ئه‌ڤرۆ:

سوپاسالارێ هێزا پێشمه‌رگێ كوردستانێ راگه‌هاند، بزاڤ د به‌رده‌وامن بۆ ئێكگرتنا هێزێن پێشمه‌رگه‌ی و گاڤان باش یێن هاتینه‌ هاڤێتن، به‌لێ وان گاڤان پێدڤی ب ده‌م و رێككه‌فتنا سیاسی یه‌.

ل دۆر ئێكگرتنا هه‌ردو هێزێن 70 و 80 یێن پێشمه‌رگه‌ی، فه‌ریق (جه‌مال ئێمینكی) سوپاسالارێ هێزا پێشمه‌رگێ كوردستانێ گۆت” هه‌وا ئێكگرتنا هێزێن پێشمه‌رگه‌ی كو به‌رنامێ چاكسازیێ حوكمه‌تا هه‌رێما كوردستانێ بوو یا به‌رده‌وامه‌، بێگومان وه‌زاره‌تا پێشمه‌رگه‌ ئێك ژ وان وه‌زاره‌تانه‌ كو پێدڤیه‌ چاكسازی تێدا بهێته‌ كرن، چاكسازی ژی زێده‌تر دناڤ هێزێن پێشمه‌رگه‌ی دانه‌ ئه‌ڤه‌ ژی بۆ ئێكگرتنا هه‌ردو هێزێن 70 و 80 یه‌، تاكو بهێنه‌ دبن كونترۆلا وه‌زاره‌تا پێشمه‌رگه‌ دا، گاڤێن باش یێن هاتینه‌ هاڤێتن بۆ وێ چه‌ندێ و چه‌ندین خال یێن هاتینه‌ بجهئینان كو چار وه‌لات د پرۆسا چاكسازیێ ل وه‌زاره‌تا پێشمه‌رگه‌ د پشكدارن ئه‌وژی ئه‌مریكا، بریتانیا، ئه‌لمانیا و هوله‌ندا. هه‌تا نوكه‌ ژی شیره‌تكارێن وان ل گه‌ل تیما بۆردێ چاكسازیێ ل وه‌زاره‌تا پێشمه‌رگه‌ به‌رده‌وام كاری ل سه‌ر وی پرۆژه‌ی دكه‌ن”.

ئێمینكی ئاماژه‌ ب وێ چه‌ندێ ژی كر كو چه‌ندین خالێن وێ رێككه‌فتنێ یێن چووینه‌ پێش د پرسا ئێكگرتنا لیوایان دا، كو گرنگترین خال یه‌كه‌یا دارایی و ژمێریاری یه‌ و بریار ژی یا كه‌فتیه‌ د وارێ بجهئینانێ دا، پارتی و ئێكه‌تی ژی د هه‌ڤڕانه‌ كو ئه‌ڤ ئێكگرتنه‌ بهێته‌ بجهئینان، به‌لێ هنده‌ك خال و گاڤ یێن ماین كو هه‌ردو ئالی ل دۆر بگه‌هنه‌ رێككه‌فتنێ كو زێده‌تر په‌یوه‌ندی ب رێككه‌فتنا سیاسی یا هه‌ردو حزبان ڤه‌ هه‌یه‌.

سه‌باره‌ت ڤه‌گوهاستنا لیوایان ژی، سوپاسالارێ هێزا پێشمه‌رگه‌ی دبێژیت” هه‌تا نوكه‌ چار لیوا یێن هاتینه‌ ڤه‌گوهاستن بۆ سه‌ر وه‌زاره‌تا پێشمه‌رگه‌ ڤه‌، ئه‌ڤ چه‌نده‌ ژی یا به‌رده‌وامه‌ و قۆناغ ب قۆناغ لیوایێن دی ژی دێ هێنه‌ ڤه‌گوهاستن بۆ سه‌ر وه‌زاره‌تا پێشمه‌رگه‌ ڤه‌” گۆت ژی” یه‌كه‌یا 80 لیوایه‌كا دی یا هنارتی و كاری ل سه‌ر دكه‌ن و بریاره‌ ژی یه‌كه‌یا 70 ژی لیوایه‌كا دی یا خوه‌ ب هه‌مان شێوه‌ ب هنێرن”.

ئه‌ڤرۆ، قائید میرۆ

رۆژ بۆ رۆژێ ناكۆكیێن ناڤبه‌را ئالیێن ئیراقی بۆ پێكئینانا حوكمه‌تێ به‌ر ب ئالۆزیێن زێده‌تر دچن و شرۆڤه‌كاره‌كێ سیاسی ژی دبێژیت، ژبلی ئالیێن ئیراقی ئالیێن هه‌رێمی و نێڤده‌وله‌تی ژی رۆل هه‌یه‌ بۆ ئێكلاكرنا پرسێن گرنگ ل ئیراقێ، هه‌روه‌سا دبێژیت، دڤێت پارتی و ئێكه‌تی ئێك هه‌لویست هه‌بیت هه‌مبه‌ر ئالیێن ئیراقی و به‌لاڤبوونا هێزێن كوردی لسه‌ر به‌ره‌یێن شیعی دێ زیانێ ب هه‌رێما كوردستانێ گه‌هینیت.

تارق سارمه‌می، شرۆڤه‌كارێ سیاسی بۆ رۆژناما (ئه‌ڤرۆ) گۆت” ره‌وشا ئیراقێ یا ئالۆزه‌، چونكه‌ تنێ كاره‌كته‌رێن ئیراقی رۆل نینه‌ ناڤا پڕۆسا سیاسی یا ئیراقی دا، به‌لكو گه‌له‌ك جاران كاره‌كته‌رێن هه‌رێمی و نێڤده‌وله‌تی رۆل هه‌یه‌ بۆ ئێكلاكرنا پرسێن ئیراقێ، راسته‌ نوكه‌ ئیراق به‌لاڤ بوویه‌ لسه‌ر دو به‌ره‌یان ونوكه‌ پێنج هه‌تا شه‌ش ئالیێن سه‌ره‌كی هه‌نه‌ ل ئیراقێ، نوكه‌ ئاریشه‌ك په‌یدابوویه‌ ئه‌ڤ ئالیێن سه‌ره‌كی بووینه‌ دو به‌ره‌، كو هنده‌ك ب خواستا وان ئالیانه‌ و هنده‌ك ژی لسه‌ر وان هاتیه‌ سه‌پاندن، به‌لێ  دوماهیێ وه‌ك ئه‌نجامێن هه‌لبژارتنان دڤێت پڕۆسا سیاسی و پێكئینانا حوكمه‌تا ئیراقێ بگه‌هیته‌ ئارمانجا خوه‌،ئانكو جڤاتا نوونه‌ران و حوكمه‌ت و سه‌رۆك كۆمارێ نوو ده‌ست بكاربن، مخابن هه‌تا نوكه‌ كورد بۆ ڤێ قۆناغا نوكه‌ ل ئیراقێ هه‌ی دئێكگرتی نینن، بتایبه‌تی ناكۆكیێن د ناڤبه‌را پارتی و ئێكه‌تیێ، دا دكو دهاته‌ پێشبینیكرن ب ئێكڕێزی و ئێك به‌رنامه‌ بچنه‌ به‌غدا به‌رگریێ ژ مافێن خه‌لكێ كوردستانێ بكه‌ن، به‌لێ ئه‌ڤ ئێكڕێزیا ناڤمالا كوردی چێنه‌بوویه‌، ئه‌ز نابێژم كیش ئالی زێده‌تر یێ گونه‌هباره‌، به‌لێ دیرۆك دێ نڤیسیت پارتی و ئێكه‌تی ئێك رێز نه‌بوونه‌ ل به‌غدا”.

