فەرماندەیێ گشتیێ هێزا پێشمەرگەی داخواز ژ حوكمەتا فیدرالی كر هەموو گرفتێن ل پێشبەری چاكسازیێ و ئێكگرتنا هێزێن پێشمەرگەی بهێنە چارەسەركرن.
نێچیرڤان بارزانی، سەرۆكێ هەرێما كوردستانێ و فەرماندەیێ گشتیێ هێزا پێشمەرگەی ل رێوڕەسمێ دەستبكاربوونا فرقەیێن سێ و چار یێن پیادە یێن وەزارەتا پێشمەرگەی، پەیڤەك پێشكێشكر.
نێچیرڤان بارزانی د پەیڤا خوە دا باسێ ئێكگرتنا هێزێن پێشمەرگەی و پێشڤەچوونێن د ڤی واریدا باسكرن، راگەهاند ژی: ئەڤ دەستكەفتە نیشانا ئیرادەیا مە یا ب هێزە و بەرهەمێ وێ قوربانیێن مەزنە كو گەلێ كوردستانێ و پێشمەرگەی ددەمێ چەندین سالاندا پێشكێش كری.
سەرۆكێ هەرێما كوردستانێ د پەیڤا خوە دا داخواز ژ پارتی دیموكراتی كوردستان و ئێكەتی نیشتمانی كوردستان كر هاریكاریێ نیشان بدەن و د هاریكار بن بۆ سەرئێخستنا پڕۆسەیا چاكسازیێ و ئێكگرتنا پێشمەرگەی.
سەرۆكێ هەرێما كوردستانێ دیاركر ژی: سەرئێخستنا ڤێ پڕۆسەیێ، ئەركەكێ نیشتمانی و نەتەوەییێ مە هەموویانە و پێدڤییە هەر گرفت و كێشەیەكا ل پێشبەری پڕۆسەیێ هەی، بهێنە چارەسەركرن، تاكو ل دووماهیێ هەموو پێشمەرگە، وەكو هێزەكا نیشتمانییا كوردستانێ، ل بن سیبەرا وەزارەتا كاروبارێن پێشمەرگەی بهێنە كۆمڤەكرن، كو ئێك سەركردایەتی، ئێك كۆنترۆل و ئێك ناڤەندا ئاراستەكرنێ هەبیت.
فەرماندەیێ گشتیێ پێشمەرگەی باس ل وێ چەندێ ژی كر، د دەمەكیدا هاریكاری و هەماهەنگییا پێشمەرگەی ل گەل هێزێن لەشكرێ ئیراقێ گەلەك پێدڤی و گرنگ د هەلسەنگینین، داخوازێ ژ حوكمەتا فیدرالییا ئیراقێ دكەین، ب گۆڕەی دستووری و قانوونێ رەفتارێ ل گەل پێشمەرگەی بكەت ووەكو پشكەك ژ سیستەمێ بەرگریێ ئیراقێ، ژ هەموو روویەكیڤە ئەرك و پێگیریێن خوە بەرامبەر پێشمەرگەی بجهبینیت.
نێچیرڤان بارزانی دیاركر ژی: د دەمەكیدا دەڤەر ب رەوشەكا ئالۆزدا دەرباز دبیت و روو ب روویێ چەندین ئاستەنگان دبین، گەلێ كوردستانێ ب ئومێد ڤە چاڤەڕێی دەنگوباسێ دامەزراندنا كابینەیا نوو یا حوكمەتا هەرێما كوردستانێیە. لەوما داخواز ژ ئالیێن سەركەفتی د هەلبژارتناندا كر ڤێ چەندێ بكەنە كارێ خوە یێ بەراهیێ و ب سەركەفتنا دانوستاندنان و رێككەفتنێ وپێكئینانا حوكمەتا نوو، دلێ گەلێ كوردستانێ خوەش بكەن. ب زووترین دەم، حوكمەتەكێ پێكبینن كو بەرسڤا داخوازی و پێشبینیێن هەڤوەلاتیێن هەرێما كوردستانێ بیت.

دەقێ پەیڤا سەرۆكێ حوكمەتا هەرێما كوردستانێ:

جەنەرال كیڤن لیهی، فەرماندەیێ هێزێن هەڤپەیمانییا نێڤدەولەتی ل ئیراقێ و سووریێ
بەرهەڤبوویێن ب رێز ..
