ئه‌ڤرۆ:

سه‌رۆكێ هه‌رێما كوردستانێ د په‌یامه‌ك ب هه‌لكه‌فتا ژ دایكبوونا پێغه‌مبه‌رێ ئیسلامی (س .خ) به‌لاڤكر و تێدا دبێژیت: ب هه‌لكه‌فتا پیرۆز یا ژدایكبوونا پێغه‌مبه‌رێ ئیسلامێ حه‌زره‌تێ محه‌مه‌د (س . خ) گه‌رمترین پیرۆزباهیێ ل موسلمانێن كوردستانێ و ئیراقێ و جیهانێ دكه‌م.

هیڤیدارم ئه‌ڤ هه‌لكه‌فتا پیرۆز، خێر و خوه‌شی و ئاسوده‌یی ژێ په‌یدا ببیت و هانده‌ر بیت بۆ پێگیریا زێده‌تر ب بها و وانه‌یێن مه‌زن یێن په‌یاما ئاشتیخوازانه‌ یا ئایینێ ئیسلامێ.

بلا ئه‌م هه‌موو وێ هه‌لكه‌فتێ بكه‌ینه‌ ده‌لیڤه‌ بۆ پتر بهێزكرنا گیانێ لێبۆرینێ و چاكخوازیێ و برایه‌تیێ و پێكڤه‌ژیانا ئاشتیانه‌.

مه‌سرور بارزانی: دخوازین هه‌لكه‌فتا ژ دایكبوونا پێغه‌مبه‌رێ ئیسلامێ (س . خ) هانده‌ره‌كێ بهێزكرنا لێبۆرینێ بیت

سه‌رۆكێ حوكمه‌تا هه‌رێما كوردستانێ، مه‌سرور بارزانی، ب هه‌لكه‌فتا ژدایكبوونا پێغه‌مبه‌رێ ئیسلامێ (س. خ) په‌یامه‌ك به‌لاڤكر و تێدا دبێژیت، ب هه‌لكه‌فتا ژ دایكبوونا پێغه‌مبه‌رێ ئیسلامێ حه‌زره‌تێ محه‌مه‌د (س. خ) گه‌رمترین پیرۆزباهیان ئاراسته‌ی هه‌موو موسلمانێن كوردستانێ و ئیراقێ و جیهانێ دكه‌م.

ژ خودایێ مه‌زن و دلۆڤان دخوازین، ئه‌ڤ هه‌لكه‌فتا پیرۆز، ببیته‌ هانده‌ره‌كێ زێده‌تر بۆ پێشڤه‌برنا بهایێن بلند و مرۆڤایه‌تی یێن ئایینی و بهێزكرنا كه‌لتوورێ ته‌باییێ و لێبۆرینێ و پێكڤه‌ژیانا ئاشتیانه‌ د ناڤ گه‌لێن جیهانێ دا.

ب هه‌لكه‌فتا جه‌ژنا جه‌مایێ یا كوردێن ئێزدی، سه‌رۆك بارزانی په‌یامه‌كا پیرۆزباهیێ به‌لاڤكر و ئه‌ڤه‌ ده‌قێ وێ یه‌ :

ب هه‌لكه‌فتا جه‌ژنا جه‌مایێ، پیرۆزباهیێن گه‌رم ئاراسته‌ی میرێ ئێزدیان و بابه‌ شێخ و جڤاتا رۆحانی و هه‌موو خوشك و برایێن ئێزدی ل كوردستانێ و جیهانێ دكه‌م.

هیڤیدارم ئه‌ڤ جه‌ژنه‌ ببیته‌ ئه‌گه‌رێ خوشی و ئارامی یا خوشك و برایێن ئێزدی و بشێن هه‌موو ساله‌كێ جه‌ژن و خوشیێن خوه‌ ب ئاشتی و ئاسوده‌یی ساز بكه‌ن.

هه‌ر ب ڤێ هه‌لكه‌فتێ داكوكیێ دكه‌ین كو پێدڤیه‌ هه‌موو لایه‌ك كار بو بهێزكرنا فه‌رهه‌نگ و كه‌لتورێ  پێكڤه‌ژیانێ و برایه‌تی و ئێكرێزیێ د ناڤبه‌را هه‌موو پێكهاته‌یێن ئولی و نه‌ته‌وه‌یێن كوردستانێ بكه‌ن و بپارێزن.

نێچیرڤان بارزانی، سه‌رۆكێ هه‌رێمێ د په‌یاما خوه‌ یا پیرۆزباهیێ دا به‌لاڤكر”دلێ مه‌ ل جه‌م وان مالبات و خوشك و برایێن مه‌ یێن ئێزدییه‌ كو هه‌تا نها كه‌سوكارێن وان د ڕه‌ڤاندینه‌ و ئه‌م وان هه‌موویان پشتڕاست دكه‌ین كو هه‌تا ڕه‌ڤاندیه‌ك ئێزدی مابیت، دێ لسه‌ر بزاڤا ڕزگاركرنا وان و دیاركرنا چاره‌نڤیسێ وان به‌رده‌وام بین”.

