سایتێ (ئەلمۆنیتۆر) یێ ئەمریكی بەلاڤكر، واشنتۆن ب رێكا پێشوازیكرنێ ل سەرۆكێ حوكمەتا هەرێما كوردستانێ، پەیاما ئەوێ چەندێ گەهاندە ئیرانێ و دەستهەلاتدارێن ئەرەبێن شیعە ل ئیراقێ، كو دەستبەرداری ئیراقێ نابیت بۆ ئیرانێ.
ئەوی سایتێ ئەمریكی د راپۆرتەكێدا ب ناڤونیشانێ( ئیدارەیا بایدنی پشتەڤانیێ ل كوردستانەكا خۆراگر دكەت) و تێدا ئاماژە كریە» ئەنتۆنی بلینكن، وەزیرێ دەرڤەیێ ئەمریكا د چارچۆڤەیێ كۆمبوونا رۆژا دوشەمبییا بۆری دا ل گەل مەسرور بارزانی، سەرۆكێ حوكمەتا هەرێما كوردستانێ، راگەهاند كو ئەمریكا پشتەڤانیێ ل هەرێما كوردستانێ یا نەرم دكەت و هەرێم ب (بەرێ كۆژیێ) د پەیوەندیێن دینامیكی یێن بەرفرهە ل گەل ئیراقێ دبینیت».
رۆهنكر ژی» بەرێ كوژیێ و خۆراگری ئەو دەستەواژەیێن دیپلۆماسی نینن كو ئەم ل سەر هەلبووین، ئەڤە ژی رامان ئەوە كو ب رێكا ئەڤان دەستەواژەیان ئاماژەیەكێ دهنێرن، دخوازن بێژن كو واشنتۆن پشتەڤانیێ ل حوكمەتا هەرێما كوردستانێ دكەت، هەروەسا داگیرانێ ژ ئیراقێ ناكەت بۆ ئیرانێ».
هەر د ئەوێ راپۆرتا سایتێ (ئەلمۆنیتۆر) دا ئاماژە ب ئەوێ چەندێ هاتییە كرن كو رەوش گەهشتییە ئاستەكی كو نێزیكە ئەمریكا ب شێوەیەكێ قۆناغ ب قۆناغ، ئیراقێ ژ دەست بدەت و هەژموونا ئیرانێ ل سەر هەموو ئیراقێ دا بهێتە سەپاندن، ب تایبەتی ژی پشتی ئەوێ چەندێ كو چارچۆڤەیێ هەماهەنگیێ یێ ئەرەبێن شیعی حوكمەتا نوو ل ئیراقێ پێكئینای، هەتاكو ل ئەڤان دووماهییان داخوازكریە هێزێن ئەمریكا ژ ئیراقێ بهێنە ڤەكێشان.
هەروەسا ئەوی سایتێ ئەمریكی بەلاڤكرییە كو ئیرانێ پلانەكا یا دانای بۆ نەهێلانا هەرێما كوردستانێ و نەهێلانا سیستەمێ فیدرال د دەمەكیدا دستوورێ ئیراقێ بڕیار ل سەر داینە و دیاركرییە ژی» دادگەها فیدرال ژی ئێك ژ كەرەستەیێن كاریگەرێن ئیرانێیە بۆ بجهئینانا ئەڤێ ستراتیژییەتا ئیرانی، هەر ژ ئەڤی روانگەهی ژی ڤە ئەڤێ دادگەهێ بڕیار دژی دۆسێیا پەترۆلا هەرێما كوردستانێ و بابەتێ مووچەیێن فەرمانبەرێن هەرێما كوردستانێ دایە».

هەولێر، قائید میرۆ

ئەندامەكا بەرێ یا لیژنا دارایی ل جڤاتا نوونەرێن ئیراقێ هۆشداریێ لدۆر بڕیارێن دادگەها فیدڕال دژی هەرێما كوردستانێ ددەت و دبێژیت، هندەك ئالیێن سیاسی ل پشت دەركرنا وان بڕیارانە و پێدڤییە هەرێما كوردستانێ بۆ قۆناغێن بهێت خوە بەرهەڤ بكەت هەروەسا ئاماژەكر، چو بەهانە بۆ گیرۆكرنا مووچێ فەرمانبەران نەماینە و ئەو مەرجێن هاتینە دانان تنێ مەرەم ژێ وەرگرتنا دەستهەلاتێیە ل هەرێما كوردستانێ.
