سەرۆك مەسعود بارزانی ل گەل وەزیر و ئەندامێن فراكسیۆنا پارتی دیموكراتی كوردستان ل جڤاتا نوونەرێن ئیراقێ و بەرپرسێن پارتی ل بەغدا كۆمبوو و ڕاگەهاند: پێدڤیە مافێن دستووری یێن قەوارەیێ قانوونی و دستووری یێ كوردستانێ و گەلێ وی یێ پاراستی بیت.
ب گۆرەی بەیاننامەیەكا بارەگەهێ بارزانی، د كۆمبوونێ دا ڕەوشا سیاسی و دووماهی پێشهات هاتنە باسكرن.
د بەیاننامەیا بارەگەهێ بارزانی هاتیە، د. فوئاد حسێن وەزیرێ دەرڤەیێ ئیراقێ و ئەندامێ مەكتەبا سیاسی یا پارتی دیموكراتی كوردستان باس ل بەرهەڤیێن هەلبژارتنێن جڤاتێن پارێزگەهان و وان قانوونان كر كو ل ڤی وەرزێ جڤاتا نوونەرێن ئیراقێ دێ دانوستاندن ل سەر هێنە كرن، ژ وان ژی قانوونا پەترۆل و غازێ، قانوونا جڤاتا فیدرالی و قانوونا دادگەها فیدرالی.
سەرۆك بارزانی د كۆمبوونێ دا بۆ بەرهەڤبوویان ئاخڤت و گوت» ئەم خودان پرسەكا ڕەواینە، د هەموو قۆناغان ژی دا د پڕۆسەیا سیاسی دا، بەردەوام د پێگیرین ب هەرسێ بنەمایێن لهەڤهاتنێ و هەڤپشكیێ و هەڤسەنگیێ».
سەرۆك بارزانی د پشكەكا دی یا ئاخڤتنێن خوە دا ڕاگەهاند» پێدڤیە مافێن دستووری یێن قەوارەیێ قانوونی و دستووری یێ كوردستانێ و گەلێ وێ د پاراستی بن، چونكە ئەڤ هەرێمە بەرهەمێ خەباتەكا دوور و درێژە ژ پێخەمەت ئازادیێ».

سەرۆك مەسعود بارزانی ل سالڤەگەرا 77 یا دامەزراندنا پارتی پەیامەك بەلاڤكر و تێدا ڕاگەهاند، پارتی و ڕێبازا بارزانی ل دەمێن بۆری و نوكە و ل پاشەڕۆژێ بەردەوام جهێ ئومێدێ و دەست و بازێن ب هێز یێن كوردستانێ و پارێزەر و بەرگریكارێن دۆزا ڕەوا یێن گەلێ كوردستانێ نە.
سەرۆك بارزانی د پەیاما خوە دا پیرۆزباهی ل خێزانێن سەربلندێن شەهیدان و پێشمەرگێن قەهرەمان و سەركردایەتی و كادر و ئەندام و لایەنگرێن پارتی و هەموو خەلكێ كوردستانێ دگەت و دبێژیت» ب ڤێ هەلكەفتێ من پێزانین بۆ خەبات و قوربانیدانا جەماوەرێ پارتی هەیە كو ل قۆناغێن دژوار دا هەردەم هێڤێنێ خۆڕاگری و ب هێزتربوونا گەلێ كوردستانێ بوون».

جێگرێ سەرۆكێ پارتی دیموكراتی كوردستان، نێچیرڤان بارزانی ب هەلكەفتا 77 سالیا دامەزراندنا پارتی پەیانەما پیرۆزباهیێ بەلاڤكر و تێدا دبێژیت: شانازیە بۆ پارتی كو پشتی ڤی ژیێ درێژ، هێشتا ل مەیدانا خەباتێ یا بەردەوامە و نوونەرایەتیا خەلكێ كوردستانێ دكەت.
دیاركر ژی، ئەڤرۆ هندی دیرۆك و مەزنی و قوربانیدانا پارتی، ئەرك و بەرپرسیارەتیا پارتی ژی یا دیرۆكی و مەزنە، لەوما پێدڤیە وەكو بەردەوام ئەرك و بەرپرسیارەتیا خوە بجهبینیت و كۆمكەرا هەموویان و دەستپێشخەر بیت بۆ چارەسەریێ و دەربازكرنا كێشە و قەیرانان، پارێزەر و پێشەنگا تەبایی و ئێكڕێزیێ و پێكڤەبوونێ و هەڤدو قبوولكرن و هاریكاریێ بیت، ڕۆلێ كارا و كاریگەرێ خوە د پاراستنا ئازادیێ و دیموكراسیێ و ماف و دەستكەفتێن دستووری یێن گەلێ كوردستانێ و چەسپاندنا فیدرالیێ دا بگێریت.

