ئه‌ڤرۆ:

پارتێن كوردی یێن باكورێ كوردستانێ راگه‌هاندن كو شه‌ش پارتێن ئۆپۆزسیۆنا توركیا ژی وه‌كو ده‌ستهه‌لاتێ سه‌باره‌ت ب پرسا كوردی هزر دكه‌ن و چو به‌رنامه‌كێ وان بۆ چاره‌سه‌ركرنا پرسا كوردی نینه‌، ژ به‌ر هندێ ژی ره‌وشا ئالۆز یا ل توركیا دێ به‌رده‌وام بیت.

پارتێن كوردی یێن باكورێ كوردستانێ د داخۆیانیه‌كێ دا دیار كرن كو به‌ری ده‌مه‌كێ شه‌ش پارتێن ئۆپۆزسیۆنا توركیا داخوازا گوهۆرینا دستوورێ توركیا كرن و به‌رنامێ خوه‌ ژی ئاشكرا كرن، لێ مخابن د پرۆژێ وان دا چو تشته‌ك ژ بۆ كوردان نینه‌، ئه‌و یه‌ك ژی نیشا دده‌ت كو ئۆپۆزسیۆنا توركیا ژی وه‌كو ده‌ستهه‌لاتێ هزر دكه‌ت و وان چو تشته‌ك بۆ كوردان نه‌ڤێت، ژ به‌ر هندێ ژی كورد ل باكورێ كوردستانێ و توركیا نه‌چار نینن كو پشته‌ڤانیێ ل ئۆپۆزسیۆنا توركیا بكه‌ن.

د داخۆیانیه‌كێ دا ئه‌و یه‌ك ژی هاتیه‌ دیار كرن كو نها توركیا به‌ر ب هه‌لبژارتنان ڤه‌ دچیت، پارتێن سیاسی ژی ده‌ست ب بزاڤه‌كا مه‌زن كرینه‌ و دخوازن پشته‌ڤانیا خه‌لكی بده‌ستڤه‌ بینن، لێ هه‌ر شه‌ش پارتێن ئۆپۆزسیۆنێ د به‌رنامێ خوه‌ دا به‌حسێ كوردان نه‌كرینه‌ ئانكۆ وان چو تشته‌ك بۆ كوردان نه‌ڤێت، بێگومان د ده‌مه‌كێ وه‌سا دا گوهۆرینا دستوورێ توركیا ژی بۆ كوردان چو ئه‌نجامێ خوه‌ نابیت، كورد ژی نه‌چار نینن پشته‌ڤانیێ ل ئۆپۆزسیۆنه‌كا وه‌سا بكه‌ن، ئانكۆ ژ بۆ كوردان چو جوداهی د ناڤبه‌را ده‌ستهه‌لاتێ و ئۆپۆزسیۆنێ دا نینه‌.

ئه‌و یه‌ك د ده‌مه‌كێ دایه‌ كو به‌ری چه‌ند رۆژان عه‌لی باباجان د داخۆیانیه‌كێ دا ب توندی ئێرشی ئه‌ردۆغانی كر و راگه‌هاند كو به‌ری نها ئه‌ردۆغانی دگۆت ئه‌ز دێ پرسا كوردی ل توركیا چاره‌سه‌ر كه‌م، لێ نها ژی ئه‌ردۆغان دبێژیت كو پرسا كوردی ل توركیا نینه‌ و ئه‌و یه‌ك ژی نیشا دده‌ت كو ئه‌ردۆغان تنێ ژ بۆ ده‌ستهه‌لاتێ كار دكه‌ت و چو به‌رنامێ ئه‌ردۆغانی بۆ چاره‌سه‌ركرنا پرسا كوردی ل توركیا نینه‌، لێ وه‌كو هێزێن ئۆپۆزسیۆنێ ئه‌و دشێن پرسا كوردی د چارچۆڤێ دستوورێ نوو یێ توركیا دا چاره‌سه‌ر بكه‌ن.