نەجیبە نەجیب، ئەنداما بەرێ یا لژنەیا دارایی ل جڤاتا نوونەرێن ئیراقێ بۆ رۆژنامەیا (ئەڤرۆ) گوت « بەری نوكە سەرۆكێ حوكمەتا هەرێما كوردستانێ داخواز ژ بەغدا كربوو مووچێ فەرمانبەرێن هەرێمێ بهێتە جوداكرن ژ هەموو پرسێن دی، هەروەسا سەرۆكێ هەرێما كوردستانێ ل هەیڤا ئێك یا ئەڤسالە سەرەدانا بەغداكربوو و هەمان داخوازكربوو كو مووچەیێ فەرمانبەران نەبیتە قوربانی هەڤڕكیێن د ناڤبەرا بەغدا و هەرێمێ دا، ژ بەر كو فەرمانبەر بەری مەهـ ب دووماهی بهێت مووچە بهێنە بەلاڤكرن و بەری دادگەها فیدڕال بڕیارێ بدەت ئەڤە داخوازا سەرۆكێ حوكمەتێ بوویە بۆ چارەسەركرنا ئاریشەیا مووچێ فەرمانبەرێن هەرێمێ، ژئالییەكێ دیڤە هەرێما كوردستانێ داخوازا راستڤەكرنا قانوونا بودجەی كریە، كو ئەو ئاستەنگێن كەفتینە هەمبەر دانا مووچێ فەرمانبەران بهێنە لادان، چونكە ب گۆڕەی قانوونا بودجەی ژ مەزاختنا راستەقینە مووچە بهێنە بەلاڤكرن، بەلێ رێككەفتن هاتیەكرن ئەو خال نەمینیت، دشێم بێژم هەردو حوكمەتێن هەرێمێ و بەغدا گەهشتبوونە رێككەفتنێ بەری بڕیارا دادگەها فیدڕال ئاریشەیا مووچەی بهێتە چارەسەركرن، ل دۆر شێوازێ مەزاختنا مووچێ فەرمانبەران ژی ب گۆڕەی بڕیارا دادگەها فیدرال دڤێت ب رێكا بەنكان مووچە بهێنە بەلاڤكرن، حوكمەتا ئیراقێ ژی دناڤا قانوونا بودجەی دا دیاركریە حیسابەكا بانكی بهێتە ڤەكرن، حوكمەتا هەرێما كوردستانێ ژی بەری بڕیارا دادگەهێ سیستەمێ هەژمارا من راگەهاندییە».
ئەڤێ ئەنداما لژنەیا دارایی ل خۆلا بۆری یا جڤاتا نوونەرێن ئیراقێ گوت» ئەو داخۆیانیێن دهێنەدان و دبێژن بەغدا مووچێ فەرمانبەرێن هەرێما كوردستانێ نادەت هەتا مووچە دهێنە (تەوتینكرن) ئەڤە مەرەمەكا سیاسییە، ئەز نابێژم سەرۆك وەزیرێن ئیراقێ، بەلێ هندەك ئالیێن سیاسی یێن دژی هەرێما كوردستانێ شێوازێ دانا مووچێ فەرمانبەران دكەنە ئامانج بۆ وەرگرتنا دەستهەلاتێ ل هەرێما كوردستانێ، ئانكو ئەو رێكارێن گران یێن هاتینە دانان مەرەمێن سیاسی ل پشت هەنە و كرینە بەهانە بۆ لاوازكرنا هەرێما كوردستانێ، تەوتینكرنا مووچێ فەرمانبەران ئامرازەكە بۆ لاوازكرنا حوكمەتا هەرێمێ، هنارتنا مووچێ فەرمانبەران ئەركەكێ دستووری و قانوونیێ حوكمەتا ئیراقێیە، نابیت ب هیچ بەهانەیەكێ مووچە گیرۆببن، بڕیارا سەرۆك وەزیرێن ئیراقێ یا هەی وبڕیارا دادگەها فیدڕال یا هەی، ل مەها كانوونا دویێ سەرۆكێ هەرێمێ رێككەفتن كریە هەیڤانە بێی گیرۆبوون 618 ملیار دینار بهێنە هنارتن دگەل داهاتێ ناڤخوە هەتا مووچێ بهێنە بەلاڤكرن، هەكە ئەگەرێن تەكنیكی نەبن چو بەهانە نەماینە بۆ گیرۆكرنا مووچێ فەرمانبەران.
