ئه‌ڤرۆ:

ئه‌ندامه‌كێ شاندێ دانوستاندكارێ پارتی دیموكراتی كوردستان راگه‌هاند، پارتی وه‌رگرتنا پۆستێ سه‌رۆك كۆمارا ئیراقێ ب مافێ خوه‌ دزانیت و هه‌ڤڕایێ ئالیێن سیاسی یێن دی یه‌ بۆ ئه‌نجامدانا هه‌لبژارتنێن پێشوه‌خت ل ئیراقێ.

به‌نگین رێكانی، ئه‌ندامێ شاندێ دانوستاندكارێ پارتی دیاركر كو پارتی دیموكراتی كوردستان پۆستێ سه‌رۆك كۆماری ب مافێ خوه‌ دزانیت وهه‌تا نوكه‌ ل گه‌ل ئێكه‌تی نیشتماتی كوردستان ل سه‌ر به‌ربژاره‌كێ هه‌ڤپشك رێكنه‌كه‌فتینه‌.

به‌نگین رێكانی ئاشكراكر” پارتی و ئێكه‌تی دانوستاندنێن باش ل سه‌ر كێشێن د ناڤبه‌را وان دا كرینه‌ سه‌باره‌ت چاوانیا ب ڕێڤه‌برنا حوكمه‌تێ و هه‌ڤپشكیێ د ناڤبه‌را هه‌ردو حزبان ل به‌غدا، به‌لێ نه‌گه‌هشتینه‌ خالا باسكرنا دیاركرنا به‌ربژاره‌كێ هه‌ڤپشك بۆ پۆستێ سه‌رۆك كۆماری”.

دووپاتكر ژی” هه‌ردو ئالی دخوازن ب به‌ربژاره‌كێ هه‌گپشك بچنه‌ كۆمبوونا جڤاتا نوونه‌رێن ئیراقێ بۆ هه‌لبژارتنا سه‌رۆك كۆماری”.

به‌نگین رێكانی ئاماژه‌كر ژی” پارتی وه‌كو سه‌ركه‌فتیێ ئێكێ د هه‌لبژارتنان دا و بده‌ستڤه‌ئینانا پتریا كورسیێن جڤاتا نوونه‌رێن ئیراقێ ل هه‌رێما كوردستانێ، پۆستی سه‌رۆك كۆمارا ئیراقێ ب مافێ خوه‌ دزانیت”.

وی ئه‌ندامێ شاندێ دانوستاندكارێ پارتی رۆهنكر ژی” بۆچوونا سه‌رۆك بارزانی یا دیاره‌ كو كێشه‌ ژ ئه‌گه‌رێ پۆسته‌كی نینه‌ به‌لكو كێشا سه‌ره‌كی پرسا مافێن دستووری یێن گه‌لێ كورده‌ ل ئیراقێ”.

هه‌روه‌سا باس ل بزاڤا نڤیسینا ره‌شنڤیسه‌كی ژی كر، كو ژ سالا 2005 ئه‌ڤه‌ جارا ئێكێ یه‌ گاڤه‌كا وه‌سا بهێته‌ هاڤێتن، د پاكێچه‌كی دا باسێ هه‌موو كێشێن ئیراقێ بهێته‌ كرن، ب باسكرنا كێشێن كوردان ژی ل گه‌ل ئاماژه‌كر بۆ چاوانیا چاره‌سه‌ركرن و دیاركرنا ده‌می بۆ بجهئینانێ.

سه‌باره‌ت ڕێككه‌فتنا داهاتی، به‌نگین ریكانی دووپاتی ل سه‌ر وێَ چه‌ندێ كر كو” پارتی ل سه‌ر هه‌لویستێ خوه‌ یا رژده‌ كو ناچیته‌ هیچ ڕێككه‌فتنه‌كێ بۆ پێكئینانا حوكمه‌تێ هه‌كه‌ گره‌نتیه‌ك نه‌بیت و هه‌موو تشت ل ڕێككه‌فتنا د ناڤبه‌را وان دا نه‌هێته‌ نڤیسین، بۆ وێ چه‌ندێ هه‌موو ئالی ل پاشه‌رۆژێ به‌رپرسیاره‌تیا سۆزێن خوه‌ ل ستۆبگرن به‌رامبه‌ر هه‌رێما كوردستانێ”.

