ئەڤرۆ نيوز:
پەیڤدارێ وەزارەتا دەرڤە یا ئیرانێ بەھرام قاسمی د داخۆیانیەکێ دا راگەھاند کو ھەرێما کوردستانێ بۆ ئیرانێ خوەدان گرنگیەکا خوە یا تایبەتە و سەرەرای ھندەک ناکۆکیان ئیرانێ بزاڤ کریە کو ھەموو گاڤان پەیوەندیێن خوە ل گەل ھەرێما کوردستانێ باش بکەت و نھا ئەم بزاڤی دکەین جارەکا دی پەیوەندیێن خوە بەر ب قۆناغەکا دی یا باش ببەین و ژ بەر ھندێ ژی سەرەدانا سەرۆکێ ھەرێما کوردستانێ بۆ ئیرانێ گەلەکا گرنگە.
پەیڤدارێ وەزارە تا دەرڤە یا ئیرانێ ئەو یەک ژی راگەھاند کو وان دڤێت ھەرێما کوردستانێ پەیوەندیێن خوە ل گەل بەغدایێ ژی باش بکەت، چونکو ھەر دو ئالی دشێن پێکڤە ناکۆکیێن خوە چارەسەر بکەن و ھەروەسا دشێن داعشێ ب تەمامی ل عیراقێ دەرخینن، ژ بەر ھندێ ژی ئیرانێ دڤێت ھەموو دەمان پەیوەندیێن ھەرێما کوردستانێ و عیراقێ ئاسایی ببن و گۆت: (مە ھەتا نھا بزاڤێن گەلەک مەزن کرینە کو ھەر دو ئالی پێکڤە پرسێن د ناڤبەرا خوە دا چارە بکەن و مە پێ باشە ھەر دو ئالی ھەمی گاڤان پێکڤە دانوستاندنان بکەن و ئەو یەک بۆ ئارامیا عیراقێ و ھەرێما کوردستانێ و ھەتا ئیرانێ ژی گرنگە).
سەبارەت ب ئۆپەراسیۆنا تورکیا د ناڤ ئاخا سووریێ دا ژی ناڤھاتی دیار کر کو ھەر ھێز و ئالیێ کو شەرێ تیرۆرێ بکەت ئەم پێشوازیێ لێ دکەین و مە پێ باشە کو تورکیا ل دووڤ چ ئارمانجێن دی نەبیت، چونکو ھێشتا سەبارەت ب پاشەرۆژا سووریێ ناکۆکیێن مەزن د ناڤبەرا مە و تورکیا دا ھەنە و ژ بەر ھندێ ژی ئەم دووڤچوونا ئۆپەراسیۆنا تورکیا دکەین و مە دڤێت تورکیا رێزێ ل سەروەریا سووریێ بگریت و وەکو وەلاتەک جیران ھاریکار بیت بۆ ژناڤچوونا داعشێ.

ئەڤرۆ:

رۆژنامەکا تورکیا دیار دکەت کو د کۆمبوونا ل چینێ یا د ناڤبەرا سەرۆک کۆمارێ تورکیا ل گەل سەرۆکێ ئەمریکا ئەردۆگانی داخواز ژ ئۆبامای کریە کو پشتەڤانیێ ل یەپەگێ و ھێزێن سووریا یا دیموکراتیک نەکەن و ھەروەسا باژێرێ منبجێ ژی رادەستی وان بکەن دا ئەو ھەرێمەکا ئارام دروست بکەن و ئۆبامای ژی راگەھاندیە کو دێ ھێزێن عەرەب منبجێ برێڤە ببەن و ھەرێما ئارام ژی د بەرنامێ ئەمریکا دا نینە.
رۆژناما حوریەت یا تورکیا دوھی راپۆرتەک سەبارەت ب ناڤەرۆکا کۆمبوونا سەرۆک کۆمارێ تورکیا رەجەب تەیب ئەردۆگان و سەرۆکێ ئەمریکا باراک ئۆبامای ل چینێ بەلاڤ کر و د راپۆرتێ دا ھاتیە دیار کرن کو ئەردۆگانی داخواز ژ ئۆبامای کریە کو د زووترین دەم دا فەتحوللو گولەنی ب تومەتا بزاڤا کۆدەتایێ ل دژی دەولەت و حوکمەتا تورکیا رادەستی وان بکەت و ھەروەسا دڤێت ئەمریکا پشتەڤانیێ ل یەپەگێ و ھێزێن سووریا یا دیموکراتیک نەکەت.
د بەردەوامیا راپۆرتێ دا ئەو یەک ژی ھاتیە دیار کرن کو ئەردۆگانی ژ بۆ ئۆبامای دیار کریە کو دڤێت ئەمریکا و ھێزێن ھەڤپەیمانان یەپەگێ و ھێزێن سووریا دیموکراتیک ژ منجبێ دەربخینن و وی باژێری رادەستێ تورکیا بکەن. چونکو تورکیا دڤێت ھەرێمەکا ئازاد ل سەر سنۆرێ خوە ل گەل تورکیا دروست بکەت.
د پشکەکا دی یا راپۆرتێ دا بەحسێ ھەلویستێ ئۆبامای ھاتیە کرن، سەرۆکێ ئەمریکا دیار کریە کو یەپەگێ سۆزا خوە بجە ئینایە و ھەموو ھێزێن خوە ڤەکێشاینە رۆژھەلاتێ فراتێ و سەبارەت ب باژێرێ منبجێ ژی ئۆبامای دیار کریە کو چو ھێزێن یەپەگێ ل منبجێ نەماینە و ئەو ھێزێن نھا ل وی باژێری ماینە ھێزێن عەرەبن کو سەر ب ھێزێن سووریا دیموکراتیکن و وان ھێزان بۆ ئازادکرنا منبجێ ژ دەستێ داعشێ گەلەک قوربانی داینە و ئەو دێ باژێرێ خوە پارێزن.
سەبارەت ب ھەلویستێ ئۆبامای ل دۆر رادەستکرنا فەتحوللا گولەنی ژی رۆژناما تورکیا دیار کریە کو ئۆبامای دیار کریە ئەو بەرھەڤن ژ بۆ دادگەھکرنا کەسێن کو دەستێ وان ل بزاڤا کۆدەتا یا سەربازی ل تورکیا ھەبوون ھاریکاریا ئەنقەرە بکەن لێ ئۆبامای ب چو رەنگەکێ بەحسێ رادەستکرنا فەتحوللا گولەنی نەکریە.
ل ئالیێ دی چاڤدێرێن سیاسی یێن تورکیا ژی دیار دکەن ل دەمێ کۆمبوونا ئەردۆگان و ئۆبامای دا نوونەرێ تایبەت یێ ئۆبامای بۆ شەرێ ل دژی داعشێ بریت ماکگورک سەرەدانا رۆژئاڤایێ کوردستانێ کریە و پشتەڤانیا ئەمریکا بۆ یەپەگێ و ھێزێن سووریا یا دیموکراتیک د شەرێ ل دژی داعشێ دا دیار کریە کو راگەھاندیە کو ئەمریکا دەستان ژ پشتەڤانی کرنا وان ھەر دو ھێزان بەرنادەت و ئەو یەک ژی نیشا ددەت کو ئەمریکا پرانیا داخوازیێن ئەردۆگانی رەد کرینە و سەرەرای ھەلویستێ نەرم یێ ئۆبامای لێ ئەمریکا ژ نێزیکبوونا تورکیا و روسیا یا دلگرانە.