ئه‌ڤرۆ نيوز:
ب گه‌هشتنا هه‌ردو به‌ره‌يێن عه‌ين عيسا و سلۆك ل باكوورێ باژێرێ ره‌ققه دووماهى ب پێنگاڤا ئێكێ يا ئۆپه‌راسيۆنا تۆره‌ييا فۆرات هات.
ئه‌و هێزێن ژ سلۆك پشكدارى ئۆپه‌راسيۆنێ بووين، 30 كيلۆمه‌تران پێشڤه‌چوون كرينه و هێزێن دى يێن ل عه‌ين عيسا 15 كيلۆمه‌تران پێشڤه‌چوون كرينه، ل دووماهيێ ل رووبارێ به‌لز ل باكوورێ ره‌ققه گه‌هشتنه ئێك.
ئەڤرۆ نیوز،زنار تۆڤی:
لدمژمێر 10:45 خۆلەک و ل رۆژا ئەینی 11.11.2016 جارەکادی تۆپخانەیا سۆپایێ تورکی دەڤەرا بەرواری بالا بوردۆمانکر. ئەڤرۆ ل رۆژا ئەینی 11.11.2016 ب مەرەما هەبوونا چەکدارێن پەکەکێ تۆپخانەیا سۆپایێ تورکی چەندین جهێن جۆدا ل دەڤەرا بەرواری بالا تۆپ بارانکرینە و هەتاکو نوکە پتری 10 گۆلە تۆپ ل وان جهان داینە و نوکەژی تۆپ باران یا بەردەوامە،دیسا ئەڤە ماوێ سێ رۆژانە ل سەر ئێک ئەو جهە دهێنە تۆپ بارانکرن.
ئه‌ڤرۆ نيوز:
پالپشت ب نڤیسارا وەزارەتا خواندنا بلند و ڤەکولینێن زانستی یا ژمارە (١٥٦٨٩) ل) ٢٣/١٠/٢٠١٦) یا تایبەت ب خواندنا بلند/ ماستەرێ، ئــاگەهداريا هەوەیێن بەرێز دکەین لدور راگەهاندنا (٣٠) کورسیێن خواندنا بلند (ماستەرێ) ل پەیمانگەها چارەسەریا دەرونى و چارەسەریا تراوما/ زانکویا دهوک ب هەماهەنگى د گەل وەزارەتا زانستیا ئەلمانى و زانکۆیا (The state University of baden-Wurttermberg, University of Tubingen Germany) بۆ سالا خواندنێ (٢٠١٦-٢٠١٧) دگەل هەمی مەرجـێن پێتڤى بو وەرگرتنێ و هــەر كەسەكێ حــەز بكـەت بــلا داخــوازيـا خـۆ پێشكێش بكــەت ل رێڤەبەریا خواندنا بلند ل سەروکاتیا زانکویا دهوک ل دویف مــەرج و بەلگەنامێـن ديــاركرى د لــيستا هەڤپێـچ دا و هــەر ژ روژائێک شەمبى رێککەفتى (١٣/١١/٢٠١٦) تا كۆ روژاسێ شەمبى رێککەفتى (١٣/١٢/٢٠١٦) دگەل رێزگرتنێ.
بۆ پتر پێزانينان سه‌را ڤى لينكێ ل خوارێ بده‌ن
ئه‌ڤرۆ نيوز:
ژ ئه‌گه‌رێ مه‌ترسيا هه‌بوونا كرياره‌كا تيرورستى، ئه‌ڤرۆ بۆ ماوێ 20 خوله‌كان فرۆكخانا نێڤده‌وله‌تى يا ئوسلو ل نه‌رويج ژ گه‌شتياران هاتيه چولكرن.