جێگرێ سەرۆكێ پارتی دیموكراتی كوردستان، مەسرور بارزانی ل سالڤەگەرا 77 یا دامەزراندنا پارتی پەیامەك بەلاڤكر و تێدا هاتیە: پارتی، حزبا وەرگرتنا بەرپرسیارەتیێن مەزنە و ب هێز ڕاگرتنا ئیرادەیا كوردستانیانە. هەروەسا گوت: پارتی چو جاران حزبا ناوچەیەك و دەڤەرەكا دیاركری یا كوردستانێ ب تنێ نەبوو، بەلكو ل دەمێ دامەزراندنا وێ، هەموو سنوورەێن ناوچەیی دەربازكرن و بوو بزاڤەكا جەماوەری یا كوردستانی و داكوكیكارا ب هێز ژ دەستكەفتێن نیشتمانی و بهایێن ئازادیێ و دیموكراسیێ و پاراستنا پێكڤەژیانا كوردستانێ یە، هەروەسا تێدا هاتیە: پارتی حزبا وەرگرتنا بەرپرسیارەتیێن مەزنە و ب هێز ڕاگرتنا ئیرادەیا كوردستانیانە و هەتا ئەڤرۆ یا بەردەوامە ل پێشەنگایەتی و پێشڕەوایەتیكرنا خەلكێ كوردستانێ ژ پێخەمەت پاراستنا قەوارەیێ نیشتمانی و دستووری یێ هەرێما كوردستانێ.

سەرۆكێ حوكمەتا هەرێما كوردستانێ و سەرۆكێ ئیماراتێ دوپاتیێ ل گرنگیا ب هێزكرنا هاریكاریێ و هەماهەنگیێ د ناڤبەرا هەرێما كوردستانێ و ئیماراتێ دكەن.
مەسرور بارزانی، سەرۆكێ حوكمەتا هەرێما كوردستانێ ل باژێرێ ئەبو زەبی، ل گەل شێخ محەمەد بن زاید ئال نەهیان سەرۆكێ ئیماراتێ كۆمبوو.
د كۆمبوونەكێ دا دانوستاندن ل دۆر پێشڤەبرنا پەیوەندیێن دۆستانە د ناڤبەرا دەولەتا ئیماراتێش وهەرێما كوردستانێ هاتە كرن و دوپاتی ل گرنگیا ب هێزكرنا هاریكاریێ و هەماهەنگیێ د ناڤبەرا هەردو ئالیان د هەموو بواراندا هاتەكرن.
د تەوەرەكێ دی یێ كۆمبوونێ دا، ڕەوشا گشتی یا ئیراقێ و دەڤەرێ و چەند پرسێن جهێ گرنگیا هەڤپشك هاتنە باسكرن.