نەجیبە نەجیب ئاماژەكر» پیلانەك یا هەیە ئیراق ڤەگەڕیت بۆ بەری سالا 2003 ێ و هەرێما كوردستانێ نەمینیت، چونكە هەر ژ سالا 2010 ێ بزاڤێن لاوازكرنا هەرێما كوردستانێ دهێنەدان، مخابن دوبەرەكی و ناكۆكیێن دناڤا هەرێما كوردستانێ پالدەرن بۆ دەركرنا ئەوان بڕیارێن دژی هەرێما كوردستانێ، هەردەمێ ئێك رێزبووینە چەندین دەستكەفت هەبووینە، نوكە ژی هەكە كورد د ئێكگرتی بان ئەو بڕیارێن دادگەها فیدڕال نەدهاتن دەركرن، مخابن دستوور یێ دهێتە ژناڤبرن و پەرت و بەلاڤبوونا ئالیێن كوردی بەهانە داینە دەست بەغدا و رەهەندێن سیاسی ل پشت دادگەها فیدڕال یێن هەین، ئەڤە 10 سالە ئاریشە ل سەر مووچێ فەرمانبەران یێن هەین، نوكە داهات و پەترۆل هەموو ددەستێ بەغدا دانە و هێشتا بەهانەیا دگرن دژی هەرێما كوردستانێ، پێدڤییە هەرێما كوردستانێ خوە بەرهەڤ بكەت بۆ بەرگریێ دژی ئەڤان پیلانێن دژی هەرێما كوردستانێ ژئالیێ بەغداڤە، ئەوا جهێ داخێیە ئالیێن كوردی ژی ل پشت دەركرنا ئەڤان بڕیارانە، ب گۆڕەی دستووری دادگەها فیدڕال دڤێت بهێتە گۆهۆڕین كو ل سەردەمێ برێمەری ل سالا 2005 هاتییە دامەزراندن، ئەڤە ددەمەكی دایە پێدڤییە دادگەها فیدڕال ژ كەسێن زانا ژی بهێتە پێكئینان».

رۆژنامەیێن جیهانی، دوپاتیێ ل گرنگترین خالێن سەرەدانا مەسرور بارزانی، سەرۆكێ حوكمەتا هەرێما كوردستانێ بۆ ئەمریكا دكەن و باس ل ئەوێ چەندێ دكەن، سەرەدان بۆ دوبارە نیشادانا گرنگی پێدانا ئیدارەیا جۆ بایدنی یە ب هەرێما كوردستانێ و ئاماژە دكەن ژی، ئەمریكا گەلەك یا رژدە ل پاراستنا هەرێما كوردستانێ ژ ئەوان گەفێن ل دەڤەرێ بوو ب روو دبن.
سەرەدانا مەسرور بارزانی، سەرۆكێ حوكمەتا هەرێما كوردستانێ بۆ واشنتۆن، رژدییا ئیدارەیا بایدنی د پاراستنا هەرێما كوردستانێ دا ژ گەفان نیشا ددەت، ئەڤە ناڤونیشانێن چەندین بابەتێن رۆژنامەیێن جیهانی بوو، بۆ سەرەدانا سەرۆكێ حوكمەتا هەریمێ و دوپاتیێ ل گرنگترین خالێن ئەوێ سەرەدانێ دكەن و پترییا وان باس ل ئەوێ چەندێ كریە، ئەو سەرەدان بۆ دوبارە نیشادنا گرنگی پێدانا ئیدارەیا جۆ بایدنی یە ب هەرێما كوردستانێ.
ب گۆڕەی دەنگوباسێن رۆژنامە و دەزگەهێن راگەهاندنێ، ئەمریكا تنێ ب ئاخڤتنێ پشتەڤانیێ ل هەرێما كوردستانێ ناكەت، بەلكو ئەمریكا یا جدییە بۆ پاراستنا هەرێما كوردستانێ ژ هەموو گەفێن دەڤەرێ.
د دەمەكیدا ئەو سەرەدانا سەرۆكێ حوكمەتا هەرێما كوردستانێ ل دووڤ داخوازییەكا فەرمی یا ئیدارەیا بایدنی هاتییە ئەنجامدان، د دەزگەهێن راگەهاندنێ یێن جیهانی ب شێوەیەكی باس ل ئەوێ سەردانێ كریە كو گرنگترین مەبەستێن ئەمریكا ژ ئەوێ داخوازكرنا فەرمی پێك دهێن ژ :
-ئاراستەكرنا پەیامەكێ بۆ هەموو جیهانێ، كو ئەمریكا ل پشتەڤانیكرنا خوە بۆ هەرێما كوردستانێ دێ یا بەردەوام بیت و دێ پشكداریێ د پاراستنا هەرێمێ دا كەت ژ هەموو گەفان.
-گرنگیدان ب هەرێما كوردستانێ، ب تایبەتی پشتی فشارێن گرۆپێن چەكدار ل ناڤخوەییا ئیراقێ بۆ ڤەكێشانا هێزێن ئەمریكی زێدەتر بوون، بۆ ئەڤێ چەندێ ژی هەرێما كوردستانێ باشترین پێگەهێ ستراتیژییە بۆ مانا هێزێن ئەمریكی ل دەڤەرێ».
-بەرهنگاربوونا هەژموونا گرۆپێن چەكدار یێن دژبەری ئەمریكا ل ئیراقێ، كو فەرمانان ژ دەرڤەی دەستهەلاتا وەلاتێ خوە وەردگرن و هەموو جۆمگێن ئیراقێ یێن قۆرخ كرین.