ئاودى عومه‌ر كو هاولاتيه‌كێ باشوورى كوردستانێ يه بۆ ئه‌ڤرۆ نيوز گوت:پشتى ئه‌ز ئه‌ڤرۆ ل كوردستانێ به‌ره‌ڤ نه‌رويج ڤه چوويم و ل ده‌مژمێر 4 و 20 ده‌قيقه ل ده‌مێ ئوروپا، ئه‌ز گه‌هشتمه فرۆكخانا نه‌رويج يا نێڤده‌وله‌تى، به‌لێ پوليسێن ئێمناهيا فرۆكخانێ هه‌موو گه‌شتيار ئاگاداركرن كو فرۆكخانێ چول بكه‌ن ژ ئه‌گه‌رێ هه‌بوونا مه‌ترسيه‌كێ ل سه‌ر فرۆكخانێ و مه هه‌مى گه‌شتياران هه‌روه‌ها هه‌تا كارمه‌ندێن فرۆكخانێ ژى فروكخانه چول كر كو نێزيكى 5 هزار كه‌س هه‌بوون.
ئەڤرۆ نیوز،زنار تۆڤی:
ئەڤرۆ رۆژا پێنجشەمبی 10-11-2016 جارەکادی تۆپخانەیا سۆپایێ تورکی دەڤەرا بەرواری بالا بوردۆمانکر.
لدەمژمێر 12 نیڤرۆیا رۆژا پێنجشەمبی تۆپخانەیا سۆپایێ تورکی سەرکێ دێشێشێ و دەردورا گوندێ سەرەرو و هەروەسا دەرارێ و تەبالا یا ب سەر گوندێ هرۆرێ ڤە ل دەڤەرا بەرواری بالا بۆ ماوێ پتر ژ دەمژمێرەکێ تۆپ بارانکر و پتری 15 گۆلە تۆپ ل وان جهان داینە و نوکەژی تۆپ باران یا بەردەوامە.
ئەڤرۆ نيوز:
رێڤەبەرێ کۆچ و کۆچبەران ل پارێزگەھا ھەولێرێ ئاشکرا کر کو ل حەفتیا داھاتی ب رێیا فرۆکخانا نێڤدەولەتی یا ھەولێرێ تەرمێن دو پەنابەرێن کورد دێ بۆ ھەرێما کوردستانێ ھێنە ڤەگەڕاندن.
نەزھەت حسێن، رێڤەبەرێ کۆچ و کۆچبەران ل پارێزگەھا ھەولێرێ دیار کر کو رۆژا چارشەمبی یان پێنجشەمبی یا حەفتیا داھاتی تەرمێن دو پەنابەرێن کورد ژ بۆلگاریا ب رێیا فرۆکخانا نێڤدەولەتی یا ھەولێرێ دێ بۆ ھەرێما کوردستانێ ھێنە ڤەگەڕاندن و بۆ دواڕۆژ گۆت: “ئەو دو تەرمێن کو دێ بۆ ھەرێمێ ھێنە ڤەگەڕاندن ل دەستپێکا ھەیڤا تەباخا سالا 2016ێ بەر ب ئورۆپا چووبوون و ل رۆژا 5/9/2016ێ گەھشتبوونە بۆلگاریا و ل رۆژا 8/9/2016ێ دناڤبەرا بۆلگاریا و ئەلمانیا دا خەندقین”.
ناڤھاتی ئاماژە دا وێ چەندێ کو ئێک ژ وان کەسێن کو دێ تەرمێن وان بۆ ھەرێمێ ھێنە ڤەگەڕاندن ب ناڤێ (ھەیام کاروان فکری)یە خەلکێ قەزا شێخان یا سەر ب پارێزگەھا دھۆکێ ڤە یە و یێ دی ژی خەلکێ رۆژئاڤایێ کوردستانێ یە و گۆت: “ل حەفتیا داھاتی ب رێیا فرۆکخانا نێڤدەولەتی یا ھەولێرێ دێ تەرمێن وان ل سەر ئەرکێ نڤیسینگەھا سەرۆکێ حوکمەتا ھەرێما کوردستانێ بۆ ھەرێمێ ھێنە ڤەگەڕاندن”.
ئه‌ڤرۆ نيوز:
ھێزێن پۆلیسان ھەڤژینا بەرێ یا دکتۆر ئاشتی ھەروامی وەزیرێ سامانێن سرۆشتی ل حوکمەتا ھەرێما کوردستانێ ب تۆمەتا گەندەلیێ و کڕین و فرۆتنا چەکێن بەلێندەران دەستەسەرکر و سەرۆکێ دەستەیا دەستپاکیێ ژی دبێژیت، چراخانێ مامەلە ب چەکێن بەلێندەران کرینە و ل گۆرەی قانوونێ قەدەغەیە مامەلە بڤان چەکا بھێتەکرن.