هوون هەموو ب خێر هاتن بۆ رێوڕەسمێ دەستبكاربوونا هەردو فیرقەیێن سێ و چار یێن پیادە ب سەر وەزارەتا كاروبارێن پێشمەرگەی ڤە. پشتی ل ئۆكتۆبەرا بۆری مە فەرمانا هەرێمی بۆ دامەزراندنا وان هەردو فیرقەیان دەركری.
گەلەك خوەشحالین كو ئەڤرۆ وەكو پشكەك و پێنگاڤەكا دی یا پڕۆسەیا چاكسازیێ و ئێكگرتنا پێشمەرگەی ل بن سیبەرا وەزارەتا كاروبارێن پێشمەرگەی ل حوكمەتا هەرێما كوردستانێ، دەستبكار بن.
ئەڤرۆ ب دەستبكاربوونا ڤان هەردو فیقەیان، ئەم دیدەڤانێن پێنگاڤەكا نوو و پڕ گرنگین د ڤی كاروانیدا كو چەندین سالە یێ بەردەوام. ئەڤ دەستكەفتە تنێ پێنگاڤەكا رێكخستن یان كارگێری نینە، بەلكو نیشانا پیرادەیا مە یا ب هێزە و بەرهەمێ ویان قوربانیێن مەزنە كو گەلێ كوردستانێ و پێشمەرگەی د دەمێ چەندین سالاندا، پێشكێش كری.
پێشمەرگە تنێ هێزەكا لەشكرییا ئاسایی نینە، بەلكو هەردەم هێمایێ قەهرەمانییەنێ و فیداكاریێ و پارێزەرا ئاسایشا هەرێما كوردستانێیە و پشكەكا گرنگ یا ناسنامەیا نیشتمانی بوو. هەر ژ رۆژا ئێكێ یا دروستبوونا وێ، هێزا شۆڕەش و پاریزەرا گەلێ كوردستانێ بوو. دەمێ رێكخراوا تیرۆرستییا داعشێ وەكو گەفەكا جیهانی دەركەفتی، پێشمەرگە ل رێزا بەراهیێ یا وان هێزان بوو كو روو ب روویێ ڤێ مەترسیێ و گەفان بووی.
پێشمەرگەی، ب قەهرەمانانە شەڕەكێ گران ل پال هەڤپەیمانییا نێڤدەولەتییا دژی داعشێ بڕێڤەبر و بۆ جیهانێ سەلماند كو تنێ هێزەك نینە بۆ بەرگریێ ژ كوردستانێ، بۆ پاراستنا پێكڤەژیانا ئاشتییانەیا هەموو پێكهاتەیێن كوردستانێ، بەلكو كەلهەكە بۆ پاراستنا مرۆڤایەتیێ ژ ڤێ گەفا هەڤپشك. لەوما ئەو شانازییە بۆ پەیدا بوو كو بەرگریێ ژ هەموو مرۆڤایەتیێ بكەت و ژ پێخەمەت وێ ب گیان و خوون شەڕی بكەت، ل دووماهیێ ژی دا ب سەركەڤیت و ل بن فەرماندەییا سەرۆك مەسعود بارزانی، ئەفسانەیا داعشێ بهێتە شكاندن.
ژبەر قەهرەمانی و سەركەفتنێن وی یێن مەزن، پێشمەرگە ل ئاستێ جیهانێ بوو سیمبۆلا ئازایەتیێ و جهێ شانازییا گەلێ كوردستانێ. د ناڤ هەموو گەل و وەلاتێن جیهانێدا، ناڤێ پێشمەرگەی، وەكو شەڕكەرەكێ قەهرەمان ژ پێخەمەت پاراستنا مرۆڤایەتیێدا دیاربوو.
ئەڤ دەستكەفتا ئەڤرۆ ب دەستڤەنەدهات، هەكە پشتەڤانییا هەڤپشكێن مە ل هەڤپەیمانییا نێڤدەولەتی نەبا كو ب شێوەیەكێ كارا پشكدار بوون د بزاڤ و پێنگاڤێن ئێكگرتنێدا. ژ ب هێزكرنا شیانێن هێزێن پێشمەرگەی، چ ب رێكا مەشق و راهێنانێ، یان دابینكرنا پێدڤیێن لەشكری، یان ژی پشتەڤانییا لۆجستی.
