هه‌ولێر، قائید میرۆ

ل دۆر په‌یوه‌ندیێن هه‌ولێرێ و به‌غدا و پشكداریا كوردان د حوكمه‌تا نوو یا ئیراقێ دا چاڤدێره‌كێ سیاسی باسێ وێ چه‌ندێ دكه‌ت كو نوكه‌ سه‌رده‌م سه‌رده‌مێ كوردایه‌ و نوكه‌ زێده‌تری هه‌ر ده‌مه‌كی كورد هه‌ژماره‌نه‌ ل ده‌ڤه‌رێ هه‌روه‌سا دبێژیت، نابیت شیعه‌ ڤێ ده‌لیڤه‌یێ ژده‌ست بده‌ن و پێدڤیه‌ دگه‌ل هه‌رێما كوردستانێ ئاریشه‌یێن خوه‌ چاره‌سه‌ر بكه‌ن هه‌روه‌سا دبێژیت، په‌یاما سه‌رۆك بارزانی گه‌هشتیه‌ هه‌موو جهه‌كی كو داگیران ژ مافێن دارایی و سه‌روه‌ری و ئاخا هه‌رێما كوردستانێ ب هیچ شێوه‌یه‌كی ناهێته‌كرن.

حه‌سه‌ن ئه‌حمه‌د مسته‌فا، چاڤدێرێ سیاسی، بۆ ڕۆژنامه‌یا (ئه‌ڤرۆ) گوت” حوكمه‌تا ئیراقێ د قۆناغه‌كا ڤه‌گوهاستنێ یا گرنگدایه‌ و چه‌ندین ئاریشه‌ یێن هه‌ین، ژوان ئاریشه‌یا ناڤمالا شیعی، هه‌روه‌سا هنده‌ك شیعه‌ بووینه‌ ئۆپۆزسیۆنا حوكمه‌تا نوكه‌ یا ئیراقێ، به‌لێ د هه‌مبه‌ردا كورد هه‌تا ڕاده‌یه‌كێ زۆر دئێكگرتی نه‌ ل به‌غدا سه‌ره‌ڕای ناكۆكیێن ناڤخوه‌یی، هه‌رچه‌نده‌ پارتی و ئێكه‌تی د ده‌مێ نوكه‌ دا زۆر ئێك نینن، به‌لێ كێمتر ئاریشه‌ ل به‌غدایه‌، هه‌ڤسه‌نگیا هێزێ ل ئیراقێ و شه‌رعیه‌تدان ب ده‌وله‌تێ تنێ كورده‌، ئه‌ڤرۆ كورد هه‌ژماره‌كا ئێكلاكه‌ره‌ ل ئیراقێ و ئیرانێ و سووریێ و توركیا ژی، هه‌تا ئه‌ز دشێم بێژم سه‌رده‌م ده‌مێ كوردانه‌، له‌وڕا پشتی سالا ٢٠٠٣ێ ده‌ستهه‌لات كه‌فتیه‌ ده‌ستێ شیعه‌یان ل ئیراقێ نوكه‌ ئه‌و د هه‌مبه‌ر تاقیكرنه‌كا دیرۆكادی نه‌، چونكه‌ شیعه‌یێن ئیراقێ ئه‌زموونا خوه‌ دیاركر، كو شیانێن مامه‌له‌كرنێ ل گه‌ل كورد و سوننه‌یان و پێكهاته‌ و جڤاكێ نێڤده‌وله‌تی ئێكجار مامه‌له‌یه‌كا لاوازه‌، ئه‌ڤه‌ژی بۆ نه‌بوونا ئه‌زموونێ ڤه‌دگه‌ڕیت، ڤێجارێ بۆ عه‌ره‌بێن شیعه‌ یا گرنگه‌ دگه‌ل هه‌رێما كوردستانێ ئاریشه‌یان چاره‌سه‌ربكه‌ن، له‌وڕا ئه‌ز پێشبینی دكه‌م هه‌م ب هاندانا كۆمارا ئیسلامی یا ئیرانێ كو ڤێجارێ حوكمه‌ت بن كۆنتڕۆلا ئیرانێ دایه‌، هه‌م ژی ئیراقی بخوه‌ ییێن گه‌هشتینه‌ وێ باوه‌ریێ كو ئاریشه‌یان ل گه‌ل هه‌رێما كوردستانێ چاره‌سه‌ر بكه‌ن”.