-پێشبینی دهێتە كرن، ژ ئەگەرێ ڤەكێشانا ئەمریكا ژ ئیراقێ مەیدان بۆ گرۆپێن چەكدار و وەلاتێن بەرەیێ موقاوەمێ چۆل بیت، ئەڤە ژی وەدكەت كو ئەمریكا گرنگییەكا زێدەتر ب هەرێما كوردستانێ بدەت.
-شكاندنا ئەو بزاڤێن د ئەڤان سالێن دووماهیێ دا بۆ بچووككرنا هەرێما كوردستانێ دهێنە كرن، ژ ئەوان ژی فشارێن دارایی، سیاسی و ئەمنی ل سەر هەرێما كوردستانێ.
-هەروەسا د ئەوێ كۆمبوونا ل گەل سەرۆكێ حوكمەتا هەرێمێ، وەزیرێ دەرڤە یێ ئەمریكا، ئەنتۆنی بلینكن دوپاتی ل سەر هەژمارەكا خالێن گرنگ یێن پەیوەندییان ل گەل هەرێما كوردستانێ كر ژ ئەوان ژی:
-پێگیریبوونا ئیدارەیا جۆ بایدنی ب هەڤپشكییا خوە ل گەل هەرێما كوردستانێ كو ل بوارێن ئەمنی و شەڕێ دژی تیرۆرێ هەرێما كوردستانێ هەڤپشكەكا راستەقینەیا ئەمریكا بوو.
-بلینكن ل درێژییا كۆمبوونا خوە ل گەل مەسرور بارزانی، سەرۆكێ حوكمەتا هەرێما كوردستانێ دووپات كریە كو هەرێما كوردستانێ نموونەیەكا سەركەفتی و حوكمڕانییەكا دیموكراتییە ل رۆژهەلاتا ناڤین و سیاسەت و ستراتیژییەتا كابینەیا نەهێ یا حوكمەتا هەرێما كوردستانێ هۆكارێ سەقامگیریێ بوو ل دەڤەرێ.
هەر د چارچۆڤەیێ كۆمبوونێ دا هەر ئێك ژ مەسرور بارزانی، سەرۆكێ حوكمەتا هەرێما كوردستانێ و ئەنتۆنی بلینكن، وەزیرێ دەرڤەیێ ئەمریكا د هەڤڕابوون ل سەر ئەوێ چەندێ كو بڕیارێن دادگەها فیدرالیا ئیراقی ل دۆر مووچەیێن فەرمانبەرێن هەرێما كوردستانێ و قانوونا هەلبژارتنان ل هەرێما كوردستانێ د دادپەروەرانە نەبوون و پێدڤییە رێز ل دستووری و سیستەمێ فیدرال بهێتە گرتن، كو ئیراق ل سەر هاتییە ئاڤاكرن.

د هەلبژارتنێن پەرلەمانێ ئیرانێ دا ل ٥ پارێزگەهێن رۆژهەلاتێ کوردستانێ ب گشتی کورد شیان ٣٢ کورسیێن پەرلەمانێ ئیرانێ بدەستڤە بینن و چاڤدێرەکێ سیاسی ژی دیار دکەت، سیستەمێ نها یێ ئیرانێ رێ نادەت نوونەرێن کوردان ل پەرلەمانی بشێن وەکو پێدڤی خزمەتا خەلکێ خوە بکەن.

د هەلبژارتنێن ڤێجارێ یێ پەرلەمانێ ئیرانێ دا کو هەڤڕکی ل سەر ٢٩٠ کورسیێن پەرلەمانی هاتنە کرن، ب گشتی ل ٥ پارێزگەهێن رۆژهەلاتێ کوردستانێ کورد شیان ٣٢ کورسیێن پەرلەمانی بدەستڤە بینن و رەنگە ئێک هەتا دوو کورسیێن دی ژی زێدە ببن، چونکی ل هندەک باژێران دبیت هەلبژارتن بهێنە دوبارە کرن.
د ڤێ دەربارێ دا د. ئەحمەد بابایی چاڤدێرێ سیاسی راگەهاند، بدەستڤەئینانا ٣٢ کورسیێن پەرلەمانی ژ ئالیێ کوردان ڤە تشتەک باشە، لێ مخابن کەسێن هاتینە هەلبژارتن نەشێن بۆ خەلکێ خوە چ بکەن، چونکی بەری هەر تشتەکێ پەرلەمانێ ئیرانێ وەکو یێ چو وەلاتێن دی نینە و ئەندامێن پەرلەمانی ژی ئەو دەستهەلاتە نینن بشێن بەرەڤانیێ ل مافێن خەلکێ خوە بکەن، بەلکو د چارچۆڤەکا دیارکری دا دشێن هندەک تشتان بکەن، ژ بەر ڤێ یەکێ ژی ڤێجارێ رێژەیا پشکداریا خەلکی د هەلبژارتنان دا گەلەک یا کێم بوو، ل هەموو ئیرانێ رێژەیا پشکداریا وەلاتیان نەگەهشتە ١٥٪ ژی، ئەو یەک نیشا ددەت باوەیا خەلکی ب دەستهەلاتێ نەمایە، ئەڤ هەلبژارتنە ژی نەشێن ببنە ئەگەرێ هندەک گوهۆڕینان کو کاریگەریەکا باش ل ژیانا وەلاتیان بکەت.
