عەزیز هەورامی:

پشتەڤانیا ناڤخوەیی و دەرڤە بۆ دەستپێشخەریا سەرۆك مەسعود بارزانی بۆ ڕێكخستنا ناڤمالا كوردستانی و كۆمبوونا بەرفرهە یا حزب و ئالیێن كوردستانێ بەردەوام د بەرفرەهبوونێ دایە، سیاسەتمەدارەكێ كورد ژی دبێژیت: دەمێ دەستپێشخەریا نیشتمانی یا بەرێز مەسعود بارزانی ژ هەموو دەمەكی گرنگترە و دەولەتێن جیهانێ ژی پشتەڤانن و كوردستانەكا ئارام دڤێت.
محەمەد ڕەئووف، سیاسەتمەدارێ كورد بۆ ڕۆژنامەیا (ئەڤرۆ) گوت» ل سالا 1991 تاكو نوكە ب قۆناغێن جودا یێن شەڕێن ناڤخوەیی یێن جۆرا و جۆر دیارە بوو هیچ تشتەك وەكو ئێكڕێزی و ئێك ستراتیژی و ئێك گۆتاری یا گرنگ نینە، هەر دەمەكێ نێزیكبوون هەبیت ڕەوش هاتیە گوهارتن ژ پشتڕاستبوونا وەلاتیان و ڕەوشا بازاری و باورەیا وەلاتیان ب حزبان بابەتەكە هاتیە ئەزموونكرن، د ڤی دەمی دا واقع دبێژیتە مە بەر ب ئالۆزیەكا مەزن دچیت تاكو سالا 2030 ب تایبەتی كوردان ژبلی ئێكڕێزیێ چو تشتەكێ دی نینە، هێزێن مەزن ل جیهانێ هندەك جاران یاری پێ دهێتە كرن، ئەم مللەتەكێ بێ دەولەتین و مە هێز نینە ژبلی ئێكگرتنا ناڤخوەیی».
گوت ژی» هەردەمێ دەستپێشخەریا ئێكگرتی بۆ ئالیان هاتبیتە كرن ل جهێ خوە بوویە، نوكە دەستپێشخەریا بەرێز مەسعود بارزانی بۆ ئالیان ل دۆر ئێكڕێزیی و كۆمبوونا بەرفرهە یا حزبان ژ هەموو دەمەكێ یا پێدڤی تربوو».
هەروەسا دیاركر» نوونەرێن دەولەتان د وێ ڕێورەسمان دا د بەرهەڤبوون، ل سەر وێ دەستپێشخەریێ ئاخڤتن، ئەو پتر هەست ب هەستیاریا ڕەوشێ دكەن ژ هەموو دەڤەران ل ئیراقێ و ڕۆژهەلاتا ناڤین، وان خواست هەیە زۆرترین ئارامی ل ئیراقێ هەبیت ب تایبەت هەولێر وەكو پایتەختێ هەرێما كوردستانێ وان پێ باشە ئەو ئارامیە بمینیت».
ناڤبری ئاماژە كر كو» میدیا ل هەرێما كوردستانێ نەشیایە یان نەشێت خزمەتا ڕاستی یا میدیایی بكەت وەكو د ڤێ قۆناغێ دا مفای ژێ ببینین و دەزگەهێن میدیایی هندی جوداهیا حزبان ژێك د دوورن، پشكەكا مەزن یا سۆشیال میدیایێ یا پۆپۆلیستیە و پشكەك ژی حزبیە و پشكەك ژی یا بێ ئاگەهە ژ ئالۆگۆریێن مەترسی یێن ئەمنی و لەشكریێن دەڤەرێ، ئەو میدیایێن خودان پەیام ژی د پێگیرن ب بنەمایێن بهایێ مرۆڤایەتی و جڤاكی و نەتەوەیی و نیشتمانی دبێژنە دڤێت بەر وان دەزگەهێن میدیایی بچین و بێژینێ دێ چەوا شێن خزمەتێ كەن، حزب دشێن میدیایێ ئاراستە بكەن».
خویاكر ژی» گرنگە ئێگگۆتاری د ناڤبەرا پارتی و ئێكەتیێ دا هەبیت، ئالیێن دی ژی داخوازا ئێكگۆتاری و ئێكهەلویستیێ دكەن و هەردو حزب پێكڤە كاركەن بۆ حوكمەتەكا باش و ڤێ قۆناغێ دەرباز بكەن و پشتی دەستپێشخەریا بەرێز مەسعود بارزانی، جارەكادی ل گەل ئیراقێ كاخەزان ڕێكبێخن و ڤەخواندنێ بۆ ڕوودانێن دەڤەرێ بكەن و حیسابێ بۆ هێزێن دی ژی بكەن ل ناڤخوە و ل ئیراقێ».

