ئەڤرۆ نیوز، ھلوری:
بەرەیێ تورکمانان ل کەرکووک دخوازن کو پوستێ پارێزگارێ کەرکووک ب وان بھێتەدان، بۆ ڤێ مەرەمێ ژی پرۆژەیەک بۆ ب رێڤەبرنا کارگێریا پارێزگەھا کەرکووک بەرھەڤکریە. پەرلەمانتارەکێ تورکمانان ژی دیارکر کو پرۆژەی چانسەکێ زۆر ھەیە ژ لایێ بەغدا و ئەنقەرە بھێتە پەسەنکرن.
دڤی واری دا “جاسم محەمەد” پەرلەمانتارێ تورکمان ل بارا ھورکاریێن پرۆژێ برێڤەبرنا پارێزگەھا کەرکووک ژ روویێ کارگێری ڤە دیارکر کو پرۆژەیێ ئیدارەدانا کەرکووک ژ لایێ تورکمانان ب ناڤێ پرۆژەیێ تورکمانان و گۆت: ( پرۆژەیێ تورکمانان چەنسه‌كێ زۆر ھەیە کو ژ لایێ بەغدا و ئەنقەرە بھێتە پەسەندکرن و د چەند رۆژێن داھاتی دا دێ ئێخینە بەردەستێ ئیرانێ و ئەمریکا و بەریتانیا ژی).
زێدەتر گۆت: (شاندەکێ تورکمانان پێشتر سەرەدانا تورکیا کریە و ل گەل ھەر ئێک ژ رەجەب تەیب ئەردوگان سەرۆک کومارێ تورکیا و بینالی یەلدرم سەروک وەزیرانێن تورکیا دانوستاندن ل سەر پرۆژەی کریە، داخواز ھاتیەکرن کو فەرماندەیەکێ سەربازی بۆ کەرکووکێ بھێتە دامەزراندن و لیوا عەلی فازل عیمران ببیتە فەرماندەیێ سەربازیێ کەرکووکێ ژ بەر کو ئەو نھا ئێکە ژ فەرماندەیێن ئوپەراسیوونێ، ھەر دیسان سێ جێگر ژی کو ژ کورد و عەرەب و تورکمانان پێکدھێن بۆ بھێنە دانان دا کو ھەڤکاریا وی بکەن بۆ ئارام راگرتن و ئیدارەدانا باژێرێ کەرکووکێ).
ناڤبری د درێژاھیا ئاخفتنێن خوه دا دیارکر ژی کو د پرۆژەی دا پێشنیاز ھاتیەکرن کو جڤاتا پارێزگەھا کەرکووک بھێتە ھەلوەشاندن دا کو چو ئاریشە نەھێنە روودان و ھە تاکو ھەلبژارتن ب سەرپەرشتیا نەتەوەیێن ئێگرتی بھێنەکرن، تورکمانان داخوازکریە کو پوشتێ پارێزگارێ کەرکووکێ ژی بۆ وان بیت و دەستھەلات ژی ل سەر بنەمایێ ٣٢% بو عەرەب و ٣٢% بو تورکمان و ٣٢% بو کوردان و ٤% بۆ پێکھاتەیێن مەسیحی بھێنەدان).
ئەڤرۆ نیوز، نەوزاد ھلۆری:
ل سەر جاددە و ھەند جھێن گشتی ل سەنتەرێ قەزا سوران جورە خوارنەک بناڤێ ” عەسەلیات ” دھێتە فروتن ، و رێڤەبەریا ساخلەمیا سوران ژی ھوشداریێ ژ خوارنا وێ ددەت ، و دھەمان دەم دا دیارکر ژی کو یێ بفروشیت دێ ھێتە سزادان.
مینا تەھا بەرپرسا راگەھاندنێ ل ساخلەمیا سوران دیارکر کو جورە خوارنەک بناڤێ عەسەلیات ل ھەند جھێن قەزا سوران دھێتە فروتن و کارتێکرن ل ساخلەمیا وەلاتیان دکەت و گۆت: ( ئەڤ خوارنە پێکدھێت ژ ماددەیێن شکولاتێن ترش و شیرین کو خوارنەکا دەستکردە و ل مالان دھێتە درۆستکرن و لسەر عەرەبانە و ھەند بازارێن سوران دھێتە فرۆتن و یا بەربەلاڤە ھەتا خوە ل قوتابخانان ژی دھێتە فروتن).
