ئه‌ڤرۆ:

مه‌زلوم عه‌بدی فه‌رماندارێ گشتی یێ هێزێن سووریا دیموكرات راگه‌هاند كو له‌شكرێ سووریێ دێ ل ده‌ڤه‌رێن سنۆری یێن ل گه‌ل توركیا بجه بن و نها هێزێن سووریێ ل كۆبانێ و ده‌ڤه‌رێن دی بجه بووینه‌ ئارمانجا سه‌ره‌كی یا رێككه‌فتنا مه‌ و شامێ ژی بۆ هندێ یه‌ دا رێ نه‌ده‌ین توركیا ئاخا سووریێ و رۆژئاڤایێ كوردستانێ داگیر بكه‌ت.

پشتی ئاخڤتنا مه‌زلوم عه‌بدی هاته‌ زانین كو هێزێن رژێما سووریێ‌ ل كۆبانێ، تل رفعه‌تی، منبجێ و گه‌له‌ك ده‌ڤه‌رێن دی یێن سنۆری ل گه‌ل توركیا بجه بووینه‌ و هێزێن رژێما سووریێ ب چه‌كێن گران ل ده‌ڤه‌رێن ستراتیژی بجه بووینه‌ دا رێگریێ ل ئۆپه‌راسیۆنه‌كا نوو یا توركیا بۆ سه‌ر رۆژئاڤایێ كوردستانێ بكه‌ن.

ل ئالیێ دی ئاژانسا سپوتینگ یا رۆسیا ژی راگه‌هاند كو چه‌ند رۆژن رۆسیا هێزێن خوه‌ ل قامشلۆ، كۆبانی و چه‌ندین ده‌ڤه‌رێن دی یێن رۆژئاڤایێ كوردستانێ بجه كرینه‌ و ب تایبه‌تی ژی به‌ری دو رۆژان رۆسیا هێزه‌كا زێده‌ ل گه‌ل چه‌كێن گران بریه‌ باژێرێ كۆبانێ و ئه‌و یه‌ك ژی ئاماژه‌كه‌ بۆ توركیا كو ئه‌و رێ ناده‌ن توركیا ئێرشی وان ده‌ڤه‌ران بكه‌ت.

ئه‌و گوهۆرینێن ل رۆژئاڤایێ كوردستانێ و باكورێ سووریێ د ده‌مه‌كێ دا روو دده‌ن كو به‌ری جه‌ژنا قوربانێ ب سه‌رپه‌رشتیا رۆسیا رێككه‌فتنه‌ك د ناڤبه‌را رژێما سووریێ، هێزێن سووریا دیموكرات و هێزێن سه‌ر ب ئیرانێ ل سووریێ هاته‌ ئیمزاكرن و ل گۆر رێككه‌فتنێ ژی هه‌موو ئالی دێ ل گه‌ل رۆسیا پێكڤه‌ كار كه‌ن دا رێ نه‌ده‌ن توركیا ده‌ست ب چو ئۆپه‌راسیۆنێن نوو بكه‌ت و هه‌روه‌سا رژێما سووریێ سۆز دابوو هێزێن سووریا دیموكرات كو دێ هاریكاریا وان كه‌ت دا بشێن ل هه‌مبه‌ر هه‌ر ئێرشه‌كێ ژ ئالیێ توركیا ڤه‌ به‌رگریێ بكه‌ن.

عه‌لی كوچووك چاڤدێرێ سیاسی راگه‌هاند كو هاتنا هێزێن رژێما سووریێ بۆ رۆژئاڤایێ كوردستانێ پێنگاڤه‌ك گه‌له‌ك خرابه‌ و دێ پاشی ئه‌نجامێن خوه‌ یێن گه‌له‌ك خراب بۆ كوردان ل سووریێ هه‌بیت، چونكی ئه‌و هێزێن رژێما سووریێ كو نها ل رۆژئاڤایێ كوردستانێ بجه بووینه‌ پاشی ناچن و دێ وی ده‌می ئالۆزیێن مه‌زن روو ده‌ن، رۆسیا دێ پشته‌ڤانیێ ل مانا وان كه‌ت و كورد ژی نه‌شێن هێزێن سووریێ ژ ده‌ڤه‌رێن خوه‌ ده‌رخینن، ئه‌و یه‌ك ژی دێ بیته‌ مه‌ترسیه‌كا گه‌له‌ك مه‌زن بۆ پاشه‌رۆژا رۆژئاڤایێ كوردستانێ.

