرەكی زالبوویە، ئەوێن ئەو پیلانە ژی ئەنجامداین بووینە پەند بۆ دیرۆكێ و ل دەف مە كوردستان و گەلێ كوردستانێ ژ هەموو بابەت و گرۆپ و ئالیێن سیاسی گرنگترن و مە باوەری ب گەلێ خوە هەیە و د پشت ڕاستین دێ ب سەر هەموو پیلانگیریەكێ دا سەركەڤین.
هەورەسا ئاماژە دا هۆكارێ سەرەكیێ ب ئارمانجگرتنا پارتی ژ ئالیێ دوژمن و نەیارێن كوردستانێ بۆ وێ چەندێ ڤەدگەرینیت كو پارتی ب بەردەوامی د مەیدانێ دا بوو بۆ بەرگریێ ژ مافێن ڕەوا یێن كورد و كوردستانێ و دیرۆكەكا درێژ هەیە ژ خەبات و بەرخودانێ و سەری بۆ زۆرداریێ و داگیركاریێ نا چەمینیت و دێ ل سەر وی نەهجی ژی بەردەوام بیت.
سەبارەت قانوونا بودجەیا گشتی یا ئیراقا فیدرال، كەمال كەركووكێ باسێ وێ چەندێ كر كو ئەو گوهۆڕینێن كو لژنەیا دارایی یا جڤاتا نوونەرێن ئیراقێ و هندەك بڕگە و مادەیێن دی ل ناڤ جڤاتا نوونەرێن ل ڕەشنڤیسا بودجەی هاتینە زێدەكرن و گوهۆڕین ب سەردا هاتی دژی مادەیێن پەیوەندیدارێن دستوورێ ئیراقێ و ڕێككەفتنا دناڤبەرا حوكمەتا هەرێما كوردستانێ و حوكمەتا ئیراقێ و دێ زیان هەبیت بۆ هەموو ئالیەكی.
ئاماژەكر ژی كو هەر ب گۆرەی دستوورێ ئیراقێ، دادگەها فیدرالی یا دستووری و قانوونی نینە، چونكە بۆ دانانا ئەندامێن دادگەها فیدرالی پێدڤی ب دەنگێن دو ل سەر سێ یا ئەندامێن جڤاتا نوونەرێن ئیراقێ یە، د دەمەكی دا ئەو ئەندامێن دادگەها فیدرالی یێن نوكە ب زۆرینەیەكا سادە یا دەنگێن پەرلەمانتارێن قانوونا وێ هاتیە دەربازكرن، نوكە ئەو دادگەهە بۆ مەرەمێن سیاسی دهێتە بكارئینان و بەرۆڤاژی دستووری یە و بڕیاران دژی هەرێما كوردستانێ دەردكەت».
كەمال كەركووكی هیڤی خواستن دەستهەلاتدارێن ئیراقێ و ئالیێن سیاسی ئەزموونان ژ دیرۆكێ وەربگرن و ڕێكا ڕاست و دروست و دستووری هەلبژێرن بۆ چارەسەركرنا كێشەیان ل گەل هەرێما كوردستانێ ل شوونا بكارئینانا ڕێكا سەپاندنا زۆرینەیێ ب نە دستووری و بكارئینانا زۆرینەیێ دوور ژ دستووری و مادەیێن قانوونی و ڕێككەفتنێن سیاسی، چونكە ڕژێمێن پێشتر د ئەزموونێن خوە دژی گەلێ كوردستانێ شكەستن خوار و گەلێ مە ب سەربلندی ما.
ل دووماهی گوت» هندی كوردان سەرۆك بارزانی هەبیت، هیچ كەس و ئالیەك نەشێت ئیرادەیا ب هێز یا گەلێ كوردستانێ لاواز بكەت و نەشێن مەترسیا ڕاستەقینە ل سەر ئەڤرۆ و پاشەڕۆژا كوردستانێ و دەستكەفتێن مە یێن مەزن دروست بكەن چونكە پشتا مە ب گەلێ كوردستانێ یا ب هێزە».