ڤی شرۆڤه‌كارێ سیاسی گۆت ژی” هه‌موو ئه‌گه‌ره‌ك یا ڤه‌كریه‌ بۆ ره‌وشا ئیراقێ، چونكه‌ هه‌ردو ئالیێن شیعی یێن ده‌ستهه‌لاتدار هێزێن له‌شكری یێن هه‌ین و دشێن ره‌وشێ ئالۆزتر بكه‌ن بۆ نموونه‌ ره‌وتێ سه‌دری هێزا سه‌رایا سه‌لام یا هه‌ی و هێزه‌كا میلیشیایه‌ و ژ ده‌رڤه‌ی ده‌ستهه‌لاتا حوكمه‌تێ یه‌، ئالیێن دی ژی یێن دبێژنێ (چارچوڤێ هه‌ماهه‌نگیێ) هێزێن خوه‌ یێن له‌شكری و میلیشیا هه‌نه‌، له‌وڕا هه‌كه‌ ئێك ئالیێ شیعی رێككه‌فتنێ دگه‌ل كوردان بكه‌ت و ئالیه‌ك پشكداریێ نه‌كه‌ت ئه‌ڤه‌ بێگومان دێ كاریگه‌ریێن خوه‌ هه‌بن و حوكمه‌تا داهاتی یا ئیراقێ ژیه‌كێ درێژ نابیت، ڤێجا كیش ئالی حوكمه‌تا داهاتی پێكبینیت جوداهی نینه‌”.

ل دۆر ده‌ستێوه‌ردانێن ده‌رڤه‌ ژی، تارق سارمه‌می ئاماژه‌كر” وه‌ك به‌رێ ئه‌م (قاسم سولێمانی) و (برێت مه‌كگۆرك) نابینین ده‌ستێوه‌ردانێ ل ره‌وشا ئیراقێ بكه‌ن، به‌لێ ب شێوه‌كێ نهێنی هێزێن هه‌رێمی، بتایبه‌تی توركیا و ئیرانێ رۆل هه‌یه‌ و هه‌ر ئێك ژوان پشته‌ڤانیا پێكهاته‌كا ئیراقی دكه‌ت، ئانكو سوننه‌ كه‌فتینه‌ بن كاریگه‌ریێن توركیا و شیعه‌ ژی لبن كاریگه‌ریا ئیرانێ نه‌، ره‌وش گه‌هشتیه‌ ئاسته‌كی هند نه‌مایه‌ كورد ژی بچیته‌ سه‌ر وان به‌ره‌یێن سه‌ر ب ئیران و توركیاڤه‌، ب دیتنا من پێدڤیه‌ كورد خوه‌ دوور بگرن ل كاریگه‌ریێن ئیران و توركیا، ژبه‌ركو پاشه‌رۆژا كوردان و هه‌رێما كوردستانێ د ده‌ستێ پارتی و ئێكه‌تیێ دایه‌ نه‌كو ئیران و توركیا، هه‌ر ئالیه‌كێ تنێ بچیته‌ دناڤا به‌ره‌یه‌كی دێ ئاریشه‌ په‌یدابن بۆ كوردان، هه‌ڤكێشه‌ك دناڤبه‌را شیعه‌ و سوننه‌یێن ئیراقێ دا چێبوویه‌ كو توركیا و وه‌لاتێ ئیمارات رۆله‌كێ سه‌ره‌كی هه‌یه‌ بۆ رێكخستنا ناڤمالا سوننی ل ئیراقێ و ئێكخستنا هه‌لویستێ ئالیێن سوننی، ئه‌ڤه‌ژی بۆیه‌ ئه‌گه‌ر هه‌تا نوكه‌ تنێ ئه‌ره‌بێن سوننه‌ بگه‌هنه‌ رێككه‌فتنێ، به‌لێ ناكۆكیێن سه‌ره‌كی دناڤا مالا شیعانه‌ وهه‌تا شیعه‌ د ناڤبه‌را خوه‌ دا نه‌گه‌هنه‌ رێككه‌فتنێ و هه‌تا ناڤمالا شیعی نه‌هێته‌ رێكخستن، ناڤمالا كوردی ژی دێ ئالۆزی تێدابن”.

دیدار، هۆشه‌نگ تاجر:

بسپۆره‌كێ په‌یوه‌ندیێن نێڤده‌وله‌تی دیار دكه‌ت كو وه‌زیرێ ده‌رڤه‌ یێ رۆسیا په‌یامه‌ك ئاشكرا دا كوردان كو دڤێت ل گه‌ل شامێ بگه‌هنه‌ رێككه‌فتنێ و به‌حسێ ئه‌زموونێ هه‌رێما كوردستانێ ژی كر، ژ به‌ر هندێ ژی ئه‌ڤساله‌ بۆ كوردێن رۆژئاڤایێ كوردستانێ دێ چاره‌نڤیساز بیت و دڤێت كورد ئاریشێن د ناڤبه‌را خوه‌ دا چاره‌سه‌ر بكه‌ن.