هەولێر، قائید میرۆ:

بسپۆرەكێ ئاسایشا نەتەوەیی ڕدگەهینیت، سەرۆك مەسعود بارزانی دشێت وەك لێڤەكەر ڕۆلەكێ مەزن ببینیت بۆ چارەسەركرنا ئاریشەیێن د ناڤبەرا ئالیێن سیاسی دا و دەسپێشخەریا سەرۆك بارزانی یا ڤێ دووماهیێ دێ هاریكار بیت بۆ چارەسركرنا ئاریشەیان. هەروەسا دبێژیت، پێدڤیە كار ل سەر پێشنیازا سەرۆك بارزانی بهێتەكرن بۆ ئاڤاكرنا ئیراقەكا دیموكراتی و چارەسەركرنا ئاریشەیێن ناڤخوەیی.
د. نەژدەت ئاكرەیی، پسپۆرێ ئاسایشا نەتەوەیی بۆ ڕۆژنامەیا (ئەڤرۆ) گوت» سەرۆك بارزانی زێدەتری نیف چەرخیە ئەزموونا سیاسی و پێشمەرگایەتی هەیە و كەسایەتیەكێ نیشتمانی و هەرێمی و نێڤدەولەتیە، لەوڕا ژی سەرۆك بارزانی ڤەكرنا مۆزەخانا نیشتیمانی یا بارزانیێ نەمر ب دەلیڤە زانی پێشنیازەكێ پێشكێشی هەموو ئالیێن سیاسی یێن ئیراقی و كوردستانی بكەت بۆ چارەسەركرنا ئاریشەیان و نەهێلانا ئەو ئاستەنگ و جوداهیێن هەین ب ڕێیا دانوستانان، هەروەسا سەرۆك بارزانی دیاركر پێدڤیە مفا ژ ئەزموونا بۆری بهێتە وەرگرتن بۆ ب دووماهی ئینانێ ب ئاریشەیان، ژ بەر كو پەیداكرنا سەقایەكێ ئاشتیانە ئەركەكێ گرانە».
د. نەژدەتی گوت ژی» ب دیتنا من گەلەك ڤەخواندن بۆ پەیاما سەرۆك بارزانی دهێنەكرن و هەردو ڕۆژێن وان ڕێورەسمان دا، سەرۆك بارزانی ب زەلالی باسێ گەلەك پرسان كر، ئەز باوەرم پێشنیازا سەرۆك بارزانی د دەمەكێ گونجای دا بوویە، كو ئەو پەیام ئاراستەی ئالیێن ئیراقی و كوردستانی كری، هەتا جارەكادی دەولەتا ئیراقێ ل سەر بنەمایێ دیموكراسیێ بهێتە ئاڤاكرن و ڕێز ل هەموو نەتەوە و ئایین و مەزهەبان بهێتە گرتن و ل سەر بنەمایێ دەستووری سەرەدەری و ڕێز ل هەموو وەلاتی و بۆچوونێن جودا جودا بهێتە گرتن».
د. نەژدەت ئاكرەیی ئاماژەكر» سالا بۆری ل گۆڤارا گولان من د گۆتارەكێ دا ئاماژەكربوو كو پێدڤیە پێشنیازەكا ستراتیژی ژئالیێ سەرۆك بارزانی ڤە بهێتەكرن بۆ چارەسەركرنا ئاریشەیێن دناڤبەرا ئالیێن سیاسی دا، نوكە ژی ب دیتنا من ئەو پێشنیاز و گازیا سەرۆك بارزانی بەسە بۆ چارەسەركرن و ئێكلاكرنا گەلەك ئاریشەیان، ب تایبەتی نوكە سەرۆك بارزانی وەكو لێڤەگەر زێدەتر دهێتە نیاسین و پێشنیاز و گازیا سەرۆك بارزانی سەنگا خوە هەیە بۆ ئێكلاكرنا ئاریشەیان، خویایە ژی سەرۆك بارزانی دشێت ڕۆلەكێ مەزن بگێڕیت بۆ چارەسەركرنا ئاریشەیان، ڕەوشا نوكە یا جیهان تێدا دبۆریت وەكو بەری 30 سالان نینە، بەری نوكە تنێ ئەمریكا جەمسەرێ ئێكانە بوو ل سەر ئاستێ جیهانێ، بەرۆڤاژی نوكە گەلەك جەمسەرێن دی ژی هەنە وەكی چینێ وئێكەتیا ئورۆپا پشتی شەڕێ د ناڤبەرا ڕووسیا و ئۆكرانیا دا جیهان هاتیە گوهۆڕین، ئەز پشتڕاستم سەرۆك مەسعود بارزانی خواندن بۆ ڕەوشا نوكە یا جیهانێ و ڕوودانێن پەیدابووین كریە و ل ژێر سیبەرا وان گوهۆڕینان داخوازا چارەسەركرنا ئاریشەیێن نافخوە كریە، بێگومان كەسەكێ وەكو سەرۆك بارزانی بێ بەرچاڤ گرتنا هەڤكێشەیێن ل جیهانێ هەین چو پێنگاڤان ناهاڤێت».