سەرۆكێ حوكمەتا هەرێما كوردستانێ دبێژیت: پێدڤیە ئاستەنگێن ل بەردەم كەرتێ پیشەسازی ب مەبەستا پێشئێخستنا وی بهێنە لادان و ئاماژە دكەت: پێدڤیە 75% ژ دەلیڤەیێن كاری د هەر پڕۆژەیەكی دا بۆ وەلاتیێن هەرێما كوردستانێ بیت.
مەسرور بارزانی، سەرۆكێ حوكمەتا هەرێما كوردستانێ ل دەمێ پشكداریكرنێ د ڕێورەسمێن دانانا بەرێ بنیاتێ كارگەهەا چیمەنتۆی ل هەولێرێ، پەیڤەك پێشكێشكر و تێدا ڕاگەهاند: هیڤیدارم ئەڤ پڕۆژەیە وەكو سۆز هاتیە دان، كوالێتیەكا بلند د دەمەكێ دیاركری دا بهێتە تمامكرن و د دروستكرنێ ژی دا مەرجێن سلامەتیا پالەیان و ژینگەهپارێزی ل بەرچاڤ بهێتە وەرگرتن.
مەسرور بارزانی ئاماژە ب وێ چەندێ ژی كر ل دەمێ دەستبكاربوونا ڤێ كارگەهێ، ب سەدان دەلیڤەیێن كاری بۆ گەنجان دێ پەیدابن، هەروەسا گوت ژی» پێدڤیە 75% ژ دەلیڤەیێن كاری ل هەر پڕۆژەیەكی بۆ وەلاتیێن هەرێما كوردستانێ بن بۆ بلندكرنا ئاستێ شارەزاییێ ژی د كاری دا، ڕاهێنان ب پالەیان و ئەندازیارێن كوردستانێ بهێتە كرن».
سەرۆكێ حوكمەتا هەرێما كوردستانێ داخوازكر د دروستكرنا ڤێ كارگەهێ دا بابەتێ ژینگەهپارێزی، گەرمبوونا ئەردی و سنوورداركرنا دەرچوونا غازێن زیاندار ل بەرچاڤ بهێتە وەرگرتن.
مەسرور بارزانی دووپاتی ل وێ چەندێ كر كو حوكمەتا هەرێما كوردستانێ د چارچۆڤەیێ كارنامەیا خوە د بوارێ هەمەجۆركرنا ئابوری دا، گرنگیەكا مەزن ب هەردو كەرتێن پیشەسازی و چاندنێ دایە و دبێژیت» دەڤەرا مە كەرەستەیەكێ خاڤ و دەستپێكی یێ زۆر هەیە كو دشیاندایە ببیتە هێڤێنێ دروستكرنا گەلەك گارگەهان و ڤەژاندنا پیشەسازی و دابینكرنا پێدڤیێن بازارێن هەرێما كوردستانێ و هەتاكو هنارتنێ ژی بۆ دەڤەرێ».
ئەڤ كارگەهە بۆ دروستكرنا چیمەنتۆی، ب شێوەیەكێ سەرەكی پشتبەستنێ ل سەر كەرەستە و كەرەستێن خاڤ یێن ناڤخوەیێ دەت. وەكو سەرۆكێ حوكمەتا هەرێما كوردستانێ دبێژیت» پتریا پێدڤیێن هەرێما كوردستانێ دهێنە هاوردەكرن، ئەڤە د دەمەكی دا ئەم دشێین پشكەكا مەزن ژ ڤی بەرهەمی و پێدڤیان د ناڤ هەرێما كوردستانێ دا دروست بکەین، وی دەمی هەم دێ كەرتێ پیشەسازیا مە هێتە ڤەژاندن و هەم بێكاری دێ كێمتر بیت و پشتبەستنا مە ب دەرڤە دێ سنووردار بیت».
مەسرور بارزانی ئەوژی بەرچاڤكر، پێشڤەبرنا كەرتێ پیشەسازی پێدڤی ب هەر هاریكاریەكێ بیت، حوكمەتا هەرێما كوردستانێ خەمساریێ ناكەت و گوت» ل ڤێرێ ئالیێن پەیوەندیدارێن حوكمەتا هەرێما كوردستانێ ڕادسپێرم كو ئاسانكاریێن زێدەتر بۆ پێشئێخستنا كەرتێ پیشەسازی بكەن و هەر ئاستەنگەكا هەبیت، پێدڤیە بهێتە لادان».