د. ئه‌كره‌م ئونه‌ن بسپۆرێ په‌یوه‌ندیێن نێڤدوه‌له‌تی د دیداره‌كا تایبه‌ت دا ل گه‌ل رۆژناما ئه‌ڤرۆ دیار كر كو وه‌زیرێ ده‌رڤه‌ یێ رۆسیا به‌ری نها ژی چه‌ندین جاران دیار كریه‌ كو دڤێت كوردێن رۆژئاڤایێ كوردستانێ مفای ژ ئه‌زموونا هه‌رێما كوردستانێ وه‌ربگرن، ئانكۆ رۆسیا دبێژیت دڤێت كوردێن رۆژئاڤایێ كوردستانێ ل گه‌ل شامێ‌ ده‌ست ب دانوستاندنان بكه‌ن و پرسێن هه‌ی د ناڤبه‌را خوه‌ دا ب رێیا دانوستاندنان چاره‌سه‌ر بكه‌ن، بێگومان ئه‌و یه‌ك گه‌له‌ك باشه‌ و گۆت: (وه‌لاته‌ك بهێز وه‌كو رۆسیا به‌رهه‌ڤه‌ وه‌كو ناڤبژیڤان د ناڤبه‌را كوردان و حوكمه‌تا شامێ دا رۆل بگێریت براستی ژی ئه‌و یه‌ك بۆ كوردێن سووریێ گه‌له‌ك گرنگه‌، چونكو هه‌ر كه‌س دزانیت ئه‌مریكا دێ هه‌تا چه‌ند سالێن دی ژ سووریێ ده‌ركه‌ڤیت و سووریا دێ بۆ رۆسیا مینیت، نها هه‌ر دو وه‌لات ل دۆر هندێ دانوستاندنان ژی دكه‌ن، ئه‌مریكا دڤێت كورد ل سووریێ بگه‌هنه‌ مافێن خوه‌ و ره‌وشا وی وه‌لاتی ئارام بیت هه‌كه‌ ئه‌مریكا ژ سووریێ ده‌ركه‌ڤت دێ هه‌ر زوو توركیا ژی ژ سووریێ ده‌ركه‌ڤیت).

ناڤهاتی دا پشكه‌كا دی یا ئاخڤتنا خوه‌ دا به‌حسێ هه‌بوونا هێزێن توركیا ل سووریێ و رۆژئاڤایێ كوردستانێ ژی كر و راگه‌هاند كو نها رۆسیا پرۆژه‌یه‌ك مه‌زن بۆ سووریێ به‌رهه‌ڤ كریه‌ و رۆسیا ناهێلیت نه‌ توركیا و نه‌ ژی ئیران ل سووریێ ئاریشان دروست بكه‌ن، هه‌ر ده‌مێ ئه‌مریكا هێزێن خوه‌ ژ سووریێ ڤه‌كێشان دێ توركیا ژی ده‌ركه‌ڤیت، چونكو رۆسیا ل سه‌ر پرۆژه‌یه‌كێ مه‌زن بۆ سووریێ كار دكه‌ت و گۆت: (توركیا و ئیران یان ژی هێزێن دی نه‌شێن ئاسته‌نگیان ل هه‌مبه‌ر پرۆژێ رۆسیا دروست بكه‌ن، دیاره‌ نها هنده‌ك خالێن گرنگ ل دۆر پاشه‌رۆژا سووریێ هه‌نه‌ كو دڤێت د ناڤبه‌را ئه‌مریكا و رۆسیا دا بهێنه‌ چاره‌سه‌ركرن هه‌ر ده‌مێ ئه‌و یه‌ك هاته‌ كرن ئه‌مریكا دێ ژ سووریێ ده‌ركه‌ڤیت).

د. ئه‌كره‌م ئونه‌ن ئه‌و یه‌ك ژی دیار كر كو ئه‌مریكا داخواز ژ رۆسیا كریه‌ كو گه‌ره‌نتیا مافێن كوردان ل سووریێ بكه‌ت و ژ به‌ر هندێ ژی هه‌تا نها چه‌ندین جاران به‌رپرسێن رۆسیا دیار كرینه‌ كو ئه‌و پشته‌ڤانیێ ل مافێن ره‌وا یێن گه‌لێ كورد ل سووریێ دكه‌ن، براستی ژی نها ده‌لیڤه‌كا مه‌زن و زێرین بۆ كوردێن سووریێ هاتیه‌ پێش، چونكو گه‌له‌ك گرنگه‌ دو وه‌لاتێن وه‌كو ئه‌مریكا و رۆسیا ل دژی مافێن كوردان نینن و پشته‌ڤانیێ ل كوردان دكه‌ن، ژ به‌ر هندێ ژی گرنگه‌ كوردێن رۆژئاڤایێ كوردستانێ هه‌موو ئاریشێن د ناڤبه‌را خوه‌ دا چاره‌سه‌ر بكه‌ن و گۆت: (وه‌زیرێ ده‌رڤه‌ یێ رۆسیا د په‌یاما خوه‌ دا دبێژیت پێدڤیه‌ كورد ل سووریێ دره‌نگ نه‌مینن و هه‌ر زوو ل گه‌ل شامێ بگه‌هنه‌ رێككه‌فتنه‌كێ، چونكو ره‌نگه‌ ئه‌ڤساله‌ هه‌تا ساله‌كا دی گه‌له‌ك گوهۆرینێن مه‌زن ل ده‌ڤه‌رێ روو بده‌ن كو دێ كارتێكرنا خوه‌ یا راسته‌وخوه‌ ل رۆژئاڤایێ كوردستانێ كه‌ن، ژ به‌ر هندێ ژی گرنگه‌ كورد د ناڤا خوه‌ دا ئێكگرتی بن و مفای ژ ره‌وشا نها وه‌ربگرن).

ناڤهاتی ئه‌و یه‌ك ژی دیار كر كو هه‌كه‌ ئه‌مریكا و رۆسیا ل دۆر مافێن كوردان ل سووریێ بگه‌هنه‌ رێككه‌فتنه‌كێ و كورد ژی بشێن ل گه‌ل شامێ ب رێیا دانوستاندنان پرسێن هه‌ی چاره‌سه‌ر بكه‌ن وی ده‌می دێ پشته‌ڤانیه‌كا گه‌له‌ك مه‌زن بۆ رۆژئاڤایێ كوردستانێ هه‌بیت و بێگومان د ره‌وشه‌كا وه‌سا دا توركیا ژی نه‌شێت ل دژی كوردێن سووریێ ده‌ركه‌ڤیت، چونكو به‌ری نها هه‌مان تشت بۆ هه‌رێما كوردستانێ ژی هاته‌ كرن و لاڤرۆڤی ژی دڤێت هه‌مان تشتی بۆ كوردان سووریێ بێژیت كو دڤێت هوون ب رێیا دانوستاندنان ئاریشێن خوه‌ چاره‌سه‌ر بكه‌ن دا دانپێدانه‌كا نێڤده‌وله‌تی بۆ كوردان سووریێ دروست ببیت.