ئەم ل هەرێما كوردستانێ سوپاسی و رێزگرتنا خوە دوپات دكەین بۆ وی رۆلێ دۆستێن مە ل هەڤپەیمانییا نێڤدەولەتی ب سەركرداەتییا ئەمریكا بۆ پشتەڤانییا مە ل ئیراقێ و هەرێما كوردستانێ د دژوارترین دەماندا، گێرای.
هەروەسا بۆ هاریكارییا مە د پڕۆسەیا چاكسازیێ و ئێكگرتن و رێكخستنا پێشمەرگەی دا. دۆستێن مە ل هەڤپەیمانییا نێڤدەولەتی، ب تایبەتی ئەمریكا، بریتانیا، ئەلمانیا، هۆلەندا، هنگاریا، ئیتالیا و فرنسا پشكداری د دانانا بنەمایێن پێدڤی بۆ ئێكگرتنا پێشمەرگەی ل بن سیبەرا وەزارەتا كاروبارێن پێشمەرگەیدا كری كو هەماهەنگیێ و كاراییێ دەستبەر دكەت و پێشمەرگەی بەرهەڤ دكەت بۆ وێ چەندێ ببیتە هێزەكا پیشەیی و زەلال. هێزەك، ب دلسۆزیڤە خزمەتا گەلێ كوردستانێ بكەت و ببیتە پشكەكا كارا و كاریگەر د سیستەمێ بەرگریێ ئیراقێدا.
پێكئینانا فیرقەیێن سێ و چار یێن پەیادە یێن پێشمەرگەی، ئەڤرۆ پێنگاڤەكا گرنگ و ستراتیژییە بەر ب ب دەستڤەئینانا ئارمانجێن مە یێن مەزنتر ئەوژی دروستكرنا هێزەكا نیشتمانییا ئێكگرتی. هێزەك كو پیشەیی و رێكخستیتر بیت و ل بەرامبەر هەر گەف و مەترسییەكێ، شیانێن پاراستن و بەرگریكرنێ ژ وەلاتێ هەبن.
ئەڤ هێزە دێ ل بن سیبەرا وەزارەتا كاروبارێن پێشمەرگەیدا كاركەن و پشتڕاستیێ دەن ژ وێ چەندێ هێزێن مە هەردەم د ئامادەباشییەكا تمام دا بن بۆ بەرهنگاربوونا هەر گەفەكێ ل سەر ئاسایشا هەرێما كوردستانێ و پاراستنا ئارامیێ و سەقامگیریێ.
راستە، پشتەڤانییا دۆستێن مە گەلەك یا پێدڤی و گرنگە، بەلێ ئەم باش دزانین كو ل دووماهیێ سەركەفتنا راستەقینەیا ڤێ پڕۆسەیێ، پشتبەستنێ ب ئیرادەیا مە یا ناڤخوەیی دكەت. ئێكگرتنا هێزێن پێشمەرگەی پێدڤی ب كاركرنا مە هەموویانە ب گیانێ ئێك تیمی و زالبوون ب سەر هەر دابەشبوون و ناكۆكییەكێدا كو دبیت رێگر بیت ل ڤی پڕۆژەیێ نیشتمانی. پێشمەرگە دڤێت هێزەكا نیشتمانی بیت و دوور ژ سیاسەتێ و دەستێوەردانا حزبی بیت، بۆ پاراستنا كوردستانێ.
بۆ ڤێ مەبەستێ داخوازێ ژ پارتی دیموكراتی كوردستان و ئێكەتی نیشتمانی كوردستان دكەم، هەموو هاریكارییەكێ بەرچاڤ بكەن و د هاریكار بن بۆ سەرئێخستنا پڕۆسەیا چاكسازی و ئێكگرتنا پێشمەرگەی. سەرئێخستنا ڤێ پڕۆسەیێ ئەركەكێ نیشتمانی و نەتەوەییێ مە هەموویانە و پێدڤییە هەر چ گرفت و كێشەیەكا ل پێشبەری پڕۆسەیێ هەی، بهێنە چارەسەركرن، تاكو ل دووماهیێ هەموو پێشمەرگە، وەكو هێزەكا نیشتمانییا كوردستانێ، ل بن سیبەرا وەزارەتا كاروبارێن پێشمەرگەی بهێتە كۆمڤەكرن كو ئێك سەركردایەتی، ئێك كۆنترۆل و ئێك ناڤەندا ئاراستەكرنێ هەبیت.
