ئەڤرۆ

سەرۆكێ حوكمەتا هەرێما كوردستانێ، مەسرور بارزانی ب هەلكەقتا ڕۆژا جیهانی یا پالەیان، د پەیامەكێ دا ڕاگەهاند: حوكمەتا هەرێما كوردستانێ دێ بەردەوام بیت د پرۆسەیا چاكسازیان دا ژ پێخەمەت باشتركرنا ڕەوشا پالەیێن كوردستانێ.
سەرۆكێ حوكمەتا هەرێما كوردستانێ د پەیاما خوە دا گوت» ب هەلكەفتا ڕۆژا جیهانی یا پالەیان، گەرمترین پیرۆزباهیان ئاراستەی پالەیێن كوردستانێ و ئیراقێ و جیهانێ دكەم. ب ڕیز و پێزانین ڤە ل ئەرك و زەحمەتی و ڕۆلێ گرنگ یێ پالەیێن كوردستانێ د ئاڤەدانكرن و گەشەپێدانا كوردستانێ دا دنێرین».
هەروەسا گوت ژی» حوكمەتا هەرێما كوردستانێ دێ بەردەوام بیت د پرۆسەیا چاكسازیێن خوە دا ژ پێخەمەت باشتركرنا ڕەوشا پالەیێن كوردستانێ، ژ ڤی ڕووی ڤە پەسەندكرنا قانوونا كاری ل هەرێما كوردستانێ ل دەمێ بۆری، پشكەكە ژ چاكسازیێن كابینەیا نەهێ د بوارێ باشتركرنا ژیان و مسۆگەركرنا مافێن پالەیان ژ ڕوویێ ساخلەمی و سلامەتیا پیشەیی و دابینكرنا مافێن وان یێن قانوونی و سنووردانان بۆ هەموو جۆرە ستەم و چەوساندنا پالەیان».

ئەڤرۆ

زنار تۆڤی:

د. نەوزاد هێتۆتی، پسپۆرێ زانستێن سیاسی ل زانكۆیا سەلاحەدین ل هەولێرێ، بۆ ڕۆژنامەیا (ئەڤرۆ) دبێژیت، هەكە ڕەوش ب ڤی ڕەنگێ نوكە بیت، دبیت هەلبژارتن ل هەرێما كوردستانێ نەهێنە كرن، ئانكو ئەگەرێن ئەنجام نەدانا هەلبژارتنان پترن ژ ئەنجامدانا وان، یا دیارە كو ڕێگریێن ل هەمبەر ڤێ پرۆسێ نە گەلەكن، بەلێ د ڕاستیدا ئێكەتیێ نەڤێت هەلبژارتن بهێنە ئەنجام دان، ئەگەرێن ڤی هەلوەستێ ئێكەتیێ ژی بۆ چەند خالان ڤەدگەرن، ژوان ترسا ئێكەتیێ ژ دەستدانا پێگەهێ وێ یێ جەماوەری هەیە، ب تایبەتی ل پارێزگەها سلێمانیێ، كو ئێكە ژ هۆكارێن خوەڤەدزینێ ژ پرۆسەیا هەلبژارتنان، دیارە پشتی ڕوودانێن 8 تەمووزێ و ئەو دابەشبوونا دناڤا ئێكەتیێ دا ڕوودایی، بوویە ئەگەرێ پتر پارچەبوونا وێ حزبێ و دهێتە چاڤەڕێكرن، گەلەك كاریگەری هەبیت ل سەر پێگەهێ ئێكەتیێ د پرۆسەیا دەنگدانێ دا.
ناڤهاتی گوت ژی» ئاریشەیێن ئێكەتیێ ل گەل پارتی، ئەگەرەكێ دی یە ئێكەتیێ پال ددەت، خوە ڤەدزیت ژ ئەنجامدانا هەلبژارتنان، یا دیارە ئاریشەیێن ئێكەتیێ ل گەل پارتی چ پەیوەندی ب پرس و ئاریشەیێن نەتەوەیی و هەروەسا داخوازیێن وێ یێن گرێدایی ب هەلبژارتنان ڤە نینن، ئەوا هەی پەیوەندی ب كۆمەكا پرسێن كەسی و حیزبی ڤە هەیە، دەستهەلاتا نوكە یا ئێكەتیێ پتر بەرێ وان ل بەغدایە نەكو پشتەڤانیكرنا هەرێمەكا ئێكگرتی یە، بەرپرسێن ئێكەتیێ بزاڤێ دكەن، هەرێمەكا دیتر ل سلێمانیێ دروست بكەن، یان وێ هەرێمێ بێخنە سەر بەغداڤە، بەلێ هەتا نوكە بەغدا ب وێ داخوازیا وان ڕازی نەبوویە و یا بەرهەڤ نینە مووچە و بودجەی بدەتە ئیدارا سلێمانیێ».
نەوزاد هێتۆتی هێشتا دبێژیت»خواندنا ئێكەتیێ بۆ پرۆسەیا سیاسی ل هەرێما كورستانێ ب وی ڕەنگیە كو لاوازبوونا هەرێمێ، ئانكو لاوازبوونا پارتی، ئانكو ئەنجام نەدانا هەلبژارتنان دێ بیتە ئەگەرێ لاوازبوونا سازیێن هەرێمێ و ل سەر ئاستێ ناڤخوەیی و ژ دەرڤە و دربەكێ ڕاستەوخوەیە ل شەرعیەتا سازیێن هەرێمێ، ئەڤە ژی، ئانكو دربەكە ل پارتی، دیسان ل سەر ئاستێ بەغدا ژی ئێكەتیێ گەلەك بزاڤكرن كو محەمەد شیاع سوودانی ڕێككەفتنێ ل گەل هەرێمێ نەكەت، بەلێ د سەركەفتی نەبوون، هەروەسا مەترسیێن ئەنجام نەدانا هەلبژارتنان ئەڤەنە، سازیێن هەرێما كوردستانێ شەرعیەتا قانوونی نامینیت، ژ بەر وێ چەندێ ئەو هەلبژارتنێن هاتینە كرن، ب تنێ بۆ چار سالان بووینە، پشتی وان چار سالان شەرعیەت و ڕەوایەتیا هەموو سازیێن هەرێمێ دێ كەڤنە بن پرسیارێ، هەروەسا ئەنجام نەدانا هەلبژارتنان دێ بیتە ئەگەرێ لاوازبوونا پرسێن دیموكراسیێ و سازیێن هەرێمێ دێ پاشڤەكێشانەكا مەزن ل سەر پرۆسەیا دیموكراسییێ هەبیت، ڤێ چەندێ دێ زیانەكا مەزن بۆ هەرێمێ هەبیت، د نوكە و د داهاتی دا».
خویاكر ژی» ئەگەرەكێ مەزن هەیە، هەكە هەلبژارتن نەهێنە ئەنجامدان، دۆستێن كوردان ب تایبەتی دەولەتێن ئورۆپی و ئەمریكا، ئێدی هاریكاریا هەرێمێ نەكەن و پتر فشاران ل سەر دروست بكەن و هەكە ڕەوش ب ڤی رەنگی بیت، دوور نینە پشتا خوە بدەنێ، دبیت دەولەتێن دۆست و هەڤپەیمان ژی مامەلە كرنێ ل گەل سازیێن هەرێمێ ڕابگرن و بەرهەڤ نەبن مامەلێ ل گەل بكەن هەتاكو هەلبژاتن دهێنە كرن، هەكە ئەڤە ڕوو بدەت، دیسان دێ زیانێن مەزن بۆ هەرێمێ هەبن، دادگەها فیدرالی ژی د چەند ڕۆژێن بهێن دا، دێ ل سەر پرسا درێژكرنا ژیێ ڤێ خۆلا پەرلەمانێ كوردستانێ كۆم بیت و ئێك ژ ئەگەرێن هەرە ب هێز ئەوە، كو وێ درێژكرنا ژیێ خۆلا پەرلەمانی ب نە قانوونی زانیت، ئەڤە دێ گەلەك ئاریشەیان بۆ هەرێمێ دروست كەت، دیسان دەستهەلاتا بەغدا دێ شێت بێژیتە هەرێمێ، ئەم د بەرهەڤ نینین مامەلێ ل گەل ڤێ دەستهەلاتێ بكەین».