بسپۆرێ په‌یوه‌ندیێن نێڤده‌وله‌تی ئه‌و یه‌ك ژی نه‌ڤه‌شارت كو رۆسیا نه‌شێت ب ره‌نگه‌كێ راسته‌وخوه‌ داخواز ژ شامێ بكه‌ت كو دڤێت هه‌رێمه‌كا كوردی یا وه‌كو هه‌رێما كوردستانێ ل سووریێ بهێته‌ ئاڤاكرن لێ رۆسیا و ئه‌مریكا وه‌كو هه‌ر دو وه‌لاتێن زلهێزێن جیهانێ پشته‌ڤانیێ ل مافێن ره‌وا یێن كوردان دكه‌ن و دڤێت كورد ژی ب ره‌نگه‌كێ راست و دروست سیاسه‌تێ بكه‌ن و گۆت: (براستی ژی هه‌كه‌ كورد ل سووریێ ئێكگرتی بن و پێكڤه‌ كار بكه‌ن دێ شێن ده‌ستكه‌فتیێن گه‌له‌ك مه‌زن بده‌ستڤه‌ بینن، ئه‌ڤساله‌ بۆ رۆژئاڤایێ كوردستانێ دێ یا چاره‌نڤیساز بیت و بێگومان هه‌كه‌ كورد د ناڤا خوه‌ دا ناكۆك بن و ئاریشێن نها ژی وه‌كو خوه‌ به‌رده‌وام بكه‌ن دێ مه‌ترسیێن گه‌له‌ك مه‌زن بۆ كوردان ل سووریێ دروست بن، چونكو سالا ٢٠٢٣ په‌یمانا لۆزان ب دووماهی دهێت و توركیا ژی به‌رهه‌ڤیان دكه‌ت و بێگومان هه‌كه‌ كورد ل سووریێ ل گه‌ل شامێ بگه‌هنه‌ رێككه‌فتنێ و شام ژی مافێن كوردان بده‌تێ وی ده‌می دێ دانپێدانه‌كا جیهانی بۆ كوردان ل سووریێ هه‌بیت و د ده‌مه‌كێ وه‌سا دا توركیا ژی نه‌شێت ئێرشی كوردان بكه‌ت، لێ به‌رۆڤاژی هندێ هه‌كه‌ ره‌وش وه‌كو نها به‌رده‌وام بیت دێ مه‌ترسیێن مه‌زن بۆ كوردان دروست بن، ژ به‌ر هندێ ژی من گۆت ئه‌ڤساله‌ بۆ كوردان ل سووریێ ساله‌كا چاره‌نڤیسازه‌ و دڤێت كورد ب هه‌موو شیانێن خوه‌ كار بكه‌ن دا ب پشته‌ڤانیا رۆسیا و ئه‌مریكا بگه‌هنه‌ مافێن خوه‌، هه‌كه‌ هه‌رێمه‌كا كوردی ل سووریێ ئاڤا بیت دێ گه‌له‌ك باش بیت، ژ بۆ هندێ ژی دڤێت سیاسه‌تا نها یا رێڤه‌به‌ریا خوه‌سه‌ر زه‌لال بیت، براستی ژی هنده‌ك داخۆیانیێن وان د خزمه‌تا دۆزا ره‌وا یا كوردان ل رۆژئاڤایێ‌ كوردستانێ‌ دا نینه‌).

د. ئه‌كره‌می د دووماهیا ئاخڤتنا خوه‌ دا ئاماژه‌ ب هندێ ژی كر كو پشتی ئه‌مریكا ژ سووریێ ده‌ركه‌ڤیت ئێدی كه‌س نه‌شێت ئاسته‌نگیان ل هه‌مبه‌ر پرۆژێن رۆسیا ل سووریێ دروست بكه‌ت، نها رۆسیا ل دژی مافێن كوردان ژی نینه‌ ئه‌و یه‌ك بۆ كوردێن رۆژئاڤایێ كوردستانێ ده‌لیڤه‌كا زێرینه‌ و دڤێت كورد ڤێ ده‌لیڤێ ژ ده‌ست نه‌ده‌ن.

ئه‌ڤرۆ:

په‌یڤدارێ پارتی دیموكراتی كوردستان، راگه‌هاند، ئه‌وا پارتی و سه‌رۆك بارزانی دخوازیت، چاره‌سه‌ركرنا كێشانه‌ ل گه‌ل ئیراقێ و كورد رژدیێ ل سه‌ر هه‌ڤپشكیه‌كا راسته‌قینه‌ ل ئیراقێ دكه‌ن.

مه‌حموود محه‌مه‌د، په‌یڤدار و ئه‌ندامێ مه‌كته‌با سیاسی یا پارتی، د كۆنگره‌كێ رۆژنامه‌ڤانی دا سه‌باره‌ت پرسا پێكئینانا حوكمه‌تا نوو یا ئیراقێ، گۆت” پێدڤیه‌ ئێدی كاركرن بۆ دامه‌زراندنا ده‌زگه‌هێن دستووری گیرو نه‌بیت، كورد ژی رژدیێ ل سه‌ر هه‌ڤپشكیێ دكه‌ن د پرسا پشكداریكرنێ د حوكمه‌تا داهاتی یا ئیراقێ دا، ئه‌وژی هه‌ڤپشكیا راسته‌قینه‌ یا كوردان د د پێكئینانا كابینا نوو و حوكمرانیا ڤی وه‌لاتی دا، هه‌روه‌سا هه‌ڤسه‌نگیا دستووری د پرسا بجهئینانا وێ هه‌ڤپشكیێ دا و كێشێن هه‌لاویستی ژ سالا 2003 ێ بهێنه‌ چاره‌سه‌ركرن”.