سەرەرای وێ چەندێ كو پێنگاڤێن پڕۆسەیا چاكسازی و ئێكگرتنا پێشمەرگەی، نە ل دووڤ خواست و چاڤەڕێیا مەیە، بەلێ كار و بزاڤێن مە بۆ سەرئێخستنا ڤێ پڕۆسەیێ، ل ڤێرێ ناراوەستیت.
ئەڤ پڕۆژەیێ نیشتمانی سۆزا مەیە بەرامبەر گەلێ كوردستانێ و نەڤیێن داهاتی. لەوما ب هەموو وزە و شیان و ئیرادە و پێداگیری، دێ بەردەوام بین د كاركرنێدا بۆ سەرئێخستنا پڕۆسەیێ و بۆ وێ چەندێ هێزێن پێشمەرگەی هەردەم نیشانا ئێكڕێزیێ و هێز و كەلهەك بن بۆ پاراستنا كوردستانێ ژ هەموو گەف مەترسییان.
هەر ب ڤێ هەلكەفتێ و د دەمەكیدا هاریكاری و هەماهەنگییا پێشمەرگەی ل گەل هێزێن لەشكرێ ئیراقێ گەلەك پێدڤی و گەلەك گرنگ د هەلسەنگینین، داخوازێ ژ حوكمەتا فیدرالییا ئیراقێ دكەین، ب گۆڕەی دستووری و قانوونێ رەفتارێ ل گەل پێشمەرگەیدا بكەت و وەكو پشكەك ژ سیستەمێ بەرگریێ ئیراقی، ژ هەموو روویەكیڤە ئەرك و پێگیریێن خوە بەرامبەر پێشمەرگەی بجهبینیت.
قەهرەمانی و قوربانیدانا پێشمەرگەی و خوونا پاقژ یا شەهیدێن نەمر یێن كوردستانێ، ل گەل پشتەڤانییا هەڤپشكێن مە ل هەڤپەیمانییا نێڤدەولەتی و پێگیرییا هەڤپشكێن مە، وەدكەن ئەڤرۆ ل ڤێرێ ب شانازی و سەربلندیڤە بەردەوام بین د كاروانێ خزمەتێ و پێشئێخستنا كوردستانێ و چ جاران خەمساریێ د ئێكگرتنا پێشمەرگەیدا نەكەین.
یێ پشتڕاستم ئەڤ دەستبكاربوونا هەردو فیرقەیێن سێ و چار و بەردەوامی و پێشڤەچوونا پڕۆسەیا ئێكگرتنا پێشمەرگەی، سەرەرای هەموو ئاستەنگ و كێشەیان، جهێ خوەشحالییەكا مەزنە گەلێ كوردستانێ و گیانێ شەهیدان شاد دكەت.
هەروەسا د دەمەكیدا دەڤەری د رەوشەكا ئالۆزدا دەرباز دبیت و روو ب روویێ چەندین ئاستەنگان دبین، گەلێ كوردستانێ ب ئومێد ڤە چاڤەڕێی دەنگوباسێ دامەزراندنا كابینەیا نوو یا حوكمەتا هەرێما كوردستانێیە.
لەوما داخوازێ ژ ئالیێن سەركەفتی د هەلبژارتناندا دكەم، ئەڤێ بكەنە كارێ خوە یێ ئێكێ و ب سەركەفتنا دانوستاندنان و رێككەفتنێ و پێكئینانا حوكمەتا نوو، دلێ گەلێ كوردستانێ خوەش بكەن. ب زووترین دەم، حوكمەتەكێ پێكبینن كو بەرسڤا داخوازی و پێشبینیێن هەڤوەلاتیێن هەرێما كوردستانێ بیت.

دوهی سێشەمبی 4/2/2025، مەسرور بارزانی، سەرۆكێ حوكمەتا هەرێما كوردستانێ، ل گەل شاندێ دانوستاندكارێ حوكمەتا هەرێمێ ل گەل بەغدا كۆمبوو.
د بەیاننامەیەكا سەرۆكایەتییا حوكمەتێدا هاتیە” د كۆمبوونەكێدا شاندێ كورتییەك ل دۆر ئەنجامێن دانوستاندن و دیدارێن خوە ل بەغدا تایبەت ب راستڤەكرنا قانوونا بۆدجەیا گشتییا فیدرالی و دابینكرنا مووچە و شایستەیێن دارایی یێن هەرێما كوردستانێ بەرچاڤكر”.