مه‌سرور بارزانی، سه‌رۆكێ حوكمه‌تا هه‌رێمێ د په‌یاما خوه‌ یا پیرۆزباهیێ دا دبێژیت” دووپات دكه‌ینه‌ڤه‌ دێ هه‌رده‌م د به‌رده‌وام بین لسه‌ر پشته‌ڤانیا ماف و داخوازیێن خوشك و برایێن ئێزدی و پتر خزمه‌تكرنا وان” .

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، داخواز دكه‌ت پرسا سه‌رۆك كۆمارا ئیراقێ ل دناڤ په‌رله‌مانێ كوردستانێ بهێته‌ ئێكلاكرن و به‌ربژارێ هه‌ڤپشك یێ كوردان بۆ وی پۆستی دناڤ په‌رله‌مانێ كوردستانێ دا بهێته‌ دیاركرن.

دوهی شه‌مبیێ 8 چریا ئێكێ 2022، مه‌سرور بارزانی، سه‌رۆكێ حوكمه‌تا هه‌رێما كوردستانێ د چارچۆڤێ پشكداریكرنێ د دیدارا (پرسا كوردی ل رۆژهه‌لاتا ناڤین) د به‌رسڤا پرسیارا چه‌ند پشكداربوویان دا ل دۆر چاره‌سه‌ركرنا كێشه‌یا پۆستێ سه‌رۆك كۆمارا ئیراقێ، راگه‌هاند” هیچ خاله‌كا دستووری و قانوونی نینه‌ كو پۆستێ سه‌رۆك وه‌زیران بۆ شیعان بیت و پۆستێ سه‌رۆك كۆماری بۆ كوردان بیت یان پۆستێ سه‌رۆكێ جڤاتا نوونه‌ران بۆ سوونه‌یان بیت، به‌لێ وه‌كو نه‌ریته‌كی لێهاتیه‌ و تاكو نوكه‌ ژی دهێته‌ په‌یڕه‌وكرن، به‌لێ چاوا ئه‌و نه‌ریته‌ هاتیه‌؟ زورینه‌یا شیعی سه‌رۆكێ وه‌زیران به‌ربژار دكه‌ت و پاشی ل جڤاتا نوونه‌ران باوه‌ری پێ دهێته‌ دان، زورینه‌یا سوننی ژی سه‌رۆكێ جڤاتا نوونه‌ران ده‌تنیشان دكه‌ت. ل ڤێرێ داخوازی ئه‌وه‌  كو پێدڤیه‌ زورینه‌یا كورد به‌ربژارێ خوه‌ بۆ پۆستێ سه‌رۆك كۆماری ده‌ستنیشان بكه‌ت”.

مه‌سرور بارزانی گوت ژی” ل سێ خولێن ئێكێ یێن جڤاتا نوونه‌رێن ئیراقێ كوردان ب ئێكڕێز و ئێكگرتی پشته‌ڤانی ل به‌ربژاره‌كی بۆ پۆستێ سه‌رۆك كۆمارێ دكر، به‌لێ د خولا پێشتر مخابن ئه‌و نه‌ریته‌ هاته‌ شكاندن، ئانكو سه‌رۆك كۆمارا ئیراقێ كو پێدڤی بوو ژئالیێ زۆرینه‌یا كوردی بهێته‌ هه‌لبژارتن نه‌هاته‌ په‌یڕه‌وكرن، به‌روڤاژی ل جڤاتا نوونه‌ران بێی كوردان زۆرینه‌یا شیعی هه‌لبژارتن كر و سه‌رۆك كۆماره‌ك ده‌ستنیشانكر” .

مه‌سرور بارزانی ب پێدڤی زانی ڕێز ل ئه‌نجامێن هه‌لبژارتنان بهێته‌ گرتن و گوت” ئالیێ سه‌ركه‌فتی د هه‌لبژارتنێن ئیراقێ دا ل هه‌رێما كوردستانێ مافێ زێده‌تر یێ هه‌ی كو به‌ربژارێ سه‌رۆكێ كۆمارێ پێشنیاز بكه‌ت، به‌لێ بۆ وێ چه‌ندێ ئه‌م بهێین و بزڤرین سه‌ر هه‌مان نه‌ریتێ كه‌ڤن، ئه‌و مه‌ داخوازكریه‌ كو زۆرینه‌یا خه‌لكێ كوردستانێ به‌ربژارێ سه‌رۆكێ كۆماری ده‌ستنیشان بكه‌ن و ئه‌و كه‌سه‌ ببیته‌ به‌ربژاری هه‌موو خه‌لكێ كوردستانێ و ل جڤاتا نوونه‌رێن ئیراقێ ده‌نگ پێ بهێته‌ دان، ئه‌و جهه‌ ژی په‌رله‌مانێ كوردستانێ یه‌ كو نوونه‌رایه‌یتا هه‌موو خه‌لكێ كوردستانێ دكه‌ت”.