مه‌حموود محه‌مه‌د خویاكر” هه‌موو بزاڤێن پارتی دیموكراتی كوردستان و سه‌رۆك مه‌سعود بارزانی ل هه‌رێما كوردستانێ ئه‌و بوو كو بزاڤێ بكه‌ین هیچ ئالیه‌ك ده‌ستێوه‌ردانێ دناڤ پێكهاتان دا نه‌كه‌ین، وه‌كو وێ چه‌ندێ ئه‌م كورد ده‌ستێوه‌ردانێ دناڤ پێكهاتێ شیعی و سووننی دا نه‌كه‌ین و به‌رۆڤاژی ژی، له‌وما ئه‌وا گرنگ ئه‌وبوو كو ده‌لیڤه‌كا زۆر هاتیه‌ دان بۆ پێكهاتێ شیعی بۆ وێ چه‌ندێ دناڤمالا خوه‌ دا رێكبكه‌ڤن و بزاڤێ بكه‌ن ئه‌و رێككه‌فتنه‌ ببیته‌ بنه‌مایه‌ك بۆ وێ ئێكێ كو گاڤێن هاتینه‌ دیاركرن بۆ هه‌لبژارتنا ده‌زگه‌هێن شه‌رعی ب رێڤه‌ بچیت، هه‌كه‌ رێك نه‌كه‌فتن، دێ ل سه‌ر وان مینیت و پێدڤیه‌ وی ده‌می خه‌لك پرسیارێ ژ وان بكه‌ت”.

هه‌ولێر، قائید میرۆ

بڕیاره‌ د چوارچوڤێ چاكسازیا هێزێن پێشمه‌رگه‌ی دا، ئه‌ڤساله‌ ژی هه‌ژماره‌كا لیوایێن نوو بۆ هێزێن پێشمه‌رگه‌ی بهێنه‌ پێكئینان و جێگرێ سه‌رۆكێ لژنا پێشمه‌رگه‌ ژی ل په‌رله‌مانێ كوردستانێ ئاشكراكر، گاڤێن باش هاتینه‌ هاڤێتن و نابیت هیچ هێزه‌كا پێشمه‌رگه‌ی ده‌رڤه‌ی وه‌زاره‌تێ بمینیت.

عوسمان سێده‌ری، جێگرێ سه‌رۆكێ لژنا پێشمه‌رگه‌ ل په‌رله‌مانێ كوردستانێ بۆ رۆژناما (ئه‌ڤرۆ) گۆت” چاكسازیێن ناڤا هێزێن پێشمه‌رگه‌ی بۆ ئێكگرتنا هێزێن پێشمه‌رگه‌ی د چارچوڤێ وه‌زاره‌تا پێشمه‌رگه‌ دا به‌رده‌وامی هه‌یه‌، هه‌ماهه‌نگیێن باش هه‌نه‌ و هێزێن ٨٠ و ٧٠ پشكداری شه‌ڕێ به‌رهنگاربوونا داعشێ كریه‌ و هنده‌ك ژوان پێشمه‌رگه‌یێن سه‌ر ب ئه‌ڤان یه‌كه‌یان لسه‌ر ده‌مێ شۆڕه‌شێن به‌رێ ژی رۆل هه‌بوویه‌ و خه‌بات كریه‌، له‌وڕاژی نابیت رۆلێ چ هێزه‌كا پێشمه‌رگه‌ی بهێته‌ ژبیركرن، بڕیاره‌ پێشمه‌رگێن ژیێ وان گونجای دێ هێنه‌ جوداكرن و نوكه‌ ڤاڤارتن بۆ هێزێن ویێن دی وه‌ك سه‌ربازێن وه‌زاره‌تا پێششمه‌رگه‌ د چارچوڤێ لیوایێن سه‌ر ب وه‌زاره‌تێ هێنه‌ رێكخستن، هه‌ژماره‌كا لیوایان چووینه‌ سه‌ر وه‌زاره‌تا پێشمه‌رگه‌ ڤه‌، هه‌روه‌سا هه‌ردو هێزێن پشته‌ڤانی ئێك و دو چووینه‌ سه‌ر وه‌زاره‌تا پێشمه‌رگه‌ڤه‌ و ل دووماهیێ دێ هه‌موو پێشمه‌رگێن ژ ده‌رڤه‌ی وه‌زاره‌تێ چنه‌ سه‌ر میلاكێ وه‌زاره‌تا پێشمه‌رگه‌ ڤه‌”.

گۆت ژی” نوكه‌ پڕۆسا پێكئینانا هه‌ژماره‌ك لیوایێن پێشمه‌رگه‌ی هاتیه‌ ده‌ستپێكرن، پڕۆسا چاكسازیێ دناڤا هێزێن پێشمه‌رگه‌ی دێ به‌رده‌وامی هه‌بیت و هه‌ر جارێ ب شێوه‌یه‌كێ ئه‌كادیمی و سه‌ربازی دێ هه‌ژماره‌كا پێشمه‌رگه‌ و یه‌كه‌ چنه‌ سه‌ر وه‌زاره‌تێ، هه‌تا نوكه‌ ژڤانێ دووماهیێ نینه‌ بۆ ڤێ چه‌ندێ، چونكه‌ پڕۆسا چاكسازی و ئێكگرتنا هێزا پێشمه‌رگه‌ی پڕۆسه‌یه‌كا دوم درێژه‌ و پێدڤی ب ده‌می هه‌یه‌، به‌لێ مه‌ ئومێد هه‌یه‌ بڤی شێوه‌یێ نوكه‌ ئه‌گه‌ر بهێت و به‌رده‌وامبیت هیچ هێزه‌ك ژ ده‌رڤه‌ی وه‌زاره‌تێ نامینیت و هه‌رێما كوردستانێ دێ بیته‌ خودان هێزه‌كا ئێكگرتی و هیچ هێزه‌ك نامینیت ژ ده‌رڤه‌ی وه‌زاره‌تێ و سه‌ر ب ئالیێن سیاسی بیت، ئه‌ڤه‌ژی گاڤێن باشن بۆ هه‌رێما كوردستانێ، لژنا پێشمه‌رگه‌ی ژی چاڤدێریا ره‌وشا ئێكگرتن و رێكخستنا هێزێن پێشمه‌رگه‌ی دكه‌ت، چاكسازیێن دی ژی هه‌مان شێوه‌ دهێنه‌ كرن دناڤا وه‌زاره‌تێ دا و به‌رده‌وام پێداچوون ل بابه‌تێ پێشمه‌رگه‌ی دهێته‌كرن وه‌كی كێم ئه‌ندامێن سه‌نگه‌ری و لیستا خانه‌نشینێن پێشمه‌رگه‌ی”.

ئه‌ڤرۆ، هۆشه‌نگ تاجر:

پشتی كو مامۆستایا كورد ل رۆژهه‌لاتێ كوردستانێ ژ به‌ر گۆتنا وانه‌یێن ب زمانێ كوردی هاته‌ زیندانكرن كوردان ل هه‌ر چار پارچه‌یێن كوردستانێ و جیهانێ ب رێیێن جودا جودا پشته‌ڤانیا خوه‌ بۆ وێ مامۆستایێ دیار كرن و داخواز ژ ده‌ستهه‌لاتا ئیرانێ كرن سزایێ وێ هلوه‌شینیت.