سەرۆكێ حوكمەتا هەرێمێ سوپاسییا ئەندامێن شاندی و هەموو تیمێن تەكنیكی یێن حوكمەتا هەرێما كوردستانێ كر، كو گەلەك ب پیشەییانە و دلسۆزانە ئەركێن خوە بجهئینان. هیڤی ژی خواست دەنگدان ل سەر راستڤەكرنا قانوونا بۆدجەیا فیدرالی ببیتە ئەگەرێ چارەسەركرنا كێشەیێن هەلاویستی یێن دی د ناڤبەرا هەرێما كوردستانێ و حوكمەتا فیدرالدا.

مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ وەلاتێ عومان ب سەرۆكایەتییا قەیس بن محەمەد ئەلیوسف، وەزیرێ بازرگانی و پێشەسازی و پێشڤەبرنا وەبەرئێنانێ كر.
ب گۆڕەی بەیاننامەیەكا حوكمەتا هەرێما كوردستانێ د دیدارەكێدا دوپاتی ل پێدڤییا ب هێزكرنا پەیوەندیێن هەرێما كوردستانێ و عومانێ د وارێن جۆراوجۆردا ب تایبەتی بازرگانی و پیشەسازی و وەبەرئێنانێدا هاتە كرن.
سەرۆكێ شاندێ عومانێ، خوەشحالییا ب سەرەدانا هەرێما كوردستانێ نیشاندا و بەرهەڤییا وەلاتێ خوە بۆ پێشڤەبرنا پەیوەندیێن دو ئالییانە دیاركر. ل دۆر ڤێ چەندێ ئاماژە ب گرنگییا ڤەكرنا قۆنسلخانەیا گشتییا وەلاتێ عومانێ ل هەرێما كوردستانێ ل نێزیك هاتە كرن.
سەرۆكێ حوكمەتا هەرێما كوردستانێ خواستا هەرێمێ بۆ ب هێزكرنا پەیوەندییان ل گەل وەلاتێ عومانێ دوپاتكر.
ژ ئالیێ خوەڤە مەحمود ئەلخرووسی، بالیۆزێ عومانێ ل ئیراقێ دداخۆیانییەكا رۆژنامەڤانیدا گۆت” شاندێ عومانێ ل گەل مەسرور بارزانی، سەرۆكێ حوكمەتا هەرێما كوردستانێ ب هێزكرنا پەیوەندیێن ئابووری و بازرگانی گەنگەشەكر و عومان چاڤەڕێی هەڤپشكییەكا ب هێزە ل گەل هەرێما كوردستانێ.
ئاشكراكر ژی” ل چەند رۆژێن داهاتی هەژمارەكا وەبەرئێنەرێن عومانی ب سەرۆكایەتییا سەرۆكێ ژۆرا بازرگانییا عومانێ دێ سەرەدانا هەولێرێ كەن و دێ پرسا وەبەرئێنانێ ل هەرێما كوردستانێ گەنگەشەكەن”.

دوهی سێشەمبی 4/2/2025، نڤیسینگەها سەرۆكێ حوكمەتا هەرێما كوردستانێ د بەیاننامەیەكێدا راگەهاند: مەسرور بارزانی، سەرۆكێ حوكمەتا هەرێما كوردستانێ، پێشوازی ل فەرامەرز ئەسەدی، قۆنسلێ گشتیێ نوو یێ كۆمارا ئیسلامییا ئیرانێ ل هەولێرێ كر.
د بەیاننامەیێدا هاتیە” د دیدارەكێدا، سەرۆكێ حوكمەتا هەرێما كوردستانێ پیرۆزباهییا دەستبكاربوونێ ل قۆنسلێ گشتیێ نوو یێ ئیرانێ ل هەولێرێ كر و هیڤییا سەركەفتنێ دئەركێ وی دا بۆ خواست”.
هەردو ئالییان دوپاتی ل گرنگییا پێشڤەبرنا پەیوەندیێن دناڤبەرا كۆمارا ئیسلامییا ئیرانێ و هەرێما كوردستانێ كر.

دوهی سێشەمبی 4/2/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل كەسایەتیێ ئایینیێ كوردستانی یێ ناڤدار شێخ مادح شێخ عوسمان نەقشبەندی كر.
د دیدارەكێدا دوپاتی ل گرنگییا پێشڤەبرنا كەلتوورێ پێكڤەژیانا ئاشتییانە و تەباییێ د ناڤبەرا پێكهاتەیێن كوردستانێدا و پاراستنا بهایێن بلند یێن ئایینێ پیرۆزێ ئیسلامێ ژ یانڕەویێ و لێبۆرینێ و ئاشتەواییێ هاتە كرن.

