ئه‌ڤرۆ نيوز:

وەزیرێ دەرڤە یێ ئەلمانیا د پرێس کۆنفرانسەکی دا راگەھاند کو ئەو وەک ئەلمانیا باش دبینن کو بۆ چارەکرنا قەیرانا سووریێ ل گەل سەرۆکێ رژێمێ بەشار ئەسەدی ژی دانوستاندن بھێنە کرن و ھەروەسا دیار کر ئەو ژ تورکیا ژی دخوازن کو ئۆپەراسیۆنێن ل دژی کوردان بدەتە راوەستاندن و ب دانوستاندنان پرسگرێکا کوردی چارە بکەت، چونکو کورد ھەڤپەیمانێ مە نە و دڤێت پتر ھاریکاریا وان بھێتە کرن.

وەزیرێ دەرڤە یێ ئەلمانیا ل باژێرێ بەرلین یێ پایتەختێ ئەلمانیا پرێس کۆنفرانسەک ساز کر و راگەھاند کو ژ بەر شەرێ ل سووریێ و کریارێن رژێمێ و رێکخستنێن تیرۆرست ب ملیۆنان خەلکێ سووریێ نەچار ماینە ژ وەلاتێن خوە کۆچبەر ببن و گۆت: (دڤێت جیھانا پێشکەڤتی و ب تایبەت وەلاتێن ھەڤپەیمانێن ل دژی تیرۆرێ جارەکا دی رەوشا سووریێ گەنگەشە بکەن و نەخشەیا ئارامکرنا سووریێ دانن، بۆ ڤێ چەندێ ژی ل دووڤ ھزرا مە باشە کو ل گەل بەشار ئەسەدی سەرۆکێ رژێما سووریێ ژی دانوستاندن بھێنە کرن و حوکمەتەکا بەرفرەە و ب ھێز ل سەر ئاخا سووریێ بھێتە ئاڤاکرن کو بەشار ئەسەد و نوونەرێن رژێمێ و یێن کوردان و ئۆپۆزسیۆنێ تێدا جیە بگرن).
وەزیرێ دەرڤە یێ ئەلمانیا د پشکەکا دی یا ئاخڤتنا خوە دا ژی راگەھاند کو نە ب تنێ ل سووریێ و عیراقێ، بەلکو ل ھژمارەک زێدە وەلاتێن رۆژھەلاتا ناڤین و ئەفریقیا پرسگرێکا تیرۆرێ ھەیە و رێکخستنێن تیرۆرست مەترسیێ ل سەر ھەموو جیھانێ دروست دکەن و گۆت: (دڤێت ئەم چارەیەکا بنگەھین پەیدا بکەین و تیرۆرێ ل گەل وارێ سەربازی د وارێن رێکخستنێ، دارایی و پەیوەندیان دا ژی ژناڤ ببەین و پاشی کار بۆ مەزنکرنا دیمۆکراسیێ ل وەلاتێن رۆژەھلاتا ناڤین و ئەفریقیا بکەین و دڤێت ئەڤە کارێ مە یێ سەرەکی بیت).
ل سەر رۆلێ کوردان د شەرێ ل دژی داعشێ دا ژی وەزیرێ دەرڤە یێ ئەلمانیا راگەھاند کو ب راستی ھەم ل عیراقێ و ھەرێما کوردستانێ و ھەم ژی ل سووریێ و رۆژئاڤایێ کوردستانێ رۆلێ پێشمەرگە و شەرڤانێن کورد د شکەستنا داعشێ دا رۆلەکێ گەلەک مەزن و کاریگەر بوویە و گۆت: (ئەم ل گەل ڤێ چەندێ نە ل گەل کوردان ل عیراقێ و سووریێ ھەڤپەیمانیەکا ستراتیژی بھێتە دانان و د وارێن سەربازی، سیاسی، ئابووری و پێدڤیێن کۆچبەران دا ھەڤکاریا وان بھێتە کرن، ژ بەر کو یێن ل سەر ئەردێ د شەرێ ل دژی تیرۆرستان دا پێشەنگن ھێزێن کوردی نە و دڤێت ئەم وان ب تنێ نەھێلین).
ل سەر رەوشا تورکیا و پەیوەندیێن ئەلمانیا ب تورکیا را ژی، فرانک والتەر شتانمایەر وەزیرێ دەرڤە یێ ئەلمانیا راگەھاند کۆ بۆ وان گەلەک باش بوو دەما حوکمەتا تورکیا ب کوردان را دەست ب قۆناغا ئاشتیێ کر و ھێڤیا مە ژی بۆ سەرکەڤتنا قۆناغا ئاشتیێ ل تورکیا ھەبو و گۆت: (پەیوەندیێن مە ل گەل تورکیا د ئاستەکی باش دانە و ئەم دخوازن ھەردەم پەیوەندیێن مە د گەشەپێدانێ دا بن، لێ ھندەک جاران ژ بەر ھندەک خالان ئەم رەخنە ل تورکیا دگرین و ب تایبەت ژی د وارێن مافێن کوردان و مافێ مرۆڤی دا).
د دووماھیا ئاخڤتنا خوە دا ژی وەزیرێ دەرڤە یێ ئەلمانیا دیار کر بۆمبەبارانکرنا ئاخا ھەرێما کوردستانێ و بەرفرەھکرنا ئۆپەراسیۆنێن سەربازی و گرتنا سیاسەتمەدارێن کورد نە کارێن راستن و زیانێ دگەھیننە تورکیا ب خوە ژی، بۆ ڤێ چەندێ داخوازا ئورۆپا و ئەلمانیا ژ تورکیا ئەڤەیە کو شەری راوەستینیت و جارەکا دی ڤەگەریتە ڤە بۆ سەر مێزا دانوستاندنان و گۆت: (ل گەل رەخنەکرنا تورکیا رەخنەیێن مە یێن گەلەک دژوار بۆ PKK ژی ھەنە و دڤێت PKK بێی مەرج خوە ژ مەیدانا شەری دوور بکەت و ڤەگەریتە بۆ رەوشا خوە یا سێ ھەیڤ بەری نھا و ب دیالۆگ و ئاشتیێ ل چارەیەکا گونجای بگەریت و ل سەر مێزا دانوستاندنان ل گەل حوکمەتا تورکیا پرسێن خوە چارە بکەت).