گوت ژی” هه‌م سه‌قامگیریا ئیراقێ و هه‌م چاره‌نڤیسێ كه‌فتیه‌ ده‌ست شیعه‌یان هه‌ردو گرێداینه‌ ب كوردان ڤه‌ و مامه‌لا وان دگه‌ل هه‌رێما كوردستانێ، سه‌ركردایه‌تیا هه‌رێما كوردستانێ و تایبه‌تی سه‌رۆك بارزانی په‌یاما وی گه‌هشتیه‌ هه‌موو جهه‌كی كو مومكین نینه‌ ل سه‌ر سه‌روه‌ری و مافێن دارایی و لسه‌ر ئاخا هه‌رێما كوردستانێ داگیران بهێته‌ كرن، ب دیتنا من هه‌كه‌ ئیراق یا به‌رهه‌ڤ نه‌بیت مافێن هه‌رێما كوردستانێ بده‌ت، به‌رۆڤاژی دێ هه‌ڤڕكی هه‌ر یا به‌رده‌وامبیت، د ده‌مێ په‌یدابوونا هه‌ڤڕكیان دا ژی شیعه‌یێن ئیراقێ نه‌شێن خوه‌ ل سه‌ر پیێن خوه‌ بگرن، فاكته‌رێ كورد ئه‌ڤرۆ نه‌ك ده‌وله‌تێن لاواز یێن مینا ئیراقێ و سووریێ هه‌ژاندینه‌، هه‌تا فاكته‌رێ كوردی گه‌فه‌كا ڕژده‌ ل سه‌ر وان ده‌وله‌تێن هه‌تا نوكه‌ د خه‌ونا ئیمڕاتۆریه‌تا ڕۆژهه‌لاتا ناڤین دانه‌، یا گرنگه‌ بۆ شیعه‌یێن ئیراقێ هه‌كه‌ بڤێت حوكمڕانیێ بكه‌ن و ئه‌و حوكمڕانی نه‌كه‌ڤیت ژێرچ  پرسیاران  پێدڤیه‌ دگه‌ل هه‌رێما كوردستانێ ببنه‌ هێزه‌كا مه‌زن و ئیراقێ ژ ڤێ ڕه‌وشێ رزگار بكه‌ن”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، دوهی شه‌مبیێ 10/12/2022 ل گه‌ل كاتالین نۆڤا سه‌رۆكا هنگاریا كۆمبوو.

د كۆمبوونه‌كێ دا، دانوستاندن ل دۆر پێشڤه‌برنا په‌یوه‌ندیێن هنگاریا و هه‌رێما كوردستانێ و دووماهی پێشهات و گوهۆڕینێنن ئیراقێ و ده‌ڤه‌رێ و ڕه‌وشا پێكڤه‌ژیانا ئاشتیانه‌ د ناڤبه‌را پێكهاته‌یان دا ل هه‌رێما كوردستانێ هاته‌ كرن.

سه‌رۆكێ حوكمه‌تا هه‌رێما كوردستانێ خوه‌شحالیا خوه‌ ب سه‌ره‌دانا سه‌رۆكا هنگاریا دیاركر و سوپاسیا وه‌لاتێ هنگاریا كر كو د چارچۆڤه‌یێ هه‌ڤپه‌یمانیا نێڤده‌وله‌تی دا یا به‌رده‌وامه‌ د پشته‌ڤانیكرنا هێزا پێشمه‌رگێ كوردستانێ دا، هه‌روه‌سا خواستا هه‌رێما كوردستانێ بۆ بهێزكرنا په‌یوه‌ندیان ل گه‌ل هنگاریا دووپات كر.

