ئەڤرو نیوز ، نەوزاد زادە ھلۆری:
ئەڤرۆ د دوو دەم و جھێن ژێکجودا ل سنوورێ قەزا شێخان پێنج کەس بونە قوربانی ، ژ وانان ئافرەتەکێ گیانی خوە ژ دەستدایە.
دلشاد روبەتکی ژ راگەھاندنا ھاتن و چونا شێخان بۆ ئەڤرۆ نیوز گۆت: (ئەڤرۆ رۆژا ھەینی ل دوو دەم و جھێن ژێکجودا دوو روودانێن ھاتن و چونێ ل سنوورێ قەزا شێخان درۆست بوینە و د ئەنجام دا پێنج کەس بوینە قوربانی)
زێدەتر گۆت: (روودانا ئێکێ ل سەنتەرێ کومەلگەھا چرەی درۆست بوویە ژ جورێ لێکدان و ئافرەتەکێ گیانی خوە ژ دەستدایە ، و روودانا دوویێ ژی ل نێزیک پەرستگەھا لالش درۆست بوویە و د ئەنجام دا چوار کەس ژ ئێک خێزان برینداربووينه  و برینا دوو کەسان ژی گرانە و بۆ نەخوشخانا تەنگاڤیا دھۆک ھاتینە رەوانەکرن)

ئەڤرو نیوز ، نەوزاد ھلۆری:
وەغەرکرنا نەوشێروان موستەفا رێکخەرێ گشتیێ تەڤگەرا گۆڕان د دەمەکێ دایە کو چەندین پرسێن سیاسی ل ھەرێما کوردستانێ دھەلاویستی ماينە ، و گۆران وەکو یاریکەرەکێ سەرەکی پشکدارێ ئەوان پرسایە ، بەرپرسێ مەکویا گۆڕان ل دھوکێ ژی ددەتن دیارکرن کو وەغەرکرنا نەوشێروان چوو ژ ھەڵویست و بەرنامەیێ گۆران ناگوھریت لسەر پرسێن سیاسی.

موئەیەد ئەحمەد بەرپرسێ مەکویا تەڤگەران گۆڕان ل دھۆکێ بۆ ئەڤرو نیوز گۆت: (ئەم وەکو مەکویا گۆڕان ل دھوکێ ب نوچەیێ وەغەرکرنا “نەوشێروان موستەفا “رێکخەرێ گشتیێ تەڤگەرا گۆڕان خەمباربووین و ژ خودێ دخوازین کو جھێ وی بحەشت بیت ، ئەم وەکو مەیا گۆران ل دھوکێ سوبەھی ب پشکداریا شاندەکێ پێکھاتی ژ سەرکرداتیا گۆڕان ل دھۆک دێ د رێورسمێن ڤەشارتنا تەرمێ نەوشێروان ل سلێمانیێ پشکداربین ، و دپشترا دێ بریارێ دەین کا دێ ل دھۆک پرسە بو نەوشێروان ھێتەدانان یان نە)
زێدەتر گۆت: ( وەغەرکرنا نەوشێروان چوو ژ ھەلویست و بەرنامەیێ گۆران ل ھەرێما کوردستانێ ناگوھریت و گۆران دێ لسەر ھەمان بەرنامەیێ نەوشێروان و گۆڕان بۆ پرسێن ھەلاویستیێن سیاسی و چاکسازی بەردەوام بیت و چوو سستی ژی ناکەڤنە گۆڕانخوازان ل ھەرێما کوردستانێ ب گشتی و دھۆکێ ب تایبەتی ، و دێ لسەر ھەمان میتود و بەرنامە و ھەلویستێن بەرا وەغەرا نەوشێروان بەردەوام بین و چوو گۆرانکاری ژی ناکەڤنە شێوازێ ب رێڤەبرن و سیاسەتا گۆڕان ل دھوکێ ژی)
دھێتە زانین ئەڤرۆ سپێدێ میدیا گۆڕان ل زاردەڤێ شورەش حاجی ئاخفتنکەرێ تەڤگەرا گۆڕان نوچەیێ وەغەرکرنا نەوشێروان موستەفا رێکخەرێ گشتیێ گۆڕان بەلاڤکر و راگەھاند کو ئەڤرۆ ل مالا خوە ل دەمژمێر ھەشتێ سپێدێ نەوشێروان موستەفا وەغەرکریە.

ئه‌ڤرۆ نيوز:

سه‌رۆكێ حوكمه‌تا هه‌رێما كوردستانێ، نێچيرڤان بارزانى، برۆسكه‌كا سه‌ره‌خۆشيێ ئاراسته‌يى خێزان و كه‌سوكار و هه‌ڤال و ئه‌ندامێن بزاڤا گۆڕان كر ب هه‌لكه‌فتا وه‌غه‌را دووماهيێ يا نه‌وشيروان مسته‌فايى.

ده‌قێ برۆسكا سه‌ره‌خۆشيێ:

به‌ڕێزان خانه‌واده‌ و كه‌سوكارى خوالێخۆشبوو نه‌وشیروان مسته‌فا،

به‌ڕێزان له‌ بزووتنه‌وه‌ى گۆڕان،

به‌بۆنه‌ى كۆچى دواییى خوالێخۆشبوو نه‌وشیروان مسته‌فاوه‌، پرسه‌ و سه‌ره‌خۆشى له‌ ئه‌ندامانى خانه‌واده‌ و كه‌سوكار و دۆست و هاوڕێیانى به‌ڕێزیان و بزووتنه‌وه‌ى گۆڕان ده‌كه‌م. هاوسۆز و به‌شدارى خه‌متانم، خواى گه‌وره‌ خوالێخۆشبوو بخاته‌ به‌ر ڕه‌حمه‌تى خۆى. هیوادارم بزووتنه‌وه‌ى گۆڕان و لایه‌نگرانى خوالێخۆشبوو نه‌وشیروان مسته‌فا بۆ خزمه‌تى كوردستان و ئامانجه‌ هاوبه‌شه‌كانى گه‌له‌كه‌مان به‌رده‌وام بن.

نێچیرڤان بارزانى
سه‌رۆك وه‌زیرانى هه‌رێمى كوردستان
19/5/2017

ئه‌ڤرۆ نيوز:

مه‌كته‌با سياسى يا ئێكه‌تى نشتيمانى كوردستان راگه‌هاندنه‌ك ب هه‌لكه‌فتا وه‌غه‌ركرنا نه‌وشيروان مسته‌فا به‌لاڤكر و تێدا داخوازا ئێكگرتنا خوه‌ و بزاڤا گۆڕان كريه‌.