زێدەتر گۆت: ( ب گورەی ئەوان پشکنینێن کو ژلایێ رێڤەبەریا ساخلەمیا سوران لسەر ئەڤێ جورێ خوارنێ ھاتیەکرن، ب چو رەنگان ب کێری خوارنێ ناھێن و خوارنەکا ساخلەم نینە، د ھەمان دەم دا دبیتە سەدەما کێم خوینی، زکچوون، رەشان و کێم خوارن ب تایبەتی بۆ زارويان، ژ بەر ڤێ چه‌ندێ ئەم ب باش نابینین کو بھێتە خوارن و داخوازێ ل ھەموو دایبابان دکەین کو ھوشیارێ زارويێن خوە بن و ھەر کەسێ بخۆت دێ مەترسیێ ل سەر سالخەمیا خوە دروست کەت).
ھەر چەند ل دەمێن بوری ژ لایێ نوونەراتیا ساخلەمیا سوران و لژنا ئابووری یا سوران دەست ب سەر کومەکا خوارنا ناڤری گرتیە و ژ ناڤبریە، بەلێ ب کارئینانا وێ خوارێ یا بەردەوامە و دڤی واری دا ناڤبری گۆت: (دووڤچوونێن لژنا ئابووری و نونەراتیا ساخلەمیا سوران دێ د بەردەوام بن و ھەر کەسەکێ ئەڤێ جورێ خوارنێ بفروشیت دێ پێرابوونێن قانوونی بەرامبەر وان ھێنە وەرگرتن ژ بەر کو ئەڤ خوارنە، خوارنەکا نە دروستە و کارتێکرنێ ل ساخلەمیا گشتی یا وەلاتیان دکەت).
ئه‌ڤرۆ نيوز:
سه‌عدى ئه‌حمه‌د پيره، ئاخفتنكه‌رێ ب ناڤێ ئێكه‌تى نشتيمانى كوردستان راگه‌هاند كو ئه‌ڤرۆ جڤاتا سه‌ركرداتيا ئێكه‌تيێ ل سلێمانيێ دێ كۆم بيت و پرسێن په‌يوه‌ندى ب هه‌رێما كوردستانێ ل گه‌ل به‌غدا و پرسا گرێدانا كۆنگره‌ى و ئاشكه‌راكرنا ئه‌نجامێن ده‌سپێكى يێن ڤه‌كۆلينێن ل سه‌ر روودانێن كه‌ركووك و دياركرنا ژڤانێ كۆنگره‌ى كۆم بيت.
ئەڤرۆ نیۆز،زنار تۆڤی:
سەرۆک کۆمارێ عێراقێ پەیامەکێ بۆ فەرماندێ سوپایێ قودسا ئیرانی،کو سوپایێ وی بەشەکە ژ سوپایێ پاسداران دهنێریت.
د پەیاما وی دا،کو مالپەرێ(ئەلعالەم) یێ ئیرانی ئەڤرۆ رۆژا شەمبێ 4/11/2017 دەقێ وێ بەلاڤکریە،کو فوئاد مەعسومی، سەرۆک کۆمارێ عێراقێ ب ”برا“ ناڤێ قاسم سولێمانی، فەرماندێ سوپایێ قودسا ئیرانی د ئینیت.
هەروەسا فوئاد مەعسوم یێ داخبارە بۆ مرنا بابێ قاسم سولێمانی و هیڤی خواستینە کو ”بەر رەحمەتا خودێ بکەڤیت“ و داخوازا سەبر و ئارامیێ بۆ قاسم سولێمانی کریە.
رۆژا 31/10/2017، محەمەد سولەێمانی، بابێ فەرماندێ سوپایێ قودسا ئیرانی د ژیێ 95 سالیێ دا مریە.
ئەڤرۆ نیۆز،زنار تۆڤی:
هژماره‌یه‌كا سیناتۆرێن كۆماری و دیموكرات یێن ئه‌مریكا نامه‌یه‌كێ بۆ حه‌یده‌ر عه‌بادی، سه‌رۆك وه‌زیرێن عێراق دهنێرن و هۆشداریێ دده‌نێ كو پارێزگاریێ ل گه‌لێ كوردستانێ بکەن،ژبەرکو پێكهاتێن وێ بۆ ئه‌وان زۆر یا گرنگه.
سیناتۆرێن ئه‌مریكا د نامه‌یه‌كێدا بۆ عه‌بادی داخواز ژێ كریه كو ل‌گه‌ل هه‌رێما كوردستانێ گفتوگۆیێن جددی ده‌ستپێ بكەت و شه‌ری رابگریت، چونكی د به‌رژه‌وه‌ندییا هیچ لایه‌كێدا نینه.