ناڤهاتی هه‌روه‌سا دیار دكه‌ت كو هاتنا هێزێن رژێما سووریێ بۆ رۆژئاڤایێ كوردستانێ دێ كارتێكرنه‌كا خوه‌ یا خراب ل خه‌لكی ژی كه‌ت، ژ به‌ر هندێ ژی ب جهێ هێزێن رژێما سووریێ پێدڤی بوو كو هێزێن سووریا دیموكرات و یه‌په‌گێ ل گه‌ل پێشمه‌رگێن رۆژ رێككه‌فتن كربا، چونكی پێشمه‌رگێن رۆژ هه‌موو خه‌لكێ رۆژئاڤایێ كوردستانێ نه‌ و پێشمه‌رگه‌ كوردن و برایێ وانن، باشتر بوو ب جهێ رژێما سووریێ پێشمه‌رگێن رۆژ ل وان ده‌ڤه‌ران هاتبانه‌ بجه كرن، لێ مخابن یا نها روو دای دێ پاشی ئه‌نجامێن خوه‌ یێن گه‌له‌ك خراب بۆ كوردان ل رۆژئاڤایێ كوردستانێ هه‌بیت.

ل ئالیێ دی دوهی به‌رپرسه‌كێ ئه‌مریكا ژی راگه‌هاند كو د زیندانێن رێڤه‌به‌ریا خوه‌سه‌ر دا نێزیكی ده‌ه هزار چه‌كێن داعشێ هه‌نه‌ و هه‌ر ئۆپه‌راسیۆنه‌كا توركیا دێ بیته‌ ئه‌گه‌رێ ئالۆزیێن نوو و ئه‌و یه‌ك د به‌رژه‌وه‌ندیا توركیا دا نینه‌ و دڤێت توركیا ده‌ست ب چو ئۆپه‌راسیۆنان نه‌كه‌ت.

ئه‌ڤرۆ:

سه‌رۆكێ حوكمه‌تا هه‌رێما كوردستانێ ل دۆر هێرشێن تیرۆرستی ل سه‌ر به‌رژه‌وه‌ندیێن هه‌رێما كوردستانێ په‌یامه‌ك به‌لاڤكر و تێدا هاتیه‌، وه‌كو وه‌لاتیێن سه‌رانسه‌ری كوردستانێ، گه‌له‌ك یێ نیگه‌رانم ژ دووباره‌بوونا هێرشێن تیرۆرستی بۆ سه‌ر خه‌لك و ژێرخانا گشتی یا كوردستانێ ل چه‌ند هه‌یڤێن بۆریدا. ئه‌و ترسنۆكێن ل پشت ئه‌نجامدانا وان هێرشان له‌وما په‌نایێ بۆ وان كاران دبه‌ن، چونكه‌ ده‌نگێ رایا گشتی ل ئیراقێ یا ژده‌ستدای،ل شوینا وێ ئێكێ هزر د پاشه‌رۆژێدا بكه‌ن و كاری بۆ پێشخستنا ئابووری و پێشڤه‌برنا په‌یوه‌ندیان ل گه‌ل جڤاكێ نێڤده‌وله‌تی و په‌یداكرنا ده‌لیڤێن كاری بۆ گه‌نجان بكه‌ن، گرۆپێن ژ ده‌رڤه‌ی قانوونێ، گوندێن مه‌ مووشه‌ك باران دكه‌ن و خه‌لكێ سڤیل دكه‌نه‌ ئارمانج.