نێچیرڤان بارزانی، سەرۆكێ هەرێما كوردستانێ، پێشوازی ل شاندەكێ بلند یێ ئەمریكی ب سەرۆكایەتیا دانا سترۆل جێگرا هاریكارێ وەزیرێ بەرگریێ ئەمریكی بۆ كاروبارێن ڕۆژهەلاتا ناڤین كر كو ژ جەنەرال ماكفارلێن فەرماندێ هێزێن هەڤپەیمانان ل ئیراقێ و سووریێ و هەژمارەكا دبلۆماتكار و بەرپرسێن وەزارەتا بەرگری پێكهاتبوو. د كۆمبوونەكێ دا هەردو ئالی د هەڤڕا بوون كو هێشتا داعش ل ئیراقێ و سووریێ گەفە و دوپاتی ل گرنگیا بەردەوامیا هاریكاریا هەڤپشك بۆ بەرهنگاربوونا مەترسیێن داعشێ كر و شاندێ ئەمریكی پشتەڤانیا وەلاتێ خوە بۆ بەردەوامیا هاریكاریا ئیراقێ و هەرێما كوردستانێ دوپاتكر. هەروەسا هەدو ئالیان پێدڤی و گرنگیا بەردەوامیا كارێ زیچدەتر بۆ سەرئێخستنا پرۆسەیا چاكسازیێ و ڕێكخستن ویەكخستنا پێشمەرگەی دوپاتكر .

سەرۆكێ دیوانا سەرۆكایەتیا هەرێمێ، فەوزی هەریری پێشوازی ل مارگۆرگیسێ سیێ یێ یونانێ پاتریاركێ نوو یێ كەنیسەیا ڕۆژهەلاتا كەڤن كر و ب ناڤێ نێچیرڤان بارزانی و سەرۆكایەتیا هەرێمێ پیرۆزباهی لێ كر بۆ دەستبكاربوونا وی و هەموو پشتەڤانیەكا سەرۆكایەتیا هەرێمێ بۆ دوپاتكر، ژئالیێ خوەڤە پاتریارك مارگۆركیس سەرەرای خوەشحالیا خوە بۆ ڕەوشا پێكهاتەیان ل هەرێما كوردستانێ، سوپاسیا خوە و پەیڕەوكارێن كەنیسەیا ڕۆژهەلاتا كەڤن بۆ سەرۆكایەتیا هەرێمێ و ڕۆل و بزاڤێن نێچیرڤان بارزانی، سەرۆكێ هەرێما كوردستانێ د پێشڤەبرنا پێكڤەژیانێ و تەباییێ و لێبۆرینێ د ناڤ پێكهاتەیێن هەرێما كوردستانێ دا دەربڕی.

بەرپرسێ دەستەیا كارگیری یا مەكتەبا سیاسی یا پارتی، فازل میرانی د پێشوازیا ڕۆمیو هەكاری سكرتێرێ حزبا بێت نەهرێن یا دیموكراتی و شاندەكێ دگەلدا ڕاگەهاند: گرنگترین پێدڤیا نوكە ڕێكخسنا ناڤمالا كوردی و پێكڤە كاركرنە د ناڤبەرا ئالیێن سیاسی یێن كوردستانی ب گیانەكێ برایانە و تەبایی فاكتەرێ سەرەكی یێ پاراستنا هەرێما كوردستانێ یە كو پێگەهێ كوردان ل ناڤخوە و دەرڤەی ژی دپارێزیت و دانوستاندن و تێكگەهشتن ل گەل هێز و ئالیێن هەرێما كوردستاتێ بكەینە بەمایێ كاركرنێ ژ پێخەمەت پاراستنا ئاشتیێ و پێكڤەژیانێ د ناڤبەرا هەموو پێكهاتەیان تاكو بشێین خزمەتگوزاریەكا هەژی تر و پاشەڕۆژەكا سەقامگیرتر بۆ خەلكێ كوردستانێ پەیدا بكەین.