ئه‌ڤرۆ نيوز:

هێشتا پارتى ديموكراتى كوردستان ل پارێزگه‌ها سلێمانيێ و ئيدارا گه‌رميان باره‌گايێن خوه‌ ژ هێزێن ئه‌منى وه‌رنه‌گرتينه‌، ده‌رباره‌ى نووژه‌نكرنا ئه‌و زيانێن ب باره‌گايێن وان كه‌فتين، پارتى چاڤه‌رێ بڕيارا دادگه‌هێ يه‌، كا دێ ئه‌و نووژه‌ن كه‌ن يان ژى حوكمه‌ت.

پشتى خونيشاندانێن قه‌لادزێ ل شه‌ڤا 9ى چريا ئێكێ يا 2015ێ ئالوزى په‌يدا بووين و كوشتى و بريندار ل دووڤ خوه‌نيشاندانان كه‌فتين، هه‌ر وێ شه‌ڤێ هێرش كره‌ سه‌ر باره‌گايێ ناوچا پارتى و سوت، رۆژا پاشتر خوه‌نيشاندان به‌رفره‌هتر لێ هاتن و ئه‌و هێرش ژى به‌رفره‌هتر لێ هاتن و هنده‌ك باره‌گايێن دى ژى يێن پارتى سوتن و به‌رده‌وام خوه‌نيشاندان به‌رفره‌هـ بوون و سه‌ركرداتيا پارتى ژى ل سلێمانيێ بڕيار دا ئه‌و باره‌گايێن وێ يێن ل سلێمانيێ راده‌ستى هێزێن ئه‌منى بكه‌ت.

ل سنورێ جڤاتا سه‌ركرداتيا پارتى ل پارێزگه‌ها سلێمانيێ لقێن چار ل ناڤ باژێرێ سلێمانيێ، 21ێ دوروبه‌رێن سلێمانيێ و 11ێ رانيێ و 12ێ هه‌له‌بچه‌يا شه‌هيد يێن هه‌ين. ديسا لقێن 19ێ چه‌مچه‌مال و 22ێ گه‌رميان سه‌ر ب جڤاتا سه‌ركرداتيا كه‌ركووك – گه‌رميانن. لقێن چار و 11 و 21 و 22 هه‌ر ئێك ژ هه‌شت ناوچان پێك دهێت و لقێ 12ێ ژى 11 ناوچه‌ و لقێ 19ێ ژى 9 ناوچه‌ يێن هه‌ين.

ب گشتى 46 باره‌گايێن پارتى يێن ل سنورێ جڤاتا سه‌ركرداتيا پارتى ل سلێمانيێ و كه‌ركووك – گه‌رميان راده‌ستى هێزێن ئه‌منى كرين و هه‌تا نوكه‌ وه‌رنه‌گرتينه‌.

ب گۆره‌يى ئه‌و پێزانينێن ل به‌ر ده‌ست زيانێن ل كه‌لار ب تنێ ب باره‌گايێ پارتى ديموكراتى كوردستان كه‌فتين ب بهايێ 80 هزار دۆلارانه‌، سه‌ركرداتيا پارتى ديموكراتى كوردستان لژنه‌ك ژى پێكئينايه‌ و پشتى زانينا زيانا دێ سكالايێ تۆمار كه‌ن.

فارس نه‌رۆلى، ئاخفتنكه‌رێ ب ناڤێ جڤاتا سه‌ركرداتيا پارتى ديموكراتى كوردستان ل سلێمانيێ بۆ رووداو گۆت: “دێ چاڤه‌رێ بڕيارا دادگه‌هێ كه‌ين كا ئايا ئه‌م دێ وان باره‌گايان نووژه‌ن كه‌ين يان ژى دێ حوكمه‌ت نووژه‌ن كه‌ت”.