دهۆك، لەزگین جوقی

شیرەتكارێ جڤاتا ڕوحانی یا ئێزدیان دبێژیت: لژنەیەك د ناڤبەرا حوكمەتا هەرێما كوردستانێ‌ و ئیراقێ دا هاتیە پێكئێنان و ل نێزیك دێ‌ دەست ب كۆمبوونێن خوە كەت و سەرۆك وەزیرێن ئیراقێ محەمەد شیاع سوودانی یێ‌ ڕژد بوو ب ڕێكا وێ لژنەیێ‌ ئاریشەیا شنگالێ چارەسەر بكەت.
كەریم سلێمان، شیرەتكارێ جڤاتا ڕوحانی یا ئێزدیان گوت» ئاریشەیا سەرەكی یا ئێزدیان بوویە شنگال, میرێ‌ ئێزدیان،حازم تەحسین بەگ داخواز ژ محەمەد شیاع سوودانی كریە ئاوارە ڤەگەرنە شنگالێ وڕێككەفتنا شنگالێ ژی ئەوا د ناڤبەرا حوكمەتا هەرێما كوردستانێ‌ و ئیراقێ دا هاتیە ئیمزاكرن بهێتە بجهئینان وخەلكێ‌ زیاندار و خێزانێن ڕزگاربوویێن ئێزدی و شەهیدێن شنگالێ هەموو بهێنە قەرەبووكرن وئاڤەدانكرنا شنگالێ بهێتە كرن كو نوكە شنگال یا وێرانكریە وگەلەك ڕژدی ل سەر بجهئێنانا ڕێككەفتنا شنگالێ هاتە كرن كو حوكمەتا ئیراقێ كار بكەت بۆ نەهێلانا ئاستەنگان وبجهئێنانا وێ ڕێككەفتنێ‌ «.
كەریم سلێمان، زێدەتر گوت» لژنەیەك د ناڤبەرا حوكمەتا هەرێما كوردستانێ‌ و ئیراقێ دا یا هاتیە دروستكرن كو ئەو لژنە كار بكەت بۆ نەهێلانا ئاستەنگان و ل دەمەكێ نێزیك دێ‌ دەست ب كۆمبوونێن خوە كەت «.
خویاكر» محەمەد شیاع سوودانی ژی یێ‌ ڕژد بوو ب ڕێكا وێ لژنەیا هاتیە پێكئێنان د ناڤبەرا حوكمەتا هەرێما كوردستانێ‌ و ئیراقێ دا ئاریشەیان چارەسەر بكەت هەروەسا د ناڤ بۆدجەیا ئیراقێ دا ژی دێ‌ خالەك هێـتە پەسەندكرن بۆ قەرەبووكرن وئاڤەدانكرنا شنگالێ و ئەم گەلەك یێن گەشبین بووین ب ئاخڤتنێن محەمەد شیاع سوودانی كو ڕەوشا شنگالێ چارەسەربكەت».
شیرەتكارێ جڤاتا ڕووحانی یا ئێزدی ئەوژی گوت» بریاربوو محەمەد شیاع سوودانی سەرەدانا شنگال بكە تلێ‌ سەرەدانا خۆ هەلوەشاند وەكو محەمەد شیاع سوودانی گۆتی ژئەگەر گەش و هەوایێ‌ سەرەدانا شنگال نەكر هەكە هندەك ئەگەرین دێ‌ هەبن مە نزانی بۆجی نەچوو شنگال ئەو گریدایێ‌ وێ‌ بوو گەلەك ڕژدی ل سەر چارەسەریا ڕەوشا شنگال هاتیە كرن و ئەم د گەشبینن دێ‌ ڕەوش چارەسەر بیت».
هەروەسا دیاركر» میرێ‌ ئێزدیان و جڤاتا ڕوحانی هەموو بزاڤان دكەن بۆ چارەسەریا ڕەوشا شنگالێ و قەرەبووكرنا خەلكێ‌ زیاندار وداخواز دكەین حوكمەتا ئیراقێ ب ڕێكا پۆلیسان ڕەوشا شنگالێ كونترۆل بكەت وڕێكێ خوەش بكەت بۆ ڤەگەراندنا ئاوارەیان وئاڤەدانكرنا شنگالێ».