ناڤهاتی ئەو یەک ژی دیار کر، ل ئورمیێ ژ بەر کو هەڤڕکیەکا مەزن د ناڤبەرا کوردان و ئازەریان دا هەبوو، ژ بەر ڤێ یەکێ رێژەیا پشکداریێ باش بوو و کوردان شیان ئەنجامەک باش بدەستڤە بینن، لێ پرسیار ئەڤە ئەرێ دەستهەلاتا نها یا ئیرانێ دێ رێ دەت ئەندامێن کورد وەکو کورد بشێن خزمەتا خەلکێ خوە بکەن، بێگومان ناهێلن و بەری نها ژی گەلەک ئاستەنگی ل هەمبەر ئەندامێن پەرلەمانی یێن کورد دروست کرینە، ژ بەر ڤێ یەکێ ژی چوونا کوردان بۆ پەرلەمانێ ئیرانێ تشتەک باشە، لێ مخابن ئەو نەشێن وەکو کورد خزمەتا گەلێ خوە بکەن، بەلکو نەچارن د چارچۆڤێ سیستەمەکێ دیارکری دا کار بکەن.
چاڤدێرێ سیاسی یێ رۆژهەلاتێ کوردستانێ ئەو یەک ژی دیار کر، ئەڤ هەلبژارتنە لاوازترین هەلبژارتن د دیرۆکا کۆمارا ئیسلامی یا ئیرانێ دا بوو، چونکی باوەریا خەلکی ب دەستهەلاتێ نەمایە، بەری نها ژی خوەنیشادان ل دژی دەستهەلاتێ هاتنە کرن، ژ بەر ڤێ یەکێ ژی ل باژێرەکێ مەزن وەکو تەهرانێ رێژەیا پشکداری وەلاتیان ٥٪ بوویە، پڕانیا وەلاتیێن ئیرانێ و رۆژهەلاتێ کوردستانێ هەلبژارتن بایکۆت کرینە، ئەو یەک ژی پەیامەکا ئاشکرا یا خەلکی یە بۆ دەستهەلاتێ، هەکە پشتی هەلبژارتنان دەستهەلاتا نها کار بۆ گوهۆڕینێن بەرچاڤ نەکەت و ب تایبەتی ژی رەوشا ئابووری یا خەلکی نەهێتە باشکرن دێ رەوش گەلەک خرابتر لێ هێت.

سەرۆك بارزانی پێشوازی ل ڤاهگن خاچاتوریان، سەرۆكێ ئەرمینیا كر. د دیدارەكێ دا سەرۆكێ ئەرمینیا رۆلێ سەرۆك بارزانی د پەیداكرنا سەقایەكێ ئارام و پێكڤەژیانێ د ناڤبەرا پێكهاتەیان ل هەرێما كوردستانێ و بەرهنگارییا تیرۆری بلند هەلسەنگاند.
سەرۆك بارزانی ئاماژە ب پەیوەندیێن دیرۆكی د ناڤبەرا گەلێ كوردستانێ و گەلێ ئەرمینیا كر و سوپاسیا وەلاتێ ئەرمینیا كر بۆ رێزگرتن ل مافێن كوردێن ئاكنجی ل ئەرمینیا. هەردو ئالییان دوپاتی ل پەیوەندیێن بازرگانی د ناڤبەرا هەرێمێ و ئەرمینیا هاتە كرن. پەیوەندیێن د ناڤبەرا هەرێمێ و بەغدا تەوەرەكێ دی یێ ئەوێ دیدارێ بوو و سەرۆك بارزانی دوپاتكر كو پێگیریبوون ب دستووری رێكا ئێكانەیا چارەسەركرنا كێشەیێن د ناڤبەرا بەغدا و هەرێمێ دایە.

سەرۆك مەسعود بارزانی ل سەلاحەدین پێشوازی ل ئوسامە نوجەیفی، سكرتێرێ گشتیێ حزبا (موتەحیدون) و شاندەكێ د گەلدا كر.
د دیدارەكێ دا باس ل پێشڤەچوون و گوهۆڕینێن دەڤەرێ ورەوشا سیاسییا ئیراقێ هاتە كرن.