سەرۆكێ حوكمەتا هەرێما كوردستانێ ل ڕێوڕەسمێ خەلاتكرنا قوتابیێن ئێكێ ل سەر ئاستێ كوردستانێ، پیرۆزباهی ل قوتابیان كر و هیڤی خواست ل هەموو قوناغێن داهاتی یێن ژیانێ بەختەوەر و سەركەفتی بن.
د پشكەكا پەیڤا سەرۆكێ حوكمەتا هەرێمێ دا هاتیە» كەرتێ پەروەردێ و فێركرنێ بەردەوام جهێ گرنگیا من و جڤاتا وەزیران بوو، مە ل ڕەوشێن دژوار وەكو سەردەمێ كورۆنا و ل ڕەوشێن دژوار یێن ئابۆری و دارایی بزاڤكر هەموو شیانێن خوە بكاربینین تاكو ئەڤ كەرتە بەردەوام بیت».
دیاركر ژی» مە بۆچوونەكا ڕۆهن بۆ پاشەڕۆژا كوردستانێ هەیە د هەموو بواراندا، مە بۆ پاشەڕۆژێ كوردستانەكا پێشكەفتی و خودان ئابۆرەكێ هەموو جۆر و خودان چاندنەكا پێشكەفتی و خودان ژینگەهەكا پاقژ و نیشتمانەكێ ئاڤەدان دڤێت، مە وەلاتەك دڤێت خودان ژێرخانەیەكا ب هێز بیت و یێ سەقامگیر بیت و هەموو ئالیەك تێدا ب بەختەوەری و ب ڕێز و ئاشتی بژین، بەلێ دزانم ئەڤە بێی سیستەمەكێ ب هێز یێ پەروەردێ و فێركرنێ ئەستەمە، لەوما بەردەوام من دوپاتی ل سەر گرنگیا پێشخستنا ڤی بواری كریە، ب تایبەتی ژی ژبلی فێركرنا زانستێ، دووپاتیێ ل سەر گرنگیا پەروەردێ دكەم .پەروەردەیا نفشێن داهاتی و ئەندامێن جڤاكێ مە ل باخچەیێن ساڤایان و قوتابخانەیان دست پێ دكەت. هەكە مە بڤێت ئەندامێن جڤاكێ مە ل پاشەڕۆژێ هەستێ نیشتمانپەروەری و خوەشتڤیا خەلكی و ئاخێ ل دەف هەبیت، پێدڤیە ل قوتابخانەیان دەست ب وێ پەروەردەیێ بكەین».
دیاركر ژی» بەردەوام ل گەل شاندێ وان وەلاتێن كو ئەزموونەكا سەركەفتی د ڤی بواری دا هەی دئاخڤم، دوپاتیێ ل سەر هاریكاریێ بۆ ڤی بواری و مفا وەرگرتنێ ژ ئەزموونا وان دكەم، هەكە خودێ حەز بكەت، ب پشتەڤانی و پشكداریا كارا یا ئالیێن پەیوەندیدار دێ بزاڤێ كەین دڤی بواری دا پێنگاڤێن كریاری بهاڤێژین، چونكە ب دیتنا من پێگەهاندنا مرۆڤی و شیانێن وی، بنەما و بناغەیێ هەموو ئاڤەدانی و پێشكەفتنێن دی یە».
هەروەسا گوت» مامۆستایێن مە یێن خوەشتڤی، بۆ پێشئێخستنا بوارێ پەروەردەیێ و فێركرنێ ژی، پێدڤیە ب هەمان گیانێ نیشتمانپەروەریێ بەردەوام بن و ب زانست و پێزانینێن نوو بهێنە زەنگینكرن و مەشق و ڕاهێنانێن نوو وەربگرن. مامۆستایێن مە یێن ب ڕێز دێ داینامۆیێ وێ گورانكاریێ بن كو ئەم ب نیازین د ڤی كەرتی دا بجهبینین.ل ڤێرێ دا ژی سەرەرای دەستخوەشیێ وپێزانینێ پشتەڤانیا خوە بۆ بدەستڤەئینانا هەموو ماف و داخوازیێن وان دوبارە دكەین».

دوهی دوشەمبی 14/8/2023 مەسرور بارزانی، سەرۆكێ حوكمەتا هەرێما كوردستانێ سەرەدانا پارێزگەها دهۆكێ كر و ژ نێزیك گوه ل داخوازیێن خەلكێ كۆمەكا تاخێن ناڤ باژێرێ دهۆكێ بوو.
ئێك ژ تاخێن دهۆكێ كو سەرۆكێ حوكمەتا هەرێمێ سەرەدانا وی كری، تاخێ مالتا بوو، ل گەل تەخ و چینێن وی تاخی كۆمبوو و گوت» ب فەرمانا سەرۆك بارزانی هاتیمە سەرەدانا هەوە بكەم، ئەوا دشیانێن مە دا بیت وەكو حوكمەت دێ د خزمەتا تاخێن هەژاران دا بین».
ئێك ژ داخوازیێن تاخێ مالتا دروستكرنا ڕێكێن تاخێ وان بوو، سەرۆكێ حوكمەتێ سۆز دا كو هەموو داخوازیێن وان هێنە بجهئینان.
سەرۆكێ حوكمەتا هەرێمێ د سەرەدانا خوە دا بۆ ناڤ باژێرێ دهۆكێ ل گەل وەلاتیێن تاخێن بەرۆشكی، رەزا و مالتا كۆمبوو و ژ نێزیك گوه ل داخوازیێن وان گرت. سەرۆكێ حوكمەتا هەرێمێ، پارێزگەرێ دهۆكێ ڕاسپارد هەر چ یا پێدڤیە بۆ ئاكنجیێن تاخێن دهۆكێ بۆ بهێتە كرن.