رائید ھۆگر عەزیز، پەیڤدارێ پۆلیسێن پارێزگەھا ھەولێرێ بۆ رۆژناما ئەڤرۆ ئاشکرا کر کو دوھی رۆژا 9/11/2016ێ ھێزەکا پۆلیسان ل سەر سکالایەکا دەستەیا دەستپاکیێ شیاینە بازرگان چراخان رەفیق ھەڤژینا بەرێ یا دکتۆر ئاشتی ھەورامی وەزیرێ سامانێن سرۆشتی ل حوکمەتا ھەرێما کوردستانێ دەستەسەربکەن و گۆت: “چراخان رەفیق ب تۆمەتا بازرگانیکرنێ ب چەکێن بەلێندەران و فرۆتنا وان د بازاڕی دا ھاتیە دەستەسەرکرن”.
دکتۆر ئەحمەد ئەنوەر، سەرۆکێ دەستەیا نەزاھێ ل ھەرێما کوردستانێ بۆ رۆژناما ئەڤرۆ دیار کر کو حوکمەتا ھەرێما کوردستانێ بەری نوکە مامەلەکرن ب چەکێن بانکی و بەلێندەرا قەدەغەکربوو و ل گۆرەی قانوونێ ژی قەدەغەیە، بەلێ چراخانێ کڕین و فرۆتن ب چەکێن بەلێندەرا کریە، لەوڕا ژ لایێ ھێزێن پۆلیسان ڤە ھاتیە دەستەسەرکرن و تۆمەتبارە ب فرۆتنا چەکێن بەلێندەرا، چونکی ئەڤ چەکە بتنێ وەکو گەرەنتیێ داینە بەلێندەران کو حوکمەت قەڕدارێ وانایە.
ژلایێ خۆڤەژی چراخان رەفیق بۆ دەزگەھێن راگەھاندنێ دیارکریە، دادگەھەکا ھەولێرێ ب تۆمەتا کڕین و فرۆتنا چەکێن بەلێندەرا چار سال سزا ب سەر وێ دا سەپاندینە و رەتکر ژی دەست د گەندەلیێ دا ھەبیت.
ئەڤرۆ نيوز:
وەزیرێ دارایی یێ حوکمەتا عیراقێ ب وەکالەت بۆچوونا سەرۆک وەزیرێن عیراقێ ل دۆر ھنارتنا پارەکێ تایبەت بۆ مامۆستایێن ھەرێما کوردستانێ دیار دکەت و راگەھاند، عەبادی دڤێت پارەکێ زۆر بۆ وەزارەتا پەروەردا حوکمەتا ھەرێما کوردستانێ بھنێریت و نوکە ل میکانزمەکێ بۆ ھنارتنا وی پارەی دگەریێت.
فازل نەبی، بریکارێ وەزارەتا دارایی یێ عیراقێ ئاشکرا کر، دەربارەی مووچێ مامۆستایێن ھەرێما کوردستانێ، وی پرسیار ئاراستەی حەیدەر عەبادی کریە، کا چ مەرەم ھەیە و دێ چاوا شێت ھاریکاریا وەزارەتا پەروەردا ھەرێما کوردستانێ کەت و گۆت: “عەبادی دیارکریە کو ئەو یێ بەرھەڤە پارەکێ زۆر بۆ ھەرێما کوردستانێ بھنێریت”.
بریکارێ وەزارەتا دارایی یێ عیراقێ خویا ژی کر، عەبادی ھزرا ھنارتنا مووچەی و کۆژمەکێ پارەی بۆ پەروەردا ھەرێما کوردستانێ یا ھەی، لێ نوکە ل میکانزما ھنارتنا وی پارەی دگەریێت ھەتا بجە بینیت.
د چارچوڤێ دیدارەکێ دا ل گەل رادیۆیا نەوا، فازل نەبی ئاشکرا کر، حەیدەر عەبادی و وەزیرێن کابینا وی، دیتنا وان دەربارەی کورد و ھەرێما کوردستانێ و پێشمەرگەی ھاتیە گوھۆرین و یا ئەرێنیە.
نيشاندان