ئەڤرۆ نيوز:

رۆژنامەڤان و نڤیسەرەکێ ناڤدارێ تورکیا دیار دکەت کو خوەنیشادانێن ڤێجارێ ل ئیرانێ نیشا ددەن کو ئێدی خەلک ژ سیستەمێ ھشکباوەر یێ ئیسلامی ل ئیرانێ بێزار بووینە و درووشمێن خەلکی و توندوتیژیا ل دژی خوەنیشادەران ڤێ راستیێ نیشا ددەت کو ئێدی ل ئیرانێ چو تشتەک وەکو بەرێ نامینیت و دێ گوھۆرین ل ئیرانێ روو دەن.

تونجا ئۆیرەتەن نڤیسەر و ڤەکۆلەرێ ناڤدارێ تورکیا دیار دکەت کو ئیران کەفتیە بەر پێلا گوھۆرینێ و ئێدی چو ھێزەک نەشێت رێگریێ ل گوھۆرینێن ل ئیرانێ بکەت، درووشمێن خەلکی گەلەکێ ئاشکرا بوون، گەنجێن نھا ل ئیرانێ دژین دخوازن د سیستەمەکا دیموکراتیک و ئازاد دا بژین و سیستەمێ نھا یێ ئیرانێ گەلەکێ بەرتەنگە و نەشێت بەرسڤا داخوازیێن خەلکی ب تایبەتی ژی تاخا گەنجان بدەت و ژ بەر ھندێ ژی سیستەمێ نھا یێ ئیرانێ دێ ھێتە گوھۆرین و خوەنیشادانێن ڤێجارێ نیشانا دەستپێکرنا قۆناغەکا نوو نە و ئەو یەک دێ بێتە ئەگەرێ ژناڤچوونا دەستھەلاتا مەلایان ل ئیرانێ.

ناڤبری د پشکەکا دی یا ئاخڤتنا خوە ئاماژە ب ھندێ ژی دکەت کو سیستەمێ نھا یێ ئیرانێ سیستەمەکێ ب تەمامی دکتاتوریە و رێزێ ل چو بیر و باوەریەکا جودا ناگریت و ٤٠ سالن خەلک ل ژێر ناڤێن جودا جودا دھێنە تەپەسەر کرن و فێل ل خەلکی دھێتە کرن، لێ نھا خەلکێ ئیرانێ پتر ژ ھەر دەمەکێ ھشیار بوویە و ناخوازیت ل ژێر دەستھەلاتا مەلایان بژیت و ژ بەر ھندێ ژی خوەنیشادانێن ڤێجارێ گەلەکێ جوداتر بوون ژ خوەنیشادان کو بەری نھا ل ئیرانێ ھاتینە کرن و گۆت: (ژبەر ھندێ ژی ئەز دبێژم قۆناغەکا نوو ل ئیرانێ دەستپێ کریە، رەنگە ئەڤ قۆناغە یا دەمدرێژ بیت لێ من دڤێت بێژم کو ئێدی ل ئیرانێ چو تشتەک وەکو بەرێ نابیت و خامەنەیی و بەرپرسێن دی یێن ئیرانێ ژی ئەڤ راستیە باش دیتن و بزاڤێ دکەن بێژن کو دەستێ ئەمریکا د ڤان روودانان دا ھەیە دا داخوازێن مەشروع یێن خەلکی بجە نەئینن).

نڤیسەر و رۆژنامەڤانێ تورکیا ئاماژە ب ھندێ ژی دکەت کو دو وەلاتێن زلھێز ئەڤرۆکە بریار داینە کو سیستەمێ ئیرانێ بھێتە گوھۆرین، ئەو ژی ئەمریکا و فرەنسا نە و نھا سیاسەتا فرەنسا ب تەمامی ل ھەمبەر ئیرانێ ھاتیە گوھۆرین، ل رۆژھەلاتا ناڤین ژی ئیسرائیل و سعوودیا و گەلەک وەلاتێن دی یێن عەرەبی ھەنە کو ب سالانە چاڤەرێ ھندێ نە سیستەمێ نھا یێ ئیرانێ ژناڤ بچیت، پشتەڤانیا ڤان وەلاتان بۆ خوەنیشادەران دێ وەسا بکەت کو خەلک پتر یێ رژد بیت بۆ گوھۆرینا سیستەمی و گۆت: (رەنگە رژێما نھا بشێت ب زۆرێ و ترساندن و کوشتنێ خەلکی بۆ دەمەکێ بێدەنگ بکەت لێ ئێدی ب چو رەنگەکێ نەشێت رێگریێ ل داخوازیێن خەلکی بکەت و ل ئیرانێ قۆناغەکا نوو دەستپێ کریە و دێ ھەر یا بەردەوام بیت و دڤێت رۆژھەلاتا ناڤین خوە بۆ گوھۆرینێن مەزن ئامادە بکەت، چونکو ئیران ئێکە ژ وەلاتێن ھەری مەزن و کاریگەر ل رۆژھەلاتا ناڤین و ھەر گوھۆرینەک ل ئیرانێ دروست بیت دێ کارتێکرنا خوە ل ھەموو رۆژھەلاتا ناڤین کەت).