رۆژنامەیەكا عەرەبی بەلاڤكر، پشتی ژ ناڤچوونا رژێما بەشار ئەسەدی و دەستپێكرنا قۆناغەكا نوو ژ دیرۆكا سووریێ، سەرۆك بارزانی بزاڤكریە رۆلەكێ كاریگەر د ئێكگرتنا كوردێن سووریێ دا بگێریت و گرێدانا وان ب پڕۆسەیا سیاسییا نوو یا وەلاتی و بدەستڤەئینانا مافێن خوە.
سەبارەت ڤێ چەندێ پشكا ئینگلیزی یا رۆژنامەیا (ئیستیقلال) كو رۆژنامەیەكا عەرەبییە و زێدەتر راپۆرتان ل دۆر فلستینێ بەلاڤ دكەت، د نووترین راپۆرتدا ب ناڤونیشانێ ( ئێكگرتنا كوردان، دیمەنێ سیاسی ل سووریا نوو د گوهۆڕیت) باس ل كۆمبوونەكا د ناڤبەرا سەرۆك بارزانی و مەزلوم عەبدی دا، فەرماندەیێ گشتیێ هێزێن سووریا دیموكرات كریە كو ل 17/12/2024 ل باژێرێ هەولێرێ هاتیە كرن.
سەبارەت كۆمبوونا سەرۆك بارزانی ل گەل مەزلۆم عەبدی، رۆژنامەیا ناڤبری ئاماژە كر» ئەو كۆمبوون ب ئێك ژ گرنگترین كۆمبوونان دهێتە هەژمارتن، ب تایبەتی د دەمەكیدا كو سووریێ دقۆناغەكا گوهۆڕینێن سیاسی یێن مەزندایە پشتی ژناڤچوونا رژێما بەشار ئەسەدی».
هەروەسا بەلاڤكر ژی» ئارمانجا سەرەكییا كۆمبوونێ ئێكگرتنا بەرەیێ كوردی ل سووریێ و بزاڤكرن بۆ دروستكرنا پەیوەندییەكا ب هێز ل گەل حوكمەتا نوو یا سووریێ بوو. هەروەسا مەزلوم عەبدی د كۆمبوونێدا داخواز ژ سەرۆك بارزانی كر كو ناڤبریێ ل گەل توركیا بكەت بۆ راگرتنا هێرشێن ل سەر هێزێن سووریا دیموكرات. هەروەسا هەردو ئالییان باس ل پڕۆسەیا گوهۆڕینێن سووریێ كریە و ئاماژە ب وێ چەندێ دایە كو پێگەهێ كوردان ل سووریێ دڤێت ب ئێكگرتی بمینیت. هەروەسا باس ل وێ ئێكێ ژی هاتە كرن كوردێن سووریێ دەلیڤەیا زێرین یا هەی كو رۆلەكێ گرنگ د دارێشتنا داهاتییا سووریێ دا بگێرن».
د پشكەكا دی یا وێ راپۆرتێدا هاتیە كو د شیاندایە ئەو كۆمبوون ببیتە پێنگاڤەكا گرنگ بۆ ئێكگرتنا كوردێن سووریێ و گرێدانا وان ب پڕۆسەیا سیاسییا نوو ل سووریێ، هەروەسا دشێت رۆلەكێ گرنگ دكێمكرنا كاریگەرییا پەكەكێ ل سەر كوردێن سووریێ وئیراقێدا بگێریت.
هەر د وێ راپۆرتێدا شرۆڤەكارێ سیاسی بەهائەدین بەرزنجی د داخۆیانییەكێدا بۆ رۆژنامەیێ دیاركر كو پێدڤییە هێزێن كوردی ل سووریێ خوە ژ پەكەكێ دووربێخن.
بەرزنجی هەروەسا ئاماژەكریە كو سەرەدانا مەزلۆم عەبدی بۆ هەرێما كوردستانێ و كۆمبوونا وی ل گەل سەرۆك بارزانی گەلەك یا گرنگ بوو، ئەڤە ژی د بەرامبەردا پەیوەندییەكا ب هێز ل گەل ئیدارەیا نوو یا سووریێ پەیدا كریە.