ئەڤرۆ نیۆز، قائید میرۆ:
ئەندامەکێ بەرێ یێ پەرلەماني عێراقێ ئاش کراکر، ئەف شەڕێ نوکە ل دەڤەرێ دھێنەکرن شەڕێ جیھانیێ سیێ یە، بەلێ ھێشتا خەلکی ب دروستی ھەست پێ نەکریە.
مەھدی حاجی، پەرلەمانتارێ بەرێ یێ پارتی دیموکراتی کوردستان بۆ ئەڤرۆ نیۆز راگەھاند” ئەف شەڕێ نوکە دھێتە رێڤەبرن شەڕێ جیھانیێ یێ سیێ یە، بەلێ ھێشتا خەلکی ھەست پێ نەکریە و ئەگەر ھەڤڕکیێن ناڤبەرا رۆسیا و ئەمریکا بەردەوامبن ئەڤە دێ شەڕەکێ مەزنتر روو دەت، مەرج نینە ئەف شەڕە تنێ یێ سەربازی بیت بەلکۆ شەڕێ سار ژی یێ دھێتەکرن.
حاجی گۆتژی” پێشبینیا مەترسیەکا مەزن دھێتەکرن لڤان گۆھۆڕینێن رۆژھەلاتا ناڤین ڤەگرتی، چونکو دەڤەر بۆیە دو میحوەر ئەوژی میحوەرێ رۆسیا و میحوەرێ ئەمریکا.