مه‌سرور بارزانی گوت ژی” هه‌موو ده‌مه‌كی گه‌لێ كورد ڕێز ل بڕیارێن ئالیێن شیعی و سوننی ل دۆر دیاركرنا به‌ربژارێن خوه‌ بۆ پۆستێن سه‌رۆك وه‌زیران و سه‌رۆكێ جڤاتا نوونه‌رێن ئیراقێ گرتیه‌، له‌وما د ده‌مه‌كیدا په‌رله‌مانێ كوردستانێ ژی تاكه‌ به‌ربژارێ كورد بۆ پۆستێ سه‌رۆك كۆمارا ئیراقێ دیاردكه‌ت، پێدڤیه‌ حزب و ئالیێن سیاسی یێن ئیراقی ڕێزێ ل بڕیارا په‌رله‌مانێ كوردستانێ بگرن”.

مه‌سرور بارزانی، سه‌رۆكێ حوكمه‌تا هه‌رێما كوردستانێ د چارچۆڤێ پشكداریا خوه‌ دا ل وێ دیداری، د په‌یڤه‌كێ دا گوت” ب درێژیا دیرۆكێ سته‌مه‌كا مه‌زن ل كوردان وه‌كو نه‌ته‌وه‌، ل نه‌ته‌وه‌ و ئایینێن جودا وه‌كو پێكهاته‌یێن ره‌سه‌ن یێن ڤێ ده‌ڤه‌رێ، هه‌روه‌سا ل ئاخا كوردستانێ وه‌كو نیشتمان هاتیه‌ كرن، ئه‌و سته‌مه‌ ب ده‌هان سالان، به‌لكو ل سه‌د سالێن بۆری و هه‌تا نوكه‌ ژی یا به‌رده‌وامه‌، مخابن ل شوینا وێ چه‌ندێ هزر د چاره‌سه‌ریا بنه‌ره‌تی دا بهێته‌ كرن، گه‌له‌ك جاران مژوولی وێ چه‌ندێنه‌ هێجه‌تان ببینن، بۆ وێ ئێكێ ئه‌ڤ كێشه‌یه‌ وه‌كو پێدڤی نه‌هێته‌ چاره‌سه‌ركرن، كێشه‌یا كوردی ل رۆژهه‌لاتا ناڤین ئه‌ڤرۆ كێشه‌یه‌كا جیهانیه‌، پێدڤیه‌ ئه‌م هه‌موو بزاڤا وێ چه‌ندێ بكه‌ین وان گرفت و شاشیان دیاربكه‌ین كو د دیرۆكێدا دژی ڤێ ده‌ڤه‌رێ و مه‌ هاتیه‌ كرن، بۆ وێ چه‌ندێ ڕێچاره‌یه‌كا گونجای بۆ ببینین، ل سالێن بۆری ئه‌و وه‌لاتێن كو كێشه‌ ل گه‌ل كوردان وه‌كو نه‌ته‌وه‌ هه‌بوو نه‌هێلایه‌ كورد هه‌تاكو باسێ كێشه‌یا خوه‌ ژی بكه‌ن، هه‌ر پێشنیازه‌كا به‌رچاڤكربیت بۆ چاره‌سه‌ریێ، پاشی كورد هاتیه‌ تاوانباركرن ب جوداخوازیێ یان كێشه‌ و ئاژاوێ دروست دكه‌ت، ئه‌م وه‌كو هه‌ر نه‌ته‌وه‌یه‌كی مه‌ مافێ وێ چه‌ندێ یێ هه‌ی كو ب دیتنا مه‌ چاوان سه‌قامگیریا ده‌ڤه‌رێ ده‌سته‌به‌ر دبیت و چاوان ئه‌م دشێین فاكته‌ره‌كێ ئاڤاكه‌ر بین، هه‌روه‌سا مه‌ ب خوه‌ مافێ وێ چه‌ندێ هه‌بیت باسێ بیر و بۆچوونێن خوه‌ بكه‌ین ل پلاتفۆرمێن نێڤده‌وله‌تی، ل ڤی ده‌مێ كو ڕێ ب كوردان هاتیه‌ دان ده‌نگێ خوه‌ بگه‌هینیته‌ جیهانێ، یێن شیاین د گه‌له‌ك بواران دا ئه‌و شرۆڤه‌كرنا شاش سه‌باره‌ت نه‌ته‌وا كوردی و خه‌لكێ كوردستانێ هاتیه‌ كرن ڤه‌ره‌ڤینیت، جیهان دیده‌ڤانێ وێ چه‌ندێ یه‌ ئه‌م  دشێین فاكته‌ره‌كێ ئاڤاكه‌ر بین، هه‌ر ژ سه‌رده‌مێ بارزانیێ نه‌مر وتاكو سه‌رۆك بارزانی به‌رده‌وام داكۆكی ل وێ چه‌ندێ كریه‌ نابیت كێشه‌یا كوردی ل گه‌ل حوكمه‌تان وه‌سا بهێته‌ شرۆڤه‌كرن كو ببیته‌ كێشه‌یا نه‌ته‌وان، مه‌ به‌رده‌وام ڕێز ل هه‌موو نه‌ته‌وان گرتیه‌ و ل سه‌ر وی پرنسیپی دێ د به‌رده‌وام بین، كێشه‌یا مه‌ ل گه‌ل نه‌ته‌وان نینه‌ كو دگه‌لدا دژین، به‌لكو كێشه‌ ل گه‌ل هنده‌ك ده‌ستهه‌لاتدار و حوكمه‌تان بوو، كوم خابن ل شوونا هزر د حوكمڕانیه‌كا یه‌كسان و دادپه‌وه‌رانه‌ دا بكه‌ن هزر د چه‌وساندنا نه‌ته‌وه‌یه‌كێ سته‌م دیتی كریه‌، به‌لێ مه‌ نه‌هێلایه‌ ئه‌و ببیته‌ كێشه‌یا د ناڤبه‌را نه‌ته‌وه‌یان دا، هه‌ر ده‌مه‌كی ژی پێدڤی بیت هه‌ر نه‌ته‌وه‌ و پێكهاته‌یه‌كی پێدڤی ب كوردستانێ هه‌بیت، كوردستانێ ده‌رگه‌هێن خوه‌ یێن ڤه‌كرین و حه‌واندین” .