فه‌رید جیهانی مامۆستایێ كورد ل باژێرێ مهابادێ یێ رۆژهه‌لاتێ كوردستانێ بۆ ئه‌ڤرۆ دیار كر كو زارا محه‌مه‌دی ده‌نگێ گه‌لێ كورد یێ ته‌په‌سه‌ركریه‌ كو ب سالانه‌ كورد ل ئیرانێ خه‌باتێ بۆ بده‌ستڤه‌ئینانا مافێن خوه‌ یێن نه‌ته‌وه‌یی دكه‌ن و ژ به‌ر هندێ ژی هه‌تا نها كوردان گه‌له‌ك قوربانی داینه‌ و گۆت: (زارا محه‌مه‌دی ب هه‌لوه‌ستێ خوه‌ یێ جوان و سه‌رده‌میانه‌ وه‌سا كر كو ئه‌ڤرۆكه‌ نه‌ تنێ ل رۆژهه‌لاتێ كوردستانێ به‌لكو ل هه‌موو پارچه‌یێن دی یێن كوردستانێ و جیهانێ كوردان پشته‌ڤانیا خوه‌ بۆ وێ دیار كرن و به‌ری كو زارا بچیته‌ زیندانێ ژی هه‌لوه‌سته‌ك گه‌له‌ك جوان دیار كر و راگه‌هاند ئه‌و دێ ل زیندانێ ژی خه‌باتا خوه‌ به‌رفره‌هتر كه‌ت و ده‌ستان ژ مافێن ره‌وا یێن گه‌لێ كورد به‌رناده‌ت).

مێهری مه‌حمودی چالاكڤانا مافێن مرۆڤی یا رۆژهه‌لاتێ كوردستانێ ژی راگه‌هاند كو ئێدی كوردان ل رۆژهه‌لاتێ كوردستانێ و ئیرانێ ده‌ست ب قۆنا‌غه‌كا نوو یا خه‌باتێ كرینه‌، نها پرانیا مامۆستایێن كورد مالێن خوه‌ كرینه‌ قۆتابخانه‌ و وانه‌یێن ب زمانێ كوردی بۆ زارۆیان، گه‌نجان و كه‌سێن ب ته‌مه‌نێ دبێژن، براستی ژی ئه‌ز دشێم بێژم كو نها مامۆستایێن كورد یێن وه‌كو زارا محه‌مه‌دی و ب ده‌هان مامۆستایێن دی بووینه‌ پێشمه‌رگه‌ و پێشه‌نگیا قۆناغه‌كا نوو یا خه‌باتا مه‌ده‌نی و مودێرن دكه‌ن و گۆت: (خه‌باتێن بۆ پێشڤه‌برنا زمانێن كوردی ل ئیرانێ و رۆژهه‌لاتێ كوردستانێ بووینه‌ ئه‌گه‌رێ هندێ كو به‌رپرسێن رژێما ئیرانێ گه‌له‌ك تووره‌ ببن، زیندانكرنا زارا محه‌مه‌دی و ب ده‌هان مامۆستایێن دی ل رۆژهه‌لاتێ كوردستانێ نیشا دده‌ت كو رژێما ئیرانێ ژ شێوه‌یێ نوو یێ خه‌باتا نه‌ته‌وه‌یی ل رۆژهه‌لاتێ كوردستانێ دلگرانه‌، لێ ده‌مێ زارا محه‌مه‌دی چوو زیندانێ خه‌لكێ مه‌ ئه‌و ب تنێ نه‌هێلان و هه‌لوه‌ستێ جوان و پشته‌ڤانیا خه‌لكی بۆ زارایێ سه‌لماند كو ئاستێ هشیاریا نه‌ته‌وه‌یی ل رۆژهه‌لاتێ كوردستانێ گه‌له‌ك بلنده‌ و ئه‌و یه‌ك جهێ شانازیێ یه‌ بۆ هه‌موو كوردێن رۆژهه‌لاتێ كوردستانێ).

ل هه‌رێما كوردستانێ ژی ب ده‌هان كه‌سایه‌تیێن ناڤدار پشته‌ڤانیا خوه‌ بۆ زارا محه‌مه‌دی دیار كرن و راگه‌هاندن كو زارایێ ب هه‌لوه‌ستێ خوه‌ یێ جوان نیشا دا كو كورد ل ئیرانێ داخوازا مافێن خوه‌ یێن نه‌ته‌وه‌یی دكه‌ن و بریارا دادگه‌ها ئیرانێ ژی شه‌رمزار كرن و داخوازا ئازادكرنا زارایێ كرن.

ل ئالیێ دی كوردێن ل ئورۆپا، ئه‌مریكا، كه‌نه‌دا و وه‌لاتێن دی یێن جیهانێ ژی ب رێیا تۆرێن جڤاكی پشته‌ڤانیا خوه‌ بۆ هه‌لوه‌ستێ نه‌ته‌وه‌یی یێ مامۆستایا كورد زارا محه‌مه‌دی دیار كرن و راگه‌هاندن كو ب زیندانكرنا زارا محه‌مه‌دی و چالاكڤانێن دی كورد بێده‌نگ نابن، چونكو ده‌ستهه‌لاتا ئیرانێ نه‌چاره‌ رێزێ ل داخوازیێن ره‌وا یێن كوردان بگریت و نابیت بابه‌تێ په‌روه‌ردا ب زمانێ كوردی كو داخوازیه‌ك ره‌وایه‌ ببیته‌ ئه‌گه‌رێ هندێ دادگه‌ها ئیرانێ بریاره‌ك وه‌سا گران بده‌ت، دڤێت دادگه‌ها ئیرانێ بریارا زیندانكرنا زارا محه‌مه‌دی هلوه‌شینیت و رێزێ ل داخوازیێن هه‌موو كوردان بگریت، چونكو ره‌وشا نها ل رۆژهه‌لاتێ كوردستانێ نیشا دده‌ت كو ب سالانه‌ ده‌ستهه‌لاتا ئیرانێ زۆرداریێ ل كوردان دكه‌ت و رێزێ ل داخوازیێن ره‌وا یێن گه‌لێ كورد ناگریت و نها ژی كورد ب رێیێن نوو داخوازا مافێن خوه‌ دكه‌ن.