چاڤدێرێن سیاسی یێن كورد ل توركیا و باكورێ كوردستانێ ژی دیار دكه‌ن كو دڤێت كورد چاڤه‌رێی ده‌ستهه‌لات و ئۆپۆزسیۆنێ نه‌بن، چونكی ئه‌زموونێن چه‌ندین سالان بۆ هه‌ر كه‌سه‌كێ سه‌لماندیه‌ كو ده‌مێ بابه‌ت ببیته‌ پرسا كوردی ده‌ستهه‌لات و ئۆپۆزسیۆنا توركیا وه‌كو ئێك هزر دكه‌ن، تنێ د ده‌مێ هه‌لبژارتنان دا هنده‌ك سۆزان دده‌نه‌ كوردان و پشتی هه‌لبژارتنان ژی هه‌موو سۆزێن خوه‌ ژبیر دكه‌ن، ژ به‌ر هندێ ژی دڤێت هه‌موو پارت و ئالیێن سیاسی یێن كوردی ل توركیا و باكورێ كوردستانێ پێكڤه‌ به‌ره‌یه‌كێ نه‌ته‌وه‌یی ئاڤا بكه‌ن و پشكداریێ د هه‌لبژارتنان دا بكه‌ن، چونكی هه‌تا كورد ل توركیا بهێز نه‌بن ناگه‌هنه‌ مافێن خوه‌ یێن ره‌وا.

ئه‌ڤرۆ:

هیڤیدارین خه‌لكه‌ك بڕیارا كۆنگره‌ی و سه‌رۆك مه‌سعود بارزانی بۆ ڤه‌كرنا به‌رپه‌ره‌كێ نوو ب شێوازه‌كی دی تێنه‌گه‌هیت، به‌لكو وه‌سا تێبگه‌هیت كو ژ نیازپاكیا مه‌یه‌ بۆ خزمه‌تكرنا ڤی وه‌لاتی

پارتی دیموكراتی كوردستان د كۆنگره‌یێ خوه‌ یێ 14 دا ل باژێرێ دهۆكێ بڕیار دابوو به‌رپه‌ره‌كێ نوو ل گه‌ل ئالیێن سیاسی یێن هه‌رێما كوردستانێ ڤه‌كه‌ت و سه‌ره‌دانا هه‌موو حزبان بكه‌ت، په‌یڤدارێ پارتی ژی دبێژیت، هنده‌ك بڕیارێن كۆنگره‌ی و كۆمیته‌یا ناڤین بۆ خستنا سه‌رپێ یا ده‌زگه‌هێن پارتی یێن ماین و پشتی بجهئینانا وان دێ ده‌ست ب سه‌ره‌دانا هه‌موو ئالیێن سیاسی كه‌ین.

دوهی ئێكشه‌مبی مه‌حموود محه‌مه‌د، په‌یڤدارێ پارتی دیموكراتی كوردستان ل ده‌مێ ده‌ستبكاربوونا به‌رپرسێ مه‌كته‌با ڕێكخستنا سلێمانیێ – هه‌له‌بجه‌ یا پارتی، ڕاگه‌هاند” ئه‌م ل گه‌ل ئێكه‌تی نیشتمانی كوردستان دو حزبێن هه‌ڤڕكین، هیڤیا مه‌ ئه‌وه‌ ڕامانا هه‌ڤڕكیێ ل گه‌ل دژایه‌تیێ  دوژمنایه‌تیێ نه‌هێته‌ تێكهه‌لكرن. هنده‌ك جاران په‌یڤ دهێته‌ خواندن یان هنده‌ك دیدار دهێنه‌ كرن كو ناچنه‌ د خانه‌یا هه‌ڤڕكیێ دا و ب كه‌ربه‌كێ دچیت كو دخوازی ب ڕێیا ده‌زگه‌هێن ڕاگه‌هاندنێ بگه‌هینیه‌ یێ به‌رامبه‌ری خوه‌”.