د به‌شەكێ دی یێ ناما وان دا ، سیناتۆرێن ئه‌مریكا داخواز ژ حه‌یده‌ر عه‌بادی كریە كو سرکرنا ئه‌نجامێن ریفراندۆمێ كو ده‌ستپێشخه‌ری و نیازپاكیا حوکمه‌تا هه‌رێما كوردستانێ بۆ چاره‌سه‌ركرنا كێشه‌یان به گفتوگۆیێ دسه‌لمینیت، پێدڤیە قەبوول بكەت.
سیناتۆرێن ئه‌مه‌ریكا گوتیە حه‌یده‌ر عه‌بادی،کو پارێزگاریكرن ل گه‌لێ كوردستان و پێكهاتێن وێ بۆ ئه‌وان زۆر یا گرنگە و جهێ بایه‌خدانێ یە و داخواز ژێ كریه كو ل گه‌ل حوکمه‌تا هه‌رێما كوردستانێ بۆ نه‌هێلانا مه‌ترسیێن شه‌ری كار بكەت.
ئه‌ڤرۆ نیوز ، نه‌وزاد هلۆرى:
سه‌روكێ حكومه‌تا هه‌رێما كوردستانێ و وه‌زیرێ ده‌رڤه‌یێ ئه‌مریكا ب رێیا په‌یوه‌ندیه‌كا تێله‌فوونى داوى گورانكاریێن عیراق و هه‌رێما كوردستانێ گوتوبێژكرن و وه‌زیرێ ده‌رڤه‌یێ ئه‌مریكا دلگرانیا خوه به‌رامبه‌ر ئالوزیێن دناڤبه‌را هه‌ولێر و به‌غدا دیاركر ، و ژلایه‌كێ دنڤه سه‌رۆكێ حكومه‌تێ دیاركر كو ئاریشه‌یێن دناڤبه‌را هه‌ولێر و به‌غدا ب شه‌رى ناهێنه چاره‌سه‌ركرن.
ل گوره‌ى راگه‌هاندنه‌كێ كو ژ نڤیسینگه‌ها نێچیرڤان بارزانى سه‌رۆكێ حكومه‌تا هه‌رێما كوردستانێ هاتیه به‌لاڤكرن ، رێكس تێله‌رسون وه‌زیرێ ده‌رڤه‌یێ ئه‌مریكا ب رێیا په‌یوه‌ندیه‌كا تێله‌فونى كو ب نێچیرڤان بارزانى سه‌رۆكى َحكومه‌تا هه‌رێما كوردستانى َكر بوو ، دلگرانیا خوه به‌رامبه‌ر ئالوزیێن دناڤبه‌را هه‌ولێر و به‌غدا دیاركر ، و پشته‌ڤانیا وه‌لاتێ خوه ژى بو مافێن ده‌ستووریێن هه‌رێما كوردستانێ د چارچوڤێ عیراقێ دا دوپاتكر ، و داخواز ژى كر كو ئاگربه‌ست و گوتوبێژێن مه‌یدانى دناڤبه‌را هه‌رێما كوردستان و حكومه‌تا عیراقا فیدرالى پێدڤى یه ببنه گوتوبیژێن سیاسى و چاره‌سه‌ركرنا ئاریشه‌یان.
د به‌رامبه‌ر دا نێچیرڤان بارزانى سه‌رۆكێ حكومه‌تا هه‌رێما كوردستانێ زێده‌بارى دلگرانیا خوه بو پێشڤه‌چوونێن سه‌ربازیێن عیراقێ دیاركر ژى كو هه‌رێما كوردستانێ هه‌موو به‌رهه‌ڤیێن گوتوبێژان ل گه‌ل عیراقێ كرینه و گۆت: ( دخوازین كو ئه‌مریكا و جڤاكێ نیڤده‌وله‌تى ، عیراقێ بو ئه‌نجامدانا گوتوبێژان و دوركه‌فتنا سه‌ربازى پالبده‌ن ، و هه‌رێما كوردستانێ شه‌ر و ئالوزى نه‌ڤێن ژبه‌ركو چوو ئاریشه‌یان چاره‌سه‌ر ناكه‌ن ، به‌لكو هه‌رێما كوردستانێ دخوازیت كو هه‌موو ئاریشه‌یێن خوه ل گه‌ل به‌غدا دچارچوڤێ ده‌ستوورێ عیراقێ دا چاره‌سه‌ر بكه‌ت).
ئەڤرۆ نیۆز:
رۆژناما (ئەلقودس ئەلعەرەبی) دراپۆرته‌كا خوه‌دا ئاماژێ ب زێده‌بوونا وێنێن رێبه‌رێ ئیرانی یێ به‌رێ ( خومه‌ینی) ل باژێرێ كه‌ركووكێ و زێده‌بوونا ده‌ستهه‌لاتا حه‌شدا شه‌عبی ل وی باژێری دكه‌ت.