ئه‌ڤرۆ نيوز:

پەیڤدارێ جڤاتا کۆمیسارێن ھەرێما کوردستانێ دیار کر، دێ دەست ب جوداکرنا فۆرمێن دامەزراندنێ بۆ کۆمسیونێ کەن و دبێژیت: “کەسوکارێن شەھیدان د دامەزراندنا کۆمسیونێ دا دێ خالێن پتر وەرگرن”.
شێروان زرار، پەیڤدارێ جڤاتا کۆمیسارێن ھەرێما کوردستانێ راگەھاند، ھەموو فۆرمە د داتابێسەکی ھاتینە دانان کو ب بەرنامەکێ تایبەت ھاتیە رێکخستن و بۆ مالپەرێ فەرمیێ پارتی گۆت: “مە کار ل سەر کریە، لێ ژ بەر کو ھژمارەکا ناڤێن دوبارە د ناڤ دا ھەنە، ھندەک کەسان چەندین جاران و ب شێوازێن جودا فۆرمە پێشکێش کرینە، لەو دڤێت وان ناڤان ژێ ببەین و ب تنێ ناڤێ راستەقینە بھێلین”.
خویا ژی کر، پشتی ئەڤ کارە دھێتە کرن دێ دەست ب جوداکرنا فۆرمان ھێتە کرن، ئەو کەسێن فۆرما دامەزراندنێ پێشکێشکرین، ھەکە کەسوکارێن شەھیدان بن، د دەمێ دامەزراندنێ دا خالان دێ وەرگرن.
کۆمسیونا بلند یا سەربخوە یا ھەلبژارتن و ڕاپرسیێ ل ھەرێما کوردستانێ پێدڤی ب دامەزراندنا ٥٣٥ کارمەندان د بسپۆریێن جودا دا ل ھەر چار پارێزگەھێن ھەرێمێ ھەیە و نێزیکی ١٠٨ ھزار کەسان ژی فۆرمە پێشکێشکرینە.

ئه‌ڤرۆ نيوز:

سەرۆکێ کۆتلا برایەتی و پێکڤەژیانێ ل جڤاتا پارێزگەھا نەینەوا بۆ ئەڤرۆ دیار کر کو دوھی ١-١١-٢٠١٥ ل ئاڤاھیێ جڤاتا پارێزگەھا نەینەوا ل ئەلقوش دەست ب ھەلبژارتنان ھاتە کرن بۆ دەستنیشانکرنا کەسەکی ل شوینا میەسەر حەجی قائیمقامێ قەزا شنگال و گۆت “مەحما خەلیل وەکو قائیمقامێ نوو یێ شنگالێ ھاتە ھەلبژارتن”.
سەیدو چەتو سەرۆکێ کۆتلا برایەتیی و پێکڤەژیانێ ل جڤاتا پارێزگەھا نەینەوا بۆ رۆژناما ئەڤرۆ دیار کر کو مەحما خەلیل شیا ١٤ دەنگان ب دەست خوەڤە بینت و پۆستێ قائیمقامیا قەزا شنگال وەربگریت و گۆت “د بەرامبەرا چ ھەڤڕکێن دی نەبوون بۆ وەرگرتنا پۆستی قائیمقامیا قەزا شنگال”.
سەرۆکێ کۆتلا برایەتی و پێکڤەژیانێ ل جڤاتا پارێزگەھا نەینەوا خویا ژی کر کو ھەلبژارتن ب حازربوونا دادوەرکی د ناڤبەرا ئەندامێن جڤاتا پارێزگەھا نەینەوا دا ھاتنە ئەنجامدان و گۆت “ب تنی مەحما خەلیل بەربژێرێ پۆستی قائیمقامێ قەزا شنگال بوو و پشتی دەنگدان ھاتیە کرن و مەحما خەلیل بوویە قائیمقامێ شنگال دێ رازیبوونا پارێزگارێ نەینەوا و جڤاتا نەینەوا ھێتە وەرگرتن و دێ دەست بکاری خوە کەت”.
سەیدو چەتو گۆت ژی “قائیمقامێ بەرێ یێ قەزا شنگال میەسەر حەجی خزمەتەکا مەزن بۆ دەڤەرا شنگال ئەنجام دایە و ئەم ھیڤدارین قائیمقامێ نوو زێدەتر خزمەتا شنگال بکەت”.