د چارچۆڤەیێ پشكداریكرنا وان د كۆڕبەندێ دیپلۆماسیێ ئەنتالیا دا، نێچیرڤان بارزانی، سەرۆكێ هەرێما كوردستانێ ل گەل رەجەب تەیب ئەردۆگان، سەرۆك كۆمارێ توركیا كۆمبوو و تێدا پێشڤەبرنا پەیوەندییان و هاریكارییا هەڤپشك یا توركیا ل گەل ئیراقێ و هەرێمێ ب تایبەتی د بوارێ بازرگانی و ئابۆریدا، هەروەسا رەوشا سیاسی و ئەمنی ل ئیراقێ و هەرێمێ هاتە باسكرن. هەردو ئالییان باس ل ئەگەر و ئەنجامێن رەوشا ئالۆز یا دەڤەرێ و پێشهاتێن شەڕی ل غەزە. هەروەسا دوپاتی دوپاتی ل گرنگییا هاریكارییا هەمەئالییانە بۆ چارەسەركرنا ئاشتییانە یا كێشەیان ب دانوستاندنێ و رێكێن دیپلۆماسی كر. مەترسیێن تیرۆرێ و چەند پرسێن جهێ گرنگییا هەڤپشك، تەوەرەكێ دی یێ كۆمبوونێ بوون.

سەرۆكێ هەرێما كوردستانێ ل هەولێرێ پێشوازی ل سەرۆكێ ئەرمینیا كر و هەردو ئالییان باس ل دەستپێكرنا گەشتێن راستەوخوەیێن ئەسمانی د ناڤبەرا هەرێما كوردستانێ و ئەرمینیا كر.
سەرۆكایەتییا هەرێما كوردستانێ د بەیاننامەیەكێ دا ل دۆر ئەوێ چەندێ بەلاڤكر» نێچیرڤان بارزانی، سەرۆكێ هەرێما كوردستانێ ل هەولێرێ ل گەل ڤاهاگن خاچاتوریان، سەرۆكێ ئەرمینیا كۆمبوو».
ب گۆڕەی ئەوێ بەیاننامەیێ، هەردو ئالییان باس ل دەلیڤەیێن پێشڤەبرنا پەیوەندیێن ئەرمینیا ل گەل ئیراقێ و هەرێما كوردستانێ د بوارێن بازرگانی، وەبەرئێنان، كەرتێ تایبەت، نوژداری و گەشتیاریدا كر و رۆناهی خستنە سەر دەلیڤەیێن گەشتێن راستەوخوەیێن ئەسمانی د ناڤبەرا ئەرمینیا و ئیراقێ و هەرێما كوردستانێ.
د كۆمبوونەكێ دا پەیوەندیێن ئەرمینیا ل گەل ئیراقێ و هەرێما كوردستانێ ب تایبەتی د بوارێ ئابۆریدا و رەوشا ئیراقێ و هەرێما كوردستانێ و رەوشا پێكهاتەیان هاتنە باسكرن.

ل دوەمین رۆژا پشكداریكرنێ د كۆربەندێ دیپلۆماسیێ ئەنتالیا دا، دوهی شەمبیێ، نێچیرڤان بارزانی، سەرۆكێ هەرێما كوردستانێ ل گەل رۆمێن رادێڤ سەرۆك كۆمارا بەلگاریا كۆمبوو.
د دیارەكێدا دوپاتی ل پێشڤەبرنا پەیوەندیێن بەلگاریا ل گەل ئیراقێ و هەرێما كوردستانێ هاتە كرن د بوارێن ئابۆری، بازرگانی، كەلتووری، وەرزشی، گەشتیاری و چاندنێ دا، هەروەسا باس ل دەلیڤەیێن هاریكارییا زێدەتر یا دو ئالییانە د بوارێن خواندنا زانكۆیی و خواندنا بلند و گەشتێن راستەوخوەیێن ئەسمانی د ناڤبەرا بولگاریا و ئیراقێ و هەرێما كوردستانێ دا، هاتە كرن.
نێچیرڤان بارزانی دوپاتكر كو هەرێما كوردستانێ ب گرنگی دنێریتە پەیوەندیێن خوە ل گەل وەلاتێن دۆست ل ئورۆپا و ئاماژە ب خواستا هەرێمێ كر بۆ بەرفرەهكرنا بوارێن هاریكارییا هەڤپشك ل گەل بولگاریا وەكو وەلاتەكێ دۆست و ئەندام د ئێكەتییا ئورۆپا دا وداخوازكر بولگاریا ئاستێ نوونەرایەتییا خوە ل هەرێمێ بلند بكەت.
هەرەسا سەرۆكێ هەرێما كوردستانێ ل گەل یاشار گولەر، وەزیرێ بەرگریێ توركیا كۆمبوو و دوماهی پێشهاتێن ئەمنی ل رۆژهەلاتا ناڤین و مەترسی و گەفێن تیرۆرێ تەوەرێن دیدارێ بوون.

سەرۆكێ حوكمەتا هەرێما كوردستانێ ل گەل مەزنە بەرپرسێن كۆچكا سپی ل واشنتۆن كۆمبوو و تەوەرێ سەرەكیێ كۆمبوونێ بەردەوامییا پشتەڤانییا ئەمریكا بوو بۆ هەرێما كوردستانێ و جارەكادی ئەمریكا پشتەڤانییا خوە بۆ كوردستانەكا ب هێز و مافێن دستووری یێن گەلێ كوردستانێ دوپاتكر.