ل دۆر ململانێیا ئالیێن سیاسی یێن ئیراقی، به‌نگین ریكانی دبێژیت” هه‌ڤڕكیێن د ناڤبه‌را حزب و ئالیێن سیاسی یێن ئیراقی دا د ده‌مكی نه‌ و هیچ بۆچوونه‌كا ستراتیژی بۆ پاشه‌رۆژێ نینه‌، ژ ئه‌گه‌رێ نه‌بوونا شاره‌زایێ دا د دیرۆكی َ دا و نه‌بوونا پلانێ بۆ پاشه‌رۆژێ”.

سه‌باره‌ت كێشێن ئیراقێ، به‌نگین ریكانی ره‌وشا ئیراقێ ب خراب هه‌ژمارت و گوت” ل ئیراقێ كێشا ناسنامێ و حوكمرانیا خراب یا هه‌ی هیچ ئێك ژ ئالیان خوه‌ ب خودانێ ئیراقێ و خودان بریار نزانن، له‌وما دروستكرنا بریارێ ل ئیراقێ یا بزه‌حمه‌ته‌ و ب ڕێڤه‌برنا وه‌لاتی ب شێوه‌یه‌كێ هه‌ره‌مه‌كی دهێته‌ ب ڕێڤه‌برن و ئالی كاری ل سه‌ر موزایه‌دا سیاسی دكه‌ن بۆ ڕاكێشانا سه‌رنجا جاده‌یێ”.

هه‌ولێر: سولین سلێمان

ئه‌ندامه‌كێ مه‌كته‌با سیاسی یا پارتی دیموكراتی كوردستان  د دیداره‌كێدا بۆ رۆژناما« ئه‌ڤرۆ راگه‌هاند، مه‌ به‌رهه‌ڤیێن ئه‌نجامدانا كۆنگره‌یێ 14 یێ پارتی یێن ب دوماهی ئیناین و ل دووڤ رێنمایێن ناڤخوه‌یی یێن پارتی، ل ده‌سپێكێ ئه‌ندامێن كۆنگره‌ی دێ هێنه‌ هه‌لبژارتن و هه‌موو ئه‌ندامێن پارتی ب  ئازادی دێ شێن ده‌نگێ خوه‌ ده‌ن،

كاكه‌مین نه‌جار، ئه‌ندامێ مه‌كته‌با سیاسی یا پارتی دیموكراتی كوردستان زێده‌تر بۆ (ئه‌ڤرۆ) گوت” دناڤا كۆنگره‌ی دا سه‌ركردایه‌تیه‌كا نوو بۆ پارتی دێ هێته‌ هه‌لبژارتن و ده‌ستهه‌لاتا هه‌موو گوهۆڕینان ژی هه‌یه‌ د په‌یره‌و و پرۆگرامی دا”.

هه‌روه‌سا دیاركر” كۆنگره‌ ب شێوازه‌كێ گه‌له‌ك نایاب دێ هێته‌ كرن چونكی ئه‌و كادرێن كو ده‌رچووین د ژێهاتینه‌ و د كاروبارێن حزبیدا ئه‌زموونه‌كا سیاسی به‌ری نۆكه‌ وان هه‌بوویه‌ ژبه‌ر ڤێ چه‌ندێ كونگره‌ دێ گه‌له‌ك ب باشی ب ڕێڤه‌دچیت”.

ژ ئالیێ خوه‌ڤه‌، نه‌جات حه‌سه‌ن، جێگرێ سه‌رۆكێ لژنا به‌رهه‌ڤكارا كۆنگره‌یێ 14 یێ پارتی دیموكراتی كوردستان راگه‌هاند” پرۆسا هه‌لبژارتنا ئه‌ندامێن گۆنگره‌یێ 14 یێ پارتی یا به‌رده‌وامه‌ و هه‌تا نوكه‌ هه‌لبژارتن ل 89 بازنه‌یان یێن هاتینه‌ ئه‌نجامدان بۆ دیاركرنا نوونه‌رێن كۆنگره‌ی و د دو رۆژێن بۆری دا ل هه‌ردو لژنێن ناوچا برایه‌تی و كوماته‌ ل سنوورێ لقێ ئێك ل دهۆكێ هه‌لبژارتنا نوونه‌رێن كۆنگره‌ی هاتنه‌ ئه‌نجامدان و ل ئورۆپا ژی هه‌لبژارتنا نوونه‌رێن كۆنگره‌ی د به‌رده‌وامن و ل وه‌لاتێ هوله‌ندا یێن ب دووماهی هاتین”.