په‌یڤدارێ پارتی دیموكراتی كوردستان ئه‌وژی گوت” ئه‌م ل سه‌ر كۆمه‌كا بابه‌تان بۆ خزمه‌تكرنا ڤی وه‌لاتی هه‌ڤڕكێن هه‌ڤدوینه‌، به‌لێ دبیت ڕێیێن مه‌ بۆ چاره‌سه‌ركرنا كێشه‌یان د جودا بن. هیڤیا من ئه‌وه‌ چاوان مه‌ بڕیارا كۆنگره‌ی و سه‌رۆك مه‌سعود بارزانی هه‌یه‌ بۆ وێ چه‌ندێ به‌رپه‌ره‌كێ نوو  ڤه‌كه‌ین، خه‌لكه‌ك ژی ڤه‌كرنا وی به‌رپه‌رێ مه‌ ب شێوازه‌كی دی تێنه‌گه‌هیت، به‌لكو وه‌سا تێبگه‌هیت كو ژ نیازپاكیا مه‌یه‌ بۆ خزمه‌تكرنا ڤی وه‌لاتی”.

بڕیار بوو پشتی كۆنگره‌یێ 14، پارتی سه‌ره‌دانا ئالیێن سیاسی یێن هه‌رێما كوردستانێ بكه‌ت، به‌لێ هه‌تا نوكه‌ وان سه‌ره‌دانان ده‌ست پێ نه‌كریه‌، مه‌حموود محه‌مه‌د، سه‌باره‌ت ڤێ چه‌ندێ دبێژیت”  كۆمه‌كا بڕیارێن كۆنگره‌ی و كۆمیته‌یا ناڤین یێن هه‌ین بۆ خستنا سه‌رپێ یا ده‌زگه‌هێن پارتی و پێدڤیه‌ بهێنه‌ بجهئینان. پاشی دێ ده‌ست ب سه‌ره‌دانا ئالیێن سیاسی یێن هه‌رێما كوردستانێ كه‌ین”.

په‌یڤدارێ پارتی ئاماژه‌كر ژی” دخوازین ب هه‌بوونا جوداهیان هه‌ڤدو قه‌بوول بكه‌ین و پێكڤه‌بوونا مه‌ ب وی ڕامانێ نینه‌ وه‌كو ئێك لێ بهێین، مه‌ د جوداینه‌ و جوداهیا مه‌ د چاره‌سه‌ریا كێشه‌یان دایه‌”.

مه‌حموود محه‌مه‌د خویاكر” هه‌كه‌ پارتی و ئێكه‌تی ل هه‌رێما كوردستانێ جوداهی هه‌بن، نابیت ل به‌غدا هه‌بن. دڤێت هه‌موو ئالی ب پارتی و ئێكه‌تی و كۆمه‌ل و ئێكگرتوو و گۆڕان و نه‌وه‌ی نوو پێكڤه‌ بین بۆ وێ چه‌ندێ گرانیه‌كێ بده‌ینه‌ پرۆسه‌یا سیاسی ئه‌وا كورد بڕێڤه‌ دبه‌ن و ئه‌و بابه‌تێن بۆ هه‌رێما كوردستانێ و ژیانا خه‌لكی دگرنگن، بجهبینین”.

په‌یڤدارێ پارتی دیموكراتی كوردستان دووپاتكر” دشیان دایه‌ ل هه‌رێما كوردستانێ ل دۆر هنده‌ك بابه‌تان مه‌ بۆچوونێن جودا هه‌بن و ل سه‌ر چاره‌سه‌ركرنا هنده‌ك كێشه‌یێن ناڤخوه‌یی د جودابین، به‌لێ ل به‌غدا دڤێت جوداهیا مه‌ ل گه‌ل خه‌لكه‌كی بیت كو دژی مافێن مه‌نه‌”.

سه‌باره‌ت چاره‌سه‌ریا كێشه‌یێن ئیراقێ و هه‌رێما كوردستانێ ل كابینه‌یا سه‌رۆك وه‌زیرێن ئیراقێ، محه‌مه‌د شیاع سودانی، مه‌حموود محه‌مه‌د دبێژیت” هه‌تا نوكه‌ كه‌لتوورێ چاره‌سه‌ركرنا كێشه‌یان ل ئیراقێ نه‌بوو، به‌لكو كه‌لتوورێ كۆمڤه‌كرنا كێشه‌یان ل سه‌ر ئێك و هه‌لگرتنا وان بۆ ده‌مه‌كی دی یێ به‌لاڤبوو، هیڤیا مه‌ ئه‌وه‌ ئه‌ڤ كه‌لتووره‌ ب دووماهی بهێت و د وێ ڕێككه‌فتنا سیاسی دا ئه‌وه‌ مه‌ ل گه‌ل ئالیێن سیاسی یێن ئیراقی گرێدای ئه‌ڤ كێشه‌یێن هه‌ین بهێنه‌ چاره‌سه‌ركرن”.