ئه‌ڤرۆ:

په‌یڤدارێ پارتی دیموكراتی كوردستان راگه‌هاند، پارتی و ئێكه‌تی پرۆژه‌ك به‌رهه‌ڤكریه‌ و دخوازن بكه‌نه‌ كارنامه‌كا كوردستانی، بۆ وێ چه‌ندێ بۆ دانوستاندنان ل گه‌ل ئالیێن سیاسی ل به‌غدا به‌رچاڤ بكه‌ن. ئاشكراكر ژی، ئێكلاكرنا پۆستان دێ د كۆمبوونا مه‌كته‌بێن سیاسی یێن پارتی و ئێكه‌تی بریار ل سه‌ر هێته‌ دان.

مه‌حموود محه‌مه‌د، په‌یڤدار و ئه‌ندامێ مه‌كته‌با سیاسی یا پارتی د كۆنفرانسه‌كێ رۆژنامه‌ڤانی دا ل دۆر هاتنا شاندێ ره‌وتێ سه‌دری بۆ هه‌ولێرێ، گۆت” هاتنا شاندێ ره‌وتێ سه‌دری په‌یوه‌ندی ب وێ ئێكێ هه‌یه‌ كو بریاره‌ ل رۆژا 9/1/2022 ئێكه‌م كۆمبوونا خۆلا پێنجێ یا جڤاتا نوونه‌رێن ئیراقێ بهێته‌ كرن، هه‌روه‌سا پێشتر هنده‌ك لێكتێگه‌هشتن دناڤبه‌را پارتی و ره‌وتێ سه‌دری دا هه‌بوو، ل دۆر چاوانیا پێكئینانا حوكمه‌تا داهاتی یا ئیراقێ پێدڤیه‌ دناڤخوه‌دا ژی ل هه‌رێما كوردستانێ دانوستاندنان بكه‌ین، بۆ وێ مه‌به‌ستێ ژی دێ شاندێ مه‌ ل گه‌ل ئێكه‌تی نیشتمانی كوردستان كۆمبیت”.

گۆت ژی” كۆمبوونا پارتی و ئێكه‌تی ل رۆژا پێنجشه‌مبی، كۆمبوونا دو لژنایه‌، ئێك ژ لژنان یا تایبه‌ته‌ ب دانوستاندنێ ل گه‌ل به‌غدا، به‌حس ل وێ چه‌ندێ دێ هێته‌ كرن ئه‌و بابه‌تێن ل ڤێرێ كارنامه‌ ل سه‌ر دهێته‌ دروستكرن، كا بۆچوونا مه‌ دێ چ بیت بۆ حوكمه‌تا نوو یا ئیراقێ، هه‌روه‌سا ئه‌و مافێن هه‌رێما كوردستانێ ل به‌غدا هه‌ین، بابه‌تێن گرنگ یێن خه‌لكێ كوردستانێ د كارنامێ دا جهێن خوه‌ بگرن. د وێ كۆمبوونێ دا دێ دانوستاندن ل سه‌ر هه‌موو پرسان هێته‌ كرن”.

سه‌باره‌ت بجهئینانا رێككه‌فتنێ ژئالیێ ئالیێن سیاسی یێ ئیراقێ ڤه‌، په‌یڤدارێ پارتی گۆت” ل ده‌مێن بۆری هنده‌ك جاران ئه‌مریكا و بریتانیا ژی یێن ئیناین دناڤ رێككه‌فتنان دا بۆ وێ چه‌ندێ بهێته‌ بجهئینان، به‌لێ ل دووماهیێ نه‌هاتینه‌ بجهئینان، ئه‌و دزڤریت بۆ راستگۆییا ویان ئالیێن رێككه‌فتن دگه‌لدا دهێته‌ كرن، كا ئایا یێ پێگیره‌ ب رێككه‌فتن و سۆزێن دده‌ت، له‌وما گه‌ره‌نتی ئه‌وه‌ ئه‌و بابه‌تێن گرن گیێن چه‌ندین ساله‌ ماین، دناڤ كارناما مه‌ یا كوردستانی دا هه‌بیت و ب راشكاوی ل گه‌ل وان به‌حس بكه‌ین و ب جدی ل گه‌ل وان ل سه‌ر هێلێ بین”.

سه‌باره‌ت بۆچوونا ره‌وتێ سه‌دری، مه‌حموود محه‌مه‌د دبێژیت” ره‌وتێ سه‌دری به‌حسێ حوكمه‌تا زۆرینه‌یا نیشتمانی دكه‌ت، بۆچوونا مه‌ ئه‌وه‌ پێدڤیه‌ ده‌رگه‌ه و په‌نجه‌رێن وێ حوكمه‌تێ دڤه‌كری بن بۆ هه‌موو ئالیان و تێدا پشكدار ببن، به‌لێ ره‌وتێ سه‌دری ل گه‌ل وێ چه‌ندێ نه‌ كو تنێ ئه‌و ئالی پشكداربن كو د هه‌لبژارتنان دا ده‌نگێ زۆرینه‌ ئیناین، ب بۆچوونا وان ئۆپۆزسیۆنه‌كا ب هێز هه‌بیت ، دێ دیموكراسی چه‌سپیت. جوداهیا مه‌ ل گه‌ل وان ئه‌وه‌ كو تایبه‌تمه‌ندیا هه‌رێما كوردستانێ یا جودایه‌ ل گه‌ل به‌غدا، ژبلی وی نیشتمانێ مه‌ هه‌یه‌ وه‌كو كوردستان ئه‌م د پشكدارین ژی د وه‌لاتێ ئیراقێ دا، كۆمه‌كا كێشێن نه‌ته‌وی مه‌ یێن هه‌ین كو وان نینن، له‌وما پێدڤیه‌ ئه‌و چه‌نده‌ دناڤ كارناما مه‌دا هه‌بیت”.

ل دۆر جوداهیا د بۆچوونێن پارتی و ئێكه‌تیێ دا، په‌یڤدارێ پارتی گۆت” پرۆژه‌كێ كارنامه‌كا هه‌ڤپشك د ناڤبه‌را پارتی و ئێكه‌تی هاتیه‌ به‌رهه‌ڤكرن، مه‌ جوداهی ل سه‌ر وی بابه‌تی نینه‌، به‌لێ پێدڤیه‌ ب نووكرنێ یه‌ و كارنامێ بكه‌ینه‌ كارنامه‌كا كوردستانی، بۆ وێ ئێكێ خالێن گرنگ ل گه‌ل ئالیێن شیعی و سوننی یێن پشكدار د حوكمه‌تێ دا بجهبینین”.