سه‌رۆكا هنگاریا سه‌ره‌رای باس ل قه‌هره‌مانیا پێشمه‌رگه‌ی د به‌رهنگاریا تیرۆرستێن داعشێ دا، ئاماژه‌ ب ئاسایش و سه‌قامگیری و پێشكه‌فتن و ئاڤه‌داننكرنا باژێرێ هه‌ولێرێ و هه‌رێما كوردستانێ كر و به‌رهه‌ڤیا وه‌لاتێ خوه‌ بۆ پێشڤه‌برنا هه‌مه‌ئالی یا په‌یوه‌ندیان ل گه‌ل هه‌رێما كوردستانێ به‌رچاڤكر.

چاكسازیێن كابینه‌یا نه‌هێ یا حوكمه‌تا هه‌رێما كوردستانێ و گرنگیا چاره‌سه‌ركرنا كێشه‌یێن هه‌رێما كوردستانێ و حوكمه‌تا فیدرالی ل سه‌ر بنه‌مایێ دستووری، ته‌وه‌ره‌كێ دی یێ دانوستاندنان بوو.

ئه‌ڤرۆ:

كاتالین نۆڤاك، سه‌رۆكا وه‌لاتێ هنگاریا د چارچۆڤه‌یێ ڤه‌كرنا قوتابخانه‌یا مێلسۆ ل عێنكاوه‌ په‌یڤه‌ك پێشكێشكر و ڕاگه‌هاند، دخوازین هاریكاریێن زێده‌تر پێشكێشی هه‌رێما كوردستانێ بكه‌ین، هه‌روه‌سا گوت ژی ” هوون ب تنێ نینن”.

دوهی شه‌مبیێ 10/12/2022، مه‌سرور بارزانی، سه‌رۆكێ حوكمه‌تا هه‌رێما كوردستانێ و كاتالین نۆڤاك، سه‌رۆكا هنگاریا قوتابخانه‌یا مێلسۆ ب فه‌رمی ڤه‌كر كو ل سه‌ر ئه‌ركێ حوكمه‌تا هنگاریا ب گۆژمێ چار ملیۆن و 500 هزار دۆلاران هاتیه‌ دروستكرن.

كاتالین نۆڤاك، سه‌رۆكا هنگاریا، ڕاگه‌هاند، هه‌رێما كوردستانێ یا ب تنێ نینه‌ و ئه‌و دێ به‌رده‌وام بین د هاریكاریا وێ دا و گوت ژی” دخوازین هاریكاریێن زێده‌تر پێشكێش بكه‌ین”.

سه‌رۆكا هنگاریا د په‌یڤا خوه‌دا ڕوو ل به‌رهه‌ڤبوویان كر و گوت” ب دیتنا من هه‌وه‌ هه‌موویان ئاشنایه‌تی ل گه‌ل ئالایێ هنگاریا یا هه‌ی، ئالایێ مه‌ وه‌كو ئالایێ هه‌وه‌یه‌، ئه‌وژی سور، سپی و كه‌سك، به‌لێ مخابن هه‌تاڤ تێدا نینه‌. ئه‌وژی ڕامانا وێ چه‌ندێ یه‌ كو نوكه‌ مه‌ هه‌تاڤ ل هنگاریا نینه‌، به‌لێ دشێین ئالایێ هنگاریا ل سه‌رانسه‌ری هه‌رێما كوردستانێ ل هه‌ژماره‌كا مه‌زن یا باژێران ببینین، جهێ شانازیا مه‌یه‌ كو دبینین ئالایێ هنگاریا یێ ل ڤێرێ، چونكه‌ ئه‌و نیازچاكیا گه‌لێ هنگاریا نیشان دده‌ت”.

د پشكه‌كا دی یا ئاخڤتنێن خوه‌ دا، سه‌رۆكا هنگاریا باسێ ڕه‌وشا كریستیانان ل جیهانێ كر و گوت” 360 ملیۆن كریستیان تووشی گه‌فان دبن”.