ئەڤرۆ

سلێمانی، عەزیز هەورامی

سامان شالی، چاڤدێرێ سیاسی بۆ ڕۆژنامەیا ئەڤرۆ دبێژیت: ئەركێ حزب و ئالیێن سیاسی یە قەوارەیێ دەستووری یێ هەرێما كوردستانێ بپارێزن و گەشێ پێ بكەن. بەلێ مخابن حزب هەیە دخوازیت قەوارەیا مە بەر ب لاوازیێ ببەت و لاوازبوونا ڤی قەوارەی ئانكو لاوازبوونا هەموو كوردایە.
سامان شالی گوت ژی» بەردەوامیا ناكۆكیان مە لاواز دكەت بەرامبەر بەغدا و پێدڤیە شەرێ ڕاگەهاندنێ بهێتە ڕاوەستاندن، ئەم دەولەت نینین و دڤێت قەوارێ خوە بزانین و هەروەسا بزانین بەرژەوەندیێن وەلاتان ل گەل مە د چاوانن، وەلاتێن هەرێمی كوردستانەكا لاواز دڤێت و دخوازن ئابۆر و چاندن وپیشەسازیا مە لاواز بكەن، بەلێ وەلاتێن ئورۆپی و ئەمریكا داخواز ژ مە دكەن كاربكەین و ئارمانجا وان كوردستانەكا ب هێزە د چارچۆڤەیێ ئیراقێ دا، هەكە ئەڤ هەرێمە ژ دەست مە بچیت هەتا 100 سالێن دی ژی بدەستڤە نائینین».
خویاكر ژی» هەكە مە باوەری ب هەڤدو هەبیت دێ چارەسەری بۆكێشەیان ژی هەبیت و گرنگە تیما ئێكەتیێ بزڤریت بۆ كۆمبوونێن جڤاتا وەزیران و بەرنامەیێ حوكمەتێ بجهبینیت و ل سەر مێزا دانوستاندنێ ل سەر كێشەیان باخڤن ژبەركو كێشە وەسا د مەزن نینن».
سەبارەت هەلبژارتنان ژی دبێژیت» پێدڤیە هەلبژارتن ددەمێ خوە یێ دیاركری دا بهێنە ئەنجامدان، هەروەسا شەرێ ڕاگەهاندنێ ژی بهێتە ڕاگرتن و شاندێن دانوستاندكار بەردەوامبن تاكو دگەهنە ڕێككەفتنێ بۆ پاراستنا قەوارەیێ مە و بەرژەوەندیێن خەلكێ كوردستانێ و جارەكا دی ئێكگرتنا مالا كوردی بهێتە دروستكرن».
ب دیتنا ڤی چاڤدێرێ سیاسی گرنگە لژنەیەكا بلند ژ سەرۆكێن حزبان بهێتە پێكئینان و كۆمبوونێن دەوری هەبن و هەر كێشەیەكا هەبیت د كۆمبوونێن سەرۆك حزبان دا چارەسەری بۆ بهێتە دیتن و پێشنیازێن خوە بۆ حوكمەتێ وپەرلەمانی بهنێرن».