نه‌جات حه‌سه‌ن دیاركر ژی” پرۆسه‌ ب شێوه‌یه‌كێ گه‌له‌ك ئارام و بێ گرفت یا به‌رده‌وامه‌ و ب گۆره‌ی پێشبینیێن مه‌ پرۆسا هه‌لبژارتنێن نوونه‌رێن كۆنگره‌ی هه‌تا 15 هه‌یڤا بهێت دێ به‌رده‌وام بیت” هه‌روه‌سا گوت” پرۆسه‌ گه‌له‌ك یا مه‌زنه‌ و هه‌ر گرفته‌كا هه‌بیت ژی ب وی شێوه‌ی نه‌بوو و یا سروشتی بوو له‌وما پرۆسه‌ گه‌له‌ك ب باشی ب ڕێڤه‌ دچیت”.

ئه‌ڤرۆ:

په‌یڤدارا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ باسێ ره‌وشا نوكه‌ یا ئیراقێ دكه‌ت و ئاماژێ ب وێ چه‌ندێ دكه‌ت كو نابیت ئه‌ڤ ره‌وشه‌ به‌رده‌وام بیت.

ڤیان ده‌خیل، په‌یڤدارا فراكسیۆنا پارتی دیموكراتی كوردستان گوت” ئه‌م وه‌كو پارتی دیموكراتی كوردستان ل گه‌ل وێ چه‌ندێ نه‌ رێیا دستووری و قانوونی بهێته‌ بكارئینان و مه‌ چو گرفت ل دۆر ئه‌نجامدانا هه‌لبژارتنێن پێشوه‌خت یێن جڤاتا نوونه‌رێن ئیراقێ نینن و پێدڤیه‌ هه‌لبژارتن ل سه‌ر بنه‌مایێ دستووری و قانوونێ بهێنه‌ ئه‌نجامدان و نابیت دانوستاندنێن ئالیێن ئیراقێ ب رێیا تویته‌ری و پۆستێن فه‌یسبووكی بهێنه‌ كرن، به‌لكو پێدڤیه‌ روونشتن و دانوستاندن كرن و رێككه‌فتنه‌ك هه‌بیت ل دۆر وێ چه‌ندێ كو دێ به‌ر ب هه‌لبژارتنان ڤه‌ چین وئه‌نجامێن وێ دێ د قبوولكری بن یان نه‌، هه‌روه‌سا پێدڤیه‌ ئه‌نجامێن هه‌لبژارتنان بهێنه‌ قبوولكرن و جڤاكێ نێڤده‌وله‌تی ژی د هه‌ڤكێشێ دا بیت نه‌كو جیهان پشتا خوه‌ بده‌ته‌ ئیراقێ و تو ژی هزر بكه‌ی شه‌رعیه‌ت ئه‌وا یا ته‌ دڤێت”.

ڤیانێ به‌رچاڤكر ژی” هێشتا یا دیار نینه‌ ره‌وتێ سه‌دری دێ پشكداریێ د كۆمبوونێن ئالیێن سیاسی دا كه‌ت یان نه‌ بۆ وێ ئێكێ ئه‌و بزڤرن بۆ دانوستاندنان، ئانكو دو رێ یێن هه‌ین یان ب فشارا ده‌ره‌كی یان ناڤخوه‌یی بهێنه‌ قایلكرن بۆ به‌رهه‌ڤبوونێ ل كۆمبوونان، هه‌روه‌سا ره‌وتێ سه‌دری چه‌ند مه‌رجه‌ك یێن هه‌ین ژوان ژی هه‌لوه‌شاندنا جڤاتا نوونه‌ران كو هه‌تا نوكه‌ هیچ ئالیه‌ك دژی هه‌لوه‌شاندنا جڤاتا نوونه‌ران نه‌بوو، به‌لێ دڤێت ڤی بابه‌تی شرۆڤه‌كرنه‌كا قانوونی بۆ بهێته‌ دیتن كو زووتر دێ گه‌هنه‌ وێ ئارمانجێ”.