دیاركر ژی” پۆس دێ د كۆمبوونێن مه‌كته‌بێن سیاسی یێن پارتی و ئێكه‌تی دا هێنه‌ ئێكلاكرن و كۆمبوونا پێنجشه‌مبی یا شاندێ پارتی و ئێكه‌تی دێ ل سه‌ر وێ كارنامێ بیت كو د دانوستاندنێن به‌غدا دا دێ به‌رچاڤ كه‌ن”.

ئه‌ڤرۆ:

بریاره‌ ل 9/1/2021 روونشتنا ئێكێ یا خۆلا پێنجێ یا جڤاتا نوونه‌رێن ئیراقێ ب رێڤه‌بچیت، به‌لێ هێشتا ئالیێن سوننی ل سه‌ر پۆستێ سه‌رۆكێ جڤاتا نوونه‌ران ئێكلا نه‌بووینه‌، گرفت د ناڤبه‌را هه‌ڤپه‌یمانیا (عه‌زم) و هه‌ڤپه‌یمانیا (ته‌قه‌دووم) هه‌بوون كو هه‌ر ئێك ژوان دخواست سه‌رۆكێ جڤاتا نوونه‌ران به‌هرا وی بیت.

مه‌شعان جبووری، ئه‌ندامێ هه‌ڤپه‌یمانیا (عه‌زم) و به‌ربژارێ سه‌ركه‌فتی د هه‌لبژارتنێن جڤاتا نوونه‌ران دا گۆت” ب چاڤدێریا سه‌رۆك مه‌سعود بارزانی رێككه‌فتین كو پشته‌ڤانیێ ل محه‌مه‌د حه‌لبووسی بكه‌ین كو جاره‌كادی ببیته‌ سه‌رۆكێ جڤاتا نوونه‌ران”.

مه‌شعانی گۆت ژی” هنده‌ك كه‌س دناڤ هه‌ڤپه‌یمانیا عه‌زم دا دێ ژ وێ رێككه‌فتنێ یاخی بن، د روونشتنا ئێكێ یا خۆلا نوو یا جڤاتا نوونه‌ران دێ خوه‌ به‌ربژار كه‌ن بۆ پۆستێ سه‌رۆكێ جڤاتێ و ئارمانجا وان ده‌نگ ب (حه‌لبووسی) نه‌ده‌ن یان ژی خوه‌ بۆ وی پۆستی به‌ربژار بكه‌ن، ئێك ژوان (سابت عه‌باسی) یه‌”.

د به‌رسڤا وان ئالیێن سه‌ركه‌فتی د هه‌لبژارتنان دا كو داخوازكریه‌ هه‌رسێ سه‌رۆكایه‌تیێن ئیراقێ بهێنه‌ گوهۆرین، ناڤبری ئاماژه‌ كر كو ئه‌و بۆچوونه‌ په‌یوه‌ندی یا ب ناڤمالا سوننی ڤه‌ هه‌ی كا دێ كێ به‌ربژاركه‌ن، ب هه‌مان شێوه‌ هه‌كه‌ ئالیێن شیعی ژی ل سه‌ر كه‌سه‌كی رێكبكه‌ڤن، سوننه‌یان هیچ لاریبوونه‌ك نابیت”.

د ده‌مه‌كی دا بریاره‌ ل رۆژا 9 ڤێ هه‌یڤێ كۆمبوونا ده‌ستپێكی یا خۆلا نوو یا جڤاتا نوونه‌ران بهێته‌ ئه‌نجامدان، هه‌تا نوكه‌ ب فه‌رمی به‌ربژارێ پۆستێ سه‌رۆكێ جڤاتا نوونه‌ران دناڤمالا سووننی دا ب دیاركری ژی د ناڤبه‌را هه‌ردو هه‌ڤپه‌یمانیێن (عه‌زم) ب سه‌رۆكایه‌تیا خه‌میس خه‌نجه‌ر و (ته‌قه‌دووم) ب سه‌رۆكایه‌تیا محه‌مه‌د حه‌لبووسی ئێكلا نه‌بوویه‌، به‌لێ ئه‌گه‌ره‌كێ ب هێ زیێ هه‌ی جاره‌كادی حه‌لبووسی ببیته‌ سه‌رۆكێ جڤاتا نوونه‌ران.

خالد ئه‌لده‌بوونی، په‌یڤدارێ به‌ره‌یێ رزگاری و گه‌شه‌پێدانێ یا سوونی دبێژیت” هه‌تا نوكه‌ ب رۆهنی لێكتێگه‌هشتن دناڤبه‌را هه‌ردو هه‌ڤپه‌یمانیێن عه‌زم و ته‌قه‌دووم نه‌هاتیه‌ راگه‌هاندن، هه‌ردو محه‌مه‌د حه‌لبووسی و خه‌میس خه‌نجه‌ر چه‌ندین جاران یێن كومبووین و وان یا راگه‌هاندی كوی ێن گه‌هشتینه‌ لێكتێگه‌هشتنێ”.

ئه‌حمه‌د مه‌زهه‌ر، ئه‌ندامێ هه‌ڤپه‌یمانیا ته‌قه‌دووم ب سه‌رۆكایه‌تیا محه‌مه‌د حه‌لبووسی و به‌ربژارێ سه‌ركه‌فتی د هه‌لبژارتنێن جڤاتا نوونه‌ران دا راگه‌هاند” پۆستێ سه‌رۆكێ جڤاتا نوونه‌ران یێ ئێكلابووی، ئه‌م ل گه‌ل هه‌ڤپه‌یمانیا (عه‌زم) یێن رێككه‌فتین كو محه‌مه‌د حه‌لبووسی به‌ربژار بیت بۆ پۆستێ سه‌رۆكێ جڤاتا نوونه‌ران ب گۆره‌ی وێ چه‌ندێ كو هه‌ڤپه‌یمانیا (ته‌قه‌دووم) پتریا كورسیێن سوننه‌یان ب ده‌ستڤه‌ئیناینه‌، هه‌روه‌سا خه‌میس خه‌نجه‌ر ژی به‌ربژارێ مه‌یه‌ بۆ پۆستێ جێگرێ سه‌رۆك كۆماری”.

هه‌ڤپه‌یمانیا حه‌لبووسی د هه‌لبژارتنان دا 37 كورسی بده‌ستڤه‌ئینان و زێده‌تر ژ ره‌وتێ سه‌در یێ نێزیكه‌، هه‌ڤپه‌یمانیا خه‌میس خه‌نجه‌ر ژی 14 كورسی ب ده‌ستڤه‌ئیناینه‌ و پتر یێ نێزیكه‌ ژ هێزێن شیعی یێن دناڤ (چارچۆڤێ هه‌ماهه‌نگیێ) دا.