ئەڤرۆ

دهۆك، لەزگین جوقی

ئەندامەكێ‌ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕاگەهاند: فراكسیۆنێن كوردستانی ل جڤاتا نوونەرێن ئیراقێ داخوازا پێكئینانا لژنەیەكا ڤەكۆلینێ‌ ل سەر ڕوودانێن شنگالێ ژ سەرۆكێ‌ جڤاتێ كریە هەروەسا ڤەكۆلینەكا ئەمنی یا توند ل سەر هەموو كەسێن ڤەگەریاینە شنگالێ بهێتە كرن.
مەحما خەلیل، ئەندامێ‌ جڤاتا نوونەرێن ئیراقێ ژ فراكسیۆنا پارتی گوت» ئێزدیان شكەستن ب بزاڤێن وان گرۆپان ئینان یێن بزاڤا دروستكرنا فتنێ‌ دكەن و مە وەكو فراكسیۆنێن كوردستانی ل جڤاتا نوونەرێن ئیراقێ داخواز ژ سەرۆكێ‌ جڤاتێ كریە لژنەیەكێ‌ ل سەر ڕوودانیێن شنگالێ دروست بكەت وئەڤ لژنە ژی ل نێزیك دێ سەرەدانا شنگالێ كەت بۆ بەرهەڤكرنا ڕاپۆرتەكێ‌ بۆ جڤاتا نوونەران و ئەم ڕەت دكەین چوو مزگەفت ل شنگالێ هاتبنە سۆتن و دووپات دكەین كو شنگال جهێ پێكڤەژیانا هەموو ئایین و نەتەوەیێن جودایە «.
گوت ژی» ئەم د ڕژدین ل سەر پاراستنا ئێمناهیا شنگالێ و پێدڤیە ڕیگری ل دووبارەبوونا تیرۆرێ‌ و ڤەگەراندنا تیرۆرستێن داعشێ بهێتە كرن، پێرابۆنێن حوكمەتا ئیراقێ بۆ ئاساییكرنا ڕەوشا شنگالێ د لاوازن وئەڤە بوو ئەگەر كچەكا ڕزگاربوویا ئێزدی ل دەڤ لەشكرێ ئیراقێ سكالایێ‌ ل سەر داعشەكێ‌ ڤەگەریای شنگالێ تۆمار بكەت كو بەری چەند ڕۆژان ئەو كەسێ داعشی ڤەگەریایە شنگالێ وئەو كچ دبێژیت ئەو كەس دناڤ تیرۆرستێن داعشێ دا بوو وی دەستدریژی ل سەر وێ كریە».
مەحمای ڕۆهنكر» ئەم داخوازێ‌ ژحوكمەتا ئیراقێ دكەین ب ئەركێ‌ خوە ڕابیت و ڕێككەفتنا شنگالێ بجهبینیت و هەیبەتا قانوونێ ل شنگالێ بزڤرینیت وهەموو هزرێن داعش ژ شنگالێ دەربكەت وهەموو هێزێن بیانی و نەشەرعی ژی ل شنگالێ نەمینن «.
ئاماژەكر» مە داخواز كریە دەست ب ڤەكۆلینەكا ئەمنی یا توند بهێتە كرن ل سەر هەموو كەسێن ڤەگەریاینە شنگالێ وئەم ب پشتڕاستی ڤە دبێژین ئێزدی د پێگیرن ب پاراستنا پێكڤەژیانێ‌ ل شنگالێ و هەر كارەكێ‌ تیكدانێ‌ بهێتە كرن ژئالیێ هندەك كەسان ڤە دەربرینێ‌ ژ هەموو خەلكی ناكەت و داخواز دكەین ئێزدی نەهێنە تۆمەتباركرن و هەر كارەكێ‌ بهێتە كرن ڤەكۆلین ل سەر بهێتە كرن وئەنجامێن ڤەكۆلینی بۆ خەلكی بهێنە ئاشكراكرن هەر كەسەكێ‌ ژ قانوونێ دەركەڤت پێرابوون دگەلدا بهێنە وەرگرتن».

سەرۆك مەسعود بارزانی پێشوازی ل شاندەكێ هوداپار (پارتا دۆزا ئازاد) ب سەرۆكایەتیا زەكەریا یاپیچی ئوغلۆ كر.
د دیدارەكێدا ڕەوشا سیاسی یا دەڤەرێ هاتە باسكرن و بیروڕا ل دۆر چارەسەریا ئاشتیانە یا كێشەیان و بكارئینانا دانوستاندنێ و تێكگەهشتنێ د ناڤبەرا گەلێن دەڤەرێ دا هاتە ئالۆگۆكرن.
هەر د وێ كۆمبوونێ دا دوپاتی ل پێشڤەبرنا پەیوەندیان د ناڤبەرا پارتی دیموكراتی كوردستان و هوداپار دا هاتە كرن.

ل دووماهی كۆمبوونا جڤاتا وەزیرێن هەرێمێ ب سەرپەرشتیا مەسرور بارزانی سەرۆكێ حوكمەتا هەرێمێ دانوستاندن هاتنە كرن ل دۆر ئەنجامێن سەرەدانا تیما جڤاتا وەزیران بۆ ئالیێ قوباد تالەبانی جێگرێ سەرۆكێ حوكمەتێ، مەسرور بارزانی دووپاتكر كو مە چەندین جاران داخواز ژ جێگرێ سەرۆكێ حوكمەتێ و تیما ئێكەتیێ كریە بزڤرن بۆ كۆمبوونێن جڤاتا وەزیران و نوكە ژی جارەكادی داخواز دكەین بزڤرن و ئەركێن قانوونی و كارگێری یێن خوە ژپێخەمەت خزمەتكرنا وەلاتیان دا بجهبینن. هەر كێشە و گرفتەكا هەبیت كو ئارمانج ژێ خزمەتكرنا بەرژەوەندیا گشتی بیت، پێدڤیە ل كۆمبوونێن جڤاتا وەزیران دانوستاندن ل سەر بهێتە كرن و دووپاتكر كو دخوازین تیما ئێكەتیێ بزڤریت و هیڤیدارین د ئاستیێ بەرپرسیارەتیێ دا بن و ئەركێن خوە بجهبینن.