ئەڤرۆ

جێگرێ سەرۆكێ پەرلەمانێ كوردستانێ ڕاگەهاند، هەلبژارتن مافەكێ گشتیێ خەلكێ كوردستانێ یە و پێدڤیە د دەمێ خوە یێ دیاركری دا بهێنە ئەنجامدان. هەروەسا دبێژیت: مە داخواز ژ یونامی كریە هاریكاری و چاڤدێریا هەلبژارتنێن كوردستانێ بكەن.

هێمن هەورامی، جێگرێ سەرۆكێ پەرلەمانێ كوردستانێ ل گەل ڕیكاردو رۆدریگێز، بەرپرسێ نڤیسینگەها یونامی ل هەرێما كوردستانێ و سیلڤی بلانشیە، بەرپرسێ هەلبژارتن ل نڤیسینگەها یونامی ل بەغدا و بەرپرسێ پشكا سیاسی ل نڤیسینگەها یونامی ل هەولێرێ كۆمبوو.

د دیدارەكێ دا دووماهی پێشهاتێن ڕەوشا سیاسی یا هەرێما كوردستانێ و ئیراقێ و پرسا ئەنجامدانا هەلبژارتنێن پەرلەمانێ كوردستانێ د كۆمبوونێ دا هاتنە كرن، جێگرێ سەرۆكێ پەرلەمانێ كوردستانێ ل دۆر وێ چەندێ ئاماژەكر» ب گرنگی ڤە مە باس ل ئەنجامدانا پرۆسەیا هەلبژارتنان كر و مە دووپاتكر كو هەلبژارتن مافەكێ گشتیێ خەلكێ كوردستانێ یە و پێدڤیە د دەمێ دیاركریێ خوە دا بهێنە ئەنجامدان».

هێمن هەورامی گوت ژی» مە دووپاتكر كو مە هەموو بزاڤێن خوە یێن ئێخستینە كار و ل گەل فراكسیۆنان چەندین كۆمبوون هاتینە ئەنجامدان و دەلیڤەیا زۆر ژی ب ئالیان هاتیە دان بۆ وێ چەندێ ڕێككەفتن ل سەر كاراكرنا كۆمسیۆنا بلند یا هەلبژارتن و ڕاپرسیان و ڕاستڤەكرنا قانوونا هەلبژارتنان بهێتە كرن» هەروەسا گوت ژی» هیڤیدارین هیچ بهانەیەك نەبیتە هۆكار بۆ ئەنجامنەدانا هەلبژارتنان د دەمێ دیاركریێ خوە دا».

