ئه‌ڤرۆ نيوز:

رێکخراوا مافێ مرۆڤی یا ئامەدێ د راپۆرتەکێ دا دیار کریە کو پشتی ٨ مەھان ژ قەدەغەیا ھاتن و چوونێ و بارێ نەئاسایی ل باژێرێ شەرنەخێ سێ رۆژن ل باژێرێ قەدەغەیا ھاتن و چوونێ ھاتیە راکرن و نھا باژێر ب تەمامی وێران بوویە و کێر ژیانێ ناھێت و یا ل شەرنەخێ روو دای چو جوداھیا خوە ل گەل حەلەبێ و باژێرێن دی یێن سووریێ نینە و لەشکرێ تورکیا ب چەکێن گران مالێن خەلکێ وێران کرینە.
رێکخراوا مافێ مرۆڤی یا ئامەدێ دوھی د راپۆرتەکێ دا راگەھاند کو پشتی ھەشت مەھان ژ شەری و راگەھاندنا بارێ نەئاسایی ل شەرنەخێ پارێزگارێ شەرنەخێ سێ رۆژ بەری نھا قەدەغەیا ھاتن و چوونێ راکر و تیمەکا سەر ب رێکخراوا مە سەرەدانا شەرنەخێ کریە و براستی ژی دیمەنێن ل شەرنەخێ گەلەک دلتەزینن و ئەو باژێر ب تەمامی وێران بوویە.
پارێزەر ئەحمەد ئایھان ژ رێکخراوا مافێ مرۆڤی یا ئامەدێ دیار کریە کو پشتی مە سەرەدانا شەرنەخێ کری و دیمەنێن باژێرێ دیتی براستی ژی مرۆڤ ھەست نەدکر کو ئەو باژێر شەرنەخ بیت، مرۆڤی ھەست دکر کو ھاتیە تاخەکا حەلەبێ، چونکو خەلکێ شەرنەخێ دیار کرن کو ھێزێن لەشکرێ تورکیا ب چەکێن گران و فرۆکێن شەری ھەموو تاخێن باژێرێ بۆمبەباران دکرن و ژ بەر بۆمبەباران فرۆکان و چەکێن گران ب دەھان وەلاتیێن سڤیل شەھید کەڤتن و وان نەدشیان برینداران ژی ببەنە خوشخانان و گۆت: (براستی ژی یا ل باژێرێ شەرنەخێ روو دای وەکو شەرێ ناڤخوەیی یێ سووریێ یە و ئەو یەک ژی نیشا ددەت کو رەوشا ناڤخوەیی یا تورکیا گەلەکا خرابە و حوکمەتا ئاکپارتیێ ب ھەموو شیانێن خوە بزاڤێ دکەت کو راستیێن ل باژێرێن باکورێ کوردستانێ روو ددەن بۆ رایا گشتی ئاشکرا نەبیت و ژ بەر ھندێ ژی گەلەک رۆژنامە و دەزگەھێن راگەھاندنێ یێن کو راستیێن باکورێ کوردستانێ بەلاڤ دکرن ژ ئالیێ حوکمەتێ ڤە ھاتنە داخستن).