نڤیسینگەها سەرۆكێ حوكمەتا هەرێمێ ڕاگەهاند، ئەگەرێ كێشەیا دارایی ل سلێمانیێ ئەوە كو پرۆسەیا كۆمكرنا داهاتی یا زەلال نینە و ڕێك ژی ناهێتە دان چاڤدێریەكا ناڤەندی ل سەر وێ پرۆسەیێ هەبیت. هەروەسا دیاركر كو دەمەكە ڕاگەهاندن و كەسانێن نێزیكی قوباد تالەبانی، جێگرێ سەرۆكێ حوكمەتێ، پرۆپاگندێ دكەن كو (وەكو هەلوەستەك ژ پێخەمەت مووچەخۆرێن سلێمانیێ وی بایكۆتا كۆمبوونێن جڤاتا وەزیران كریە) بەلێ بەرگری ژ خەلكێ سلێمانیێ ئەركێ هەموو تیمێن وەزاری یە و هەكە ستەمەك بەرامبەر خەلكێ سلێمانیێ هەبیت، هەر وەزیرێن پارتی و گۆڕان و سوشیالیست قبوول ناكەن، لەوما بلا موزایەدە ل سەر خەلكێ سلێمانیێ نەهێتە كرن و جهێ چارەسەریا هەموو ڤان كێشەیان تنێ كۆمبوونێن جڤاتا وەزیرانە و هەكە قوباد تالەبانی و تیما وی هەست ب بەرپرسیاریێ بەرامبەر خەلكێ سلێمانیێ دكەن بلا بزڤرن بۆ كۆمبوونان و دانوستاندنێن ئاڤاكەر بكەن.

ئەڤرۆ

دوهی رۆژا شەمبی 29/4/2023 سەرۆك مەسعود بارزانی پێشوازی ل شاندەكێ هەڤپشك یێ نوونەرایەتیێن وەلاتان ل هەولێرێ كر، كو پێكهاتبوو ژ ڕۆزی كەیڤ قونسلا گشتی یا بریتانیا ل هەولێرێ و جاكۆ بیرندس قونسلێ گشتیێ هۆلەندا ل هەولێرێ و كلاوس سترێچێر قونسلێ گشتیێ ئەلمانیا ل هەولێرێ و تۆكلید بیگ بەرپرسێ نوونەرایەتیا ئێكەتیا ئورۆپا ل هەولێرێ و كاتریەن كرۆفت بەرپرسێ پشكا سیاسی ل قونسلخانەیا ئەمریكا ل هەولێرێ.
د دیدارەكێ دا بۆچوون سەبارەت دووماهی پێشهاتێن سیاسی و پرۆسەیا سیاسی ل هەرێما كوردستانێ و هەلبژارتنان هاتنە ئالۆگۆركرن و شاندێ مێهڤان سەرەرای دەستخوەشیێ بۆ دیاركرنا ژڤانێ ئەنجامدانا هەلبژارتنان ل هەرێما كوردستانێ، دوپاتی ل گرنگیا ئەنجامدانا هەلبژارتنان و پاراستنا بهایێن دیموكراسیێ و پاراستن و ب هێزكرنا بنەمایێن شەرعیەتێ ل هەرێما كوردستانێ كر.
هەر د وێ دیدارێ دا سەرۆك بارزانی كۆرتیەك ل دۆر پێگیربوونا هەرێما كوردستانێ ب فەرهەنگا دیمموكراسیێ و هەلبژارتنان بۆ شاندێ مێهڤان بەرچاڤكر و ئاماژە ب وێ چەندێ دا كو گەلێ كوردستانێ قوربانی داینە ژبۆ كو ب ئازادی بژیت و بهایێن دیموكراسیێ بهێنە پەیڕەوكرن و پشتی سەرهدانا گەلێ كوردستانێ ل 1991 ل باژێرێ كۆیە بۆ ئێكەمین جار مە ڕاگەهاند كو پێدڤیە ژ شەرعیەتا شۆڕەشگێری بەر ب شەرعیەتا دەستووری بچین و هەلبژارتن بهێنە ئەنجامدان.
سەرۆك بارزانی ئەوژی بۆ شاندێ مێهڤان دوپاتكر، كو كوردستان د سەر هەموو بەرژەوەندیێن دی دایە و ژ پێخەمەت پاراستنا شەرعیەت و بهایێن دیموكراسیێ، پێدڤیە د ئەڤ سالەدا ل هەرێما كوردستانێ هەلبژارتن ل دەمێ خوە یێ دیاركری دا بهێنە ئەنجامدان، سەبارەت بابەتێ چاوانیا پشكداریا پێكهاتەیان ژی ڕاگەهاند، پێكهاتەیێن هەرێما كوردستانێ ب خوە چ بڕیارەكێ بدەن دێ پشتەڤانێن خواستا وان بین..