من ب رێیا ته‌له‌فۆنێ ل گه‌ل هه‌ڤپشكێن سیاسی یێن سه‌ره‌كی یێن هه‌رێما كوردستانێ و ئیراقێ وهه‌روه‌سا دۆستێن مه‌ ل ده‌رڤه‌ی وه‌لاتی ئاخڤتیه‌، د په‌یوه‌ندیا خوه‌ دا ل گه‌ل مسته‌فا كازمی سه‌رۆك وه‌زیرێن ئیراقێ، من دووپاتی ل سه‌ر پێدڤی و گرنگیا پێكئینانا هێزه‌كا هه‌ڤپشك یا پێشمه‌رگه‌ی و هێزێن ئه‌منی یێن ئیراقی كر بۆ پركرنا هه‌ر ڤالاهیه‌كا ئه‌منی كو ل ده‌ڤه‌رێن ناكۆكی ل سه‌ر هه‌بیت كو گرۆپێن ژ ده‌رڤه‌ی قانوونێ بكاردئینن بۆ تێكدانا سه‌قامگیریا هه‌موو ئیراقێ، من بۆ كازمی رۆهنكر كو ئه‌و هێرشه‌ مه‌ترسیێ ل سه‌ر سه‌قامگیری و ره‌وشا وه‌به‌رئێنانێ ل ئیراقێ ب گشتی دروست دكه‌ن و من داخواز ژێ كر رێكارێن رژد و كریاری بگریته‌ به‌ر بۆ كونترۆلكرنا وان گرۆپان.

هه‌روه‌سا وه‌زیرێن كاروبارێن پێشمه‌رگه‌ و ناڤخوه‌یی من راسپاردن هه‌موو رێكارێن پێدڤی ئه‌نجام بده‌ن بۆ پاراستنا ژێرخانا گشتی و ده‌زگه‌هێن په‌ترۆل و غازێ، د چارچۆڤێ پلانێدا، رێككه‌فتین ل سه‌ر هنارتنا هێزێن زێده‌تر بۆ ده‌ڤه‌رێ، ل رۆژێن داهاتی ژی دا دێ رێكارێن زێده‌تر ئه‌نجامده‌ین.

هه‌روه‌سا ل گه‌ل بریت مه‌كگۆرك رێكخه‌رێ كۆچكا سپی بۆ رۆژهه‌لاتا ناڤین و باكوورێ ئه‌فریقیا ئاخڤتن، هه‌ڤالێن مه‌ یێن ئه‌مریكی و هه‌موو وه‌به‌رئێنه‌ره‌كی، دڤێت پێگیریێ به‌رچاڤ بكه‌ین، نه‌شێین ملكه‌چی بۆ ترسێ و توپاندنێ بده‌ین، ل چه‌ند رۆژێن داهاتیدا، دێ داخوازێ ژ دۆست و هه‌ڤپشكێن نێڤده‌وله‌تی یێن مه‌ كه‌م و پێدڤیه‌ جڤاتا ئاسایشا نێڤده‌وله‌تی ژی د په‌یوه‌ندی و بزاڤێن خوه‌ دا ل گه‌ل هه‌ولێرێ و به‌غدا به‌رده‌وامبیت بۆ وێ ئێكێ پێكڤه‌ زێده‌تر رێ ل هێرشێن تیرۆرستی بگرین.

حوكمه‌تا هه‌رێما كوردستانێ، ب پێزانین ڤه‌ دنێریته‌ رۆلێ وه‌به‌رئێنانێ د كه‌رتێ په‌ترۆل و غازێ و سه‌رجه‌م ژێرخانا گشتی و به‌رگریێ ژی لێ دكه‌ت، گه‌له‌ك ب راشكاوی دبێژین، هێرشكرن ل سه‌ر هه‌ر جهه‌كی ل كوردستانێ، هێرشكرنه‌ بۆ سه‌ر هه‌موو كوردستانێ و خه‌لكێ كوردستانێ ب گشتی.

