ئەڤرۆ نیوز:
ل دووڤ سایتێ (رۆژانە ھەوال)، ژێدەرەکی ژ حوکمەتا ئیسرائیلێ د داخۆیانیەکێ دا بۆ مالپەرێ (میدلێس) یێ ئیسرائیلی راگەھاندیە، ل دۆر دووماھی سەرەدانا شاندێ ھەرێما کوردستانێ بۆ بەغدا، وەزیرێ دەرڤەیێ ئیسرائیلێ (لێبرمان) ب وەزیرێ دەرڤەیێ ئەمریکی (جۆن کێری) گوتیە کو عیراق ل بەرچاڤێ مە ھەموویان گەلەک تشت ژدەستداینە، بێ کو ھزر د وێ چەندێ بکەت کو د پاشەرۆژەکا نێزیک دا، کورد دێ بنە دەولەتەکا سەربخوە.
مالپەرێ ئیسرائیلی، سەبارەت پەیوەندیێن کورد و ئیسرائیلێ دبێژیت” پەیوەندیێن کوردان و ئیسرائیلێ بۆ سالا 1960 ڤەدگەرن و پشتی سالا 2003 ێ کو ئەمریکا عیراق داگیرکر، ھەڤکاریا ھەوالگیریا لەشکری د ناڤبەرا ھەردو لایەنان دا زێدەتر لێھاتیە”.
مالپەرێ (میدلێس) ل سەر زارێ چەند بەرپرسێن بلند یێن ئیسرائیلی ل دۆر گرنگیا کوردان بۆ وی وەلاتی، نڤیسی یە” پاشەرۆژا گەلێ کورد بۆ گەلێ ئیسرائیلی یا گرنگە و بابەتێ ھەرە گەرمێ خەلکێ ئیسرائیلێ پرسا سەربخوەیا کوردستانێ یە، ئیسرائیل ب گرنگیەکا مەزن سەحدکتەتە سەربخوەیا کوردستانێ و ژھەموو روویەکی ڤە پشتەڤانیێ ژی لێ دکەت”.
مالپەرێ ناڤبری ل سەر زارێ ( یعارز تسافریر) بەرپرسێ ھەوالگیریا ئیسرائیلێ (مۆساد) ڤەگوھاستیە” ئیسرائیلێ پەیوەندیێن نھێنی یێن گرنگ ل گەل کوردان یێن ھەین و پەیوەندیێن مە ب باشی ب ڕێڤەدچن”.
ئەو مالپەرە ل دۆر پەیوەندیێن کورد و ئیسرائیلێ ل سەر زارێ بەرپرسەکێ بلند یێ کوردی، بەلاڤکر” کورد ب پەیوەندیێن خوە ل گەل ئیسرائیلێ ددلخوەشن” د بەرامبەر دا داخۆیانیا بەرپرسەکێ ئیسرائیلی ب ناڤێ (ھارفی موریس) وەرگرتیە کو تێدا دبێژیت” ئیسرائیلیێن کوردستانێ ل وی وەلاتی ب ئارامی دژین و چو کێشە نینن”.
وی بەرپرسێ ئیسرائیلی گوت ژی” د پاشەرۆژێ دا کورد دێ بنە دەولەت و دێ ئیسرائیل ژی ھەموو پشتەڤانیەکێ ل وێ دەولەتێ کەت، چونکی دێ بیتە دەولەتەکا گرنگ بۆ وەلاتێ ئیسرائیلێ و ل شوینا عیراقێ دێ بیتە ژێدەرێ دابینکرنا پەترۆلێ و ژێدەرێن سروشتی”.
سەبارەت ئاینێن ل کوردستانێ ھەین، ئەو بەرپرسێ ئیسرائیلی دبێژیت” پتریا خەلکێ کوردستانێ موسلمانن، بەلێ وەلاتەکە کو ھەموو ئاین یێن لێ ھەین و ھەموو ژی ب ئاشتیانە دژین و چو کێشەکا ئاینی و مەزھەبی تێدا نینە”.
د راپۆرتا وی مالپەرێ ئیسرائیلی دا بەحسێ گرنگیا باژێرێ کەرکووکێ ھاتیە کرن و ب باژێرەکێ سەر ب دەولەتا کوردستانێ د ھەژمێریت و دبێژیت” مەسعود بارزانی سەرۆکێ ھەرێما کوردستانێ و فەرماندێ لەشکرێ کوردستانێ، بەحسێ گرنگیا کەرکووکێ کریە و ئاماژە ب وێ چەندێ کریە کو پشتی خوەڤەکێشانا لەشکرێ عیراقێ ژ ئەگەرێ ھاتنا داعشێ، پێشمەرگەی کەرکووک و دەوروبەرێن وی یێن کونترۆل کرین و پێشمەرگە وان دەڤەران، ب کەرکووک، ڤە ڕادەستی چو کەس و لایەنەکی ناکەت”.
د ڕاپۆرتا وی مالپەری دا ھاتیە ژی کو ل سالا 2003 ێ ب ھەڤکاریا ھێزێن ئەمریکی، کورد زڤرینە کەرکووکێ، بەلێ ب ھاتنا داعشێ و ڕەڤینا لەشکرێ عیراقێ، کوردان ھەموو دەڤەرێن کوردستانێ کونترۆلکرن و ئەو دەلیڤە ژدەست نەدا، ئارمانج ژی ژ ڤەگەراندنا کەرکووکێ ئەوە دا بچیتە ب سەر وێ دەولەتێ ڤە ئەوا دێ ل پاشەرۆژەکا نێزیک ھێتە راگەھاندن.
ل دووماھیێ سایتێ (ڕۆژانە نیۆز) دبێژیت” بەلاڤبوونا وێ ڕاپۆرتا ئیسرائیلی، د دەمەکی دایە کو کۆمارا ئیسلامی یا ئیرانی ل دۆر دروستبوونا دەولەتا کوردی ل دەڤەرێ، ب توندی ل سەر خەتە و دژایەتیا خوەژی بەرامبەر وێ پرسێ بۆ کورد و ئیسرائیلێ یا راگەھاندی”.