سه‌رۆكێ حوكمه‌تا هه‌رێما كوردستانێ، دیاركر” پشتی په‌یدابوونا شه‌ڕێ داعشێ، زێده‌تر ژ دو ملیۆن كه‌سان ژ ده‌ڤه‌رێن دی یێن ئیراقێ و سووریێ و وه‌لاتێن هه‌ڤسنوور به‌ر ب هه‌رێما كوردستانێ هاتن، هه‌رێمێ ده‌رگه‌هێ خوه‌ بۆ ڤه‌كر، كو هه‌تا نوكه‌ ژی ب شانازی ڤه‌ دبێژین كوردستان بوویه‌ په‌ناگه‌هه‌ك بۆ ئه‌وێن ژ ده‌ستێ تاوانێ و تیرۆرێ د رٍه‌ڤن وكوردستانێ ب جهه‌كێ پاراستی دزانن و به‌ر ب وێ دهێن، ئه‌م منه‌تێ ل كه‌سێ ناكه‌ین، به‌لێ ئه‌ڤه‌ كه‌لتوره‌كه‌ ل گه‌ل مه‌یه‌ و ئه‌و پره‌نسیپه‌ن یێن مه‌ باوه‌ری پێ هه‌ی”.

مه‌سرور بارزانی د پشكه‌كا په‌یڤا خوه‌ دا به‌رچاڤكر” چاره‌سه‌ركرنا كێشه‌یا كوردی دێ بیته‌ چاره‌سه‌ریا كێشه‌یا رۆژهه‌لاتا ناڤین ب گشتی، دخوازم باسێ نموونه‌یا ئیراقێ بكه‌م، هه‌كه‌ سه‌حكه‌ینه‌ روودانێن 100 سالێن بۆری بكه‌ین پشتی دامه‌زراندنا ده‌وله‌تا ئیراقێ هه‌تا نوكه‌ ئایا ئیراقێ وه‌كو پێدڤی سه‌قامگیری بخوه‌ڤه‌ دیتیه‌؟ پێشكه‌فتیه‌؟ شیایه‌ ب یه‌كسانی خزمه‌تا هه‌موو خه‌لكی بكه‌ت؟ بێگومان نه‌خێر، ئێك ژ هوكارێن هه‌ره‌ سه‌ره‌كی یێن هه‌موو وان نه‌هامه‌تیێن ل ڤی وه‌لاتی رووداین ئه‌وه‌ كێشه‌یا كوردی نه‌هاتیه‌ چاره‌سه‌ركرن”.

گوت ژی” كورد وه‌كو نه‌ته‌وه‌ ڕێز لێ نه‌هاتیه‌ گرتن، به‌لێ ل كوردستانێ ڕێز ل مافێن مرۆڤی و نه‌ته‌وه‌ و پێكهاته‌یێن جودا دهێته‌ گرتن، پێكڤه‌ژیان بوویه‌ پێناسه‌كا دیار یا هه‌رێما كوردستانێ، هه‌كه‌ ده‌لیڤه‌كا وه‌سا ب مه‌ هاتبا دان كاربكه‌ین، ڕێز ل مه‌ هاتبا گرتن، دانپێدان ب مافێن مه‌ هاتبا كرن، بێگومان دا شێین پێشكه‌فتنه‌كا گه‌له‌ك زێده‌تر نه‌كو بۆ خوه‌، به‌لكو بۆ هه‌موو ده‌ڤه‌رێ ژی بده‌ستڤه‌ئینین”.

ئه‌ڤرۆ، سالار محه‌مه‌د دۆسكی:

شیره‌تكارێ مه‌كته‌با سیاسی یا پارتی دیموكراتی كوردستان، راگه‌هاند، دڤێت پارتی بۆ قۆناغا داهاتی بهێز و شیانێن مه‌زنتر د مه‌یدانا خه‌باتا كوردایه‌تیێ دا  رۆلێ پیشه‌نگێ خوه‌ بگێریت، خویاكر كو پێشكه‌فتن و هاتنا گه‌نج و ئافره‌تان بۆ پێشڤه‌ خه‌سله‌ته‌كا دێرینا پارتی یه‌.