هه‌ڤده‌م دیاركر ژی” سه‌رۆك بارزانی ده‌ستپێشخه‌ریه‌ك هه‌بوو به‌لێ ئه‌و شه‌ڕێ به‌غدا هاته‌ روودان، هه‌روه‌سا ئه‌م ب خوه‌ ژی دزانین هه‌موو ده‌ستپێشخه‌ریێن ئیراقێ ژ هه‌ولێرێ ده‌ردكه‌ڤن، له‌وما ئه‌ڤ ده‌ستپێشخه‌ریا سه‌رۆكی بۆ ڤێ ره‌وشا ئیراقێ یا گرنگه‌ و هه‌كه‌ ده‌ستپێشخه‌ریه‌كا نوو ژ ئالیێ سه‌رۆك بارزانی ڤه‌ هه‌بیت دووباره‌ دێ ره‌وشێ هه‌موویێ گوهۆریت”.

په‌یڤدارا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ ئه‌وژی گوت” هه‌كه‌ ب ڤی شێوه‌ی ئیراق بمینیت دێ مه‌ترسی دروست بیت، نابیت ره‌وش به‌رده‌وام بیت چونكه‌ دبیت وی ده‌می جڤاكێ نێڤده‌وله‌تی ده‌ستپێشخه‌ریێ بكه‌ت به‌لێ هه‌تا نوكه‌ ئه‌و چه‌نده‌ نه‌كریه‌، لێ هه‌كه‌ ره‌وش گه‌هشته‌ پێكدادانێ دبیت ئه‌و ده‌ستپێشخه‌ریێ بكه‌ن، به‌لێ كاریگه‌ری نابیت ل سه‌ر ره‌وشا ئیراقێ چونكه‌ ئه‌و پرسه‌كا ناڤخوه‌یی یه‌”.

ئه‌ڤرۆ:

ئه‌ندامه‌كێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان راگه‌هاند، لێكتێگه‌هشتنه‌كا باش دناڤبه‌را پارتی دیموكراتی كوردستان وئێكه‌تی نیشتمانی كوردستان دا یا هه‌ی و ل ده‌مێ پێدڤی دێ به‌ربژاره‌كێ هه‌ڤپشك بۆ پۆستێ سه‌رۆك كۆماری ئاماده‌ بیت، ئه‌ندامه‌كێ سه‌ركردایه‌تیا ئێكه‌تی نیشتمانی كوردستانێ ژی هه‌مان پێزانینێ پشت راست دكه‌ت.

پارتی و ئێكه‌تی ژبلی به‌رهه‌م سالح و رێبه‌ر ئه‌حمه‌د كو به‌ربژارێن هه‌ردو ئالیانه‌ بۆ  پۆستێ سه‌رۆك كۆمارا ئیراقێ، كه‌سه‌كێ دی وه‌كو به‌ربژارێ هه‌ڤپشك یێ هه‌ردو ئالیان دێ هێته‌ دیاركرن، هه‌رچه‌نده‌ كو باسێ به‌ربژاره‌كی یێ هه‌ی كو دێ بیته‌ به‌ربژارێ هه‌ڤپشك یێ پارتی و ئێكه‌تی، به‌لێ به‌ربرسێن هه‌ردو ئالیان ره‌ت دكه‌ن ناڤێ هیچ به‌ربژاره‌كی هاتبیته‌ ئێكلاكرن.

شوان محه‌مه‌د روسته‌م، ئه‌ندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان راگه‌هاند” لێكتێگه‌هشتنه‌كا باش د ناڤبه‌را پارتی و ئێكه‌تی ل سه‌ر به‌ربژارێ پۆستێ سه‌رۆك كۆماری یا دروست بووی”.

شوانی گوت ژی” هه‌كه‌ رێكارێن دستووری ل سه‌ر كوردان بمینیت بۆ هه‌لبژارتنا سه‌رۆك كۆماری و پێكئینانا حوكمه‌تا نوو یا ئیراقێ، ئه‌و رێ ناده‌ن پرۆسه‌ گیرو ببیت و دێ كوردان به‌ربژاره‌كێ هه‌ڤپشك هه‌بیت”.