جێگرێ سەرۆكێ پەرلەمانێ كوردستانێ دبێژیت» مە داخواز ژ یونامی و جڤاكێ نێڤدەولەتی كر كو چاڤدێر و هاریكار و هەماهەنگ بن بۆ ئەنجامدانا پرۆسەیا هەلبژارتنان و ژ نێزیك چاڤدێریا پرۆسەیێ بكەن».

بڕیاربوو ل ڕۆژا 1/10/2022 هەلبژارتنێن خۆلا شەشێ یا پەرلەمانێ كوردستانێ بهێنە ئەنجامدان، بەلێ ناكۆكیێن سیاسی د ناڤبەرا ئالیان دا ل سەر قانوونا هەلبژارتنان، پێكهاتەیا كۆمسیۆنا بلند یا هەلبژارتن و ڕاپرسیان و شێوازێ ئەنجامدانا هەلبژارتنان د ناڤبەرا ئێك بازنەیی و فرەبازنەیی، بوونە ئەگەرێ پاشئێخستنا هەلبژارتنان.

نێچیرڤان بارزانی، سەرۆكێ هەرێما كوردستانێ جارەكادی ڕۆژا 18/11/2023 وەكو ژڤانێ هەلبژارتنێن خۆلا شەشێ یا پەرلەمانێ كوردستانێ دیاركر، بەلێ بەری هەلبژارتن بهێنە ئەنجامدان، قانوونا هەلبژارتنان پێدڤی ب ڕاستڤەكرنێ یە و كۆمسیۆنا هەلبژارتنان ژی پێدڤی ب كاراكرنێ یە.

دووماهی كۆمبوونا پارتی و ئێكەتی ل سەر ئاستێ پشك و دەزگەهێ هەلبژارتن، ڕۆژا 5 نیسانا بۆری هاتە گرێدان و تێدا شاندێ یۆنامی پشكداریكر و بڕیاردا پێشنیازا خوە ل دۆر شێوازێ پشكداریا پێكهاتەیان د هەلبژارتنێن پەرلەمانێ كوردستانێ دا بدەتە پارتی و ئێكەتیێ.

ڕۆژا 9 نیسانا بۆری ،یونامی دو پێشنیاز ئاراستەی پارتی و ئێكەتیێ كرن، ئێك: پێكهاتە ب ئێك بازنە پشكداریێ د هەلبژارتنان دا بكەن، دو: هەكە ب ئێك بازنە پشكداریێ ناكەن, دو كورسیێن پێكهاتەیان بۆ سلێمانیێ بیت، كو ئێك بۆ مەسیحیان و ئێك ژی بۆ توركمانان بیت.

ئەڤرۆ

ئەندامەكێ شاندێ پشكا هەلبژارتن یا پارتی دیموكراتی كوردستان ڕادگەهینیت: د كۆمبوونێن بۆری ل گەل دەزگەهێ هەلبژارتن یێ ئێكەتی نیشتمانی كوردستان هەموو كێشە هاتینە چارەسەركرن و ئەوا هەی بهانە گرتنە، لەوما بۆ وێ چەندێ كو دشیان دابیت ئەو ئاستەنگە بهێنە چارەسەركرن، ڤێجارێ ل سەر ئاستێ بلند كۆمبوون بهێتە ئەنجامدان.

عەبدولسەلام بەرواری، ئەندامێ شاندێ پشكا هەلبژارتن یا پارتی دیموكراتی كوردستان گوت» پرسا هەلبژارتنان و ئەوێن گرێدای هەلبژارتنان هیچ گرفتەك نەما و پارتی هاتیە پێش و هەموو ئەو داخوازیێن وان بۆ وێ چەندێ هەلبژارتن بهێنە ئەنجامدان پارتی ڕازی بوو و هەژمارا كورسیێن بازنەیان و دەنگدانا نیڤ ل سەر بنەمایێ دەنگدانێ و نیڤ ژی ل سەر بنەمایێ لیستێ بیت، مە ئەو هەموو قبوول كرینە، ئەوا بوویە بەربەست ئەو كێشەنە یێن ئێكەتی دروست دكەت بۆ وێ چەندێ هەلبژارتن نەهێنە ئەنجدامدان، لەوما پێدڤیە كۆمبوون دناڤبەرا پارتی و ئێكەتیێ دا بهێتە كرن و پەیوەندی بهێنە ئاساییكرن و هەموو كێشە دێ چارەسەر بن».