رۆژناما ناڤبری دراپۆرتا خوه‌دا دبێژیت كارێن توندوتیژیێ ل كه‌ركووكێ دهێنه ئه‌نجامدان ژ ده‌سته‌سه‌ركرن وره‌ڤاندن ولێدانا وه‌لاتیان و ئاماژێ دده‌ت كو ئه‌ڤ كریاره پشتی كونترۆلكرنا كه‌ركووكێ ژلایێ له‌شكرێ عیراقی و حه‌شدا شه‌عبی یێن به‌لاڤبووین.
رۆژنامێ ژ زارده‌ڤێ ئه‌فسه‌ره‌كێ پۆلیسێن كه‌ركووكێ ڤه‌گوهاستیه كو سه‌رپێچیێن حه‌شدا شه‌عبی دناڤ تاخێن باژێری دا یێن به‌ر ب زێده‌بوونێ ڤه دچن و رۆژانه روودانێن رێكخستی ل دژی وه‌لاتیان دهێنه ئه‌نجامدان ب تایبه‌تی دژی وه‌لاتیێن كورد وعه‌ره‌بێن سونه و ل گه‌له‌ك حاله‌تان نه ب تنێ حه‌شدا شه‌عبی ڤان كریاران ئه‌نجام دده‌ت، به‌لكو گه‌له‌ك جاران له‌شكرێ عیراقی ژی ب هێجه‌تا چه‌سپاندنا قانوونێ ب ڤان كریاران رادبیت.
ئەڤرۆ نیۆز،زنار تۆڤی:
موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ دیارکر:ئەڤرۆ ئەینیێ 3.11.2017 ژ ئەگەرێ روودانەکا ترافیكێ ل سه‌ر جادا گشتى یا دناڤبه‌را قه‌زا شێخان و دهۆكێ دا چار كه‌سان گیانێ خۆ ژ ده‌ست دایە.
ناڤهاتی گوت ژی:ئەڤرۆ ئەینیێ ٢٠١٧/١١/٣ ل دەمژمێر ١٢:٠٠ نیڤرۆ ل سەر جادا سەرەکی یا ناڤبەرا قەزا شێخان و پارێزگەها دهوکێ دا و ل سێریانا ناحیا باعەدرێ روودانەک ژ جورێ لێگدان دناڤبەرا دو ترمبێلێن بارهەلگر ژ جورێن تریلەکا تانکە و پیکاب تویوتا دا روودایە و د ئەنجامێ وێ روودانێ دا (4 ) کەسان گیانێ خو ژدەست دایە،هەروەسا زیانێن ماددی ژی بەر ب هەردو ترومبێلان کەفتینە.
ئه‌ڤرۆ نیوز ، نه‌وزاد هلۆرى:
ب مه‌ره‌ما گه‌هشتن ب رێیا چاره‌سه‌ریا پرسێن سیاسى دناڤبه‌را هه‌رێما كوردستان و عیراقێ دا ، شانده‌كێ سه‌ربازی یێ هه‌رێما كوردستانێ ل گه‌ل شانده‌كێ سه‌ربازی یێ عیراقێ ب چاڤدێریا لایه‌نێ ئه‌مریكى ل موسل د كومبوونێ دانه.
ل گوره‌ى زانیاریێن ئه‌ڤرۆ نیوز وه‌سا بریاره د كومبوونێ دا چه‌ند پێشنیاره‌كێن نوو،بۆ ب رێڤه‌چوونا دانوستاندنان بهێنه ده‌ركرن ، ژبه‌ركو هه‌تا نوکە هه‌ولێر و به‌غدا ژ بۆ چاره‌سه‌ركرنا ئاریشه‌یێن سیاسى نه‌گه‌هشتینه چو رێكه‌فتنان ب تایبه‌تى ژ بۆ نه‌هێلانا سۆپایێ عیراقێ ل ده‌ڤه‌رێن كوردستانیێن ده‌رڤه‌ی كارگێریا هه‌رێما كوردستانێ.
كومبوونا هه‌ردو لایان د ده‌مه‌كێ دایه كو دوهى وه‌زاره‌تا پێشمه‌رگه‌ى د راگه‌هاندنه‌كێ دا به‌رسڤا حوکمه‌تا عیراقێ دایە و ره‌دكریە كو چو رێكکه‌فتن دناڤبه‌را هه‌ولێر و به‌غدا بۆ چاره‌سه‌ركرنا ئاریشه‌یان هاتبیته كرن.
نيشاندان