ئەڤرۆنيوز:

تۆرا “فوكس نیوز” یا ئەمریكی، گۆتارەكێ نڤیسەرەكێ ئەمریكی بەلاڤكر كو تێدا داخوازێ ژ سەرۆكێ ئەمریكی ترامپی دكەت كو عیراقێ وسووریێ ولوبنانێ ویەمەنێ پارچە بكەت  ب مەرەما بەهنگاریا پرۆژێ بەرفرەهبوونا ئیرانێ وەكو چاڤلێكرنەك بۆ سیاسەتەكا بەرێ كو ئەمریكا بكارئینای بۆ پارچەكرنا ئێكەتیا سوڤیەتێ.

نڤیسەرێ ئەمریكی “مایكل ماكوفسكی” دگۆتارا خوە دا داخوازا گوهۆرینا نەخشێ رۆژهەلاتا ناڤین دكەت وەكو ئامرازەك بۆ بەرهنگاریا ئیرانێ كو دخوازیت ل دەڤەرێ بەرفرەه ببیت وئیسرائیلێ ژناڤ ببەت.

ماكوفسكی كو رێڤەبەرێ پەیمانگەها جوهی بۆ ئاسایشا نەتەوی یا ئەمریكی یه ‌دبێژیت” دەركەفتنا ئیرانێ یا جیوسیاسی گرنگترین ومەترسیدارترین پێشڤەچوونە ل سەدێ 21 وددەمەكی دا ستراتیژیەتا ئاسایشا نەتەوی یا نوو یا سەرۆكێ ئەمریكی ترامپی ، ئیرانی ب مەترسی ل سەر ئاسایشا نەتەوی یا ئەمریكی دهەژمێریت، بەلێ چو ستراتیژیەتێن بەرچاڤ نەكرینە كو تێدا پێنگاڤێن بەرهنگاریا مەترسیا ئیرانی یا زێدە ل دەڤەرێ دیار بكەت”.

وی نڤیسەری داخواز ژترامپی كر كو چاڤ ل سەرۆكێ ئەمریكی یێ بەرێ “رۆنالد ریگان” بكەت كو سیاسەتەكا هێرشبرنێ بكارئینای بۆ لاوازكرنا ئێكەتیا سوڤیەتی یا بەرێ كو ریگان ب رێیا وێ ستراتیژیەتێ پشتەڤانی ل هێزێن ناڤخوەیی یێن دژی شیوعیەتێ ل سەرانسەری جیهانێ كر.

گۆت ژی” پێدڤیە ئەڤرۆ ئەمریكا پشتەڤانیێ ل هێزێن داخوازا سەربخوەیێ وئازادیێ ژ كارتێكرنا ئیرانی دكەن بكەت وپێدڤیە ئەمریكا هەبوونا خوە یا لەشكری ل عیراقێ وسووریێ بهێلیت وپشتەڤانیا لەشكری بۆ هێزێن ناڤخوەیی ل وان هەردو وەلاتان بكەت وئەمریكا یا پێدڤی ب پشتەڤانیا هەڤپەیمانێن خوە ل دەڤەرێ هەیە ب تایبەتی ئوردن وئیسرائیل”.

دیاكر ژی” ئەڤ هەلویستێ هێرشبرنێ ب تنێ بەس نینە بۆ بەرهنگاریا ئیرانێ، بەلكو پێدڤیە ل سەر ئەمریكا دانپێدانێ ب عیراقێ وسووریێ ویەمەنێ ولوبنانێ بكەت دحالەتێن ئەو وەلات نوكە تێدا ئەوژی كیانێن دروستكری یێن فاشل ودبن دەستهەلاتا ئیرانێ دا وئیران مفایەكێ مەزن ژ ژناڤبرنا (خیلافەتێ) دیت بۆ چەسپاندنا هێز وكوننترۆلا خوە ل سەر وان هەر چار وەلاتان”.