عەبدولسەلام بەرواری زێدەتر گوت» پێدڤیە ڤێجاری دەمێ كۆمبوون د ناڤبەرا پارتی و ئێكەتیێ دا دهێتە كرن ل سەر ئاستێ دەزگەهێن هەلبژارتن نەبیت، چونكە مفایەكێ وەسا نابیت، لەوما پێدڤیە ڤێجارێ ل سەر ئاستێ بلند كۆمبوون بهێتە كرن، چونكە دیارە ئەو چارەسەریا بۆ كۆمسیۆنا بلند یا هەلبژارتن و ڕاپرسیان و قانوونا هەلبژارتنان دهێتە باسكرن بهانەیە، لەوما پێدڤیە ل سەر ئاستێ مەكتەبا سیاسی كۆمبوون بهێتە كرن و ڕوو ب ڕوو هەموو كێشە بهێنە چارەسەركرن».

ئەڤرۆ

عەزیز هەورامی:

ئەكرەم سالح، بەرپرسێ لقێ 22 یێ پارتی دیموكراتی كوردستان ل گەرمیان، ڕاگەهاند، ئێكڕێزیا ناڤمالا كوردی فاكتەرەكێ ب هێزە بۆ پێگەهێ كوردستانێ و هەر ناكۆكیەك ل هەرێما كوردستانێ دێ كاریگەریا نەرێنی هەبیت ل سەر پێگەهێ كوردان ل سەر ئاستێ ئیراقی و هەرێمایەتی و نێڤدەولەتی و گرنگە ئالیێن كوردستانێ ب گشتی هەست ب هەستیاریا ڕەوشا ڤێ قۆناغێ بكەن و ناكۆكی بهێنە چارەسەر كرن تاكو تاكو ژ ڤێ ڕەوشا ئیراق تێدا دەرباز دبیت و ئالیێن كوردستانێ ب كۆدەنگیێ ڕوو ب ڕوویێ ئاریشە و گرفتان بن.

ئەكرەم سالح، زێدەتر بۆ ڕۆژنامەیا (ئەڤرۆ) گوت» پرسا هەلبژارتنان بۆ دەمێ سالەكێ ژ ژڤانێ خوە هاتیە پاشئێخستن و هەتا نوكە قانوونا هەلبژارتنان نەهاتیە ڕاستڤەكرن و كۆمسیۆنا بلند یا هەلبژارتن و ڕاپرسیان ل هەرێمێ كوردستانێ نەهاتیە كاراكرن، هەكە هەلبژارتن ل ژڤانێ بۆ هاتیە دیاركرن نەهێنە ئەنجامدان دێ كاریگەریەكا خراب ل سەر ڕەوشا كوردستانێ هەبیت».

گوت ژی» ئەم وەكو پارتی ل دەف مە گرنگە هەلبژارتن د دەمێ خوە دا بهێنە ئەنجامدان، پرسا دیموكراسیێ و ئازادیێ و مافێن مرۆڤی بۆ كوردستانێ كاریگەریا گرنگ یا خوە هەیە ل ڕوانگەها دەولەتێن زلهێز و دۆست و هەڤپەیمانێن مە، هەموو ئالی هزر د بەرژەوەندیا تایبەت دا نەكەن، بەلكو بەرژەوەندیا گشتی و پاشەڕۆژا هەرێما كوردستانێ ل پێشتر بیت و بهانەیان نە ئینن ژبەر لاوازیا سیاسی تاكو هەلبژارتن نەهێنە ئەنجامدان، ژ بەر كو هەلبژارتن پرۆسەیەكا گرنگە و پێدڤیە د دەمێ خوە دا بهێنە ئەنجامدان».

هەروەسا گوت» پێدڤیە ل سەر هەموو ئالیان سەرۆكایەتیا هەرێما كوردستانێ و جڤاتا وەزیران بكەنە جهێ چارەسەركرنا كێشە و ئاریشەیێن كوردستانێ، نەكو سۆشیال میدیایێ و داخۆیانیێن لابەلا و پەنابرن بۆ نەحەزێن كوردستانێ، پێدڤیە كورد ل بەری هەموویان دۆستێن هەڤدو بن، نەكو چاڤەڕێی خەلكی دی بن چارەسەریێ بۆ بكەت».