جێگرێ سەرۆكێ پارتی دیموكراتی كوردستان، مەسرور بارزانی سەرەدانا مەكتەبا ڕێكخستنا پارتی دیموكراتی كوردستان ل پارێزگەها دهۆكێ كر.
ئارمانج ژ سەرەدانا جێگرێ سەرۆكێ پارتی دیموكراتی كوردستان بۆ مەكتەبا ڕێكخستنا پارتی ل دهۆكێ، كۆمبوون و دانوستاندن بوو سەبارەت بەرنامە و كار و پلان و پڕۆژەیێن پارتی.
پشتی كۆنگرەیێ 14، پارتی دیموكراتی كوردستان ل پارێزگەها دهۆكێ ژی مەكتەبا ڕێكخستنێ ڤەكر، ب مەبەستا زێدەتر گرنگیدان ب وێ دەڤەرێ و ئاگەهداربوون ژ ڕەوشا خەلكی.
پشتی كۆنگرەیێ 14 یێ پارتی، پشتیوان سادق ئەندامێ مەكتەبا سیاسی وەكو بەرپرسێ مەكتەبا ڕێكخستنێ یا پارتی دیموكراتی كوردستان ل پارێزگەها دهۆكێ هاتیە دەستنیشانكرن.

پەیڤدارێ حوكمەتا هەرێما كوردستانێ ڕاگەهاند: ل ڕۆژا سێشەمبی 15/8/2023 شاندەكێ حوكمەتا هەرێما كوردستانێ دێ سەرەدانا بەغدا كەت و ئاماژەكر ژی ل دەمێ گەهشتنا بودجەی ژ بەغدا دێ مووچە ژ كارێن بەراهیێ بیت .
پێشەوا هەورامانی، پەیڤدارێ حوكمەتا هەرێما كوردستانێ گوت» بابەتێ قانوونا بودجەیا گشتی یا ئیراقێ دێ بابەتێ دانوستاندنێن شاندێ حوكمەتا هەرێما كوردستانێ و حوكمەتا ئیراقێ بیت و هەرێما كوردستانێ هەموو ئەركێن سەر ملێن خوە بجهئیناینە و چاڤەڕێ هنارتنا پشكا بودجەیا هەرێما كوردستانێ دكەین».
پێشەوا هەورامانی گوت ژی» مووچەیێن وەلاتیێن مە دێ ژ كارێن بەراهیێ بیت ل دەمێ گەهشتنا بودجەی ژ بەغدا».
سەبارەت سەرەدانا شاندێ حوكمەتا هەرێما كوردستانێ بۆ بەغدا، پەیڤدارێ حوكمەتا هەرێمێ دبێژیت» بەرێز سەرۆكێ حوكمەتا هەرێما كوردستانێ ئالیێن پەیوەندارێن حوكمەتا هەرێمێ ڕاسپاردینە بۆ وێ چەندێ هەموو هاریكاریەكێ ل گەل تیمێن تەكنیكی یێن ئیراقێ بكەن و هیچ پرسیارەك بێ بەرسڤ نەمینیت».
هەروەسا دیاركر» ڕۆژا ئێكشەمبیا داهاتی ژی شاندەكێ حوكمەتا هەرێما كوردستانێ بۆ دانوستاندنێ ل سەر قانوونا پەترۆل و غازێ دێ سەرەدانا بەغدا كەت و هەرێما كوردستانێ دخوازیت دستوور بنەما بیت د بابەتێ پەترۆل و غازێ دا، كو دێ سێ ئالیێن سەرەكی د قانوونا پەترۆل و غازێ دا دانوستاندنان كەن ئەوژی حوكمەتا هەرێما كوردستانێ، پارێزگەهێن بەرهەمئینەرێن پەترۆلێ و حوكمەتا ئیراقێ».
هەڤدەم باس ل وێ چەندێ ژی كر» هەرێما كوردستانێ دخوازیت قانوونەك بۆ پەترۆل و غازێ بهێتە دەركرن كو هیچ ئالیەك تێدا هەست ب غەدرێ نەكەت و پێدڤیە ئالیێن كوردستانی د ڤی بابەتی دا ئێكدەنگ بن و خواستا حوكمەتا هەرێما كوردستانێ ئەوە ئەزموونا قانوونا بودجەی د پرسا قانوونا پەترۆل و غازێ دا ل ناڤ هۆلا جڤاتا نوونەران دا دوبارە نەكەینەڤە» .