وی شرۆڤەكارێ سیاسی خویاكر ژی» بارزانی وەكو كەسایەتییەكێ جهێ باوەریێ و قەبوولكری ژ ئالیێ توركیا و وەلاتێن رۆژئاڤا و وەلاتێن عەرەبی ڤە دهێتە هەژمارتن، كو ئەڤە ژی دەلیڤەیەكا گرنگ پەیدا دكەت كو رۆلەكێ كاریگەر د پڕۆسەیا سیاسییا سووریێ دا بگێریت».
ناڤبری هەروەسا دبێژیت» دبیت ئەمریكا داخواز ژ سەرۆك بارزانی بكەت هاریكاریێ د پەیداكرنا سەقامگیریا كاروبارێن كوردان ل سووریێ بكەت، ئەوژی وەكو گەرەنتییەك د دانوستاندناندا ل گەل توركیا و حوكمەتا نوو یا سووریێ».
ناڤبری پێشبینییا وێ چەندێ ژی كر كو دبیت هەر ژ نوكە هەڤدەنگییەكا توركی – ئەمریكی بۆ پشتەڤانیكرنێ ل ڤێ پڕۆسەیێ هەبیت.

بارەگەهێ بارزانی د رۆهنكرنەكێدا وێ داخۆیانیێ رەت دكەت ئەوا ب ناڤێ سەرۆك بارزانی ل دۆر سەرۆك وەزیرێن ئیراقێ، هاتیە بەلاڤكرن.
دەقێ رۆهنكرنا بارەگەهێ بارزانی:
د چەند پێگەهێن میدیایی و سۆشیال میدیایێدا داخۆیانییەك ب ناڤێ سەرۆك بارزانی بەلاڤبوویە و تێدا هاتیە كو سەرۆك بارزانی دژی دوبارە دانانا محەمەد شیاع سۆدانی یە بۆ پۆستێ سەرۆك وەزیرێن ئیراقێ.
ل ڤێرێ رادگەهینین كو هیچ بنەمایەك بۆ ڤی بابەتی نینە و یێ دوورە ژ راستیێ، ئارمانج ژی ژ بەلاڤكرنا ڤی دەنگۆباسی تێكدانا وی سەقایێ ئەرێنییە ئەوێ د پەیوەندیێن حوكمەتا هەرێما كوردستانێ و حوكمەتا ئیراقا فیدرالدا پەیدا بووین.

نێچیرڤان بارزانی، سەرۆكێ هەرێما كوردستانێ، د پەیامەكێدا سەبارەت دەنگدانێ ب راستڤەكرنا قانوونا بودجەیا فیدرال ل جڤاتا نوونەرێن ئیراقێ راگەهاند: پێشوازیێ لێ دكەین.
د پەیاما سەرۆكێ هەرێما كوردستانێ دا هاتیە» پێشوازیێ ل دەنگدانا جڤاتا نوونەرێن ئیراقێ ل سەر راستڤەكرنا قانوونا بودجەیا گشتییا فیدرالی دكەین و دەستخوەشیێ ل جڤاتا نوونەران و هەموو وان ئالیێن كو ل بەرهەڤكرن و پەسەندكرنێدا، پشكداربووین».
سەرۆكێ هەرێمێ دیاركر ژی» سوپاسی ورێزگرتنەكا تایبەت بۆ سەرۆك وەزیران، محەمەد شیاع سۆدانی كو هەر ژ دەستپێكێ دلسۆزانە و ب گیانەكێ نیشتمانی، ل گەل مە یێ هاریكاربوو بۆ چارەسەكرنا پرسێن گرێدای بودجەی و مووچەی و شایستەیێن دارایی یێن هەرێما كوردستانێ. دەستخوەشیێ ل شاندێ دانوستاندكار و ئالیێن پەیوەندیدارێن حوكمەتا هەرێما كوردستانێ و حوكمەتا فیدرالییا ئیراقێ دكەین».
نێچیرڤان بارزانی ئاماژەكر» ئەڤە پێنگاڤەكا دروست و ئومێد بەخشە و دێ بۆ خێر و بەرژەوەندییا هەموو ئیراقێ و هەرێما كوردستانێ زڤریت. هیڤیدارین ببیتە دەستپێكا چارەسەكرنا كێشەیێن دی و ب زووترین دەم دەنگوباسێن دلخوەشكەرێن چارەسەربوونا ئێكجارییا پرسا مووچەی و شایستەیێن دارایی یێن هەرێما كوردستانێ د دووڤدا بهێت و تێكگەهشتن یا بەردەوام بیت».