خویاكر» هەموو دەمان دەرگەهێ پارتی یێ ڤەكری بوو بۆ دانوستاندنێ و چارەسەركرنا كێشەیان و چو جاران پارتی هۆكار نەبوو بۆ وێ چەندێ ڕەوشا سیاسی و حوكمڕانی ب وی ئاراستەیێ ئالۆز بچیت و مخابن ژ ئەگەرێ كۆمەكا گرفتان كو ل دەمێ بۆری دا رووداین و تیما ئێكەتیێ نەچوونە كۆمبوونێن جڤاتا وەزیران، پێدڤی بوو د چارچۆڤەیێ جڤاتا وەزیران دا كێشەیێن خوە چارەسەر كربان و داخوازیێن خوە بەرچاڤ كربان چونكە ئێكەتی ئالیەكێ سەرەكیێ حوكمەتا هەرێمێ یە، نوكە ژی دەلیڤە مایە و كێشە نەگەهشتینە وی ئاستی كو نەهێنە چارەسەركرن، نیەت پاكی و پێگیریكرن ب قانوون و بەرژەوەندیێن بلند یێ كوردستانێ وەدكەت كێشە ب شێوەیێ ئاسایی چارەسەر ببن».

ئاماژەكر» بزاڤ د بەردەوامن كو چارەسەری بۆ كێشەیان بهێنە دیتن و قۆناغا نوكە بهێتە دەربازكرن، بزاڤ ژی ل سەر ئاستێ هەڤپەیمان و ناڤخوە د بەردەوامن ب هیڤیا وێ چەندێ د دەمەكێ نێزیك دا كۆمبوونێن پارتی و ئێكەتیێ دەست پێ بكەن و بزاڤ بهێنە كرن چارەسەری بۆ وان خالێن بووینە جهێ ناكۆكیێ چارەسەریا گونجای بۆ بهێتە دیتن و هەلبژارتنێن پەرلەمانێ كوردستانێ بهێنە ئەنجامدان».

سەرۆك مەسعود بارزانی پێشوازی ل باربارا لیف هاریكارا وەزیرێ دەرڤەیێ ئەمریكا كر، د دیدارەكێ دا ب بەرهەڤبوونا ئەلینا ڕۆمانوسكی بالیۆزا ئەمریكا ل ئیراقێ و ئیرڤن هیكس قونسۆلێ گشتیێ ئەمریكا ل هەولێرێ، باس ل ڕەوشا گشتی یا ئیراقێ و دەڤەرێ هاتە كرن زێدەباری پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال دا. ژئالیێ خوەڤە وەزارەتا دەرڤە یا ئەمریكا د تویتەكێ دا بەلاڤكر باربارا لیف پیرۆزباهیا سەرۆك بارزانی كر ب ڤەكرنا مۆزەخانا نەتەوی یا بارزانی كو بڕیارە ل دووماهیا ڤێ هەیڤێ بهێتە ڤەكرن و دیاركر ژی كو شانازیێ دكەین كو دەهان سالە ئەمریكا پشتەڤانیا هەرێما كوردستانێ دكەت.

سەرۆك مەسعود بارزانی ل سەلاحەدین، پێشوازی ل مارتین یێگەر بالیۆزێ ئەلمانیا ل ئیراقێ كر كو ب هەلكەفتا ب دووماهی هاتنا ئەركێن خوە و خاتر خواستنێ سەرەدانا سەرۆك بارزانی كربوو. د دیدارەكێ دا سەرۆك بارزانی سوپاسیا گەل و حوكمەتا ئەلمانیا كر كو ل قۆناغێن جودا جودا پشتەڤانێن گەلێ كوردستانێ بوون.

هەر د وێ دیدارێ دا ڕەوشا سیاسی یا ئیراقێ و پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال هاتە باسكرن و دووپاتی ل پێشڤەبرنا پەیوەندیێن د ناڤبەرا هەردو ئالیا دا هاتە كرن.