ب دیتنا ماكوفسكی” مانا رەوشا وان وەلاتان وەكو نوكە هەی تنێ دخزمەتا ئیرانێ دایە وچو تشتێ پیرۆز ل دۆر سنورێن وان وەلاتان نینە وبێگومان نە رێزگرتنا داعشێ وئیرانێ بۆ وان سنوران نەگرنگیا وان سنوران دیار دكەت” خویا كر ژی” عیراق وسووریا ویەمەن ولوبنان كیانێن دروستكرینە دقۆناغا پشتی شەرێ جیهانیێ ئێكێ دا وئەو وەلات یێن دبن دابەشكرنێن نەتەوی – تایفگەری دا كو دەستهەلاتەكا حاكمەكێ دیكتاتور ئەو پێكڤە گرێددان”.

گۆت ژی”ژڤێرێ دیاردبیت كو لاوازیا ئیرانێ دزڤریت بۆ پشت بەستنا وێ ل سەر رژێمێن ستەمكار كو حوكمرانیا دەڤەرێن دبن دابەشكرنێن نەتەوی – تایفگەری دایە، لەوما پێدڤیە ل سەر ئەمریكا ڤێ لاوازبوونێ ل بەرچاڤ وەرگریت وپشتەڤانیێ ل وان هێزان بكەت یێن دژی دەستهەلاتا ئیرانێ ودخوازن ژ وەلات وپایتەختین خوە جودا ببن وئەنجامێ ڤێ چەندێ دێ هەبوونا كونفیدرالیێن ڤەكری، یان وەلاتێن نوو بیت”.

ئەو نڤیسەر نموونان دئینیت ل سەر پشتەڤانیێ ل پێكئینانا دەولەتەكا كوردی یا سەربخوە ل عیراقێ وراوەستاندنا پشتەڤانیا لەشكری ل بەغدا ئەوا دێ حوكمرانیێ ل فیدرالیەتەكێ بێ كوردستان كەت ودشیان دایە كونفیدرالیەك ل سووریێ بهێتە پێكئینان، یان هندەك وەلاتێن ژێك وەكو دەولەتەكا عەلەوی دبن دەستهەلاتا ئیرانێ ڤە ل كنارێن سووریێ ل سەر دەریا ناڤەراست ودەولەتەكا كوردی ل باكوورێ رۆژهەلاتێ سووریێ ودەولەتەكا عەرەبی سونی ل ناڤەراستا سوورێێ وتاكو ئەمریكا خوە دیاربكەت كو دژی شیعان نینە، دبیت پەیوەندیێ خوە ل گەل ئازرەبایجانێ باش بكەت، كو پتریا وەلاتیێن وێ شیعێن علمانی نە ونێزیكی ئیرانێ یە.

ئه‌ڤرۆنيوز:

له‌شكرێ رژێما سوورى ئه‌ڤرۆ سێشه‌مبى 9/1/2018  كونترۆلكرنا ده‌ڤه‌را سنجار ل پارێزگه‌ها ئيدلب ل باكوورێ سووريێ راگه‌هاند.

فه‌رمانده‌كێ له‌شكرێ سوورى ب ئاژانسا (سپۆتنيك) يا رووسى راگه‌هاند كو هێزێن وان باژێركێ سنجار كونترۆلكر و ب ده‌ڤه‌ره‌كا ستراتيژى هژمارت.

دياركر ژى” چه‌كدارێن به‌ره‌يێ نوسره‌ كو بالێ رێكخراوا قاعيده‌ يا تيرۆرستى يه‌ ل سووريێ ژ وێ ده‌ڤه‌رێ ره‌ڤين”.

ئه‌ڤرۆ نيوز:

ئێكه‌تيا ئورۆپا ستراتيژيه‌تا نوو يا خوه‌ ل عيراقێ راگه‌هاند و ئاخفتنكه‌را ب ناڤێ به‌رپرسا سياسه‌تا ژ ده‌رڤه‌ يا ئێكه‌تيا ئورۆپا د داخۆيانيه‌كێ دا بۆ K24 راگه‌هاند كو ئه‌و د ئاماده‌نه‌ هاريكاريا عيراقێ بكه‌ن د ئاڤه‌دانكرنا وه‌لاتێ وان دا و ل ڤان نێزيكان دێ ل گه‌ل هه‌رێما كوردستانێ و حوكمه‌تا به‌غدا ده‌ست ب دانوستاندنان كه‌ن.