ئه‌و په‌رله‌مانتار یێ به‌رهه‌ڤ نه‌بوو ناڤێ هیچ به‌ربژاره‌كێ هه‌ڤپشك یێ پارتی و ئێكه‌تی بۆ  پۆستێ سه‌رۆك كۆماری ئاشكرا بكه‌ت،  به‌لێ نه‌ ڤه‌شارت ژی كو به‌ربژارێ وی پۆستی دێ به‌ربژارێ هه‌ڤپشك بیت و به‌رهه‌م سالح نابیت.

ژ ئالیێ خوه‌ڤه‌ رابیحه‌ حه‌مه‌د، ئه‌نداما سه‌ركردایه‌تیا ئێكه‌تی نیشتمانی كوردستانی و به‌رپرسا مه‌لبه‌ندێ به‌غدا یێ ئێكه‌تیێ راگه‌هاند” ژ پێخه‌مه‌ت به‌رژه‌وه‌ندیا گشتی یا گه‌لێ مه‌، نێزیكبوونه‌كا باش دناڤبه‌را پارتی و ئێكه‌تیێ بۆ بۆ هه‌لبژارتنا سه‌رۆك كۆماری یا هه‌ی”.

رابیحایێ ژی ناڤێ به‌ربژارێ هه‌ڤپشك یێ هه‌ردو ئالیان بۆ پۆستێ سه‌رۆك كۆماری ئاشكرا نه‌كر، به‌لێ گوت” دانوستاندن و ئاراستێن لێكتێگه‌هشتنێ بۆ به‌ربژارێ هه‌ڤپشك دناڤبه‌را مه‌ دا یێن هه‌ین”.

وێ ئه‌نداما سه‌ركردایه‌تیا ئێكه‌تیێ به‌ربژارێ هه‌ڤپشك یێ پارتی و ئێكه‌تی ب گرنگ هژمارت و گوت ژی” به‌ربژارێ هه‌ڤپشك بۆ پاراستنا به‌رژه‌وه‌ندیێن هه‌رێما كوردستانێ و ده‌ستكه‌فتان یێ گرنگه‌، هیڤیدارم سیناریۆیا سالا 2018 دووباره‌ نه‌بیت و ب ئێك به‌ربژاری بچینه‌ جڤاتا نوونه‌رێن ئیراقێ”.

زێده‌تر ژ 11 هه‌یڤایه‌ هه‌لبژارتنێن جڤاتا نوونه‌رێن ئیراقێ یێن هاتینه‌ ئه‌نجامدان، به‌لێ هه‌تا نوكه‌ سه‌رۆك كۆمارا ئیراقێ نه‌هاتیه‌ هه‌لبژارتن، ب ڤێ چه‌ندێ ژی پێكئینانا حوكمه‌تا نوو یا ئیراقێ هاتیه‌ پاشخستن، چونكه‌ ب گۆره‌ی دستووری سه‌رۆك كۆمار مه‌زنترین فراكسیۆنا جڤاتا نوونه‌ران بۆ پێكئینانا حوكمه‌تێ دێ راسپێریت.

ئه‌ڤرۆ:

شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ راگه‌هاند، هه‌تا هێزا پێشمه‌رگه‌ی نه‌زڤریته‌ وان ده‌ڤه‌رێن به‌ری 2017، ئه‌سته‌مه‌ داعش ل ده‌ڤه‌رێن كوردستانی یێن ده‌رڤه‌ی ئیدارا هه‌رێمێ بهێته‌ كونترولكرن، چونكه‌ لڤینێن داعشێ ل وان ده‌ڤه‌ران یا هه‌ی كو ڤالاهیا ئه‌منی دناڤبه‌را هێزێن ئیراقێ و پێشمه‌رگه‌ی دا تێدا هه‌ی. دژوار فائیق گوت ژی” ل ده‌مێ سه‌رۆك وه‌زیرێن ئیراقێ یێن وی سه‌رده‌می د نامیشه‌كا له‌شكری دا گوتبوو داعش ب دووماهی هات و نه‌مایه‌، به‌لێ هه‌ر ل وی ده‌می سه‌رۆك بارزانی گوتبوو داعش ب دووماهی نه‌هاتیه‌ و تنێ یا تووشی شكه‌ستنا له‌شكری بووی، له‌وما داعش پشتی شه‌ڕی ب ده‌مه‌كی خوه‌ بێده‌نگ كربوو، جاره‌كادی خوه‌ رێكخست و ژدیالا هه‌تا دگه‌هیته‌ سووریێ  ده‌ستپێكریه‌ و لڤینێن وان زێده‌تر ل وان ده‌ڤه‌رانه‌ كو ڤالاهیا ئه‌منی د ناڤبه‌را پێشمه‌رگه‌ی و له‌شكرێ ئیراقێ تێدا هه‌ی”.