عارف روشدی، شیره‌تكارێ مه‌كته‌با سیاسی یا پارتی دیموكراتی كوردستان بۆ رۆژناما (ئه‌ڤرۆ) گۆت”  كۆنگره‌  هه‌ر وه‌ك د پشكا حه‌فتێ  و مادێ شازدێ  ژ په‌یره‌وێ ناڤخوه‌یێ پارتی دا هاتیه‌ (بلندترین ده‌سته‌هه‌لاتا حزبی یه‌) هه‌ر چار سالان جاره‌كێ دڤێت بهێته‌ سازكرن، كۆنگره‌ ده‌ستهه‌لاتا هه‌موو گوهۆرینان یا هه‌ی ل سه‌ر ئاستێ (رێكخراوه‌یی، هزری، سیاسی) به‌لكو ئه‌م دشێین بێژین وه‌ك دادگه‌هه‌كێ یه‌ بۆ پێداچوون و هه‌لسه‌نگاندنا چاوانیا بجهئینانا كاروبار و ئه‌ركێن حزبی دناڤبه‌را  كۆنگره‌یاندا، بریاردان ل سه‌ر دارشتنا په‌یره‌و و پرۆگرامێ كارێ داهاتی و هه‌ر گوهۆرینه‌كا دی یا پێدڤی بیت داكو حزب ب هه‌ڤسه‌نگی ل گه‌ل كاودانێن نوو یێن سیاسی، ئیداری، جڤاكی خوه‌ ب گونجینیت و ب ره‌نگه‌گێ سه‌رده‌میانه‌ سه‌رده‌ریێ بكه‌ت”.

شیره‌تكارێ مه‌كته‌با سیاسی یا پارتی دیموكراتی كوردستان گوت ژی” جوداهیا كۆنگره‌یێ 14ێ ل گه‌ل كۆنگره‌یێ 13ێ ئه‌وه‌ یێ یێ 14 د ده‌مه‌كی دایه‌ گه‌له‌ك ئالنگاریێت چونایه‌تی هه‌نه‌ ل سه‌ر ئاستێ ناڤخوه‌یێ كوردستانێ، یان ل سه‌ر ئاستێ ئیراقێ و سیاسه‌تا هه‌رێمی و نیڤ ده‌وله‌تی به‌رامبه‌ر دوزا ملله‌تێ مه‌ وسه‌روه‌ریا قه‌وارێ هه‌رێما كوردستانێ، پارتی وه‌كو هێزا سه‌ره‌كی یا حوكمڕان ل هه‌رێما كوردستانێ و خودان كاریگه‌ری ل سه‌ر دوزا نه‌ته‌وی ب شێوه‌كێ گشتی دڤێ كۆنگره‌یدا دێ بهێزه‌كا دی به‌رامبه‌ر چه‌وایه‌تییا چاره‌سه‌ركرنا ده‌رهاوشتێت ڤان ئالنگاریا نێرینێت خودا  دارێژیت،  گه‌له‌ك یا گرنگه‌ ب بابه‌تیانه‌ دڤی بیاڤێ هه‌ستیاردا ئه‌و گاڤێن هه‌تا نوكه‌ هاتینه‌ هاڤێتن دوی واریدا بهێنه‌ هه‌لسه‌نگاندن”.

ل دور بڕێڤه‌چوونا كۆنگره‌یێ 14ێ یێ پارتی ل دهۆكێ، عارف روشدی گوت” هه‌تا نوكه‌ پارتی دیموكراتی كوردستان كۆنگره‌ ل هه‌موو پارێزگه‌هێن هه‌رێما كوردستانێ و به‌غدا ژی یێن گرێداین، دهۆك وه‌كو بنه‌ستره‌كی دیار د پشته‌ڤانیا جه‌ماوه‌ری دا نه‌هێته‌ بێ باركرن ژڤێ هه‌لكه‌فتا سیاسی پارتی بریاردایه‌ كۆنگره‌ ل ئێك ژ هولێن باژێرێ دهۆكێ بهێته‌ برێڤه‌برن، هه‌روه‌سا رێز و پێزانینه‌كه‌ بۆ خه‌لكێ دهۆكێ و ده‌ڤه‌را به‌هدینان به‌رامبه‌ر وێ قوربانیدانا به‌رده‌وام د درێژاهیا بزاڤا رزگاری خوازیا خه‌لكێ كوردستانێ دا”.

شیره‌تكارێ مه‌كته‌با سیاسی یا پارتی دیموكراتی كوردستان ئاماژه‌كر ژی” پێشكه‌فتن و هاتنا گه‌نج و ئافره‌تان بۆ پێشڤه‌ دناڤ پارتیدا خه‌سله‌ته‌كا دێرین یا پارتی یه‌، چونكه‌ پارتی دوێ باوه‌ریێ دایه‌ نووبوونه‌ڤه‌ د هه‌موو ده‌راڤێن ژیانێ دا (خواسته‌كا خوزاییه‌) له‌وما پێدڤیه‌ به‌رده‌وام لێكتێگه‌هشتن دناڤبه‌را خه‌باتكه‌رێن نفشێ دێرین و خودان سه‌ربور و نفشێ ژ نوو پێگه‌هشتی ژ هه‌ر دو ره‌گه‌زێن نێر و مێدا ب ڕه‌نگه‌كێ ئه‌رێنی دروست ببیت”.