په‌یڤدارێ پارتی ئاماژه‌ ب وێ چه‌ندێ ژی كر” هه‌كه‌ ئومێده‌ك ژی ل ده‌ف مه‌ هه‌بیت ل سه‌ر وان ڕێككه‌فتن و دانوستاندنێن مه‌ ئه‌نجامداین و ئیمزا ل سه‌ر هاتیه‌ كرن، پێدڤیه‌ ئه‌وێن د خه‌ما ئێكپارچه‌ییا ئیراقێ و خه‌لكێ ئیراقێ دا، د ده‌مه‌كێ دیاركری دا دووماهیێ ب ڤی كه‌لتوورێ بینن و ڤان كێشه‌یان چاره‌سه‌ر بكه‌ن”.

ئه‌ڤرۆ:

شیره‌تكارێ سه‌رۆكێ حوكمه‌تا هه‌رێما كوردستانێ بۆ ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، ڕاگه‌هاند، دووباره‌ كاراكرنا ماده‌یێ 140 گاڤه‌كا باشه‌ و دڤێت پشته‌ڤانیێ لێ بكه‌ین، هه‌روه‌سا دبێژیت، بڕیارێن ئیداری و سیاسی یێن پشتی 16 ئۆكتۆبه‌رێ بۆ ب ئه‌ره‌بكرنێ هاتینه‌ ده‌ردكرن، به‌رۆڤاژی دستووری و قانوونێ نه‌ و پێدڤیه‌ هه‌موو بهێنه‌ هه‌لوه‌شاندن”.

ڕێبوار تاله‌بانی، شیره‌تكارێ سه‌رۆكێ حوكمه‌تا هه‌رێما كوردستانێ بۆ ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، گوت” دووباره‌ كاراكرنا ماده‌یێ 140 د په‌یڕه‌وێ وه‌زاری یێن محه‌مه‌د شیاع سودانی دا هاتیه‌ نڤیسین و ژڤانێ شه‌ش هه‌یڤان بۆ هاتیه‌ دانان بۆ بجهئینانا وی په‌یڕه‌وی و د پره‌نسیپێن په‌یڕه‌وی دا دێ هێته‌ هه‌لسه‌نگاندن، تاكو بهێته‌ زانین دێ چه‌ند ژێ هیچته‌ بجهئینان، كو ئه‌وژی جهێ دلخوه‌شیێ یه‌ و یێ جودایه‌ ل گه‌ل سه‌رۆكێن حوكمه‌تێن پێشتر كو وان تنێ سۆزا چاره‌سه‌ركرنا كێشه‌یان ددا، به‌لێ ئه‌و سۆز بجه نه‌دئینان”.

ڕێبواری گوت ژی” ئه‌ڤه‌ گاڤه‌كا باشه‌ و دڤێت پشته‌ڤانیێ لێ بكه‌ین، بۆ وێ چه‌ندێ بشێین ئه‌و كێشه‌یێن هه‌تا نوكه‌ د ناڤبه‌را مه‌ و به‌غدا ماین بهێنه‌ چاره‌سه‌ركرن”.

سه‌باره‌ت كاراكرنا ماده‌یێ 140 گوت” ئه‌و ماده‌یه‌ هه‌كه‌ بهێته‌ بجهئینان، ڕه‌نجا خه‌باتا به‌رده‌وام یا ملله‌تێ كورده‌ و خوینه‌كا زۆر یا هاتیه‌ ڕێتن بۆ وێ چه‌ندێ ناسنامه‌یا كه‌ركووكێ و ده‌ڤه‌رێن دی یێن كوردستانی بگه‌هیته‌ ئارمانج، هه‌ر ژ دروستبوونا بزاڤا ڕزگاریخوازا كورد داگیران ژڤێ كه‌یسێ نه‌كریه‌، حوكمه‌تا هه‌رێما كوردستانێ ژی ب كریار د دانوستاندنێن خوه‌دا به‌رده‌وام دووپاتی ل وی بابه‌تی كریه‌، به‌لێ مخابن هه‌موو جاران ئیراقێ ڕێككه‌فتن بجهنه‌ئینایه‌، هیڤیا مه‌ ئه‌وه‌ سه‌رۆكی وه‌زیران یێ نوو وێ گاڤێ بهاڤێژیت و ب گۆره‌ی دستووی كارێن خوه‌ بكه‌ت”.