ناڤھاتی ئەو یەک ژی دیار کریە کو دیمەنێن دلتەزینێن ل شەرنەخێ و یێن بەرێ ل باژێرکێ سورێ ژی نیشا ددەن کو حوکمەتا ئاکپارتی چو وانە ژ دیرۆکا تورکیا وەرنەگرتینە، چونکو حوکمەتێن بەرێ ژی ب سالان بزاڤ کرن کو ب رێیا کوشتن و وێران کرن و دەرخستنا کوردان ژ مالێن وان پرسا کوردی ژناڤ ببەن، لێ نەشیان سەربکەڤن و ژ بەر ھندێ ژی دڤێت ئەردۆگان دەستان ژ کوشتنا کوردان بەردەت و جارەکا دی بزاڤێ بکەت پرسا کوردی ب رێیا ئاشتیێ و دوور ژ شەری چارە بکەت.
ل ئالیێ دی چەندین دەزگەھێن راگەھاندنێ یێ سەر ب حوکمەتا تورکیا ژی راگەھاندن کو ھێزێن تورکیا شیاینە شەرنەخێ ژ تیرۆرستان پاقژ بکەن و ل ھەر جھەکێ پێدڤی بیت دێ شەرێ تیرۆرێ ھێتە کرن و ھەتا پەکەکێ دەستان ژ چەکی بەرنەدەت و چالاکیێن خوە ل دژی تورکیا نەدەتە راگرتن دێ ئۆپەراسیۆن بەردەوام بن.
رۆژناما یێنی شەفەق یا تورکیا کو رۆژنامەکا سەر ب ئاکپارتی یە د راپۆرتەکێ دا دیار کریە کو چو راستی بۆ ھندێ نینن کو دبێژن ژ بەر ئۆپەراسیۆنێن ل شەرنەخ و باژێرێن دی وەلاتیێن سڤیل بووینە قوربانی، چونکو یێن ھاتینە کوشتن ھەموو تیرۆرست بووینە و دێ شەرێ ل دژی تیرۆرێ ژی ب ھەموو رەنگەکێ بەردەوام بیت.
ل ئالیێ دی پشتی سەرەدانا خوە یا بۆ تورکیا فرانگ ڤالتەر شتانمایەر وەزیرێ دەرڤە یێ ئەلمانیا راگەھاند کو پەیوەندیێن ئەلمانیا و تورکیا گەلەک ئالۆزن و د ھەڤدیتنا ل گەل سەرۆک کۆمار و سەرۆک وەزیران ژی دیار بوویە کو ئاریشێن ناڤبەرا مە دا گەلەک مەزنتر لێ ھاتینە و ب سەرەدانەکێ مرۆڤ نەشێت بەحسێ چارەکرنا ئالۆزیێن ھەر دو وەلاتان بکەت. ئەو داخۆیانیا وەزیرێ دەرڤە یێ ئەلمانیا پشتی ھندێ ھات کو بەری چەند ھەفتیان بەرپرسێن تورکیا دیار کرن ئەلمانیا پشتەڤانیێ ل تیرۆرێ دکەن و ئەلمانیا ژی ب توندی بەرسڤا تورکیا دا و راگەھاند دڤێت تورکیا دەستان ژ کوشتنا کوردان بەردەت.