سه‌باره‌ت قانوونا وه‌لاتێ وێ د په‌یوه‌ندیێن نێڤده‌وله‌تی دا، گوت” ئه‌م ڕێزێ ل خه‌لكی دگرین، ئه‌وژی ڕامانا وێ ئه‌وه‌ كو ڕێزێ ل ئه‌وێَن دی دگرین. ئه‌م ناخوازین وانه‌یان ب كه‌سێ بێژین. تنێ ڕێزێ نیشان دده‌ین. ئه‌وژی ڕامانا وێ ئه‌وه‌ كو دخوازین ژ كه‌سێ به‌رامبه‌ر تێبگه‌هین وبنیاسین و ڕێزێ لێ بگرین. ئه‌وژی ڕامانا وێ ئه‌وه‌ ڕێزێ ل سه‌روه‌ریا وه‌لاتێن دی دگرین”.

سه‌رۆكا هنگاریا گوت ژی” قانوونا دویێ و سیێ یا وه‌لاتێ مه‌ د په‌یوه‌ندیێن نێڤده‌وله‌تی دا ئه‌وه‌ كو ئه‌م پشته‌ڤانیا چاره‌سه‌ریا دیموكراسی دكه‌ین و ل گه‌ل دیموكراسیێ داینه‌ و ڕێزێ لێ دگرین. یا سیێ ژی ئه‌وه‌ كو ئه‌م توندوتیژیێ شه‌رمزار دكه‌ین. تیرۆرێ شه‌رمزار دكه‌ین، دوژمنێ مه‌ یێ هه‌ڤپشك تیرۆرا نێڤده‌وله‌تیه‌. ئه‌وژی ئه‌وه‌ كو سه‌ربازێن مه‌ یێن ل ڤێرێ، ل ئیراقێ شه‌ڕی بۆ دكه‌ن”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، دوهی شه‌مبیێ 10/12/2022 ب به‌رهه‌ڤبوونا كاتالین نۆڤاك سه‌رۆكا هنگاریا، د ڕێوڕه‌سه‌كێ تایبه‌ت دا، قوتابخانه‌یا (مێلسۆ) یا نێڤده‌وله‌تی ل عێنكاوا ڤه‌كر.

سه‌رۆكێ حوكمه‌تا هه‌رێمێ د ڕێوڕه‌سمی دا په‌یڤه‌ك پێشكێشكر و دووپاتی ل سه‌ر گرنگیدانێ ب كه‌رتێ په‌روه‌ردێ كر ئه‌ركه‌كێ سه‌ره‌كی یێ كابینه‌یا نه‌هێ یا حوكمه‌تا هه‌رێما كوردستانێ.

هه‌روه‌سا پێگیریا حوكمه‌تا هه‌رێما كوردستانێ دووپاتكر بۆ زێده‌تر بهێزكرنا وێ پێكڤه‌ژیانا ئاشتیانه‌ ل هه‌رێما كوردستانێ هه‌ی و ئاماژه‌كر، هه‌رێما كوردستانێ یا بوویه‌ په‌ناگه‌هه‌كا ئارام بۆ وان كریستیان و ئێزدیێن ژ ئه‌گه‌رێ گه‌فێن تیرۆرێ ژ ده‌شتا نه‌ینه‌وا ڕه‌ڤین.

سه‌رۆكێ حوكمه‌تا هه‌رێما كوردستانێ خویاكر ژی كو هه‌رێما كوردستانێ پێشوازی ل زێده‌تر ژ دو ملیۆن وه‌لاتیێن ئیراقی و په‌نابه‌رێن سووری كریه‌، یێن پاراستین و جهێ ڤه‌حه‌واندنێ بۆ دابینكرینه‌، كو بێی پشته‌ڤانیا جڤاكێ نێڤده‌وله‌تی كاره‌كێ ب زه‌حمه‌ت بوو.