ل دووماهیێ شیره‌تكارێ مه‌كته‌با سیاسی یا پارتی دیموكراتی كوردستان دبێژیت” هیڤیا من ئه‌وه‌ خه‌باتكه‌رێن پارتی ل سنورێ هه‌موو لق و مه‌كته‌ب و ده‌زگه‌هان ب هه‌سته‌كێ به‌رپرسیارانه‌ پشكداربن دپرۆسا هه‌لبژارتنا نوونه‌رێن خوه‌ بۆ كۆنگره‌یێ 14ێ  بۆ وێ چه‌ندێ بشێن پشكدارێن ئه‌رێنی بن د نه‌خشه‌دانانا سیاسه‌تا حزبا خوه‌ بۆ قوناغا داهاتی و دڤێـت بزانین قۆناغه‌كا هه‌ستیاره‌ و پێدڤیه‌ پارتی بهێز و شیانه‌كا مه‌زنتر د مه‌یدانا خه‌باتا كوردایه‌تیێ دا  رۆلێ پیشه‌نگێ خوه‌ بگێریت”.

ئه‌ڤرۆ:

سه‌رۆكێ فراكسیۆنا پارتی دیموكراتی كوردستان ل جڤاتا نوونه‌رێن ئیراقێ راگه‌هاند، بڕیاربوو پشتی چله‌یا ئیمام حوسێن كۆمبوونا جڤاتا نوونه‌رێن ئیراقێ بهێته‌ كرن و هه‌تا نوكه‌ ژڤانێ وێ یێ دیار نینه‌، چونكه‌ هیچ رێككه‌فتنه‌ك بۆ ئه‌نجامدانا كۆمبوونێ نه‌هاتیه‌ كرن و شیعه‌ ژی د ناڤخوه‌ دا نه‌گه‌هشتینه‌ رێككه‌فتنێ.

ڤیان سه‌بری، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ گوت” هه‌تا نوكه‌ ژڤانه‌كێ دیاركری بۆ ئه‌نجامدانا كۆمبوونا جڤاتا نوونه‌رێن ئیراقێ نه‌هاتیه‌ دیاركرن و باس ل وێ چه‌ندێ هاتیه‌ كرن كوپ شتی چله‌یا ئیمام حوسێنی ده‌ست ب كۆمبوونێن جڤاتا نوونه‌ران بهێته‌ كرن و نوكه‌ چله‌یا ئیمام حوسێنی یا ب دووماهی هاتی و هه‌تا نوكه‌ كۆمبوون نه‌هاتیه‌ كرن”.

ل دۆر وێ چه‌ندێ كو ئایا هه‌تا نوكه‌ رێككه‌فتنه‌ك د ناڤبه‌را ئالیان دا هه‌یه‌ بۆ ئه‌نجامدانا كۆمبوونا جڤاتا نوونه‌ران، ڤیانێ گوت” هه‌تا نوكه‌ رێككه‌فتن نه‌هاتیه‌ كرن و شیعه‌ ژی رێكنه‌كه‌فتینه‌ وهیچ گوهۆڕینه‌كا نوو نه‌بوویه‌”.

دهێته‌ زانین هه‌ر ئێك ژ ڤیان سه‌بری سه‌رۆكا فراكسیۆنا پارتی دیموكراتی كوردستانه‌ ل جڤاتا نوونه‌رێن ئیراقێ وڤیان ده‌خیل په‌یڤدارا فراكسیۆنا پارتی یه‌ ل جڤاتا نوونه‌ران و خالیدا خه‌لیل ژی په‌یڤدارا باره‌گه‌هێ بارزانی یه‌.

ئه‌ڤرۆ:

سكرتێرا په‌رله‌مانێ كوردستانێ راگه‌هاند، سه‌رۆكایه‌تیا په‌رله‌مانێ كوردستانێ لژنا قانوونی یا په‌رله‌مانی راسپاردیه‌ بۆ وێ چه‌ندێ به‌رهه‌ڤی بۆ دستووری بهێنه‌ كرن و هه‌موو ئالی و حوكمه‌ت و سه‌رۆكایه‌تیا هه‌رێما كوردستانێ ژی ل گه‌ل وێ چه‌ندێ نه‌ هه‌رێما كوردستانێ ببیته‌ خودانا دستوورێ خوه‌، له‌وما ئێكه‌مین كارێ په‌رله‌مانێ كوردستانێ ل ده‌ستپێكا وه‌رزێ نووی ێ قانووندانانێ دستوورێ هه‌رێما كوردستانێ بوو، چونكه‌ دستوور هه‌موو كێشان چاره‌سه‌ر دكه‌ت.