مەسرور بارزانی، سەرۆكێ حوكمەتا هەرێما كوردستانێ جودا ل گەل هەر ئێك ژ جەیك سولیڤان، شیرەتكارێ ئاسایشا نیشتیمانییا ئەمریكا، برێت مەكگۆرك، هەماهەنكگارێ كۆچكا سپێ بۆ كاروبارێن رۆژهەلاتا ناڤین و باكوورێ ئەفریقیا و ئامۆس هۆكستین، مەزنە شیرەتكارێ سەرۆكێ ئەمریكا بۆ كاروبارێن وزێ و وەبەرئێنانێ كۆمبوو.
مەسرور بارزانی، سەرۆكێ حوكمەتا هەرێما كوردستانێ ل تۆرا جڤاكییا ئێكس (تویتەرا بەرێ) ل دۆر كۆمبوونا خوە ل گەل جەیك سولیڤان، شیرەتكارێ ئاسایشا نیشتیمانییا ئەمریكا نڤیسی» من سوپاسییا جەیك سولیڤان، شیرەتكارێ ئاسایشا نیشتیمانییا ئەمریكا كر بۆ پشتەڤانییا كۆچكا سپی ل كوردستانەكا ب هێز و مافێن دستووری یێن گەلێ كوردستانێ. هەروەسا مە ئاماژە ب گرنگییا بجهئینانا دستووری و پاراستنا مافێن پێكهاتەیان و پێكئینانا جڤاتا فیدرالی ل ئیراقێ كر».
نڤیسینگەها راگەهاندنا سەرۆكێ حوكمەتا هەرێما كوردستانێ بەلاڤكر» ل دەستپێكا كۆمبوونێ دا، شیرەتكارێ ئاسایشا نیشتیمانییا ئەمریكا ئاماژەكر كو سەرۆك جۆ بایدن سلاڤ و رێز بۆ سەرۆك بارزانی و سەرۆكێ حوكمەتێ یێن هەین و پشتەڤانییا كۆچكا سپی ژی بۆ كوردستانەكا ب هێز و مافێن دستووری یێن گەلێ كوردستانێ دوپاتكر».
هەروەسا كۆچكا سپی ل دۆر ناڤەرۆكا كۆمبوونێ بەیاننامەیەك بەلاڤكر و باس ل ئەوێ چەندێ كر» جەیك سولیڤان سوپاسی و پێزانینا خوە بۆ هەڤپشكییا درێژخایەن د ناڤبەرا هەرێما كوردستانێ و ئەمریكا دا دەربڕی، هەڤدەم دوپاتی ل ئەوێ چەندێ ژی كر كو هاریكاری و پشتەڤانییا ئەمریكا بۆ كوردستانەكا ب هێز و خودان شیان ژ ئالیێ ئابۆریڤە دێ بەردەوام بیت، هەروەكو چاوان د دستوورێ ئیراقێدا ئاماژە ژی ب هەبوونا هەرێمەكا ب هێز هاتییە كرن».
مەسرور بارزانی، سەرۆكێ حوكمەتا هەرێما كوردستانێ ل تۆرا جڤاكییا ئێكس ل دۆر كۆمبوونا خوە ل گەل هەماهەنكگارێ كۆچكا سپی بۆ كاروبارێن رۆژهەلاتا ناڤین و باكوورێ ئەفریقیا نڤیسی» ل گەل برێت مەكگۆرك، مە باس ل گوهۆڕینێن ئیراقێ و دەڤەرێ و پێشڤەبرنا پەیوەندیێن دوقۆلی كر و د هەڤڕا بووین ل سەر گرنگییا پاراستنا ئاسایش و سەقامگیرییا هەرێما كوردستانێ و رێزگرتنێ ل قەوارەیێ دستووری و فیدرالیێ هەرێما كوردستانێ و پاراستنا مافێ پێكهاتەیان».
سەرۆكێ حوكمەتا هەرێما كوردستانێ ل دۆر كۆمبوونا ل گەل مەزنە شیرەتكارێ سەرۆكێ ئەمریكا بۆ كاروبارێن وزێ و وەبەرئێنانێ ل تۆرا جڤاكییا ئێكس نڤیسی» د هەڤڕا بووین ل سەر دەستپێكرنا هنارتنا پەترۆلا هەرێمێ ب زووترین دەم و پێشڤەبرنا پەیوەندیێن هەرێما كوردستانێ و ئەمریكا ب تایبەتی د بوارێن وزێ و وەبەرئێنانێدا».