مه‌سرور بارزانی سوپاسیا به‌رهه‌ڤبوونا كاتالین نۆڤاك، سه‌رۆكا هنگاریا ژی كر و گوت” هنگاریا ئێك ژ وان وه‌لاتان بوو یێن به‌رده‌وام هاریكاریا هه‌رێما كوردستانێ كری ب تایبه‌تی د شه‌ڕێ دژی داعشێ دا”.

د پشكه‌كا دی یا ئاخڤتنێن خوه‌ دا، مه‌سرور بارزانی باسێ عێنكاوه‌ كر كو بوویه‌ جڤاكه‌كێ گه‌ش بۆ پێكڤه‌ژیانێ ئه‌ڤه‌ژی جهێ شانازیی یه‌ بۆ مه‌.

سه‌باره‌ت ڤه‌كرنا قوتابخانه‌یا (مێلسۆ) یا نێڤده‌وله‌تی، سه‌رۆكێ حوكمه‌تا هه‌رێما كوردستانێ ئاماژه‌ ب ڕۆل و هاریكاریێن حوكمه‌تا هنگاریا كر و دووپاتی ل وێ چه‌ندێ كر، گرنگیدان ب كه‌رتێ په‌روه‌ردێ ژ كارێن سه‌ره‌كی یێن ڤێ كابینه‌یا حوكمه‌تا هه‌رێما كوردستانێ نه‌ ژ پێخه‌مه‌ت ئاڤاكرنا وه‌لاته‌كێ بهێزتر.

سه‌رۆكێ حوكمه‌تا هه‌رێمێ پشته‌ڤانیا خوه‌ یا تمام بۆ هه‌موو گاڤه‌كێ بۆ زێده‌تر به‌ر ب پێشڤه‌برنا كه‌رتێ په‌روه‌ردێ دووپاتكر.

ل دۆر گرنگیا زانست و په‌روه‌ردێ، مه‌سرور بارزانی دیاركر” زانست و په‌روه‌رده‌ بناغێن پێشكه‌فتنا وه‌لاتێ مه‌نه‌ به‌ر ب پاشه‌ڕۆژه‌كا باشتر”.

سه‌رۆكێ حوكمه‌تا هه‌رێما كوردستانێ دیاركر ژی” گرنگیدان ب په‌روه‌ردێ باشترین وه‌به‌رئێنانه‌ د گه‌نجێن مه‌ دا ئه‌نجام بده‌ین، بۆ وێ چه‌ندێ ب شێویه‌كی په‌روه‌رده‌ بكه‌ین تاكو ل پاشه‌ڕۆژی ل بازارێ كارێ ناڤخوه‌ و ده‌رڤه‌ دا هه‌ڤڕكیێ بكه‌ن بۆ بده‌ستڤه‌ئینانا باشترین ده‌لیڤێن كاری”.

مه‌سرور بارزانی ئاماژه‌ ب دامه‌زراندنا ده‌سته‌یا باوه‌ری به‌خشینێ ب ده‌زگه‌هان و پرۆگرامێن په‌روه‌ردێ و خواندنا بلند ل هه‌رێما كوردستانێ كر، وه‌كو ئێك ژ گاڤێن حوكمه‌تا هه‌رێما كوردستانێ بۆ زێده‌تر گرنگیدانێ ب كه‌رتێ په‌روه‌ردێ و بلندكرنا ئاستێ زانستی یێ ناڤه‌ندێن خواندنێ ل هه‌رێما كوردستانێ.

ل دووماهیا په‌یڤا خوه‌، سه‌رۆكێ حوكمه‌تا هه‌رێما كوردستانێ، سه‌ره‌رای ده‌ربڕینا پێزانینان بۆ سه‌رۆكا هنگاریا ل به‌رامبه‌ر پشته‌ڤانیێن وه‌لاتێ وێ بۆ ڤه‌كرنا وێ قوتابخانه‌یێ، گوت” هه‌وه‌ پشت ڕاست دكه‌ین وه‌كو پێگیریا حوكمه‌تێ كو هاریكاریێن هه‌وه‌ ب باشی یێن هاتینه‌ مه‌زاختن د ڤه‌كرنا ڤێ قوتابخانه‌یێ دا”.