مونا قه‌هوه‌چی، سكرتێرا په‌رله‌مانێ كوردستانێ، گوت” به‌رهه‌ڤی بۆ دستوورێ هه‌رێما كوردستانێ یێن دهێنه‌ كرن و هه‌كه‌ نیه‌ت ژی هه‌بیت ل ڤی وه‌رزێ قانووندانانێ دێ دستوور یێ به‌رهه‌ڤ بیت، چونكه‌ هه‌موو ئالی د رژدن ل سه‌ر وێ چه‌ندێ هه‌رێما كوردستانێ ببیته‌ خودانا دستوورێ خوه‌، هه‌ڤده‌م سه‌رۆكایه‌تیا په‌رله‌مانێ كوردستانێ لژنا قانوونی راسپاردیه‌ بۆ وێ ئێكێ پێشنیازه‌ قانوونه‌كێ به‌رهه‌ڤ بكه‌ن ل دۆر چاوانیا نڤیسینا دستوورێ هه‌رێما كوردستانێ و ل وێ پێشنیازه‌ قانوونێ دێ باسێ هه‌موو هوورده‌كاریێن نڤیسینا دستوورێ هه‌رێما كوردستانێ هێته‌ كرن و نوونه‌رێن هه‌موو فراكسیۆنان ژی دێ د به‌رهه‌ڤكرنا پێشنیازێ دا ئاماده‌بن”.

ئه‌ڤرۆ:

به‌رپرسێ لژنا ناوچا قه‌ره‌ته‌به‌ یا پارتی دیموكراتی كوردستان راگه‌هاند، هه‌ژماره‌كا گوندێن كوردان ل سنوورێ ناحیا قه‌ره‌ته‌به‌ ژ ئه‌گه‌رێ ره‌وشا ئه‌منی یا خراب یێن هاتینه‌ چۆلكرن و ئاكنجیێن وان گوندان یێن به‌ر ب باژێران چووین.

كه‌مال ئیبراهیم، به‌رپرسێ لژنا ناوچا قه‌ره‌ته‌به‌ یا پارتی گوت” ده‌مێ هێزا پێشمه‌رگێن كوردستانێ ل سنوورێ ڤێ ناحیێ هه‌ی، مالێن كوردان د ته‌ناهیێ دا بوون و دپاراستی بوون، به‌لێ نوكه‌ هێزێن ئیراقی تنێ مالێن توركمان و ئه‌ره‌بان دپارێزن، گوندێن كوردان چ ژ روویێ خزمه‌تگوزاری ڤه‌، چ ژ روویێ ته‌ناهیێ ڤه‌ د پشت گوه هاڤێتینه‌”.

ناڤبری ئه‌وژی به‌رچاڤكر” ل باژێركێ جه‌باره‌ چار گوندێن كوردان ب ناڤێن (گلابات ئێك، گلابات دو، گلابات سێ و عێن شوكر) ب تمامی یێن هاتینه‌ چۆلكرن، ئه‌وژی ژ ئه‌گه‌رێ نه‌بوونا ته‌ناهیێ و خزمه‌تگوزاریان، هه‌روه‌سا ل ناحیا قه‌ره‌ته‌به‌ چه‌كدارێن داعشێ رۆژانه‌ لڤینان دكه‌ن و یێن بووینه‌ مه‌ترسی ل سه‌ر ژیانا وه‌لاتیان، له‌وما ب نه‌چاری گوندێن خوه‌ چۆل دكه‌ن”.

به‌رپرسێ لژنا ناوچا پارتی ل قه‌ره‌ته‌به‌ ب پێدڤی دزانیت هێزا پێشمه‌رگه‌ی بۆ پاراستنا مالێن وه‌لاتیان بزڤرنه‌ ده‌ڤه‌رێ و دبێژیت” هێزێن ئیراقی نه‌شیاینه‌ ته‌ناهیێ بۆ خه‌لكی دابین بكه‌ن، به‌ری حه‌فتیه‌كێ ژی گه‌نجه‌كێ كورد ل گوندێ نارین هاته‌ ره‌ڤاندن و هه‌تا نوكه‌ هێزێن ئیراقی هیچ تشته‌ك بۆ رزگاركرنا وی نه‌كریه‌”.

هه‌ولێر، قائید میرۆ

نێزیكی ساله‌كێ یه‌ بسه‌ر هه‌لبژارتنێن جڤاتا نوونه‌رێن ئیراقێ ده‌رباز بووین و ئالیێن سیاسی كار بۆ هه‌لبژارتنه‌كا دی یا پێشوه‌خت  دكه‌ت چاڤدێره‌كێ سیاسی ژی رادگه‌هینیت، باشترین چاره‌سه‌ری بۆ ره‌وشا نوكه‌ یا ئیراقێ پێكئینانا حوكمه‌ته‌كا ده‌مكیه‌ هه‌تا هه‌لبژارتنێن نوو یێن جڤاتا نوونه‌ران دهێنه‌ ئه‌نجامدان هه‌روه‌سا ئاماژه‌كر، باشترین یاریزانێ پرۆسا سیاسی ل ئیراقێ موقته‌دا سه‌دره‌ و بێی سه‌در چو حوكمه‌ت سه‌رناگرن ل ئیراقێ.