ئه‌ڤرۆ نيوز، نيوار محه‌حه‌د سه‌ليم:

وه‌زاره‌تا پێشمه‌رگه‌ى بێ ئاگه‌هيا خوه‌ نيشان دا ل دۆر هه‌ر رێكه‌فتنه‌كێ بۆ ڤه‌كێشانا پێشمه‌رگه‌ى ژ ده‌ڤه‌رێن به‌رى شه‌رێ داعش و ته‌كست كر كو ئه‌وان سوزێن ژ وى ره‌نگى نه‌داينه‌.

ل گه‌ل پێشڤه‌چوونێن هێزێن عيراقى ل شه‌رێ مووسل ماوێ چه‌ند رۆژايه‌ به‌رپرسێن عيراق و ئه‌مريكا به‌حس ل ڤه‌كێشانا پێشمه‌رگه‌ى ژ وان ده‌ڤه‌ران دكه‌ن يێن به‌رى شه‌رێ داعش لێ بنه‌جهـ بووين، د ده‌مه‌كى دا پێشمه‌رگه‌ى د شه‌رێ دژى داعش دا روويه‌كێ گه‌له‌ك مه‌زن يێ ئه‌ردى كونترۆل كريه‌.

ئه‌ليزابێس ترودۆ، رێڤه‌به‌را ئۆفيسا راگه‌ها راگه‌هاندنا وه‌زاره‌تا ده‌رڤه‌ يا ئه‌مريكا، دوهى د كۆنگره‌كێ رۆژنامه‌ڤانى دا، ل دۆر ڤه‌كێشانا پێشمه‌رگه‌ى پشتى شكه‌ستنا داعش، بۆ وان ده‌ڤه‌ران به‌رى هاتنا رێكخراوێ لێ بنه‌جهـ بووين و گۆت: “پێشمه‌رگه‌ى ب خوه‌ ئه‌و گۆتيه‌ و مه‌ ژى ژێ خواستيه‌ ل دووڤ گۆتنێن خوه‌ سه‌ره‌ده‌ريێ بكه‌ن”.

هه‌لگۆرد حكمه‌ت، رێڤه‌به‌رێ راگه‌هاندنا وه‌زاره‌تا پێشمه‌رگه‌ى بۆ ئه‌ڤرۆ نيوز گۆت: “ئه‌وان وه‌كو وه‌زاره‌تا پێشمه‌رگه‌ى لايه‌نێ بجهئينانێ نه‌ و فه‌رماندێ گشتى يێ هێزێن چه‌كدار بڕيارێ دده‌ت و هه‌ر تشته‌كێ ئه‌و ب بێژيت ئه‌و دێ بجهـ ئينن و چاڤه‌رێ فه‌رمانا وى نه‌ د وێ ده‌ربارێ دا”.
هه‌لگۆرد ل گه‌ل هندێ كو بێ ئاگه‌هيا خوه‌ نيشان دا كو چو رێكه‌فتنێن ژ وى ره‌نگى هاتبيته‌ كرن كو پێشمه‌رگه‌ خوه‌ ژ وان ده‌ڤه‌ران ڤه‌كێشت و ته‌كست ل سه‌ر وێ چه‌ندێ كر”مه‌ بۆ ڤه‌كێشانێ سوز نه‌دايه‌ ئه‌مريكا”.

هه‌ر چه‌نده‌ به‌رى نوكه‌ پرۆتۆكوله‌كا لێكتێگه‌هشتنێ د ناڤبه‌را هه‌رێما كوردستانێ و ئه‌مريكا دا هاتبوو ئيمزاكرن و چه‌ندين خالا ب خوه‌ ڤه‌گرتبوون، به‌لێ ب گۆره‌ى نوونه‌رێ هه‌رێمێ د شانا راگه‌هاندنا شه‌رى يا هێزێن عيراقى د شه‌رێ مووسل دا، چ برگه‌يه‌كا ژ وى ره‌نگى تێدا نينه‌ كو دڤێت پشتى ئازادكرنێ پێشمه‌رگه‌ ژ وان ده‌ڤه‌ران خوه‌ ڤه‌كێشن، به‌لكو تێدا هاتيه‌ كو دڤێت رێكه‌فتنه‌كا سياسى ل سه‌ر بهێته‌ كرن.

ئه‌ڤه‌ د ده‌مه‌كى دايه‌ كو ل 8ى ڤێ هه‌يڤێ حه‌يده‌ر عه‌بادى سه‌رۆك وه‌زيرێن عيراقێ راگه‌هانديه‌ كو پشتى ب دووماهى هاتنا شه‌رێ ئازادكرنا مووسل، سۆپايێ عيراقێ دێ ژ ئاخا هه‌رێمێ ده‌ركه‌ڤيت و پێشمه‌رگه‌ ژى دێ چيته‌ وان ده‌ڤه‌رێن به‌رى نوكه‌، ب گۆره‌ى رێكه‌فتنا ل گه‌ل به‌رپرسێن پله‌ بلندێن هه‌رێمێ.
هێزێن پێشمه‌رگه‌ى ل شه‌رێ دژى داعش پێشڤه‌چوونێن مه‌زن كرينه‌ و هه‌موو ئه‌و ده‌ڤه‌ر كونترۆل كرينه‌ يێن ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ دهێنه‌ ب ناڤكرن.