ل دۆر نڤیسینگه‌هێن مادێ 140 ل كه‌ركووكێ و باژێرێن دی، گوت” نڤیسینگه‌ه مابوون، به‌لێ د كارا نه‌بوون و بودجه‌ بۆ نه‌دهاته‌ ته‌رخانكرن و ئه‌و ماده‌ و قانوونێن گرێدای ئاسانكاریان د بجهئینانا ماده‌یێ 140 بۆ نه‌ دهاتنه‌ ده‌ركرن، ئه‌م ب هیڤی نه‌ ڤێجارێ بكه‌ڤنه‌ سه‌ر خه‌ت و ڕژدیا زێده‌ترێڤه‌ دیار بیت، ئه‌وژی دڤێت چاڤه‌ڕێ بین ئه‌و شه‌ش هه‌یڤه‌ دێ سه‌لمینن ئایا ئه‌وا د په‌یڕه‌وا وه‌زاری یا سودانی دا هاتی دێ هێته‌ بجهئینان یان دێ هه‌ر وه‌كو پێشتر بیت، یان ژی تنێ قه‌ره‌بووكرنه‌، هه‌كه‌ تنێ قه‌ره‌بووكرن بیت، 10 ملیۆن دینار بۆ ئاواران و 20 ملیۆن دینار بۆ هاوردان باوه‌رناكه‌م هیچ تشته‌ك بیت، چونكه‌ كێشه‌یێن كوردان ل گه‌ل ئیراقێ پرسا پاره‌ی نه‌بوو، به‌لكو بابه‌تێ ئاخێ بوو و دخوازین ڕه‌وش بهێته‌ ئاساییكرن، سه‌رژمێری و ڕاپرسی بهێنه‌ ئه‌نجامدان و ئه‌و ده‌ڤه‌رێن ژ كه‌ركووكێ هاتینه‌ دابرین بهێنه‌ ڤه‌گه‌راندن و ئه‌و ده‌ڤه‌رێن هاتینه‌ ب سه‌ر ڤه‌ بهێنه‌ لادان”.

ل دۆر وێ هه‌وا ب ئه‌ره‌بكرنێ ئه‌وا د ده‌مێ پێنج سالێن بۆری و هه‌تا نوكه‌ دهێته‌ ئه‌نجامدان، چه‌ند بۆ دڤێت هه‌تا شوونوارێن وێ بهێنه‌ ژناڤبرن، ڕێبواری گوت” هێشتا شوونوارێن ب ئه‌ره‌بكرنێ یێن سه‌رده‌مێ به‌عسیان مابوون و نه‌هاتبوونه‌ ئێكلاكرن، ئه‌ڤجا ئه‌وا 16 ئۆكتۆبه‌رێ ژی هاته‌ سه‌ر، پێدڤیه‌ بڕیارێن جڤاتا ب ناڤێ شۆڕه‌شێ یا سه‌رده‌مێ به‌عسی بهێنه‌ هه‌لوه‌شاندن و هه‌روه‌سا ئه‌و بڕیارێن كو بۆ ب ئه‌ره‌بكرنێ د ده‌مێ ڤان پێنج سالێن بۆری دا هاتینه‌ ده‌ركرن، ئه‌وژی بهێنه‌ هه‌لوه‌شاندن، چونكه‌ ئه‌وا بۆ ب ئه‌ره‌بكرنێ پشتی 16 ئۆكتۆبه‌رێ چ بڕیارێن ئیداری یان سیاسی بن، هه‌موو به‌رۆڤاژی دستووری و قانوونێ نه‌ و پێدڤیه‌ بهێنه‌ هه‌لوه‌شاندن و وێ چه‌ندێ ژی گاڤ بۆ دڤێن”.