داخوازێ ژ خه‌لكێ كوردستانێ دكه‌م ئیرادا وان یا ب هێز بیت. ئه‌ڤه‌ هێرشه‌كا ئاشكرایه‌ بۆ سه‌ر ژێرخانا مه‌ و پشكه‌كه‌ ژ بزاڤه‌كا تێكده‌رانه‌ بۆ راوه‌ستاندنا مه‌ ژ پلانێن ستراتیژی و كارناما مه‌ یا چاكسازیێ، به‌لێ د پشتراست بن دێ د خۆراگر بین.

ئه‌ڤرۆ:

ئه‌ندامه‌كێ مه‌كته‌با سیاسی یا پارتی دیموكراتی كوردستان رادگه‌هینیت، بێ مه‌رج پارتی ناچیته‌ دناڤ هیچ پرۆسه‌كا سیاسی دا و ئاماژه‌كر كو ل ده‌ف پارتی رێزگرتن ل دستووری و پاراستنا سازانێ و هه‌ڤپشكیێ و هه‌ڤسه‌نگیێ بنه‌مایێن سه‌ره‌كی نه‌ بۆ پێكئینانا حوكمه‌تێ.

جه‌عفه‌ر ئێمینكی، ئه‌ندامێ مه‌كته‌با سیاسی یا پارتی گوت” پارتی یا ڤه‌كریه‌ ل سه‌ر پرۆسا سیاسی ل ئیراقێ و بایكۆت ناكه‌ین و خوه‌ ژی پشت گوه ناهاڤێژین و چاره‌نڤیسێ مه‌ ل ڤی وه‌لاتی ب ڤی شێوه‌یه‌ و دڤێت به‌رده‌وام بین”.

هه‌روه‌سا گوت” ئه‌م بێ مه‌رج د ناچینه‌ دناڤ هیچ پرۆسه‌كا سیاسی دا، و ل ده‌ف مه‌ پێدڤیه‌ رێز ل دستووری بهێته‌ گرتن و سازان و هه‌ڤپشكی و هه‌ڤسه‌نگی د پاراستی بن، وی ده‌می هه‌ر ئالیه‌كێ سووننی، شیعی و كوردی هه‌ڤپشكێ مه‌یه‌ د پرۆسا سیاسی دا و دانوستاندنان دێ دگه‌لدا كه‌ین و دێ بزاڤێ كه‌ین ل گه‌ل رێكه‌ڤین”.

ئێمینكی دووپاتكر ژی” بێ هه‌بوونا حوكمه‌ته‌كا ب هێز ئه‌ڤ وه‌لاته‌ ناهێته‌ ب رێڤه‌برن و هه‌كه‌ ب ڤی شێوه‌یێ نوكه‌ به‌رده‌وام بیت، دێ هه‌رێما كوردستانێ زیاندارا ئێكێ بیت، مووشه‌ك دهێنه‌ ئاراسته‌كرن و درۆنان دهنێرنه‌ مه‌، بودجا گشتی یا ئیراقێ كو ب گۆره‌ی رێژه‌یا ئاكنجیان دهێته‌ دابه‌شكرن، تێرا هه‌رێما كوردستانێ وه‌كو پێدڤی نینه‌، له‌وما ئه‌رك و مافه‌كێ مه‌یه‌، كو به‌رهه‌ڤبوونا ل به‌غدا یا ب هێز بیت”.

ناڤبری دیاركر” بێ مه‌رج ناچینه‌ دناڤ هیچ پرۆسه‌كا سیاسی دا، به‌لكو ل ده‌ف پارتی رێزگرتن ل دستووری و پاراستنا سازانێ و هه‌ڤپشكیێ و هه‌ڤسه‌نگیێ بنه‌مایێن سه‌ره‌كی نه‌ و بێ وان حوكمه‌ته‌كا ب هێز ناهێته‌ پێكئینان و ب رێڤه‌برن”.