ئەڤرۆ

دهۆك، لەزگین جوقی

وەكیلێ‌ میرێ‌ ئێزدیان بۆ كاروبارێن پەیوەندیان ڕاگەهاند، ئایینێ‌ ئێزدی ڕێ‌ نادەت هیچ كەسەكێ‌ ئێزدی هێرشی جهێن ئایینێ‌ بكەت و د فەرهەنگا ئێزدیان دا نینە هێرشێ‌ ل سەر جهێن ئایینی بكەن وئەو ڕوودانیێن ل شنگالێ دروست بووین گۆمان تێدا نێنە دەستێ‌ دەرەكی د ناڤدا بوویە وپشتەڤانی كرینە كو هندەك ئەرەب ڤەگەرنە شنگالێ بێ‌ پێرابوونێن قانوونێ‌ دگەلدا بهێنە وەرگرتن.
جەهوەر عەلی بەگ، وەكیلێ‌ میرێ‌ ئێزدیان ل كوردستانێ و جیهانێ بۆ كاروبارێن پەیوەندیان گوت» گەلەك ئەرەبێن سونە یێن زڤرینە شنگالێ و هیچ ڕۆژەكێ‌ كەسەكێ‌ ئێزدی زیان نەگەهاندیە وان ژبەركو وان دەست د جینوسایدا شنگالێ دا ل سالا 2014ێ‌ ل سەر دەستێ داعشێ دا نەبوو لەوراژی ئێزدیان ڕێز ل وان گرتیە».
گوت ژی» ئەوا ل ڤێ دووماهیێ دروست بووی ژ ئەگەرێ زڤرینا هندەك خێزانێن ئەرەبە بۆ شنگالێ ب ڕێكا حوكمەتا ئیراقێ د ئەنجامدا خەلكێ‌ ئێزدی ل شنگالێ نەرازیبوونا خوە دیاركریە و داخازكرن ئەو كەسێن دەست دگەل تیرۆرستێن داعشێ دا هەین هەموو بهێنە سزادان، مخابن دەستێن دەرەكی و سیاسی ل پشت ڤان بوویەرێن شنگالێ دا نە داكو فتنە و ئالۆزی ل شنگالێ دروست بن».
ئاشكركر ژی» خەلكەك یێ‌ ئازادە ڤەگەریتە شنگالێ ب تایبەتی ژی كەسێن دەست د تاوانێن شنگالێ دا نەبن بێ‌ هیچ ئاریشەیەك دزڤرنە شنگالێ و گەلەك خێزانێن ئەرەب بەری نوكە زڤرینە شنگالێ بێی كو چ ئالۆزی دروست ببن، بەلێ ڤێجارێ‌ دەمێ‌ هندەك خێزانێن ئەرەب ژ مووسل هاتینە ڤەگۆهاستن بۆ شنگالێ ئالۆزی دروستبوون ژ بەر كو خەلكێ‌ شنگالێ دخواست ڤەكۆلین دگەلدا بهێتە كرن وكەسێن بووینە تیرۆرست نەڤەگەرنە شنگالێ».
میر جەهوەر عەلی بەگ ئەوژی گۆت: دەستێن دەرەكی ل پشت ڕوودانێن شنگالێ هەنە و ئەڤە ناهێتە قبوول كرن ولژنەیەك ل نەینەوا هاتیە پێكئینان ل سەر روودانێ و دخوازین حوكمەتا ئیراقێ دەست بجهئێنانا ڕێككەفتنا شنگالێ بكەت، چونكو باشترین چارەسەری بۆ ڕەوشا شنگالێ بجهئینانا وێ ڕێككەفتنێ‌ یە».