سەرۆكێ حوكمەتا هەرێمێ د بەردەوامییا سەرەدانا خوە دا بۆ واشنتۆن ل گەل بریكارا وەزیرێ بەرگریێ ئەمریكا ب وەكالەت كۆمبوو، ل دۆر ئەوێ كۆمبوونێ ژی ل تۆرا جڤاكییا ئێكس نڤیسی» ل پنتاگۆنێ، ل گەل ساشا بەیكەر، بریكارا وەزیرێ بەرگریێ ئەمریكا ب وەكالەت كۆومبووین و دیدیارەكێدا كو سێلست والندەر، هاریكارێ وەزیرێ بەرگریێ ئەمریكا بۆ كاروبارێن ئاسایشا نێڤدەولەتی بەرهەڤبووی مە رەوشا گشتییا ئیراقێ و دەڤەرێ و گرنگییا پاراستنا ئاسایش و سەقامگیرییا هەرێما كوردستانێ گەنگەشەكر و هەردڤ ئالی د هەڤڕابووین ل سەر بەردەوامبوونا پشتەڤانی و هاریكاریكرنا پێشمەرگەی د بەرهنگارییا گەف و مەترسیێن تیرۆرستێن داعشێ و تیرۆرێ ب گشتی، پشتەڤانیكرنا ئێكخستنا هێزێن پێشمەرگەی و چاكسازیێن وەزارەتا كاروبارێن پێشمەرگەی، تەوەرەكێ دی یێ دانوستاندنێن كۆمبوونا مە بوو» .
ژ ئالییەكێ دیڤە، ل واشنتۆن شیڤ خوارنەكا تایبەت بۆ پێشوازیكرنێ ل مەسرور بارزانی، سەرۆكێ حوكمەتا هەرێما كوردستانێ ژ ئالیێ كەسایەتیێ ئەمریكی یێ ناڤدار رۆس پرۆ هاتە رێكخستن، تێدا هەژمارەكا مەزن ژ سیناتۆر و ئەندامێن گۆنگرێسی و بەرپرسێن حوكمەتا ئەمریكی بەرهەڤبوون ژ وان: مایك تێرنر سەرۆكێ لژنەیا هەوالگیریێ ل كۆنگرێسی، مایكل مەكاول سەرۆكێ لژنەیا پەیوەندیێن دەرڤە ل كۆنگرێسی، كەی گرنجەر سەرۆكێ لژنەیا تەرخانكرنا بودجەی ل كۆنگرێسی، كین كالڤێرت سەرۆكێ لژنەیا بەرگریێ ل كۆنگرێسی، و هەر ئێك ژ مایكل وولتر و جۆ ویلسن و جەیك ئیلزی، ئەندامێن كۆنگرێسی و سیناتۆر بیل هاگەرتی و ڤیكتریا تەیلەر، جێگرا هاریكارێ وەزیرێ دەرڤەیێ ئەمریكی هەروەسا و چەندین كەسایەتی و خودانكار و فەرماندەیێن بەرێ یێن لەشكری.
بەرهەڤبوویان ب خێر هاتنا مەسرور بارزانی كر بۆ واشنتۆن و پشتەڤانییا خوە بۆ ئاسایش و سەقامگیرییا هەرێما كوردستانێ دوپاتكر.
سەرۆكێ حوكمەتا هەرێما كوردستانێ سوپاسییا بەرهەڤبوویان كر و دوپات كر كو هەرێما كوردستانێ دێ هەردەم فاكتەرێ ئاسایش و ئارامیێ و بنگەهێ پێكڤەژیانا ئاشتییانەیا پێكهاتەیێن جودا جودا بیت ل دەڤەرێ.
مەسرور بارزانی ل گەل براین نیلسن، بریكارێ وەزارەتا گەنجینەیا ئەمریكا بۆ كاروبارێن پەیوەندیدار ب تیرۆرێ و هەوالگیرییا دارایی كۆمبوو و دیدارەكێدا باس پێشڤەبرنا پەیوەندیێن دوقۆلی و پشتەڤانیكرنا چاكسازیێن كابینەیا نەهێ د بوارێن سیستەمێ دارایی و كەرتێ بانكی و پڕۆژەیێ (هەژمارا من) و ب دیجیتالكرنا خزمەتكوزاریێن گشتی هاتە كرن.
سەرۆكێ حوكمەتا هەرێما كوردستانێ د بەردەوامییا سەرەدانا خوە دا بۆ ئەمریكا ل گەل سیناتۆر جاك رید، سەرۆكێ لژنەیا هێزێن چەكدار ل جڤاتا پیرێن ئەمریكا و سیناتۆر رۆجەر ویكر، ئەندامێ بلند یا ئەوێ لژنەیێ كۆمبوو هەروەسا سەرەدانا بالیۆزخانەیا ئیراقێ ل واشنتۆن ژی كر و پێشوازی لێ هاتە كرن ژ ئالیێ بالیۆز نزار ئەلخەیروللا.