شیره‌تكارێ سه‌رۆكێ حوكمه‌تێ گوت ژی” مخابن هنده‌ك ئالیان پێخوه‌شه‌ داعش ل وان ده‌ڤه‌ران هه‌بیت و پێشمه‌رگه‌ ژی نه‌زڤریت وان ده‌ڤه‌ران، هۆكارێن لڤینێن داعشێ ژی بۆ ڤالاهیا ئه‌منی و هه‌روه‌سا هه‌ماهه‌نگیا دناڤبه‌را پێشمه‌رگه‌ی و له‌شكرێ ئیراقێ دا نه‌گه‌هشتیه‌ وی ئاستی كوڤ الاهیا ئه‌منی بهێته‌ پڕكرن و ئه‌گه‌ر ژی دزڤریت بۆ وێ چه‌ندێ به‌غدا وه‌كو پێدڤی ناهێته‌ پێش و ئه‌گه‌ره‌كی دی ئه‌وه‌ خه‌لكه‌ك ل وان ده‌ڤه‌ران هاریكاریا داعشێ دكه‌ن كو دبیت دناڤ رێزێن هێزێن ئیراقی دا بن”.

ئاماژه‌كر” ل ئیراقێ پرۆسا سیاسی شكه‌ستن ئینایه‌ و ڤێ چه‌ندێ ژی كارتێكرن  ل سه‌ر هێزێن ئه‌منی كریه‌ و ل ئیراقێ هێزێن ئه‌منی و له‌شكری سه‌ركردایه‌تیه‌كا ئێكگرتی نینه‌، ب تایبه‌ت میلیشیا فه‌رمانی ژ سه‌ركردایه‌تیا گشتی یا له‌شكری وه‌رناگرن به‌لكو ژ ئالیێ سه‌ركردێن خوه‌ وه‌ردگرن، ڤێ چه‌ندێ ژی وه‌كریه‌ پلانه‌كا باش نه‌بیت كو ڤالاهیێن ئه‌منی پێ بهێنه‌ پڕكرن”.

دیاركر ژی” چاره‌سه‌ریا ڤێ ره‌وشێ ئه‌وه‌ حوكمه‌ته‌ك بهێته‌ پێكئینان ولگه‌ل هه‌رێمێ ڤالاهیا ئه‌منی بهێته‌ پڕكرن و پێشمه‌رگه‌ بزڤریت بۆ وان خالێن به‌ری 2017 تێدا، له‌وما هه‌تاكو ب هه‌ماهه‌نگیێ ئه‌و ڤالاهیا ئه‌منی نه‌هێته‌ پڕكرن ئه‌سته‌مه‌ داعش بهێته‌ كونترولكرن”.

ل دووماهیێ دبێژیت” ئه‌ڤه‌ بۆچوونا سه‌ركردایه‌تیا سیاسی و حوكمه‌تێ و سه‌رۆكێ حوكمه‌تێ یه‌، پێدڤیه‌ ئیراق هه‌ماهه‌نگیا زێده‌تر ل گه‌ل پێشمه‌رگه‌ی بكه‌ت و هاریكاریا پێشمه‌رگه‌ی بكه‌ت ژ روویێ چه‌ك و ته‌قه‌مه‌نی و پێدڤیان، چونكه‌ یا هاتیه‌ سه‌لماندن ئه‌و ده‌ڤه‌ر بێی پێشمه‌رگه‌ی سه‌قامگیریێ بخوه‌ڤه‌ نابینن”.