ئاراس عه‌بدولا، چاڤدێرێ سیاسی بۆ رۆژناما (ئه‌ڤرۆ) گوت” ئیراق یا كه‌فتیه‌ قۆناغه‌كا دژوار دا، له‌وڕاژی مه‌رج نینه‌ هه‌كه‌ جاره‌كادی هه‌لبژارتن ژی بهێنه‌ دوباره‌كرن هه‌موو ئالیێن سیاسی و پشكدار دانپێدانانێ ب ئه‌نجامێن هه‌لبژارتنان بكه‌ن، مه‌ دیت ل چه‌ند رۆژێن بۆری ژ ئه‌نجامێ ڤه‌گوهاستنا قۆناغا لهه‌ڤهاتنا نیشتیمانی بۆ زۆرینه‌یا نیشتیمانی ئالۆزی په‌یدابوون و خه‌لكه‌ك ژی هاته‌ كوشتن، ئه‌ز باوه‌رم مه‌ترسی لسه‌ر پرۆسا هه‌لبژارتنان ل ئیراقێ یا هه‌ی، چونكه‌ گومان یێن هه‌ین كو د ده‌مێ رێڤه‌چوونا هه‌لبژارتنان دا ئالۆزی په‌یداببن و ده‌ستێوه‌ردان د پرۆسا هه‌لبژارتنان دا بهێته‌كرن، ئه‌ز باوه‌ر ناكه‌م دووباره‌ ئه‌نجامدانا هه‌لبژارتن ببیته‌ ئه‌گه‌ره‌ك بۆ چاره‌سه‌ركرنا ئاریشه‌یان، ب دیتنا من تنێ ب مه‌رج دێ هه‌لبژارتن ببنه‌ ئه‌گه‌ره‌ك بۆ چاره‌سه‌ركرنا ئالۆزیێن نوكه‌ ئیراق تێدا ده‌رباز دبیت ئه‌وژی بده‌ست ئینانا ٢٢٠ كورسیێن په‌رله‌مانی ژلئالیێ هژماره‌كا هێزێن سیاسی بۆ ته‌مامكرنا رێژه‌یا قانوونی یا هه‌لبژارتنا سه‌رۆك كۆماری، ژ به‌ر كو هه‌كه‌ سه‌رۆك كۆمار بهێته‌ هه‌لبژارتن و رێژه‌یا قانوونی یا ئه‌ندامێن جڤاتا نوونه‌ران به‌رهه‌ڤی كۆمبوونا جڤاتا نوونه‌ران ببیت دێ ئاریشه‌ هه‌تا راده‌یه‌كی هێته‌ چاره‌سه‌ركرن، به‌رۆڤاژی هیچ ئه‌گه‌ره‌كێ دی نینه‌ بۆ وێ چه‌ندێ بێژین دوباره‌كرنا پرۆسا هه‌لبژارتنان دێ بیته‌ ده‌رگه‌هه‌ك بۆ ب دوماهی ئینانا ئاریشه‌یێن ئیراقێ”.

ئاراس عه‌بدولای  گوت ژی” ئیراق وه‌لاته‌كه‌ سه‌روه‌ری نینه‌ و یێ كه‌فتیه‌ دبن كاریگه‌ریا وه‌لاتێن هه‌رێمی دا، ئانكو وه‌لاتێن هه‌رێمی ل ئیراقێ رۆل یێ هه‌ی و چه‌ندین میلیشیا یێن هه‌ین كو بڕیارێن وان ژ ده‌رڤه‌ی ئیراقێ دهێن و بۆ ئه‌ره‌بێن سونه‌ ژی ب هه‌مان شێوه‌یه‌، دیاره‌ كورد ژی بووینه‌ دوبه‌ره‌ و هه‌ر ئێك گه‌هشتیه‌ به‌ره‌یه‌كێ ئیراقێ، ئه‌ز باوه‌رناكه‌م حوكمه‌ته‌كا نوو ل ئیراقێ بهێته‌ پێك ئینان، تنێ دشێن حوكمه‌ته‌كا ده‌مكی بهێته‌ پێكئینان بۆ ب ڕێڤه‌برنا هنده‌ك كاروباران هه‌تا هه‌لبژارتن دهێنه‌ ئه‌نجامدان، دبیت ژیێ حوكمه‌تا ده‌مكی تنێ شه‌ش هه‌یڤ بن نه‌كو زێده‌تر، مانا ڤێ حوكمه‌تا نوكه‌ ژی ب سه‌رۆكایه‌تیا مسته‌فا كازمی جهێ رازیبوونا ئالیێن سیاسی نینه‌ و گومان یا هه‌ی ده‌ستێوه‌ردانێ دپرۆسا هه‌لبژارتنان دا بكه‌ن، مانا حوكمه‌تا نوكه‌ پێدڤی ب لهه‌ڤهاتنا ئالیێن سیاسی یا هه‌ی، باشترین یاریكه‌رێ مه‌یدانا سیاسی یا ئیراقێ د ده‌مێ نوكه‌دا موقته‌دا سه‌دره‌، چونكه‌ دیاربو پشتی خوه‌ ڤه‌كێشای جاده‌ یا د ده‌ستێن سه‌دری دا و هه‌ر ئه‌وژی دشێت ئاشتیێ به‌لاڤ بكه‌ت یان ژی بكه‌ته‌ شه‌ڕ ل ئیراقێ، ب كورتی حوكمه‌تا نوكه‌ بمینیت یان ژی حوكمه‌ته‌كا ده‌مكی بهێته‌ پێكئینان هه‌ر دڤێت ب رازیبوونا موقته‌دا سه‌در بیت”.