سەرۆكێ حوكمەتا هەرێما كوردستانێ پێشوازی ل دەنگدانا جڤاتا نوونەرێن ئیراقێ ل سەر راستڤەكرنا قانوونا بودجەیا فیدرال كر و دەستخوەشی ل هەموو وان ئالییان كر یێن هاریكاری د سەرئێخستنا راستڤەكرنێدا كری.
مەسرور بارزانی، سەرۆكێ حوكمەتا هەرێما كوردستانێ ل تۆرا جڤاكییا (ئێكس) پەیامەك بەلاڤكر و تێدا گۆت» پێشوازیێ ل دەنگدانا جڤاتا نوونەرێن ئیراقێ ل سەر راستڤەكرنا قانوونا بودجەیا فیدرال دكەین و دەستخوەشیێ ل وان هەموو ئالییان دكەین یێن هاریكاری د سەرئێخستنا راستڤەكرنێدا كری».
سەرۆكێ حوكمەتا هەرێمێ دیاركر ژی» سوپاسییا تیما دانوستاندكارا حوكمەتا هەرێمێ ژی دكەین بۆ كاركرنێ ژ پێخەمەت دانانا میكانیزما چارەسەركرنا كێشەیا مووچەی».
هەروەسا گۆت» هیڤیدارین ئەڤ پێنگاڤا ئەرێنییا راستڤەكرنا قانوونا بودجەی، ببیتە دەستپێكەك بۆ چارەسەركرنا هەموو كێشەیێن دی و پێگیریبوونا حوكمەتا فیدرال ب هنارتنا مووچەی و شایستەیێن دارایی یێن هەرێما كوردستانێ».

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ سەرەرای پیرۆزباهیێ ل خەلكێ ئیراقێ و هەرێما كوردستانێ ب دەنگدانێ ل سەر راستڤەكرنا قانوونا بودجەی ل جڤاتا نوونەرێن ئیراقێ، راگەهاند: دێ قانوونێن زێدەتر بۆ زێدەتر خزمەتا خەلكێ ئیراقێ و هەرێما كوردستانێ دەركەین.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ل تۆرا جڤاكییا فەیسبووكی پەیامەك ل دۆردەنگدانێ ل سەر راستڤەكرنا پڕۆژەقانوونا بودجەی ل جڤاتا نوونەرێن ئیراقێ بەلاڤكر و تێدا ب وێ هەلكەفتێ پیرۆزباهی ل خەلكێ ئیراقێ و هەرێما كوردستانێ كر.
ڤیان سەبری گۆت» دەنگدان ل سەر راستڤەكرنا قانوونا بودجەی، دێ پەیوەندیێن د ناڤبەرا حوكمەتا هەرێما كوردستانێ و حوكمەتا فیدرالی ب هێز كەت، ب هێزبوونا پەیوەندییان ژی دێ خزمەتا كەرتێ پترۆلێ و بلندكرنا داهاتێن فیدرالی كەت ل گەل كێمكرنا كورتئینانا بودجەی ل گەنجینەیا فیدرالی».
سەرۆكا فراكسیۆنا پارتی دیموكراتی كوردستان ئاماژە ب وێ چەندێ ژی كر» ب رێكا لژنەیەكا شیرەكارییا نێڤدەولەتییا تایبەتمەند، دێ تێچوویێ دەرئینانا پەترۆلێ ژ زەڤیێن پەترۆلی یێن هەرێما كوردستانێ ب شێوەیەكێ دادپەروەرانە و یەكسان هێتە دیاركرن و ب رێكا كۆمپانییا (سۆمۆ) و بەندەرێ جەیهان یێ توركی دێ هێتە هنارتن».
ڤیان سەبری سوپاسییا سەرۆكێ جڤاتا نوونەرێن ئیراقێ و فراكسیۆنان و ئەندامێن لژنەیا دارایی ل جڤاتا نوونەران كر بۆ پشتەڤانییا وان ل دەربازكرنا قانوونێ و گۆت» هەماهەنگییا بلند دناڤبەرا حوكمەتا فیدرال و حوكمەتا هەرێما كوردستانێدا بلندد هەلسەنگینین و دێ بزاڤێن دەستكەفت و تێكگەهشتن و دەركرنا قانوونێن نوو بین بۆ خزمەتا بەرژەوەندییا گشتییا ئیراقێ و هەرێما كوردستانێ».