دهۆك، لەزگین جوقی

بەرپرسێ‌ ڕێكخستنا لقێ‌ 17 یێ پارتی دیموكراتی كوردستان ل شنگالێ ڕاگەهاند كو گرۆپێن نەشەرعی و میلیشیێن د ناڤ باژێرێ شنگالێ دا هەموو بزاڤان دكەن ئاوارە بزڤرن بۆ شنگالێ تاكو بۆ هەلبژارتنێن جڤاتێن پارێزگەهێن ئیراقێ دەنگێن وان بێخنە د بەرژوەندیا خوە دا ،هەروەسا دیاركر ژی كو ل شنگالێ هەژمارەكا پارت وگرۆپان هاتینە پێكئێنان ب ناڤێ‌ ئێزدیان كو ئەو هەموو بۆ خاپاندنا خەلكێ‌ شنگالێ كار دكەن.
قاسم ڕەشۆ، بەرپرسێ‌ ڕێكخستنا لقێ‌ 17 یێ پارتی دیموكراتی كوردستان ل شنگالێ دیاركر» هەلبژارتنێن جڤاتێن پارێزگەهێن ئیراقێ بۆ قەزا شنگالێ د چارەنڤیسازن وهەردەمێ‌ بەربژارێن پارتی دیموكراتی كوردستان بچنە جڤاتا پارێزگەها نەینەوا بیگومان دێ‌ ڕەوشا شنگالێ چارەسەركەن ودێ‌ دەستێ‌ ئاڤەدانیێ گەهیتە شنگالێ وخەلكێ‌ وێ یێ زیاندار ژی دێ هێتە قەرەبووكرن وئاوارە دێ‌ ڤەگەرنە شنگالێ و د نوكە دا پارتی دیموكراتی كوردستان ل شنگالێ دەست ب بەرهەڤیان بۆ هەلبژارتنێن جڤاتا پارێزگەها نەینەوا كریە ونوكە ناڤێن ئاوارەیان یێن دهێنە تۆماركرن ودێ‌ ئاوارە ل كەمپان دەنگێ‌ خوە دەن هەروەسا ئەو ئاوارەیێن چووینە شنگالێ ژی دێ‌ هەر ل شنگالێ دەنگێن خوە دەن».
ناڤبری خویاكر ژی نوكە ب ڕیێا 18 گرۆپان دناڤ ئاوارەیان دا كار دهێتە كرن كو ئاوارە بچن ناڤێن خوە تۆمار بكەن بۆ پشكداریكرنێ د هەلبژارتنێن جڤاتێن پارێزگەهان دا و دگەل كۆمسیۆنا بلند یا سەربخوە یا هەلبژارتنان ل ئیراقێ و ڕێڤەبەریا كۆچ و كۆچبەران گرۆپ هاتینە پێكئێنان بۆ هاندانا ئاوارەیان كو بچن ناڤێن خوە تۆمار بكەن تاكو ل ڕۆژا ئەنجامدانا هەلبژارتنان ل 18/12/2023 ب ساناهی بشێن دەنگێن خوە بدەن «.
بەرپرسێ‌ ڕێكخستنا لقێ‌ 17 یێ پارتی دیموكراتی كوردستان ل شنگالێ ئەو ژی گوت» گرۆپێن نەشەرعی و میلیشیێن د ناڤ شنگالێ دا هەموو بزاڤان دكەن ئاوارە بزڤرن شنگالێ دا كو بۆ هەلبژارتنان بكاربینن ونوكە گرۆپێن نەشەرعی و میلیشیا بەردەوام د ناڤ شنگال دا كۆمبوونان دكەن وهەموو بزاڤان ژی دكەن ئاوارە ژ كەمپان بەر ب شنگالێ ڤەگەرن داكو خەلكێ‌ بێخنە دبن فشارا خوە دا و ل ڕۆژا دەنگدانێ فشاران ل وەلاتیان بكەن ودەنگان بێخنە د بەرژوەندیا خوە دا «.
قاسم ڕەشۆئاماژەكر ژی»پارتا ئازادی دیموكراتی ئێزدی كو ب ناڤێ‌ ئێزدیان پشتی جینۆسایدا شنگالێ ل سالا 2014ێ‌ د ناڤ شنگالێ دا هاتیە دروستكرن كو هزر وبیرێن وی پارتی یێن گرۆپێن نەشەرعی نە و ئەڤ پارتا ب ناڤێ ئێزدیان ژئالیێ وان گرۆپان ڤە هاتیە دروستكرن و پارتا پشكەفتنا ئێزدیان و بزاڤا ئێزدیان ل سەر بدەستڤە ئینانا كورسیا كۆتا ئێزدیان كار دكەن و هەژمارەكا پارتێن سیاسی ب ناڤێ‌ ئێزدیان ل شنگالێ هاتینە دروستكرن كو كار بۆ خاپاندنا خەلكێ‌ شنگالێ دكەن وچەندێن ئالایێن هەمەجۆر د ناڤ شنگالێ دا بلندكرینە وهەموو بزاڤان دكەن خەلكی ب خاپینن لێ‌ خەلكێ‌ شنگالێ یێ هشیارە و چو جاران ناهێتە خاپاندن وئەو پارتێن دروستكری چو جاران نەشێن شەرعیەتێ‌ ل شنگالێ ب دەستڤەبینن».