مەحما خەلیل، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان دیاركر» دەستێن هندەك ئالیێن سیاسی و چەكدار د ناڤ ڕوودانێن شنگالێ دا هەنە بۆ چێكرنا فتنێ‌ دناڤبەرا پێكهاتەیێن شنگالێ دا و هەر دەمێ‌ پێنگاڤ بۆ باشكرنا ڕەوشا شنگالێ هەبن ئەڤ ئالۆزی دروست دبن و هندەك ئالی هەنە ناخوازن ڕەوشا شنگالێ باش ببیت ژ بەر كو جهێ‌ گرۆپێن چەكدار د ناڤ شنگالێ دا نامینیت».
سعود مستۆ، ڕێڤەبەرێ گشتیێ كاروبارێن ئێزدیان ل وەزارەتا ئەوقەف وكاروبارێن ئایینی ل هەرێما كوردستانێ گوت» ئێزدی ڕێزێ‌ ل هەموو ئایینان دگرن، مزگەفتا ڕەحمان ل شنگالێ ژ ئالیێ ئێزدیان ڤە نەهاتیە سۆتن بەلكو ژ ئالیێ تیرۆرستێن داعشێ ڤە هاتیە سۆتن».
سعودی گۆت ژی» د فەرهەنگا ئێزدیاتیێ‌ دا لێبۆرین و پێكڤەژیان و ئاشتی و ڕێزگرتن ل هەموو ئایینان هەیە».
ڕۆهنكر ژی» چو هێرش بۆ سەر مزگەفتێ‌ نەهاتینە كرن تنێ‌ ئالۆزی د ناڤبەرا هندەك ژ خەلكی و هێزین د ناڤ شنگالێ دا دروست بوویە و ئەو مزگەفت ل سالا 2014ێ‌ ژئالیێ تیرۆرستێن داعشێ ڤە هاتیە سۆتن ئەو وێنە و ڤێدیۆ یێن هاتینە بەلاڤكرن ژی یێن سەردەمێ‌ تیرۆرستێن داعشێ‌ نە، مخابن هندەك پەیچ و دەزگەهێن ڕاگەهاندنێ‌ ئەو وێنە بكاردئینان وڕێڤەبەریا وەقفا سوونی ل مووسلێ ڕابوویە ب سەخبێركرنا وێ مزگەفتێ و پشتی شنگال ڕزگاربووی ژی ژئالیێ ئێزدیان ڤە هاتیە پاراستن».
سعود مستۆی ئاماژەكر» ئێزدی دخوازن تیرۆرستێن داعشێ و كەسێن بووینە پشتەڤان و هەڤكارێن وان هەموو بهێنە سزادان كو سالا 2014ێ‌ پتر ژ شەش هزار و 417 كچ وژن و زارۆیێن ئێزدیان هاتنە ڕەڤاندن هەتا نوكە ژی چارەنڤیسێ‌ گەلەك ژوان یێ دیارنینە وخەلكێ‌ شنگالێ گومان ژ زڤرینا وان ئەرەبان هەیە یێن ڕێك پێ‌ دهێتە دان ڤەگەرنە شنگالێ وپێدڤیە ڤەكۆلین ل سەر بهێتە كرن وتاوانبار بگەهنە سزایێ‌ خوە».
گوت ژی» هەتا نوكە پتر ژ 320 هزار كەسان ژ خەلكێ‌ شنگالێ د ناڤ كەمپان دا ئاوارەنە ونەشێن ڤەگەرن، بۆچی ڕێك دهێتە دان ئەرەب ڤەگەرن وبۆجێ‌ ڕەوشا شنگالێ ناهێتە خوەشكرن دا ئێزدی ڤەگەرن ئەڤە وێ‌ دگەهینیت كو پلانەك هەیە بۆ پتر خرابكرنا ڕەوشا شنگالێ».